໖. ຘມ຺ມຈຣິຍສຸຕ຺ຕໍ

໒໗໖. ຘມ຺ມຈຣິຍໍ ພ຺ຣຫ຺ມຈຣິຍໍ, ເອຕທາຫຸ ວສຸຕ຺ຕມໍ;

ປພ຺ພຊິໂຕປິ ເຈ ໂຫຕິ, ອຄາຣາ ອນຄາຣິຍໍ.

໒໗໗. ໂສ ເຈ ມຸຂຣຊາຕິໂກ, ວິເຫສາຠິຣໂຕ ມໂຄ;

ຊີວິຕໍ ຕສ຺ສ ປາປິໂຍ, ຣຊໍ ວຑ຺ເຒຕິ ອຕ຺ຕໂນ.

໒໗໘. ກລຫາຠິຣໂຕ ຠິກ຺ຂຸ, ໂມຫຘມ຺ເມນ ອາວຸໂຕ;

ອກ຺ຂາຕມ຺ປິ ນ ຊານາຕິ, ຘມ຺ມໍ ພຸທ຺ເຘນ ເທສິຕໍ.

໒໗໙. ວິເຫສໍ ຠາວິຕຕ຺ຕານໍ, ອວິຊ຺ຊາຍ ປຸຣກ຺ຂໂຕ;

ສໍກິເລສໍ ນ ຊານາຕິ, ມຄ຺ຄໍ ນິຣຍຄາມິນໍ.

໒໘໐. ວິນິປາຕໍ ສມາປນ຺ໂນ, ຄພ຺ຠາ ຄພ຺ຠໍ ຕມາ ຕມໍ;

ສ ເວ ຕາທິສໂກ ຠິກ຺ຂຸ, ເປຈ຺ຈ ທຸກ຺ຂໍ ນິຄຈ຺ຉຕິ.

໒໘໑. ຄູຖກູໂປ ຍຖາ ອສ຺ສ, ສມ຺ປຸຓ຺ໂຓ ຄຓວສ຺ສິໂກ;

ໂຍ ຈ ເອວຣູໂປ ອສ຺ສ, ທຸພ຺ພິໂສໂຘ ຫິ ສາງ຺ຄໂຓ.

໒໘໒. ຍໍ ເອວຣູປໍ ຊານາຖ, ຠິກ຺ຂໂວ ເຄຫນິສ຺ສິຕໍ;

ປາປິຈ຺ຉໍ ປາປສງ຺ກປ຺ປໍ, ປາປອາຈາຣໂຄຈຣໍ.

໒໘໓. ສພ຺ເພ ສມຄ຺ຄາ ຫຸຕ຺ວານ, ອຠິນິພ຺ພຊ຺ຊິຍາຖ [ອຠິນິພ຺ພຊ຺ຊຍາຖ (ສີ. ປີ. ອ. ນິ. ໘.໑໐)] ນໍ;

ກາຣຓ຺ຑວໍ [ກາຣຓ຺ຑໍ ວ (ສ຺ຍາ. ກ.) ອ. ນິ. ໘.໑໐] ນິທ຺ຘມຖ, ກສມ຺ພຸໍ ອປກສ຺ສຖ [ອວກສ຺ສຖ (ສີ. ສ຺ຍາ. ກ.)].

໒໘໔. ຕໂຕ ປລາເປ [ປລາເສ (ກ.)] ວາເຫຖ, ອສ຺ສມເຓ ສມຓມານິເນ;

ນິທ຺ຘມິຕ຺ວານ ປາປິຈ຺ເຉ, ປາປອາຈາຣໂຄຈເຣ.

໒໘໕. ສຸທ຺ຘາ ສຸທ຺ເຘຫິ ສໍວາສໍ, ກປ຺ປຍວ຺ໂຫ ປຕິສ຺ສຕາ;

ຕໂຕ ສມຄ຺ຄາ ນິປກາ, ທຸກ຺ຂສ຺ສນ຺ຕໍ ກຣິສ຺ສຖາຕິ.

ຘມ຺ມຈຣິຍສຸຕ຺ຕໍ [ກປິລສຸຕ຺ຕໍ (ອຏ຺ຐ.)] ຉຏ຺ຐໍ ນິຏ຺ຐິຕໍ.