໗. ເປສວຕີວິມານວຕ຺ຖຸ

໖໔໖. ‘‘ຜລິກຣຊຕເຫມຊາລຉນ຺ນໍ, ວິວິຘຈິຕ຺ຣຕລມທ຺ທສໍ ສຸຣມ຺ມໍ;

ພ຺ຍມ຺ຫໍ ສຸນິມ຺ມິຕໍ ໂຕຣຓູປປນ຺ນໍ, ຣຸຈກຸປກິຓ຺ຓມິທໍ ສຸຠໍ ວິມານໍ.

໖໔໗. ‘‘ຠາຕິ ຈ ທສ ທິສາ ນເຠວ ສຸຣິໂຍ, ສຣເທ ຕໂມນຸໂທ ສຫສ຺ສຣໍສີ;

ຕຖາ ຕປຕິມິທໍ ຕວ ວິມານໍ, ຊລມິວ ຘູມສິໂຂ ນິເສ ນຠຄ຺ເຄ.

໖໔໘. ‘‘ມຸສຕີວ ນຍນໍ ສເຕຣຕາວ [ສເຕຣິຕາວ (ສ຺ຍາ. ກ.)], ອາກາເສ ຐປິຕມິທໍ ມນຸຎ຺ຎໍ;

ວີຓາມຸຣຊສມ຺ມຕາຬຆຸຏ຺ຐໍ, ອິທ຺ຘໍ ອິນ຺ທປຸຣໍ ຍຖາ ຕເວທໍ.

໖໔໙. ‘‘ປທຸມກຸມຸທຸປ຺ປລກຸວລຍໍ, ໂຍຘິກ [ຍູຘິກ (ສີ.)] ພນ຺ຘຸກໂນຊກາ [ໂຍຖິກາ ຠຓ຺ຑິກາ ໂນຊກາ (ສ຺ຍາ.)] ຈ ສນ຺ຕິ;

ສາລກຸສຸມິຕປຸປ຺ຜິຕາ ອໂສກາ, ວິວິຘທຸມຄ຺ຄສຸຄນ຺ຘເສວິຕມິທໍ.

໖໕໐. ‘‘ສຬລລພຸຊຠຸຊກ [ສຸຊກ (ສີ. ສ຺ຍາ.)] ສໍຍຸຕ຺ຕາ [ສຎ຺ຎຕາ (ສີ.)], ກຸສກສຸຜຸລ຺ລິຕລຕາວລມ຺ພິນີຫິ;

ມຓິຊາລສທິສາ ຍສສ຺ສິນີ, ຣມ຺ມາ ໂປກ຺ຂຣຓີ ອຸປຏ຺ຐິຕາ ເຕ.

໖໕໑. ‘‘ອຸທກຣຸຫາ ຈ ເຍຕ຺ຖິ ປຸປ຺ຜຊາຕາ, ຖລຊາ ເຍ ຈ ສນ຺ຕິ ຣຸກ຺ຂຊາຕາ;

ມານຸສກາມານຸສ຺ສກາ ຈ ທິພ຺ພາ, ສພ຺ເພ ຕຸຍ຺ຫໍ ນິເວສນມ຺ຫິ ຊາຕາ.

໖໕໒. ‘‘ກິສ຺ສ ສໍຍມທມສ຺ສຍໍ ວິປາໂກ, ເກນາສິ ກມ຺ມຜເລນິຘູປປນ຺ນາ;

ຍຖາ ຈ ເຕ ອຘິຄຕມິທໍ ວິມານໍ, ຕທນຸປທໍ ອວຈາສິຬາຣປມ຺ເຫ’’ຕິ [ປຂຸເມຕິ (ສີ.)].

໖໕໓. ‘‘ຍຖາ ຈ ເມ ອຘິຄຕມິທໍ ວິມານໍ, ໂກຎ຺ຈມຍູຣຈໂກຣ [ຈງ຺ໂກຣ (ກ.)] ສງ຺ຆຈຣິຕໍ;

ທິພ຺ຍ [ທິພ຺ພ (ສີ. ປີ.)] ປິລວຫໍສຣາຊຈິຓ຺ຓໍ, ທິຊກາຣຓ຺ຑວໂກກິລາຠິນທິຕໍ.

໖໕໔. ‘‘ນານາສນ຺ຕານກປຸປ຺ຜຣຸກ຺ຂວິວິຘາ, ປາຏລິຊມ຺ພຸອໂສກຣຸກ຺ຂວນ຺ຕໍ;

ຍຖາ ຈ ເມ ອຘິຄຕມິທໍ ວິມານໍ, ຕໍ ເຕ ປເວທຍາມິ [ປວທິສ຺ສາມິ (ສີ.), ປເວທິສ຺ສາມິ (ປີ.)] ສຸໂຓຫິ ຠນ຺ເຕ.

໖໕໕. ‘‘ມຄຘວຣປຸຣຕ຺ຖິເມນ, ນາຬກຄາໂມ ນາມ ອຕ຺ຖິ ຠນ຺ເຕ;

ຕຕ຺ຖ ອໂຫສິໍ ປຸເຣ ສຸຓິສາ, ເປສວຕີຕິ [ເສສວຕີຕິ (ສີ. ສ຺ຍາ.)] ຕຕ຺ຖ ຊານິໍສຸ ມມໍ.

໖໕໖. ‘‘ສາຫມປຈິຕຕ຺ຖຘມ຺ມກຸສລໍ, ເທວມນຸສ຺ສປູຊິຕໍ ມຫນ຺ຕໍ;

ອຸປຕິສ຺ສໍ ນິພ຺ພຸຕມປ຺ປເມຍ຺ຍໍ, ມຸທິຕມນາ ກຸສຸເມຫິ ອພ຺ຠຸກິຣິໍ [ອພ຺ໂຠກິຣິໍ (ສີ. ສ຺ຍາ. ປີ. ກ.)].

໖໕໗. ‘‘ປຣມຄຕິຄຕຎ຺ຈ ປູຊຍິຕ຺ວາ, ອນ຺ຕິມເທຫຘຣໍ ອິສິໍ ອຸຬາຣໍ;

ປຫາຍ ມານຸສກໍ ສມຸສ຺ສຍໍ, ຕິທສຄຕາ ອິຘ ມາວສາມິ ຐານ’’ນ຺ຕິ.

ເປສວຕີວິມານໍ ສຕ຺ຕມໍ.