໕. ນນ຺ທາເຖຣີອປທານໍ

໑໖໖. ‘‘ປທຸມຸຕ຺ຕໂຣ ນາມ ຊິໂນ, ສພ຺ພຘມ຺ມານ ປາຣຄູ;

ອິໂຕ ສຕສຫສ຺ສມ຺ຫິ, ກປ຺ເປ ອຸປ຺ປຊ຺ຊິ ນາຍໂກ.

໑໖໗. ‘‘ໂອວາທໂກ ວິຎ຺ຎາປໂກ, ຕາຣໂກ ສພ຺ພປາຓິນໍ;

ເທສນາກຸສໂລ ພຸທ຺ໂຘ, ຕາເຣສິ ຊນຕໍ ພຫຸໍ.

໑໖໘. ‘‘ອນຸກມ຺ປໂກ ກາຣຸຓິໂກ, ຫິເຕສີ ສພ຺ພປາຓິນໍ;

ສມ຺ປຕ຺ເຕ ຕິຕ຺ຖິເຍ ສພ຺ເພ, ປຎ຺ຈສີເລ ປຕິຏ຺ຐປິ.

໑໖໙. ‘‘ເອວໍ ນິຣາກຸລໍ ອາສິ, ສຸຎ຺ຎຕໍ ຕິຕ຺ຖິເຍຫິ ຈ;

ວິຈິຕ຺ຕໍ ອຣຫນ຺ເຕຫິ, ວສີຠູເຕຫິ ຕາທິຠິ.

໑໗໐. ‘‘ຣຕນານຏ຺ຐປຎ຺ຎາສໍ, ອຸຄ຺ຄໂຕວ ມຫາມຸນິ;

ກຎ຺ຈນຄ຺ຆິຍສງ຺ກາໂສ, ພາຕ຺ຕິໍສວຣລກ຺ຂໂຓ.

໑໗໑. ‘‘ວສ຺ສສຕສຫສ຺ສານິ, ອາຍຸ ວິຊ຺ຊຕິ ຕາວເທ;

ຕາວຕາ ຕິຏ຺ຐມາໂນ ໂສ, ຕາເຣສິ ຊນຕໍ ພຫຸໍ.

໑໗໒. ‘‘ຕທາຫໍ ຫໍສວຕິຍໍ, ຊາຕາ ເສຏ຺ຐິກຸເລ ອຫຸໍ;

ນານາຣຕນປຊ຺ໂຊເຕ, ມຫາສຸຂສມປ຺ປິຕາ.

໑໗໓. ‘‘ອຸເປຕ຺ວາ ຕໍ ມຫາວີຣໍ, ອສ຺ໂສສິໍ ຘມ຺ມເທສນໍ;

ອມຕໍ ປຣມສ຺ສາທໍ, ປຣມຕ຺ຖນິເວທກໍ.

໑໗໔. ‘‘ຕທາ ນິມນ຺ຕຍິຕ຺ວານ, ສສງ຺ຆໍ ໂລກນາຍກໍ;

ທຕ຺ວາ ຕສ຺ສ ມຫາທານໍ, ປສນ຺ນາ ເສຫິ ປາຓິຠິ.

໑໗໕. ‘‘ຌາຍິນີນໍ ຠິກ຺ຂຸນີນໍ, ອຄ຺ຄຏ຺ຐານມປຕ຺ຖຍິໍ;

ນິປຈ຺ຈ ສິຣສາ ຘີຣໍ, ສສງ຺ຆໍ ໂລກນາຍກໍ.

໑໗໖. ‘‘ຕທາ ອທນ຺ຕທມໂກ, ຕິໂລກສຣໂຓ ປຠູ;

ພ຺ຍາກາສິ ນຣສາຣຖິ, ‘ລຈ຺ຉເສ ຕໍ ສຸປຕ຺ຖິຕໍ.

໑໗໗. ‘‘‘ສຕສຫສ຺ສິໂຕ ກປ຺ເປ, ໂອກ຺ກາກກຸລສມ຺ຠໂວ;

ໂຄຕໂມ ນາມ ໂຄຕ຺ເຕນ, ສຕ຺ຖາ ໂລເກ ຠວິສ຺ສຕິ.

໑໗໘. ‘‘‘ຕສ຺ສ ຘມ຺ເມສຸ ທາຍາທາ, ໂອຣສາ ຘມ຺ມນິມ຺ມິຕາ;

ນນ຺ທາຕິ ນາມ ນາເມນ, ເຫສ຺ສຕິ ສຕ຺ຖຸ ສາວິກາ’.

໑໗໙. ‘‘ຕໍ ສຸຕ຺ວາ ມຸທິຕາ ຫຸຕ຺ວາ, ຍາວຊີວໍ ຕທາ ຊິນໍ;

ເມຕ຺ຕຈິຕ຺ຕາ ປຣິຈຣິໍ, ປຈ຺ຈເຍຫິ ວິນາຍກໍ.

໑໘໐. ‘‘ເຕນ ກມ຺ເມນ ສຸກເຕນ, ເຈຕນາປຓິຘີຫິ ຈ;

ຊຫິຕ຺ວາ ມານຸສໍ ເທຫໍ, ຕາວຕິໍສມຄຈ຺ຉຫໍ.

໑໘໑. ‘‘ຕໂຕ ຈຸຕາ ຍາມມຄໍ, ຕໂຕຫໍ ຕຸສິຕໍ ຄຕາ [ອຄໍ (ສີ. ປີ. ກ.)];

ຕໂຕ ຈ ນິມ຺ມານຣຕິໍ, ວສວຕ຺ຕິປຸຣໍ ຕໂຕ [ຄຕາ (ສ຺ຍາ.)].

໑໘໒. ‘‘ຍຕ຺ຖ ຍຕ຺ຖູປປຊ຺ຊາມິ, ຕສ຺ສ ກມ຺ມສ຺ສ ວາຫສາ;

ຕຕ຺ຖ ຕຕ຺ເຖວ ຣາຊູນໍ, ມເຫສິຕ຺ຕມກາຣຍິໍ.

໑໘໓. ‘‘ຕໂຕ ຈຸຕາ ມນຸສ຺ສຕ຺ເຕ, ຣາຊານໍ ຈກ຺ກວຕ຺ຕິນໍ;

ມຓ຺ຑລີນຎ຺ຈ ຣາຊູນໍ, ມເຫສິຕ຺ຕມກາຣຍິໍ.

໑໘໔. ‘‘ສມ຺ປຕ຺ຕິໍ ອນຸໂຠຕ຺ວານ, ເທເວສຸ ມນຸເຊສຸ ຈ;

ສພ຺ພຕ຺ຖ ສຸຂິຕາ ຫຸຕ຺ວາ, ເນກກປ຺ເປສຸ ສໍສຣິໍ.

໑໘໕. ‘‘ປຈ຺ຉິເມ ຠເວ ສມ຺ປຕ຺ເຕ, ສຸຣມ຺ເມ [ປຸຣສ຺ມິໍ (ສ຺ຍາ.)] ກປິລວ຺ຫເຍ;

ຣຎ຺ໂຎ ສຸທ຺ໂຘທນສ຺ສາຫໍ, ຘີຕາ ອາສິໍ ອນິນ຺ທິຕາ.

໑໘໖. ‘‘ສິຣິຍາ [ສິຣິໍວ (ສີ.), ຣໍສິຣິວ (ສ຺ຍາ.)] ຣູປິນິໍ ທິສ຺ວາ, ນນ຺ທິຕໍ ອາສິ ຕໍ ກຸລໍ;

ເຕນ ນນ຺ທາຕິ ເມ ນາມໍ, ສຸນ຺ທຣໍ ປວຣໍ ອຫຸ.

໑໘໗. ‘‘ຍຸວຕີນຎ຺ຈ ສພ຺ພາສໍ, ກລ຺ຍາຓີຕິ ຈ ວິສ຺ສຸຕາ;

ຕສ຺ມິມ຺ປິ ນຄເຣ ຣມ຺ເມ, ຐເປຕ຺ວາ ຕໍ ຍໂສຘຣໍ.

໑໘໘. ‘‘ເຊຏ຺ໂຐ ຠາຕາ ຕິໂລກຄ຺ໂຄ, ປຈ຺ຉິໂມ [ມຊ຺ຌິໂມ (ປີ.)] ອຣຫາ ຕຖາ;

ເອກາກິນີ ຄຫຏ຺ຐາຫໍ, ມາຕຣາ ປຣິໂຈທິຕາ.

໑໘໙. ‘‘‘ສາກິຍມ຺ຫິ ກຸເລ ຊາຕາ, ປຸຕ຺ເຕ ພຸທ຺ຘານຸຊາ ຕຸວໍ;

ນນ຺ເທນປິ ວິນາ ຠູຕາ, ອຄາເຣ ກິໍ ນຸ ອຈ຺ຉສິ.

໑໙໐. ‘‘‘ຊຣາວສານໍ ໂຍພ຺ພຎ຺ຎໍ, ຣູປໍ ອສຸຈິສມ຺ມຕໍ;

ໂຣຄນ຺ຕມປິຈາໂຣຄ຺ຍໍ, ຊີວິຕໍ ມຣຓນ຺ຕິກໍ.

໑໙໑. ‘‘‘ອິທມ຺ປິ ເຕ ສຸຠໍ ຣູປໍ, ສສີກນ຺ຕໍ ມໂນຫຣໍ;

ຠູສນານໍ ອລງ຺ກາຣໍ, ສິຣິສງ຺ຆາຏສນ຺ນິຠໍ.

໑໙໒. ‘‘‘ປຸຎ຺ຊິຕໍ ໂລກສາຣໍວ, ນຍນານໍ ຣສາຍນໍ;

ປຸຎ຺ຎານໍ ກິຕ຺ຕິຊນນໍ, ອຸກ຺ກາກກຸລນນ຺ທນໍ.

໑໙໓. ‘‘‘ນ ຈິເຣເນວ ກາເລນ, ຊຣາ ສມຘິເສສ຺ສຕິ [ສມຠິໂຠສ຺ສຕິ (ສີ. ສ຺ຍາ.), ສມຘິເຫສ຺ສຕິ (ປີ.)];

ວິຫາຍ ເຄຫໍ ກາຣຸຎ຺ເຎ [ກາຣຸຎ຺ເຎ (ສີ. ປີ.), ປາຣຍ຺ຫິໍ (ສ຺ຍາ.)], ຈຣ ຘມ຺ມມນິນ຺ທິເຕ’.

໑໙໔. ‘‘ສຸຕ຺ວາຫໍ ມາຕຸ ວຈນໍ, ປພ຺ພຊິໍ ອນຄາຣິຍໍ;

ເທເຫນ ນ ຕຸ ຈິຕ຺ເຕນ, ຣູປໂຍພ຺ພນລາຬິຕາ.

໑໙໕. ‘‘ມຫຕາ ຈ ປຍຕ຺ເຕນ, ຌານຊ຺ເຌນ ປຣໍ ມມ;

ກາຕຸຎ຺ຈ ວທເຕ ມາຕາ, ນ ຈາຫໍ ຕຕ຺ຖ ອຸສ຺ສຸກາ.

໑໙໖. ‘‘ຕໂຕ ມຫາກາຣຸຓິໂກ, ທິສ຺ວາ ມໍ ກາມລາລສໍ [ກມລານນໍ (ສ຺ຍາ.)];

ນິພ຺ພິນ຺ທນຕ຺ຖໍ ຣູປສ຺ມິໍ, ມມ ຈກ຺ຂຸປເຖ ຊິໂນ.

໑໙໗. ‘‘ສເກນ ອານຸຠາເວນ, ອິຕ຺ຖິໍ ມາເປສິ ໂສຠິນິໍ;

ທສ຺ສນີຍໍ ສຸຣຸຈິຣໍ, ມມໂຕປິ ສຸຣູປິນິໍ.

໑໙໘. ‘‘ຕມຫໍ ວິມ຺ຫິຕາ ທິສ຺ວາ, ອຕິວິມ຺ຫິຕເທຫິນິໍ;

ຈິນ຺ຕຍິໍ ສຜລໍ ເມຕິ, ເນຕ຺ຕລາຠຎ຺ຈ ມານຸສໍ.

໑໙໙. ‘‘ຕມຫໍ ເອຫິ ສຸຠເຄ, ເຍນຕ຺ໂຖ ຕໍ ວເທຫິ ເມ;

ກຸລໍ ເຕ ນາມໂຄຕ຺ຕຎ຺ຈ, ວທ ເມ ຍທິ ເຕ ປິຍໍ.

໒໐໐. ‘ນ ວຎ຺ຈກາໂລ ສຸຠເຄ [ປຎ຺ຫກາໂລ ສຸຠເຓ (ສີ. ສ຺ຍາ. ປີ.)], ອຸຈ຺ຉງ຺ເຄ ມໍ ນິວາສຍ;

ສີທນ຺ຕີວ ມມງ຺ຄານິ, ປສຸປ຺ປຍ ມຸຫຸຕ຺ຕກໍ’.

໒໐໑. ‘‘ຕໂຕ ສີສໍ ມມງ຺ເກ ສາ, ກຕ຺ວາ ສຍິ ສຸໂລຈນາ;

ຕສ຺ສາ ນລາເຏ ປຕິຕາ, ລຸທ຺ຘາ [ລູຕາ (ສ຺ຍາ.)] ປຣມທາຣຸຓາ.

໒໐໒. ‘‘ສຫ ຕສ຺ສາ ນິປາເຕນ, ປິຬກາ ອຸປປຊ຺ຊຖ;

ປຄ຺ຆຣິໍສຸ ປຠິນ຺ນາ ຈ, ກຸຓປາ ປຸພ຺ພໂລຫິຕາ.

໒໐໓. ‘‘ປຠິນ຺ນໍ ວທນຎ຺ຈາປິ, ກຸຓປໍ ປູຕິຄນ຺ຘນໍ;

ອຸທ຺ຘຸມາຕໍ ວິນິລຎ຺ຈ, ປຸພ຺ພຎ຺ຈາປິ ສຣີຣກໍ.

໒໐໔. ‘‘ສາ ປເວທິຕສພ຺ພງ຺ຄີ, ນິສ຺ສສນ຺ຕີ ມຸຫຸໍ ມຸຫຸໍ;

ເວທຍນ຺ຕີ ສກໍ ທຸກ຺ຂໍ, ກຣຸຓໍ ປຣິເທວຍິ.

໒໐໕. ‘‘‘ທຸກ຺ເຂນ ທຸກ຺ຂິຕາ ໂຫມິ, ຜຸສຍນ຺ຕິ ຈ ເວທນາ;

ມຫາທຸກ຺ເຂ ນິມຸຄ຺ຄມ຺ຫິ, ສຣຓໍ ໂຫຫິ ເມ ສຂີ’.

໒໐໖. ‘‘‘ກຸຫິໍ ວທນໂສຠໍ ເຕ, ກຸຫິໍ ເຕ ຕຸງ຺ຄນາສິກາ;

ຕມ຺ພພິມ຺ພວໂຣຏ຺ຐໍ ເຕ, ວທນໍ ເຕ ກຸຫິໍ ຄຕໍ.

໒໐໗. ‘‘‘ກຸຫິໍ ສສີນິຠໍ ວຓ຺ຓໍ, ກມ຺ພຸຄີວາ ກຸຫິໍ ຄຕາ;

ໂທຬາໂລລາວ [ທາມາມາລຎ຺ຈ (ສ຺ຍາ.), ໂທໂລລຸລ຺ລາວ (ກ.)] ເຕ ກຓ຺ຓາ, ເວວຓ຺ຓໍ ສມຸປາຄຕາ.

໒໐໘. ‘‘‘ມກຸຬຂາຣກາກາຣາ [ມກຸລມ຺ພຸຣູຫາກາຣາ (ສີ.), ມກຸຬປທຸມາກາຣາ (ສ຺ຍາ.)], ກລິກາວ [ກລສາວ (ສີ. ສ຺ຍາ. ປີ.)] ປໂຍຘຣາ;

ປຠິນ຺ນາ ປູຕິກຸຓປາ, ທຸຏ຺ຐຄນ຺ຘິຕ຺ຕມາຄຕາ.

໒໐໙. ‘‘‘ເວທິມຊ຺ຌາວ ສຸສ຺ໂສຓີ [ຕນຸມຊ຺ຌາ ປຸຖຸສ຺ໂສຓີ (ສີ. ສ຺ຍາ.), ເວທິມຊ຺ຌາ ປຸຖຸສ຺ໂສຓີ (ປີ.)], ສູນາວ ນີຕກິພ຺ພິສາ;

ຊາຕາ ອເມຊ຺ຌຠຣິຕາ, ອໂຫ ຣູປມສສ຺ສຕໍ.

໒໑໐. ‘‘‘ສພ຺ພໍ ສຣີຣສຎ຺ຊາຕໍ, ປູຕິຄນ຺ຘໍ ຠຍານກໍ;

ສຸສານມິວ ພີຠຈ຺ຉໍ, ຣມນ຺ເຕ ຍຕ຺ຖ ພາລິສາ’.

໒໑໑. ‘‘ຕທາ ມຫາກາຣຸຓິໂກ, ຠາຕາ ເມ ໂລກນາຍໂກ;

ທິສ຺ວາ ສໍວິຄ຺ຄຈິຕ຺ຕໍ ມໍ, ອິມາ ຄາຖາ ອຠາສຖ.

໒໑໒. ‘‘‘ອາຕຸຣໍ ກຸຓປໍ ປູຕິໍ, ປສ຺ສ ນນ຺ເທ ສມຸສ຺ສຍໍ;

ອສຸຠາຍ ຈິຕ຺ຕໍ ຠາເວຫິ, ເອກຄ຺ຄໍ ສຸສມາຫິຕໍ.

໒໑໓. ‘‘‘ຍຖາ ອິທໍ ຕຖາ ເອຕໍ, ຍຖາ ເອຕໍ ຕຖາ ອິທໍ;

ທຸຄ຺ຄນ຺ຘໍ ປູຕິກໍ ວາຕິ, ພາລານໍ ອຠິນນ຺ທິຕໍ.

໒໑໔. ‘‘‘ເອວເມຕໍ ອເວກ຺ຂນ຺ຕີ, ຣຕ຺ຕິນ຺ທິວມຕນ຺ທິຕາ;

ຕໂຕ ສກາຍ ປຎ຺ຎາຍ, ອຠິນິພ຺ພິຊ຺ຌ ທກ຺ຂສິ’.

໒໑໕. ‘‘ຕໂຕຫໍ ອຕິສໍວິຄ຺ຄາ, ສຸຕ຺ວາ ຄາຖາ ສຸຠາສິຕາ;

ຕຕ຺ຣຏ຺ຐິຕາວຫໍ ສນ຺ຕີ, ອຣຫຕ຺ຕມປາປຸຓິໍ.

໒໑໖. ‘‘ຍຕ຺ຖ ຍຕ຺ຖ ນິສິນ຺ນາຫໍ, ສທາ ຌານປຣາຍນາ;

ຊິໂນ ຕສ຺ມິໍ ຄຸເຓ ຕຸຏ຺ໂຐ, ເອຕທຄ຺ເຄ ຐເປສິ ມໍ.

໒໑໗. ‘‘ກິເລສາ ຌາປິຕາ ມຍ຺ຫໍ…ເປ… ວິຫຣາມິ ອນາສວາ.

໒໑໘. ‘‘ສ຺ວາຄຕໍ ວຕ ເມ ອາສິ…ເປ… ກຕໍ ພຸທ຺ຘສ຺ສ ສາສນໍ.

໒໑໙. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ນນ຺ທາ ຠິກ຺ຂຸນີ ຊນປທກລ຺ຍາຓີ ອິມາ ຄາຖາໂຍ ອຠາສິຕ຺ຖາຕິ.

ນນ຺ທາເຖຣິຍາປທານໍ ປຎ຺ຈມໍ.