໒. ກິສາໂຄຕມີເຖຣີອປທານໍ

໕໕. ‘‘ປທຸມຸຕ຺ຕໂຣ ນາມ ຊິໂນ, ສພ຺ພຘມ຺ມານ ປາຣຄູ;

ອິໂຕ ສຕສຫສ຺ສມ຺ຫິ, ກປ຺ເປ ອຸປ຺ປຊ຺ຊິ ນາຍໂກ.

໕໖. ‘‘ຕທາຫໍ ຫໍສວຕິຍໍ, ຊາຕາ ອຎ຺ຎຕເຣ ກຸເລ;

ອຸເປຕ຺ວາ ຕໍ ນຣວຣໍ, ສຣຓໍ ສມຸປາຄມິໍ.

໕໗. ‘‘ຘມ຺ມຎ຺ຈ ຕສ຺ສ ອສ຺ໂສສິໍ, ຈຕຸສຈ຺ຈູປສຎ຺ຫິຕໍ;

ມຘຸຣໍ ປຣມສ຺ສາທໍ, ວຏ຺ຏສນ຺ຕິສຸຂາວຫໍ [ຈິຕ຺ຕສນ຺ຕິ … (ສ຺ຍາ.)].

໕໘. ‘‘ຕທາ ຈ ຠິກ຺ຂຸນິໍ ວີໂຣ, ລູຂຈີວຣຘາຣິນິໍ;

ຐເປນ຺ໂຕ ເອຕທຄ຺ຄມ຺ຫິ, ວຓ຺ຓຍີ ປຸຣິສຸຕ຺ຕໂມ.

໕໙. ‘‘ຊເນຕ຺ວານປ຺ປກໍ ປີຕິໍ, ສຸຕ຺ວາ ຠິກ຺ຂຸນິຍາ ຄຸເຓ;

ກາຣໍ ກຕ຺ວານ ພຸທ຺ຘສ຺ສ, ຍຖາສຕ຺ຕິ ຍຖາພລໍ.

໖໐. ‘‘ນິປຈ຺ຈ ມຸນິວຣໍ ຕໍ, ຕໍ ຐານມຠິປຕ຺ຖຍິໍ;

ຕທານຸໂມທິ ສມ຺ພຸທ຺ໂຘ, ຐານລາຠາຍ ນາຍໂກ.

໖໑. ‘‘‘ສຕສຫສ຺ສິໂຕ ກປ຺ເປ, ໂອກ຺ກາກກຸລສມ຺ຠໂວ;

ໂຄຕໂມ ນາມ ໂຄຕ຺ເຕນ, ສຕ຺ຖາ ໂລເກ ຠວິສ຺ສຕິ.

໖໒. ‘‘‘ຕສ຺ສ ຘມ຺ເມສຸ ທາຍາທາ, ໂອຣສາ ຘມ຺ມນິມ຺ມິຕາ;

ກິສາໂຄຕມີ [ໂຄຕມີ ນາມ (ສີ. ກ.)] ນາເມນ, ເຫສ຺ສຕິ ສຕ຺ຖຸ ສາວິກາ’.

໖໓. ‘‘ຕໍ ສຸຕ຺ວາ ມຸທິຕາ ຫຸຕ຺ວາ, ຍາວຊີວໍ ຕທາ ຊິນໍ;

ເມຕ຺ຕຈິຕ຺ຕາ ປຣິຈຣິໍ, ປຈ຺ຈເຍຫິ ວິນາຍກໍ.

໖໔. ‘‘ເຕນ ກມ຺ເມນ ສຸກເຕນ, ເຈຕນາປຓິຘີຫິ ຈ;

ຊຫິຕ຺ວາ ມານຸສໍ ເທຫໍ, ຕາວຕິໍສມຄຈ຺ຉຫໍ.

໖໕. ‘‘ອິມມ຺ຫິ ຠທ຺ທເກ ກປ຺ເປ, ພ຺ຣຫ຺ມພນ຺ຘຸ ມຫາຍໂສ;

ກສ຺ສໂປ ນາມ ໂຄຕ຺ເຕນ, ອຸປ຺ປຊ຺ຊິ ວທຕໍ ວໂຣ.

໖໖. ‘‘ອຸປຏ຺ຐາໂກ ມເຫສິສ຺ສ, ຕທາ ອາສິ ນຣິສ຺ສໂຣ;

ກາສິຣາຊາ ກິກີ ນາມ, ພາຣາຓສິປຸຣຸຕ຺ຕເມ.

໖໗. ‘‘ປຎ຺ຈມີ ຕສ຺ສ ຘີຕາສິໍ, ຘມ຺ມາ ນາເມນ ວິສ຺ສຸຕາ;

ຘມ຺ມໍ ສຸຕ຺ວາ ຊິນຄ຺ຄສ຺ສ, ປພ຺ພຊ຺ຊໍ ສມໂຣຈຍິໍ.

໖໘. ‘‘ອນຸຊານິ ນ ໂນ ຕາໂຕ, ອຄາເຣວ ຕທາ ມຍໍ;

ວີສວສ຺ສສຫສ຺ສານິ, ວິຈຣິມ຺ຫ ອຕນ຺ທິຕາ.

໖໙. ‘‘ໂກມາຣິພ຺ຣຫ຺ມຈຣິຍໍ, ຣາຊກຎ຺ຎາ ສຸເຂຘິຕາ;

ພຸທ຺ໂຘປຏ຺ຐານນິຣຕາ, ມຸທິຕາ ສຕ຺ຕ ຘີຕໂຣ.

໗໐. ‘‘ສມຓີ ສມຓຄຸຕ຺ຕາ ຈ, ຠິກ຺ຂຸນີ ຠິກ຺ຂຸທາຍິກາ;

ຘມ຺ມາ ເຈວ ສຸຘມ຺ມາ ຈ, ສຕ຺ຕມີ ສງ຺ຆທາຍິກາ.

໗໑. ‘‘ເຂມາ ອຸປ຺ປລວຓ຺ຓາ ຈ, ປຏາຈາຣາ ຈ ກຸຓ຺ຑລາ;

ອຫຎ຺ຈ ຘມ຺ມທິນ຺ນາ ຈ, ວິສາຂາ ໂຫຕິ ສຕ຺ຕມີ.

໗໒. ‘‘ເຕຫິ ກມ຺ເມຫິ ສຸກເຕຫິ, ເຈຕນາປຓິຘີຫິ ຈ;

ຊຫິຕ຺ວາ ມານຸສໍ ເທຫໍ, ຕາວຕິໍສມຄຈ຺ຉຫໍ.

໗໓. ‘‘ປຈ຺ຉິເມ ຈ ຠເວ ທານິ, ຊາຕາ ເສຏ຺ຐິກຸເລ ອຫໍ;

ທຸຄ຺ຄເຕ ອຘເນ ນຏ຺ເຐ [ນີເຈ (ສ຺ຍາ.), ນິທ຺ເຘ (ປີ.)], ຄຕາ ຈ ສຘນໍ ກຸລໍ.

໗໔. ‘‘ປຕິໍ ຐເປຕ຺ວາ ເສສາ ເມ, ເທສ຺ສນ຺ຕິ ອຘນາ ອິຕິ;

ຍທາ ຈ ປສູຕາ [ສສຸຕາ (ສີ. ປີ.)] ອາສິໍ, ສພ຺ເພສໍ ທຍິຕາ ຕທາ.

໗໕. ‘‘ຍທາ ໂສ ຕຣຸໂຓ ຠທ຺ໂທ [ປຸຕ຺ໂຕ (ສີ. ສ຺ຍາ.)], ໂກມລໂກ [ໂກມາຣໂກ (ສ຺ຍາ.), ໂກມລງ຺ໂຄ (ສີ. ປີ.)] ສຸເຂຘິໂຕ;

ສປາຓມິວ ກນ຺ໂຕ ເມ, ຕທາ ຍມວສໍ ຄໂຕ.

໗໖. ‘‘ໂສກຏ຺ຏາ ທີນວທນາ, ອສ຺ສຸເນຕ຺ຕາ ຣຸທມ຺ມຸຂາ;

ມຕໍ ກຸຓປມາທາຍ, ວິລປນ຺ຕີ ຄມາມຫໍ.

໗໗. ‘‘ຕທາ ເອເກນ ສນ຺ທິຏ຺ຐາ, ອຸເປຕ຺ວາຠິສກ຺ກຸຕ຺ຕມໍ;

ອໂວຈໍ ເທຫິ ເຠສຊ຺ຊໍ, ປຸຕ຺ຕສຎ຺ຊີວນນ຺ຕິ ໂຠ.

໗໘. ‘‘ນ ວິຊ຺ຊນ຺ເຕ ມຕາ ຍສ຺ມິໍ, ເຄເຫ ສິທ຺ຘຕ຺ຖກໍ ຕໂຕ;

ອາຫຣາຕິ ຊິໂນ ອາຫ, ວິນໂຍປາຍໂກວິໂທ.

໗໙. ‘‘ຕທາ ຄມິຕ຺ວາ ສາວຕ຺ຖິໍ, ນ ລຠິໍ ຕາທິສໍ ຆຣໍ;

ກຸໂຕ ສິທ຺ຘຕ຺ຖກໍ ຕສ຺ມາ, ຕໂຕ ລທ຺ຘາ ສຕິໍ ອຫໍ.

໘໐. ‘‘ກຸຓປໍ ຉຑ຺ຑຍິຕ຺ວານ, ອຸເປສິໍ ໂລກນາຍກໍ;

ທູຣໂຕວ ມມໍ ທິສ຺ວາ, ອໂວຈ ມຘຸຣສ຺ສໂຣ.

໘໑. ‘‘‘ໂຍ ຈ ວສ຺ສສຕໍ ຊີເວ, ອປສ຺ສໍ ອຸທຍພ຺ພຍໍ;

ເອກາຫໍ ຊີວິຕໍ ເສຍ຺ໂຍ, ປສ຺ສໂຕ ອຸທຍພ຺ພຍໍ.

໘໒. ‘‘‘ນ ຄາມຘມ຺ໂມ ນິຄມສ຺ສ ຘມ຺ໂມ, ນ ຈາປິຍໍ ເອກກຸລສ຺ສ ຘມ຺ໂມ;

ສພ຺ພສ຺ສ ໂລກສ຺ສ ສເທວກສ຺ສ, ເອເສວ ຘມ຺ໂມ ຍທິທໍ ອນິຈ຺ຈຕາ’.

໘໓. ‘‘ສາຫໍ ສຸຕ຺ວານິມາ [ສຫສຸຕ຺ວານິມາ (ກ.)] ຄາຖາ, ຘມ຺ມຈກ຺ຂຸໍ ວິໂສຘຍິໍ;

ຕໂຕ ວິຎ຺ຎາຕສທ຺ຘມ຺ມາ, ປພ຺ພຊິໍ ອນຄາຣິຍໍ.

໘໔. ‘‘ຕຖາ ປພ຺ພຊິຕາ ສນ຺ຕີ, ຍຸຎ຺ຊນ຺ຕີ ຊິນສາສເນ;

ນ ຈິເຣເນວ ກາເລນ, ອຣຫຕ຺ຕມປາປຸຓິໍ.

໘໕. ‘‘ອິທ຺ຘີສຸ ຈ ວສີ ໂຫມິ, ທິພ຺ພາຍ ໂສຕຘາຕຸຍາ;

ປຣຈິຕ຺ຕານິ ຊານາມິ, ສຕ຺ຖຸສາສນກາຣິກາ.

໘໖. ‘‘ປຸພ຺ເພນິວາສໍ ຊານາມິ, ທິພ຺ພຈກ຺ຂຸ ວິໂສຘິຕໍ;

ເຂເປຕ຺ວາ ອາສເວ ສພ຺ເພ, ວິສຸທ຺ຘາສິໍ ສຸນິມ຺ມລາ.

໘໗. ‘‘ປຣິຈິຓ຺ໂຓ ມຍາ ສຕ຺ຖາ, ກຕໍ ພຸທ຺ຘສ຺ສ ສາສນໍ;

ໂອຫິໂຕ ຄຣຸໂກ ຠາໂຣ, ຠວເນຕ຺ຕິ ສມູຫຕາ.

໘໘. ‘‘ຍສ຺ສຕ຺ຖາຍ ປພ຺ພຊິຕາ, ອຄາຣສ຺ມານຄາຣິຍໍ;

ໂສ ເມ ອຕ຺ໂຖ ອນຸປ຺ປຕ຺ໂຕ, ສພ຺ພສໍໂຍຊນກ຺ຂໂຍ.

໘໙. ‘‘ອຕ຺ຖຘມ຺ມນິຣຸຕ຺ຕີສຸ, ປຏິຠາເນ ຕເຖວ ຈ;

ຎາຓໍ ເມ ວິມລໍ ສຸທ຺ຘໍ, ພຸທ຺ຘເສຏ຺ຐສ຺ສ ວາຫສາ.

໙໐. ‘‘ສງ຺ກາຣກູຏາ ອາຫິຕ຺ວາ, ສຸສານາ ຣຖິຍາປິ ຈ;

ຕໂຕ ສງ຺ຆາຏິກໍ ກຕ຺ວາ, ລູຂໍ ຘາເຣມິ ຈີວຣໍ.

໙໑. ‘‘ຊິໂນ ຕສ຺ມິໍ ຄຸເຓ ຕຸຏ຺ໂຐ, ລູຂຈີວຣຘາຣເຓ;

ຐເປສິ ເອຕທຄ຺ຄມ຺ຫິ, ປຣິສາສຸ ວິນາຍໂກ.

໙໒. ‘‘ກິເລສາ ຌາປິຕາ ມຍ຺ຫໍ…ເປ… ວິຫຣາມິ ອນາສວາ.

໙໓. ‘‘ສ຺ວາຄຕໍ ວຕ ເມ ອາສິ…ເປ… ກຕໍ ພຸທ຺ຘສ຺ສ ສາສນໍ.

໙໔. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ກິສາໂຄຕມີ ຠິກ຺ຂຸນີ ອິມາ ຄາຖາໂຍ ອຠາສິຕ຺ຖາຕິ.

ກິສາໂຄຕມີເຖຣິຍາປທານໍ ທຸຕິຍໍ.