໔. ສກຸລາເຖຣີອປທານໍ

໑໓໑. ‘‘ປທຸມຸຕ຺ຕໂຣ ນາມ ຊິໂນ, ສພ຺ພຘມ຺ມານ ປາຣຄູ;

ອິໂຕ ສຕສຫສ຺ສມ຺ຫິ, ກປ຺ເປ ອຸປ຺ປຊ຺ຊິ ນາຍໂກ.

໑໓໒. ‘‘ຫິຕາຍ ສພ຺ພສຕ຺ຕານໍ, ສຸຂາຍ ວທຕໍ ວໂຣ;

ອຕ຺ຖາຍ ປຸຣິສາຊຎ຺ໂຎ, ປຏິປນ຺ໂນ ສເທວເກ.

໑໓໓. ‘‘ຍສຄ຺ຄປຕ຺ໂຕ ສິຣິມາ, ກິຕ຺ຕິວຓ຺ຓຄໂຕ ຊິໂນ;

ປູຊິໂຕ ສພ຺ພໂລກສ຺ສ, ທິສາສພ຺ພາສຸ ວິສ຺ສຸໂຕ.

໑໓໔. ‘‘ອຸຕ຺ຕິຓ຺ຓວິຈິກິຈ຺ໂຉ ໂສ, ວີຕິວຕ຺ຕກຖໍກໂຖ;

ສມ຺ປຸຓ຺ຓມນສງ຺ກປ຺ໂປ, ປຕ຺ໂຕ ສມ຺ໂພຘິມຸຕ຺ຕມໍ.

໑໓໕. ‘‘ອນຸປ຺ປນ຺ນສ຺ສ ມຄ຺ຄສ຺ສ, ອຸປ຺ປາເທຕາ ນຣຸຕ຺ຕໂມ;

ອນກ຺ຂາຕຎ຺ຈ ອກ຺ຂາສິ, ອສຎ຺ຊາຕຎ຺ຈ ສຎ຺ຊນີ.

໑໓໖. ‘‘ມຄ຺ຄຎ຺ຎູ ຈ ມຄ຺ຄວິທູ, ມຄ຺ຄກ຺ຂາຍີ ນຣາສໂຠ;

ມຄ຺ຄສ຺ສ ກຸສໂລ ສຕ຺ຖາ, ສາຣຖີນໍ ວຣຸຕ຺ຕໂມ.

໑໓໗. ‘‘ມຫາກາຣຸຓິໂກ ສຕ຺ຖາ, ຘມ຺ມໍ ເທເສສິ ນາຍໂກ;

ນິມຸຄ຺ເຄ ກາມປງ຺ກມ຺ຫິ, ສມຸທ຺ຘຣຕິ ປາຓິເນ.

໑໓໘. ‘‘ຕທາຫໍ ຫໍສວຕິຍໍ, ຊາຕາ ຂຕ຺ຕິຍນນ຺ທນາ;

ສຸຣູປາ ສຘນາ ຈາປິ, ທຍິຕາ ຈ ສິຣີມຕີ.

໑໓໙. ‘‘ອານນ຺ທສ຺ສ ມຫາຣຎ຺ໂຎ, ຘີຕາ ປຣມໂສຠຓາ;

ເວມາຕາ [ເວມາຕຸ (ສີ.)] ຠຄິນີ ຈາປິ, ປທຸມຸຕ຺ຕຣນາມິໂນ.

໑໔໐. ‘‘ຣາຊກຎ຺ຎາຫິ ສຫິຕາ, ສພ຺ພາຠຣຓຠູສິຕາ;

ອຸປາຄມ຺ມ ມຫາວີຣໍ, ອສ຺ໂສສິໍ ຘມ຺ມເທສນໍ.

໑໔໑. ‘‘ຕທາ ຫິ ໂສ ໂລກຄຣຸ, ຠິກ຺ຂຸນິໍ ທິພ຺ພຈກ຺ຂຸກໍ;

ກິຕ຺ຕຍໍ ປຣິສາມຊ຺ເຌ [ຈຕຸປຣິສາຍ ມຊ຺ເຌ (ສ຺ຍາ.)], ອຄ຺ຄຏ຺ຐາເນ ຐເປສິ ຕໍ.

໑໔໒. ‘‘ສຸຓິຕ຺ວາ ຕມຫໍ ຫຏ຺ຐາ, ທານໍ ທຕ຺ວານ ສຕ຺ຖຸໂນ;

ປູຊິຕ຺ວານ ຈ ສມ຺ພຸທ຺ຘໍ, ທິພ຺ພຈກ຺ຂຸໍ ອປຕ຺ຖຍິໍ.

໑໔໓. ‘‘ຕໂຕ ອໂວຈ ມໍ ສຕ຺ຖາ, ‘ນນ຺ເທ ລຈ຺ຉສິ ປຕ຺ຖິຕໍ;

ປທີປຘມ຺ມທານານໍ, ຜລເມຕໍ ສຸນິຈ຺ຉິຕໍ.

໑໔໔. ‘‘‘ສຕສຫສ຺ສິໂຕ ກປ຺ເປ, ໂອກ຺ກາກກຸລສມ຺ຠໂວ;

ໂຄຕໂມ ນາມ ໂຄຕ຺ເຕນ, ສຕ຺ຖາ ໂລເກ ຠວິສ຺ສຕິ.

໑໔໕. ‘‘‘ຕສ຺ສ ຘມ຺ເມສຸ ທາຍາທາ, ໂອຣສາ ຘມ຺ມນິມ຺ມິຕາ;

ສກຸລາ ນາມ ນາເມນ [ສກຸລາຕິ ຈ ນາເມນ (ສ຺ຍາ.)], ເຫສ຺ສຕິ ສຕ຺ຖຸ ສາວິກາ’.

໑໔໖. ‘‘ເຕນ ກມ຺ເມນ ສຸກເຕນ, ເຈຕນາປຓິຘີຫິ ຈ;

ຊຫິຕ຺ວາ ມານຸສໍ ເທຫໍ, ຕາວຕິໍສມຄຈ຺ຉຫໍ.

໑໔໗. ‘‘ອິມມ຺ຫິ ຠທ຺ທເກ ກປ຺ເປ, ພ຺ຣຫ຺ມພນ຺ຘຸ ມຫາຍໂສ;

ກສ຺ສໂປ ນາມ ໂຄຕ຺ເຕນ, ອຸປ຺ປຊ຺ຊິ ວທຕໍ ວໂຣ.

໑໔໘. ‘‘ປຣິພ຺ພາຊກິນີ ອາສິໍ, ຕທາຫໍ ເອກຈາຣິນີ;

ຠິກ຺ຂາຍ ວິຈຣິຕ຺ວານ, ອລຠິໍ ເຕລມຕ຺ຕກໍ.

໑໔໙. ‘‘ເຕນ ທີປໍ ປທີເປຕ຺ວາ, ອຸປຏ຺ຐິໍ ສພ຺ພສໍວຣິໍ;

ເຈຕິຍໍ ທ຺ວິປທຄ຺ຄສ຺ສ [ທິປທຄ຺ຄສ຺ສ (ສີ. ສ຺ຍາ. ປີ.)], ວິປ຺ປສນ຺ເນນ ເຈຕສາ.

໑໕໐. ‘‘ເຕນ ກມ຺ເມນ ສຸກເຕນ, ເຈຕນາປຓິຘີຫິ ຈ;

ຊຫິຕ຺ວາ ມານຸສໍ ເທຫໍ, ຕາວຕິໍສມຄຈ຺ຉຫໍ.

໑໕໑. ‘‘ຍຕ຺ຖ ຍຕ຺ຖູປປຊ຺ຊາມິ, ຕສ຺ສ ກມ຺ມສ຺ສ ວາຫສາ;

ປຊ຺ຊລນ຺ຕິ [ສຎ຺ຊລນ຺ຕິ (ສ຺ຍາ. ກ.), ສໍຈຣນ຺ຕິ (ປີ.)] ມຫາທີປາ, ຕຕ຺ຖ ຕຕ຺ຖ ຄຕາຍ ເມ.

໑໕໒. ‘‘ຕິໂຣກຸຏ຺ຏໍ ຕິໂຣເສລໍ, ສມຕິຄ຺ຄຍ຺ຫ ປພ຺ພຕໍ;

ປສ຺ສາມຫໍ ຍທິຈ຺ຉາມິ, ທີປທານສ຺ສິທໍ ຜລໍ.

໑໕໓. ‘‘ວິສຸທ຺ຘນຍນາ ໂຫມິ, ຍສສາ ຈ ຊລາມຫໍ;

ສທ຺ຘາປຎ຺ຎາວຕີ ເຈວ, ທີປທານສ຺ສິທໍ ຜລໍ.

໑໕໔. ‘‘ປຈ຺ຉິເມ ຈ ຠເວ ທານິ, ຊາຕາ ວິປ຺ປກຸເລ ອຫໍ;

ປຫູຕຘນຘຎ຺ຎມ຺ຫິ, ມຸທິເຕ ຣາຊປູຊິເຕ.

໑໕໕. ‘‘ອຫໍ ສພ຺ພງ຺ຄສມ຺ປນ຺ນາ, ສພ຺ພາຠຣຓຠູສິຕາ;

ປຸຣປ຺ປເວເສ ສຸຄຕໍ, ວາຕປາເນ ຐິຕາ ອຫໍ.

໑໕໖. ‘‘ທິສ຺ວາ ຊລນ຺ຕໍ ຍສສາ, ເທວມນຸສ຺ສສກ຺ກຕໍ;

ອນຸພ຺ຍຎ຺ຊນສມ຺ປນ຺ນໍ, ລກ຺ຂເຓຫິ ວິຠູສິຕໍ.

໑໕໗. ‘‘ອຸທຄ຺ຄຈິຕ຺ຕາ ສຸມນາ, ປພ຺ພຊ຺ຊໍ ສມໂຣຈຍິໍ;

ນ ຈິເຣເນວ ກາເລນ, ອຣຫຕ຺ຕມປາປຸຓິໍ.

໑໕໘. ‘‘ອິທ຺ຘີສຸ ຈ ວສີ ໂຫມິ, ທິພ຺ພາຍ ໂສຕຘາຕຸຍາ;

ປຣຈິຕ຺ຕານິ ຊານາມິ, ສຕ຺ຖຸສາສນກາຣິກາ.

໑໕໙. ‘‘ປຸພ຺ເພນິວາສໍ ຊານາມິ, ທິພ຺ພຈກ຺ຂຸ ວິໂສຘິຕໍ;

ເຂເປຕ຺ວາ ອາສເວ ສພ຺ເພ, ວິສຸທ຺ຘາສິໍ ສຸນິມ຺ມລາ.

໑໖໐. ‘‘ປຣິຈິຓ຺ໂຓ ມຍາ ສຕ຺ຖາ, ກຕໍ ພຸທ຺ຘສ຺ສ ສາສນໍ;

ໂອຫິໂຕ ຄຣຸໂກ ຠາໂຣ, ຠວເນຕ຺ຕິ ສມູຫຕາ.

໑໖໑. ‘‘ຍສ຺ສຕ຺ຖາຍ ປພ຺ພຊິຕາ, ອຄາຣສ຺ມານຄາຣິຍໍ;

ໂສ ເມ ອຕ຺ໂຖ ອນຸປ຺ປຕ຺ໂຕ, ສພ຺ພສໍໂຍຊນກ຺ຂໂຍ.

໑໖໒. ‘‘ຕໂຕ ມຫາກາຣຸຓິໂກ, ເອຕທຄ຺ເຄ ຐເປສິ ມໍ;

ທິພ຺ພຈກ຺ຂຸການໍ ອຄ຺ຄາ, ສກຸລາຕິ ນຣຸຕ຺ຕໂມ.

໑໖໓. ‘‘ກິເລສາ ຌາປິຕາ ມຍ຺ຫໍ…ເປ… ວິຫຣາມິ ອນາສວາ.

໑໖໔. ‘‘ສ຺ວາຄຕໍ ວຕ ເມ ອາສິ…ເປ… ກຕໍ ພຸທ຺ຘສ຺ສ ສາສນໍ.

໑໖໕. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ສກຸລາ ຠິກ຺ຂຸນີ ອິມາ ຄາຖາໂຍ ອຠາສິຕ຺ຖາຕິ.

ສກຸລາເຖຣິຍາປທານໍ ຈຕຸຕ຺ຖໍ.