໗. ພ຺ຣາຫ຺ມຓຘມ຺ມິກສຸຕ຺ຕໍ

ເອວໍ ເມ ສຸຕໍ – ເອກໍ ສມຍໍ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ອຖ ໂຂ ສມ຺ພຫຸລາ ໂກສລກາ ພ຺ຣາຫ຺ມຓມຫາສາລາ ຊິຓ຺ຓາ ວຸຑ຺ຒາ ມຫລ຺ລກາ ອທ຺ຘຄຕາ ວໂຍອນຸປ຺ປຕ຺ຕາ ເຍນ ຠຄວາ ເຕນຸປສງ຺ກມິໍສຸ; ອຸປສງ຺ກມິຕ຺ວາ ຠຄວຕາ ສທ຺ຘິໍ ສມ຺ໂມທິໍສຸ. ສມ຺ໂມທນີຍໍ ກຖໍ ສາຣຓີຍໍ ວີຕິສາເຣຕ຺ວາ ເອກມນ຺ຕໍ ນິສີທິໍສຸ. ເອກມນ຺ຕໍ ນິສິນ຺ນາ ໂຂ ເຕ ພ຺ຣາຫ຺ມຓມຫາສາລາ ຠຄວນ຺ຕໍ ເອຕທໂວຈຸໍ – ‘‘ສນ຺ທິສ຺ສນ຺ຕິ ນຸ ໂຂ, ໂຠ ໂຄຕມ, ເອຕຣຫິ ພ຺ຣາຫ຺ມຓາ ໂປຣາຓານໍ ພ຺ຣາຫ຺ມຓານໍ ພ຺ຣາຫ຺ມຓຘມ຺ເມ’’ຕິ? ‘‘ນ ໂຂ, ພ຺ຣາຫ຺ມຓາ, ສນ຺ທິສ຺ສນ຺ຕິ ເອຕຣຫິ ພ຺ຣາຫ຺ມຓາ ໂປຣາຓານໍ ພ຺ຣາຫ຺ມຓານໍ ພ຺ຣາຫ຺ມຓຘມ຺ເມ’’ຕິ. ‘‘ສາຘຸ ໂນ ຠວໍ ໂຄຕໂມ ໂປຣາຓານໍ ພ຺ຣາຫ຺ມຓານໍ ພ຺ຣາຫ຺ມຓຘມ຺ມໍ ຠາສຕຸ, ສເຈ ໂຠໂຕ ໂຄຕມສ຺ສ ອຄຣູ’’ຕິ. ‘‘ເຕນ ຫິ, ພ຺ຣາຫ຺ມຓາ, ສຸຓາຖ, ສາຘຸກໍ ມນສິ ກໂຣຖ, ຠາສິສ຺ສາມີ’’ຕິ. ‘‘ເອວໍ, ໂຠ’’ຕິ ໂຂ ເຕ ພ຺ຣາຫ຺ມຓມຫາສາລາ ຠຄວໂຕ ປຈ຺ຈສ຺ໂສສຸໍ. ຠຄວາ ເອຕທໂວຈ –

໒໘໖. ‘‘ອິສໂຍ ປຸພ຺ພກາ ອາສຸໍ, ສຎ຺ຎຕຕ຺ຕາ ຕປສ຺ສິໂນ;

ປຎ຺ຈ ກາມຄຸເຓ ຫິຕ຺ວາ, ອຕ຺ຕທຕ຺ຖມຈາຣິສຸໍ.

໒໘໗. ‘‘ນ ປສູ ພ຺ຣາຫ຺ມຓານາສຸໍ, ນ ຫິຣຎ຺ຎໍ ນ ຘານິຍໍ;

ສຊ຺ຌາຍຘນຘຎ຺ຎາສຸໍ, ພ຺ຣຫ຺ມໍ ນິຘິມປາລຍຸໍ.

໒໘໘. ‘‘ຍໍ ເນສໍ ປກຕໍ ອາສິ, ທ຺ວາຣຠຕ຺ຕໍ ອຸປຏ຺ຐິຕໍ;

ສທ຺ຘາປກຕເມສານໍ, ທາຕເວ ຕທມຎ຺ຎິສຸໍ.

໒໘໙. ‘‘ນານາຣຕ຺ເຕຫິ ວຕ຺ເຖຫິ, ສຍເນຫາວສເຖຫິ ຈ;

ຜີຕາ ຊນປທາ ຣຏ຺ຐາ, ເຕ ນມສ຺ສິໍສຸ ພ຺ຣາຫ຺ມເຓ.

໒໙໐. ‘‘ອວຊ຺ຌາ ພ຺ຣາຫ຺ມຓາ ອາສຸໍ, ອເຊຍ຺ຍາ ຘມ຺ມຣກ຺ຂິຕາ;

ນ ເນ ໂກຈິ ນິວາເຣສິ, ກຸລທ຺ວາເຣສຸ ສພ຺ພໂສ.

໒໙໑. ‘‘ອຏ຺ຐຈຕ຺ຕາລີສໍ ວສ຺ສານິ, (ໂກມາຣ) ພ຺ຣຫ຺ມຈຣິຍໍ ຈຣິໍສຸ ເຕ;

ວິຊ຺ຊາຈຣຓປຣິເຍຏ຺ຐິໍ, ອຈຣຸໍ ພ຺ຣາຫ຺ມຓາ ປຸເຣ.

໒໙໒. ‘‘ນ ພ຺ຣາຫ຺ມຓາ ອຎ຺ຎມຄມຸໍ, ນປິ ຠຣິຍໍ ກິຓິໍສຸ ເຕ;

ສມ຺ປິເຍເນວ ສໍວາສໍ, ສງ຺ຄນ຺ຕ຺ວາ ສມໂຣຈຍຸໍ.

໒໙໓. ‘‘ອຎ຺ຎຕ຺ຣ ຕມ຺ຫາ ສມຍາ, ອຸຕຸເວຣມຓິໍ ປຕິ;

ອນ຺ຕຣາ ເມຖຸນໍ ຘມ຺ມໍ, ນາສ຺ສຸ ຄຈ຺ຉນ຺ຕິ ພ຺ຣາຫ຺ມຓາ.

໒໙໔. ‘‘ພ຺ຣຫ຺ມຈຣິຍຎ຺ຈ ສີລຎ຺ຈ, ອຊ຺ຊວໍ ມທ຺ທວໍ ຕປໍ;

ໂສຣຈ຺ຈໍ ອວິຫິໍສຎ຺ຈ, ຂນ຺ຕິຎ຺ຈາປິ ອວຓ຺ຓຍຸໍ.

໒໙໕. ‘‘ໂຍ ເນສໍ ປຣໂມ ອາສິ, ພ຺ຣຫ຺ມາ ທຬ຺ຫປຣກ຺ກໂມ;

ສ ວາປິ ເມຖຸນໍ ຘມ຺ມໍ, ສຸປິນນ຺ເຕປິ ນາຄມາ.

໒໙໖. ‘‘ຕສ຺ສ ວຕ຺ຕມນຸສິກ຺ຂນ຺ຕາ, ອິເຘເກ ວິຎ຺ຎຸຊາຕິກາ;

ພ຺ຣຫ຺ມຈຣິຍຎ຺ຈ ສີລຎ຺ຈ, ຂນ຺ຕິຎ຺ຈາປິ ອວຓ຺ຓຍຸໍ.

໒໙໗. ‘‘ຕຓ຺ຑຸລໍ ສຍນໍ ວຕ຺ຖໍ, ສປ຺ປິເຕລຎ຺ຈ ຍາຈິຍ;

ຘມ຺ເມນ ສໂມຘາເນຕ຺ວາ, ຕໂຕ ຍຎ຺ຎມກປ຺ປຍຸໍ.

໒໙໘. ‘‘ອຸປຏ຺ຐິຕສ຺ມິໍ ຍຎ຺ຎສ຺ມິໍ, ນາສ຺ສຸ ຄາໂວ ຫນິໍສຸ ເຕ;

ຍຖາ ມາຕາ ປິຕາ ຠາຕາ, ອຎ຺ເຎ ວາປິ ຈ ຎາຕກາ;

ຄາໂວ ໂນ ປຣມາ ມິຕ຺ຕາ, ຍາສຸ ຊາຍນ຺ຕິ ໂອສຘາ.

໒໙໙. ‘‘ອນ຺ນທາ ພລທາ ເຈຕາ, ວຓ຺ຓທາ ສຸຂທາ ຕຖາ [ສຸຂທາ ຈ ຕາ (ກ.)];

ເອຕມຕ຺ຖວສໍ ຎຕ຺ວາ, ນາສ຺ສຸ ຄາໂວ ຫນິໍສຸ ເຕ.

໓໐໐. ‘‘ສຸຂຸມາລາ ມຫາກາຍາ, ວຓ຺ຓວນ຺ໂຕ ຍສສ຺ສິໂນ;

ພ຺ຣາຫ຺ມຓາ ເສຫິ ຘມ຺ເມຫິ, ກິຈ຺ຈາກິຈ຺ເຈສຸ ອຸສ຺ສຸກາ;

ຍາວ ໂລເກ ອວຕ຺ຕິໍສຸ, ສຸຂເມຘິຕ຺ຖຍໍ ປຊາ.

໓໐໑. ‘‘ເຕສໍ ອາສິ ວິປລ຺ລາໂສ, ທິສ຺ວານ ອຓຸໂຕ ອຓຸໍ;

ຣາຊິໂນ ຈ ວິຍາກາຣໍ, ນາຣິໂຍ ສມລງ຺ກຕາ.

໓໐໒. ‘‘ຣເຖ ຈາຊຎ຺ຎສໍຍຸຕ຺ເຕ, ສຸກເຕ ຈິຕ຺ຕສິພ຺ພເນ;

ນິເວສເນ ນິເວເສ ຈ, ວິຠຕ຺ເຕ ຠາຄໂສ ມິເຕ.

໓໐໓. ‘‘ໂຄມຓ຺ຑລປຣິພ຺ຍູຬ຺ຫໍ, ນາຣີວຣຄຓາຍຸຕໍ;

ອຸຬາຣໍ ມານຸສໍ ໂຠຄໍ, ອຠິຊ຺ຌາຍິໍສຸ ພ຺ຣາຫ຺ມຓາ.

໓໐໔. ‘‘ເຕ ຕຕ຺ຖ ມນ຺ເຕ ຄນ຺ເຖຕ຺ວາ, ໂອກ຺ກາກໍ ຕທຸປາຄມຸໍ;

ປຫູຕຘນຘຎ຺ໂຎສິ, ຍຊສ຺ສຸ ພຫຸ ເຕ ວິຕ຺ຕໍ;

ຍຊສ຺ສຸ ພຫຸ ເຕ ຘນໍ.

໓໐໕. ‘‘ຕໂຕ ຈ ຣາຊາ ສຎ຺ຎຕ຺ໂຕ, ພ຺ຣາຫ຺ມເຓຫິ ຣເຖສໂຠ;

ອສ຺ສເມຘໍ ປຸຣິສເມຘໍ, ສມ຺ມາປາສໍ ວາຊເປຍ຺ຍໍ ນິຣຄ຺ຄຬໍ;

ເອເຕ ຍາເຄ ຍຊິຕ຺ວານ, ພ຺ຣາຫ຺ມຓານມທາ ຘນໍ.

໓໐໖. ‘‘ຄາໂວ ສຍນຎ຺ຈ ວຕ຺ຖຎ຺ຈ, ນາຣິໂຍ ສມລງ຺ກຕາ;

ຣເຖ ຈາຊຎ຺ຎສໍຍຸຕ຺ເຕ, ສຸກເຕ ຈິຕ຺ຕສິພ຺ພເນ.

໓໐໗. ‘‘ນິເວສນານິ ຣມ຺ມານິ, ສຸວິຠຕ຺ຕານິ ຠາຄໂສ;

ນານາຘຎ຺ຎສ຺ສ ປູເຣຕ຺ວາ, ພ຺ຣາຫ຺ມຓານມທາ ຘນໍ.

໓໐໘. ‘‘ເຕ ຈ ຕຕ຺ຖ ຘນໍ ລທ຺ຘາ, ສນ຺ນິຘິໍ ສມໂຣຈຍຸໍ;

ເຕສໍ ອິຈ຺ຉາວຕິຓ຺ຓານໍ, ຠິຍ຺ໂຍ ຕຓ຺ຫາ ປວຑ຺ຒຖ;

ເຕ ຕຕ຺ຖ ມນ຺ເຕ ຄນ຺ເຖຕ຺ວາ, ໂອກ຺ກາກໍ ປຸນມຸປາຄມຸໍ.

໓໐໙. ‘‘ຍຖາ ອາໂປ ຈ ປຖວີ ຈ, ຫິຣຎ຺ຎໍ ຘນຘານິຍໍ;

ເອວໍ ຄາໂວ ມນຸສ຺ສານໍ, ປຣິກ຺ຂາໂຣ ໂສ ຫິ ປາຓິນໍ;

ຍຊສ຺ສຸ ພຫຸ ເຕ ວິຕ຺ຕໍ, ຍຊສ຺ສຸ ພຫຸ ເຕ ຘນໍ.

໓໑໐. ‘‘ຕໂຕ ຈ ຣາຊາ ສຎ຺ຎຕ຺ໂຕ, ພ຺ຣາຫ຺ມເຓຫິ ຣເຖສໂຠ;

ເນກາ ສຕສຫສ຺ສິໂຍ, ຄາໂວ ຍຎ຺ເຎ ອຆາຕຍິ.

໓໑໑. ‘‘ນ ປາທາ ນ ວິສາເຓນ, ນາສ຺ສຸ ຫິໍສນ຺ຕິ ເກນຈິ;

ຄາໂວ ເອຬກສມານາ, ໂສຣຕາ ກຸມ຺ຠທູຫນາ;

ຕາ ວິສາເຓ ຄເຫຕ຺ວານ, ຣາຊາ ສຕ຺ເຖນ ຆາຕຍິ.

໓໑໒. ‘‘ຕໂຕ ເທວາ ປິຕໂຣ ຈ [ຕໂຕ ຈ ເທວາ ປິຕໂຣ (ສີ. ສ຺ຍາ.)], ອິນ຺ໂທ ອສຸຣຣກ຺ຂສາ;

ອຘມ຺ໂມ ອິຕິ ປກ຺ກນ຺ທຸໍ, ຍໍ ສຕ຺ຖໍ ນິປຕີ ຄເວ.

໓໑໓. ‘‘ຕໂຍ ໂຣຄາ ປຸເຣ ອາສຸໍ, ອິຈ຺ຉາ ອນສນໍ ຊຣາ;

ປສູນຎ຺ຈ ສມາຣມ຺ຠາ, ອຏ຺ຐານວຸຕິມາຄມຸໍ.

໓໑໔. ‘‘ເອໂສ ອຘມ຺ໂມ ທຓ຺ຑານໍ, ໂອກ຺ກນ຺ໂຕ ປຸຣາໂຓ ອຫຸ;

ອທູສິກາໂຍ ຫຎ຺ຎນ຺ຕິ, ຘມ຺ມາ ຘໍສນ຺ຕິ [ຘໍເສນ຺ຕິ (ສີ. ປີ.)] ຍາຊກາ.

໓໑໕. ‘‘ເອວເມໂສ ອຓຸຘມ຺ໂມ, ໂປຣາໂຓ ວິຎ຺ຎຸຄຣຫິໂຕ;

ຍຕ຺ຖ ເອທິສກໍ ປສ຺ສຕິ, ຍາຊກໍ ຄຣຫຕີ [ຄຣຫີ (ກ.)] ຊໂນ.

໓໑໖. ‘‘ເອວໍ ຘມ຺ເມ ວິຍາປນ຺ເນ, ວິຠິນ຺ນາ ສຸທ຺ທເວສ຺ສິກາ;

ປຸຖູ ວິຠິນ຺ນາ ຂຕ຺ຕິຍາ, ປຕິໍ ຠຣິຍາວມຎ຺ຎຖ.

໓໑໗. ‘‘ຂຕ຺ຕິຍາ ພ຺ຣຫ຺ມພນ຺ຘູ ຈ, ເຍ ຈຎ຺ເຎ ໂຄຕ຺ຕຣກ຺ຂິຕາ;

ຊາຕິວາທໍ ນິຣໍກຕ຺ວາ [ນິຣາກຕ຺ວາ (?) ຍຖາ ອນິຣາກຕຊ຺ຌາໂນຕິ], ກາມານໍ ວສມນ຺ວຄຸ’’ນ຺ຕິ.

ເອວໍ ວຸຕ຺ເຕ, ເຕ ພ຺ຣາຫ຺ມຓມຫາສາລາ ຠຄວນ຺ຕໍ ເອຕທໂວຈຸໍ – ‘‘ອຠິກ຺ກນ຺ຕໍ, ໂຠ ໂຄຕມ…ເປ. … ອຸປາສເກ ໂນ ຠວໍ ໂຄຕໂມ ຘາເຣຕຸ ອຊ຺ຊຕຄ຺ເຄ ປາຓຸເປເຕ ສຣຓໍ ຄເຕ’’ຕິ.

ພ຺ຣາຫ຺ມຓຘມ຺ມິກສຸຕ຺ຕໍ ສຕ຺ຕມໍ ນິຏ຺ຐິຕໍ.