໑. ປຐມວຄ຺ໂຄ

໑. ອຸຕ຺ຕຣຕ຺ເຖຣຄາຖາ

໑໒໑. ‘‘ນຕ຺ຖິ ໂກຈິ ຠໂວ ນິຈ຺ໂຈ, ສງ຺ຂາຣາ ວາປິ ສສ຺ສຕາ;

ອຸປ຺ປຊ຺ຊນ຺ຕິ ຈ ເຕ ຂນ຺ຘາ, ຈວນ຺ຕິ ອປຣາປຣໍ.

໑໒໒. ‘‘ເອຕມາທີນໍ ຎຕ຺ວາ, ຠເວນມ຺ຫິ ອນຕ຺ຖິໂກ;

ນິສ຺ສໂຏ ສພ຺ພກາເມຫິ, ປຕ຺ໂຕ ເມ ອາສວກ຺ຂໂຍ’’ຕິ.

ອິຕ຺ຖໍ ສຸທໍ ອາຍສ຺ມາ ອຸຕ຺ຕໂຣ ເຖໂຣ ຄາຖາໂຍ ອຠາສິຕ຺ຖາຕິ.

໒. ປິຓ຺ໂຑລຠາຣທ຺ວາຊຕ຺ເຖຣຄາຖາ

໑໒໓. ‘‘ນຍິທໍ ອນເຍນ ຊີວິຕໍ, ນາຫາໂຣ ຫທຍສ຺ສ ສນ຺ຕິໂກ;

ອາຫາຣຏ຺ຐິຕິໂກ ສມຸສ຺ສໂຍ, ອິຕິ ທິສ຺ວານ ຈຣາມິ ເອສນໍ.

໑໒໔. ‘‘ປງ຺ໂກຕິ ຫິ ນໍ ປເວທຍຸໍ, ຍາຍໍ ວນ຺ທນປູຊນາ ກຸເລສຸ;

ສຸຂຸມໍ ສລ຺ລໍ ທຸຣຸພ຺ພຫໍ, ສກ຺ກາໂຣ ກາປຸຣິເສນ ທຸຊ຺ຊໂຫ’’ຕິ.

ອິຕ຺ຖໍ ສຸທໍ ອາຍສ຺ມາ ປິຓ຺ໂຑລຠາຣທ຺ວາໂຊ ເຖໂຣ ຄາຖາໂຍ ອຠາສິຕ຺ຖາຕິ.

໓. ວລ຺ລິຍຕ຺ເຖຣຄາຖາ

໑໒໕. ‘‘ມກ຺ກໂຏ ປຎ຺ຈທ຺ວາຣາຍໍ, ກຸຏິກາຍໍ ປສກ຺ກິຍ;

ທ຺ວາເຣນ ອນຸປຣິເຍຕິ, ຆຏ຺ຏຍນ຺ໂຕ ມຸຫຸໍ ມຸຫຸໍ.

໑໒໖. ‘‘ຕິຏ຺ຐ ມກ຺ກຏ ມາ ຘາວິ, ນ ຫິ ເຕ ຕໍ ຍຖາ ປຸເຣ;

ນິຄ຺ຄຫີໂຕສິ ປຎ຺ຎາຍ, ເນວ ທູຣໍ ຄມິສ຺ສຕີ’’ຕິ.

… ວລ຺ລິໂຍ ເຖໂຣ….

໔. ຄງ຺ຄາຕີຣິຍຕ຺ເຖຣຄາຖາ

໑໒໗. ‘‘ຕິຓ຺ຓໍ ເມ ຕາລປຕ຺ຕານໍ, ຄງ຺ຄາຕີເຣ ກຸຏີ ກຕາ;

ຉວສິຕ຺ໂຕວ ເມ ປຕ຺ໂຕ, ປໍສຸກູລຎ຺ຈ ຈີວຣໍ.

໑໒໘. ‘‘ທ຺ວິນ຺ນໍ ອນ຺ຕຣວສ຺ສານໍ, ເອກາ ວາຈາ ເມ ຠາສິຕາ;

ຕຕິເຍ ອນ຺ຕຣວສ຺ສມ຺ຫິ, ຕໂມຂນ຺ໂຘ [ຕໂມກ຺ຂນ຺ໂຘ (ສີ. ສ຺ຍາ.)] ປທາລິໂຕ’’ຕິ.

… ຄງ຺ຄາຕີຣິໂຍ ເຖໂຣ….

໕. ອຊິນຕ຺ເຖຣຄາຖາ

໑໒໙. ‘‘ອປິ ເຈ ໂຫຕິ ເຕວິຊ຺ໂຊ, ມຈ຺ຈຸຫາຍີ ອນາສໂວ;

ອປ຺ປຎ຺ຎາໂຕຕິ ນໍ ພາລາ, ອວຊານນ຺ຕິ ອຊານຕາ.

໑໓໐. ‘‘ໂຍ ຈ ໂຂ ອນ຺ນປານສ຺ສ, ລາຠີ ໂຫຕີຘ ປຸຄ຺ຄໂລ;

ປາປຘມ຺ໂມປິ ເຈ ໂຫຕິ, ໂສ ເນສໍ ໂຫຕິ ສກ຺ກໂຕ’’ຕິ.

… ອຊິໂນ ເຖໂຣ….

໖. ເມຬຊິນຕ຺ເຖຣຄາຖາ

໑໓໑. ‘‘ຍທາຫໍ ຘມ຺ມມສ຺ໂສສິໍ, ຠາສມານສ຺ສ ສຕ຺ຖຸໂນ;

ນ ກງ຺ຂມຠິຊານາມິ, ສພ຺ພຎ຺ຎູອປຣາຊິເຕ.

໑໓໒. ‘‘ສຕ຺ຖວາເຫ ມຫາວີເຣ, ສາຣຖີນໍ ວຣຸຕ຺ຕເມ;

ມຄ຺ເຄ ປຏິປທາຍໍ ວາ, ກງ຺ຂາ ມຍ຺ຫໍ ນ ວິຊ຺ຊຕີ’’ຕິ.

… ເມຬຊິໂນ ເຖໂຣ….

໗. ຣາຘຕ຺ເຖຣຄາຖາ

໑໓໓. [ຘ. ປ. ໑໓ ຘມ຺ມປເທ] ‘‘ຍຖາ ອຄາຣໍ ທຸຈ຺ຉນ຺ນໍ, ວຸຏ຺ຐີ ສມຕິວິຊ຺ຌຕິ;

ເອວໍ ອຠາວິຕໍ ຈິຕ຺ຕໍ, ຣາໂຄ ສມຕິວິຊ຺ຌຕິ.

໑໓໔. [ຘ. ປ. ໑໔ ຘມ຺ມປເທ] ‘‘ຍຖາ ອຄາຣໍ ສຸຈ຺ຉນ຺ນໍ, ວຸຑ຺ຒີ ນ ສມຕິວິຊ຺ຌຕິ;

ເອວໍ ສຸຠາວິຕໍ ຈິຕ຺ຕໍ, ຣາໂຄ ນ ສມຕິວິຊ຺ຌຕີ’’ຕິ.

… ຣາໂຘ ເຖໂຣ….

໘. ສຸຣາຘຕ຺ເຖຣຄາຖາ

໑໓໕. ‘‘ຂີຓາ ຫິ ມຍ຺ຫໍ ຊາຕິ, ວຸສິຕໍ ຊິນສາສນໍ;

ປຫີໂນ ຊາລສງ຺ຂາໂຕ, ຠວເນຕ຺ຕິ ສມູຫຕາ.

໑໓໖. ‘‘ຍສ຺ສຕ຺ຖາຍ ປພ຺ພຊິໂຕ, ອຄາຣສ຺ມານຄາຣິຍໍ;

ໂສ ເມ ອຕ຺ໂຖ ອນຸປ຺ປຕ຺ໂຕ, ສພ຺ພສໍໂຍຊນກ຺ຂໂຍ’’ຕິ.

… ສຸຣາໂຘ ເຖໂຣ….

໙. ໂຄຕມຕ຺ເຖຣຄາຖາ

໑໓໗. ‘‘ສຸຂໍ ສຸປນ຺ຕິ ມຸນໂຍ, ເຍ ອິຕ຺ຖີສຸ ນ ພຊ຺ຌເຣ;

ສທາ ເວ ຣກ຺ຂິຕພ຺ພາສຸ, ຍາສຸ ສຈ຺ຈໍ ສຸທຸລ຺ລຠໍ.

໑໓໘. ‘‘ວຘໍ ຈຣິມ຺ຫ ເຕ ກາມ, ອນຓາ ທານິ ເຕ ມຍໍ;

ຄຈ຺ຉາມ ທານິ ນິພ຺ພານໍ, ຍຕ຺ຖ ຄນ຺ຕ຺ວາ ນ ໂສຈຕີ’’ຕິ.

… ໂຄຕໂມ ເຖໂຣ….

໑໐. ວສຠຕ຺ເຖຣຄາຖາ

໑໓໙. ‘‘ປຸພ຺ເພ ຫນຕິ ອຕ຺ຕານໍ, ປຈ຺ຉາ ຫນຕິ ໂສ ປເຣ;

ສຸຫຕໍ ຫນ຺ຕິ ອຕ຺ຕານໍ, ວີຕໍເສເນວ ປກ຺ຂິມາ.

໑໔໐. ‘‘ນ ພ຺ຣາຫ຺ມໂຓ ພຫິວຓ຺ໂຓ, ອນ຺ໂຕ ວຓ຺ໂຓ ຫິ ພ຺ຣາຫ຺ມໂຓ;

ຍສ຺ມິໍ ປາປານິ ກມ຺ມານິ, ສ ເວ ກຓ຺ໂຫ ສຸຊມ຺ປຕີ’’ຕິ.

… ວສໂຠ ເຖໂຣ….

ວຄ຺ໂຄ ປຐໂມ ນິຏ຺ຐິໂຕ.

ຕສ຺ສຸທ຺ທານໍ –

ອຸຕ຺ຕໂຣ ເຈວ ປິຓ຺ໂຑໂລ, ວລ຺ລິໂຍ ຕີຣິໂຍ ອິສິ;

ອຊິໂນ ຈ ເມຬຊິໂນ, ຣາໂຘ ສຸຣາໂຘ ໂຄຕໂມ;

ວສເຠນ ອິເມ ໂຫນ຺ຕິ, ທສ ເຖຣາ ມຫິທ຺ຘິກາຕິ.