໑໐. ປາຣາປຣິຍຕ຺ເຖຣຄາຖາ

໙໒໐. ສມຓສ຺ສ ອຫຸ ຈິນ຺ຕາ, ປຸປ຺ຜິຕມ຺ຫິ ມຫາວເນ;

ເອກຄ຺ຄສ຺ສ ນິສິນ຺ນສ຺ສ, ປວິວິຕ຺ຕສ຺ສ ຌາຍິໂນ.

໙໒໑. ‘‘ອຎ຺ຎຖາ ໂລກນາຖມ຺ຫິ, ຕິຏ຺ຐນ຺ເຕ ປຸຣິສຸຕ຺ຕເມ;

ອິຣິຍໍ ອາສິ ຠິກ຺ຂູນໍ, ອຎ຺ຎຖາ ທານິ ທິສ຺ສຕິ.

໙໒໒. ‘‘ສີຕວາຕປຣິຕ຺ຕານໍ, ຫິຣິໂກປີນຉາທນໍ;

ມຕ຺ຕຏ຺ຐິຍໍ ອຠຸຎ຺ຊິໍສຸ, ສນ຺ຕຸຏ຺ຐາ ອິຕຣີຕເຣ.

໙໒໓. ‘‘ປຓີຕໍ ຍທິ ວາ ລູຂໍ, ອປ຺ປໍ ວາ ຍທິ ວາ ພຫຸໍ;

ຍາປນຕ຺ຖໍ ອຠຸຎ຺ຊິໍສຸ, ອຄິທ຺ຘາ ນາຘິມຸຈ຺ຉິຕາ.

໙໒໔. ‘‘ຊີວິຕານໍ ປຣິກ຺ຂາເຣ, ເຠສຊ຺ເຊ ອຖ ປຈ຺ຈເຍ;

ນ ພາຬ຺ຫໍ ອຸສ຺ສຸກາ ອາສຸໍ, ຍຖາ ເຕ ອາສວກ຺ຂເຍ.

໙໒໕. ‘‘ອຣຎ຺ເຎ ຣຸກ຺ຂມູເລສຸ, ກນ຺ທຣາສຸ ຄຸຫາສຸ ຈ;

ວິເວກມນຸພ຺ຣູຫນ຺ຕາ, ວິຫໍສຸ ຕປ຺ປຣາຍນາ.

໙໒໖. ‘‘ນີຈາ ນິວິຏ຺ຐາ ສຸຠຣາ, ມຸທູ ອຕ຺ຖທ຺ຘມານສາ;

ອພ຺ຍາເສກາ ອມຸຂຣາ, ອຕ຺ຖຈິນ຺ຕາ ວສານຸຄາ.

໙໒໗. ‘‘ຕໂຕ ປາສາທິກໍ ອາສິ, ຄຕໍ ຠຸຕ຺ຕໍ ນິເສວິຕໍ;

ສິນິທ຺ຘາ ເຕລຘາຣາວ, ອໂຫສິ ອິຣິຍາປໂຖ.

໙໒໘. ‘‘ສພ຺ພາສວປຣິກ຺ຂີຓາ, ມຫາຌາຍີ ມຫາຫິຕາ;

ນິພ຺ພຸຕາ ທານິ ເຕ ເຖຣາ, ປຣິຕ຺ຕາ ທານິ ຕາທິສາ.

໙໒໙. ‘‘ກຸສລານຎ຺ຈ ຘມ຺ມານໍ, ປຎ຺ຎາຍ ຈ ປຣິກ຺ຂຍາ;

ສພ຺ພາກາຣວຣູເປຕໍ, ລຸຊ຺ຊເຕ ຊິນສາສນໍ.

໙໓໐. ‘‘ປາປການຎ຺ຈ ຘມ຺ມານໍ, ກິເລສານຎ຺ຈ ໂຍ ອຸຕຸ;

ອຸປຏ຺ຐິຕາ ວິເວກາຍ, ເຍ ຈ ສທ຺ຘມ຺ມເສສກາ.

໙໓໑. ‘‘ເຕ ກິເລສາ ປວຑ຺ຒນ຺ຕາ, ອາວິສນ຺ຕິ ພຫຸໍ ຊນໍ;

ກີຬນ຺ຕິ ມຎ຺ເຎ ພາເລຫິ, ອຸມ຺ມຕ຺ເຕຫິວ ຣກ຺ຂສາ.

໙໓໒. ‘‘ກິເລເສຫາຠິຠູຕາ ເຕ, ເຕນ ເຕນ ວິຘາວິຕາ;

ນຣາ ກິເລສວຕ຺ຖູສຸ, ສສງ຺ຄາເມວ ໂຆສິເຕ.

໙໓໓. ‘‘ປຣິຈ຺ຈຊິຕ຺ວາ ສທ຺ຘມ຺ມໍ, ອຎ຺ຎມຎ຺ເຎຫິ ຠຓ຺ຑເຣ;

ທິຏ຺ຐິຄຕານິ ອນ຺ເວນ຺ຕາ, ອິທໍ ເສຍ຺ໂຍຕິ ມຎ຺ຎເຣ.

໙໓໔. ‘‘ຘນຎ຺ຈ ປຸຕ຺ຕໍ ຠຣິຍຎ຺ຈ, ຉຑ຺ຑຍິຕ຺ວານ ນິຄ຺ຄຕາ;

ກຏຈ຺ຉຸຠິກ຺ຂເຫຕູປິ, ອກິຈ຺ຉານິ ນິເສວເຣ.

໙໓໕. ‘‘ອຸທຣາວເທຫກໍ ຠຸຕ຺ວາ, ສຍນ຺ຕຸຕ຺ຕານເສຍ຺ຍກາ;

ກຖໍ ວຕ຺ເຕນ຺ຕິ [ກຖາ ວຑ຺ເຒນ຺ຕິ (ສີ. ກ.)] ປຏິພຸທ຺ຘາ, ຍາ ກຖາ ສຕ຺ຖຸຄຣຫິຕາ.

໙໓໖. ‘‘ສພ຺ພກາຣຸກສິປ຺ປານິ, ຈິຕ຺ຕິໍ ກຕ຺ວານ [ຈິຕ຺ຕີກຕ຺ວານ (ສີ.), ຈິຕ຺ຕໍ ກຕ຺ວານ (ສ຺ຍາ.)] ສິກ຺ຂເຣ;

ອວູປສນ຺ຕາ ອຊ຺ຌຕ຺ຕໍ, ສາມຎ຺ຎຕ຺ໂຖຕິ ອຈ຺ຉຕິ [ຕິຣິຎ຺ຈຕິ (?)].

໙໓໗. ‘‘ມຕ຺ຕິກໍ ເຕລຈຸຓ຺ຓຎ຺ຈ, ອຸທກາສນໂຠຊນໍ;

ຄິຫີນໍ ອຸປນາເມນ຺ຕິ, ອາກງ຺ຂນ຺ຕາ ພຫຸຕ຺ຕຣໍ.

໙໓໘. ‘‘ທນ຺ຕໂປນໍ ກປິຕ຺ຖຎ຺ຈ, ປຸປ຺ຜໍ ຂາທນິຍານິ ຈ;

ປິຓ຺ຑປາເຕ ຈ ສມ຺ປນ຺ເນ, ອມ຺ເພ ອາມລການິ ຈ.

໙໓໙. ‘‘ເຠສຊ຺ເຊສຸ ຍຖາ ເວຊ຺ຊາ, ກິຈ຺ຈາກິຈ຺ເຈ ຍຖາ ຄິຫີ;

ຄຓິກາວ ວິຠູສາຍໍ, ອິສ຺ສເຣ ຂຕ຺ຕິຍາ ຍຖາ.

໙໔໐. ‘‘ເນກຕິກາ ວຎ຺ຈນິກາ, ກູຏສກ຺ຂີ ອປາຏຸກາ;

ພຫູຫິ ປຣິກປ຺ເປຫິ, ອາມິສໍ ປຣິຠຸຎ຺ຊເຣ.

໙໔໑. ‘‘ເລສກປ຺ເປ ປຣິຍາເຍ, ປຣິກປ຺ເປນຸຘາວິຕາ;

ຊີວິກຕ຺ຖາ ອຸປາເຍນ, ສງ຺ກຑ຺ຒນ຺ຕິ ພຫຸໍ ຘນໍ.

໙໔໒. ‘‘ອຸປຏ຺ຐາເປນ຺ຕິ ປຣິສໍ, ກມ຺ມໂຕ ໂນ ຈ ຘມ຺ມໂຕ;

ຘມ຺ມໍ ປເຣສໍ ເທເສນ຺ຕິ, ລາຠໂຕ ໂນ ຈ ອຕ຺ຖໂຕ.

໙໔໓. ‘‘ສງ຺ຆລາຠສ຺ສ ຠຓ຺ຑນ຺ຕິ, ສງ຺ຆໂຕ ປຣິພາຫິຣາ;

ປຣລາໂຠປຊີວນ຺ຕາ, ອຫິຣີກາ ນ ລຊ຺ຊເຣ.

໙໔໔. ‘‘ນານຸຍຸຕ຺ຕາ ຕຖາ ເອເກ, ມຸຓ຺ຑາ ສງ຺ຆາຏິປາຣຸຕາ;

ສມ຺ຠາວນໍເຍວິຈ຺ຉນ຺ຕິ, ລາຠສກ຺ກາຣມຸຈ຺ຉິຕາ.

໙໔໕. ‘‘ເອວໍ ນານປ຺ປຍາຕມ຺ຫິ, ນ ທານິ ສຸກຣໍ ຕຖາ;

ອຜຸສິຕໍ ວາ ຜຸສິຕຸໍ, ຜຸສິຕໍ ວານຸຣກ຺ຂິຕຸໍ.

໙໔໖. ‘‘ຍຖາ ກຓ຺ຏກຏ຺ຐານມ຺ຫິ, ຈເຣຍ຺ຍ ອນຸປາຫໂນ;

ສຕິໍ ອຸປຏ຺ຐເປຕ຺ວານ, ເອວໍ ຄາເມ ມຸນີ ຈເຣ.

໙໔໗. ‘‘ສຣິຕ຺ວາ ປຸພ຺ພເກ ໂຍຄີ, ເຕສໍ ວຕ຺ຕມນຸສ຺ສຣໍ;

ກິຎ຺ຈາປິ ປຈ຺ຉິໂມ ກາໂລ, ຜຸເສຍ຺ຍ ອມຕໍ ປທໍ.

໙໔໘. ‘‘ອິທໍ ວຕ຺ວາ ສາລວເນ, ສມໂຓ ຠາວິຕິນ຺ທ຺ຣິໂຍ;

ພ຺ຣາຫ຺ມໂຓ ປຣິນິພ຺ພາຍີ, ອິສິ ຂີຓປຸນພ຺ຠໂວ’’ຕິ.

… ປາຣາປຣິໂຍ [ປາຣາສຣິໂຍ (ສ຺ຍາ.)] ເຖໂຣ….

ວີສຕິນິປາໂຕ ນິຏ຺ຐິໂຕ.