໘. ນາວາສຸຕ຺ຕໍ

໓໑໘. ຍສ຺ມາ ຫິ ຘມ຺ມໍ ປຸຣິໂສ ວິຊຎ຺ຎາ, ອິນ຺ທໍວ ນໍ ເທວຕາ ປູຊເຍຍ຺ຍ;

ໂສ ປູຊິໂຕ ຕສ຺ມິ ປສນ຺ນຈິຕ຺ໂຕ, ພຫຸສ຺ສຸໂຕ ປາຕຸກໂຣຕິ ຘມ຺ມໍ.

໓໑໙. ຕທຏ຺ຐິກຕ຺ວານ ນິສມ຺ມ ຘີໂຣ, ຘມ຺ມານຸຘມ຺ມໍ ປຏິປຊ຺ຊມາໂນ;

ວິຎ຺ຎູ ວິຠາວີ ນິປຸໂຓ ຈ ໂຫຕິ, ໂຍ ຕາທິສໍ ຠຊຕິ ອປ຺ປມຕ຺ໂຕ.

໓໒໐. ຂຸທ຺ທຎ຺ຈ ພາລໍ ອຸປເສວມາໂນ, ອນາຄຕຕ຺ຖຎ຺ຈ ອຸສູຍກຎ຺ຈ;

ອິເຘວ ຘມ຺ມໍ ອວິຠາວຍິຕ຺ວາ, ອວິຕິຓ຺ຓກງ຺ໂຂ ມຣຓໍ ອຸເປຕິ.

໓໒໑. ຍຖາ ນໂຣ ອາປຄໂມຕຣິຕ຺ວາ, ມໂຫທກໍ ສລິລໍ ສີຆໂສຕໍ;

ໂສ ວຸຍ຺ຫມາໂນ ອນຸໂສຕຄາມີ, ກິໍ ໂສ ປເຣ ສກ຺ຂຕິ ຕາຣເຍຕຸໍ.

໓໒໒. ຕເຖວ ຘມ຺ມໍ ອວິຠາວຍິຕ຺ວາ, ພຫຸສ຺ສຸຕານໍ ອນິສາມຍຕ຺ຖໍ;

ສຍໍ ອຊານໍ ອວິຕິຓ຺ຓກງ຺ໂຂ, ກິໍ ໂສ ປເຣ ສກ຺ຂຕິ ນິຊ຺ຌເປຕຸໍ.

໓໒໓. ຍຖາປິ ນາວໍ ທຬ຺ຫມາຣຸຫິຕ຺ວາ, ຜິເຍນ [ປິເຍນ (ສີ. ສ຺ຍາ.)] ຣິຕ຺ເຕນ ສມງ຺ຄິຠູໂຕ;

ໂສ ຕາຣເຍ ຕຕ຺ຖ ພຫູປິ ອຎ຺ເຎ, ຕຕ຺ຣູປຍຎ຺ຎູ ກຸສໂລ ມຸຕີມາ [ມຕີມາ (ສ຺ຍາ. ກ.)].

໓໒໔. ເອວມ຺ປິ ໂຍ ເວທຄຸ ຠາວິຕຕ຺ໂຕ, ພຫຸສ຺ສຸໂຕ ໂຫຕິ ອເວຘຘມ຺ໂມ;

ໂສ ໂຂ ປເຣ ນິຊ຺ຌປເຍ ປຊານໍ, ໂສຕາວຘານູປນິສູປປນ຺ເນ.

໓໒໕. ຕສ຺ມາ ຫເວ ສປ຺ປຸຣິສໍ ຠເຊຖ, ເມຘາວິນຎ຺ເຈວ ພຫຸສ຺ສຸຕຎ຺ຈ;

ອຎ຺ຎາຍ ອຕ຺ຖໍ ປຏິປຊ຺ຊມາໂນ, ວິຎ຺ຎາຕຘມ຺ໂມ ສ ສຸຂໍ [ໂສ ສຸຂໍ (ສີ.)] ລເຠຖາຕິ.

ນາວາສຸຕ຺ຕໍ ອຏ຺ຐມໍ ນິຏ຺ຐິຕໍ.