໒. ເສຣີສກເປຕວຕ຺ຖຸ

໖໐໔. [ວິ. ວ. ໑໒໒໘] ສຸໂຓຖ ຍກ຺ຂສ຺ສ ວາຓິຊານ ຈ, ສມາຄໂມ ຍຕ຺ຖ ຕທາ ອໂຫສິ;

ຍຖາ ກຖໍ ອິຕຣິຕເຣນ ຈາປິ, ສຸຠາສິຕໍ ຕຎ຺ຈ ສຸຓາຖ ສພ຺ເພ.

໖໐໕. ໂຍ ໂສ ອຫຸ ຣາຊາ ປາຍາສິ ນາມ [ນາໂມ (ສີ.)], ຠຸມ຺ມານໍ ສຫພ຺ຍຄໂຕ ຍສສ຺ສີ;

ໂສ ໂມທມາໂນວ ສເກ ວິມາເນ, ອມານຸໂສ ມານຸເສ ອຊ຺ຌຠາສີຕິ.

໖໐໖. ‘‘ວງ຺ເກ ອຣຎ຺ເຎ ອມນຸສ຺ສຏ຺ຐາເນ, ກນ຺ຕາເຣ ອປ຺ໂປທເກ ອປ຺ປຠກ຺ເຂ;

ສຸທຸຄ຺ຄເມ ວຓ຺ຓຸປຖສ຺ສ ມຊ຺ເຌ, ວງ຺ກໍຠຍາ ນຏ຺ຐມນາ ມນຸສ຺ສາ.

໖໐໗. ‘‘ນຍິຘ ຜລາ ມູລມຍາ ຈ ສນ຺ຕິ, ອຸປາທານໍ ນຕ຺ຖິ ກຸໂຕຘ ຠກ຺ໂຂ [ຠິກ຺ໂຂ (ກ.)];

ອຎ຺ຎຕ຺ຣ ປໍສູຫິ ຈ ວາລຸກາຫິ ຈ, ຕຕາຫິ ອຸຓ຺ຫາຫິ ຈ ທາຣຸຓາຫິ ຈ.

໖໐໘. ‘‘ອຸຊ຺ຊງ຺ຄລໍ ຕຕ຺ຕມິວໍ ກປາລໍ, ອນາຍສໍ ປຣໂລເກນ ຕຸລ຺ຍໍ;

ລຸທ຺ທານມາວາສມິທໍ ປຸຣາຓໍ, ຠູມິປ຺ປເທໂສ ອຠິສຕ຺ຕຣູໂປ.

໖໐໙. ‘‘‘ອຖ ຕຸມ຺ເຫ ເກນ ວຓ຺ເຓນ, ກິມາສມານາ ອິມໍ ປເທສໍ ຫິ;

ອນຸປວິຏ຺ຐາ ສຫສາ ສມຈ຺ຈ, ໂລຠາ ຠຍາ ອຖ ວາ ສມ຺ປມູຬ຺ຫາ’’’ຕິ.

໖໑໐. ‘‘ມຄເຘສຸ ອງ຺ເຄສຸ ຈ ສຕ຺ຖວາຫາ, ອາໂຣປຍິຕ຺ວາ ປຓິຍໍ ປຸຖຸຕ຺ຕໍ;

ເຕ ຍາມເສ ສິນ຺ຘຸໂສວີຣຠູມິໍ, ຘນຕ຺ຖິກາ ອຸທ຺ທຍໍ ປຕ຺ຖຍານາ.

໖໑໑. ‘‘ທິວາ ປິປາສໍ ນຘິວາສຍນ຺ຕາ, ໂຍຄ຺ຄານຸກມ຺ປຎ຺ຈ ສເມກ຺ຂມານາ;

ເອເຕນ ເວເຄນ ອາຍາມ ສພ຺ເພ, ຣຕ຺ຕິໍ ມຄ຺ຄໍ ປຏິປນ຺ນາ ວິກາເລ.

໖໑໒. ‘‘ເຕ ທຸປ຺ປຍາຕາ ອປຣທ຺ຘມຄ຺ຄາ, ອນ຺ຘາກຸລາ ວິປ຺ປນຏ຺ຐາ ອຣຎ຺ເຎ;

ສຸທຸຄ຺ຄເມ ວຓ຺ຓຸປຖສ຺ສ ມຊ຺ເຌ, ທິສໍ ນ ຊານາມ ປມູຬ຺ຫຈິຕ຺ຕາ.

໖໑໓. ‘‘ອິທຎ຺ຈ ທິສ຺ວານ ອທິຏ຺ຐປຸພ຺ພໍ, ວິມານເສຏ຺ຐຎ຺ຈ ຕວຎ຺ຈ ຍກ຺ຂ;

ຕຕຸຕ຺ຕຣິໍ ຊີວິຕມາສມານາ, ທິສ຺ວາ ປຕີຕາ ສຸມນາ ອຸທຄ຺ຄາ’’ຕິ.

໖໑໔. ‘‘ປາຣໍ ສມຸທ຺ທສ຺ສ ອິມຎ຺ຈ ວຓ຺ຓຸໍ, ເວຕ຺ຕາຈຣໍ [ເວຕ຺ຕໍ ປຣໍ (ສ຺ຍາ.), ເວຕ຺ຕາຈາຣໍ (ກ.)] ສງ຺ກຸປຖຎ຺ຈ ມຄ຺ຄໍ;

ນທິໂຍ ປນ ປພ຺ພຕານຎ຺ຈ ທຸຄ຺ຄາ, ປຸຖຸທ຺ທິສາ ຄຈ຺ຉຖ ໂຠຄເຫຕຸ.

໖໑໕. ‘‘ປກ຺ຂນ຺ທິຍານ ວິຊິຕໍ ປເຣສໍ, ເວຣຊ຺ຊເກ ມານຸເສ ເປກ຺ຂມານາ;

ຍໍ ໂວ ສຸຕໍ ວາ ອຖ ວາປິ ທິຏ຺ຐໍ, ອຈ຺ເຉຣກໍ ຕໍ ໂວ ສຸໂຓມ ຕາຕາ’’ຕິ.

໖໑໖. ‘‘ອິໂຕປິ ອຈ຺ເຉຣຕຣໍ ກຸມາຣ, ນ ໂນ ສຸຕໍ ວາ ອຖ ວາປິ ທິຏ຺ຐໍ;

ອຕີຕມານຸສ຺ສກເມວ ສພ຺ພໍ, ທິສ຺ວາ ນ ຕປ຺ປາມ ອໂນມວຓ຺ຓໍ.

໖໑໗. ‘‘ເວຫາຍສໍ ໂປກ຺ຂຣຎ຺ໂຎ ສວນ຺ຕິ, ປຫູຕມລ຺ຍາ [ປຫູຕມາລ຺ຍາ (ສ຺ຍາ.)] ພຫຸປຸຓ຺ຑຣີກາ;

ທຸມາ ຈິເມ ນິຈ຺ຈຜລູປປນ຺ນາ, ອຕີວ ຄນ຺ຘາ ສຸຣຠິໍ ປວາຍນ຺ຕິ.

໖໑໘. ‘‘ເວຬູຣິຍຖມ຺ຠາ ສຕມຸສ຺ສິຕາເສ, ສິລາປວາຬສ຺ສ ຈ ອາຍຕໍສາ;

ມສາຣຄລ຺ລາ ສຫໂລຫິຕງ຺ຄາ, ຖມ຺ຠາ ອິເມ ໂຊຕິຣສາມຍາເສ.

໖໑໙. ‘‘ສຫສ຺ສຖມ຺ຠໍ ອຕຸລານຸຠາວໍ, ເຕສູປຣິ ສາຘຸມິທໍ ວິມານໍ;

ຣຕນນ຺ຕຣໍ ກຎ຺ຈນເວທິມິສ຺ສໍ, ຕປນີຍປຏ຺ເຏຫິ ຈ ສາຘຸຉນ຺ນໍ.

໖໒໐. ‘‘ຊມ຺ໂພນທຸຕ຺ຕຕ຺ຕມິທໍ ສຸມຏ຺ໂຐ, ປາສາທໂສປາຓຜລູປປນ຺ໂນ;

ທຬ຺ໂຫ ຈ ວຄ຺ຄຸ ຈ ສຸສງ຺ຄໂຕ ຈ [ວຄ຺ຄຸ ສຸມຸໂຂ ສຸສງ຺ຄໂຕ (ສີ.)], ອຕີວ ນິຊ຺ຌານຂໂມ ມນຸຎ຺ໂຎ.

໖໒໑. ‘‘ຣຕນນ຺ຕຣສ຺ມິໍ ພຫຸອນ຺ນປານໍ, ປຣິວາຣິໂຕ ອຈ຺ຉຣາສງ຺ຄເຓນ;

ມຸຣຊອາລມ຺ພຣຕູຣິຍຆຸຏ຺ໂຐ, ອຠິວນ຺ທິໂຕສິ ຖຸຕິວນ຺ທນາຍ.

໖໒໒. ‘‘ໂສ ໂມທສິ ນາຣິຄຓປ຺ປໂພຘໂນ, ວິມານປາສາທວເຣ ມໂນຣເມ;

ອຈິນ຺ຕິໂຍ ສພ຺ພຄຸຓູປປນ຺ໂນ, ຣາຊາ ຍຖາ ເວສ຺ສວໂຓ ນຬິນ຺ຍາ [ນຬິຎ຺ຎໍ (ກ.)].

໖໒໓. ‘‘ເທໂວ ນຸ ອາສິ ອຸທວາສິ ຍກ຺ໂຂ, ອຸທາຫຸ ເທວິນ຺ໂທ ມນຸສ຺ສຠູໂຕ;

ປຸຈ຺ຉນ຺ຕິ ຕໍ ວາຓິຊາ ສຕ຺ຖວາຫາ, ອາຈິກ຺ຂ ໂກ ນາມ ຕຸວໍສິ ຍກ຺ໂຂ’’ຕິ.

໖໒໔. ‘‘ເສຣີສໂກ ນາມ ອຫມ຺ຫິ ຍກ຺ໂຂ, ກນ຺ຕາຣິໂຍ ວຓ຺ຓຸປຖມ຺ຫິ ຄຸຕ຺ໂຕ;

ອິມໍ ປເທສໍ ອຠິປາລຍາມິ, ວຈນກໂຣ ເວສ຺ສວຓສ຺ສ ຣຎ຺ໂຎ’’ຕິ.

໖໒໕. ‘‘ອຘິຈ຺ຈລທ຺ຘໍ ປຣິຓາມຊໍ ເຕ, ສຍໍ ກຕໍ ອຸທາຫຸ ເທເວຫິ ທິນ຺ນໍ;

ປຸຈ຺ຉນ຺ຕິ ຕໍ ວາຓິຊາ ສຕ຺ຖວາຫາ, ກຖໍ ຕຍາ ລທ຺ຘມິທໍ ມນຸຎ຺ຎ’’ນ຺ຕິ.

໖໒໖. ‘‘ນາຘິຈ຺ຈລທ຺ຘໍ ນ ປຣິຓາມຊໍ ເມ, ນ ສຍໍ ກຕໍ ນ ຫິ ເທເວຫິ ທິນ຺ນໍ;

ສເກຫິ ກມ຺ເມຫິ ອປາປເກຫິ, ປຸຎ຺ເຎຫິ ເມ ລທ຺ຘມິທໍ ມນຸຎ຺ຎ’’ນ຺ຕິ.

໖໒໗. ‘‘ກິໍ ເຕ ວຕໍ ກິໍ ປນ ພ຺ຣຫ຺ມຈຣິຍໍ, ກິສ຺ສ ສຸຈິຓ຺ຓສ຺ສ ອຍໍ ວິປາໂກ;

ປຸຈ຺ຉນ຺ຕິ ຕໍ ວາຓິຊາ ສຕ຺ຖວາຫາ, ກຖໍ ຕຍາ ລທ຺ຘມິທໍ ວິມານ’’ນ຺ຕິ.

໖໒໘. ‘‘ມມໍ ປາຍາສີຕິ ອຫຸ ສມຎ຺ຎາ, ຣຊ຺ຊໍ ຍທາ ກາຣຍິໍ ໂກສລານໍ;

ນຕ຺ຖິກທິຏ຺ຐິ ກທຣິໂຍ ປາປຘມ຺ໂມ, ອຸຈ຺ເຉທວາທີ ຈ ຕທາ ອໂຫສິໍ.

໖໒໙. ‘‘ສມໂຓ ຈ ໂຂ ອາສິ ກຸມາຣກສ຺ສໂປ, ພຫຸສ຺ສຸໂຕ ຈິຕ຺ຕກຖີ ອຸຬາໂຣ;

ໂສ ເມ ຕທາ ຘມ຺ມກຖໍ ອຠາສິ, ທິຏ຺ຐິວິສູການິ ວິໂນທຍີ ເມ.

໖໓໐. ‘‘ຕາຫໍ ຕສ຺ສ ຘມ຺ມກຖໍ ສຸຓິຕ຺ວາ, ອຸປາສກຕ຺ຕໍ ປຏິເທວຍິສ຺ສໍ;

ປາຓາຕິປາຕາ ວິຣໂຕ ອໂຫສິໍ, ໂລເກ ອທິນ຺ນໍ ປຣິວຊ຺ຊຍິສ຺ສໍ;

ອມຊ຺ຊໂປ ໂນ ຈ ມຸສາ ອຠາຓິໍ, ສເກນ ທາເຣນ ຈ ອໂຫສິ ຕຸຏ຺ໂຐ.

໖໓໑. ‘‘ຕໍ ເມ ວຕໍ ຕໍ ປນ ພ຺ຣຫ຺ມຈຣິຍໍ, ຕສ຺ສ ສຸຈິຓ຺ຓສ຺ສ ອຍໍ ວິປາໂກ;

ເຕເຫວ ກມ຺ເມຫິ ອປາປເກຫິ, ປຸຎ຺ເຎຫິ ເມ ລທ຺ຘມິທໍ ວິມານ’’ນ຺ຕິ.

໖໓໒. ‘‘ສຈ຺ຈໍ ກິຣາຫໍສຸ ນຣາ ສປຎ຺ຎາ, ອນຎ຺ຎຖາ ວຈນໍ ປຓ຺ຑິຕານໍ;

ຍຫິໍ ຍຫິໍ ຄຈ຺ຉຕິ ປຸຎ຺ຎກມ຺ໂມ, ຕຫິໍ ຕຫິໍ ໂມທຕິ ກາມກາມີ.

໖໓໓. ‘‘ຍຫິໍ ຍຫິໍ ໂສກປຣິທ຺ທໂວ ຈ, ວໂຘ ຈ ພນ຺ໂຘ ຈ ປຣິກ຺ກິເລໂສ;

ຕຫິໍ ຕຫິໍ ຄຈ຺ຉຕິ ປາປກມ຺ໂມ, ນ ມຸຈ຺ຈຕິ ທຸຄ຺ຄຕິຍາ ກທາຈີ’’ຕິ.

໖໓໔. ‘‘ສມ຺ມູຬ຺ຫຣູໂປວ ຊໂນ ອໂຫສິ, ອສ຺ມິໍ ມຸຫຸຕ຺ເຕ ກລລີກໂຕວ;

ຊນສ຺ສິມສ຺ສ ຕຸຍ຺ຫຎ຺ຈ ກຸມາຣ, ອປ຺ປຈ຺ຈໂຍ ເກນ ນຸ ໂຂ ອໂຫສີ’’ຕິ.

໖໓໕. ‘‘ອິເມ ຈ ສິຣີສວນາ [ອິເມ ສິຣີສູປວນາ ຈ (ສີ.), ອິເມປິ ສິຣີສວນາ ຈ (ປີ. ກ.)] ຕາຕາ, ທິພ຺ພາ ຄນ຺ຘາ ສຸຣຠີ ສມ຺ປວນ຺ຕິ;

ເຕ ສມ຺ປວາຍນ຺ຕິ ອິມໍ ວິມານໍ, ທິວາ ຈ ຣຕ຺ໂຕ ຈ ຕມໍ ນິຫນ຺ຕ຺ວາ.

໖໓໖. ‘‘ອິເມສຎ຺ຈ ໂຂ ວສ຺ສສຕຈ຺ຈເຍນ, ສິປາຏິກາ ຜລຕິ ເອກເມກາ;

ມານຸສ຺ສກໍ ວສ຺ສສຕໍ ອຕີຕໍ, ຍທຄ຺ເຄ ກາຍມ຺ຫິ ອິຘູປປນ຺ໂນ.

໖໓໗. ‘‘ທິສ຺ວານຫໍ ວສ຺ສສຕານິ ປຎ຺ຈ, ອສ຺ມິໍ ວິມາເນ ຐຕ຺ວານ ຕາຕາ;

ອາຍຸກ຺ຂຍາ ປຸຎ຺ຎກ຺ຂຍາ ຈວິສ຺ສໍ, ເຕເນວ ໂສເກນ ປມຸຈ຺ຉິໂຕສ຺ມີ’’ຕິ.

໖໓໘. ‘‘ກຖໍ ນຸ ໂສເຈຍ຺ຍ ຕຖາວິໂຘ ໂສ, ລທ຺ຘາ ວິມານໍ ອຕຸລໍ ຈິຣາຍ;

ເຍ ຈາປິ ໂຂ ອິຕ຺ຕຣມຸປປນ຺ນາ, ເຕ ນູນ ໂສເຈຍ຺ຍຸໍ ປຣິຕ຺ຕປຸຎ຺ຎາ’’ຕິ.

໖໓໙. ‘‘ອນຸຈ຺ຉວິໍ ໂອວທິຍຎ຺ຈ ເມ ຕໍ, ຍໍ ມໍ ຕຸມ຺ເຫ ເປຍ຺ຍວາຈໍ ວເທຖ;

ຕຸມ຺ເຫ ຈ ໂຂ ຕາຕາ ມຍານຸຄຸຕ຺ຕາ, ເຍນິຈ຺ຉກໍ ເຕນ ປເລຖ ໂສຕ຺ຖິ’’ນ຺ຕິ.

໖໔໐. ‘‘ຄນ຺ຕ຺ວາ ມຍໍ ສິນ຺ຘຸໂສວີຣຠູມິໍ, ຘນ຺ນຕ຺ຖິກາ ອຸທ຺ທຍໍ ປຕ຺ຖຍານາ;

ຍຖາປໂຍຄາ ປຣິປຸຓ຺ຓຈາຄາ, ກາຫາມ ເສຣີສມຫໍ ອຸຬາຣ’’ນ຺ຕິ.

໖໔໑. ‘‘ມາ ເຈວ ເສຣີສມຫໍ ອກຕ຺ຖ, ສພ຺ພຎ຺ຈ ໂວ ຠວິສ຺ສຕິ ຍໍ ວເທຖ;

ປາປານິ ກມ຺ມານິ ວິວຊ຺ຊຍາຖ, ຘມ຺ມານຸໂຍຄຎ຺ຈ ອຘິຏ຺ຐຫາຖ.

໖໔໒. ‘‘ອຸປາສໂກ ອຕ຺ຖິ ອິມມ຺ຫິ ສງ຺ເຆ, ພຫຸສ຺ສຸໂຕ ສີລວຕູປປນ຺ໂນ;

ສທ຺ໂຘ ຈ ຈາຄີ ຈ ສຸເປສໂລ ຈ, ວິຈກ຺ຂໂຓ ສນ຺ຕຸສິໂຕ ມຸຕີມາ.

໖໔໓. ‘‘ສຎ຺ຊານມາໂນ ນ ມຸສາ ຠເຓຍ຺ຍ, ປຣູປຆາຕາຍ ຈ ເຈຕເຍຍ຺ຍ;

ເວຠູຕິກໍ ເປສຸຓໍ ໂນ ກເຣຍ຺ຍ, ສຓ຺ຫຎ຺ຈ ວາຈໍ ສຂິລໍ ຠເຓຍ຺ຍ.

໖໔໔. ‘‘ສຄາຣໂວ ສປ຺ປຏິສ຺ໂສ ວິນີໂຕ, ອປາປໂກ ອຘິສີເລ ວິສຸທ຺ໂຘ;

ໂສ ມາຕຣໍ ປິຕຣຎ຺ຈາປິ ຊນ຺ຕຸ, ຘມ຺ເມນ ໂປເສຕິ ອຣິຍວຸຕ຺ຕິ.

໖໔໕. ‘‘ມຎ຺ເຎ ໂສ ມາຕາປິຕູນໍ ກາຣຓາ, ໂຠຄານິ ປຣິເຍສຕິ ນ ອຕ຺ຕເຫຕຸ;

ມາຕາປິຕູນຎ຺ຈ ໂຍ ອຈ຺ຈເຍນ, ເນກ຺ຂມ຺ມໂປໂຓ ຈຣິສ຺ສຕິ ພ຺ຣຫ຺ມຈຣິຍໍ.

໖໔໖. ‘‘ອຸຊູ ອວງ຺ໂກ ອສໂຐ ອມາໂຍ, ນ ເລສກປ຺ເປນ ຈ ໂວຫເຣຍ຺ຍ;

ໂສ ຕາທິໂສ ສຸກຕກມ຺ມກາຣີ, ຘມ຺ເມ ຐິໂຕ ກິນ຺ຕິ ລເຠຖ ທຸກ຺ຂໍ.

໖໔໗. ‘‘ຕໍ ກາຣຓາ ປາຕຸກໂຕມ຺ຫິ ອຕ຺ຕນາ, ຕສ຺ມາ ຘມ຺ມໍ ປສ຺ສຖ ວາຓິຊາເສ;

ອຎ຺ຎຕ຺ຣ ເຕນິຫ ຠສ຺ມີ [ຠສ຺ມິ (ສ຺ຍາ.), ຠສ຺ມ (ກ.)] ຠເວຖ, ອນ຺ຘາກຸລາ ວິປ຺ປນຏ຺ຐາ ອຣຎ຺ເຎ;

ຕໍ ຂິປ຺ປມາເນນ ລຫຸໍ ປເຣນ, ສຸໂຂ ຫເວ ສປ຺ປຸຣິເສນ ສງ຺ຄໂມ’’ຕິ.

໖໔໘. ‘‘ກິໍ ນາມ ໂສ ກິຎ຺ຈ ກໂຣຕິ ກມ຺ມໍ, ກິໍ ນາມເຘຍ຺ຍໍ ກິໍ ປນ ຕສ຺ສ ໂຄຕ຺ຕໍ;

ມຍມ຺ປິ ນໍ ທຏ຺ຐຸກາມມ຺ຫ ຍກ຺ຂ, ຍສ຺ສານຸກມ຺ປາຍ ອິຘາຄໂຕສິ;

ລາຠາ ຫິ ຕສ຺ສ ຍສ຺ສ ຕຸວໍ ປິເຫສີ’’ຕິ.

໖໔໙. ‘‘ໂຍ ກປ຺ປໂກ ສມ຺ຠວນາມເຘຍ຺ໂຍ, ອຸປາສໂກ ໂກຈ຺ຉຜລູປຊີວີ;

ຊານາຖ ນໍ ຕຸມ຺ຫາກໍ ເປສິໂຍ ໂສ, ມາ ໂຂ ນໍ ຫີຬິຕ຺ຖ ສຸເປສໂລ ໂສ’’ຕິ.

໖໕໐. ‘‘ຊານາມເສ ຍໍ ຕ຺ວໍ ປວເທສິ ຍກ຺ຂ, ນ ໂຂ ນໍ ຊານາມ ສ ເອທິໂສຕິ;

ມຍມ຺ປິ ນໍ ປູຊຍິສ຺ສາມ ຍກ຺ຂ, ສຸຕ຺ວານ ຕຸຍ຺ຫໍ ວຈນໍ ອຸຬາຣ’’ນ຺ຕິ.

໖໕໑. ‘‘ເຍ ເກຈິ ອິມສ຺ມິໍ ສຕ຺ເຖ ມນຸສ຺ສາ, ທຫຣາ ມຫນ຺ຕາ ອຖວາປິ ມຊ຺ຌິມາ;

ສພ຺ເພວ ເຕ ອາລມ຺ພນ຺ຕຸ ວິມານໍ, ປສ຺ສນ຺ຕຸ ປຸຎ຺ຎານໍ ຜລໍ ກທຣິຍາ’’ຕິ.

໖໕໒. ເຕ ຕຕ຺ຖ ສພ຺ເພວ ‘ອຫໍ ປຸເຣ’ຕິ, ຕໍ ກປ຺ປກໍ ຕຕ຺ຖ ປຸຣກ຺ຂຕ຺ວາ [ປຸຣກ຺ຂິປິຕ຺ວາ (ສີ.)];

ສພ຺ເພວ ເຕ ອາລມ຺ພິໍສຸ ວິມານໍ, ມສກ຺ກສາຣໍ ວິຍ ວາສວສ຺ສ.

໖໕໓. ເຕ ຕຕ຺ຖ ສພ຺ເພວ ‘ອຫໍ ປຸເຣ’ຕິ, ອຸປາສກຕ຺ຕໍ ປຏິເວທຍິໍສຸ;

ປາຓາຕິປາຕາ ປຏິວິຣຕາ ອເຫສຸໍ, ໂລເກ ອທິນ຺ນໍ ປຣິວຊ຺ຊຍິໍສຸ;

ອມຊ຺ຊປາ ໂນ ຈ ມຸສາ ຠຓິໍສຸ, ສເກນ ທາເຣນ ຈ ອເຫສຸໍ ຕຸຏ຺ຐາ.

໖໕໔. ເຕ ຕຕ຺ຖ ສພ຺ເພວ ‘ອຫໍ ປຸເຣ’ຕິ, ອຸປາສກຕ຺ຕໍ ປຏິເວທຍິຕ຺ວາ;

ປກ຺ກາມິ ສຕ຺ໂຖ ອນຸໂມທມາໂນ, ຍກ຺ຂິທ຺ຘິຍາ ອນຸມໂຕ ປຸນປ຺ປຸນໍ.

໖໕໕. ຄນ຺ຕ຺ວານ ເຕ ສິນ຺ຘຸໂສວີຣຠູມິໍ, ຘນຕ຺ຖິກາ ອຸທ຺ທຍໍ [ອຸທຍ (ປີ. ກ.)] ປຕ຺ຖຍານາ;

ຍຖາປໂຍຄາ ປຣິປຸຓ຺ຓລາຠາ, ປຈ຺ຈາຄມຸໍ ປາຏລິປຸຕ຺ຕມກ຺ຂຕໍ.

໖໕໖. ຄນ຺ຕ຺ວານ ເຕ ສງ຺ຆຣໍ ໂສຕ຺ຖິວນ຺ໂຕ, ປຸຕ຺ເຕຫິ ທາເຣຫິ ສມງ຺ຄິຠູຕາ;

ອານນ຺ທີ ວິຕ຺ຕາ ສຸມນາ ປຕີຕາ, ອກໍສຸ ເສຣີສມຫໍ ອຸຬາຣໍ;

ເສຣີສກໍ ເຕ ປຣິເວຓໍ ມາປຍິໍສຸ.

໖໕໗. ເອຕາທິສາ ສປ຺ປຸຣິສານ ເສວນາ, ມຫຕ຺ຖິກາ ຘມ຺ມຄຸຓານ ເສວນາ;

ເອກສ຺ສ ອຕ຺ຖາຍ ອຸປາສກສ຺ສ, ສພ຺ເພວ ສຕ຺ຕາ ສຸຂິຕາ [ສຸຂິໂນ (ປີ. ກ.)] ອເຫສຸນ຺ຕິ.

ເສຣີສກເປຕວຕ຺ຖຸ ທຸຕິຍໍ.

ຠາຓວາຣໍ ຕຕິຍໍ ນິຏ຺ຐິຕໍ.