໑໖. ສາຣິປຸຕ຺ຕສຸຕ຺ຕໍ

໙໖໑. ‘‘ນ ເມ ທິຏ຺ໂຐ ອິໂຕ ປຸພ຺ເພ, (ອິຈ຺ຈາຍສ຺ມາ ສາຣິປຸຕ຺ໂຕ)

ນ ສຸໂຕ ອຸທ ກສ຺ສຈິ;

ເອວໍ ວຄ຺ຄຸວໂທ ສຕ຺ຖາ,

ຕຸສິຕາ ຄຓິມາຄໂຕ.

໙໖໒. ‘‘ສເທວກສ຺ສ ໂລກສ຺ສ, ຍຖາ ທິສ຺ສຕິ ຈກ຺ຂຸມາ;

ສພ຺ພໍ ຕມໍ ວິໂນເທຕ຺ວາ, ເອໂກວ ຣຕິມຊ຺ຌຄາ.

໙໖໓. ‘‘ຕໍ ພຸທ຺ຘໍ ອສິຕໍ ຕາທິໍ, ອກຸຫໍ ຄຓິມາຄຕໍ;

ພຫູນມິຘ ພທ຺ຘານໍ, ອຕ຺ຖິ ປຎ຺ເຫນ ອາຄມໍ.

໙໖໔. ‘‘ຠິກ຺ຂຸໂນ ວິຊິຄຸຈ຺ຉໂຕ, ຠຊໂຕ ຣິຕ຺ຕມາສນໍ;

ຣຸກ຺ຂມູລໍ ສຸສານໍ ວາ, ປພ຺ພຕານໍ ຄຸຫາສຸ ວາ.

໙໖໕. ‘‘ອຸຈ຺ຈາວເຈສຸ ສຍເນສຸ, ກີວນ຺ໂຕ ຕຕ຺ຖ ເຠຣວາ;

ເຍຫິ ຠິກ຺ຂຸ ນ ເວເຘຍ຺ຍ, ນິຄ຺ໂຆເສ ສຍນາສເນ.

໙໖໖. ‘‘ກຕີ ປຣິສ຺ສຍາ ໂລເກ, ຄຈ຺ຉໂຕ ອຄຕໍ ທິສໍ;

ເຍ ຠິກ຺ຂຸ ອຠິສມ຺ຠເວ, ປນ຺ຕມ຺ຫິ ສຍນາສເນ.

໙໖໗. ‘‘ກ຺ຍາສ຺ສ ພ຺ຍປ຺ປຖໂຍ ອສ຺ສຸ, ກ຺ຍາສ຺ສສ຺ສຸ ອິຘ ໂຄຈຣາ;

ການິ ສີລພ຺ພຕານາສ຺ສຸ, ປຫິຕຕ຺ຕສ຺ສ ຠິກ຺ຂຸໂນ.

໙໖໘. ‘‘ກໍ ໂສ ສິກ຺ຂໍ ສມາທາຍ, ເອໂກທິ ນິປໂກ ສໂຕ;

ກມ຺ມາໂຣ ຣຊຕສ຺ເສວ, ນິທ຺ຘເມ ມລມຕ຺ຕໂນ’’.

໙໖໙. ‘‘ວິຊິຄຸຈ຺ຉມານສ຺ສ ຍທິທໍ ຜາສຸ, (ສາຣິປຸຕ຺ຕາຕິ ຠຄວາ)

ຣິຕ຺ຕາສນໍ ສຍນໍ ເສວໂຕ ເຈ;

ສມ຺ໂພຘິກາມສ຺ສ ຍຖານຸຘມ຺ມໍ,

ຕໍ ເຕ ປວກ຺ຂາມິ ຍຖາ ປຊານໍ.

໙໗໐. ‘‘ປຎ຺ຈນ຺ນໍ ຘີໂຣ ຠຍານໍ ນ ຠາເຍ, ຠິກ຺ຂຸ ສໂຕ ສປຣິຍນ຺ຕຈາຣີ;

ຑໍສາຘິປາຕານໍ ສຣີສປານໍ, ມນຸສ຺ສຜສ຺ສານໍ ຈຕຸປ຺ປທານໍ.

໙໗໑. ‘‘ປຣຘມ຺ມິການມ຺ປິ ນ ສນ຺ຕເສຍ຺ຍ, ທິສ຺ວາປິ ເຕສໍ ພຫຸເຠຣວານິ;

ອຖາປຣານິ ອຠິສມ຺ຠເວຍ຺ຍ, ປຣິສ຺ສຍານິ ກຸສລານຸເອສີ.

໙໗໒. ‘‘ອາຕງ຺ກຜສ຺ເສນ ຂຸທາຍ ຜຸຏ຺ໂຐ, ສີຕໍ ອຕຸຓ຺ຫໍ [ອຈ຺ຈຸຓ຺ຫໍ (ສີ. ສ຺ຍາ.)] ອຘິວາສເຍຍ຺ຍ;

ໂສ ເຕຫິ ຜຸຏ຺ໂຐ ພຫຸຘາ ອໂນໂກ, ວີຣິຍໍ ປຣກ຺ກມ຺ມທຬ຺ຫໍ ກເຣຍ຺ຍ.

໙໗໓. ‘‘ເຖຍ຺ຍໍ ນ ກາເຣ [ນ ກເຣຍ຺ຍ (ສີ. ສ຺ຍາ. ກ.)] ນ ມຸສາ ຠເຓຍ຺ຍ, ເມຕ຺ຕາຍ ຜສ຺ເສ ຕສຖາວຣານິ;

ຍທາວິລຕ຺ຕໍ ມນໂສ ວິຊຎ຺ຎາ, ກຓ຺ຫສ຺ສ ປກ຺ໂຂຕິ ວິໂນທເຍຍ຺ຍ.

໙໗໔. ‘‘ໂກຘາຕິມານສ຺ສ ວສໍ ນ ຄຈ຺ເຉ, ມູລມ຺ປິ ເຕສໍ ປລິຂຎ຺ຎ ຕິຏ຺ເຐ;

ອຖປ຺ປິຍໍ ວາ ປນ ອປ຺ປິຍໍ ວາ, ອທ຺ຘາ ຠວນ຺ໂຕ ອຠິສມ຺ຠເວຍ຺ຍ.

໙໗໕. ‘‘ປຎ຺ຎໍ ປຸຣກ຺ຂຕ຺ວາ ກລ຺ຍາຓປີຕິ, ວິກ຺ຂມ຺ຠເຍ ຕານິ ປຣິສ຺ສຍານິ;

ອຣຕິໍ ສເຫຖ ສຍນມ຺ຫິ ປນ຺ເຕ, ຈຕຸໂຣ ສເຫຖ ປຣິເທວຘມ຺ເມ.

໙໗໖. ‘‘ກິໍສູ ອສິສ຺ສາມິ ກຸວໍ ວາ [ກຸຘ ວາ (ກ.), ກຸຖ ວາ (ນິທ຺ເທສ)] ອສິສ຺ສໍ, ທຸກ຺ຂໍ ວຕ ເສຕ຺ຖ ກ຺ວຊ຺ຊ ເສສ຺ສໍ;

ເອເຕ ວິຕກ຺ເກ ປຣິເທວເນຍ຺ເຍ, ວິນເຍຖ ເສໂຂ ອນິເກຕຈາຣີ.

໙໗໗. ‘‘ອນ຺ນຎ຺ຈ ລທ຺ຘາ ວສນຎ຺ຈ ກາເລ, ມຕ຺ຕໍ ໂສ ຊຎ຺ຎາ ອິຘ ໂຕສນຕ຺ຖໍ;

ໂສ ເຕສຸ ຄຸຕ຺ໂຕ ຍຕຈາຣິ ຄາເມ, ຣຸສິໂຕປິ ວາຈໍ ຜຣຸສໍ ນ ວຊ຺ຊາ.

໙໗໘. ‘‘ໂອກ຺ຂິຕ຺ຕຈກ຺ຂຸ ນ ຈ ປາທໂລໂລ, ຌານານຸຍຸຕ຺ໂຕ ພຫຸຊາຄຣສ຺ສ;

ອຸເປກ຺ຂມາຣພ຺ຠ ສມາຫິຕຕ຺ໂຕ, ຕກ຺ກາສຍໍ ກຸກ຺ກຸຈ຺ຈິຍູປຉິນ຺ເທ.

໙໗໙. ‘‘ຈຸທິໂຕ ວຈີຠິ ສຕິມາຠິນນ຺ເທ, ສພ຺ຣຫ຺ມຈາຣີສຸ ຂິລໍ ປຠິນ຺ເທ;

ວາຈໍ ປມຸຎ຺ເຈ ກຸສລໍ ນາຕິເວລໍ, ຊນວາທຘມ຺ມາຍ ນ ເຈຕເຍຍ຺ຍ.

໙໘໐. ‘‘ອຖາປຣໍ ປຎ຺ຈ ຣຊານິ ໂລເກ, ເຍສໍ ສຕີມາ ວິນຍາຍ ສິກ຺ເຂ;

ຣູເປສຸ ສທ຺ເທສຸ ອໂຖ ຣເສສຸ, ຄນ຺ເຘສຸ ຜສ຺ເສສຸ ສເຫຖ ຣາຄໍ.

໙໘໑. ‘‘ເອເຕສຸ ຘມ຺ເມສຸ ວິເນຍ຺ຍ ຉນ຺ທໍ, ຠິກ຺ຂຸ ສຕິມາ ສຸວິມຸຕ຺ຕຈິຕ຺ໂຕ;

ກາເລນ ໂສ ສມ຺ມາ ຘມ຺ມໍ ປຣິວີມໍສມາໂນ,

ເອໂກທິຠູໂຕ ວິຫເນ ຕມໍ ໂສ’’ຕິ.

ສາຣິປຸຕ຺ຕສຸຕ຺ຕໍ ໂສຬສມໍ ນິຏ຺ຐິຕໍ.

ອຏ຺ຐກວຄ຺ໂຄ ຈຕຸຕ຺ໂຖ