໑໐. ມາຕິກາກຖາ

໔໐. ນິຈ຺ຉາໂຕ [ນິຈ຺ຉາໂຕ ມຸຈ຺ຈຕີຕິ (ສ຺ຍາ.)], ໂມກ຺ໂຂ ວິໂມກ຺ໂຂ, ວິຊ຺ຊາວິມຸຕ຺ຕິ, ອຘິສີລໍ, ອຘິຈິຕ຺ຕໍ, ອຘິປຎ຺ຎາ, ປສ຺ສທ຺ຘິ, ຎາຓໍ, ທສ຺ສນໍ ວິສຸທ຺ຘິ [ສຸທ຺ຘິ (ສ຺ຍາ.)] ເນກ຺ຂມ຺ມໍ, ນິສ຺ສຣຓໍ ປວິເວໂກ, ໂວສ຺ສຄ຺ໂຄ, ຈຣິຍາ, ຌານວິໂມກ຺ໂຂ, ຠາວນາ, ອຘິຏ຺ຐານໍ, ຊີວິຕໍ.

໔໑. ນິຈ຺ຉາໂຕຕິ ເນກ຺ຂມ຺ເມນ ກາມຈ຺ຉນ຺ທໂຕ ນິຈ຺ຉາໂຕ, ອພ຺ຍາປາເທນ ພ຺ຍາປາທໂຕ ນິຈ຺ຉາໂຕ…ເປ… ປຐເມນ ຌາເນນ ນີວຣເຓຫິ ນິຈ຺ຉາໂຕ…ເປ… ອຣຫຕ຺ຕມຄ຺ເຄນ ສພ຺ພກິເລເສຫິ ນິຈ຺ຉາໂຕ.

ໂມກ຺ໂຂ ວິໂມກ຺ໂຂຕິ ເນກ຺ຂມ຺ເມນ ກາມຈ຺ຉນ຺ທໂຕ ມຸຈ຺ຈຕີຕິ – ໂມກ຺ໂຂ ວິໂມກ຺ໂຂ. ອພ຺ຍາປາເທນ ພ຺ຍາປາທໂຕ ມຸຈ຺ຈຕີຕິ – ໂມກ຺ໂຂ ວິໂມກ຺ໂຂ…ເປ… ປຐເມນ ຌາເນນ ນີວຣເຓຫິ ມຸຈ຺ຈຕີຕິ – ໂມກ຺ໂຂ ວິໂມກ຺ໂຂ…ເປ… ອຣຫຕ຺ຕມຄ຺ເຄນ ສພ຺ພກິເລເສຫິ ມຸຈ຺ຈຕີຕິ – ໂມກ຺ໂຂ ວິໂມກ຺ໂຂ.

ວິຊ຺ຊາວິມຸຕ຺ຕີຕິ ເນກ຺ຂມ຺ມໍ ວິຊ຺ຊຕີຕິ ວິຊ຺ຊາ, ກາມຈ຺ຉນ຺ທໂຕ ມຸຈ຺ຈຕີຕິ ວິມຸຕ຺ຕິ. ວິຊ຺ຊນ຺ໂຕ ມຸຈ຺ຈຕິ, ມຸຈ຺ຈນ຺ໂຕ ວິຊ຺ຊຕີຕິ – ວິຊ຺ຊາວິມຸຕ຺ຕິ. ອພ຺ຍາປາໂທ [ອພ຺ຍາປາທໍ (ສ຺ຍາ.)] ວິຊ຺ຊຕີຕິ ວິຊ຺ຊາ, ພ຺ຍາປາທໂຕ ວິມຸຈ຺ຈຕີຕິ ວິມຸຕ຺ຕິ. ວິຊ຺ຊນ຺ໂຕ ມຸຈ຺ຈຕິ, ມຸຈ຺ຈນ຺ໂຕ ວິຊ຺ຊຕີຕິ – ວິຊ຺ຊາວິມຸຕ຺ຕິ…ເປ… ອຣຫຕ຺ຕມຄ຺ໂຄ ວິຊ຺ຊຕີຕິ ວິຊ຺ຊາ, ສພ຺ພກິເລເສຫິ ມຸຈ຺ຈຕີຕິ ວິມຸຕ຺ຕິ. ວິຊ຺ຊນ຺ໂຕ ມຸຈ຺ຈຕິ, ມຸຈ຺ຈນ຺ໂຕ ວິຊ຺ຊຕີຕິ – ວິຊ຺ຊາວິມຸຕ຺ຕິ.

ອຘິສີລໍ ອຘິຈິຕ຺ຕໍ ອຘິປຎ຺ຎາຕິ ເນກ຺ຂມ຺ເມນ ກາມຈ຺ຉນ຺ທໍ, ສໍວຣຏ຺ເຐນ ສີລວິສຸທ຺ຘິ, ອວິກ຺ເຂປຏ຺ເຐນ ຈິຕ຺ຕວິສຸທ຺ຘິ, ທສ຺ສນຏ຺ເຐນ ທິຏ຺ຐິວິສຸທ຺ຘິ. ໂຍ ຕຕ຺ຖ ສໍວຣຏ຺ໂຐ, ອຍໍ ອຘິສີລສິກ຺ຂາ. ໂຍ ຕຕ຺ຖ ອວິກ຺ເຂປຏ຺ໂຐ, ອຍໍ ອຘິຈິຕ຺ຕສິກ຺ຂາ. ໂຍ ຕຕ຺ຖ ທສ຺ສນຏ຺ໂຐ, ອຍໍ ອຘິປຎ຺ຎາສິກ຺ຂາ. ອພ຺ຍາປາເທນ ພ຺ຍາປາທໍ ສໍວຣຏ຺ເຐນ ສີລວິສຸທ຺ຘິ…ເປ… ອຣຫຕ຺ຕມຄ຺ເຄນ ສພ຺ພກິເລເສ ສໍວຣຏ຺ເຐນ ສີລວິສຸທ຺ຘິ, ອວິກ຺ເຂປຏ຺ເຐນ ຈິຕ຺ຕວິສຸທ຺ຘິ. ທສ຺ສນຏ຺ເຐນ ທິຏ຺ຐິວິສຸທ຺ຘິ. ໂຍ ຕຕ຺ຖ ສໍວຣຏ຺ໂຐ, ອຍໍ ອຘິສີລສິກ຺ຂາ. ໂຍ ຕຕ຺ຖ ອວິກ຺ເຂປຏ຺ໂຐ, ອຍໍ ອຘິຈິຕ຺ຕສິກ຺ຂາ. ໂຍ ຕຕ຺ຖ ທສ຺ສນຏ຺ໂຐ, ອຍໍ ອຘິປຎ຺ຎາສິກ຺ຂາ.

ປສ຺ສທ຺ຘີຕິ ເນກ຺ຂມ຺ເມນ ກາມຈ຺ຉນ຺ທໍ ປຏິປ຺ປສ຺ສມ຺ເຠຕິ, ອພ຺ຍາປາເທນ ພ຺ຍາປາທໍ ປຏິປ຺ປສ຺ສມ຺ເຠຕິ…ເປ… ອຣຫຕ຺ຕມຄ຺ເຄນ ສພ຺ພກິເລເສ ປຏິປ຺ປສ຺ສມ຺ເຠຕິ.

ຎາຓນ຺ຕິ ກາມຈ຺ຉນ຺ທສ຺ສ ປຫີນຕ຺ຕາ ເນກ຺ຂມ຺ມໍ ຎາຕຏ຺ເຐນ ຎາຓໍ; ພ຺ຍາປາທສ຺ສ ປຫີນຕ຺ຕາ ອພ຺ຍາປາໂທ ຎາຕຏ຺ເຐນ ຎາຓໍ…ເປ… ສພ຺ພກິເລສານໍ ປຫີນຕ຺ຕາ ອຣຫຕ຺ຕມຄ຺ໂຄ ຎາຕຏ຺ເຐນ ຎາຓໍ.

ທສ຺ສນນ຺ຕິ ກາມຈ຺ຉນ຺ທສ຺ສ ປຫີນຕ຺ຕາ ເນກ຺ຂມ຺ມໍ ທິຏ຺ຐຕ຺ຕາ ທສ຺ສນໍ. ພ຺ຍາປາທສ຺ສ ປຫີນຕ຺ຕາ ອພ຺ຍາປາໂທ ທິຏ຺ຐຕ຺ຕາ ທສ຺ສນໍ…ເປ… ສພ຺ພກິເລສານໍ ປຫີນຕ຺ຕາ ອຣຫຕ຺ຕມຄ຺ໂຄ ທິຏ຺ຐຕ຺ຕາ ທສ຺ສນໍ.

ວິສຸທ຺ຘີຕິ ກາມຈ຺ຉນ຺ທໍ ປຊຫນ຺ໂຕ ເນກ຺ຂມ຺ເມນ ວິສຸຊ຺ຌຕິ. ພ຺ຍາປາທໍ ປຊຫນ຺ໂຕ ອພ຺ຍາປາເທນ ວິສຸຊ຺ຌຕິ…ເປ… ສພ຺ພກິເລເສ ປຊຫນ຺ໂຕ ອຣຫຕ຺ຕມຄ຺ເຄນ ວິສຸຊ຺ຌຕິ.

ເນກ຺ຂມ຺ມນ຺ຕິ ກາມານເມຕໍ ນິສ຺ສຣຓໍ, ຍທິທໍ ເນກ຺ຂມ຺ມໍ. ຣູປານເມຕໍ ນິສ຺ສຣຓໍ, ຍທິທໍ ອາຣຸປ຺ປໍ. ຍໍ ໂຂ ປນ ກິຎ຺ຈິ ຠູຕໍ ສງ຺ຂຕໍ ປຏິຈ຺ຈສມຸປ຺ປນ຺ນໍ, ນິໂຣໂຘ ຕສ຺ສ ເນກ຺ຂມ຺ມໍ. ພ຺ຍາປາທສ຺ສ ອພ຺ຍາປາໂທ ເນກ຺ຂມ຺ມໍ. ຖິນມິທ຺ຘສ຺ສ ອາໂລກສຎ຺ຎາ ເນກ຺ຂມ຺ມໍ…ເປ… ສພ຺ພກິເລສານໍ ອຣຫຕ຺ຕມຄ຺ໂຄ ເນກ຺ຂມ຺ມໍ.

ນິສ຺ສຣຓນ຺ຕິ ກາມານເມຕໍ ນິສ຺ສຣຓໍ, ຍທິທໍ ເນກ຺ຂມ຺ມໍ. ຣູປານເມຕໍ ນິສ຺ສຣຓໍ, ຍທິທໍ ອາຣຸປ຺ປໍ. ຍໍ ໂຂ ປນ ກິຎ຺ຈິ ຠູຕໍ ສງ຺ຂຕໍ ປຏິຈ຺ຈສມຸປ຺ປນ຺ນໍ, ນິໂຣໂຘ ຕສ຺ສ ນິສ຺ສຣຓໍ. ກາມຈ຺ຉນ຺ທສ຺ສ ເນກ຺ຂມ຺ມໍ ນິສ຺ສຣຓໍ. ພ຺ຍາປາທສ຺ສ ອພ຺ຍາປາໂທ ນິສ຺ສຣຓໍ…ເປ… ສພ຺ພກິເລສານໍ ອຣຫຕ຺ຕມຄ຺ໂຄ ນິສ຺ສຣຓໍ.

ປວິເວໂກຕິ ກາມຈ຺ຉນ຺ທສ຺ສ ເນກ຺ຂມ຺ມໍ ປວິເວໂກ …ເປ… ສພ຺ພກິເລສານໍ ອຣຫຕ຺ຕມຄ຺ໂຄ ປວິເວໂກ.

ໂວສ຺ສຄ຺ໂຄຕິ ເນກ຺ຂມ຺ເມນ ກາມຈ຺ຉນ຺ທໍ ໂວສ຺ສຊ຺ຊຕີຕິ – ໂວສ຺ສຄ຺ໂຄ. ອພ຺ຍາປາເທນ ພ຺ຍາປາທໍ ໂວສ຺ສຊ຺ຊຕີຕິ – ໂວສ຺ສຄ຺ໂຄ…ເປ… ອຣຫຕ຺ຕມຄ຺ເຄນ ສພ຺ພກິເລເສ ໂວສ຺ສຊ຺ຊຕີຕິ – ໂວສ຺ສຄ຺ໂຄ.

ຈຣິຍາຕິ ກາມຈ຺ຉນ຺ທໍ ປຊຫນ຺ໂຕ ເນກ຺ຂມ຺ເມນ ຈຣຕິ. ພ຺ຍາປາທໍ ປຊຫນ຺ໂຕ ອພ຺ຍາປາເທນ ຈຣຕິ…ເປ… ສພ຺ພກິເລເສ ປຊຫນ຺ໂຕ ອຣຫຕ຺ຕມຄ຺ເຄນ ຈຣຕິ.

ຌານວິໂມກ຺ໂຂຕິ ເນກ຺ຂມ຺ມໍ ຌາຍຕີຕິ – ຌານໍ. ກາມຈ຺ຉນ຺ທໍ ຌາເປຕີຕິ – ຌານໍ. ຌາຍນ຺ໂຕ ມຸຈ຺ຈຕີຕິ – ຌານວິໂມກ຺ໂຂ. ຌາເປນ຺ໂຕ ມຸຈ຺ຈຕີຕິ – ຌານວິໂມກ຺ໂຂ. ຌາຍນ຺ຕີຕິ ຘມ຺ມາ. ຌາເປນ຺ຕີຕິ ກິເລເສ. ຌາເຕ ຈ ຌາເປ ຈ ຊານາຕີຕິ – ຌານຌາຍີ [ຌານວິໂມກ຺ໂຂ (ສ຺ຍາ.) ອຏ຺ຐກຖາ ໂອໂລເກຕພ຺ພາ]. ອພ຺ຍາປາໂທ ຌາຍຕີຕິ ຌານໍ. ພ຺ຍາປາທໍ ຌາເປຕີຕິ – ຌານໍ…ເປ… ອາໂລກສຎ຺ຎາ ຌາຍຕີຕິ – ຌານໍ. ຖິນມິທ຺ຘໍ ຌາເປຕີຕິ – ຌານໍ…ເປ… ອຣຫຕ຺ຕມຄ຺ໂຄ ຌາຍຕີຕິ – ຌານໍ. ສພ຺ພກິເລເສ ຌາເປຕີຕິ – ຌານໍ. ຌາຍນ຺ໂຕ ມຸຈ຺ຈຕີຕິ – ຌານວິໂມກ຺ໂຂ. ຌາເປນ຺ໂຕ ມຸຈ຺ຈຕີຕິ – ຌານວິໂມກ຺ໂຂ. ຌາຍນ຺ຕີຕິ – ຘມ຺ມາ. ຌາເປນ຺ຕີຕິ – ກິເລເສ. ຌາເຕ ຈ ຌາເປ ຈ ຊານາຕີຕິ – ຌານຌາຍີ.

໔໒. ຠາວນາ ອຘິຏ຺ຐານໍ ຊີວິຕນ຺ຕິ ກາມຈ຺ຉນ຺ທໍ ປຊຫນ຺ໂຕ ເນກ຺ຂມ຺ມໍ ຠາເວຕີຕິ – ຠາວນາສມ຺ປນ຺ໂນ. ເນກ຺ຂມ຺ມວເສນ ຈິຕ຺ຕໍ ອຘິຏ຺ຐາຕີຕິ – ອຘິຏ຺ຐານສມ຺ປນ຺ໂນ. ສ຺ວາຍໍ ເອວໍ ຠາວນາສມ຺ປນ຺ໂນ ອຘິຏ຺ຐານສມ຺ປນ຺ໂນ ສມໍ ຊີວຕິ, ໂນ ວິສມໍ; ສມ຺ມາ ຊີວຕິ, ໂນ ມິຈ຺ຉາ; ວິສຸທ຺ຘໍ ຊີວຕິ, ໂນ ກິລິຏ຺ຐນ຺ຕິ – ອາຊີວສມ຺ປນ຺ໂນ. ສ຺ວາຍໍ ເອວໍ ຠາວນາສມ຺ປນ຺ໂນ ອຘິຏ຺ຐານສມ຺ປນ຺ໂນ ອາຊີວສມ຺ປນ຺ໂນ ຍຎ຺ຎເທວ ປຣິສໍ ອຸປສງ຺ກມຕິ – ຍທິ ຂຕ຺ຕິຍປຣິສໍ ຍທິ ພ຺ຣາຫ຺ມຓປຣິສໍ ຍທິ ຄຫປຕິປຣິສໍ ຍທິ ສມຓປຣິສໍ – ວິສາຣໂທ ອຸປສງ຺ກມຕິ ອມງ຺ກຸຠູໂຕ. ຕໍ ກິສ຺ສ ເຫຕຸ? ຕຖາ ຫິ ໂສ ຠາວນາສມ຺ປນ຺ໂນ ອຘິຏ຺ຐານສມ຺ປນ຺ໂນ ອາຊີວສມ຺ປນ຺ໂນ.

ພ຺ຍາປາທໍ ປຊຫນ຺ໂຕ ອພ຺ຍາປາທໍ ຠາເວຕີຕິ – ຠາວນາສມ຺ປນ຺ໂນ…ເປ… ຖິນມິທ຺ຘໍ ປຊຫນ຺ໂຕ ອາໂລກສຎ຺ຎໍ ຠາເວຕີຕິ – ຠາວນາສມ຺ປນ຺ໂນ…ເປ… ອຸທ຺ຘຈ຺ຈໍ ປຊຫນ຺ໂຕ ອວິກ຺ເຂປໍ ຠາເວຕີຕິ – ຠາວນາສມ຺ປນ຺ໂນ…ເປ… ວິຈິກິຈ຺ຉໍ ປຊຫນ຺ໂຕ ຘມ຺ມວວຕ຺ຖານໍ ຠາເວຕີຕິ – ຠາວນາສມ຺ປນ຺ໂນ…ເປ… ອວິຊ຺ຊໍ ປຊຫນ຺ໂຕ ວິຊ຺ຊໍ ຠາເວຕີຕິ – ຠາວນາສມ຺ປນ຺ໂນ…ເປ… ອຣຕິໍ ປຊຫນ຺ໂຕ ປາໂມຊ຺ຊໍ ຠາເວຕີຕິ – ຠາວນາສມ຺ປນ຺ໂນ…ເປ… ນີວຣເຓ ປຊຫນ຺ໂຕ ປຐມໍ ຌານໍ ຠາເວຕີຕິ – ຠາວນາສມ຺ປນ຺ໂນ…ເປ… ສພ຺ພກິເລເສ ປຊຫນ຺ໂຕ ອຣຫຕ຺ຕມຄ຺ຄໍ ຠາເວຕີຕິ – ຠາວນາສມ຺ປນ຺ໂນ. ອຣຫຕ຺ຕມຄ຺ຄວເສນ ຈິຕ຺ຕໍ ອຘິຏ຺ຐາຕີຕິ – ອຘິຏ຺ຐານສມ຺ປນ຺ໂນ. ສ຺ວາຍໍ ເອວໍ ຠາວນາສມ຺ປນ຺ໂນ ອຘິຏ຺ຐານສມ຺ປນ຺ໂນ ສມໍ ຊີວຕິ, ໂນ ວິສມໍ; ສມ຺ມາ ຊີວຕິ, ໂນ ມິຈ຺ຉາ; ວິສຸທ຺ຘໍ ຊີວຕິ, ໂນ ກິລິຏ຺ຐນ຺ຕິ – ອາຊີວສມ຺ປນ຺ໂນ. ສ຺ວາຍໍ ເອວໍ ຠາວນາສມ຺ປນ຺ໂນ ອຘິຏ຺ຐານສມ຺ປນ຺ໂນ ອາຊີວສມ຺ປນ຺ໂນ ຍຎ຺ຎເທວ ປຣິສໍ ອຸປສງ຺ກມຕິ – ຍທິ ຂຕ຺ຕິຍປຣິສໍ ຍທິ ພ຺ຣາຫ຺ມຓປຣິສໍ ຍທິ ຄຫປຕິປຣິສໍ ຍທິ ສມຓປຣິສໍ – ວິສາຣໂທ ອຸປສງ຺ກມຕິ ອມງ຺ກຸຠູໂຕ. ຕໍ ກິສ຺ສ ເຫຕຸ? ຕຖາ ຫິ ໂສ ຠາວນາສມ຺ປນ຺ໂນ ອຘິຏ຺ຐານສມ຺ປນ຺ໂນ ອາຊີວສມ຺ປນ຺ໂນຕິ.

ມາຕິກາກຖາ ນິຏ຺ຐິຕາ.

ປຎ຺ຎາວຄ຺ໂຄ ຕຕິໂຍ.