໓. ຘມ຺ມທິນ຺ນາເຖຣີອປທານໍ

໙໕. ‘‘ປທຸມຸຕ຺ຕໂຣ ນາມ ຊິໂນ, ສພ຺ພຘມ຺ມານ ປາຣຄູ;

ອິໂຕ ສຕສຫສ຺ສມ຺ຫິ, ກປ຺ເປ ອຸປ຺ປຊ຺ຊິ ນາຍໂກ.

໙໖. ‘‘ຕທາຫໍ ຫໍສວຕິຍໍ, ກຸເລ ອຎ຺ຎຕເຣ ອຫຸໍ;

ປຣກມ຺ມກາຣີ ອາສິໍ, ນິປກາ ສີລສໍວຸຕາ.

໙໗. ‘‘ປທຸມຸຕ຺ຕຣພຸທ຺ຘສ຺ສ, ສຸຊາໂຕ ອຄ຺ຄສາວໂກ;

ວິຫາຣາ ອຠິນິກ຺ຂມ຺ມ, ປິຓ຺ຑປາຕາຍ [ປຕ຺ຕມາທາຍ (ກ.)] ຄຈ຺ຉຕິ.

໙໘. ‘‘ຆຏໍ ຄເຫຕ຺ວາ ຄຈ຺ຉນ຺ຕີ, ຕທາ ອຸທກຫາຣິກາ;

ຕໍ ທິສ຺ວາ ອທທໍ ປູປໍ, ປສນ຺ນາ ເສຫິ ປາຓິຠິ.

໙໙. ‘‘ປຏິຄ຺ຄເຫຕ຺ວາ ຕຕ຺ເຖວ, ນິສິນ຺ໂນ ປຣິຠຸຎ຺ຊິ ໂສ;

ຕໂຕ ເນຕ຺ວານ ຕໍ ເຄຫໍ, ອທາສິໍ ຕສ຺ສ ໂຠຊນໍ.

໑໐໐. ‘‘ຕໂຕ ເມ ອຍ຺ຍໂກ ຕຸຏ຺ໂຐ, ອກຣີ ສຸຓິສໍ ສກໍ;

ສສ຺ສຸຍາ ສຫ ຄນ຺ຕ຺ວານ, ສມ຺ພຸທ຺ຘໍ ອຠິວາທຍິໍ.

໑໐໑. ‘‘ຕທາ ໂສ ຘມ຺ມກຖິກໍ, ຠິກ຺ຂຸນິໍ ປຣິກິຕ຺ຕຍໍ;

ຐເປສິ ເອຕທຄ຺ຄມ຺ຫິ, ຕໍ ສຸຕ຺ວາ ມຸທິຕາ ອຫໍ.

໑໐໒. ‘‘ນິມນ຺ຕຍິຕ຺ວາ ສຸຄຕໍ, ສສງ຺ຆໍ ໂລກນາຍກໍ;

ມຫາທານໍ ທທິຕ຺ວານ, ຕໍ ຐານມຠິປຕ຺ຖຍິໍ.

໑໐໓. ‘‘ຕໂຕ ມໍ ສຸຄໂຕ ອາຫ, ຆນນິນ຺ນາທສຸສ຺ສໂຣ [ຆນນິນ຺ນາທສຸສ຺ສເຣ (ກ.)];

‘ມມຸປຏ຺ຐານນິຣເຕ, ສສງ຺ຆປຣິເວສິເກ.

໑໐໔. ‘‘‘ສທ຺ຘມ຺ມສ຺ສວເນ ຍຸຕ຺ເຕ, ຄຸຓວທ຺ຘິຕມານເສ;

ຠທ຺ເທ ຠວສ຺ສຸ ມຸທິຕາ, ລຈ຺ຉເສ ປຓິຘີຜລໍ.

໑໐໕. ‘‘‘ສຕສຫສ຺ສິໂຕ ກປ຺ເປ, ໂອກ຺ກາກກຸລສມ຺ຠໂວ;

ໂຄຕໂມ ນາມ ໂຄຕ຺ເຕນ, ສຕ຺ຖາ ໂລເກ ຠວິສ຺ສຕິ.

໑໐໖. ‘‘‘ຕສ຺ສ ຘມ຺ເມສຸ ທາຍາທາ, ໂອຣສາ ຘມ຺ມນິມ຺ມິຕາ;

ຘມ຺ມທິນ຺ນາຕິ ນາເມນ, ເຫສ຺ສຕິ ສຕ຺ຖຸ ສາວິກາ’.

໑໐໗. ‘‘ຕໍ ສຸຕ຺ວາ ມຸທິຕາ ຫຸຕ຺ວາ, ຍາວຊີວໍ ມຫາມຸນິໍ;

ເມຕ຺ຕຈິຕ຺ຕາ ປຣິຈຣິໍ, ປຈ຺ຈເຍຫິ ວິນາຍກໍ.

໑໐໘. ‘‘ເຕນ ກມ຺ເມນ ສຸກເຕນ, ເຈຕນາປຓິຘີຫິ ຈ;

ຊຫິຕ຺ວາ ມານຸສໍ ເທຫໍ, ຕາວຕິໍສມຄຈ຺ຉຫໍ.

໑໐໙. ‘‘ອິມມ຺ຫິ ຠທ຺ທເກ ກປ຺ເປ, ພ຺ຣຫ຺ມພນ຺ຘຸ ມຫາຍໂສ;

ກສ຺ສໂປ ນາມ ໂຄຕ຺ເຕນ, ອຸປ຺ປຊ຺ຊິ ວທຕໍ ວໂຣ.

໑໑໐. ‘‘ອຸປຏ຺ຐາໂກ ມເຫສິສ຺ສ, ຕທາ ອາສິ ນຣິສ຺ສໂຣ;

ກາສິຣາຊາ ກິກີ ນາມ, ພາຣາຓສິປຸຣຸຕ຺ຕເມ.

໑໑໑. ‘‘ຉຏ຺ຐາ ຕສ຺ສາສຫໍ ຘີຕາ, ສຸຘມ຺ມາ ອິຕິ ວິສ຺ສຸຕາ;

ຘມ຺ມໍ ສຸຕ຺ວາ ຊິນຄ຺ຄສ຺ສ, ປພ຺ພຊ຺ຊໍ ສມໂຣຈຍິໍ.

໑໑໒. ‘‘ອນຸຊານິ ນ ໂນ ຕາໂຕ, ອຄາເຣວ ຕທາ ມຍໍ;

ວີສວສ຺ສສຫສ຺ສານິ, ວິຈຣິມ຺ຫ ອຕນ຺ທິຕາ.

ຕຕິຍໍ ຠາຓວາຣໍ.

໑໑໓. ‘‘ໂກມາຣິພ຺ຣຫ຺ມຈຣິຍໍ, ຣາຊກຎ຺ຎາ ສຸເຂຘິຕາ;

ພຸທ຺ໂຘປຏ຺ຐານນິຣຕາ, ມຸທິຕາ ສຕ຺ຕ ຘີຕໂຣ.

໑໑໔. ‘‘ສມຓີ ສມຓຄຸຕ຺ຕາ ຈ, ຠິກ຺ຂຸນີ ຠິກ຺ຂຸທາຍິກາ;

ຘມ຺ມາ ເຈວ ສຸຘມ຺ມາ ຈ, ສຕ຺ຕມີ ສງ຺ຆທາຍິກາ.

໑໑໕. ‘‘ເຂມາ ອຸປ຺ປລວຓ຺ຓາ ຈ, ປຏາຈາຣາ ຈ ກຸຓ຺ຑລາ;

ໂຄຕມີ ຈ ອຫຎ຺ເຈວ, ວິສາຂາ ໂຫຕິ ສຕ຺ຕມີ.

໑໑໖. ‘‘ເຕຫິ ກມ຺ເມຫິ ສຸກເຕຫິ, ເຈຕນາປຓິຘີຫິ ຈ;

ຊຫິຕ຺ວາ ມານຸສໍ ເທຫໍ, ຕາວຕິໍສມຄຈ຺ຉຫໍ.

໑໑໗. ‘‘ປຈ຺ຉິເມ ຈ ຠເວ ທານິ, ຄິຣິພ຺ພຊປຸຣຸຕ຺ຕເມ;

ຊາຕາ ເສຏ຺ຐິກຸເລ ຜີເຕ, ສພ຺ພກາມສມິທ຺ຘິເນ.

໑໑໘. ‘‘ຍທາ ຣູປຄຸຓູເປຕາ, ປຐເມ ໂຍພ຺ພເນ ຐິຕາ;

ຕທາ ປຣກຸລໍ ຄນ຺ຕ຺ວາ, ວສິໍ ສຸຂສມປ຺ປິຕາ.

໑໑໙. ‘‘ອຸເປຕ຺ວາ ໂລກສຣຓໍ, ສຸຓິຕ຺ວາ ຘມ຺ມເທສນໍ;

ອນາຄາມິຜລໍ ປຕ຺ໂຕ, ສາມິໂກ ເມ ສຸພຸທ຺ຘິມາ.

໑໒໐. ‘‘ຕທາຫໍ ອນຸຊາເນຕ຺ວາ, ປພ຺ພຊິໍ ອນຄາຣິຍໍ;

ນ ຈິເຣເນວ ກາເລນ, ອຣຫຕ຺ຕມປາປຸຓິໍ.

໑໒໑. ‘‘ຕທາ ອຸປາສໂກ ໂສ ມໍ, ອຸປຄນ຺ຕ຺ວາ ອປຸຈ຺ຉຖ;

ຄມ຺ຠີເຣ ນິປຸເຓ ປຎ຺ເຫ, ເຕ ສພ຺ເພ ພ຺ຍາກຣິໍ ອຫໍ.

໑໒໒. ‘‘ຊິໂນ ຕສ຺ມິໍ ຄຸເຓ ຕຸຏ຺ໂຐ, ເອຕທຄ຺ເຄ ຐເປສິ ມໍ;

‘ຠິກ຺ຂຸນິໍ ຘມ຺ມກຖິກໍ, ນາຎ຺ຎໍ ປສ຺ສາມິ ເອທິສິໍ.

໑໒໓. ‘ຘມ຺ມທິນ຺ນາ ຍຖາ ຘີຣາ, ເອວໍ ຘາເຣຖ ຠິກ຺ຂໂວ’;

‘‘ເອວາຫໍ ປຓ຺ຑິຕາ ໂຫມິ [ຊາຕາ (ສີ.), ນາມ (ສ຺ຍາ.)], ນາຍເກນານຸກມ຺ປິຕາ.

໑໒໔. ‘‘ປຣິຈິຓ຺ໂຓ ມຍາ ສຕ຺ຖາ, ກຕໍ ພຸທ຺ຘສ຺ສ ສາສນໍ;

ໂອຫິໂຕ ຄຣຸໂກ ຠາໂຣ, ຠວເນຕ຺ຕິ ສມູຫຕາ.

໑໒໕. ‘‘ຍສ຺ສຕ຺ຖາຍ ປພ຺ພຊິຕາ, ອຄາຣສ຺ມານຄາຣິຍໍ;

ໂສ ເມ ອຕ຺ໂຖ ອນຸປ຺ປຕ຺ໂຕ, ສພ຺ພສໍໂຍຊນກ຺ຂໂຍ.

໑໒໖. ‘‘ອິທ຺ຘີສຸ ຈ ວສີ ໂຫມິ, ທິພ຺ພາຍ ໂສຕຘາຕຸຍາ;

ປຣຈິຕ຺ຕານິ ຊານາມິ, ສຕ຺ຖຸສາສນກາຣິກາ.

໑໒໗. ‘‘ປຸພ຺ເພນິວາສໍ ຊານາມິ, ທິພ຺ພຈກ຺ຂຸ ວິໂສຘິຕໍ;

ເຂເປຕ຺ວາ ອາສເວ ສພ຺ເພ, ວິສຸທ຺ຘາສິໍ ສຸນິມ຺ມລາ.

໑໒໘. ‘‘ກິເລສາ ຌາປິຕາ ມຍ຺ຫໍ…ເປ… ວິຫຣາມິ ອນາສວາ.

໑໒໙. ‘‘ສ຺ວາຄຕໍ ວຕ ເມ ອາສິ…ເປ… ກຕໍ ພຸທ຺ຘສ຺ສ ສາສນໍ.

໑໓໐. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ຘມ຺ມທິນ຺ນາ ຠິກ຺ຂຸນີ ອິມາ ຄາຖາໂຍ ອຠາສິຕ຺ຖາຕິ.

ຘມ຺ມທິນ຺ນາເຖຣິຍາປທານໍ ຕຕິຍໍ.