໒. ທຸຕິຍວຄ຺ໂຄ

໑. ມຫາຈຸນ຺ທຕ຺ເຖຣຄາຖາ

໑໔໑. ‘‘ສຸສ຺ສູສາ ສຸຕວທ຺ຘນີ, ສຸຕໍ ປຎ຺ຎາຍ ວທ຺ຘນໍ;

ປຎ຺ຎາຍ ອຕ຺ຖໍ ຊານາຕິ, ຎາໂຕ ອຕ຺ໂຖ ສຸຂາວໂຫ.

໑໔໒. ‘‘ເສເວຖ ປນ຺ຕານິ ເສນາສນານິ, ຈເຣຍ຺ຍ ສໍໂຍຊນວິປ຺ປໂມກ຺ຂໍ;

ສເຈ ຣຕິໍ ນາຘິຄຈ຺ເຉຍ຺ຍ ຕຕ຺ຖ, ສງ຺ເຆ ວເສ ຣກ຺ຂິຕຕ຺ໂຕ ສຕິມາ’’ຕິ.

… ມຫາຈຸນ຺ໂທ ເຖໂຣ….

໒. ໂຊຕິທາສຕ຺ເຖຣຄາຖາ

໑໔໓. ‘‘ເຍ ໂຂ ເຕ ເວຐມິສ຺ເສນ [ເວຆມິສ຺ເສນ (ສີ. ສ຺ຍາ.), ເວ ຄມິສ຺ເສນ, ເວຂມິສ຺ເສນ (ກ.)], ນານຕ຺ເຕນ ຈ ກມ຺ມຸນາ;

ມນຸສ຺ເສ ອຸປຣຸນ຺ຘນ຺ຕິ, ຜຣຸສູປກ຺ກມາ ຊນາ;

ເຕປິ ຕຕ຺ເຖວ ກີຣນ຺ຕິ, ນ ຫິ ກມ຺ມໍ ປນສ຺ສຕິ.

໑໔໔. ‘‘ຍໍ ກໂຣຕິ ນໂຣ ກມ຺ມໍ, ກລ຺ຍາຓໍ ຍທິ ປາປກໍ;

ຕສ຺ສ ຕສ຺ເສວ ທາຍາໂທ, ຍໍ ຍໍ ກມ຺ມໍ ປກຸພ຺ພຕີ’’ຕິ.

… ໂຊຕິທາໂສ ເຖໂຣ….

໓. ເຫຣຎ຺ຎການິຕ຺ເຖຣຄາຖາ

໑໔໕. ‘‘ອຈ຺ຈຍນ຺ຕິ ອໂຫຣຕ຺ຕາ, ຊີວິຕໍ ອຸປຣຸຊ຺ຌຕິ;

ອາຍຸ ຂີຍຕິ ມຈ຺ຈານໍ, ກຸນ຺ນທີນໍວ ໂອທກໍ.

໑໔໖. ‘‘ອຖ ປາປານິ ກມ຺ມານິ, ກຣໍ ພາໂລ ນ ພຸຊ຺ຌຕິ;

ປຈ຺ຉາສ຺ສ ກຏຸກໍ ໂຫຕິ, ວິປາໂກ ຫິສ຺ສ ປາປໂກ’’ຕິ.

… ເຫຣຎ຺ຎການິຕ຺ເຖໂຣ….

໔. ໂສມມິຕ຺ຕຕ຺ເຖຣຄາຖາ

໑໔໗. ‘‘ປຣິຕ຺ຕໍ ທາຣຸມາຣຸຍ຺ຫ, ຍຖາ ສີເທ ມຫຓ຺ຓເວ;

ເອວໍ ກຸສີຕມາຄມ຺ມ, ສາຘຸຊີວີປິ ສີທຕິ;

ຕສ຺ມາ ຕໍ ປຣິວຊ຺ເຊຍ຺ຍ, ກຸສີຕໍ ຫີນວີຣິຍໍ.

໑໔໘. ‘‘ປວິວິຕ຺ເຕຫິ ອຣິເຍຫິ, ປຫິຕຕ຺ເຕຫິ ຌາຍິຠິ;

ນິຈ຺ຈໍ ອາຣທ຺ຘວີຣິເຍຫິ, ປຓ຺ຑິເຕຫິ ສຫາວເສ’’ຕິ.

… ໂສມມິຕ຺ໂຕ ເຖໂຣ….

໕. ສພ຺ພມິຕ຺ຕຕ຺ເຖຣຄາຖາ

໑໔໙. ‘‘ຊໂນ ຊນມ຺ຫິ ສມ຺ພທ຺ໂຘ [ສມ຺ພທ຺ໂຘ (ສ຺ຍາ. ກ.)], ຊນເມວສ຺ສິໂຕ ຊໂນ;

ຊໂນ ຊເນນ ເຫຐີຍຕິ, ເຫເຐຕິ ຈ [ໂພຘິຍຕິ, ພາເຘຕິ ຈ (ກ.)] ຊໂນ ຊນໍ.

໑໕໐. ‘‘ໂກ ຫິ ຕສ຺ສ ຊເນນຕ຺ໂຖ, ຊເນນ ຊນິເຕນ ວາ;

ຊນໍ ໂອຫາຍ ຄຈ຺ຉໍ ຕໍ, ເຫຐຍິຕ຺ວາ [ພາຘຍິຕ຺ວາ (ກ.)] ພຫຸໍ ຊນ’’ນ຺ຕິ.

… ສພ຺ພມິຕ຺ໂຕ ເຖໂຣ….

໖. ມຫາກາຬຕ຺ເຖຣຄາຖາ

໑໕໑. ‘‘ກາຬີ ອິຕ຺ຖີ ພ຺ຣຫຕີ ຘງ຺ກຣູປາ, ສຕ຺ຖິຎ຺ຈ ເຠຕ຺ວາ ອປຣຎ຺ຈ ສຕ຺ຖິໍ;

ພາຫຎ຺ຈ ເຠຕ຺ວາ ອປຣຎ຺ຈ ພາຫໍ, ສີສຎ຺ຈ ເຠຕ຺ວາ ທຘິຖາລກໍວ;

ເອສາ ນິສິນ຺ນາ ອຠິສນ຺ທຫິຕ຺ວາ.

໑໕໒. ‘‘ໂຍ ເວ ອວິທ຺ວາ ອຸປຘິໍ ກໂຣຕິ, ປຸນປ຺ປຸນໍ ທຸກ຺ຂມຸເປຕິ ມນ຺ໂທ;

ຕສ຺ມາ ປຊານໍ ອຸປຘິໍ ນ ກຍິຣາ, ມາຫໍ ປຸນ ຠິນ຺ນສິໂຣ ສຍິສ຺ສ’’ນ຺ຕິ [ປສ຺ສິສ຺ສນ຺ຕິ (ກ.)].

… ມຫາກາໂຬ ເຖໂຣ….

໗. ຕິສ຺ສຕ຺ເຖຣຄາຖາ

໑໕໓. ‘‘ພຫູ ສປຕ຺ເຕ ລຠຕິ, ມຸຓ຺ໂຑ ສງ຺ຆາຏິປາຣຸໂຕ;

ລາຠີ ອນ຺ນສ຺ສ ປານສ຺ສ, ວຕ຺ຖສ຺ສ ສຍນສ຺ສ ຈ.

໑໕໔. ‘‘ເອຕມາທີນວໍ ຎຕ຺ວາ, ສກ຺ກາເຣສຸ ມຫພ຺ຠຍໍ;

ອປ຺ປລາໂຠ ອນວສ຺ສຸໂຕ, ສໂຕ ຠິກ຺ຂຸ ປຣິພ຺ພເຊ’’ຕິ.

… ຕິສ຺ໂສ ເຖໂຣ….

໘. ກິມິລຕ຺ເຖຣຄາຖາ

໑໕໕. ‘‘ປາຈີນວໍສທາຍມ຺ຫິ, ສກ຺ຍປຸຕ຺ຕາ ສຫາຍກາ;

ປຫາຍານປ຺ປເກ ໂຠເຄ, ອຸຎ຺ຉາປຕ຺ຕາຄເຕ ຣຕາ.

໑໕໖. ‘‘ອາຣທ຺ຘວີຣິຍາ ປຫິຕຕ຺ຕາ, ນິຈ຺ຈໍ ທຬ຺ຫປຣກ຺ກມາ;

ຣມນ຺ຕິ ຘມ຺ມຣຕິຍາ, ຫິຕ຺ວານ ໂລກິຍໍ ຣຕິ’’ນ຺ຕິ.

… ກິມິໂລ [ກິມ຺ພິໂລ (ສີ. ສ຺ຍາ. ປີ.)] ເຖໂຣ….

໙. ນນ຺ທຕ຺ເຖຣຄາຖາ

໑໕໗. ‘‘ອໂຍນິໂສ ມນສິກາຣາ, ມຓ຺ຑນໍ ອນຸຍຸຎ຺ຊິສໍ;

ອຸທ຺ຘໂຕ ຈປໂລ ຈາສິໍ, ກາມຣາເຄນ ອຏ຺ຏິໂຕ.

໑໕໘. ‘‘ອຸປາຍກຸສເລນາຫໍ, ພຸທ຺ເຘນາທິຈ຺ຈພນ຺ຘຸນາ;

ໂຍນິໂສ ປຏິປຊ຺ຊິຕ຺ວາ, ຠເວ ຈິຕ຺ຕໍ ອຸທພ຺ພຫິ’’ນ຺ຕິ.

… ນນ຺ໂທ ເຖໂຣ….

໑໐. ສິຣິມຕ຺ເຖຣຄາຖາ

໑໕໙. ‘‘ປເຣ ຈ ນໍ ປສໍສນ຺ຕິ, ອຕ຺ຕາ ເຈ ອສມາຫິໂຕ;

ໂມຆໍ ປເຣ ປສໍສນ຺ຕິ, ອຕ຺ຕາ ຫິ ອສມາຫິໂຕ.

໑໖໐. ‘‘ປເຣ ຈ ນໍ ຄຣຫນ຺ຕິ, ອຕ຺ຕາ ເຈ ສຸສມາຫິໂຕ;

ໂມຆໍ ປເຣ ຄຣຫນ຺ຕິ, ອຕ຺ຕາ ຫິ ສຸສມາຫິໂຕ’’ຕິ.

… ສິຣິມາ ເຖໂຣ….

ວຄ຺ໂຄ ທຸຕິໂຍ ນິຏ຺ຐິໂຕ.

ຕສ຺ສຸທ຺ທານໍ –

ຈຸນ຺ໂທ ຈ ໂຊຕິທາໂສ ຈ, ເຖໂຣ ເຫຣຎ຺ຎການິ ຈ;

ໂສມມິຕ຺ໂຕ ສພ຺ພມິຕ຺ໂຕ, ກາໂລ ຕິສ຺ໂສ ຈ ກິມິໂລ [ກິມ຺ພິໂລ (ສີ. ສ຺ຍາ. ປີ.), ຉນ຺ທລກ຺ຂຓານຸໂລມໍ];

ນນ຺ໂທ ຈ ສິຣິມາ ເຈວ, ທສ ເຖຣາ ມຫິທ຺ຘິກາຕິ.