໔. ອຏ຺ຐກວຄ຺ໂຄ

໑. ກາມສຸຕ຺ຕໍ

໗໗໒. ກາມໍ ກາມຍມານສ຺ສ, ຕສ຺ສ ເຈ ຕໍ ສມິຊ຺ຌຕິ;

ອທ຺ຘາ ປີຕິມໂນ ໂຫຕິ, ລທ຺ຘາ ມຈ຺ໂຈ ຍທິຈ຺ຉຕິ.

໗໗໓. ຕສ຺ສ ເຈ ກາມຍານສ຺ສ [ກາມຍມານສ຺ສ (ກ.)], ຉນ຺ທຊາຕສ຺ສ ຊນ຺ຕຸໂນ;

ເຕ ກາມາ ປຣິຫາຍນ຺ຕິ, ສລ຺ລວິທ຺ໂຘວ ຣຸປ຺ປຕິ.

໗໗໔. ໂຍ ກາເມ ປຣິວຊ຺ເຊຕິ, ສປ຺ປສ຺ເສວ ປທາ ສິໂຣ;

ໂສມໍ [ໂສ ອິມໍ (ສີ. ປີ.)] ວິສຕ຺ຕິກໍ ໂລເກ, ສໂຕ ສມຕິວຕ຺ຕຕິ.

໗໗໕. ເຂຕ຺ຕໍ ວຕ຺ຖຸໍ ຫິຣຎ຺ຎໍ ວາ, ຄວສ຺ສໍ [ຄວາສ຺ສໍ (ສີ. ສ຺ຍາ. ປີ.)] ທາສໂປຣິສໍ;

ຖິໂຍ ພນ຺ຘູ ປຸຖຸ ກາເມ, ໂຍ ນໂຣ ອນຸຄິຊ຺ຌຕິ.

໗໗໖. ອພລາ ນໍ ພລີຍນ຺ຕິ, ມທ຺ທນ຺ເຕນໍ ປຣິສ຺ສຍາ;

ຕໂຕ ນໍ ທຸກ຺ຂມນ຺ເວຕິ, ນາວໍ ຠິນ຺ນມິໂວທກໍ.

໗໗໗. ຕສ຺ມາ ຊນ຺ຕຸ ສທາ ສໂຕ, ກາມານິ ປຣິວຊ຺ຊເຍ;

ເຕ ປຫາຍ ຕເຣ ໂອຆໍ, ນາວໍ ສິຕ຺ວາວ [ສິຎ຺ຈິຕ຺ວາ (ສີ.)] ປາຣຄູຕິ.

ກາມສຸຕ຺ຕໍ ປຐມໍ ນິຏ຺ຐິຕໍ.

໒. ຄຸຫຏ຺ຐກສຸຕ຺ຕໍ

໗໗໘. ສຕ຺ໂຕ ຄຸຫາຍໍ ພຫຸນາຠິຉນ຺ໂນ, ຕິຏ຺ຐໍ ນໂຣ ໂມຫນສ຺ມິໍ ປຄາຬ຺ໂຫ;

ທູເຣ ວິເວກາ ຫິ ຕຖາວິໂຘ ໂສ, ກາມາ ຫິ ໂລເກ ນ ຫິ ສຸປ຺ປຫາຍາ.

໗໗໙. ອິຈ຺ຉານິທານາ ຠວສາຕພທ຺ຘາ, ເຕ ທຸປ຺ປມຸຎ຺ຈາ ນ ຫິ ອຎ຺ຎໂມກ຺ຂາ;

ປຈ຺ຉາ ປຸເຣ ວາປິ ອເປກ຺ຂມານາ, ອິເມວ ກາເມ ປຸຣິເມວ ຊປ຺ປໍ.

໗໘໐. ກາເມສຸ ຄິທ຺ຘາ ປສຸຕາ ປມູຬ຺ຫາ, ອວທານິຍາ ເຕ ວິສເມ ນິວິຏ຺ຐາ;

ທຸກ຺ຂູປນີຕາ ປຣິເທວຍນ຺ຕິ, ກິໍສູ ຠວິສ຺ສາມ ອິໂຕ ຈຸຕາເສ.

໗໘໑. ຕສ຺ມາ ຫິ ສິກ຺ເຂຖ ອິເຘວ ຊນ຺ຕຸ, ຍໍ ກິຎ຺ຈິ ຊຎ຺ຎາ ວິສມນ຺ຕິ ໂລເກ;

ນ ຕສ຺ສ ເຫຕູ ວິສມໍ ຈເຣຍ຺ຍ, ອປ຺ປຎ຺ຫິທໍ ຊີວິຕມາຫຸ ຘີຣາ.

໗໘໒. ປສ຺ສາມິ ໂລເກ ປຣິຜນ຺ທມານໍ, ປຊໍ ອິມໍ ຕຓ຺ຫຄຕໍ ຠເວສຸ;

ຫີນາ ນຣາ ມຈ຺ຈຸມຸເຂ ລປນ຺ຕິ, ອວີຕຕຓ຺ຫາເສ ຠວາຠເວສຸ.

໗໘໓. ມມາຍິເຕ ປສ຺ສຖ ຜນ຺ທມາເນ, ມຈ຺ເຉວ ອປ຺ໂປທເກ ຂີຓໂສເຕ;

ເອຕມ຺ປິ ທິສ຺ວາ ອມໂມ ຈເຣຍ຺ຍ, ຠເວສຸ ອາສຕ຺ຕິມກຸພ຺ພມາໂນ.

໗໘໔. ອຸໂຠສຸ ອນ຺ເຕສຸ ວິເນຍ຺ຍ ຉນ຺ທໍ, ຜສ຺ສໍ ປຣິຎ຺ຎາຍ ອນານຸຄິທ຺ໂຘ;

ຍທຕ຺ຕຄຣຫີ ຕທກຸພ຺ພມາໂນ, ນ ລິປ຺ປຕີ [ນ ລິມ຺ປຕີ (ສ຺ຍາ. ກ.)] ທິຏ຺ຐສຸເຕສຸ ຘີໂຣ.

໗໘໕. ສຎ຺ຎໍ ປຣິຎ຺ຎາ ວິຕເຣຍ຺ຍ ໂອຆໍ, ປຣິຄ຺ຄເຫສຸ ມຸນິ ໂນປລິຕ຺ໂຕ;

ອພ຺ພູຬ຺ຫສລ຺ໂລ ຈຣມປ຺ປມຕ຺ໂຕ, ນາສີສຕີ [ນາສິໍສຕີ (ສີ. ສ຺ຍາ. ປີ.)] ໂລກມິມໍ ປຣຎ຺ຈາຕິ.

ຄຸຫຏ຺ຐກສຸຕ຺ຕໍ ທຸຕິຍໍ ນິຏ຺ຐິຕໍ.

໓. ທຸຏ຺ຐຏ຺ຐກສຸຕ຺ຕໍ

໗໘໖. ວທນ຺ຕິ ເວ ທຸຏ຺ຐມນາປິ ເອເກ, ອໂຖປິ ເວ ສຈ຺ຈມນາ ວທນ຺ຕິ;

ວາທຎ຺ຈ ຊາຕໍ ມຸນິ ໂນ ອຸເປຕິ, ຕສ຺ມາ ມຸນີ ນຕ຺ຖິ ຂິໂລ ກຸຫິຎ຺ຈິ.

໗໘໗. ສກຎ຺ຫິ ທິຏ຺ຐິໍ ກຖມຈ຺ຈເຍຍ຺ຍ, ຉນ຺ທານຸນີໂຕ ຣຸຈິຍາ ນິວິຏ຺ໂຐ;

ສຍໍ ສມຕ຺ຕານິ ປກຸພ຺ພມາໂນ, ຍຖາ ຫິ ຊາເນຍ຺ຍ ຕຖາ ວເທຍ຺ຍ.

໗໘໘. ໂຍ ອຕ຺ຕໂນ ສີລວຕານິ ຊນ຺ຕຸ, ອນານຸປຸຏ຺ໂຐວ ປເຣສ [ປຣສ຺ສ (ກ.)] ປາວ [ປາວາ (ສີ. ສ຺ຍາ. ປີ.)];

ອນຣິຍຘມ຺ມໍ ກຸສລາ ຕມາຫຸ, ໂຍ ອາຕຸມານໍ ສຍເມວ ປາວ.

໗໘໙. ສນ຺ໂຕ ຈ ຠິກ຺ຂຸ ອຠິນິພ຺ພຸຕຕ຺ໂຕ, ອິຕິຫນ຺ຕິ ສີເລສຸ ອກຕ຺ຖມາໂນ;

ຕມຣິຍຘມ຺ມໍ ກຸສລາ ວທນ຺ຕິ, ຍສ຺ສຸສ຺ສທາ ນຕ຺ຖິ ກຸຫິຎ຺ຈິ ໂລເກ.

໗໙໐. ປກປ຺ປິຕາ ສງ຺ຂຕາ ຍສ຺ສ ຘມ຺ມາ, ປຸຣກ຺ຂຕາ [ປຸເຣກ຺ຂຕາ (ສີ.)] ສນ຺ຕິ ອວີວທາຕາ;

ຍທຕ຺ຕນິ ປສ຺ສຕິ ອານິສໍສໍ, ຕໍ ນິສ຺ສິໂຕ ກຸປ຺ປປຏິຈ຺ຈ ສນ຺ຕິໍ.

໗໙໑. ທິຏ຺ຐີນິເວສາ ນ ຫິ ສ຺ວາຕິວຕ຺ຕາ, ຘມ຺ເມສຸ ນິຈ຺ເຉຍ຺ຍ ສມຸຄ຺ຄຫີຕໍ;

ຕສ຺ມາ ນໂຣ ເຕສຸ ນິເວສເນສຸ, ນິຣສ຺ສຕີ ອາທິຍຕີ ຈ ຘມ຺ມໍ.

໗໙໒. ໂຘນສ຺ສ ຫິ ນຕ຺ຖິ ກຸຫິຎ຺ຈິ ໂລເກ, ປກປ຺ປິຕາ ທິຏ຺ຐິ ຠວາຠເວສຸ;

ມາຍຎ຺ຈ ມານຎ຺ຈ ປຫາຍ ໂຘໂນ, ສ ເກນ ຄຈ຺ເຉຍ຺ຍ ອນູປໂຍ ໂສ.

໗໙໓. ອຸປໂຍ ຫິ ຘມ຺ເມສຸ ອຸເປຕິ ວາທໍ, ອນູປຍໍ ເກນ ກຖໍ ວເທຍ຺ຍ;

ອຕ຺ຕາ ນິຣຕ຺ຕາ [ອຕ຺ຕໍ ນິຣຕ຺ຕໍ (ພຫູສຸ)] ນ ຫິ ຕສ຺ສ ອຕ຺ຖິ, ອໂຘສິ ໂສ ທິຏ຺ຐິມິເຘວ ສພ຺ພນ຺ຕິ.

ທຸຏ຺ຐຏ຺ຐກສຸຕ຺ຕໍ ຕຕິຍໍ ນິຏ຺ຐິຕໍ.

໔. ສຸທ຺ຘຏ຺ຐກສຸຕ຺ຕໍ

໗໙໔. ປສ຺ສາມິ ສຸທ຺ຘໍ ປຣມໍ ອໂຣຄໍ, ທິຏ຺ເຐນ ສໍສຸທ຺ຘິ ນຣສ຺ສ ໂຫຕິ;

ເອວາຠິຊານໍ [ເອຕາຠິຊານໍ (ສີ. ປີ.)] ປຣມນ຺ຕິ ຎຕ຺ວາ, ສຸທ຺ຘານຸປສ຺ສີຕິ ປຈ຺ເຈຕິ ຎາຓໍ.

໗໙໕. ທິຏ຺ເຐນ ເຈ ສຸທ຺ຘິ ນຣສ຺ສ ໂຫຕິ, ຎາເຓນ ວາ ໂສ ປຊຫາຕິ ທຸກ຺ຂໍ;

ອຎ຺ເຎນ ໂສ ສຸຊ຺ຌຕິ ໂສປຘີໂກ, ທິຏ຺ຐີ ຫິ ນໍ ປາວ ຕຖາ ວທານໍ.

໗໙໖. ນ ພ຺ຣາຫ຺ມໂຓ ອຎ຺ຎໂຕ ສຸທ຺ຘິມາຫ, ທິຏ຺ເຐ ສຸເຕ ສີລວເຕ ມຸເຕ ວາ;

ປຸຎ຺ເຎ ຈ ປາເປ ຈ ອນູປລິຕ຺ໂຕ, ອຕ຺ຕຎ຺ຊໂຫ ນຍິຘ ປກຸພ຺ພມາໂນ.

໗໙໗. ປຸຣິມໍ ປຫາຍ ອປຣໍ ສິຕາເສ, ເອຊານຸຄາ ເຕ ນ ຕຣນ຺ຕິ ສງ຺ຄໍ;

ເຕ ອຸຄ຺ຄຫາຍນ຺ຕິ ນິຣສ຺ສຊນ຺ຕິ, ກປີວ ສາຂໍ ປມຸຎ຺ຈໍ ຄຫາຍໍ [ປມຸຂໍ ຄຫາຍ (ສ຺ຍາ.), ປມຸຎ຺ຈ ຄຫາຍ (ກ.)].

໗໙໘. ສຍໍ ສມາທາຍ ວຕານິ ຊນ຺ຕຸ, ອຸຈ຺ຈາວຈໍ ຄຈ຺ຉຕິ ສຎ຺ຎສຕ຺ໂຕ;

ວິທ຺ວາ ຈ ເວເທຫິ ສເມຈ຺ຈ ຘມ຺ມໍ, ນ ອຸຈ຺ຈາວຈໍ ຄຈ຺ຉຕິ ຠູຣິປຎ຺ໂຎ.

໗໙໙. ສ ສພ຺ພຘມ຺ເມສຸ ວິເສນິຠູໂຕ, ຍໍ ກິຎ຺ຈິ ທິຏ຺ຐໍ ວ ສຸຕໍ ມຸຕໍ ວາ;

ຕເມວ ທສ຺ສິໍ ວິວຏໍ ຈຣນ຺ຕໍ, ເກນີຘ ໂລກສ຺ມິ ວິກປ຺ປເຍຍ຺ຍ.

໘໐໐. ນ ກປ຺ປຍນ຺ຕິ ນ ປຸເຣກ຺ຂໂຣນ຺ຕິ, ອຈ຺ຈນ຺ຕສຸທ຺ຘີຕິ ນ ເຕ ວທນ຺ຕິ;

ອາທານຄນ຺ຖໍ ຄຖິຕໍ ວິສຊ຺ຊ, ອາສໍ ນ ກຸພ຺ພນ຺ຕິ ກຸຫິຎ຺ຈິ ໂລເກ.

໘໐໑. ສີມາຕິໂຄ ພ຺ຣາຫ຺ມໂຓ ຕສ຺ສ ນຕ຺ຖິ, ຎຕ຺ວາ ວ ທິສ຺ວາ ວ [ຎຕ຺ວາ ຈ ທິສ຺ວາ ຈ (ກ. ສີ. ກ.)] ສມຸຄ຺ຄຫີຕໍ;

ນ ຣາຄຣາຄີ ນ ວິຣາຄຣຕ຺ໂຕ, ຕສ຺ສີຘ ນຕ຺ຖີ ປຣມຸຄ຺ຄຫີຕນ຺ຕິ.

ສຸທ຺ຘຏ຺ຐກສຸຕ຺ຕໍ ຈຕຸຕ຺ຖໍ ນິຏ຺ຐິຕໍ.

໕. ປຣມຏ຺ຐກສຸຕ຺ຕໍ

໘໐໒. ປຣມນ຺ຕິ ທິຏ຺ຐີສຸ ປຣິພ຺ພສາໂນ, ຍທຸຕ຺ຕຣິ ກຸຣຸເຕ ຊນ຺ຕຸ ໂລເກ;

ຫີນາຕິ ອຎ຺ເຎ ຕໂຕ ສພ຺ພມາຫ, ຕສ຺ມາ ວິວາທານິ ອວີຕິວຕ຺ໂຕ.

໘໐໓. ຍທຕ຺ຕນີ ປສ຺ສຕິ ອານິສໍສໍ, ທິຏ຺ເຐ ສຸເຕ ສີລວເຕ [ສີລພ຺ພເຕ (ສ຺ຍາ.)] ມຸເຕ ວາ;

ຕເທວ ໂສ ຕຕ຺ຖ ສມຸຄ຺ຄຫາຍ, ນິຫີນໂຕ ປສ຺ສຕິ ສພ຺ພມຎ຺ຎໍ.

໘໐໔. ຕໍ ວາປິ ຄນ຺ຖໍ ກຸສລາ ວທນ຺ຕິ, ຍໍ ນິສ຺ສິໂຕ ປສ຺ສຕິ ຫີນມຎ຺ຎໍ;

ຕສ຺ມາ ຫິ ທິຏ຺ຐໍ ວ ສຸຕໍ ມຸຕໍ ວາ, ສີລພ຺ພຕໍ ຠິກ຺ຂຸ ນ ນິສ຺ສເຍຍ຺ຍ.

໘໐໕. ທິຏ຺ຐິມ຺ປິ ໂລກສ຺ມິໍ ນ ກປ຺ປເຍຍ຺ຍ, ຎາເຓນ ວາ ສີລວເຕນ ວາປິ;

ສໂມຕິ ອຕ຺ຕານມນູປເນຍ຺ຍ, ຫີໂນ ນ ມຎ຺ເຎຖ ວິເສສິ ວາປິ.

໘໐໖. ອຕ຺ຕໍ ປຫາຍ ອນຸປາທິຍາໂນ, ຎາເຓປິ ໂສ ນິສ຺ສຍໍ ໂນ ກໂຣຕິ;

ສ ເວ ວິຍຕ຺ເຕສຸ [ວິຍຸຕ຺ເຕສຸ (ສີ. ອຏ຺ຐ.), ທ຺ວິຍຕ຺ເຕສຸ (ກ.)] ນ ວຄ຺ຄສາຣີ, ທິຏ຺ຐິມ຺ປິ [ທິຏ຺ຐິມປິ (ກ.)] ໂສ ນ ປຈ຺ເຈຕິ ກິຎ຺ຈິ.

໘໐໗. ຍສ຺ສູຠຍນ຺ເຕ ປຓິຘີຘ ນຕ຺ຖິ, ຠວາຠວາຍ ອິຘ ວາ ຫຸຣໍ ວາ;

ນິເວສນາ ຕສ຺ສ ນ ສນ຺ຕິ ເກຈິ, ຘມ຺ເມສຸ ນິຈ຺ເຉຍ຺ຍ ສມຸຄ຺ຄຫີຕໍ.

໘໐໘. ຕສ຺ສີຘ ທິຏ຺ເຐ ວ ສຸເຕ ມຸເຕ ວາ, ປກປ຺ປິຕາ ນຕ຺ຖິ ອຓູປິ ສຎ຺ຎາ;

ຕໍ ພ຺ຣາຫ຺ມຓໍ ທິຏ຺ຐິມນາທິຍານໍ, ເກນີຘ ໂລກສ຺ມິໍ ວິກປ຺ປເຍຍ຺ຍ.

໘໐໙. ນ ກປ຺ປຍນ຺ຕິ ນ ປຸເຣກ຺ຂໂຣນ຺ຕິ, ຘມ຺ມາປິ ເຕສໍ ນ ປຏິຈ຺ຉິຕາເສ;

ນ ພ຺ຣາຫ຺ມໂຓ ສີລວເຕນ ເນຍ຺ໂຍ, ປາຣງ຺ຄໂຕ ນ ປຈ຺ເຈຕິ ຕາທີຕິ.

ປຣມຏ຺ຐກສຸຕ຺ຕໍ ປຎ຺ຈມໍ ນິຏ຺ຐິຕໍ.

໖. ຊຣາສຸຕ຺ຕໍ

໘໑໐. ອປ຺ປໍ ວຕ ຊີວິຕໍ ອິທໍ, ໂອຣໍ ວສ຺ສສຕາປິ ມິຍ຺ຍຕິ [ມີຍຕິ (ສີ. ອຏ຺ຐ.)];

ໂຍ ເຈປິ ອຕິຈ຺ຈ ຊີວຕິ, ອຖ ໂຂ ໂສ ຊຣສາປິ ມິຍ຺ຍຕິ.

໘໑໑. ໂສຈນ຺ຕິ ຊນາ ມມາຍິເຕ, ນ ຫິ ສນ຺ຕິ [ນ ຫິ ສນ຺ຕາ (ສີ.), ນ ຫີ ສນ຺ຕິ (ກຕ຺ຖຈິ)] ນິຈ຺ຈາ ປຣິຄ຺ຄຫາ;

ວິນາຠາວສນ຺ຕເມວິທໍ, ອິຕິ ທິສ຺ວາ ນາຄາຣມາວເສ.

໘໑໒. ມຣເຓນປິ ຕໍ ປຫີຍຕິ [ປຫິຍ຺ຍຕິ (ສີ. ສ຺ຍາ. ກ.)], ຍໍ ປຸຣິໂສ ມມິທນ຺ຕິ [ມມຍິທນ຺ຕິ (ສີ. ສ຺ຍາ. ກ.), ມມາຍນ຺ຕິ (ກ.)] ມຎ຺ຎຕິ;

ເອຕມ຺ປິ ວິທິຕ຺ວາ [ເອຕໍ ທິສ຺ວານ (ນິທ຺ເທເສ), ເອຕມ຺ປິ ວິທິຕ຺ວ (?)] ປຓ຺ຑິໂຕ, ນ ມມຕ຺ຕາຍ ນເມຖ ມາມໂກ.

໘໑໓. ສຸປິເນນ ຍຖາປິ ສງ຺ຄຕໍ, ປຏິພຸທ຺ໂຘ ປຸຣິໂສ ນ ປສ຺ສຕິ;

ເອວມ຺ປິ ປິຍາຍິຕໍ ຊນໍ, ເປຕໍ ກາລກຕໍ ນ ປສ຺ສຕິ.

໘໑໔. ທິຏ຺ຐາປິ ສຸຕາປິ ເຕ ຊນາ, ເຍສໍ ນາມມິທໍ ປວຸຈ຺ຈຕິ [ນາມເມວາ ວສິສ຺ສຕິ (ສີ. ສ຺ຍາ. ປີ.)];

ນາມໍເຍວາວສິສ຺ສຕິ, ອກ຺ເຂຍ຺ຍໍ ເປຕສ຺ສ ຊນ຺ຕຸໂນ.

໘໑໕. ໂສກປ຺ປຣິເທວມຈ຺ຉຣໍ [ໂສກປຣິເທວມຈ຺ຉຣໍ (ສີ. ສ຺ຍາ. ປີ.), ໂສກໍ ປຣິເທວມຈ຺ຉຣໍ (?)], ນ ຊຫນ຺ຕິ ຄິທ຺ຘາ ມມາຍິເຕ;

ຕສ຺ມາ ມຸນໂຍ ປຣິຄ຺ຄຫໍ, ຫິຕ຺ວາ ອຈຣິໍສຸ ເຂມທສ຺ສິໂນ.

໘໑໖. ປຕິລີນຈຣສ຺ສ ຠິກ຺ຂຸໂນ, ຠຊມານສ຺ສ ວິວິຕ຺ຕມາສນໍ;

ສາມຄ຺ຄິຍມາຫຸ ຕສ຺ສ ຕໍ, ໂຍ ອຕ຺ຕານໍ ຠວເນ ນ ທສ຺ສເຍ.

໘໑໗. ສພ຺ພຕ຺ຖ ມຸນີ ອນິສ຺ສິໂຕ, ນ ປິຍໍ ກຸພ຺ພຕິ ໂນປິ ອປ຺ປິຍໍ;

ຕສ຺ມິໍ ປຣິເທວມຈ຺ຉຣໍ, ປຓ຺ເຓ ວາຣິ ຍຖາ ນ ລິມ຺ປຕິ [ລິປ຺ປຕິ (ສີ. ປີ.)].

໘໑໘. ອຸທພິນ຺ທຸ ຍຖາປິ ໂປກ຺ຂເຣ, ປທຸເມ ວາຣິ ຍຖາ ນ ລິມ຺ປຕິ;

ເອວໍ ມຸນິ ໂນປລິມ຺ປຕິ, ຍທິທໍ ທິຏ຺ຐສຸຕໍ ມຸເຕສຸ ວາ.

໘໑໙. ໂຘໂນ ນ ຫິ ເຕນ ມຎ຺ຎຕິ, ຍທິທໍ ທິຏ຺ຐສຸຕໍ ມຸເຕສຸ ວາ;

ນາຎ຺ເຎນ ວິສຸທ຺ຘິມິຈ຺ຉຕິ, ນ ຫິ ໂສ ຣຊ຺ຊຕິ ໂນ ວິຣຊ຺ຊຕີຕິ.

ຊຣາສຸຕ຺ຕໍ ຉຏ຺ຐໍ ນິຏ຺ຐິຕໍ.

໗. ຕິສ຺ສເມຕ຺ເຕຍ຺ຍສຸຕ຺ຕໍ

໘໒໐. ‘‘ເມຖຸນມນຸຍຸຕ຺ຕສ຺ສ, (ອິຈ຺ຈາຍສ຺ມາ ຕິສ຺ໂສ ເມຕ຺ເຕຍ຺ໂຍ) ວິຆາຕໍ ພ຺ຣູຫິ ມາຣິສ;

ສຸຕ຺ວານ ຕວ ສາສນໍ, ວິເວເກ ສິກ຺ຂິສ຺ສາມເສ.

໘໒໑. ‘‘ເມຖຸນມນຸຍຸຕ຺ຕສ຺ສ, (ເມຕ຺ເຕຍ຺ຍາຕິ ຠຄວາ) ມຸສ຺ສເຕ ວາປິ ສາສນໍ;

ມິຈ຺ຉາ ຈ ປຏິປຊ຺ຊຕິ, ເອຕໍ ຕສ຺ມິໍ ອນາຣິຍໍ.

໘໒໒. ‘‘ເອໂກ ປຸພ຺ເພ ຈຣິຕ຺ວານ, ເມຖຸນໍ ໂຍ ນິເສວຕິ;

ຍານໍ ຠນ຺ຕໍ ວ ຕໍ ໂລເກ, ຫີນມາຫຸ ປຸຖຸຊ຺ຊນໍ.

໘໒໓. ‘‘ຍໂສ ກິຕ຺ຕິ ຈ ຍາ ປຸພ຺ເພ, ຫາຍເຕ ວາປິ ຕສ຺ສ ສາ;

ເອຕມ຺ປິ ທິສ຺ວາ ສິກ຺ເຂຖ, ເມຖຸນໍ ວິປ຺ປຫາຕເວ.

໘໒໔. ‘‘ສງ຺ກປ຺ເປຫິ ປເຣໂຕ ໂສ, ກປໂຓ ວິຍ ຌາຍຕິ;

ສຸຕ຺ວາ ປເຣສໍ ນິຄ຺ໂຆສໍ, ມງ຺ກຸ ໂຫຕິ ຕຖາວິໂຘ.

໘໒໕. ‘‘ອຖ ສຕ຺ຖານິ ກຸຣຸເຕ, ປຣວາເທຫິ ໂຈທິໂຕ;

ເອສ ຂ຺ວສ຺ສ ມຫາເຄໂຘ, ໂມສວຊ຺ຊໍ ປຄາຫຕິ.

໘໒໖. ‘‘ປຓ຺ຑິໂຕຕິ ສມຎ຺ຎາໂຕ, ເອກຈຣິຍໍ ອຘິຏ຺ຐິໂຕ;

ອຖາປິ [ສ ຈາປິ (ນິທ຺ເທເສ)] ເມຖຸເນ ຍຸຕ຺ໂຕ, ມນ຺ໂທວ ປຣິກິສ຺ສຕິ [ປຣິກິລິສ຺ສຕິ (ສີ.)].

໘໒໗. ‘‘ເອຕມາທີນວໍ ຎຕ຺ວາ, ມຸນິ ປຸພ຺ພາປເຣ ອິຘ;

ເອກຈຣິຍໍ ທຬ຺ຫໍ ກຍິຣາ, ນ ນິເສເວຖ ເມຖຸນໍ.

໘໒໘. ‘‘ວິເວກຎ຺ເຎວ ສິກ຺ເຂຖ, ເອຕທຣິຍານມຸຕ຺ຕມໍ;

ນ ເຕນ ເສຏ຺ໂຐ ມຎ຺ເຎຖ, ສ ເວ ນິພ຺ພານສນ຺ຕິເກ.

໘໒໙. ‘‘ຣິຕ຺ຕສ຺ສ ມຸນິໂນ ຈຣໂຕ, ກາເມສຸ ອນເປກ຺ຂິໂນ;

ໂອຆຕິຓ຺ຓສ຺ສ ປິຫຍນ຺ຕິ, ກາເມສຸ ຄຘິຕາ [ຄຖິຕາ (ສີ.)] ປຊາ’’ຕິ.

ຕິສ຺ສເມຕ຺ເຕຍ຺ຍສຸຕ຺ຕໍ ສຕ຺ຕມໍ ນິຏ຺ຐິຕໍ.

໘. ປສູຣສຸຕ຺ຕໍ

໘໓໐. ອິເຘວ ສຸທ຺ຘິ ອິຕິ ວາທຍນ຺ຕິ [ວິທິຍນ຺ຕິ (ສີ. ປີ.)], ນາຎ຺ເຎສຸ ຘມ຺ເມສຸ ວິສຸທ຺ຘິມາຫຸ;

ຍໍ ນິສ຺ສິຕາ ຕຕ຺ຖ ສຸຠໍ ວທານາ, ປຈ຺ເຈກສຈ຺ເຈສຸ ປຸຖູ ນິວິຏ຺ຐາ.

໘໓໑. ເຕ ວາທກາມາ ປຣິສໍ ວິຄຍ຺ຫ, ພາລໍ ທຫນ຺ຕີ ມິຖຸ ອຎ຺ຎມຎ຺ຎໍ;

ວທນ຺ຕິ ເຕ ອຎ຺ຎສິຕາ ກໂຖຊ຺ຊໍ, ປສໍສກາມາ ກຸສລາ ວທານາ.

໘໓໒. ຍຸຕ຺ໂຕ ກຖາຍໍ ປຣິສາຍ ມຊ຺ເຌ, ປສໍສມິຈ຺ຉໍ ວິນິຆາຕິ ໂຫຕິ;

ອປາຫຕສ຺ມິໍ ປນ ມງ຺ກຸ ໂຫຕິ, ນິນ຺ທາຍ ໂສ ກຸປ຺ປຕິ ຣນ຺ຘເມສີ.

໘໓໓. ຍມສ຺ສ ວາທໍ ປຣິຫີນມາຫຸ, ອປາຫຕໍ ປຎ຺ຫວິມໍສກາເສ;

ປຣິເທວຕິ ໂສຈຕິ ຫີນວາໂທ, ອຸປຈ຺ຈຄາ ມນ຺ຕິ ອນຸຕ຺ຖຸນາຕິ.

໘໓໔. ເອເຕ ວິວາທາ ສມເຓສຸ ຊາຕາ, ເອເຕສຸ ອຸຄ຺ຆາຕິ ນິຆາຕິ ໂຫຕິ;

ເອຕມ຺ປິ ທິສ຺ວາ ວິຣເມ ກໂຖຊ຺ຊໍ, ນ ຫຎ຺ຎທຕ຺ຖຕ຺ຖິປສໍສລາຠາ.

໘໓໕. ປສໍສິໂຕ ວາ ປນ ຕຕ຺ຖ ໂຫຕິ, ອກ຺ຂາຍ ວາທໍ ປຣິສາຍ ມຊ຺ເຌ;

ໂສ ຫສ຺ສຕີ ອຸຓ຺ຓມຕີ [ອຸນ຺ນມຕີ (?)] ຈ ເຕນ, ປປ຺ປຸຍ຺ຍ ຕມຕ຺ຖໍ ຍຖາ ມໂນ ອຫຸ.

໘໓໖. ຍາ ອຸຓ຺ຓຕີ [ອຸນ຺ນຕີ (?)] ສາສ຺ສ ວິຆາຕຠູມິ, ມານາຕິມານໍ ວທເຕ ປເນໂສ;

ເອຕມ຺ປິ ທິສ຺ວາ ນ ວິວາທເຍຖ, ນ ຫິ ເຕນ ສຸທ຺ຘິໍ ກຸສລາ ວທນ຺ຕິ.

໘໓໗. ສູໂຣ ຍຖາ ຣາຊຂາທາຍ ປຸຏ຺ໂຐ, ອຠິຄຊ຺ຊເມຕິ ປຏິສູຣມິຈ຺ຉໍ;

ເຍເນວ ໂສ ເຕນ ປເລຫິ ສູຣ, ປຸພ຺ເພວ ນຕ຺ຖິ ຍທິທໍ ຍຸຘາຍ.

໘໓໘. ເຍ ທິຏ຺ຐິມຸຄ຺ຄຍ຺ຫ ວິວາທຍນ຺ຕິ [ວິວາທິຍນ຺ຕິ (ສີ. ປີ.)], ອິທເມວ ສຈ຺ຈນ຺ຕິ ຈ ວາທຍນ຺ຕິ;

ເຕ ຕ຺ວໍ ວທສ຺ສູ ນ ຫິ ເຕຘ ອຕ຺ຖິ, ວາທມ຺ຫິ ຊາເຕ ປຏິເສນິກຕ຺ຕາ.