໔. ຈຕຸຕ຺ຖວຄ຺ໂຄ

໑. ມິຄສິຣຕ຺ເຖຣຄາຖາ

໑໘໑. ‘‘ຍໂຕ ອຫໍ ປພ຺ພຊິໂຕ, ສມ຺ມາສມ຺ພຸທ຺ຘສາສເນ;

ວິມຸຈ຺ຈມາໂນ ອຸຄ຺ຄຈ຺ຉິໍ, ກາມຘາຕຸໍ ອຸປຈ຺ຈຄໍ.

໑໘໒. ‘‘ພ຺ຣຫ຺ມຸໂນ ເປກ຺ຂມານສ຺ສ, ຕໂຕ ຈິຕ຺ຕໍ ວິມຸຈ຺ຈິ ເມ;

ອກຸປ຺ປາ ເມ ວິມຸຕ຺ຕີຕິ, ສພ຺ພສໍໂຍຊນກ຺ຂຍາ’’ຕິ.

… ມິຄສິໂຣ ເຖໂຣ….

໒. ສິວກຕ຺ເຖຣຄາຖາ

໑໘໓. ‘‘ອນິຈ຺ຈານິ ຄຫການິ, ຕຕ຺ຖ ຕຕ຺ຖ ປຸນປ຺ປຸນໍ;

ຄຫກາຣໍ [ຄຫກາຣກໍ (ສີ. ປີ.)] ຄເວສນ຺ໂຕ, ທຸກ຺ຂາ ຊາຕິ ປຸນປ຺ປຸນໍ.

໑໘໔. ‘‘ຄຫກາຣກ ທິຏ຺ໂຐສິ, ປຸນ ເຄຫໍ ນ ກາຫສິ;

ສພ຺ພາ ເຕ ຜາສຸກາ ຠຄ຺ຄາ, ຖູຓິກາ [ຖູຓິຣາ (ປີ. ກ.), ຘຸຓິຣາ (ສ຺ຍາ.)] ຈ ວິທາລິຕາ [ປທາລິຕາ (ສີ. ສ຺ຍາ.)];

ວິມຣິຍາທິກຕໍ ຈິຕ຺ຕໍ, ອິເຘວ ວິຘມິສ຺ສຕີ’’ຕິ.

… ສິວໂກ [ສີວໂກ (ສີ.)] ເຖໂຣ….

໓. ອຸປວາຓຕ຺ເຖຣຄາຖາ

໑໘໕. ‘‘ອຣຫໍ ສຸຄໂຕ ໂລເກ, ວາເຕຫາພາຘິໂຕ [… ພາຘິໂຕ (ກ.)] ມຸນິ;

ສເຈ ອຸຓ຺ໂຫທກໍ ອຕ຺ຖິ, ມຸນິໂນ ເທຫິ ພ຺ຣາຫ຺ມຓ.

໑໘໖. ‘‘ປູຊິໂຕ ປູຊເນຍ຺ຍານໍ [ປູຊນີຍານໍ (ສີ.)], ສກ຺ກເຣຍ຺ຍານ ສກ຺ກໂຕ;

ອປຈິໂຕປເຈຍ຺ຍານໍ [ອປຈນີຍານໍ (ສີ.), ອປຈິເນຍ຺ຍານໍ (ສ຺ຍາ.)], ຕສ຺ສ ອິຈ຺ຉາມິ ຫາຕເວ’’ຕິ.

… ອຸປວາໂຓ ເຖໂຣ….

໔. ອິສິທິນ຺ນຕ຺ເຖຣຄາຖາ

໑໘໗. ‘‘ທິຏ຺ຐາ ມຍາ ຘມ຺ມຘຣາ ອຸປາສກາ, ກາມາ ອນິຈ຺ຈາ ອິຕິ ຠາສມານາ;

ສາຣຕ຺ຕຣຕ຺ຕາ ມຓິກຸຓ຺ຑເລສຸ, ປຸຕ຺ເຕສຸ ທາເຣສຸ ຈ ເຕ ອເປກ຺ຂາ.

໑໘໘. ‘‘ອທ຺ຘາ ນ ຊານນ຺ຕິ ຍໂຕຘ ຘມ຺ມໍ, ກາມາ ອນິຈ຺ຈາ ອິຕິ ຈາປິ ອາຫຸ;

ຣາຄຎ຺ຈ ເຕສໍ ນ ພລຕ຺ຖິ ເຉຕ຺ຕຸໍ, ຕສ຺ມາ ສິຕາ ປຸຕ຺ຕທາຣໍ ຘນຎ຺ຈາ’’ຕິ.

… ອິສິທິນ຺ໂນ ເຖໂຣ….

໕. ສມ຺ພຸລກຈ຺ຈານຕ຺ເຖຣຄາຖາ

໑໘໙. ‘‘ເທໂວ ຈ ວສ຺ສຕິ ເທໂວ ຈ ຄຬຄຬາຍຕິ,

ເອກໂກ ຈາຫໍ ເຠຣເວ ພິເລ ວິຫຣາມິ;

ຕສ຺ສ ມຍ຺ຫໍ ເອກກສ຺ສ ເຠຣເວ ພິເລ ວິຫຣໂຕ,

ນຕ຺ຖິ ຠຍໍ ວາ ຉມ຺ຠິຕຕ຺ຕໍ ວາ ໂລມຫໍໂສ ວາ.

໑໙໐. ‘‘ຘມ຺ມຕາ ມມສາ ຍສ຺ສ ເມ, ເອກກສ຺ສ ເຠຣເວ ພິເລ;

ວິຫຣໂຕ ນຕ຺ຖິ ຠຍໍ ວາ, ຉມ຺ຠິຕຕ຺ຕໍ ວາ ໂລມຫໍໂສ ວາ’’ຕິ.

… ສມ຺ພຸລກຈ຺ຈາໂນ [ສມ຺ພຫຸລກຈ຺ຈາໂນ (ກ.)] ເຖໂຣ….

໖. ນິຕກຕ຺ເຖຣຄາຖາ

໑໙໑. [ອຸທາ. ໓໔ ອຸທາເນປິ] ‘‘ກສ຺ສ ເສລູປມໍ ຈິຕ຺ຕໍ, ຐິຕໍ ນານຸປກມ຺ປຕິ;

ວິຣຕ຺ຕໍ ຣຊນີເຍສຸ, ກຸປ຺ປນີເຍ ນ ກຸປ຺ປຕິ;

ຍສ຺ເສວໍ ຠາວິຕໍ ຈິຕ຺ຕໍ, ກຸໂຕ ຕໍ ທຸກ຺ຂເມສ຺ສຕິ.

໑໙໒. ‘‘ມມ ເສລູປມໍ ຈິຕ຺ຕໍ, ຐິຕໍ ນານຸປກມ຺ປຕິ;

ວິຣຕ຺ຕໍ ຣຊນີເຍສຸ, ກຸປ຺ປນີເຍ ນ ກຸປ຺ປຕິ;

ມເມວໍ ຠາວິຕໍ ຈິຕ຺ຕໍ, ກຸໂຕ ມໍ ທຸກ຺ຂເມສ຺ສຕີ’’ຕິ.

… ນິຕໂກ [ຂິຕໂກ (ສີ. ສ຺ຍາ.)] ເຖໂຣ….

໗. ໂສຓໂປຏິຣິຍຕ຺ເຖຣຄາຖາ

໑໙໓. ‘‘ນ ຕາວ ສຸປິຕຸໍ ໂຫຕິ, ຣຕ຺ຕິ ນກ຺ຂຕ຺ຕມາລິນີ;

ປຏິຊຄ຺ຄິຕຸເມເວສາ, ຣຕ຺ຕິ ໂຫຕິ ວິຊານຕາ.

໑໙໔. ‘‘ຫຕ຺ຖິກ຺ຂນ຺ຘາວປຕິຕໍ, ກຸຎ຺ຊໂຣ ເຈ ອນຸກ຺ກເມ;

ສງ຺ຄາເມ ເມ ມຕໍ ເສຍ຺ໂຍ, ຍຎ຺ເຈ ຊີເວ ປຣາຊິໂຕ’’ຕິ.

… ໂສໂຓ ໂປຏິຣິໂຍ [ເສລິສ຺ສຣິໂຍ (ສີ.), ໂປຏ຺ຏິຣິຍປຸຕ຺ໂຕ (ສ຺ຍາ.)] ເຖໂຣ ….

໘. ນິສຠຕ຺ເຖຣຄາຖາ

໑໙໕. ‘‘ປຎ຺ຈ ກາມຄຸເຓ ຫິຕ຺ວາ, ປິຍຣູເປ ມໂນຣເມ;

ສທ຺ຘາຍ ຆຣາ ນິກ຺ຂມ຺ມ, ທຸກ຺ຂສ຺ສນ຺ຕກໂຣ ຠເວ.

໑໙໖. ‘‘ນາຠິນນ຺ທາມິ ມຣຓໍ, ນາຠິນນ຺ທາມິ ຊີວິຕໍ;

ກາລຎ຺ຈ ປຏິກງ຺ຂາມິ, ສມ຺ປຊາໂນ ປຕິສ຺ສໂຕ’’ຕິ.

… ນິສໂຠ ເຖໂຣ….

໙. ອຸສຠຕ຺ເຖຣຄາຖາ

໑໙໗. ‘‘ອມ຺ພປລ຺ລວສງ຺ກາສໍ, ອໍເສ ກຕ຺ວານ ຈີວຣໍ;

ນິສິນ຺ໂນ ຫຕ຺ຖິຄີວາຍໍ, ຄາມໍ ປິຓ຺ຑາຍ ປາວິສິໍ.

໑໙໘. ‘‘ຫຕ຺ຖິກ຺ຂນ຺ຘໂຕ ໂອຣຸຍ຺ຫ, ສໍເວຄໍ ອລຠິໍ ຕທາ;

ໂສຫໍ ທິຕ຺ໂຕ ຕທາ ສນ຺ໂຕ, ປຕ຺ໂຕ ເມ ອາສວກ຺ຂໂຍ’’ຕິ.

… ອຸສໂຠ ເຖໂຣ….

໑໐. ກປ຺ປຏກຸຣຕ຺ເຖຣຄາຖາ

໑໙໙. ‘‘ອຍມິຕິ ກປ຺ປໂຏ ກປ຺ປຏກຸໂຣ, ອຈ຺ຉາຍ ອຕິຠຣິຕາຍ [ອຕິຠຣິຍາຍ (ສີ. ກ.), ອຈ຺ຈໍ ຠຣາຍ (ສ຺ຍາ.)];

ອມຕຆຏິກາຍໍ ຘມ຺ມກຏມຕ຺ໂຕ [ຘມ຺ມກຏປຕ຺ໂຕ (ສ຺ຍາ. ກ. ອຏ຺ຐ.), ຘມ຺ມກຏມຄ຺ໂຄ (ສີ. ອຏ຺ຐ.)], ກຕປທໍ ຌານານິ ໂອເຈຕຸໍ.

໒໐໐. ‘‘ມາ ໂຂ ຕ຺ວໍ ກປ຺ປຏ ປຈາເລສິ, ມາ ຕ຺ວໍ ອຸປກຓ຺ຓມ຺ຫິ ຕາເຬສ຺ສໍ;

ນ ຫິ [ນ ວາ (ກ.)] ຕ຺ວໍ ກປ຺ປຏ ມຕ຺ຕມຎ຺ຎາສິ, ສງ຺ຆມຊ຺ຌມ຺ຫິ ປຈລາຍມາໂນຕິ.

… ກປ຺ປຏກຸໂຣ ເຖໂຣ….

ວຄ຺ໂຄ ຈຕຸຕ຺ໂຖ ນິຏ຺ຐິໂຕ.

ຕສ຺ສຸທ຺ທານໍ –

ມິຄສິໂຣ ສິວໂກ ຈ, ອຸປວາໂນ ຈ ປຓ຺ຑິໂຕ;

ອິສິທິນ຺ໂນ ຈ ກຈ຺ຈາໂນ, ນິຕໂກ ຈ ມຫາວສີ;

ໂປຏິຣິຍປຸຕ຺ໂຕ ນິສໂຠ, ອຸສໂຠ ກປ຺ປຏກຸໂຣຕິ.