໓. ກຸຓ຺ຑລເກສີວຄ຺ໂຄ

໑. ກຸຓ຺ຑລເກສາເຖຣີອປທານໍ

໑. ‘‘ປທຸມຸຕ຺ຕໂຣ ນາມ ຊິໂນ, ສພ຺ພຘມ຺ມານ ປາຣຄູ;

ອິໂຕ ສຕສຫສ຺ສມ຺ຫິ, ກປ຺ເປ ອຸປ຺ປຊ຺ຊິ ນາຍໂກ.

໒. ‘‘ຕທາຫໍ ຫໍສວຕິຍໍ, ຊາຕາ ເສຏ຺ຐິກຸເລ ອຫຸໍ;

ນານາຣຕນປຊ຺ໂຊເຕ, ມຫາສຸຂສມປ຺ປິຕາ.

໓. ‘‘ອຸເປຕ຺ວາ ຕໍ ມຫາວີຣໍ, ອສ຺ໂສສິໍ ຘມ຺ມເທສນໍ;

ຕໂຕ ຊາຕປ຺ປສາທາຫໍ, ອຸເປສິໍ ສຣຓໍ ຊິນໍ.

໔. ‘‘ຕທາ ມຫາກາຣຸຓິໂກ, ປທຸມຸຕ຺ຕຣນາມໂກ;

ຂິປ຺ປາຠິຎ຺ຎານມຄ຺ຄນ຺ຕິ, ຐເປສິ ຠິກ຺ຂຸນິໍ ສຸຠໍ.

໕. ‘‘ຕໍ ສຸຕ຺ວາ ມຸທິຕາ ຫຸຕ຺ວາ, ທານໍ ທຕ຺ວາ ມເຫສິໂນ;

ນິປຈ຺ຈ ສິຣສາ ປາເທ, ຕໍ ຐານມຠິປຕ຺ຖຍິໍ.

໖. ‘‘ອນຸໂມທິ ມຫາວີໂຣ, ‘ຠທ຺ເທ ຍໍ ເຕຠິປຕ຺ຖິຕໍ;

ສມິຊ຺ຌິສ຺ສຕິ ຕໍ ສພ຺ພໍ, ສຸຂິນີ ໂຫຫິ ນິພ຺ພຸຕາ.

໗. ‘‘‘ສຕສຫສ຺ສິໂຕ ກປ຺ເປ, ໂອກ຺ກາກກຸລສມ຺ຠໂວ;

ໂຄຕໂມ ນາມ ໂຄຕ຺ເຕນ, ສຕ຺ຖາ ໂລເກ ຠວິສ຺ສຕິ.

໘. ‘‘‘ຕສ຺ສ ຘມ຺ເມສຸ ທາຍາທາ, ໂອຣສາ ຘມ຺ມນິມ຺ມິຕາ;

ຠທ຺ທາກຸຓ຺ຑລເກສາຕິ, ເຫສ຺ສຕິ ສຕ຺ຖຸ ສາວິກາ’.

໙. ‘‘ເຕນ ກມ຺ເມນ ສຸກເຕນ, ເຈຕນາປຓິຘີຫິ ຈ;

ຊຫິຕ຺ວາ ມານຸສໍ ເທຫໍ, ຕາວຕິໍສມຄຈ຺ຉຫໍ.

໑໐. ‘‘ຕໂຕ ຈຸຕາ ຍາມມຄໍ, ຕໂຕຫໍ ຕຸສິຕໍ ຄຕາ;

ຕໂຕ ຈ ນິມ຺ມານຣຕິໍ, ວສວຕ຺ຕິປຸຣໍ ຕໂຕ.

໑໑. ‘‘ຍຕ຺ຖ ຍຕ຺ຖູປປຊ຺ຊາມິ, ຕສ຺ສ ກມ຺ມສ຺ສ ວາຫສາ;

ຕຕ຺ຖ ຕຕ຺ເຖວ ຣາຊູນໍ, ມເຫສິຕ຺ຕມກາຣຍິໍ.

໑໒. ‘‘ຕໂຕ ຈຸຕາ ມນຸສ຺ເສສຸ, ຣາຊູນໍ ຈກ຺ກວຕ຺ຕິນໍ;

ມຓ຺ຑລີນຎ຺ຈ ຣາຊູນໍ, ມເຫສິຕ຺ຕມກາຣຍິໍ.

໑໓. ‘‘ສມ຺ປຕ຺ຕິໍ ອນຸໂຠຕ຺ວານ, ເທເວສຸ ມານຸເສສຸ ຈ;

ສພ຺ພຕ຺ຖ ສຸຂິຕາ ຫຸຕ຺ວາ, ເນກກປ຺ເປສຸ ສໍສຣິໍ.

໑໔. ‘‘ອິມມ຺ຫິ ຠທ຺ທເກ ກປ຺ເປ, ພ຺ຣຫ຺ມພນ຺ຘຸ ມຫາຍໂສ;

ກສ຺ສໂປ ນາມ ໂຄຕ຺ເຕນ, ອຸປ຺ປຊ຺ຊິ ວທຕໍ ວໂຣ.

໑໕. ‘‘ອຸປຏ຺ຐາໂກ ມເຫສິສ຺ສ, ຕທາ ອາສິ ນຣິສ຺ສໂຣ;

ກາສິຣາຊາ ກິກີ ນາມ, ພາຣາຓສິປຸຣຸຕ຺ຕເມ.

໑໖. ‘‘ຕສ຺ສ ຘີຕາ ຈຕຸຕ຺ຖາສິໍ, ຠິກ຺ຂຸທາຍີຕິ ວິສ຺ສຸຕາ;

ຘມ຺ມໍ ສຸຕ຺ວາ ຊິນຄ຺ຄສ຺ສ, ປພ຺ພຊ຺ຊໍ ສມໂຣຈຍິໍ.

໑໗. ‘‘ອນຸຊານິ ນ ໂນ ຕາໂຕ, ອຄາເຣວ ຕທາ ມຍໍ;

ວີສວສ຺ສສຫສ຺ສານິ, ວິຈຣິມ຺ຫ ອຕນ຺ທິຕາ.

໑໘. ‘‘ໂກມາຣິພ຺ຣຫ຺ມຈຣິຍໍ, ຣາຊກຎ຺ຎາ ສຸເຂຘິຕາ;

ພຸທ຺ໂຘປຏ຺ຐານນິຣຕາ, ມຸທິຕາ ສຕ຺ຕ ຘີຕໂຣ.

໑໙. ‘‘ສມຓີ ສມຓຄຸຕ຺ຕາ ຈ, ຠິກ຺ຂຸນີ ຠິກ຺ຂຸທາຍິກາ;

ຘມ຺ມາ ເຈວ ສຸຘມ຺ມາ ຈ, ສຕ຺ຕມີ ສງ຺ຆທາຍິກາ.

໒໐. ‘‘ເຂມາ ອຸປ຺ປລວຓ຺ຓາ ຈ, ປຏາຈາຣາ ອຫໍ ຕທາ;

ກິສາໂຄຕມີ ຘມ຺ມທິນ຺ນາ, ວິສາຂາ ໂຫຕິ ສຕ຺ຕມີ.

໒໑. ‘‘ເຕຫິ ກມ຺ເມຫິ ສຸກເຕຫິ, ເຈຕນາປຓິຘີຫິ ຈ;

ຊຫິຕ຺ວາ ມານຸສໍ ເທຫໍ, ຕາວຕິໍສມຄຈ຺ຉຫໍ.

໒໒. ‘‘ປຈ຺ຉິເມ ຈ ຠເວ ທານິ, ຄິຣິພ຺ພຊປຸຣຸຕ຺ຕເມ;

ຊາຕາ ເສຏ຺ຐິກຸເລ ຜີເຕ, ຍທາຫໍ ໂຍພ຺ພເນ ຐິຕາ.

໒໓. ‘‘ໂຈຣໍ ວຘຕ຺ຖໍ ນີຍນ຺ຕໍ, ທິສ຺ວາ ຣຕ຺ຕາ ຕຫິໍ ອຫໍ;

ປິຕາ ເມ ຕໍ ສຫສ຺ເສນ, ໂມຈຍິຕ຺ວາ ວຘາ ຕໂຕ.

໒໔. ‘‘ອທາສິ ຕສ຺ສ ມໍ ຕາໂຕ, ວິທິຕ຺ວານ ມນໍ ມມ;

ຕສ຺ສາຫມາສິໍ ວິສຏ຺ຐາ, ອຕີວ ທຍິຕາ ຫິຕາ.

໒໕. ‘‘ໂສ ເມ ຠູສນໂລເຠນ, ພລິມຊ຺ຌາສໂຍ [ຂລິຕຊ຺ຌາສໂຍ (ສີ.), ພລິໍ ປຈ຺ຈາຫຣໍ (ສ຺ຍາ.), ມາລປຈ຺ຉາຫຕໍ (ປີ.)] ທິໂສ;

ໂຈຣປ຺ປປາຕໍ ເນຕ຺ວານ, ປພ຺ພຕໍ ເຈຕຍີ ວຘໍ.

໒໖. ‘‘ຕທາຫໍ ປຓມິຕ຺ວານ, ສຕ຺ຕຸກໍ ສຸກຕຎ຺ຊລີ;

ຣກ຺ຂນ຺ຕີ ອຕ຺ຕໂນ ປາຓໍ, ອິທໍ ວຈນມພ຺ຣວິໍ.

໒໗. ‘‘‘ອິທໍ ສຸວຓ຺ຓເກຍູຣໍ, ມຸຕ຺ຕາ ເວຬຸຣິຍາ ພຫູ;

ສພ຺ພໍ ຫຣສ຺ສຸ [ວຣສ຺ສຸ (ກ.)] ຠທ຺ທນ຺ເຕ, ມຎ຺ຈ ທາສີຕິ ສາວຍ’.

໒໘. ‘‘‘ໂອໂຣປຍສ຺ສຸ ກລ຺ຍາຓີ, ມາ ພາຬ຺ຫໍ ປຣິເທວສິ;

ນ ຈາຫໍ ອຠິຊານາມິ, ອຫນ຺ຕ຺ວາ ຘນມາຠຕໍ’.

໒໙. ‘‘‘ຍໂຕ ສຣາມິ ອຕ຺ຕານໍ, ຍໂຕ ປຕ຺ໂຕສ຺ມິ ວິຎ຺ຎຸຕໍ;

ນ ຈາຫໍ ອຠິຊານາມິ, ອຎ຺ຎໍ ປິຍຕຣໍ ຕຍາ’.

໓໐. ‘‘‘ເອຫິ ຕໍ ອຸປຄູຫິສ຺ສໍ, ກຕ຺ວານ ຕໍ ປທກ຺ຂິຓໍ;

ນ ຈ ທານິ ປຸໂນ ອຕ຺ຖິ [ຕໍ ວນ຺ທາມິ ປຸນ ນຕ຺ຖິ (ສ຺ຍາ.)], ມມ ຕຸຍ຺ຫຎ຺ຈ ສງ຺ຄໂມ.

໓໑. ‘‘‘ນ ຫິ ສພ຺ເພສຸ ຐາເນສຸ, ປຸຣິໂສ ໂຫຕິ ປຓ຺ຑິໂຕ;

ອິຕ຺ຖີປິ ປຓ຺ຑິຕາ ໂຫຕິ, ຕຕ຺ຖ ຕຕ຺ຖ ວິຈກ຺ຂຓາ.

໓໒. ‘‘‘ນ ຫິ ສພ຺ເພສຸ ຐາເນສຸ, ປຸຣິໂສ ໂຫຕິ ປຓ຺ຑິໂຕ;

ອິຕ຺ຖີປິ ປຓ຺ຑິຕາ ໂຫຕິ, ລຫຸໍ ອຕ຺ຖວິຈິນ຺ຕິກາ.

໓໓. ‘‘‘ລຫຸຎ຺ຈ ວຕ ຂິປ຺ປຎ຺ຈ, ນິກຏ຺ເຐ [ເນກຕ຺ເຖ (ສີ. ສ຺ຍາ.)] ສມເຈຕຍິໍ;

ມິຄໍ ອຸຓ຺ຓາ ຍຖາ ເອວໍ [ຈິຕ຺ຕປຸຓ຺ຓາຍ ຕາເນວ (ສ຺ຍາ.), ມິຄໍ ປຸຓ຺ຓາຍ ເຕເນວ (ປີ.)], ຕທາຫໍ ສຕ຺ຕຸກໍ ວຘິໍ.

໓໔. ‘‘‘ໂຍ ຈ ອຸປ຺ປຕິຕໍ ອຕ຺ຖໍ, ນ ຂິປ຺ປມນຸພຸຊ຺ຌຕິ;

ໂສ ຫຎ຺ຎເຕ ມນ຺ທມຕິ, ໂຈໂຣວ ຄິຣິຄພ຺ຠເຣ.

໓໕. ‘‘‘ໂຍ ຈ ອຸປ຺ປຕິຕໍ ອຕ຺ຖໍ, ຂິປ຺ປເມວ ນິໂພຘຕິ;

ມຸຈ຺ຈເຕ ສຕ຺ຕຸສມ຺ພາຘາ, ຕທາຫໍ ສຕ຺ຕຸກາ ຍຖາ’.

໓໖. ‘‘ຕທາຫໍ ປາຕຍິຕ຺ວານ, ຄິຣິທຸຄ຺ຄມ຺ຫິ ສຕ຺ຕຸກໍ;

ສນ຺ຕິກໍ ເສຕວຕ຺ຖານໍ, ອຸເປຕ຺ວາ ປພ຺ພຊິໍ ອຫໍ.

໓໗. ‘‘ສຓ຺ຑາເສນ ຈ ເກເສ ເມ, ລຸຎ຺ຈິຕ຺ວາ ສພ຺ພໂສ ຕທາ;

ປພ຺ພຊິຕ຺ວານ ສມຍໍ, ອາຈິກ຺ຂິໍສຸ ນິຣນ຺ຕຣໍ.

໓໘. ‘‘ຕໂຕ ຕໍ ອຸຄ຺ຄເຫຕ຺ວາຫໍ, ນິສີທິຕ຺ວານ ເອກິກາ;

ສມຍໍ ຕໍ ວິຈິນ຺ເຕສິໍ, ສຸວາໂນ ມານຸສໍ ກຣໍ.

໓໙. ‘‘ຉິນ຺ນໍ ຄຍ຺ຫ ສມີເປ ເມ, ປາຕຍິຕ຺ວາ ອປກ຺ກມິ;

ທິສ຺ວາ ນິມິຕ຺ຕມລຠິໍ, ຫຕ຺ຖໍ ຕໍ ປຸຬວາກຸລໍ.

໔໐. ‘‘ຕໂຕ ອຸຏ຺ຐາຍ ສໍວິຄ຺ຄາ, ອປຸຈ຺ຉິໍ ສຫຘມ຺ມິເກ;

ເຕ ອໂວຈຸໍ ວິຊານນ຺ຕິ, ຕໍ ອຕ຺ຖໍ ສກ຺ຍຠິກ຺ຂໂວ.

໔໑. ‘‘ສາຫໍ ຕມຕ຺ຖໍ ປຸຈ຺ຉິສ຺ສໍ, ອຸເປຕ຺ວາ ພຸທ຺ຘສາວເກ;

ເຕ ມມາທາຍ ຄຈ຺ຉິໍສຸ, ພຸທ຺ຘເສຏ຺ຐສ຺ສ ສນ຺ຕິກໍ.

໔໒. ‘‘ໂສ ເມ ຘມ຺ມມເທເສສິ, ຂນ຺ຘາຍຕນຘາຕຸໂຍ;

ອສຸຠານິຈ຺ຈທຸກ຺ຂາຕິ, ອນຕ຺ຕາຕິ ຈ ນາຍໂກ.

໔໓. ‘‘ຕສ຺ສ ຘມ຺ມໍ ສຸຓິຕ຺ວາຫໍ, ຘມ຺ມຈກ຺ຂຸໍ ວິໂສຘຍິໍ;

ຕໂຕ ວິຎ຺ຎາຕສທ຺ຘມ຺ມາ, ປພ຺ພຊ຺ຊໍ ອຸປສມ຺ປທໍ.

໔໔. ‘‘ອາຍາຈິໂຕ ຕທາ ອາຫ, ‘ເອຫິ ຠທ຺ເທ’ຕິ ນາຍໂກ;

ຕທາຫໍ ອຸປສມ຺ປນ຺ນາ, ປຣິຕ຺ຕໍ ໂຕຍມທ຺ທສໍ.

໔໕. ‘‘ປາທປກ຺ຂາລເນນາຫໍ, ຎຕ຺ວາ ສອຸທຍພ຺ພຍໍ;

ຕຖາ ສພ຺ເພປິ ສງ຺ຂາເຣ, ອີທິສໍ ຈິນ຺ຕຍິໍ [ສງ຺ຂາຣາ, ອິຕິ ສໍຈິນ຺ຕຍິໍ (ສີ. ສ຺ຍາ. ປີ.)] ຕທາ.

໔໖. ‘‘ຕໂຕ ຈິຕ຺ຕໍ ວິມຸຈ຺ຈິ ເມ, ອນຸປາທາຍ ສພ຺ພໂສ;

ຂິປ຺ປາຠິຎ຺ຎານມຄ຺ຄໍ ເມ, ຕທາ ປຎ຺ຎາປຍີ ຊິໂນ.

໔໗. ‘‘ອິທ຺ຘີສຸ ຈ ວສີ ໂຫມິ, ທິພ຺ພາຍ ໂສຕຘາຕຸຍາ;

ປຣຈິຕ຺ຕານິ ຊານາມິ, ສຕ຺ຖຸສາສນກາຣິກາ.

໔໘. ‘‘ປຸພ຺ເພນິວາສໍ ຊານາມິ, ທິພ຺ພຈກ຺ຂຸ ວິໂສຘິຕໍ;

ເຂເປຕ຺ວາ ອາສເວ ສພ຺ເພ, ວິສຸທ຺ຘາສິໍ ສຸນິມ຺ມລາ.

໔໙. ‘‘ປຣິຈິຓ຺ໂຓ ມຍາ ສຕ຺ຖາ, ກຕໍ ພຸທ຺ຘສ຺ສ ສາສນໍ;

ໂອຫິໂຕ ຄຣຸໂກ ຠາໂຣ, ຠວເນຕ຺ຕິ ສມູຫຕາ.

໕໐. ‘‘ຍສ຺ສຕ຺ຖາຍ ປພ຺ພຊິຕາ, ອຄາຣສ຺ມານຄາຣິຍໍ;

ໂສ ເມ ອຕ຺ໂຖ ອນຸປ຺ປຕ຺ໂຕ, ສພ຺ພສໍໂຍຊນກ຺ຂໂຍ.

໕໑. ‘‘ອຕ຺ຖຘມ຺ມນິຣຸຕ຺ຕີສຸ, ປຏິຠາເນ ຕເຖວ ຈ;

ຎາຓໍ ເມ ວິມລໍ ສຸທ຺ຘໍ, ພຸທ຺ຘເສຏ຺ຐສ຺ສ ສາສເນ.

໕໒. ‘‘ກິເລສາ ຌາປິຕາ ມຍ຺ຫໍ, ຠວາ ສພ຺ເພ ສມູຫຕາ;

ນາຄີວ ພນ຺ຘນໍ ເຉຕ຺ວາ, ວິຫຣາມິ ອນາສວາ.

໕໓. ‘‘ສ຺ວາຄຕໍ ວຕ ເມ ອາສິ, ມມ ພຸທ຺ຘສ຺ສ ສນ຺ຕິເກ;

ຕິສ຺ໂສ ວິຊ຺ຊາ ອນຸປ຺ປຕ຺ຕາ, ກຕໍ ພຸທ຺ຘສ຺ສ ສາສນໍ.

໕໔. ‘‘ປຏິສມ຺ຠິທາ ຈຕສ຺ໂສ, ວິໂມກ຺ຂາປິ ຈ ອຏ຺ຐິເມ;

ຉຬຠິຎ຺ຎາ ສຈ຺ຉິກຕາ, ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ຠທ຺ທາກຸຓ຺ຑລເກສາ ຠິກ຺ຂຸນີ ອິມາ ຄາຖາໂຍ ອຠາສິຕ຺ຖາຕິ.

ກຸຓ຺ຑລເກສາເຖຣິຍາປທານໍ ປຐມໍ.

໒. ກິສາໂຄຕມີເຖຣີອປທານໍ

໕໕. ‘‘ປທຸມຸຕ຺ຕໂຣ ນາມ ຊິໂນ, ສພ຺ພຘມ຺ມານ ປາຣຄູ;

ອິໂຕ ສຕສຫສ຺ສມ຺ຫິ, ກປ຺ເປ ອຸປ຺ປຊ຺ຊິ ນາຍໂກ.

໕໖. ‘‘ຕທາຫໍ ຫໍສວຕິຍໍ, ຊາຕາ ອຎ຺ຎຕເຣ ກຸເລ;

ອຸເປຕ຺ວາ ຕໍ ນຣວຣໍ, ສຣຓໍ ສມຸປາຄມິໍ.

໕໗. ‘‘ຘມ຺ມຎ຺ຈ ຕສ຺ສ ອສ຺ໂສສິໍ, ຈຕຸສຈ຺ຈູປສຎ຺ຫິຕໍ;

ມຘຸຣໍ ປຣມສ຺ສາທໍ, ວຏ຺ຏສນ຺ຕິສຸຂາວຫໍ [ຈິຕ຺ຕສນ຺ຕິ … (ສ຺ຍາ.)].

໕໘. ‘‘ຕທາ ຈ ຠິກ຺ຂຸນິໍ ວີໂຣ, ລູຂຈີວຣຘາຣິນິໍ;

ຐເປນ຺ໂຕ ເອຕທຄ຺ຄມ຺ຫິ, ວຓ຺ຓຍີ ປຸຣິສຸຕ຺ຕໂມ.

໕໙. ‘‘ຊເນຕ຺ວານປ຺ປກໍ ປີຕິໍ, ສຸຕ຺ວາ ຠິກ຺ຂຸນິຍາ ຄຸເຓ;

ກາຣໍ ກຕ຺ວານ ພຸທ຺ຘສ຺ສ, ຍຖາສຕ຺ຕິ ຍຖາພລໍ.

໖໐. ‘‘ນິປຈ຺ຈ ມຸນິວຣໍ ຕໍ, ຕໍ ຐານມຠິປຕ຺ຖຍິໍ;

ຕທານຸໂມທິ ສມ຺ພຸທ຺ໂຘ, ຐານລາຠາຍ ນາຍໂກ.

໖໑. ‘‘‘ສຕສຫສ຺ສິໂຕ ກປ຺ເປ, ໂອກ຺ກາກກຸລສມ຺ຠໂວ;

ໂຄຕໂມ ນາມ ໂຄຕ຺ເຕນ, ສຕ຺ຖາ ໂລເກ ຠວິສ຺ສຕິ.

໖໒. ‘‘‘ຕສ຺ສ ຘມ຺ເມສຸ ທາຍາທາ, ໂອຣສາ ຘມ຺ມນິມ຺ມິຕາ;

ກິສາໂຄຕມີ [ໂຄຕມີ ນາມ (ສີ. ກ.)] ນາເມນ, ເຫສ຺ສຕິ ສຕ຺ຖຸ ສາວິກາ’.

໖໓. ‘‘ຕໍ ສຸຕ຺ວາ ມຸທິຕາ ຫຸຕ຺ວາ, ຍາວຊີວໍ ຕທາ ຊິນໍ;

ເມຕ຺ຕຈິຕ຺ຕາ ປຣິຈຣິໍ, ປຈ຺ຈເຍຫິ ວິນາຍກໍ.

໖໔. ‘‘ເຕນ ກມ຺ເມນ ສຸກເຕນ, ເຈຕນາປຓິຘີຫິ ຈ;

ຊຫິຕ຺ວາ ມານຸສໍ ເທຫໍ, ຕາວຕິໍສມຄຈ຺ຉຫໍ.

໖໕. ‘‘ອິມມ຺ຫິ ຠທ຺ທເກ ກປ຺ເປ, ພ຺ຣຫ຺ມພນ຺ຘຸ ມຫາຍໂສ;

ກສ຺ສໂປ ນາມ ໂຄຕ຺ເຕນ, ອຸປ຺ປຊ຺ຊິ ວທຕໍ ວໂຣ.

໖໖. ‘‘ອຸປຏ຺ຐາໂກ ມເຫສິສ຺ສ, ຕທາ ອາສິ ນຣິສ຺ສໂຣ;

ກາສິຣາຊາ ກິກີ ນາມ, ພາຣາຓສິປຸຣຸຕ຺ຕເມ.

໖໗. ‘‘ປຎ຺ຈມີ ຕສ຺ສ ຘີຕາສິໍ, ຘມ຺ມາ ນາເມນ ວິສ຺ສຸຕາ;

ຘມ຺ມໍ ສຸຕ຺ວາ ຊິນຄ຺ຄສ຺ສ, ປພ຺ພຊ຺ຊໍ ສມໂຣຈຍິໍ.

໖໘. ‘‘ອນຸຊານິ ນ ໂນ ຕາໂຕ, ອຄາເຣວ ຕທາ ມຍໍ;

ວີສວສ຺ສສຫສ຺ສານິ, ວິຈຣິມ຺ຫ ອຕນ຺ທິຕາ.

໖໙. ‘‘ໂກມາຣິພ຺ຣຫ຺ມຈຣິຍໍ, ຣາຊກຎ຺ຎາ ສຸເຂຘິຕາ;

ພຸທ຺ໂຘປຏ຺ຐານນິຣຕາ, ມຸທິຕາ ສຕ຺ຕ ຘີຕໂຣ.

໗໐. ‘‘ສມຓີ ສມຓຄຸຕ຺ຕາ ຈ, ຠິກ຺ຂຸນີ ຠິກ຺ຂຸທາຍິກາ;

ຘມ຺ມາ ເຈວ ສຸຘມ຺ມາ ຈ, ສຕ຺ຕມີ ສງ຺ຆທາຍິກາ.

໗໑. ‘‘ເຂມາ ອຸປ຺ປລວຓ຺ຓາ ຈ, ປຏາຈາຣາ ຈ ກຸຓ຺ຑລາ;

ອຫຎ຺ຈ ຘມ຺ມທິນ຺ນາ ຈ, ວິສາຂາ ໂຫຕິ ສຕ຺ຕມີ.

໗໒. ‘‘ເຕຫິ ກມ຺ເມຫິ ສຸກເຕຫິ, ເຈຕນາປຓິຘີຫິ ຈ;

ຊຫິຕ຺ວາ ມານຸສໍ ເທຫໍ, ຕາວຕິໍສມຄຈ຺ຉຫໍ.

໗໓. ‘‘ປຈ຺ຉິເມ ຈ ຠເວ ທານິ, ຊາຕາ ເສຏ຺ຐິກຸເລ ອຫໍ;