໑໕. ອຕ຺ຕທຓ຺ຑສຸຕ຺ຕໍ

໙໔໑. ‘‘ອຕ຺ຕທຓ຺ຑາ ຠຍໍ ຊາຕໍ, ຊນໍ ປສ຺ສຖ ເມຘຄໍ;

ສໍເວຄໍ ກິຕ຺ຕຍິສ຺ສາມິ, ຍຖາ ສໍວິຊິຕໍ ມຍາ.

໙໔໒. ‘‘ຜນ຺ທມານໍ ປຊໍ ທິສ຺ວາ, ມຈ຺ເຉ ອປ຺ໂປທເກ ຍຖາ;

ອຎ຺ຎມຎ຺ເຎຫິ ພ຺ຍາຣຸທ຺ເຘ, ທິສ຺ວາ ມໍ ຠຍມາວິສິ.

໙໔໓. ‘‘ສມນ຺ຕມສາໂຣ ໂລໂກ, ທິສາ ສພ຺ພາ ສເມຣິຕາ;

ອິຈ຺ຉໍ ຠວນມຕ຺ຕໂນ, ນາທ຺ທສາສິໍ ອໂນສິຕໍ.

໙໔໔. ‘‘ໂອສາເນຕ຺ເວວ ພ຺ຍາຣຸທ຺ເຘ, ທິສ຺ວາ ເມ ອຣຕີ ອຫຸ;

ອເຖຕ຺ຖ ສລ຺ລມທ຺ທກ຺ຂິໍ, ທຸທ຺ທສໍ ຫທຍນິສ຺ສິຕໍ.

໙໔໕. ‘‘ເຍນ ສລ຺ເລນ ໂອຕິຓ຺ໂຓ, ທິສາ ສພ຺ພາ ວິຘາວຕິ;

ຕເມວ ສລ຺ລມພ຺ພຸຍ຺ຫ, ນ ຘາວຕິ ນ ສີທຕິ.

໙໔໖. ‘‘ຕຕ຺ຖ ສິກ຺ຂານຸຄີຍນ຺ຕິ [ສິກ຺ຂານຸກິຣິຍນ຺ຕິ (ກ.)], ຍານິ ໂລເກ ຄຘິຕານິ;

ນ ເຕສຸ ປສຸໂຕ ສິຍາ, ນິພ຺ພິຊ຺ຌ ສພ຺ພໂສ ກາເມ;

ສິກ຺ເຂ ນິພ຺ພານມຕ຺ຕໂນ.

໙໔໗. ‘‘ສຈ຺ໂຈ ສິຍາ ອປ຺ປຄພ຺ໂຠ, ອມາໂຍ ຣິຕ຺ຕເປສຸໂຓ;

ອກ຺ໂກຘໂນ ໂລຠປາປໍ, ເວວິຈ຺ຉໍ ວິຕເຣ ມຸນິ.

໙໔໘. ‘‘ນິທ຺ທໍ ຕນ຺ທິໍ ສເຫ ຖີນໍ, ປມາເທນ ນ ສໍວເສ;

ອຕິມາເນ ນ ຕິຏ຺ເຐຍ຺ຍ, ນິພ຺ພານມນໂສ ນໂຣ.

໙໔໙. ‘‘ໂມສວຊ຺ເຊ ນ ນີເຍຖ, ຣູເປ ສ຺ເນຫໍ ນ ກຸພ຺ພເຍ;

ມານຎ຺ຈ ປຣິຊາເນຍ຺ຍ, ສາຫສາ ວິຣໂຕ ຈເຣ.

໙໕໐. ‘‘ປຸຣາຓໍ ນາຠິນນ຺ເທຍ຺ຍ, ນເວ ຂນ຺ຕິໍ ນ ກຸພ຺ພເຍ;

ຫິຍ຺ຍມາເນ ນ ໂສເຈຍ຺ຍ, ອາກາສໍ ນ ສິໂຕ ສິຍາ.

໙໕໑. ‘‘ເຄຘໍ ພ຺ຣູມິ ມໂຫໂຆຕິ, ອາຊວໍ ພ຺ຣູມິ ຊປ຺ປນໍ;

ອາຣມ຺ມຓໍ ປກປ຺ປນໍ, ກາມປງ຺ໂກ ທຸຣຈ຺ຈໂຍ.

໙໕໒. ‘‘ສຈ຺ຈາ ອໂວກ຺ກມ຺ມ [ອໂວກ຺ກມໍ (ນິທ຺ເທສ)] ມຸນິ, ຖເລ ຕິຏ຺ຐຕິ ພ຺ຣາຫ຺ມໂຓ;

ສພ຺ພໍ ໂສ [ສພ຺ພໂສ (ສ຺ຍາ. ກ.)] ປຏິນິສ຺ສຊ຺ຊ, ສ ເວ ສນ຺ໂຕຕິ ວຸຈ຺ຈຕິ.

໙໕໓. ‘‘ສ ເວ ວິທ຺ວາ ສ ເວທຄູ, ຎຕ຺ວາ ຘມ຺ມໍ ອນິສ຺ສິໂຕ;

ສມ຺ມາ ໂສ ໂລເກ ອິຣິຍາໂນ, ນ ປິເຫຕີຘ ກສ຺ສຈິ.

໙໕໔. ‘‘ໂຍຘ ກາເມ ອຈ຺ຈຕຣິ, ສງ຺ຄໍ ໂລເກ ທຸຣຈ຺ຈຍໍ;

ນ ໂສ ໂສຈຕິ ນາຊ຺ເຌຕິ, ຉິນ຺ນໂສໂຕ ອພນ຺ຘໂນ.

໙໕໕. ‘‘ຍໍ ປຸພ຺ເພ ຕໍ ວິໂສເສຫິ, ປຈ຺ຉາ ເຕ ມາຫຸ ກິຎ຺ຈນໍ;

ມຊ຺ເຌ ເຈ ໂນ ຄເຫສ຺ສສິ, ອຸປສນ຺ໂຕ ຈຣິສ຺ສສິ.

໙໕໖. ‘‘ສພ຺ພໂສ ນາມຣູປສ຺ມິໍ, ຍສ຺ສ ນຕ຺ຖິ ມມາຍິຕໍ;

ອສຕາ ຈ ນ ໂສຈຕິ, ສ ເວ ໂລເກ ນ ຊີຍຕິ.

໙໕໗. ‘‘ຍສ຺ສ ນຕ຺ຖິ ອິທໍ ເມຕິ, ປເຣສໍ ວາປິ ກິຎ຺ຈນໍ;

ມມຕ຺ຕໍ ໂສ ອສໍວິນ຺ທໍ, ນຕ຺ຖິ ເມຕິ ນ ໂສຈຕິ.

໙໕໘. ‘‘ອນິຏ຺ຐຸຣີ ອນນຸຄິທ຺ໂຘ, ອເນໂຊ ສພ຺ພຘີ ສໂມ;

ຕມານິສໍສໍ ປພ຺ຣູມິ, ປຸຈ຺ຉິໂຕ ອວິກມ຺ປິນໍ.

໙໕໙. ‘‘ອເນຊສ຺ສ ວິຊານໂຕ, ນຕ຺ຖິ ກາຈິ ນິສງ຺ຂຕິ [ນິສງ຺ຂິຕິ (ສີ. ປີ.)].

ວິຣໂຕ ໂສ ວິຍາຣພ຺ຠາ, ເຂມໍ ປສ຺ສຕິ ສພ຺ພຘິ.

໙໖໐. ‘‘ນ ສເມສຸ ນ ໂອເມສຸ, ນ ອຸສ຺ເສສຸ ວທເຕ ມຸນິ;

ສນ຺ໂຕ ໂສ ວີຕມຈ຺ຉໂຣ, ນາເທຕິ ນ ນິຣສ຺ສຕີ’’ຕິ.

ອຕ຺ຕທຓ຺ຑສຸຕ຺ຕໍ ປນ຺ນຣສມໍ ນິຏ຺ຐິຕໍ.