໓. ຕຕິຍວຄ຺ໂຄ

໑. ອຸຕ຺ຕຣຕ຺ເຖຣຄາຖາ

໑໖໑. ‘‘ຂນ຺ຘາ ມຍາ ປຣິຎ຺ຎາຕາ, ຕຓ຺ຫາ ເມ ສຸສມູຫຕາ;

ຠາວິຕາ ມມ ໂພຊ຺ຌງ຺ຄາ, ປຕ຺ໂຕ ເມ ອາສວກ຺ຂໂຍ.

໑໖໒. ‘‘ໂສຫໍ ຂນ຺ເຘ ປຣິຎ຺ຎາຍ, ອພ຺ພຫິຕ຺ວານ [ອພ຺ພຸຫິຕ຺ວານ (ກ.)] ຊາລິນິໍ;

ຠາວຍິຕ຺ວານ ໂພຊ຺ຌງ຺ເຄ, ນິພ຺ພາຍິສ຺ສໍ ອນາສໂວ’’ຕິ.

… ອຸຕ຺ຕໂຣ ເຖໂຣ….

໒. ຠທ຺ທຊິຕ຺ເຖຣຄາຖາ

໑໖໓. ‘‘ປນາໂທ ນາມ ໂສ ຣາຊາ, ຍສ຺ສ ຍູໂປ ສຸວຓ຺ຓໂຍ;

ຕິຣິຍໍ ໂສຬສຸພ຺ເພໂຘ [ໂສຬສປພ຺ເພໂຘ (ສີ. ອຏ຺ຐ.), ໂສຬສພ຺ພາໂຓ (?)], ອຸພ຺ຠມາຫຸ [ອຸທ຺ຘມາຫຸ (ສີ.), ອຸຈ຺ຈມາຫຸ (ສ຺ຍາ.)] ສຫສ຺ສຘາ.

໑໖໔. ‘‘ສຫສ຺ສກຓ຺ໂຑ ສຕເຄຓ຺ຑຸ, ຘຊາລຸ ຫຣິຕາມໂຍ;

ອນຈ຺ຈຸໍ ຕຕ຺ຖ ຄນ຺ຘພ຺ພາ, ຉສຫສ຺ສານິ ສຕ຺ຕຘາ’’ຕິ.

… ຠທ຺ທຊິຕ຺ເຖໂຣ….

໓. ໂສຠິຕຕ຺ເຖຣຄາຖາ

໑໖໕. ‘‘ສຕິມາ ປຎ຺ຎວາ ຠິກ຺ຂຸ, ອາຣທ຺ຘພລວີຣິໂຍ;

ປຎ຺ຈ ກປ຺ປສຕານາຫໍ, ເອກຣຕ຺ຕິໍ ອນຸສ຺ສຣິໍ.

໑໖໖. ‘‘ຈຕ຺ຕາໂຣ ສຕິປຏ຺ຐາເນ, ສຕ຺ຕ ອຏ຺ຐ ຈ ຠາວຍໍ;

ປຎ຺ຈ ກປ຺ປສຕານາຫໍ, ເອກຣຕ຺ຕິໍ ອນຸສ຺ສຣິ’’ນ຺ຕິ.

… ໂສຠິໂຕ ເຖໂຣ….

໔. ວລ຺ລິຍຕ຺ເຖຣຄາຖາ

໑໖໗. ‘‘ຍໍ ກິຈ຺ຈໍ ທຬ຺ຫວີຣິເຍນ, ຍໍ ກິຈ຺ຈໍ ໂພທ຺ຘຸມິຈ຺ຉຕາ;

ກຣິສ຺ສໍ ນາວຣຊ຺ຌິສ຺ສໍ [ນາວຣຸຊ຺ຌິສ຺ສໍ (ກ. ສີ. ກ.)], ປສ຺ສ ວີຣິຍໍ ປຣກ຺ກມ.

໑໖໘. ‘‘ຕ຺ວຎ຺ຈ ເມ ມຄ຺ຄມກ຺ຂາຫິ, ອຎ຺ຊສໍ ອມໂຕຄຘໍ;

ອຫໍ ໂມເນນ ໂມນິສ຺ສໍ, ຄງ຺ຄາໂສໂຕວ ສາຄຣ’’ນ຺ຕິ.

… ວລ຺ລິໂຍ ເຖໂຣ….

໕. ວີຕໂສກຕ຺ເຖຣຄາຖາ

໑໖໙. ‘‘ເກເສ ເມ ໂອລິຂິສ຺ສນ຺ຕິ, ກປ຺ປໂກ ອຸປສງ຺ກມິ;

ຕໂຕ ອາທາສມາທາຍ, ສຣີຣໍ ປຈ຺ຈເວກ຺ຂິສໍ.

໑໗໐. ‘‘ຕຸຈ຺ໂຉ ກາໂຍ ອທິສ຺ສິຕ຺ຖ, ອນ຺ຘກາໂຣ ຕໂມ ພ຺ຍຄາ;

ສພ຺ເພ ໂຈຬາ ສມຸຈ຺ຉິນ຺ນາ, ນຕ຺ຖິ ທານິ ປຸນພ຺ຠໂວ’’ຕິ.

… ວີຕໂສໂກ ເຖໂຣ….

໖. ປຸຓ຺ຓມາສຕ຺ເຖຣຄາຖາ

໑໗໑. ‘‘ປຎ຺ຈ ນີວຣເຓ ຫິຕ຺ວາ, ໂຍຄກ຺ເຂມສ຺ສ ປຕ຺ຕິຍາ;

ຘມ຺ມາທາສໍ ຄເຫຕ຺ວານ, ຎາຓທສ຺ສນມຕ຺ຕໂນ.

໑໗໒. ‘‘ປຈ຺ຈເວກ຺ຂິໍ ອິມໍ ກາຍໍ, ສພ຺ພໍ ສນ຺ຕຣພາຫິຣໍ;

ອຊ຺ຌຕ຺ຕຎ຺ຈ ພຫິທ຺ຘາ ຈ, ຕຸຈ຺ໂຉ ກາໂຍ ອທິສ຺ສຖາ’’ຕິ.

… ປຸຓ຺ຓມາໂສ ເຖໂຣ….

໗. ນນ຺ທກຕ຺ເຖຣຄາຖາ

໑໗໓. ‘‘ຍຖາປິ ຠທ຺ໂທ ອາຊຎ຺ໂຎ, ຂລິຕ຺ວາ ປຕິຕິຏ຺ຐຕິ;

ຠິຍ຺ໂຍ ລທ຺ທານ ສໍເວຄໍ, ອທີໂນ ວຫເຕ ຘຸຣໍ.

໑໗໔. ‘‘ເອວໍ ທສ຺ສນສມ຺ປນ຺ນໍ, ສມ຺ມາສມ຺ພຸທ຺ຘສາວກໍ;

ອາຊານີຍໍ ມໍ ຘາເຣຖ, ປຸຕ຺ຕໍ ພຸທ຺ຘສ຺ສ ໂອຣສ’’ນ຺ຕິ.

… ນນ຺ທໂກ ເຖໂຣ….

໘. ຠຣຕຕ຺ເຖຣຄາຖາ

໑໗໕. ‘‘ເອຫິ ນນ຺ທກ ຄຈ຺ຉາມ, ອຸປຊ຺ຌາຍສ຺ສ ສນ຺ຕິກໍ;

ສີຫນາທໍ ນທິສ຺ສາມ, ພຸທ຺ຘເສຏ຺ຐສ຺ສ ສມ຺ມຸຂາ.

໑໗໖. ‘‘ຍາຍ ໂນ ອນຸກມ຺ປາຍ, ອມ຺ເຫ ປພ຺ພາຊຍີ ມຸນິ;

ໂສ ໂນ ອຕ຺ໂຖ ອນຸປ຺ປຕ຺ໂຕ, ສພ຺ພສໍໂຍຊນກ຺ຂໂຍ’’ຕິ.

… ຠຣໂຕ ເຖໂຣ….

໙. ຠາຣທ຺ວາຊຕ຺ເຖຣຄາຖາ

໑໗໗. ‘‘ນທນ຺ຕິ ເອວໍ ສປ຺ປຎ຺ຎາ, ສີຫາວ ຄິຣິຄພ຺ຠເຣ;

ວີຣາ ວິຊິຕສງ຺ຄາມາ, ເຊຕ຺ວາ ມາຣໍ ສວາຫນິໍ [ສວາຫນໍ (ພຫູສຸ)].

໑໗໘. ‘‘ສຕ຺ຖາ ຈ ປຣິຈິຓ຺ໂຓ ເມ, ຘມ຺ໂມ ສງ຺ໂຆ ຈ ປູຊິໂຕ;

ອຫຎ຺ຈ ວິຕ຺ໂຕ ສຸມໂນ, ປຸຕ຺ຕໍ ທິສ຺ວາ ອນາສວ’’ນ຺ຕິ.

… ຠາຣທ຺ວາໂຊ ເຖໂຣ….

໑໐. ກຓ຺ຫທິນ຺ນຕ຺ເຖຣຄາຖາ

໑໗໙. ‘‘ອຸປາສິຕາ ສປ຺ປຸຣິສາ, ສຸຕາ ຘມ຺ມາ ອຠິຓ຺ຫໂສ;

ສຸຕ຺ວານ ປຏິປຊ຺ຊິສ຺ສໍ, ອຎ຺ຊສໍ ອມໂຕຄຘໍ.

໑໘໐. ‘‘ຠວຣາຄຫຕສ຺ສ ເມ ສໂຕ, ຠວຣາໂຄ ປຸນ ເມ ນ ວິຊ຺ຊຕິ;

ນ ຈາຫຸ ນ ຈ ເມ ຠວິສ຺ສຕິ, ນ ຈ ເມ ເອຕຣຫິ ວິຊ຺ຊຕີ’’ຕິ.

… ກຓ຺ຫທິນ຺ໂນ ເຖໂຣ….

ວຄ຺ໂຄ ຕຕິໂຍ ນິຏ຺ຐິໂຕ.

ຕສ຺ສຸທ຺ທານໍ –

ອຸຕ຺ຕໂຣ ຠທ຺ທຊິຕ຺ເຖໂຣ, ໂສຠິໂຕ ວລ຺ລິໂຍ ອິສິ;

ວີຕໂສໂກ ຈ ໂຍ ເຖໂຣ, ປຸຓ຺ຓມາໂສ ຈ ນນ຺ທໂກ;

ຠຣໂຕ ຠາຣທ຺ວາໂຊ ຈ, ກຓ຺ຫທິນ຺ໂນ ມຫາມຸນີຕິ.