໙. ວິປສ຺ສນາກຖາ

໓໖. ເອວໍ ເມ ສຸຕໍ – ເອກໍ ສມຍໍ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ຕຕ຺ຣ ໂຂ ຠຄວາ ຠິກ຺ຂູ ອາມນ຺ເຕສິ – ‘‘ຠິກ຺ຂໂວ’’ຕິ. ‘‘ຠທນ຺ເຕ’’ຕິ ເຕ ຠິກ຺ຂູ ຠຄວໂຕ ປຈ຺ຈສ຺ໂສສຸໍ. ຠຄວາ ເອຕທໂວຈ –

‘‘ໂສ ວຕ, ຠິກ຺ຂເວ, ຠິກ຺ຂຸ ກຎ຺ຈິ [ກິຎ຺ຈິ (ກ.) ອ. ນິ. ໖.໙໙-໑໐໐ ປສ຺ສິຕພ຺ພາ] ສງ຺ຂາຣໍ ນິຈ຺ຈໂຕ ສມນຸປສ຺ສນ຺ໂຕ ອນຸໂລມິກາຍ ຂນ຺ຕິຍາ ສມນ຺ນາຄໂຕ ຠວິສ຺ສຕີຕິ – ເນຕໍ ຐານໍ ວິຊ຺ຊຕິ; ອນຸໂລມິກາຍ ຂນ຺ຕິຍາ ອສມນ຺ນາຄໂຕ ສມ຺ມຕ຺ຕນິຍາມໍ ໂອກ຺ກມິສ຺ສຕີຕິ – ເນຕໍ ຐານໍ ວິຊ຺ຊຕິ; ສມ຺ມຕ຺ຕນິຍາມໍ ອໂນກ຺ກມມາໂນ ໂສຕາປຕ຺ຕິຜລໍ ວາ ສກທາຄາມິຜລໍ ວາ ອນາຄາມິຜລໍ ວາ ອຣຫຕ຺ຕໍ ວາ [ອຣຫຕ຺ຕຜລໍ ວາ (ສ຺ຍາ. ກ.) ອ. ນິ. ໖.໙໘ ປສ຺ສິຕພ຺ພາ] ສຈ຺ຉິກຣິສ຺ສຕີຕິ – ເນຕໍ ຐານໍ ວິຊ຺ຊຕິ.

‘‘ໂສ ວຕ, ຠິກ຺ຂເວ, ຠິກ຺ຂຸ ສພ຺ພສງ຺ຂາເຣ ອນິຈ຺ຈໂຕ ສມນຸປສ຺ສນ຺ໂຕ ອນຸໂລມິກາຍ ຂນ຺ຕິຍາ ສມນ຺ນາຄໂຕ ຠວິສ຺ສຕີຕິ – ຐານເມຕໍ ວິຊ຺ຊຕິ; ອນຸໂລມິກາຍ ຂນ຺ຕິຍາ ສມນ຺ນາຄໂຕ ສມ຺ມຕ຺ຕນິຍາມໍ ໂອກ຺ກມິສ຺ສຕີຕິ – ຐານເມຕໍ ວິຊ຺ຊຕິ, ສມ຺ມຕ຺ຕນິຍາມໍ ໂອກ຺ກມມາໂນ ໂສຕາປຕ຺ຕິຜລໍ ວາ ສກທາຄາມິຜລໍ ວາ ອນາຄາມິຜລໍ ວາ ອຣຫຕ຺ຕໍ ວາ ສຈ຺ຉິກຣິສ຺ສຕີຕິ – ຐານເມຕໍ ວິຊ຺ຊຕິ.

‘‘ໂສ ວຕ, ຠິກ຺ຂເວ, ຠິກ຺ຂຸ ກຎ຺ຈິ ສງ຺ຂາຣໍ ສຸຂໂຕ ສມນຸປສ຺ສນ຺ໂຕ ອນຸໂລມິກາຍ ຂນ຺ຕິຍາ ສມນ຺ນາຄໂຕ ຠວິສ຺ສຕີຕິ – ເນຕໍ ຐານໍ ວິຊ຺ຊຕິ; ອນຸໂລມິກາຍ ຂນ຺ຕິຍາ ອສມນ຺ນາຄໂຕ ສມ຺ມຕ຺ຕນິຍາມໍ ໂອກ຺ກມິສ຺ສຕີຕິ – ເນຕໍ ຐານໍ ວິຊ຺ຊຕິ; ສມ຺ມຕ຺ຕນິຍາມໍ ອໂນກ຺ກມມາໂນ ໂສຕາປຕ຺ຕິຜລໍ ວາ ສກທາຄາມິຜລໍ ວາ ອນາຄາມິຜລໍ ວາ ອຣຫຕ຺ຕໍ ວາ ສຈ຺ຉິກຣິສ຺ສຕີຕິ – ເນຕໍ ຐານໍ ວິຊ຺ຊຕິ.

‘‘ໂສ ວຕ, ຠິກ຺ຂເວ, ຠິກ຺ຂຸ ສພ຺ພສງ຺ຂາເຣ ທຸກ຺ຂໂຕ ສມນຸປສ຺ສນ຺ໂຕ ອນຸໂລມິກາຍ ຂນ຺ຕິຍາ ສມນ຺ນາຄໂຕ ຠວິສ຺ສຕີຕິ – ຐານເມຕໍ ວິຊ຺ຊຕິ; ອນຸໂລມິກາຍ ຂນ຺ຕິຍາ ສມນ຺ນາຄໂຕ ສມ຺ມຕ຺ຕນິຍາມໍ ໂອກ຺ກມິສ຺ສຕີຕິ – ຐານເມຕໍ ວິຊ຺ຊຕິ; ສມ຺ມຕ຺ຕນິຍາມໍ ໂອກ຺ກມມາໂນ ໂສຕາປຕ຺ຕິຜລໍ ວາ ສກທາຄາມິຜລໍ ວາ ອນາຄາມິຜລໍ ວາ ອຣຫຕ຺ຕໍ ວາ ສຈ຺ຉິກຣິສ຺ສຕີຕິ – ຐານເມຕໍ ວິຊ຺ຊຕິ.

‘‘ໂສ ວຕ, ຠິກ຺ຂເວ, ຠິກ຺ຂຸ ກຎ຺ຈິ ຘມ຺ມໍ ອຕ຺ຕໂຕ ສມນຸປສ຺ສນ຺ໂຕ ອນຸໂລມິກາຍ ຂນ຺ຕິຍາ ສມນ຺ນາຄໂຕ ຠວິສ຺ສຕີຕິ – ເນຕໍ ຐານໍ ວິຊ຺ຊຕິ; ອນຸໂລມິກາຍ ຂນ຺ຕິຍາ ອສມນ຺ນາຄໂຕ ສມ຺ມຕ຺ຕນິຍາມໍ ໂອກ຺ກມິສ຺ສຕີຕິ – ເນຕໍ ຐານໍ ວິຊ຺ຊຕິ; ສມ຺ມຕ຺ຕນິຍາມໍ ອໂນກ຺ກມມາໂນ ໂສຕາປຕ຺ຕິຜລໍ ວາ ສກທາຄາມິຜລໍ ວາ ອນາຄາມິຜລໍ ວາ ອຣຫຕ຺ຕໍ ວາ ສຈ຺ຉິກຣິສ຺ສຕີຕິ – ເນຕໍ ຐານໍ ວິຊ຺ຊຕິ.

‘‘ໂສ ວຕ, ຠິກ຺ຂເວ, ຠິກ຺ຂຸ ສພ຺ພຘມ຺ເມ [ກຎ຺ຈິ ຘມ຺ມໍ (ສ຺ຍາ.), ກິຎ຺ຈິ ຘມ຺ມໍ (ກ.) ອ. ນິ. ໖.໑໐໐ ປສ຺ສິຕພ຺ພາ] ອນຕ຺ຕໂຕ ສມນຸປສ຺ສນ຺ໂຕ ອນຸໂລມິກາຍ ຂນ຺ຕິຍາ ສມນ຺ນາຄໂຕ ຠວິສ຺ສຕີຕິ – ຐານເມຕໍ ວິຊ຺ຊຕິ; ອນຸໂລມິກາຍ ຂນ຺ຕິຍາ ສມນ຺ນາຄໂຕ ສມ຺ມຕ຺ຕນິຍາມໍ ໂອກ຺ກມິສ຺ສຕີຕິ – ຐານເມຕໍ ວິຊ຺ຊຕິ; ສມ຺ມຕ຺ຕນິຍາມໍ ໂອກ຺ກມມາໂນ ໂສຕາປຕ຺ຕິຜລໍ ວາ ສກທາຄາມິຜລໍ ວາ ອນາຄາມິຜລໍ ວາ ອຣຫຕ຺ຕໍ ວາ ສຈ຺ຉິກຣິສ຺ສຕີຕິ – ຐານເມຕໍ ວິຊ຺ຊຕິ.

‘‘ໂສ ວຕ, ຠິກ຺ຂເວ, ຠິກ຺ຂຸ ນິພ຺ພານໍ ທຸກ຺ຂໂຕ ສມນຸປສ຺ສນ຺ໂຕ ອນຸໂລມິກາຍ ຂນ຺ຕິຍາ ສມນ຺ນາຄໂຕ ຠວິສ຺ສຕີຕິ – ເນຕໍ ຐານໍ ວິຊ຺ຊຕິ; ອນຸໂລມິກາຍ ຂນ຺ຕິຍາ ອສມນ຺ນາຄໂຕ ສມ຺ມຕ຺ຕນິຍາມໍ ໂອກ຺ກມິສ຺ສຕີຕິ – ເນຕໍ ຐານໍ ວິຊ຺ຊຕິ; ສມ຺ມຕ຺ຕນິຍາມໍ ອໂນກ຺ກມມາໂນ ໂສຕາປຕ຺ຕິຜລໍ ວາ ສກທາຄາມິຜລໍ ວາ ອນາຄາມິຜລໍ ວາ ອຣຫຕ຺ຕໍ ວາ ສຈ຺ຉິກຣິສ຺ສຕີຕິ – ເນຕໍ ຐານໍ ວິຊ຺ຊຕິ.

‘‘ໂສ ວຕ, ຠິກ຺ຂເວ, ຠິກ຺ຂຸ ນິພ຺ພານໍ ສຸຂໂຕ ສມນຸປສ຺ສນ຺ໂຕ ອນຸໂລມິກາຍ ຂນ຺ຕິຍາ ສມນ຺ນາຄໂຕ ຠວິສ຺ສຕີຕິ – ຐານເມຕໍ ວິຊ຺ຊຕິ; ອນຸໂລມິກາຍ ຂນ຺ຕິຍາ ສມນ຺ນາຄໂຕ ສມ຺ມຕ຺ຕນິຍາມໍ ໂອກ຺ກມິສ຺ສຕີຕິ – ຐານເມຕໍ ວິຊ຺ຊຕິ; ສມ຺ມຕ຺ຕນິຍາມໍ ໂອກ຺ກມມາໂນ ໂສຕາປຕ຺ຕິຜລໍ ວາ ສກທາຄາມິຜລໍ ວາ ອນາຄາມິຜລໍ ວາ ອຣຫຕ຺ຕໍ ວາ ສຈ຺ຉິກຣິສ຺ສຕີຕິ – ຐານເມຕໍ ວິຊ຺ຊຕິ’’.

໓໗. ກຕິຫາກາເຣຫິ ອນຸໂລມິກໍ ຂນ຺ຕິໍ ປຏິລຠຕິ, ກຕິຫາກາເຣຫິ ສມ຺ມຕ຺ຕນິຍາມໍ ໂອກ຺ກມຕິ? ຈຕ຺ຕາຣີສາຍ ອາກາເຣຫິ ອນຸໂລມິກໍ ຂນ຺ຕິໍ ປຏິລຠຕິ, ຈຕ຺ຕາຣີສາຍ ອາກາເຣຫິ ສມ຺ມຕ຺ຕນິຍາມໍ ໂອກ຺ກມຕິ.

ກຕເມຫິ ຈຕ຺ຕາຣີສາຍ ອາກາເຣຫິ ອນຸໂລມິກໍ ຂນ຺ຕິໍ ປຏິລຠຕິ, ກຕມຫິ ຈຕ຺ຕາຣີສາຍ ອາກາເຣຫິ ສມ຺ມຕ຺ຕນິຍາມໍ ໂອກ຺ກມຕິ? ປຎ຺ຈກ຺ຂນ຺ເຘ ອນິຈ຺ຈໂຕ ທຸກ຺ຂໂຕ ໂຣຄໂຕ ຄຓ຺ຑໂຕ ສລ຺ລໂຕ ອຆໂຕ ອາພາຘໂຕ ປຣໂຕ ປໂລກໂຕ ອີຕິໂຕ ອຸປທ຺ທວໂຕ ຠຍໂຕ ອຸປສຄ຺ຄໂຕ ຈລໂຕ ປຠງ຺ຄຸໂຕ [ປຠງ຺ຄໂຕ (ສ຺ຍາ.)] ອທ຺ຘຸວໂຕ ອຕາຓໂຕ [ອຕ຺ຕາຓໂຕ (ສ຺ຍາ.)] ອເລຓໂຕ ອສຣຓໂຕ ຣິຕ຺ຕໂຕ ຕຸຈ຺ຉໂຕ ສຸຎ຺ຎໂຕ ອນຕ຺ຕໂຕ ອາທີນວໂຕ ວິປຣິຓາມຘມ຺ມໂຕ ອສາຣກໂຕ ອຆມູລໂຕ ວຘກໂຕ ວິຠວໂຕ ສາສວໂຕ ສງ຺ຂຕໂຕ ມາຣາມິສໂຕ ຊາຕິຘມ຺ມໂຕ ຊຣາຘມ຺ມໂຕ ພ຺ຍາຘິຘມ຺ມໂຕ ມຣຓຘມ຺ມໂຕ ໂສກຘມ຺ມໂຕ ປຣິເທວຘມ຺ມໂຕ ອຸປາຍາສຘມ຺ມໂຕ ສໍກິເລສິກຘມ຺ມໂຕ.

໓໘. ປຎ຺ຈກ຺ຂນ຺ເຘ ອນິຈ຺ຈໂຕ ປສ຺ສນ຺ໂຕ ອນຸໂລມິກໍ ຂນ຺ຕິໍ ປຏິລຠຕິ. ປຎ຺ຈນ຺ນໍ ຂນ຺ຘານໍ ນິໂຣໂຘ ນິຈ຺ຈໍ ນິພ຺ພານນ຺ຕິ ປສ຺ສນ຺ໂຕ ສມ຺ມຕ຺ຕນິຍາມໍ ໂອກ຺ກມຕິ. ປຎ຺ຈກ຺ຂນ຺ເຘ ທຸກ຺ຂໂຕ ປສ຺ສນ຺ໂຕ ອນຸໂລມິກໍ ຂນ຺ຕິໍ ປຏິລຠຕິ. ປຎ຺ຈນ຺ນໍ ຂນ຺ຘານໍ ນິໂຣໂຘ ສຸຂໍ ນິພ຺ພານນ຺ຕິ ປສ຺ສນ຺ໂຕ ສມ຺ມຕ຺ຕນິຍາມໍ ໂອກ຺ກມຕິ. ປຎ຺ຈກ຺ຂນ຺ເຘ ໂຣຄໂຕ ປສ຺ສນ຺ໂຕ ອນຸໂລມິກໍ ຂນ຺ຕິໍ ປຏິລຠຕິ. ປຎ຺ຈນ຺ນໍ ຂນ຺ຘານໍ ນິໂຣໂຘ ອາໂຣຄ຺ຍໍ ນິພ຺ພານນ຺ຕິ ປສ຺ສນ຺ໂຕ ສມ຺ມຕ຺ຕນິຍາມໍ ໂອກ຺ກມຕິ. ປຎ຺ຈກ຺ຂນ຺ເຘ ຄຓ຺ຑໂຕ ປສ຺ສນ຺ໂຕ ອນຸໂລມິກໍ ຂນ຺ຕິໍ ປຏິລຠຕິ. ປຎ຺ຈນ຺ນໍ ຂນ຺ຘານໍ ນິໂຣໂຘ ອຄຓ຺ຑໍ [ນິຄຓ຺ໂຑ (ສ຺ຍາ.)] ນິພ຺ພານນ຺ຕິ ປສ຺ສນ຺ໂຕ ສມ຺ມຕ຺ຕນິຍາມໍ ໂອກ຺ກມຕິ. ປຎ຺ຈກ຺ຂນ຺ເຘ ສລ຺ລໂຕ ປສ຺ສນ຺ໂຕ ອນຸໂລມິກໍ ຂນ຺ຕິໍ ປຏິລຠຕິ. ປຎ຺ຈນ຺ນໍ ຂນ຺ຘານໍ ນິໂຣໂຘ ວິສລ຺ລໍ [ນິສ຺ສລ຺ລໍ (ສ຺ຍາ.)] ນິພ຺ພານນ຺ຕິ ປສ຺ສນ຺ໂຕ ສມ຺ມຕ຺ຕນິຍາມໍ ໂອກ຺ກມຕິ.

ປຎ຺ຈກ຺ຂນ຺ເຘ ອຆໂຕ ປສ຺ສນ຺ໂຕ ອນຸໂລມິກໍ ຂນ຺ຕິໍ ປຏິລຠຕິ. ປຎ຺ຈນ຺ນໍ ຂນ຺ຘານໍ ນິໂຣໂຘ ອນໂຆ ນິພ຺ພານນ຺ຕິ ປສ຺ສນ຺ໂຕ ສມ຺ມຕ຺ຕນິຍາມໍ ໂອກ຺ກມຕິ. ປຎ຺ຈກ຺ຂນ຺ເຘ ອາພາຘໂຕ ປສ຺ສນ຺ໂຕ ອນຸໂລມິກໍ ຂນ຺ຕິໍ ປຏິລຠຕິ. ປຎ຺ຈນ຺ນໍ ຂນ຺ຘານໍ ນິໂຣໂຘ ອນາພາໂຘ ນິພ຺ພານນ຺ຕິ ປສ຺ສນ຺ໂຕ ສມ຺ມຕ຺ຕນິຍາມໍ ໂອກ຺ກມຕິ. ປຎ຺ຈກ຺ຂນ຺ເຘ ປຣໂຕ ປສ຺ສນ຺ໂຕ ອນຸໂລມິກໍ ຂນ຺ຕິໍ ປຏິລຠຕິ. ປຎ຺ຈນ຺ນໍ ຂນ຺ຘານໍ ນິໂຣໂຘ ອປຣປ຺ປຈ຺ຈຍໍ ນິພ຺ພານນ຺ຕິ ປສ຺ສນ຺ໂຕ ສມ຺ມຕ຺ຕນິຍາມໍ ໂອກ຺ກມຕິ. ປຎ຺ຈກ຺ຂນ຺ເຘ ປໂລກໂຕ ປສ຺ສນ຺ໂຕ ອນຸໂລມິກໍ ຂນ຺ຕິໍ ປຏິລຠຕິ. ປຎ຺ຈນ຺ນໍ ຂນ຺ຘານໍ ນິໂຣໂຘ ອປໂລກຘມ຺ໂມ ນິພ຺ພານນ຺ຕິ ປສ຺ສນ຺ໂຕ ສມ຺ມຕ຺ຕນິຍາມໍ ໂອກ຺ກມຕິ. ປຎ຺ຈກ຺ຂນ຺ເຘ ອີຕິໂຕ ປສ຺ສນ຺ໂຕ ອນຸໂລມິກໍ ຂນ຺ຕິໍ ປຏິລຠຕິ. ປຎ຺ຈນ຺ນໍ ຂນ຺ຘານໍ ນິໂຣໂຘ ອນີຕິກໍ ນິພ຺ພານນ຺ຕິ ປສ຺ສນ຺ໂຕ ສມ຺ມຕ຺ຕນິຍາມໍ ໂອກ຺ກມຕິ.

ປຎ຺ຈກ຺ຂນ຺ເຘ ອຸປທ຺ທວໂຕ ປສ຺ສນ຺ໂຕ ອນຸໂລມິກໍ ຂນ຺ຕິໍ ປຏິລຠຕິ. ປຎ຺ຈນ຺ນໍ ຂນ຺ຘານໍ ນິໂຣໂຘ ອນຸປທ຺ທວໍ ນິພ຺ພານນ຺ຕິ ປສ຺ສນ຺ໂຕ ສມ຺ມຕ຺ຕນິຍາມໍ ໂອກ຺ກມຕິ. ປຎ຺ຈກ຺ຂນ຺ເຘ ຠຍໂຕ ປສ຺ສນ຺ໂຕ ອນຸໂລມິກໍ ຂນ຺ຕິໍ ປຏິລຠຕິ. ປຎ຺ຈນ຺ນໍ ຂນ຺ຘານໍ ນິໂຣໂຘ ອຠຍໍ ນິພ຺ພານນ຺ຕິ ປສ຺ສນ຺ໂຕ ສມ຺ມຕ຺ຕນິຍາມໍ ໂອກ຺ກມຕິ. ປຎ຺ຈກ຺ຂນ຺ເຘ ອຸປສຄ຺ຄໂຕ ປສ຺ສນ຺ໂຕ ອນຸໂລມິກໍ ຂນ຺ຕິໍ ປຏິລຠຕິ. ປຎ຺ຈນ຺ນໍ ຂນ຺ຘານໍ ນິໂຣໂຘ ອນຸປສຄ຺ຄໍ ນິພ຺ພານນ຺ຕິ ປສ຺ສນ຺ໂຕ ສມ຺ມຕ຺ຕນິຍາມໍ ໂອກ຺ກມຕິ. ປຎ຺ຈກ຺ຂນ຺ເຘ ຈລໂຕ ປສ຺ສນ຺ໂຕ ອນຸໂລມິກໍ ຂນ຺ຕິໍ ປຏິລຠຕິ. ປຎ຺ຈນ຺ນໍ ຂນ຺ຘານໍ ນິໂຣໂຘ ອຈລໍ ນິພ຺ພານນ຺ຕິ ປສ຺ສນ຺ໂຕ ສມ຺ມຕ຺ຕນິຍາມໍ ໂອກ຺ກມຕິ. ປຎ຺ຈກ຺ຂນ຺ເຘ ປຠງ຺ຄຸໂຕ ປສ຺ສນ຺ໂຕ ອນຸໂລມິກໍ ຂນ຺ຕິໍ ປຏິລຠຕິ. ປຎ຺ຈນ຺ນໍ ຂນ຺ຘານໍ ນິໂຣໂຘ ອປຠງ຺ຄຸ [ອປ຺ປຠງ຺ຄໍ (ສ຺ຍາ.)] ນິພ຺ພານນ຺ຕິ ປສ຺ສນ຺ໂຕ ສມ຺ມຕ຺ຕນິຍາມໍ ໂອກ຺ກມຕິ.

ປຎ຺ຈກ຺ຂນ຺ເຘ ອທ຺ຘຸວໂຕ ປສ຺ສນ຺ໂຕ ອນຸໂລມິກໍ ຂນ຺ຕິໍ ປຏິລຠຕິ. ປຎ຺ຈນ຺ນໍ ຂນ຺ຘານໍ ນິໂຣໂຘ ຘຸວໍ ນິພ຺ພານນ຺ຕິ ປສ຺ສນ຺ໂຕ ສມ຺ມຕ຺ຕນິຍາມໍ ໂອກ຺ກມຕິ. ປຎ຺ຈກ຺ຂນ຺ເຘ ອຕາຓໂຕ ປສ຺ສນ຺ໂຕ ອນຸໂລມິກໍ ຂນ຺ຕິໍ ປຏິລຠຕິ. ປຎ຺ຈນ຺ນໍ ຂນ຺ຘານໍ ນິໂຣໂຘ ຕາຓໍ ນິພ຺ພານນ຺ຕິ ປສ຺ສນ຺ໂຕ ສມ຺ມຕ຺ຕນິຍາມໍ ໂອກ຺ກມຕິ. ປຎ຺ຈກ຺ຂນ຺ເຘ ອເລຓໂຕ ປສ຺ສນ຺ໂຕ ອນຸໂລມິກໍ ຂນ຺ຕິໍ ປຏິລຠຕິ. ປຎ຺ຈນ຺ນໍ ຂນ຺ຘານໍ ນິໂຣໂຘ ເລຓໍ ນິພ຺ພານນ຺ຕິ ປສ຺ສນ຺ໂຕ ສມ຺ມຕ຺ຕນິຍາມໍ ໂອກ຺ກມຕິ. ປຎ຺ຈກ຺ຂນ຺ເຘ ອສຣຓໂຕ ປສ຺ສນ຺ໂຕ ອນຸໂລມິກໍ ຂນ຺ຕິໍ ປຏິລຠຕິ. ປຎ຺ຈນ຺ນໍ ຂນ຺ຘານໍ ນິໂຣໂຘ ສຣຓໍ ນິພ຺ພານນ຺ຕິ ປສ຺ສນ຺ໂຕ ສມ຺ມຕ຺ຕນິຍາມໍ ໂອກ຺ກມຕິ. ປຎ຺ຈກ຺ຂນ຺ເຘ ຣິຕ຺ຕໂຕ ປສ຺ສນ຺ໂຕ ອນຸໂລມິກໍ ຂນ຺ຕິໍ ປຏິລຠຕິ. ປຎ຺ຈນ຺ນໍ ຂນ຺ຘານໍ ນິໂຣໂຘ ອຣິຕ຺ຕໍ ນິພ຺ພານນ຺ຕິ ປສ຺ສນ຺ໂຕ ສມ຺ມຕ຺ຕນິຍາມໍ ໂອກ຺ກມຕິ.

ປຎ຺ຈກ຺ຂນ຺ເຘ ຕຸຈ຺ຉໂຕ ປສ຺ສນ຺ໂຕ ອນຸໂລມິກໍ ຂນ຺ຕິໍ ປຏິລຠຕິ. ປຎ຺ຈນ຺ນໍ ຂນ຺ຘານໍ ນິໂຣໂຘ ອຕຸຈ຺ຉໍ ນິພ຺ພານນ຺ຕິ ປສ຺ສນ຺ໂຕ ສມ຺ມຕ຺ຕນິຍາມໍ ໂອກ຺ກມຕິ. ປຎ຺ຈກ຺ຂນ຺ເຘ ສຸຎ຺ຎໂຕ ປສ຺ສນ຺ໂຕ ອນຸໂລມິກໍ ຂນ຺ຕິໍ ປຏິລຠຕິ. ປຎ຺ຈນ຺ນໍ ຂນ຺ຘານໍ ນິໂຣໂຘ ປຣມສຸຎ຺ຎໍ ນິພ຺ພານນ຺ຕິ ປສ຺ສນ຺ໂຕ ສມ຺ມຕ຺ຕນິຍາມໍ ໂອກ຺ກມຕິ. ປຎ຺ຈກ຺ຂນ຺ເຘ ອນຕ຺ຕໂຕ ປສ຺ສນ຺ໂຕ ອນຸໂລມິກໍ ຂນ຺ຕິໍ ປຏິລຠຕິ. ປຎ຺ຈນ຺ນໍ ຂນ຺ຘານໍ ນິໂຣໂຘ ປຣມຕ຺ຖໍ ນິພ຺ພານນ຺ຕິ ປສ຺ສນ຺ໂຕ ສມ຺ມຕ຺ຕນິຍາມໍ ໂອກ຺ກມຕິ. ປຎ຺ຈກ຺ຂນ຺ເຘ ອາທີນວໂຕ ປສ຺ສນ຺ໂຕ ອນຸໂລມິກໍ ຂນ຺ຕິໍ ປຏິລຠຕິ. ປຎ຺ຈນ຺ນໍ ຂນ຺ຘານໍ ນິໂຣໂຘ ອນາທີນວໍ ນິພ຺ພານນ຺ຕິ ປສ຺ສນ຺ໂຕ ສມ຺ມຕ຺ຕນິຍາມໍ ໂອກ຺ກມຕິ. ປຎ຺ຈກ຺ຂນ຺ເຘ ວິປຣິຓາມຘມ຺ມໂຕ ປສ຺ສນ຺ໂຕ ອນຸໂລມິກໍ ຂນ຺ຕິໍ ປຏິລຠຕິ. ປຎ຺ຈນ຺ນໍ ຂນ຺ຘານໍ ນິໂຣໂຘ ອວິປຣິຓາມຘມ຺ມໍ ນິພ຺ພານນ຺ຕິ ປສ຺ສນ຺ໂຕ ສມ຺ມຕ຺ຕນິຍາມໍ ໂອກ຺ກມຕິ.

ປຎ຺ຈກ຺ຂນ຺ເຘ ອສາຣກໂຕ ປສ຺ສນ຺ໂຕ ອນຸໂລມິກໍ ຂນ຺ຕິໍ ປຏິລຠຕິ. ປຎ຺ຈນ຺ນໍ ຂນ຺ຘານໍ ນິໂຣໂຘ ສາຣໍ ນິພ຺ພານນ຺ຕິ ປສ຺ສນ຺ໂຕ ສມ຺ມຕ຺ຕນິຍາມໍ ໂອກ຺ກມຕິ. ປຎ຺ຈກ຺ຂນ຺ເຘ ອຆມູລໂຕ ປສ຺ສນ຺ໂຕ ອນຸໂລມິກໍ ຂນ຺ຕິໍ ປຏິລຠຕິ. ປຎ຺ຈນ຺ນໍ ຂນ຺ຘານໍ ນິໂຣໂຘ ອນຆມູລໍ ນິພ຺ພານນ຺ຕິ ປສ຺ສນ຺ໂຕ ສມ຺ມຕ຺ຕນິຍາມໍ ໂອກ຺ກມຕິ. ປຎ຺ຈກ຺ຂນ຺ເຘ ວຘກໂຕ ປສ຺ສນ຺ໂຕ ອນຸໂລມິກໍ ຂນ຺ຕິໍ ປຏິລຠຕິ. ປຎ຺ຈນ຺ນໍ ຂນ຺ຘານໍ ນິໂຣໂຘ ອວຘກໍ ນິພ຺ພານນ຺ຕິ ປສ຺ສນ຺ໂຕ ສມ຺ມຕ຺ຕນິຍາມໍ ໂອກ຺ກມຕິ. ປຎ຺ຈກ຺ຂນ຺ເຘ ວິຠວໂຕ ປສ຺ສນ຺ໂຕ ອນຸໂລມິກໍ ຂນ຺ຕິໍ ປຏິລຠຕິ. ປຎ຺ຈນ຺ນໍ ຂນ຺ຘານໍ ນິໂຣໂຘ ອວິຠວໍ ນິພ຺ພານນ຺ຕິ ປສ຺ສນ຺ໂຕ ສມ຺ມຕ຺ຕນິຍາມໍ ໂອກ຺ກມຕິ. ປຎ຺ຈກ຺ຂນ຺ເຘ ສາສວໂຕ ປສ຺ສນ຺ໂຕ ອນຸໂລມິກໍ ຂນ຺ຕິໍ ປຏິລຠຕິ. ປຎ຺ຈນ຺ນໍ ຂນ຺ຘານໍ ນິໂຣໂຘ ອນາສວໍ ນິພ຺ພານນ຺ຕິ ປສ຺ສນ຺ໂຕ ສມ຺ມຕ຺ຕນິຍາມໍ ໂອກ຺ກມຕິ.

ປຎ຺ຈກ຺ຂນ຺ເຘ ສງ຺ຂຕໂຕ ປສ຺ສນ຺ໂຕ ອນຸໂລມິກໍ ຂນ຺ຕິໍ ປຏິລຠຕິ. ປຎ຺ຈນ຺ນໍ ຂນ຺ຘານໍ ນິໂຣໂຘ ອສງ຺ຂຕໍ ນິພ຺ພານນ຺ຕິ ປສ຺ສນ຺ໂຕ ສມ຺ມຕ຺ຕນິຍາມໍ ໂອກ຺ກມຕິ. ປຎ຺ຈກ຺ຂນ຺ເຘ ມາຣາມິສໂຕ ປສ຺ສນ຺ໂຕ ອນຸໂລມິກໍ ຂນ຺ຕິໍ ປຏິລຠຕິ. ປຎ຺ຈນ຺ນໍ ຂນ຺ຘານໍ ນິໂຣໂຘ ນິຣາມິສໍ ນິພ຺ພານນ຺ຕິ ປສ຺ສນ຺ໂຕ ສມ຺ມຕ຺ຕນິຍາມໍ ໂອກ຺ກມຕິ. ປຎ຺ຈກ຺ຂນ຺ເຘ ຊາຕິຘມ຺ມໂຕ ປສ຺ສນ຺ໂຕ ອນຸໂລມິກໍ ຂນ຺ຕິໍ ປຏິລຠຕິ. ປຎ຺ຈນ຺ນໍ ຂນ຺ຘານໍ ນິໂຣໂຘ ອຊາຕໍ ນິພ຺ພານນ຺ຕິ ປສ຺ສນ຺ໂຕ ສມ຺ມຕ຺ຕນິຍາມໍ ໂອກ຺ກມຕິ. ປຎ຺ຈກ຺ຂນ຺ເຘ ຊຣາຘມ຺ມໂຕ ປສ຺ສນ຺ໂຕ ອນຸໂລມິກໍ ຂນ຺ຕິໍ ປຏິລຠຕິ. ປຎ຺ຈນ຺ນໍ ຂນ຺ຘານໍ ນິໂຣໂຘ ອຊຣໍ ນິພ຺ພານນ຺ຕິ ປສ຺ສນ຺ໂຕ ສມ຺ມຕ຺ຕນິຍາມໍ ໂອກ຺ກມຕິ. ປຎ຺ຈກ຺ຂນ຺ເຘ ພ຺ຍາຘິຘມ຺ມໂຕ ປສ຺ສນ຺ໂຕ ອນຸໂລມິກໍ ຂນ຺ຕິໍ ປຏິລຠຕິ. ປຎ຺ຈນ຺ນໍ ຂນ຺ຘານໍ ນິໂຣໂຘ ອພ຺ຍາຘິ [ອພ຺ຍາຘິຘມ຺ມໍ (ສ຺ຍາ.)] ນິພ຺ພານນ຺ຕິ ປສ຺ສນ຺ໂຕ ສມ຺ມຕ຺ຕນິຍາມໍ ໂອກ຺ກມຕິ.

ປຎ຺ຈກ຺ຂນ຺ເຘ ມຣຓຘມ຺ມໂຕ ປສ຺ສນ຺ໂຕ ອນຸໂລມິກໍ ຂນ຺ຕິໍ ປຏິລຠຕິ. ປຎ຺ຈນ຺ນໍ ຂນ຺ຘານໍ ນິໂຣໂຘ ອມຕໍ ນິພ຺ພານນ຺ຕິ ປສ຺ສນ຺ໂຕ ສມ຺ມຕ຺ຕນິຍາມໍ ໂອກ຺ກມຕິ. ປຎ຺ຈກ຺ຂນ຺ເຘ ໂສກຘມ຺ມໂຕ ປສ຺ສນ຺ໂຕ ອນຸໂລມິກໍ ຂນ຺ຕິໍ ປຏິລຠຕິ. ປຎ຺ຈນ຺ນໍ ຂນ຺ຘານໍ ນິໂຣໂຘ ອໂສກໍ ນິພ຺ພານນ຺ຕິ ປສ຺ສນ຺ໂຕ ສມ຺ມຕ຺ຕນິຍາມໍ ໂອກ຺ກມຕິ. ປຎ຺ຈກ຺ຂນ຺ເຘ ປຣິເທວຘມ຺ມໂຕ ປສ຺ສນ຺ໂຕ ອນຸໂລມິກໍ ຂນ຺ຕິໍ ປຏິລຠຕິ. ປຎ຺ຈນ຺ນໍ ຂນ຺ຘານໍ ນິໂຣໂຘ ອປຣິເທວໍ ນິພ຺ພານນ຺ຕິ ປສ຺ສນ຺ໂຕ ສມ຺ມຕ຺ຕນິຍາມໍ ໂອກ຺ກມຕິ. ປຎ຺ຈກ຺ຂນ຺ເຘ ອຸປາຍາສຘມ຺ມໂຕ ປສ຺ສນ຺ໂຕ ອນຸໂລມິກໍ ຂນ຺ຕິໍ ປຏິລຠຕິ. ປຎ຺ຈນ຺ນໍ ຂນ຺ຘານໍ ນິໂຣໂຘ ອນຸປາຍາສໍ ນິພ຺ພານນ຺ຕິ ປສ຺ສນ຺ໂຕ ສມ຺ມຕ຺ຕນິຍາມໍ ໂອກ຺ກມຕິ. ປຎ຺ຈກ຺ຂນ຺ເຘ ສໍກິເລສິກຘມ຺ມໂຕ ປສ຺ສນ຺ໂຕ ອນຸໂລມິກໍ ຂນ຺ຕິໍ ປຏິລຠຕິ. ປຎ຺ຈນ຺ນໍ ຂນ຺ຘານໍ ນິໂຣໂຘ ອສໍກິລິຏ຺ຐໍ ນິພ຺ພານນ຺ຕິ ປສ຺ສນ຺ໂຕ ສມ຺ມຕ຺ຕນິຍາມໍ ໂອກ຺ກມຕິ.

໓໙. ອນິຈ຺ຈໂຕຕິ, ອນິຈ຺ຈານຸປສ຺ສນາ. ທຸກ຺ຂໂຕຕິ, ທຸກ຺ຂານຸປສ຺ສນາ. ໂຣຄໂຕຕິ, ທຸກ຺ຂານຸປສ຺ສນາ. ຄຓ຺ຑໂຕຕິ, ທຸກ຺ຂານຸປສ຺ສນາ. ສລ຺ລໂຕຕິ, ທຸກ຺ຂານຸປສ຺ສນາ. ອຆໂຕຕິ, ທຸກ຺ຂານຸປສ຺ສນາ. ອາພາຘໂຕຕິ, ທຸກ຺ຂານຸປສ຺ສນາ. ປຣໂຕຕິ, ອນຕ຺ຕານຸປສ຺ສນາ. ປໂລກໂຕຕິ, ອນິຈ຺ຈານຸປສ຺ສນາ. ອີຕິໂຕຕິ, ທຸກ຺ຂານຸປສ຺ສນາ.

ອຸປທ຺ທວໂຕຕິ, ທຸກ຺ຂານຸປສ຺ສນາ. ຠຍໂຕຕິ, ທຸກ຺ຂານຸປສ຺ສນາ. ອຸປສຄ຺ຄໂຕຕິ, ທຸກ຺ຂານຸປສ຺ສນາ. ຈລໂຕຕິ, ອນິຈ຺ຈານຸປສ຺ສນາ. ປຠງ຺ຄຸໂຕຕິ, ອນິຈ຺ຈານຸປສ຺ສນາ. ອທ຺ຘຸວໂຕຕິ, ອນິຈ຺ຈານຸປສ຺ສນາ. ອຕາຓໂຕຕິ, ທຸກ຺ຂານຸປສ຺ສນາ. ອເລຓໂຕຕິ, ທຸກ຺ຂານຸປສ຺ສນາ. ອສຣຓໂຕຕິ, ທຸກ຺ຂານຸປສ຺ສນາ. ຣິຕ຺ຕໂຕຕິ, ອນຕ຺ຕານຸປສ຺ສນາ.

ຕຸຈ຺ຉໂຕຕິ, ອນຕ຺ຕານຸປສ຺ສນາ. ສຸຎ຺ຎໂຕຕິ, ອນຕ຺ຕານຸປສ຺ສນາ. ອນຕ຺ຕໂຕຕິ, ອນຕ຺ຕານຸປສ຺ສນາ. ອາທີນວໂຕຕິ, ທຸກ຺ຂານຸປສ຺ສນາ. ວິປຣິຓາມຘມ຺ມໂຕຕິ, ອນິຈ຺ຈານຸປສ຺ສນາ. ອສາຣກໂຕຕິ, ອນຕ຺ຕານຸປສ຺ສນາ. ອຆມູລໂຕຕິ, ທຸກ຺ຂານຸປສ຺ສນາ. ວຘກໂຕຕິ, ທຸກ຺ຂານຸປສ຺ສນາ. ວິຠວໂຕຕິ, ອນິຈ຺ຈານຸປສ຺ສນາ. ສາສວໂຕຕິ, ທຸກ຺ຂານຸປສ຺ສນາ.

ສງ຺ຂຕໂຕຕິ, ອນິຈ຺ຈານຸປສ຺ສນາ. ມາຣາມິສໂຕຕິ, ທຸກ຺ຂານຸປສ຺ສນາ. ຊາຕິຘມ຺ມໂຕຕິ, ທຸກ຺ຂານຸປສ຺ສນາ. ຊຣາຘມ຺ມໂຕຕິ, ທຸກ຺ຂານຸປສ຺ສນາ. ພ຺ຍາຘິຘມ຺ມໂຕຕິ, ທຸກ຺ຂານຸປສ຺ສນາ. ມຣຓຘມ຺ມໂຕຕິ, ອນິຈ຺ຈານຸປສ຺ສນາ. ໂສກຘມ຺ມໂຕຕິ, ທຸກ຺ຂານຸປສ຺ສນາ. ປຣິເທວຘມ຺ມໂຕຕິ, ທຸກ຺ຂານຸປສ຺ສນາ. ອຸປາຍາສຘມ຺ມໂຕຕິ, ທຸກ຺ຂານຸປສ຺ສນາ. ສໍກິເລສິກຘມ຺ມໂຕຕິ, ທຸກ຺ຂານຸປສ຺ສນາ.

ອິເມຫິ ຈຕ຺ຕາລີສາຍ ອາກາເຣຫິ ອນຸໂລມິກໍ ຂນ຺ຕິໍ ປຏິລຠຕິ. ອິເມຫິ ຈຕ຺ຕາລີສາຍ ອາກາເຣຫິ ສມ຺ມຕ຺ຕນິຍາມໍ ໂອກ຺ກມຕິ.

ອິເມຫິ ຈຕ຺ຕາລີສາຍ ອາກາເຣຫິ ອນຸໂລມິກໍ ຂນ຺ຕິໍ ປຏິລຠນ຺ຕສ຺ສ, ອິເມຫິ ຈຕ຺ຕາລີສາຍ ອາກາເຣຫິ ສມ຺ມຕ຺ຕນິຍາມໍ ໂອກ຺ກມນ຺ຕສ຺ສ ກຕິ ອນິຈ຺ຈານຸປສ຺ສນາ, ກຕິ ທຸກ຺ຂານຸປສ຺ສນາ, ກຕິ ອນຕ຺ຕານຸປສ຺ສນາ?

ປຎ຺ຈວີສຕິ ອນຕ຺ຕານຸປສ຺ສນາ, ປຎ຺ຎາສ ອນິຈ຺ຈານຸປສ຺ສນາ;

ສຕໍ ປຎ຺ຈວີສຕິ ເຈວ, ຍານິ ທຸກ຺ເຂ ປວຸຈ຺ຈເຣຕິ.

ວິປສ຺ສນາກຖາ ນິຏ຺ຐິຕາ.