໑. ມຫາປຎ຺ຎາກຖາ

໑. ອນິຈ຺ຈານຸປສ຺ສນາ ຠາວິຕາ ພຫຸລີກຕາ ກຕມໍ ປຎ຺ຎໍ ປຣິປູເຣຕິ? ທຸກ຺ຂານຸປສ຺ສນາ ຠາວິຕາ ພຫຸລີກຕາ ກຕມໍ ປຎ຺ຎໍ ປຣິປູເຣຕິ? ອນຕ຺ຕານຸປສ຺ສນາ ຠາວິຕາ ພຫຸລີກຕາ ກຕມໍ ປຎ຺ຎໍ ປຣິປູເຣຕິ…ເປ… ປຏິນິສ຺ສຄ຺ຄານຸປສ຺ສນາ ຠາວິຕາ ພຫຸລີກຕາ ກຕມໍ ປຎ຺ຎໍ ປຣິປູເຣຕິ?

ອນິຈ຺ຈານຸປສ຺ສນາ ຠາວິຕາ ພຫຸລີກຕາ ຊວນປຎ຺ຎໍ ປຣິປູເຣຕິ. ທຸກ຺ຂານຸປສ຺ສນາ ຠາວິຕາ ພຫຸລີກຕາ ນິພ຺ເພຘິກປຎ຺ຎໍ ປຣິປູເຣຕິ. ອນຕ຺ຕານຸປສ຺ສນາ ຠາວິຕາ ພຫຸລີກຕາ ມຫາປຎ຺ຎໍ ປຣິປູເຣຕິ. ນິພ຺ພິທານຸປສ຺ສນາ ຠາວິຕາ ພຫຸລີກຕາ ຕິກ຺ຂປຎ຺ຎໍ ປຣິປູເຣຕິ. ວິຣາຄານຸປສ຺ສນາ ຠາວິຕາ ພຫຸລີກຕາ ວິປຸລປຎ຺ຎໍ ປຣິປູເຣຕິ. ນິໂຣຘານຸປສ຺ສນາ ຠາວິຕາ ພຫຸລີກຕາ ຄມ຺ຠີຣປຎ຺ຎໍ ປຣິປູເຣຕິ. ປຏິນິສ຺ສຄ຺ຄານຸປສ຺ສນາ ຠາວິຕາ ພຫຸລີກຕາ ອສາມນ຺ຕປຎ຺ຎໍ [ອສ຺ສາມນ຺ຕປຎ຺ຎໍ (ສ຺ຍາ.)] ປຣິປູເຣຕິ. ອິມາ ສຕ຺ຕ ປຎ຺ຎາ ຠາວິຕາ ພຫຸລີກຕາ ປຓ຺ຑິຈ຺ຈໍ ປຣິປູເຣນ຺ຕິ. ອິມາ ອຏ຺ຐ ປຎ຺ຎາ ຠາວິຕາ ພຫຸລີກຕາ ປຸຖຸປຎ຺ຎໍ ປຣິປູເຣນ຺ຕິ. ອິມາ ນວ ປຎ຺ຎາ ຠາວິຕາ ພຫຸລີກຕາ ຫາສປຎ຺ຎໍ ປຣິປູເຣນ຺ຕິ.

ຫາສປຎ຺ຎາ ປຏິຠານປຏິສມ຺ຠິທາ. ຕສ຺ສາ ອຕ຺ຖວວຕ຺ຖານໂຕ ອຕ຺ຖປຏິສມ຺ຠິທາ ອຘິຄຕາ ໂຫຕິ ສຈ຺ຉິກຕາ ຜສ຺ສິຕາ ປຎ຺ຎາຍ. ຘມ຺ມວວຕ຺ຖານໂຕ ຘມ຺ມປຏິສມ຺ຠິທາ ອຘິຄຕາ ໂຫຕິ ສຈ຺ຉິກຕາ ຜສ຺ສິຕາ ປຎ຺ຎາຍ. ນິຣຸຕ຺ຕິວວຕ຺ຖານໂຕ ນິຣຸຕ຺ຕິປຏິສມ຺ຠິທາ ອຘິຄຕາ ໂຫຕິ ສຈ຺ຉິກຕາ ຜສ຺ສິຕາ ປຎ຺ຎາຍ. ປຏິຠານວວຕ຺ຖານໂຕ ປຏິຠານປຏິສມ຺ຠິທາ ອຘິຄຕາ ໂຫຕິ ສຈ຺ຉິກຕາ ຜສ຺ສິຕາ ປຎ຺ຎາຍ. ຕສ຺ສິມາ ຈຕສ຺ໂສ ປຏິສມ຺ຠິທາໂຍ ອຘິຄຕາ ໂຫນ຺ຕິ ສຈ຺ຉິກຕາ ຜສ຺ສິຕາ ປຎ຺ຎາຍ.

ຣູເປ ອນິຈ຺ຈານຸປສ຺ສນາ ຠາວິຕາ ພຫຸລີກຕາ ກຕມໍ ປຎ຺ຎໍ ປຣິປູເຣຕິ…ເປ… ຣູເປ ປຏິນິສ຺ສຄ຺ຄານຸປສ຺ສນາ ຠາວິຕາ ພຫຸລີກຕາ ກຕມໍ ປຎ຺ຎໍ ປຣິປູເຣຕິ? ຣູເປ ອນິຈ຺ຈານຸປສ຺ສນາ ຠາວິຕາ ພຫຸລີກຕາ ຊວນປຎ຺ຎໍ ປຣິປູເຣຕິ…ເປ… ຣູເປ ປຏິນິສ຺ສຄ຺ຄານຸປສ຺ສນາ ຠາວິຕາ ພຫຸລີກຕາ ອສາມນ຺ຕປຎ຺ຎໍ ປຣິປູເຣຕິ. ອິມາ ສຕ຺ຕ ປຎ຺ຎາ ຠາວິຕາ ພຫຸລີກຕາ ປຓ຺ຑິຈ຺ຈໍ ປຣິປູເຣນ຺ຕິ. ອິມາ ອຏ຺ຐ ປຎ຺ຎາ ຠາວິຕາ ພຫຸລີກຕາ ປຸຖຸປຎ຺ຎໍ ປຣິປູເຣນ຺ຕິ. ອິມາ ນວ ປຎ຺ຎາ ຠາວິຕາ ພຫຸລີກຕາ ຫາສປຎ຺ຎໍ ປຣິປູເຣນ຺ຕິ.

ຫາສປຎ຺ຎາ ປຏິຠານປຏິສມ຺ຠິທາ. ຕສ຺ສາ ອຕ຺ຖວວຕ຺ຖານໂຕ ອຕ຺ຖປຏິສມ຺ຠິທາ ອຘິຄຕາ ໂຫຕິ ສຈ຺ຉິກຕາ ຜສ຺ສິຕາ ປຎ຺ຎາຍ. ຘມ຺ມວວຕ຺ຖານໂຕ ຘມ຺ມປຏິສມ຺ຠິທາ ອຘິຄຕາ ໂຫຕິ ສຈ຺ຉິກຕາ ຜສ຺ສິຕາ ປຎ຺ຎາຍ. ນິຣຸຕ຺ຕິວວຕ຺ຖານໂຕ ນິຣຸຕ຺ຕິປຏິສມ຺ຠິທາ ອຘິຄຕາ ໂຫຕິ ສຈ຺ຉິກຕາ ຜສ຺ສິຕາ ປຎ຺ຎາຍ. ປຏິຠານວວຕ຺ຖານໂຕ ປຏິຠານປຏິສມ຺ຠິທາ ອຘິຄຕາ ໂຫຕິ, ສຈ຺ຉິກຕາ ຜສ຺ສິຕາ ປຎ຺ຎາຍ. ຕສ຺ສິມາ ຈຕສ຺ໂສ ປຏິສມ຺ຠິທາໂຍ ອຘິຄຕາ ໂຫນ຺ຕິ ສຈ຺ຉິກຕາ ຜສ຺ສິຕາ ປຎ຺ຎາຍ.

ເວທນາຍ…ເປ… ສຎ຺ຎາຍ… ສງ຺ຂາເຣສຸ… ວິຎ຺ຎາເຓ… ຈກ຺ຂຸສ຺ມິໍ…ເປ… ຊຣາມຣເຓ ອນິຈ຺ຈານຸປສ຺ສນາ ຠາວິຕາ ພຫຸລີກຕາ ກຕມໍ ປຎ຺ຎໍ ປຣິປູເຣຕິ…ເປ… ຊຣາມຣເຓ ປຏິນິສ຺ສຄ຺ຄານຸປສ຺ສນາ ຠາວິຕາ ພຫຸລີກຕາ ກຕມໍ ປຎ຺ຎໍ ປຣິປູເຣຕິ? ຊຣາມຣເຓ ອນິຈ຺ຈານຸປສ຺ສນາ ຠາວິຕາ ພຫຸລີກຕາ ຊວນປຎ຺ຎໍ ປຣິປູເຣຕິ…ເປ… ຊຣາມຣເຓ ປຏິນິສ຺ສຄ຺ຄານຸປສ຺ສນາ ຠາວິຕາ ພຫຸລີກຕາ ອສາມນ຺ຕປຎ຺ຎໍ ປຣິປູເຣຕິ. ອິມາ ສຕ຺ຕ ປຎ຺ຎາ ຠາວິຕາ ພຫຸລີກຕາ ປຓ຺ຑິຈ຺ຈໍ ປຣິປູເຣນ຺ຕິ. ອິມາ ອຏ຺ຐ ປຎ຺ຎາ ຠາວິຕາ ພຫຸລີກຕາ ປຸຖຸປຎ຺ຎໍ ປຣິປູເຣນ຺ຕິ. ອິມາ ນວ ປຎ຺ຎາ ຠາວິຕາ ພຫຸລີກຕາ ຫາສປຎ຺ຎໍ ປຣິປູເຣນ຺ຕິ.

ຫາສປຎ຺ຎາ ປຏິຠານປຏິສມ຺ຠິທາ. ຕສ຺ສາ ອຕ຺ຖວວຕ຺ຖານໂຕ ອຕ຺ຖປຏິສມ຺ຠິທາ ອຘິຄຕາ ໂຫຕິ ສຈ຺ຉິກຕາ ຜສ຺ສິຕາ ປຎ຺ຎາຍ. ຘມ຺ມວວຕ຺ຖານໂຕ ຘມ຺ມປຏິສມ຺ຠິທາ ອຘິຄຕາ ໂຫຕິ ສຈ຺ຉິກຕາ ຜສ຺ສິຕາ ປຎ຺ຎາຍ. ນິຣຸຕ຺ຕິວວຕ຺ຖານໂຕ ນິຣຸຕ຺ຕິປຏິສມ຺ຠິທາ ອຘິຄຕາ ໂຫຕິ ສຈ຺ຉິກຕາ ຜສ຺ສິຕາ ປຎ຺ຎາຍ. ປຏິຠານວວຕ຺ຖານໂຕ ປຏິຠານປຏິສມ຺ຠິທາ ອຘິຄຕາ ໂຫຕິ ສຈ຺ຉິກຕາ ຜສ຺ສິຕາ ປຎ຺ຎາຍ. ຕສ຺ສິມາ ຈຕສ຺ໂສ ປຏິສມ຺ຠິທາໂຍ ອຘິຄຕາ ໂຫນ຺ຕິ ສຈ຺ຉິກຕາ ຜສ຺ສິຕາ ປຎ຺ຎາຍ.

໒. ຣູເປ ອນິຈ຺ຈານຸປສ຺ສນາ ຠາວິຕາ ພຫຸລີກຕາ ກຕມໍ ປຎ຺ຎໍ ປຣິປູເຣຕິ? ອຕີຕານາຄຕປຈ຺ຈຸປ຺ປນ຺ເນ ຣູເປ ອນິຈ຺ຈານຸປສ຺ສນາ ຠາວິຕາ ພຫຸລີກຕາ ກຕມໍ ປຎ຺ຎໍ ປຣິປູເຣຕິ? ຣູເປ ທຸກ຺ຂານຸປສ຺ສນາ ຠາວິຕາ ພຫຸລີກຕາ ກຕມໍ ປຎ຺ຎໍ ປຣິປູເຣຕິ? ອຕີຕານາຄຕປຈ຺ຈຸປ຺ປນ຺ເນ ຣູເປ ທຸກ຺ຂານຸປສ຺ສນາ ຠາວິຕາ ພຫຸລີກຕາ ກຕມໍ ປຎ຺ຎໍ ປຣິປູເຣຕິ? ຣູເປ ອນຕ຺ຕານຸປສ຺ສນາ ຠາວິຕາ ພຫຸລີກຕາ ກຕມໍ ປຎ຺ຎໍ ປຣິປູເຣຕິ? ອຕີຕານາຄຕປຈ຺ຈຸປ຺ປນ຺ເນ ຣູເປ ອນຕ຺ຕານຸປສ຺ສນາ ຠາວິຕາ ພຫຸລີກຕາ ກຕມໍ ປຎ຺ຎໍ ປຣິປູເຣຕິ? ຣູເປ ນິພ຺ພິທານຸປສ຺ສນາ ຠາວິຕາ ພຫຸລີກຕາ ກຕມໍ ປຎ຺ຎໍ ປຣິປູເຣຕິ? ອຕີຕານາຄຕປຈ຺ຈຸປ຺ປນ຺ເນ ຣູເປ ນິພ຺ພິທານຸປສ຺ສນາ ຠາວິຕາ ພຫຸລີກຕາ ກຕມໍ ປຎ຺ຎໍ ປຣິປູເຣຕິ? ຣູເປ ວິຣາຄານຸປສ຺ສນາ ຠາວິຕາ ພຫຸລີກຕາ ກຕມໍ ປຎ຺ຎໍ ປຣິປູເຣຕິ? ອຕີຕານາຄຕປຈ຺ຈຸປ຺ປນ຺ເນ ຣູເປ ວິຣາຄານຸປສ຺ສນາ ຠາວິຕາ ພຫຸລີກຕາ ກຕມໍ ປຎ຺ຎໍ ປຣິປູເຣຕິ? ຣູເປ ນິໂຣຘານຸປສ຺ສນາ ຠາວິຕາ ພຫຸລີກຕາ ກຕມໍ ປຎ຺ຎໍ ປຣິປູເຣຕິ? ອຕີຕານາຄຕປຈ຺ຈຸປ຺ປນ຺ເນ ຣູເປ ນິໂຣຘານຸປສ຺ສນາ ຠາວິຕາ ພຫຸລີກຕາ ກຕມໍ ປຎ຺ຎໍ ປຣິປູເຣຕິ? ຣູເປ ປຏິນິສ຺ສຄ຺ຄານຸປສ຺ສນາ ຠາວິຕາ ພຫຸລີກຕາ ກຕມໍ ປຎ຺ຎໍ ປຣິປູເຣຕິ? ອຕີຕານາຄຕປຈ຺ຈຸປ຺ປນ຺ເນ ຣູເປ ປຏິນິສ຺ສຄ຺ຄານຸປສ຺ສນາ ຠາວິຕາ ພຫຸລີກຕາ ກຕມໍ ປຎ຺ຎໍ ປຣິປູເຣຕິ?

ຣູເປ ອນິຈ຺ຈານຸປສ຺ສນາ ຠາວິຕາ ພຫຸລີກຕາ ຊວນປຎ຺ຎໍ ປຣິປູເຣຕິ. ອຕີຕານາຄຕປຈ຺ຈຸປ຺ປນ຺ເນ ຣູເປ ອນິຈ຺ຈານຸປສ຺ສນາ ຠາວິຕາ ພຫຸລີກຕາ ຊວນປຎ຺ຎໍ ປຣິປູເຣຕິ. ຣູເປ ທຸກ຺ຂານຸປສ຺ສນາ ຠາວິຕາ ພຫຸລີກຕາ ນິພ຺ເພຘິກປຎ຺ຎໍ ປຣິປູເຣຕິ. ອຕີຕານາຄຕປຈ຺ຈຸປ຺ປນ຺ເນ ຣູເປ ທຸກ຺ຂານຸປສ຺ສນາ ຠາວິຕາ ພຫຸລີກຕາ ຊວນປຎ຺ຎໍ ປຣິປູເຣຕິ. ຣູເປ ອນຕ຺ຕານຸປສ຺ສນາ ຠາວິຕາ ພຫຸລີກຕາ ມຫາປຎ຺ຎໍ ປຣິປູເຣຕິ. ອຕີຕານາຄຕປຈ຺ຈຸປ຺ປນ຺ເນ ຣູເປ ອນຕ຺ຕານຸປສ຺ສນາ ຠາວິຕາ ພຫຸລີກຕາ ຊວນປຎ຺ຎໍ ປຣິປູເຣຕິ. ຣູເປ ນິພ຺ພິທານຸປສ຺ສນາ ຠາວິຕາ ພຫຸລີກຕາ ຕິກ຺ຂປຎ຺ຎໍ ປຣິປູເຣຕິ. ອຕີຕານາຄຕປຈ຺ຈຸປ຺ປນ຺ເນ ຣູເປ ນິພ຺ພິທານຸປສ຺ສນາ ຠາວິຕາ ພຫຸລີກຕາ ຊວນປຎ຺ຎໍ ປຣິປູເຣຕິ. ຣູເປ ວິຣາຄານຸປສ຺ສນາ ຠາວິຕາ ພຫຸລີກຕາ ວິປຸລປຎ຺ຎໍ ປຣິປູເຣຕິ. ອຕີຕານາຄຕປຈ຺ຈຸປ຺ປນ຺ເນ ຣູເປ ວິຣາຄານຸປສ຺ສນາ ຠາວິຕາ ພຫຸລີກຕາ ຊວນປຎ຺ຎໍ ປຣິປູເຣຕິ. ຣູເປ ນິໂຣຘານຸປສ຺ສນາ ຠາວິຕາ ພຫຸລີກຕາ ຄມ຺ຠີຣປຎ຺ຎໍ ປຣິປູເຣຕິ. ອຕີຕານາຄຕປຈ຺ຈຸປ຺ປນ຺ເນ ຣູເປ ນິໂຣຘານຸປສ຺ສນາ ຠາວິຕາ ພຫຸລີກຕາ ຊວນປຎ຺ຎໍ ປຣິປູເຣຕິ. ຣູເປ ປຏິນິສ຺ສຄ຺ຄານຸປສ຺ສນາ ຠາວິຕາ ພຫຸລີກຕາ ອສາມນ຺ຕປຎ຺ຎໍ ປຣິປູເຣຕິ. ອຕີຕານາຄຕປຈ຺ຈຸປ຺ປນ຺ເນ ຣູເປ ປຏິນິສ຺ສຄ຺ຄານຸປສ຺ສນາ ຠາວິຕາ ພຫຸລີກຕາ ຊວນປຎ຺ຎໍ ປຣິປູເຣຕິ. ອິມາ ສຕ຺ຕ ປຎ຺ຎາ ຠາວິຕາ ພຫຸລີກຕາ ປຓ຺ຑິຈ຺ຈໍ ປຣິປູເຣນ຺ຕິ. ອິມາ ອຏ຺ຐ ປຎ຺ຎາ ຠາວິຕາ ພຫຸລີກຕາ ປຸຖຸປຎ຺ຎໍ ປຣິປູເຣນ຺ຕິ. ອິມາ ນວ ປຎ຺ຎາ ຠາວິຕາ ພຫຸລີກຕາ ຫາສປຎ຺ຎໍ ປຣິປູເຣນ຺ຕິ.

ຫາສປຎ຺ຎາ ປຏິຠານປຏິສມ຺ຠິທາ. ຕສ຺ສາ ອຕ຺ຖວວຕ຺ຖານໂຕ ອຕ຺ຖປຏິສມ຺ຠິທາ ອຘິຄຕາ ໂຫຕິ ສຈ຺ຉິກຕາ ຜສ຺ສິຕາ ປຎ຺ຎາຍ. ຘມ຺ມວວຕ຺ຖານໂຕ ຘມ຺ມປຏິສມ຺ຠິທາ ອຘິຄຕາ ໂຫຕິ ສຈ຺ຉິກຕາ ຜສ຺ສິຕາ ປຎ຺ຎາຍ. ນິຣຸຕ຺ຕິວວຕ຺ຖານໂຕ ນິຣຸຕ຺ຕິປຏິສມ຺ຠິທາ ອຘິຄຕາ ໂຫຕິ ສຈ຺ຉິກຕາ ຜສ຺ສິຕາ ປຎ຺ຎາຍ. ປຏິຠານວວຕ຺ຖານໂຕ ປຏິຠານປຏິສມ຺ຠິທາ ອຘິຄຕາ ໂຫຕິ ສຈ຺ຉິກຕາ ຜສ຺ສິຕາ ປຎ຺ຎາຍ. ຕສ຺ສິມາ ຈຕສ຺ໂສ ປຏິສມ຺ຠິທາໂຍ ອຘິຄຕາ ໂຫນ຺ຕິ ສຈ຺ຉິກຕາ ຜສ຺ສິຕາ ປຎ຺ຎາຍ.

ເວທນາຍ…ເປ… ສຎ຺ຎາຍ… ສງ຺ຂາເຣສຸ… ວິຎ຺ຎາເຓ… ຈກ຺ຂຸສ຺ມິໍ…ເປ… ຊຣາມຣເຓ ອນິຈ຺ຈານຸປສ຺ສນາ ຠາວິຕາ ພຫຸລີກຕາ ກຕມໍ ປຎ຺ຎໍ ປຣິປູເຣຕິ? ອຕີຕານາຄຕປຈ຺ຈຸປ຺ປນ຺ເນ ຊຣາມຣເຓ ອນິຈ຺ຈານຸປສ຺ສນາ ຠາວິຕາ ພຫຸລີກຕາ ກຕມໍ ປຎ຺ຎໍ ປຣິປູເຣຕິ…ເປ… ຊຣາມຣເຓ ປຏິນິສ຺ສຄ຺ຄານຸປສ຺ສນາ ຠາວິຕາ ພຫຸລີກຕາ ກຕມໍ ປຎ຺ຎໍ ປຣິປູເຣຕິ? ອຕີຕານາຄຕປຈ຺ຈຸປ຺ປນ຺ເນ ຊຣາມຣເຓ ປຏິນິສ຺ສຄ຺ຄານຸປສ຺ສນາ ຠາວິຕາ ພຫຸລີກຕາ ກຕມໍ ປຎ຺ຎໍ ປຣິປູເຣຕິ? ຊຣາມຣເຓ ອນິຈ຺ຈານຸປສ຺ສນາ ຠາວິຕາ ພຫຸລີກຕາ ຊວນປຎ຺ຎໍ ປຣິປູເຣຕິ. ອຕີຕານາຄຕປຈ຺ຈຸປ຺ປນ຺ເນ ຊຣາມຣເຓ ອນິຈ຺ຈານຸປສ຺ສນາ ຠາວິຕາ ພຫຸລີກຕາ ຊວນປຎ຺ຎໍ ປຣິປູເຣຕິ…ເປ… ຕສ຺ສິມາ ຈຕສ຺ໂສ ປຏິສມ຺ຠິທາໂຍ ອຘິຄຕາ ໂຫນ຺ຕິ ສຈ຺ຉິກຕາ ຜສ຺ສິຕາ ປຎ຺ຎາຍ.

໓. ‘‘ຈຕ຺ຕາໂຣເມ, ຠິກ຺ຂເວ [ສໍ. ນິ. ໕.໑໘໕໑], ຘມ຺ມາ ຠາວິຕາ ພຫຸລີກຕາ ໂສຕາປຕ຺ຕິຜລສຈ຺ຉິກິຣິຍາຍ ສໍວຕ຺ຕນ຺ຕິ. ກຕເມ ຈຕ຺ຕາໂຣ? ສປ຺ປຸຣິສສໍເສໂວ, ສທ຺ຘມ຺ມສ຺ສວນໍ, ໂຍນິໂສມນສິກາໂຣ, ຘມ຺ມານຸຘມ຺ມປຏິປຕ຺ຕິ – ອິເມ ໂຂ, ຠິກ຺ຂເວ, ຈຕ຺ຕາໂຣ ຘມ຺ມາ ຠາວິຕາ ພຫຸລີກຕາ ໂສຕາປຕ຺ຕິຜລສຈ຺ຉິກິຣິຍາຍ ສໍວຕ຺ຕນ຺ຕິ.

‘‘ຈຕ຺ຕາໂຣເມ, ຠິກ຺ຂເວ, ຘມ຺ມາ ຠາວິຕາ ພຫຸລີກຕາ ສກທາຄາມິຜລສຈ຺ຉິກິຣິຍາຍ ສໍວຕ຺ຕນ຺ຕິ…ເປ… ອນາຄາມິຜລສຈ຺ຉິກິຣິຍາຍ ສໍວຕ຺ຕນ຺ຕິ…ເປ… ອຣຫຕ຺ຕຜລສຈ຺ຉິກິຣິຍາຍ ສໍວຕ຺ຕນ຺ຕິ. ກຕເມ ຈຕ຺ຕາໂຣ? ສປ຺ປຸຣິສສໍເສໂວ, ສທ຺ຘມ຺ມສ຺ສວນໍ, ໂຍນິໂສມນສິກາໂຣ, ຘມ຺ມານຸຘມ຺ມປຏິປຕ຺ຕິ – ອິເມ ໂຂ, ຠິກ຺ຂເວ, ຈຕ຺ຕາໂຣ ຘມ຺ມາ ຠາວິຕາ ພຫຸລີກຕາ ອຣຫຕ຺ຕມຄ຺ຄຜລສຈ຺ຉິກິຣິຍາຍ ສໍວຕ຺ຕນ຺ຕິ.

‘‘ຈຕ຺ຕາໂຣເມ, ຠິກ຺ຂເວ, ຘມ຺ມາ ຠາວິຕາ ພຫຸລີກຕາ ປຎ຺ຎາປຏິລາຠາຍ ສໍວຕ຺ຕນ຺ຕິ…ເປ… ປຎ຺ຎາພຸທ຺ຘິຍາ ສໍວຕ຺ຕນ຺ຕິ, ປຎ຺ຎາເວປຸລ຺ລາຍ ສໍວຕ຺ຕນ຺ຕິ, ມຫາປຎ຺ຎຕາຍ ສໍວຕ຺ຕນ຺ຕິ, ປຸຖຸປຎ຺ຎຕາຍ ສໍວຕ຺ຕນ຺ຕິ, ວິປຸລປຎ຺ຎຕາຍ ສໍວຕ຺ຕນ຺ຕິ, ຄມ຺ຠີຣປຎ຺ຎຕາຍ ສໍວຕ຺ຕນ຺ຕິ, ອສາມນ຺ຕປຎ຺ຎຕາຍ [ອສ຺ສາມນ຺ຕປຎ຺ຎຕາຍ (ສ຺ຍາ.) ສໍ. ນິ. ໓ ປສ຺ສິຕພ຺ພາ] ສໍວຕ຺ຕນ຺ຕິ, ຠູຣິປຎ຺ຎຕາຍ ສໍວຕ຺ຕນ຺ຕິ, ປຎ຺ຎາພາຫຸລ຺ລາຍ ສໍວຕ຺ຕນ຺ຕິ, ສີຆປຎ຺ຎຕາຍ ສໍວຕ຺ຕນ຺ຕິ, ລຫຸປຎ຺ຎຕາຍ ສໍວຕ຺ຕນ຺ຕິ, ຫາສປຎ຺ຎຕາຍ ສໍວຕ຺ຕນ຺ຕິ, ຊວນປຎ຺ຎຕາຍ ສໍວຕ຺ຕນ຺ຕິ, ຕິກ຺ຂປຎ຺ຎຕາຍ ສໍວຕ຺ຕນ຺ຕິ, ນິພ຺ເພຘິກປຎ຺ຎຕາຍ ສໍວຕ຺ຕນ຺ຕິ. ກຕເມ ຈຕ຺ຕາໂຣ? ສປ຺ປຸຣິສສໍເສໂວ, ສທ຺ຘມ຺ມສ຺ສວນໍ, ໂຍນິໂສມນສິກາໂຣ, ຘມ຺ມານຸຘມ຺ມປຏິປຕ຺ຕິ – ອິເມ ໂຂ, ຠິກ຺ຂເວ, ຈຕ຺ຕາໂຣ ຘມ຺ມາ ຠາວິຕາ ພຫຸລີກຕາ ປຎ຺ຎາປຏິລາຠາຍ ສໍວຕ຺ຕນ຺ຕິ, ປຎ຺ຎາພຸທ຺ຘິຍາ ສໍວຕ຺ຕນ຺ຕິ…ເປ… ນິພ຺ເພຘິກປຎ຺ຎຕາຍ ສໍວຕ຺ຕນ຺ຕິ’’.

໑. ໂສຬສປຎ຺ຎານິທ຺ເທໂສ

໔. ປຎ຺ຎາປຏິລາຠາຍ ສໍວຕ຺ຕນ຺ຕີຕິ ກຕໂມ ປຎ຺ຎາປຏິລາໂຠ? ຈຕຸນ຺ນໍ ມຄ຺ຄຎາຓານໍ, ຈຕຸນ຺ນໍ ຜລຎາຓານໍ, ຈຕຸນ຺ນໍ ປຏິສມ຺ຠິທາຎາຓານໍ, ຉນ຺ນໍ ອຠິຎ຺ຎາຎາຓານໍ, ເຕສຕ຺ຕຕີນໍ ຎາຓານໍ, ສຕ຺ຕສຕ຺ຕຕີນໍ ຎາຓານໍ ລາໂຠ ປຏິລາໂຠ ປຕ຺ຕິ ສມ຺ປຕ຺ຕິ ຜສ຺ສນາ [ຜຸສນາ (ກ.)] ສຈ຺ຉິກິຣິຍາ ອຸປສມ຺ປທາ. ປຎ຺ຎາປຏິລາຠາຍ ສໍວຕ຺ຕນ຺ຕີຕິ – ອຍໍ ປຎ຺ຎາ ປຏິລາໂຠ.

ປຎ຺ຎາພຸທ຺ຘິຍາ ສໍວຕ຺ຕນ຺ຕີຕິ ກຕມາ ປຎ຺ຎາພຸທ຺ຘິ? ສຕ຺ຕນ຺ນຎ຺ຈ ເສກ຺ຂານໍ ປຸຖຸຊ຺ຊນກລ຺ຍາຓກສ຺ສ ຈ ປຎ຺ຎາ ວຑ຺ຒຕິ, ອຣຫໂຕ ປຎ຺ຎາ ວຑ຺ຒຕິ. ວຑ຺ຒິຕວຑ຺ຒນາ ປຎ຺ຎາພຸທ຺ຘິຍາ ສໍວຕ຺ຕນ຺ຕີຕິ – ອຍໍ ປຎ຺ຎາພຸທ຺ຘິ.

ປຎ຺ຎາເວປຸລ຺ລາຍ ສໍວຕ຺ຕນ຺ຕີຕິ ກຕມໍ ປຎ຺ຎາເວປຸລ຺ລໍ? ສຕ຺ຕນ຺ນໍ ເສກ຺ຂານໍ ປຸຖຸຊ຺ຊນກລ຺ຍາຓກສ຺ສ ຈ ປຎ຺ຎາເວປຸລ຺ລໍ ຄຈ຺ຉຕິ. ອຣຫໂຕ ປຎ຺ຎາ ເວປຸລ຺ລຄຕາ ປຎ຺ຎາເວປຸລ຺ລາຍ ສໍວຕ຺ຕນ຺ຕີຕິ – ອິທໍ ປຎ຺ຎາເວປຸລ຺ລໍ.

ມຫາປຎ຺ຎຕາຍ ສໍວຕ຺ຕນ຺ຕີຕິ ກຕມາ ມຫາປຎ຺ຎາ? ມຫນ຺ເຕ ອຕ຺ເຖ ປຣິຄ຺ຄຓ຺ຫາຕີຕິ – ມຫາປຎ຺ຎາ. ມຫນ຺ເຕ ຘມ຺ເມ ປຣິຄ຺ຄຓ຺ຫາຕີຕິ – ມຫາປຎ຺ຎາ. ມຫນ຺ຕາ ນິຣຸຕ຺ຕິໂຍ ປຣິຄ຺ຄຓ຺ຫາຕີຕິ – ມຫາປຎ຺ຎາ. ມຫນ຺ຕານິ ປຏິຠານານິ ປຣິຄ຺ຄຓ຺ຫາຕີຕິ – ມຫາປຎ຺ຎາ. ມຫນ຺ເຕ ສີລກ຺ຂນ຺ເຘ ປຣິຄ຺ຄຓ຺ຫາຕີຕິ – ມຫາປຎ຺ຎາ. ມຫນ຺ເຕ ສມາຘິກ຺ຂນ຺ເຘ ປຣິຄ຺ຄຓ຺ຫາຕີຕິ – ມຫາປຎ຺ຎາ. ມຫນ຺ເຕ ປຎ຺ຎາກ຺ຂນ຺ເຘ ປຣິຄ຺ຄຓ຺ຫາຕີຕິ – ມຫາປຎ຺ຎາ. ມຫນ຺ເຕ ວິມຸຕ຺ຕິກ຺ຂນ຺ເຘ ປຣິຄ຺ຄຓ຺ຫາຕີຕິ – ມຫາປຎ຺ຎາ. ມຫນ຺ເຕ ວິມຸຕ຺ຕິຎາຓທສ຺ສນກ຺ຂນ຺ເຘ ປຣິຄ຺ຄຓ຺ຫາຕີຕິ – ມຫາປຎ຺ຎາ. ມຫນ຺ຕານິ ຐານາຏ຺ຐານານິ ປຣິຄ຺ຄຓ຺ຫາຕີຕິ – ມຫາປຎ຺ຎາ. ມຫນ຺ຕາ ວິຫາຣສມາປຕ຺ຕິໂຍ ປຣິຄ຺ຄຓ຺ຫາຕີຕິ – ມຫາປຎ຺ຎາ. ມຫນ຺ຕານິ ອຣິຍສຈ຺ຈານິ ປຣິຄ຺ຄຓ຺ຫາຕີຕິ – ມຫາປຎ຺ຎາ. ມຫນ຺ເຕ ສຕິປຏ຺ຐາເນ ປຣິຄ຺ຄຓ຺ຫາຕີຕິ – ມຫາປຎ຺ຎາ. ມຫນ຺ເຕ ສມ຺ມປ຺ປຘາເນ ປຣິຄ຺ຄຓ຺ຫາຕີຕິ – ມຫາປຎ຺ຎາ. ມຫນ຺ເຕ ອິທ຺ຘິປາເທ ປຣິຄ຺ຄຓ຺ຫາຕີຕິ – ມຫາປຎ຺ຎາ. ມຫນ຺ຕານິ ອິນ຺ທ຺ຣິຍານິ ປຣິຄ຺ຄຓ຺ຫາຕີຕິ – ມຫາປຎ຺ຎາ. ມຫນ຺ຕານິ ພລານິ ປຣິຄ຺ຄຓ຺ຫາຕີຕິ – ມຫາປຎ຺ຎາ. ມຫນ຺ເຕ ໂພຊ຺ຌງ຺ເຄ ປຣິຄ຺ຄຓ຺ຫາຕີຕິ – ມຫາປຎ຺ຎາ. ມຫນ຺ຕໍ ອຣິຍມຄ຺ຄໍ [ມຫນ຺ເຕ ອຣິຍມຄ຺ເຄ (ກ.)] ປຣິຄ຺ຄຓ຺ຫາຕີຕິ – ມຫາປຎ຺ຎາ. ມຫນ຺ຕານິ ສາມຎ຺ຎຜລານິ ປຣິຄ຺ຄຓ຺ຫາຕີຕິ – ມຫາປຎ຺ຎາ. ມຫນ຺ຕາ ອຠິຎ຺ຎາໂຍ [ມຫາຠິຎ຺ຎາໂຍ (ກ.)] ປຣິຄ຺ຄຓ຺ຫາຕີຕິ – ມຫາປຎ຺ຎາ. ມຫນ຺ຕໍ ປຣມຕ຺ຖໍ ນິພ຺ພານໍ ປຣິຄ຺ຄຓ຺ຫາຕີຕິ – ມຫາປຎ຺ຎາ. ມຫາປຎ຺ຎຕາຍ ສໍວຕ຺ຕນ຺ຕີຕິ – ອຍໍ ມຫາປຎ຺ຎາ.

ປຸຖຸປຎ຺ຎຕາຍ ສໍວຕ຺ຕນ຺ຕີຕິ ກຕມາ ປຸຖຸປຎ຺ຎາ? ປຸຖຸນານາຂນ຺ເຘສຸ ຎາຓໍ ປວຕ຺ຕຕີຕິ – ປຸຖຸປຎ຺ຎາ. ປຸຖຸນານາຘາຕູສຸ ຎາຓໍ ປວຕ຺ຕຕີຕິ – ປຸຖຸປຎ຺ຎາ. ປຸຖຸນານາອາຍຕເນສຸ ຎາຓໍ ປວຕ຺ຕຕີຕິ – ປຸຖຸປຎ຺ຎາ. ປຸຖຸນານາປຏິຈ຺ຈສມຸປ຺ປາເທສຸ ຎາຓໍ ປວຕ຺ຕຕີຕິ – ປຸຖຸປຎ຺ຎາ. ປຸຖຸນານາສຸຎ຺ຎຕມນຸປລພ຺ເຠສຸ ຎາຓໍ ປວຕ຺ຕຕີຕິ – ປຸຖຸປຎ຺ຎາ. ປຸຖຸນານາອຕ຺ເຖສຸ ຎາຓໍ ປວຕ຺ຕຕີຕິ – ປຸຖຸປຎ຺ຎາ. ປຸຖຸນານາຘມ຺ເມສຸ ຎາຓໍ ປວຕ຺ຕຕີຕິ – ປຸຖຸປຎ຺ຎາ. ປຸຖຸນານານິຣຸຕ຺ຕີສຸ ຎາຓໍ ປວຕ຺ຕຕີຕິ – ປຸຖຸປຎ຺ຎາ. ປຸຖຸນານາປຏິຠາເນສຸ ຎາຓໍ ປວຕ຺ຕຕີຕິ – ປຸຖຸປຎ຺ຎາ. ປຸຖຸນານາສີລກ຺ຂນ຺ເຘສຸ ຎາຓໍ ປວຕ຺ຕຕີຕິ – ປຸຖຸປຎ຺ຎາ. ປຸຖຸນານາສມາຘິກ຺ຂນ຺ເຘສຸ ຎາຓໍ ປວຕ຺ຕຕີຕິ – ປຸຖຸປຎ຺ຎາ. ປຸຖຸນານາປຎ຺ຎາກ຺ຂນ຺ເຘສຸ ຎາຓໍ ປວຕ຺ຕຕີຕິ – ປຸຖຸປຎ຺ຎາ. ປຸຖຸນານາວິມຸຕ຺ຕິກ຺ຂນ຺ເຘສຸ ຎາຓໍ ປວຕ຺ຕຕີຕິ – ປຸຖຸປຎ຺ຎາ. ປຸຖຸນານາວິມຸຕ຺ຕິຎາຓທສ຺ສນກ຺ຂນ຺ເຘສຸ ຎາຓໍ ປວຕ຺ຕຕີຕິ – ປຸຖຸປຎ຺ຎາ. ປຸຖຸນານາຐານາຏ຺ຐາເນສຸ ຎາຓໍ ປວຕ຺ຕຕີຕິ – ປຸຖຸປຎ຺ຎາ. ປຸຖຸນານາວິຫາຣສມາປຕ຺ຕີສຸ ຎາຓໍ ປວຕ຺ຕຕີຕິ – ປຸຖຸປຎ຺ຎາ. ປຸຖຸນານາອຣິຍສຈ຺ເຈສຸ ຎາຓໍ ປວຕ຺ຕຕີຕິ – ປຸຖຸປຎ຺ຎາ. ປຸຖຸນານາສຕິປຏ຺ຐາເນສຸ ຎາຓໍ ປວຕ຺ຕຕີຕິ – ປຸຖຸປຎ຺ຎາ. ປຸຖຸນານາສມ຺ມປ຺ປຘາເນສຸ ຎາຓໍ ປວຕ຺ຕຕີຕິ – ປຸຖຸປຎ຺ຎາ. ປຸຖຸນານາອິທ຺ຘິປາເທສຸ ຎາຓໍ ປວຕ຺ຕຕີຕິ – ປຸຖຸປຎ຺ຎາ. ປຸຖຸນານາອິນ຺ທ຺ຣິເຍສຸ ຎາຓໍ ປວຕ຺ຕຕີຕິ – ປຸຖຸປຎ຺ຎາ. ປຸຖຸນານາພເລສຸ ຎາຓໍ ປວຕ຺ຕຕີຕິ – ປຸຖຸປຎ຺ຎາ. ປຸຖຸນານາໂພຊ຺ຌງ຺ເຄສຸ ຎາຓໍ ປວຕ຺ຕຕີຕິ – ປຸຖຸປຎ຺ຎາ. ປຸຖຸນານາອຣິຍມຄ຺ເຄສຸ ຎາຓໍ ປວຕ຺ຕຕີຕິ – ປຸຖຸປຎ຺ຎາ. ປຸຖຸນານາສາມຎ຺ຎຜເລສຸ ຎາຓໍ ປວຕ຺ຕຕີຕິ – ປຸຖຸປຎ຺ຎາ. ປຸຖຸນານາອຠິຎ຺ຎາສຸ ຎາຓໍ ປວຕ຺ຕຕີຕິ – ປຸຖຸປຎ຺ຎາ. ປຸຖຸຊ຺ຊນສາຘາຣເຓ ຘມ຺ເມ ອຕິກ຺ກມ຺ມ [ສມຕິກ຺ກມ຺ມ (ສ຺ຍາ.)] ປຣມຕ຺ເຖ ນິພ຺ພາເນ ຎາຓໍ ປວຕ຺ຕຕີຕິ – ປຸຖຸປຎ຺ຎາ. ປຸຖຸປຎ຺ຎຕາຍ ສໍວຕ຺ຕນ຺ຕີຕິ – ອຍໍ ປຸຖຸປຎ຺ຎາ.

ວິປຸລປຎ຺ຎຕາຍ ສໍວຕ຺ຕນ຺ຕີຕິ ກຕມາ ວິປຸລປຎ຺ຎາ? ວິປຸເລ ອຕ຺ເຖ ປຣິຄ຺ຄຓ຺ຫາຕີຕິ – ວິປຸລປຎ຺ຎາ. ວິປຸເລ ຘມ຺ເມ ປຣິຄ຺ຄຓ຺ຫາຕີຕິ – ວິປຸລປຎ຺ຎາ. ວິປຸລາ ນິຣຸຕ຺ຕິໂຍ ປຣິຄ຺ຄຓ຺ຫາຕີຕິ – ວິປຸລປຎ຺ຎາ. ວິປຸລານິ ປຏິຠານານິ ປຣິຄ຺ຄຓ຺ຫາຕີຕິ – ວິປຸລປຎ຺ຎາ. ວິປຸເລ ສີລກ຺ຂນ຺ເຘ ປຣິຄ຺ຄຓ຺ຫາຕີຕິ – ວິປຸລປຎ຺ຎາ. ວິປຸເລ ສມາຘິກ຺ຂນ຺ເຘ ປຣິຄ຺ຄຓ຺ຫາຕີຕິ – ວິປຸລປຎ຺ຎາ. ວິປຸເລ ປຎ຺ຎາກ຺ຂນ຺ເຘ ປຣິຄ຺ຄຓ຺ຫາຕີຕິ – ວິປຸລປຎ຺ຎາ. ວິປຸເລ ວິມຸຕ຺ຕິກ຺ຂນ຺ເຘ ປຣິຄ຺ຄຓ຺ຫາຕີຕິ – ວິປຸລປຎ຺ຎາ. ວິປຸເລ ວິມຸຕ຺ຕິຎາຓທສ຺ສນກ຺ຂນ຺ເຘ ປຣິຄ຺ຄຓ຺ຫາຕີຕິ – ວິປຸລປຎ຺ຎາ. ວິປຸລານິ ຐານາຏ຺ຐານານິ ປຣິຄ຺ຄຓ຺ຫາຕີຕິ – ວິປຸລປຎ຺ຎາ. ວິປຸລາ ວິຫາຣສມາປຕ຺ຕິໂຍ ປຣິຄ຺ຄຓ຺ຫາຕີຕິ – ວິປຸລປຎ຺ຎາ. ວິປຸລານິ ອຣິຍສຈ຺ຈານິ ປຣິຄ຺ຄຓ຺ຫາຕີຕິ – ວິປຸລປຎ຺ຎາ. ວິປຸເລ ສຕິປຏ຺ຐາເນ ປຣິຄ຺ຄຓ຺ຫາຕີຕິ – ວິປຸລປຎ຺ຎາ. ວິປຸເລ ສມ຺ມປ຺ປຘາເນ ປຣິຄ຺ຄຓ຺ຫາຕີຕິ – ວິປຸລປຎ຺ຎາ. ວິປຸເລ ອິທ຺ຘິປາເທ ປຣິຄ຺ຄຓ຺ຫາຕີຕິ – ວິປຸລປຎ຺ຎາ. ວິປຸລານິ ອິນ຺ທ຺ຣິຍານິ ປຣິຄ຺ຄຓ຺ຫາຕີຕິ – ວິປຸລປຎ຺ຎາ. ວິປຸລານິ ພລານິ ປຣິຄ຺ຄຓ຺ຫາຕີຕິ – ວິປຸລປຎ຺ຎາ. ວິປຸເລ ໂພຊ຺ຌງ຺ເຄ ປຣິຄ຺ຄຓ຺ຫາຕີຕິ – ວິປຸລປຎ຺ຎາ. ວິປຸເລ ອຣິຍມຄ຺ເຄ ປຣິຄ຺ຄຓ຺ຫາຕີຕິ – ວິປຸລປຎ຺ຎາ. ວິປຸລານິ ສາມຎ຺ຎຜລານິ ປຣິຄ຺ຄຓ຺ຫາຕີຕິ – ວິປຸລປຎ຺ຎາ. ວິປຸລາ ອຠິຎ຺ຎາໂຍ ປຣິຄ຺ຄຓ຺ຫາຕີຕິ – ວິປຸລປຎ຺ຎາ. ວິປຸລໍ ປຣມຕ຺ຖໍ ນິພ຺ພານໍ ປຣິຄ຺ຄຓ຺ຫາຕີຕິ – ວິປຸລປຎ຺ຎາ. ວິປຸລປຎ຺ຎຕາຍ ສໍວຕ຺ຕນ຺ຕີຕິ – ອຍໍ ວິປຸລປຎ຺ຎາ.

ຄມ຺ຠີຣປຎ຺ຎຕາຍ ສໍວຕ຺ຕນ຺ຕີຕິ ກຕມາ ຄມ຺ຠີຣປຎ຺ຎາ? ຄມ຺ຠີເຣສຸ ຂນ຺ເຘສຸ ຎາຓໍ ປວຕ຺ຕຕີຕິ – ຄມ຺ຠີຣປຎ຺ຎາ. ຄມ຺ຠີຣາສຸ ຘາຕູສຸ ຎາຓໍ ປວຕ຺ຕຕີຕິ – ຄມ຺ຠີຣປຎ຺ຎາ. ຄມ຺ຠີເຣສຸ ອາຍຕເນສຸ ຎາຓໍ ປວຕ຺ຕຕີຕິ – ຄມ຺ຠີຣປຎ຺ຎາ. ຄມ຺ຠີເຣສຸ ປຏິຈ຺ຈສມຸປ຺ປາເທສຸ ຎາຓໍ ປວຕ຺ຕຕີຕິ – ຄມ຺ຠີຣປຎ຺ຎາ. ຄມ຺ຠີເຣສຸ ສຸຎ຺ຎຕມນຸປລພ຺ເຠສຸ ຎາຓໍ ປວຕ຺ຕຕີຕິ – ຄມ຺ຠີຣປຎ຺ຎາ. ຄມ຺ຠີເຣສຸ ອຕ຺ເຖສຸ ຎາຓໍ ປວຕ຺ຕຕີຕິ – ຄມ຺ຠີຣປຎ຺ຎາ. ຄມ຺ຠີເຣສຸ ຘມ຺ເມສຸ ຎາຓໍ ປວຕ຺ຕຕີຕິ – ຄມ຺ຠີຣປຎ຺ຎາ. ຄມ຺ຠີຣາສຸ ນິຣຸຕ຺ຕີສຸ ຎາຓໍ ປວຕ຺ຕຕີຕິ – ຄມ຺ຠີຣປຎ຺ຎາ. ຄມ຺ຠີເຣສຸ ປຏິຠາເນສຸ ຎາຓໍ ປວຕ຺ຕຕີຕິ – ຄມ຺ຠີຣປຎ຺ຎາ. ຄມ຺ຠີເຣສຸ ສີລກ຺ຂນ຺ເຘສຸ ຎາຓໍ ປວຕ຺ຕຕີຕິ – ຄມ຺ຠີຣປຎ຺ຎາ. ຄມ຺ຠີເຣສຸ ສມາຘິກ຺ຂນ຺ເຘສຸ ຎາຓໍ ປວຕ຺ຕຕີຕິ – ຄມ຺ຠີຣປຎ຺ຎາ. ຄມ຺ຠີເຣສຸ ປຎ຺ຎາກ຺ຂນ຺ເຘສຸ ຎາຓໍ ປວຕ຺ຕຕີຕິ – ຄມ຺ຠີຣປຎ຺ຎາ. ຄມ຺ຠີເຣສຸ ວິມຸຕ຺ຕິກ຺ຂນ຺ເຘສຸ ຎາຓໍ ປວຕ຺ຕຕີຕິ – ຄມ຺ຠີຣປຎ຺ຎາ. ຄມ຺ຠີເຣສຸ ວິມຸຕ຺ຕິຎາຓທສ຺ສນກ຺ຂນ຺ເຘສຸ ຎາຓໍ ປວຕ຺ຕຕີຕິ – ຄມ຺ຠີຣປຎ຺ຎາ. ຄມ຺ຠີເຣສຸ ຐານາຏ຺ຐາເນສຸ ຎາຓໍ ປວຕ຺ຕຕີຕິ – ຄມ຺ຠີຣປຎ຺ຎາ. ຄມ຺ຠີຣາສຸ ວິຫາຣສມາປຕ຺ຕີສຸ ຎາຓໍ ປວຕ຺ຕຕີຕິ – ຄມ຺ຠີຣປຎ຺ຎາ. ຄມ຺ຠີເຣສຸ ອຣິຍສຈ຺ເຈສຸ ຎາຓໍ ປວຕ຺ຕຕີຕິ – ຄມ຺ຠີຣປຎ຺ຎາ. ຄມ຺ຠີເຣສຸ ສຕິປຏ຺ຐາເນສຸ ຎາຓໍ ປວຕ຺ຕຕີຕິ – ຄມ຺ຠີຣປຎ຺ຎາ. ຄມ຺ຠີເຣສຸ ສມ຺ມປ຺ປຘາເນສຸ ຎາຓໍ ປວຕ຺ຕຕີຕິ – ຄມ຺ຠີຣປຎ຺ຎາ. ຄມ຺ຠີເຣສຸ ອິທ຺ຘິປາເທສຸ ຎາຓໍ ປວຕ຺ຕຕີຕິ – ຄມ຺ຠີຣປຎ຺ຎາ. ຄມ຺ຠີເຣສຸ ອິນ຺ທ຺ຣິເຍສຸ ຎາຓໍ ປວຕ຺ຕຕີຕິ – ຄມ຺ຠີຣປຎ຺ຎາ. ຄມ຺ຠີເຣສຸ ພເລສຸ ຎາຓໍ ປວຕ຺ຕຕີຕິ – ຄມ຺ຠີຣປຎ຺ຎາ. ຄມ຺ຠີເຣສຸ ໂພຊ຺ຌງ຺ເຄສຸ ຎາຓໍ ປວຕ຺ຕຕີຕິ – ຄມ຺ຠີຣປຎ຺ຎາ. ຄມ຺ຠີເຣສຸ ອຣິຍມຄ຺ເຄສຸ ຎາຓໍ ປວຕ຺ຕຕີຕິ – ຄມ຺ຠີຣປຎ຺ຎາ. ຄມ຺ຠີເຣສຸ ສາມຎ຺ຎຜເລສຸ ຎາຓໍ ປວຕ຺ຕຕີຕິ – ຄມ຺ຠີຣປຎ຺ຎາ. ຄມ຺ຠີຣາສຸ ອຠິຎ຺ຎາສຸ ຎາຓໍ ປວຕ຺ຕຕີຕິ – ຄມ຺ຠີຣປຎ຺ຎາ. ຄມ຺ຠີເຣ ປຣມຕ຺ເຖ ນິພ຺ພາເນ ຎາຓໍ ປວຕ຺ຕຕີຕິ – ຄມ຺ຠີຣປຎ຺ຎາ. ຄມ຺ຠີຣປຎ຺ຎຕາຍ ສໍວຕ຺ຕນ຺ຕີຕິ – ອຍໍ ຄມ຺ຠີຣປຎ຺ຎາ.

ອສາມນ຺ຕປຎ຺ຎຕາຍ ສໍວຕ຺ຕນ຺ຕີຕິ ກຕມາ ອສາມນ຺ຕປຎ຺ຎາ? ຍສ຺ສ ປຸຄ຺ຄລສ຺ສ ອຕ຺ຖວວຕ຺ຖານໂຕ ອຕ຺ຖປຏິສມ຺ຠິທາ ອຘິຄຕາ ໂຫຕິ ສຈ຺ຉິກຕາ ຜສ຺ສິຕາ ປຎ຺ຎາຍ, ຘມ຺ມວວຕ຺ຖານໂຕ ຘມ຺ມປຏິສມ຺ຠິທາ ອຘິຄຕາ ໂຫຕິ ສຈ຺ຉິກຕາ ຜສ຺ສິຕາ ປຎ຺ຎາຍ, ນິຣຸຕ຺ຕິວວຕ຺ຖານໂຕ ນິຣຸຕ຺ຕິປຏິສມ຺ຠິທາ ອຘິຄຕາ ໂຫຕິ ສຈ຺ຉິກຕາ ຜສ຺ສິຕາ ປຎ຺ຎາຍ, ປຏິຠານວວຕ຺ຖານໂຕ ປຏິຠານປຏິສມ຺ຠິທາ ອຘິຄຕາ ໂຫຕິ ສຈ຺ຉິກຕາ ຜສ຺ສິຕາ ປຎ຺ຎາຍ, ຕສ຺ສ ອຕ຺ເຖ ຈ ຘມ຺ເມ ຈ ນິຣຸຕ຺ຕິຍາ ຈ ປຏິຠາເນ ຈ ນ ອຎ຺ໂຎ ໂກຈິ ສກ຺ໂກຕິ ອຠິສມ຺ຠວິຕຸໍ. ອນຠິສມ຺ຠວນີໂຍ ຈ ໂສ ອຎ຺ເຎຫີຕິ – ອສາມນ຺ຕປຎ຺ໂຎ.

ປຸຖຸຊ຺ຊນກລ຺ຍາຓກສ຺ສ ປຎ຺ຎາ ອຏ຺ຐມກສ຺ສ ປຎ຺ຎາຍ ທູເຣ ວິທູເຣ ສຸວິທູເຣ ນ ສນ຺ຕິເກ ນ ສາມນ຺ຕາ. ປຸຖຸຊ຺ຊນກລ຺ຍາຓກໍ ອຸປາທາຍ ອຏ຺ຐມໂກ ອສາມນ຺ຕປຎ຺ໂຎ. ອຏ຺ຐມກສ຺ສ ປຎ຺ຎາ ໂສຕາປນ຺ນສ຺ສ ປຎ຺ຎາຍ ທູເຣ ວິທູເຣ ສຸວິທູເຣ ນ ສນ຺ຕິເກ ນ ສາມນ຺ຕາ. ອຏ຺ຐມກໍ ອຸປາທາຍ ໂສຕາປນ຺ໂນ ອສາມນ຺ຕປຎ຺ໂຎ. ໂສຕາປນ຺ນສ຺ສ ປຎ຺ຎາ ສກທາຄາມິສ຺ສ ປຎ຺ຎາຍ ທູເຣ ວິທູເຣ ສຸວິທູເຣ ນ ສນ຺ຕິເກ ນ ສາມນ຺ຕາ. ໂສຕາປນ຺ນໍ ອຸປາທາຍ ສກທາຄາມິ ອສາມນ຺ຕປຎ຺ໂຎ. ສກທາຄາມິສ຺ສ ປຎ຺ຎາ ອນາຄາມິສ຺ສ ປຎ຺ຎາຍ ທູເຣ ວິທູເຣ ສຸວິທູເຣ ນ ສນ຺ຕິເກ ນ ສາມນ຺ຕາ. ສກທາຄາມິໍ ອຸປາທາຍ ອນາຄາມີ ອສາມນ຺ຕປຎ຺ໂຎ. ອນາຄາມິສ຺ສ ປຎ຺ຎາ ອຣຫໂຕ ປຎ຺ຎາຍ ທູເຣ ວິທູເຣ ສຸວິທູເຣ ນ ສນ຺ຕິເກ ນ ສາມນ຺ຕາ. ອນາຄາມິໍ ອຸປາທາຍ ອຣຫາ ອສາມນ຺ຕປຎ຺ໂຎ. ອຣຫໂຕ ປຎ຺ຎາ ປຈ຺ເຈກສມ຺ພຸທ຺ຘສ຺ສ [ປຈ຺ເຈກພຸທ຺ຘສ຺ສ (ສ຺ຍາ. ກ.) ອຏ຺ຐກຖາ ໂອໂລເກຕພ຺ພາ] ປຎ຺ຎາຍ ທູເຣ ວິທູເຣ ສຸວິທູເຣ ນ ສນ຺ຕິເກ ນ ສາມນ຺ຕາ. ອຣຫນ຺ຕໍ ອຸປາທາຍ ປຈ຺ເຈກພຸທ຺ໂຘ ອສາມນ຺ຕປຎ຺ໂຎ. ປຈ຺ເຈກພຸທ຺ຘຎ຺ຈ ສເທວກຎ຺ຈ ໂລກໍ ອຸປາທາຍ ຕຖາຄໂຕ ອຣຫໍ ສມ຺ມາສມ຺ພຸທ຺ໂຘ ອຄ຺ໂຄ ອສາມນ຺ຕປຎ຺ໂຎ.

໕. ປຎ຺ຎາປເຠທກຸສໂລ ປຠິນ຺ນຎາໂຓ ອຘິຄຕປ຺ປຏິສມ຺ຠິໂທ ຈຕຸເວສາຣຊ຺ຊປ຺ປຕ຺ໂຕ ທສພລຘາຣີ ປຸຣິສາສໂຠ ປຸຣິສສີໂຫ ປຸຣິສນາໂຄ ປຸຣິສາຊຎ຺ໂຎ ປຸຣິສໂຘຣຍ຺ໂຫ ອນນ຺ຕຎາໂຓ ອນນ຺ຕເຕໂຊ ອນນ຺ຕຍໂສ ອຑ຺ໂຒ ມຫທ຺ຘໂນ ຘນວາ ເນຕາ ວິເນຕາ ອນຸເນຕາ ປຎ຺ຎາເປຕາ ນິຊ຺ຌາເປຕາ ເປກ຺ເຂຕາ ປສາເທຕາ. ໂສ ຫິ ຠຄວາ ອນຸປ຺ປນ຺ນສ຺ສ ມຄ຺ຄສ຺ສ ອຸປ຺ປາເທຕາ, ອສຎ຺ຊາຕສ຺ສ ມຄ຺ຄສ຺ສ ສຎ຺ຊເນຕາ [ສຎ຺ຊາເນຕາ (ສ຺ຍາ.)], ອນກ຺ຂາຕສ຺ສ ມຄ຺ຄສ຺ສ ອກ຺ຂາຕາ, ມຄ຺ຄຎ຺ຎູ ມຄ຺ຄວິທູ ມຄ຺ຄໂກວິໂທ ມຄ຺ຄານຸຄາມີ [ມຄ຺ຄານຸຄາ (ສ຺ຍາ.) ມຫານິ. ໖໙ ປສ຺ສິຕພ຺ໂພ] ຈ ປນສ຺ສ ເອຕຣຫິ ສາວກາ ວິຫຣນ຺ຕິ ປຈ຺ຉາ ສມນ຺ນາຄຕາ.

ໂສ ຫິ ຠຄວາ ຊານໍ ຊານາຕິ, ປສ຺ສໍ ປສ຺ສຕິ, ຈກ຺ຂຸຠູໂຕ ຎາຓຠູໂຕ ຘມ຺ມຠູໂຕ ພ຺ຣຫ຺ມຠູໂຕ ວຕ຺ຕາ ປວຕ຺ຕາ ອຕ຺ຖສ຺ສ ນິນ຺ເນຕາ ອມຕສ຺ສ ທາຕາ ຘມ຺ມສ຺ສາມີ ຕຖາຄໂຕ. ນຕ຺ຖິ ຕສ຺ສ ຠຄວໂຕ ອຎ຺ຎາຕໍ ອທິຏ຺ຐໍ ອວິທິຕໍ ອສຈ຺ຉິກຕໍ ອຜສ຺ສິຕໍ ປຎ຺ຎາຍ. ອຕີຕໍ ອນາຄຕໍ ປຈ຺ຈຸປ຺ປນ຺ນໍ [ອຕີຕານາຄຕປຈ຺ຈຸປ຺ປນ຺ນໍ (ສ຺ຍາ.) ມຫານິ. ໖໙] ອຸປາທາຍ ສພ຺ເພ ຘມ຺ມາ ສພ຺ພາກາເຣນ ພຸທ຺ຘສ຺ສ ຠຄວໂຕ ຎາຓມຸເຂ ອາປາຖໍ ອາຄຈ຺ຉນ຺ຕິ. ຍໍ ກິຎ຺ຈິ ເນຍ຺ຍໍ ນາມ ອຕ຺ຖິ ຕໍ ສພ຺ພໍ ຊານິຕພ຺ພໍ [ສພ຺ພໍ ຘມ຺ມໍ ຊານິຕພ຺ພໍ (ກ.)]. ອຕ຺ຕຕ຺ໂຖ ວາ ປຣຕ຺ໂຖ ວາ ອຸຠຍຕ຺ໂຖ ວາ ທິຏ຺ຐຘມ຺ມິໂກ ວາ ອຕ຺ໂຖ ສມ຺ປຣາຍິໂກ ວາ ອຕ຺ໂຖ ອຸຕ຺ຕາໂນ ວາ ອຕ຺ໂຖ ຄມ຺ຠີໂຣ ວາ ອຕ຺ໂຖ ຄູຬ຺ໂຫ ວາ ອຕ຺ໂຖ ປຏິຈ຺ຉນ຺ໂນ ວາ ອຕ຺ໂຖ ເນຍ຺ໂຍ ວາ ອຕ຺ໂຖ ນີໂຕ ວາ ອຕ຺ໂຖ ອນວຊ຺ໂຊ ວາ ອຕ຺ໂຖ ນິກ຺ກິເລໂສ ວາ ອຕ຺ໂຖ ໂວທາໂນ ວາ ອຕ຺ໂຖ ປຣມຕ຺ໂຖ ວາ ອຕ຺ໂຖ, ສພ຺ພໍ ຕໍ ອນ຺ໂຕພຸທ຺ຘຎາເຓ ປຣິວຕ຺ຕຕິ.

ສພ຺ພໍ ກາຍກມ຺ມໍ ພຸທ຺ຘສ຺ສ ຠຄວໂຕ ຎາຓານຸປຣິວຕ຺ຕິ. ສພ຺ພໍ ວຈີກມ຺ມໍ ພຸທ຺ຘສ຺ສ ຠຄວໂຕ ຎາຓານຸປຣິວຕ຺ຕິ. ສພ຺ພໍ ມໂນກມ຺ມໍ ພຸທ຺ຘສ຺ສ ຠຄວໂຕ ຎາຓານຸປຣິວຕ຺ຕິ. ອຕີເຕ ພຸທ຺ຘສ຺ສ ຠຄວໂຕ ອປ຺ປຏິຫຕໍ ຎາຓໍ. ອນາຄເຕ ພຸທ຺ຘສ຺ສ ຠຄວໂຕ ອປ຺ປຏິຫຕໍ ຎາຓໍ. ປຈ຺ຈຸປ຺ປນ຺ເນ ພຸທ຺ຘສ຺ສ ຠຄວໂຕ ອປ຺ປຏິຫຕໍ ຎາຓໍ. ຍາວຕກໍ ເນຍ຺ຍໍ ຕາວຕກໍ ຎາຓໍ, ຍາວຕກໍ ຎາຓໍ ຕາວຕກໍ ເນຍ຺ຍໍ. ເນຍ຺ຍປຣິຍນ຺ຕິກໍ ຎາຓໍ, ຎາຓປຣິຍນ຺ຕິກໍ ເນຍ຺ຍໍ. ເນຍ຺ຍໍ ອຕິກ຺ກມິຕ຺ວາ ຎາຓໍ ນປ຺ປວຕ຺ຕຕິ. ຎາຓໍ ອຕິກ຺ກມິຕ຺ວາ ເນຍ຺ຍປໂຖ ນຕ຺ຖິ. ອຎ຺ຎມຎ຺ຎປຣິຍນ຺ຕຏ຺ຐາຍິໂນ ເຕ ຘມ຺ມາ. ຍຖາ ທ຺ວິນ຺ນໍ ສມຸຄ຺ຄປຏລານໍ ສມ຺ມາ ຜຸສິຕານໍ [ສຸຜຸສ຺ສິຕານໍ (ສ຺ຍາ. ກ.)] ເຫຏ຺ຐິມໍ ສມຸຄ຺ຄປຏລໍ ອຸປຣິມໍ ນາຕິວຕ຺ຕຕິ, ອຸປຣິມໍ ສມຸຄ຺ຄປຏລໍ ເຫຏ຺ຐິມໍ ນາຕິວຕ຺ຕຕິ, ອຎ຺ຎມຎ຺ຎປຣິຍນ຺ຕຏ຺ຐາຍິໂນ; ເອວເມວ ພຸທ຺ຘສ຺ສ ຠຄວໂຕ ເນຍ຺ຍຎ຺ຈ ຎາຓຎ຺ຈ ອຎ຺ຎມຎ຺ຎປຣິຍນ຺ຕຏ຺ຐາຍິໂນ. ຍາວຕກໍ ເນຍ຺ຍໍ ຕາວຕກໍ ຎາຓໍ, ຍາວຕກໍ ຎາຓໍ ຕາວຕກໍ ເນຍ຺ຍໍ. ເນຍ຺ຍປຣິຍນ຺ຕິກໍ ຎາຓໍ, ຎາຓປຣິຍນ຺ຕິກໍ ເນຍ຺ຍໍ. ເນຍ຺ຍໍ ອຕິກ຺ກມິຕ຺ວາ ຎາຓໍ ນປ຺ປວຕ຺ຕຕິ. ຎາຓໍ ອຕິກ຺ກມິຕ຺ວາ ເນຍ຺ຍປໂຖ ນຕ຺ຖິ. ອຎ຺ຎມຎ຺ຎປຣິຍນ຺ຕຏ຺ຐາຍິໂນ ເຕ ຘມ຺ມາ. ສພ຺ພຘມ຺ເມສຸ ພຸທ຺ຘສ຺ສ ຠຄວໂຕ ຎາຓໍ ປວຕ຺ຕຕິ.

ສພ຺ເພ ຘມ຺ມາ ພຸທ຺ຘສ຺ສ ຠຄວໂຕ ອາວຊ຺ຊນປ຺ປຏິພທ຺ຘາ ອາກງ຺ຂປ຺ປຏິພທ຺ຘາ ມນສິກາຣປ຺ປຏິພທ຺ຘາ ຈິຕ຺ຕຸປ຺ປາທປ຺ປຏິພທ຺ຘາ. ສພ຺ພສຕ຺ເຕສຸ ພຸທ຺ຘສ຺ສ ຠຄວໂຕ ຎາຓໍ ປວຕ຺ຕຕິ. ສພ຺ເພສໍ ສຕ຺ຕານໍ ພຸທ຺ໂຘ ອາສຍໍ ຊານາຕິ, ອນຸສຍໍ ຊານາຕິ, ຈຣິຕໍ [ຈຣິຍໍ (ສ຺ຍາ.) ມຫານິ. ໖໙ ປສ຺ສິຕພ຺ພາ] ຊານາຕິ, ອຘິມຸຕ຺ຕິໍ ຊານາຕິ. ອປ຺ປຣຊກ຺ເຂ ມຫາຣຊກ຺ເຂ ຕິກ຺ຂິນ຺ທ຺ຣິເຍ ມຸທິນ຺ທ຺ຣິເຍ ສ຺ວາກາເຣ ທ຺ວາກາເຣ ສຸວິຎ຺ຎາປເຍ ທຸວິຎ຺ຎາປເຍ ຠພ຺ພາຠພ຺ເພ ສຕ຺ເຕ ປຊານາຕິ. ສເທວໂກ ໂລໂກ ສມາຣໂກ ສພ຺ຣຫ຺ມໂກ ສສ຺ສມຓພ຺ຣາຫ຺ມຓີ ປຊາ ສເທວມນຸສ຺ສາ ອນ຺ໂຕພຸທ຺ຘຎາເຓ ປຣິວຕ຺ຕຕິ.

ຍຖາ ເຍ ເກຈິ ມຈ຺ຉກຈ຺ຉປາ, ອນ຺ຕມໂສ ຕິມິຕິມິງ຺ຄລໍ ອຸປາທາຍ, ອນ຺ໂຕມຫາສມຸທ຺ເທ ປຣິວຕ຺ຕນ຺ຕິ, ເອວເມວໍ ສເທວໂກ ໂລໂກ ສມາຣໂກ ສພ຺ຣຫ຺ມໂກ ສສ຺ສມຓພ຺ຣາຫ຺ມຓີ ປຊາ ສເທວມນຸສ຺ສາ ອນ຺ໂຕພຸທ຺ຘຎາເຓ ປຣິວຕ຺ຕຕິ. ຍຖາ ເຍ ເກຈິ ປກ຺ຂິໂນ, ອນ຺ຕມໂສ ຄຣຸຬໍ ເວນເຕຍ຺ຍໍ ອຸປາທາຍ, ອາກາສສ຺ສ ປເທເສ ປຣິວຕ຺ຕນ຺ຕິ; ເອວເມວ ເຍປິ ເຕ ສາຣິປຸຕ຺ຕສມາ ປຎ຺ຎາຍ ເຕປິ ພຸທ຺ຘຎາຓສ຺ສ ປເທເສ ປຣິວຕ຺ຕນ຺ຕິ. ພຸທ຺ຘຎາຓໍ ເທວມນຸສ຺ສານໍ ປຎ຺ຎໍ ຜຣິຕ຺ວາ ອຕິຆໍສິຕ຺ວາ ຕິຏ຺ຐຕິ. ເຍປິ ເຕ ຂຕ຺ຕິຍປຓ຺ຑິຕາ ພ຺ຣາຫ຺ມຓປຓ຺ຑິຕາ ຄຫປຕິປຓ຺ຑິຕາ ສມຓປຓ຺ຑິຕາ ນິປຸຓາ ກຕປຣປ຺ປວາທາ ວາລເວຘິຣູປາ ໂວຠິນ຺ທນ຺ຕາ [ເຕ ຠິນ຺ທນ຺ຕາ (ສ຺ຍາ. ກ.)] ມຎ຺ເຎ ຈຣນ຺ຕິ ປຎ຺ຎາຄເຕນ ທິຏ຺ຐິຄຕານິ, ເຕ ປຎ຺ຫໍ ອຠິສງ຺ຂຣິຕ຺ວາ ອຠິສງ຺ຂຣິຕ຺ວາ ຕຖາຄຕໍ ອຸປສງ຺ກມິຕ຺ວາ ປຸຈ຺ຉນ຺ຕິ ຄູຬ຺ຫານິ ຈ ປຏິຈ຺ຉນ຺ນານິ ຈ, ກຖິຕາ ວິສຊ຺ຊິຕາ ຈ ເຕ ປຎ຺ຫາ ຠຄວຕາ ໂຫນ຺ຕິ ນິທ຺ທິຏ຺ຐກາຣຓາ [ນິທ຺ທິຏ຺ຐິກາຣຓາ (ສ຺ຍາ.)]. ອຸປກ຺ຂິຕ຺ຕກາ ຈ ເຕ ຠຄວໂຕ ສມ຺ປຊ຺ຊນ຺ຕິ. ອຖ ໂຂ ຠຄວາ ຕຕ຺ຖ ອຕິໂຣຈຕິ ຍທິທໍ ປຎ຺ຎາຍາຕິ. ອຄ຺ໂຄ ອສາມນ຺ຕປຎ຺ໂຎ, ອສາມນ຺ຕປຎ຺ຎຕາຍ ສໍວຕ຺ຕນ຺ຕີຕິ – ອຍໍ ອສາມນ຺ຕປຎ຺ຎາ.

໖. ຠູຣິປຎ຺ຎຕາຍ ສໍວຕ຺ຕນ຺ຕີຕິ ກຕມາ ຠູຣິປຎ຺ຎາ? ຣາຄໍ ອຠິຠຸຍ຺ຍຕີຕິ – ຠູຣິປຎ຺ຎາ. ອຠິຠວິຕາຕິ – ຠູຣິປຎ຺ຎາ. ໂທສໍ ອຠິຠຸຍ຺ຍຕີຕິ – ຠູຣິປຎ຺ຎາ. ອຠິຠວິຕາຕິ – ຠູຣິປຎ຺ຎາ. ໂມຫໍ ອຠິຠຸຍ຺ຍຕີຕິ – ຠູຣິປຎ຺ຎາ. ອຠິຠວິຕາຕິ – ຠູຣິປຎ຺ຎາ. ໂກຘໍ…ເປ… ອຸປນາຫໍ … ມກ຺ຂໍ… ປຬາສໍ… ອິສ຺ສໍ… ມຈ຺ຉຣິຍໍ… ມາຍໍ… ສາເຐຍ຺ຍໍ… ຖມ຺ຠໍ… ສາຣມ຺ຠໍ… ມານໍ… ອຕິມານໍ… ມທໍ… ປມາທໍ… ສພ຺ເພ ກິເລເສ… ສພ຺ເພ ທຸຈ຺ຈຣິເຕ… ສພ຺ເພ ອຠິສງ຺ຂາເຣ…ເປ… ສພ຺ເພ ຠວຄາມິກມ຺ເມ ອຠິຠຸຍ຺ຍຕີຕິ – ຠູຣິປຎ຺ຎາ. ອຠິຠວິຕາຕິ – ຠູຣິປຎ຺ຎາ. ຣາໂຄ ອຣິ. ຕໍ ອຣິໍ ມທ຺ທນິປຎ຺ຎາຕິ – ຠູຣິປຎ຺ຎາ. ໂທໂສ ອຣິ. ຕໍ ອຣິໍ ມທ຺ທນິປຎ຺ຎາຕິ – ຠູຣິປຎ຺ຎາ. ໂມໂຫ ອຣິ. ຕໍ ອຣິໍ ມທ຺ທນິປຎ຺ຎາຕິ – ຠູຣິປຎ຺ຎາ. ໂກໂຘ…ເປ… ອຸປນາໂຫ… ມກ຺ໂຂ… ປຬາໂສ… ອິສ຺ສາ… ມຈ຺ຉຣິຍໍ… ມາຍາ… ສາເຐຍ຺ຍໍ… ຖມ຺ໂຠ… ສາຣມ຺ໂຠ… ມາໂນ… ອຕິມາໂນ… ມໂທ… ປມາໂທ… ສພ຺ເພ ກິເລສາ… ສພ຺ເພ ທຸຈ຺ຈຣິຕາ… ສພ຺ເພ ອຠິສງ຺ຂາຣາ…ເປ… ສພ຺ເພ ຠວຄາມິກມ຺ມາ ອຣິ. ຕໍ ອຣິໍ ມທ຺ທນິປຎ຺ຎາຕິ – ຠູຣິປຎ຺ຎາ. ຠູຣິ ວຸຈ຺ຈຕິ ປຖວີ [ປຐວີ (ສ຺ຍາ.)]. ຕາຍ ປຖວິສມາຍ ວິຕ຺ຖຕາຍ ວິປຸລາຍ ປຎ຺ຎາຍ ສມນ຺ນາຄໂຕຕິ – ຠູຣິປຎ຺ຎາ. ອປິ ຈ, ປຎ຺ຎາຍ ເມຕໍ ອຘິວຈນໍ. ຠູຣິ ເມຘາ ປຣິຓາຍິກາຕິ – ຠູຣິປຎ຺ຎາ. ຠູຣິປຎ຺ຎຕາຍ ສໍວຕ຺ຕນ຺ຕີຕິ – ອຍໍ ຠູຣິປຎ຺ຎາ.

ປຎ຺ຎາພາຫຸລ຺ລາຍ ສໍວຕ຺ຕນ຺ຕີຕິ ກຕມໍ ປຎ຺ຎາພາຫຸລ຺ລໍ? ອິເຘກຈ຺ໂຈ ປຎ຺ຎາຄຣຸໂກ ໂຫຕິ ປຎ຺ຎາຈຣິໂຕ ປຎ຺ຎາສໂຍ ປຎ຺ຎາຘິມຸຕ຺ໂຕ ປຎ຺ຎາຘໂຊ ປຎ຺ຎາເກຕຸ ປຎ຺ຎາຘິປເຕຍ຺ໂຍ ວິຈຍພຫຸໂລ ປວິຈຍພຫຸໂລ ໂອກ຺ຂາຍນພຫຸໂລ ສໂມກ຺ຂາຍນພຫຸໂລ [ສມ຺ເປກ຺ຂາຍນພຫຸໂລ (ສ຺ຍາ. ກ.) ມຫານິ. ໒໐໔ ປສ຺ສິຕພ຺ພາ] ສມ຺ເປກ຺ຂາຍນຘມ຺ໂມ ວິຠູຕວິຫາຣີ ຕຈ຺ຈຣິໂຕ ຕຄ຺ຄຣຸໂກ ຕພ຺ພຫຸໂລ ຕນ຺ນິນ຺ໂນ ຕປ຺ໂປໂຓ ຕປ຺ປພ຺ຠາໂຣ ຕທຘິມຸຕ຺ໂຕ ຕທຘິປເຕຍ຺ໂຍ. ຍຖາ ຄຓຄຣຸໂກ ວຸຈ຺ຈຕິ ‘‘ຄຓພາຫຸລິໂກ’’ຕິ, ຈີວຣຄຣຸໂກ ວຸຈ຺ຈຕິ ‘‘ຈີວຣພາຫຸລິໂກ’’ຕິ, ປຕ຺ຕຄຣຸໂກ ວຸຈ຺ຈຕິ ‘‘ປຕ຺ຕພາຫຸລິໂກ’’ຕິ, ເສນາສນຄຣຸໂກ ວຸຈ຺ຈຕິ ‘‘ເສນາສນພາຫຸລິໂກ’’ຕິ; ເອວເມວໍ ອິເຘກຈ຺ໂຈ ປຎ຺ຎາ ຄຣຸໂກ ໂຫຕິ ປຎ຺ຎາຈຣິໂຕ ປຎ຺ຎາສໂຍ ປຎ຺ຎາຘິມຸຕ຺ໂຕ ປຎ຺ຎາຘໂຊ ປຎ຺ຎາເກຕຸ ປຎ຺ຎາຘິປເຕຍ຺ໂຍ ວິຈຍພຫຸໂລ ປວິຈຍພຫຸໂລ ໂອກ຺ຂາຍນພຫຸໂລ ສໂມກ຺ຂາຍນພຫຸໂລ ສມ຺ເປກ຺ຂາຍນຘມ຺ໂມ ວິຠູຕວິຫາຣີ ຕຈ຺ຈຣິໂຕ ຕຄ຺ຄຣຸໂກ ຕພ຺ພຫຸໂລ ຕນ຺ນິນ຺ໂນ ຕປ຺ໂປໂຓ ຕປ຺ປພ຺ຠາໂຣ ຕທຘິມຸຕ຺ໂຕ ຕທຘິປເຕຍ຺ໂຍ. ປຎ຺ຎາພາຫຸລ຺ລາຍ ສໍວຕ຺ຕນ຺ຕີຕິ – ອິທໍ ປຎ຺ຎາພາຫຸລ຺ລໍ.

ສີຆປຎ຺ຎຕາຍ ສໍວຕ຺ຕນ຺ຕີຕິ ກຕມາ ສີຆປຎ຺ຎາ? ສີຆໍ ສີຆໍ ສີລານິ ປຣິປູເຣຕີຕິ – ສີຆປຎ຺ຎາ. ສີຆໍ ສີຆໍ ອິນ຺ທ຺ຣິຍສໍວຣໍ ປຣິປູເຣຕີຕິ – ສີຆປຎ຺ຎາ. ສີຆໍ ສີຆໍ ໂຠຊເນ ມຕ຺ຕຎ຺ຎຸຕໍ ປຣິປູເຣຕີຕິ – ສີຆປຎ຺ຎາ. ສີຆໍ ສີຆໍ ຊາຄຣິຍານຸໂຍຄໍ ປຣິປູເຣຕີຕິ – ສີຆປຎ຺ຎາ. ສີຆໍ ສີຆໍ ສີລກ຺ຂນ຺ຘໍ ປຣິປູເຣຕີຕິ – ສີຆປຎ຺ຎາ. ສີຆໍ ສີຆໍ ສມາຘິກ຺ຂນ຺ຘໍ ປຣິປູເຣຕີຕິ – ສີຆປຎ຺ຎາ. ສີຆໍ ສີຆໍ ປຎ຺ຎາກ຺ຂນ຺ຘໍ ປຣິປູເຣຕີຕິ – ສີຆປຎ຺ຎາ. ສີຆໍ ສີຆໍ ວິມຸຕ຺ຕິກ຺ຂນ຺ຘໍ ປຣິປູເຣຕີຕິ – ສີຆປຎ຺ຎາ. ສີຆໍ ສີຆໍ ວິມຸຕ຺ຕິຎາຓທສ຺ສນກ຺ຂນ຺ຘໍ ປຣິປູເຣຕີຕິ – ສີຆປຎ຺ຎາ. ສີຆໍ ສີຆໍ ຐານາຏ຺ຐານານິ ປຏິວິຊ຺ຌຕີຕິ – ສີຆປຎ຺ຎາ. ສີຆໍ ສີຆໍ ວິຫາຣສມາປຕ຺ຕິໂຍ ປຣິປູເຣຕີຕິ – ສີຆປຎ຺ຎາ. ສີຆໍ ສີຆໍ ອຣິຍສຈ຺ຈານິ ປຏິວິຊ຺ຌຕີຕິ – ສີຆປຎ຺ຎາ. ສີຆໍ ສີຆໍ ສຕິປຏ຺ຐາເນ ຠາເວຕີຕິ – ສີຆປຎ຺ຎາ. ສີຆໍ ສີຆໍ ສມ຺ມປ຺ປຘາເນ ຠາເວຕີຕິ – ສີຆປຎ຺ຎາ. ສີຆໍ ສີຆໍ ອິທ຺ຘິປາເທ ຠາເວຕີຕິ – ສີຆປຎ຺ຎາ. ສີຆໍ ສີຆໍ ອິນ຺ທ຺ຣິຍານິ ຠາເວຕີຕິ – ສີຆປຎ຺ຎາ. ສີຆໍ ສີຆໍ ພລານິ ຠາເວຕີຕິ – ສີຆປຎ຺ຎາ. ສີຆໍ ສີຆໍ ໂພຊ຺ຌງ຺ເຄ ຠາເວຕີຕິ – ສີຆປຎ຺ຎາ. ສີຆໍ ສີຆໍ ອຣິຍມຄ຺ຄໍ ຠາເວຕີຕິ – ສີຆປຎ຺ຎາ. ສີຆໍ ສີຆໍ ສາມຎ຺ຎຜລານິ ສຈ຺ຉິກໂຣຕີຕິ – ສີຆປຎ຺ຎາ. ສີຆໍ ສີຆໍ ອຠິຎ຺ຎາໂຍ ປຏິວິຊ຺ຌຕີຕິ – ສີຆປຎ຺ຎາ. ສີຆໍ ສີຆໍ ປຣມຕ຺ຖໍ ນິພ຺ພານໍ ສຈ຺ຉິກໂຣຕີຕິ – ສີຆປຎ຺ຎາ. ສີຆປຎ຺ຎຕາຍ ສໍວຕ຺ຕນ຺ຕີຕິ – ອຍໍ ສີຆປຎ຺ຎາ.

ລຫຸປຎ຺ຎຕາຍ ສໍວຕ຺ຕນ຺ຕີຕິ ກຕມາ ລຫຸປຎ຺ຎາ? ລຫຸໍ ລຫຸໍ ສີລານິ ປຣິປູເຣຕີຕິ – ລຫຸປຎ຺ຎາ. ລຫຸໍ ລຫຸໍ ອິນ຺ທ຺ຣິຍສໍວຣໍ ປຣິປູເຣຕີຕິ – ລຫຸປຎ຺ຎາ. ລຫຸໍ ລຫຸໍ ໂຠຊເນ ມຕ຺ຕຎ຺ຎຸຕໍ ປຣິປູເຣຕີຕິ – ລຫຸປຎ຺ຎາ. ລຫຸໍ ລຫຸໍ ຊາຄຣິຍານຸໂຍຄໍ ປຣິປູເຣຕີຕິ – ລຫຸປຎ຺ຎາ. ລຫຸໍ ລຫຸໍ ສີລກ຺ຂນ຺ຘໍ …ເປ… ສມາຘິກ຺ຂນ຺ຘໍ … ປຎ຺ຎາກ຺ຂນ຺ຘໍ… ວິມຸຕ຺ຕິກ຺ຂນ຺ຘໍ… ວິມຸຕ຺ຕິຎາຓທສ຺ສນກ຺ຂນ຺ຘໍ ປຣິປູເຣຕີຕິ – ລຫຸປຎ຺ຎາ. ລຫຸໍ ລຫຸໍ ຐານາຏ຺ຐານານິ ປຏິວິຊ຺ຌຕີຕິ – ລຫຸປຎ຺ຎາ. ລຫຸໍ ລຫຸໍ ວິຫາຣສມາປຕ຺ຕິໂຍ ປຣິປູເຣຕີຕິ – ລຫຸປຎ຺ຎາ. ລຫຸໍ ລຫຸໍ ອຣິຍສຈ຺ຈານິ ປຏິວິຊ຺ຌຕີຕິ – ລຫຸປຎ຺ຎາ. ລຫຸໍ ລຫຸໍ ສຕິປຏ຺ຐາເນ ຠາເວຕີຕິ – ລຫຸປຎ຺ຎາ. ລຫຸໍ ລຫຸໍ ສມ຺ມປ຺ປຘາເນ ຠາເວຕີຕິ – ລຫຸປຎ຺ຎາ. ລຫຸໍ ລຫຸໍ ອິທ຺ຘິປາເທ ຠາເວຕີຕິ – ລຫຸປຎ຺ຎາ. ລຫຸໍ ລຫຸໍ ອິນ຺ທ຺ຣິຍານິ ຠາເວຕີຕິ – ລຫຸປຎ຺ຎາ. ລຫຸໍ ລຫຸໍ ພລານິ ຠາເວຕີຕິ – ລຫຸປຎ຺ຎາ. ລຫຸໍ ລຫຸໍ ໂພຊ຺ຌງ຺ເຄ ຠາເວຕີຕິ – ລຫຸປຎ຺ຎາ. ລຫຸໍ ລຫຸໍ ອຣິຍມຄ຺ຄໍ ຠາເວຕີຕິ – ລຫຸປຎ຺ຎາ. ລຫຸໍ ລຫຸໍ ສາມຎ຺ຎຜລານິ ສຈ຺ຉິກໂຣຕີຕິ – ລຫຸປຎ຺ຎາ. ລຫຸໍ ລຫຸໍ ອຠິຎ຺ຎາໂຍ ປຏິວິຊ຺ຌຕີຕິ – ລຫຸປຎ຺ຎາ. ລຫຸໍ ລຫຸໍ ປຣມຕ຺ຖໍ ນິພ຺ພານໍ ສຈ຺ຉິກໂຣຕີຕິ – ລຫຸປຎ຺ຎາ. ລຫຸປຎ຺ຎຕາຍ ສໍວຕ຺ຕນ຺ຕີຕິ – ອຍໍ ລຫຸປຎ຺ຎາ.

ຫາສປຎ຺ຎຕາຍ ສໍວຕ຺ຕນ຺ຕີຕິ ກຕມາ ຫາສປຎ຺ຎາ? ອິເຘກຈ຺ໂຈ ຫາສພຫຸໂລ ເວທພຫຸໂລ ຕຸຏ຺ຐິພຫຸໂລ ປາໂມຊ຺ຊພຫຸໂລ ສີລານິ ປຣິປູເຣຕີຕິ – ຫາສປຎ຺ຎາ. ຫາສພຫຸໂລ ເວທພຫຸໂລ ຕຸຏ຺ຐິພຫຸໂລ ປາໂມຊ຺ຊພຫຸໂລ ອິນ຺ທ຺ຣິຍສໍວຣໍ ປຣິປູເຣຕີຕິ – ຫາສປຎ຺ຎາ. ຫາສພຫຸໂລ ເວທພຫຸໂລ ຕຸຏ຺ຐິພຫຸໂລ ປາໂມຊ຺ຊພຫຸໂລ ໂຠຊເນ ມຕ຺ຕຎ຺ຎຸຕໍ ປຣິປູເຣຕີຕິ – ຫາສປຎ຺ຎາ. ຫາສພຫຸໂລ ເວທພຫຸໂລ ຕຸຏ຺ຐິພຫຸໂລ ປາໂມຊ຺ຊພຫຸໂລ ຊາຄຣິຍານຸໂຍຄໍ ປຣິປູເຣຕີຕິ – ຫາສປຎ຺ຎາ. ຫາສພຫຸໂລ ເວທພຫຸໂລ ຕຸຏ຺ຐິພຫຸໂລ ປາໂມຊ຺ຊພຫຸໂລ ສີລກ຺ຂນ຺ຘໍ…ເປ… ສມາຘິກ຺ຂນ຺ຘໍ… ປຎ຺ຎາກ຺ຂນ຺ຘໍ… ວິມຸຕ຺ຕິກ຺ຂນ຺ຘໍ… ວິມຸຕ຺ຕິຎາຓທສ຺ສນກ຺ຂນ຺ຘໍ ປຣິປູເຣຕີຕິ…ເປ… ຐານາຏ຺ຐານານິ ປຏິວິຊ຺ຌຕີຕິ… ວິຫາຣສມາປຕ຺ຕິໂຍ ປຣິປູເຣຕີຕິ … ອຣິຍສຈ຺ຈານິ ປຏິວິຊ຺ຌຕີຕິ… ສຕິປຏ຺ຐາເນ ຠາເວຕີຕິ… ສມ຺ມປ຺ປຘາເນ ຠາເວຕີຕິ… ອິທ຺ຘິປາເທ ຠາເວຕີຕິ… ອິນ຺ທ຺ຣິຍານິ ຠາເວຕີຕິ… ພລານິ ຠາເວຕີຕິ… ໂພຊ຺ຌງ຺ເຄ ຠາເວຕີຕິ … ອຣິຍມຄ຺ຄໍ ຠາເວຕີຕິ…ເປ… ສາມຎ຺ຎຜລານິ ສຈ຺ຉິກໂຣຕີຕິ – ຫາສປຎ຺ຎາ. ຫາສພຫຸໂລ ເວທພຫຸໂລ ຕຸຏ຺ຐິພຫຸໂລ ປາໂມຊ຺ຊພຫຸໂລ ອຠິຎ຺ຎາໂຍ ປຏິວິຊ຺ຌຕີຕິ – ຫາສປຎ຺ຎາ. ຫາສພຫຸໂລ ເວທພຫຸໂລ ຕຸຏ຺ຐິພຫຸໂລ ປາໂມຊ຺ຊພຫຸໂລ ປຣມຕ຺ຖໍ ນິພ຺ພານໍ ສຈ຺ຉິກໂຣຕີຕິ – ຫາສປຎ຺ຎາ. ຫາສປຎ຺ຎຕາຍ ສໍວຕ຺ຕນ຺ຕີຕິ – ອຍໍ ຫາສປຎ຺ຎາ.

໗. ຊວນປຎ຺ຎຕາຍ ສໍວຕ຺ຕນ຺ຕີຕິ ກຕມາ ຊວນປຎ຺ຎາ? ຍໍ ກິຎ຺ຈິ ຣູປໍ ອຕີຕານາຄຕປຈ຺ຈຸປ຺ປນ຺ນໍ ອຊ຺ຌຕ຺ຕໍ ວາ ພຫິທ຺ຘາ ວາ ໂອຬາຣິກໍ ວາ ສຸຂຸມໍ ວາ ຫີນໍ ວາ ປຓີຕໍ ວາ ຍໍ ທູເຣ ສນ຺ຕິເກ ວາ, ສພ຺ພໍ ຣູປໍ ອນິຈ຺ຈໂຕ ຂິປ຺ປໍ ຊວຕີຕິ – ຊວນປຎ຺ຎາ. ທຸກ຺ຂໂຕ ຂິປ຺ປໍ ຊວຕີຕິ – ຊວນປຎ຺ຎາ. ອນຕ຺ຕໂຕ ຂິປ຺ປໍ ຊວຕີຕິ – ຊວນປຎ຺ຎາ. ຍາ ກາຈິ ເວທນາ…ເປ… ຍາ ກາຈິ ສຎ຺ຎາ… ເຍ ເກຈິ ສງ຺ຂາຣາ… ຍໍ ກິຎ຺ຈິ ວິຎ຺ຎາຓໍ ອຕີຕານາຄຕປຈ຺ຈຸປ຺ປນ຺ນໍ ອຊ຺ຌຕ຺ຕໍ ວາ ພຫິທ຺ຘາ ວາ ໂອຬາຣິກໍ ວາ ສຸຂຸມໍ ວາ ຫີນໍ ວາ ປຓີຕໍ ວາ ຍໍ ທູເຣ ສນ຺ຕິເກ ວາ, ສພ຺ພໍ ວິຎ຺ຎາຓໍ ອນິຈ຺ຈໂຕ ຂິປ຺ປໍ ຊວຕີຕິ – ຊວນປຎ຺ຎາ. ທຸກ຺ຂໂຕ ຂິປ຺ປໍ ຊວຕີຕິ – ຊວນປຎ຺ຎາ. ອນຕ຺ຕໂຕ ຂິປ຺ປໍ ຊວຕີຕິ – ຊວນປຎ຺ຎາ. ຈກ຺ຂຸ…ເປ… ຊຣາມຣຓໍ ອຕີຕານາຄຕປຈ຺ຈຸປ຺ປນ຺ນໍ ອນິຈ຺ຈໂຕ ຂິປ຺ປໍ ຊວຕີຕິ – ຊວນປຎ຺ຎາ. ທຸກ຺ຂໂຕ ຂິປ຺ປໍ ຊວຕີຕິ – ຊວນປຎ຺ຎາ. ອນຕ຺ຕໂຕ ຂິປ຺ປໍ ຊວຕີຕິ – ຊວນປຎ຺ຎາ.

ຣູປໍ ອຕີຕານາຄຕປຈ຺ຈຸປ຺ປນ຺ນໍ ອນິຈ຺ຈໍ ຂຍຏ຺ເຐນ ທຸກ຺ຂໍ ຠຍຏ຺ເຐນ ອນຕ຺ຕາ ອສາຣກຏ຺ເຐນາຕິ ຕຸລຍິຕ຺ວາ ຕີຣຍິຕ຺ວາ ວິຠາວຍິຕ຺ວາ ວິຠູຕໍ ກຕ຺ວາ ຣູປນິໂຣເຘ ນິພ຺ພາເນ ຂິປ຺ປໍ ຊວຕີຕິ – ຊວນປຎ຺ຎາ. ເວທນາ…ເປ… ສຎ຺ຎາ… ສງ຺ຂາຣາ… ວິຎ຺ຎາຓໍ… ຈກ຺ຂຸ…ເປ… ຊຣາມຣຓໍ ອຕີຕານາຄຕປຈ຺ຈຸປ຺ປນ຺ນໍ ອນິຈ຺ຈໍ ຂຍຏ຺ເຐນ ທຸກ຺ຂໍ ຠຍຏ຺ເຐນ ອນຕ຺ຕາ ອສາຣກຏ຺ເຐນາຕິ ຕຸລຍິຕ຺ວາ ຕີຣຍິຕ຺ວາ ວິຠາວຍິຕ຺ວາ ວິຠູຕໍ ກຕ຺ວາ ຊຣາມຣຓນິໂຣເຘ [ຊຣາມຣຓໍ ຣູປນິໂຣເຘ (ສ຺ຍາ.)] ນິພ຺ພາເນ ຂິປ຺ປໍ ຊວຕີຕິ – ຊວນປຎ຺ຎາ.

ຣູປໍ ອຕີຕານາຄຕປຈ຺ຈຸປ຺ປນ຺ນໍ ອນິຈ຺ຈໍ ສງ຺ຂຕໍ ປຏິຈ຺ຈສມຸປ຺ປນ຺ນໍ ຂຍຘມ຺ມໍ ວຍຘມ຺ມໍ ວິຣາຄຘມ຺ມໍ ນິໂຣຘຘມ຺ມນ຺ຕິ ຕຸລຍິຕ຺ວາ ຕີຣຍິຕ຺ວາ ວິຠາວຍິຕ຺ວາ ວິຠູຕໍ ກຕ຺ວາ ຣູປນິໂຣເຘ ນິພ຺ພາເນ ຂິປ຺ປໍ ຊວຕີຕິ – ຊວນປຎ຺ຎາ. ເວທນາ…ເປ… ສຎ຺ຎາ… ສງ຺ຂາຣາ… ວິຎ຺ຎາຓໍ… ຈກ຺ຂຸ…ເປ… ຊຣາມຣຓໍ ອຕີຕານາຄຕປຈ຺ຈຸປ຺ປນ຺ນໍ ອນິຈ຺ຈໍ ສງ຺ຂຕໍ ປຏິຈ຺ຈສມຸປ຺ປນ຺ນໍ ຂຍຘມ຺ມໍ ວຍຘມ຺ມໍ ວິຣາຄຘມ຺ມໍ ນິໂຣຘຘມ຺ມນ຺ຕິ ຕຸລຍິຕ຺ວາ ຕີຣຍິຕ຺ວາ ວິຠາວຍິຕ຺ວາ ວິຠູຕໍ ກຕ຺ວາ ຊຣາມຣຓນິໂຣເຘ ນິພ຺ພາເນ ຂິປ຺ປໍ ຊວຕີຕິ – ຊວນປຎ຺ຎາ. ຊວນປຎ຺ຎຕາຍ ສໍວຕ຺ຕນ຺ຕີຕິ – ອຍໍ ຊວນປຎ຺ຎາ.

ຕິກ຺ຂປຎ຺ຎຕາຍ ສໍວຕ຺ຕນ຺ຕີຕິ ກຕມາ ຕິກ຺ຂປຎ຺ຎາ? ຂິປ຺ປໍ ກິເລເສ ຉິນ຺ທຕີຕິ – ຕິກ຺ຂປຎ຺ຎາ. ອຸປ຺ປນ຺ນໍ ກາມວິຕກ຺ກໍ ນາຘິວາເສຕິ ປຊຫຕິ ວິໂນເທຕິ ພ຺ຍນ຺ຕີກໂຣຕິ [ພ຺ຍນ຺ຕິໍ ກໂຣຕິ (ກ.)] ອນຠາວໍ ຄເມຕີຕິ – ຕິກ຺ຂປຎ຺ຎາ. ອຸປ຺ປນ຺ນໍ ພ຺ຍາປາທວິຕກ຺ກໍ ນາຘິວາເສຕິ ປຊຫຕິ ວິໂນເທຕິ ພ຺ຍນ຺ຕີກໂຣຕິ ອນຠາວໍ ຄເມຕີຕິ – ຕິກ຺ຂປຎ຺ຎາ. ອຸປ຺ປນ຺ນໍ ວິຫິໍສາວິຕກ຺ກໍ ນາຘິວາເສຕິ…ເປ… ອຸປ຺ປນ຺ນຸປ຺ປນ຺ເນ ປາປເກ ອກຸສເລ ຘມ຺ເມ ນາຘິວາເສຕິ ປຊຫຕິ ວິໂນເທຕິ ພ຺ຍນ຺ຕີກໂຣຕິ ອນຠາວໍ ຄເມຕີຕິ – ຕິກ຺ຂປຎ຺ຎາ. ອຸປ຺ປນ຺ນໍ ຣາຄໍ ນາຘິວາເສຕິ ປຊຫຕິ ວິໂນເທຕິ ພ຺ຍນ຺ຕີກໂຣຕິ ອນຠາວໍ ຄເມຕີຕິ – ຕິກ຺ຂປຎ຺ຎາ. ອຸປ຺ປນ຺ນໍ ໂທສໍ…ເປ… ອຸປ຺ປນ຺ນໍ ໂມຫໍ … ອຸປ຺ປນ຺ນໍ ໂກຘໍ… ອຸປ຺ປນ຺ນໍ ອຸປນາຫໍ… ມກ຺ຂໍ… ປຬາສໍ… ອິສ຺ສໍ… ມຈ຺ຉຣິຍໍ… ມາຍໍ… ສາເຐຍ຺ຍໍ… ຖມ຺ຠໍ… ສາຣມ຺ຠໍ… ມານໍ… ອຕິມານໍ… ມທໍ… ປມາທໍ… ສພ຺ເພ ກິເລເສ… ສພ຺ເພ ທຸຈ຺ຈຣິເຕ… ສພ຺ເພ ອຠິສງ຺ຂາເຣ…ເປ… ສພ຺ເພ ຠວຄາມິກມ຺ເມ ນາຘິວາເສຕິ ປຊຫຕິ ວິໂນເທຕິ ພ຺ຍນ຺ຕີກໂຣຕິ ອນຠາວໍ ຄເມຕີຕິ – ຕິກ຺ຂປຎ຺ຎາ. ເອກສ຺ມິໍ ອາສເນ ຈຕ຺ຕາໂຣ ຈ ອຣິຍມຄ຺ຄາ ຈຕ຺ຕາຣິ ຈ ສາມຎ຺ຎຜລານິ ຈຕສ຺ໂສ ປຏິສມ຺ຠິທາໂຍ ຉ ອຠິຎ຺ຎາໂຍ ອຘິຄຕາ ໂຫນ຺ຕິ ສຈ຺ຉິກຕາ ຜສ຺ສິຕາ ປຎ຺ຎາຍາຕິ – ຕິກ຺ຂປຎ຺ຎາ. ຕິກ຺ຂປຎ຺ຎຕາຍ ສໍວຕ຺ຕນ຺ຕີຕິ – ອຍໍ ຕິກ຺ຂປຎ຺ຎາ.

ນິພ຺ເພຘິກປຎ຺ຎຕາຍ ສໍວຕ຺ຕນ຺ຕີຕິ ກຕມາ ນິພ຺ເພຘິກປຎ຺ຎາ? ອິເຘກຈ຺ໂຈ ສພ຺ພສງ຺ຂາເຣສຸ ອຸພ຺ເພຄພຫຸໂລ ໂຫຕິ ອຸຕ຺ຕາສພຫຸໂລ ອຸກ຺ກຓ຺ຐນພຫຸໂລ ອຣຕິພຫຸໂລ ອນຠິຣຕິພຫຸໂລ. ພຫິມຸໂຂ ນ ຣມຕິ ສພ຺ພສງ຺ຂາເຣສຸ. ອນິພ຺ພິທ຺ຘປຸພ຺ພໍ ອປ຺ປທາລິຕປຸພ຺ພໍ ໂລຠກ຺ຂນ຺ຘໍ ນິພ຺ພິຊ຺ຌຕິ ປທາເລຕີຕິ – ນິພ຺ເພຘິກປຎ຺ຎາ. ອນິພ຺ພິທ຺ຘປຸພ຺ພໍ ອປ຺ປທາລິຕປຸພ຺ພໍ ໂທສກ຺ຂນ຺ຘໍ ນິພ຺ພິຊ຺ຌຕິ ປທາເລຕີຕິ – ນິພ຺ເພຘິກປຎ຺ຎາ. ອນິພ຺ພິທ຺ຘປຸພ຺ພໍ ອປ຺ປທາລິຕປຸພ຺ພໍ ໂມຫກ຺ຂນ຺ຘໍ ນິພ຺ພິຊ຺ຌຕິ ປທາເລຕີຕິ – ນິພ຺ເພຘິກປຎ຺ຎາ. ອນິພ຺ພິທ຺ຘປຸພ຺ພໍ ອປ຺ປທາລິຕປຸພ຺ພໍ ໂກຘໍ…ເປ… ອຸປນາຫໍ… ມກ຺ຂໍ… ປຬາສໍ… ອິສ຺ສໍ… ມຈ຺ຉຣິຍໍ… ມາຍໍ… ສາເຐຍ຺ຍໍ… ຖມ຺ຠໍ… ສາຣມ຺ຠໍ… ມານໍ… ອຕິມານໍ… ມທໍ… ປມາທໍ… ສພ຺ເພ ກິເລເສ… ສພ຺ເພ ທຸຈ຺ຈຣິເຕ… ສພ຺ເພ ອຠິສງ຺ຂາເຣ…ເປ… ສພ຺ເພ ຠວຄາມິກມ຺ເມ ນິພ຺ພິຊ຺ຌຕິ ປທາເລຕີຕິ – ນິພ຺ເພຘິກປຎ຺ຎາ. ນິພ຺ເພຘິກປຎ຺ຎຕາຍ ສໍວຕ຺ຕນ຺ຕີຕິ – ອຍໍ ນິພ຺ເພຘິກປຎ຺ຎາ.

ອິມາ ໂສຬສ ປຎ຺ຎາໂຍ. ອິມາຫິ ໂສຬສຫິ ປຎ຺ຎາຫິ ສມນ຺ນາຄໂຕ ປຸຄ຺ຄໂລ ປຏິສມ຺ຠິທປ຺ປຕ຺ໂຕ.

໒. ປຸຄ຺ຄລວິເສສນິທ຺ເທໂສ

໘. ທ຺ເວ ປຸຄ຺ຄລາ ປຏິສມ຺ຠິທປ຺ປຕ຺ຕາ – ເອໂກ ປຸພ຺ພໂຍຄສມ຺ປນ຺ໂນ, ເອໂກ ນ ປຸພ຺ພໂຍຄສມ຺ປນ຺ໂນ. ໂຍ ປຸພ຺ພໂຍຄສມ຺ປນ຺ໂນ ໂສ ເຕນ ອຕິເຣໂກ ໂຫຕິ, ອຘິໂກ ໂຫຕິ, ວິເສໂສ ໂຫຕິ. ຕສ຺ສ ຎາຓໍ ປຠິຊ຺ຊຕິ.

ທ຺ເວ ປຸຄ຺ຄລາ ປຏິສມ຺ຠິທປ຺ປຕ຺ຕາ, ທ຺ເວປິ ປຸພ຺ພໂຍຄສມ຺ປນ຺ນາ – ເອໂກ ພຫຸສ຺ສຸໂຕ, ເອໂກ ນ ພຫຸສ຺ສຸໂຕ. ໂຍ ພຫຸສ຺ສຸໂຕ, ໂສ ເຕນ ອຕິເຣໂກ ໂຫຕິ, ອຘິໂກ ໂຫຕິ, ວິເສໂສ ໂຫຕິ. ຕສ຺ສ ຎາຓໍ ປຠິຊ຺ຊຕິ.

ທ຺ເວ ປຸຄ຺ຄລາ ປຏິສມ຺ຠິທປ຺ປຕ຺ຕາ, ທ຺ເວປິ ປຸພ຺ພໂຍຄສມ຺ປນ຺ນາ, ທ຺ເວປິ ພຫຸສ຺ສຸຕາ – ເອໂກ ເທສນາພຫຸໂລ, ເອໂກ ນ ເທສນາພຫຸໂລ. ໂຍ ເທສນາພຫຸໂລ, ໂສ ເຕນ ອຕິເຣໂກ ໂຫຕິ, ອຘິໂກ ໂຫຕິ, ວິເສໂສ ໂຫຕິ. ຕສ຺ສ ຎາຓໍ ປຠິຊ຺ຊຕິ.

ທ຺ເວ ປຸຄ຺ຄລາ ປຏິສມ຺ຠິທປ຺ປຕ຺ຕາ, ທ຺ເວປິ ປຸພ຺ພໂຍຄສມ຺ປນ຺ນາ, ທ຺ເວປິ ພຫຸສ຺ສຸຕາ, ທ຺ເວປິ ເທສນາພຫຸລາ – ເອໂກ ຄຣູປນິສ຺ສິໂຕ, ເອໂກ ນ ຄຣູປນິສ຺ສິໂຕ. ໂຍ ຄຣູປນິສ຺ສິໂຕ, ໂສ ເຕນ ອຕິເຣໂກ ໂຫຕິ, ອຘິໂກ ໂຫຕິ, ວິເສໂສ ໂຫຕິ. ຕສ຺ສ ຎາຓໍ ປຠິຊ຺ຊຕິ.

ທ຺ເວ ປຸຄ຺ຄລາ ປຏິສມ຺ຠິທປ຺ປຕ຺ຕາ, ທ຺ເວປິ ປຸພ຺ພໂຍຄສມ຺ປນ຺ນາ, ທ຺ເວປິ ພຫຸສ຺ສຸຕາ, ທ຺ເວປິ ເທສນາພຫຸລາ, ທ຺ເວປິ ຄຣູປນິສ຺ສິຕາ – ເອໂກ ວິຫາຣພຫຸໂລ, ເອໂກ ນ ວິຫາຣພຫຸໂລ. ໂຍ ວິຫາຣພຫຸໂລ, ໂສ ເຕນ ອຕິເຣໂກ ໂຫຕິ, ອຘິໂກ ໂຫຕິ, ວິເສໂສ ໂຫຕິ. ຕສ຺ສ ຎາຓໍ ປຠິຊ຺ຊຕິ.

ທ຺ເວ ປຸຄ຺ຄລາ ປຏິສມ຺ຠິທປ຺ປຕ຺ຕາ, ທ຺ເວປິ ປຸພ຺ພໂຍຄສມ຺ປນ຺ນາ, ທ຺ເວປິ ພຫຸສ຺ສຸຕາ, ທ຺ເວປິ ເທສນາພຫຸລາ, ທ຺ເວປິ ຄຣູປນິສ຺ສິຕາ, ທ຺ເວປິ ວິຫາຣພຫຸລາ – ເອໂກ ປຈ຺ຈເວກ຺ຂຓາພຫຸໂລ, ເອໂກ ນ ປຈ຺ຈເວກ຺ຂຓາພຫຸໂລ. ໂຍ ປຈ຺ຈເວກ຺ຂຓາພຫຸໂລ, ໂສ ເຕນ ອຕິເຣໂກ ໂຫຕິ, ອຘິໂກ ໂຫຕິ, ວິເສໂສ ໂຫຕິ. ຕສ຺ສ ຎາຓໍ ປຠິຊ຺ຊຕິ.

ທ຺ເວ ປຸຄ຺ຄລາ ປຏິສມ຺ຠິທປ຺ປຕ຺ຕາ, ທ຺ເວປິ ປຸພ຺ພໂຍຄສມ຺ປນ຺ນາ, ທ຺ເວປິ ພຫຸສ຺ສຸຕາ, ທ຺ເວປິ ເທສນາພຫຸລາ, ທ຺ເວປິ ຄຣູປນິສ຺ສິຕາ, ທ຺ເວປິ ວິຫາຣພຫຸລາ, ທ຺ເວປິ ປຈ຺ຈເວກ຺ຂຓາພຫຸລາ – ເອໂກ ເສຂປຏິສມ຺ຠິທປ຺ປຕ຺ໂຕ, ເອໂກ ອເສຂປຏິສມ຺ຠິທປ຺ປຕ຺ໂຕ. ໂຍ ອເສຂປຏິສມ຺ຠິທປ຺ປຕ຺ໂຕ, ໂສ ເຕນ ອຕິເຣໂກ ໂຫຕິ, ອຘິໂກ ໂຫຕິ, ວິເສໂສ ໂຫຕິ. ຕສ຺ສ ຎາຓໍ ປຠິຊ຺ຊຕິ.

ທ຺ເວ ປຸຄ຺ຄລາ ປຏິສມ຺ຠິທປ຺ປຕ຺ຕາ, ທ຺ເວປິ ປຸພ຺ພໂຍຄສມ຺ປນ຺ນາ, ທ຺ເວປິ ພຫຸສ຺ສຸຕາ, ທ຺ເວປິ ເທສນາພຫຸລາ, ທ຺ເວປິ ຄຣູປນິສ຺ສິຕາ, ທ຺ເວປິ ວິຫາຣພຫຸລາ, ທ຺ເວປິ ປຈ຺ຈເວກ຺ຂຓາພຫຸລາ, ທ຺ເວປິ ອເສຂປຏິສມ຺ຠິທປ຺ປຕ຺ຕາ – ເອໂກ ສາວກປາຣມິປ຺ປຕ຺ໂຕ, ເອໂກ ນ ສາວກປາຣມິປ຺ປຕ຺ໂຕ. ໂຍ ສາວກປາຣມິປ຺ປຕ຺ໂຕ, ໂສ ເຕນ ອຕິເຣໂກ ໂຫຕິ, ອຘິໂກ ໂຫຕິ, ວິເສໂສ ໂຫຕິ. ຕສ຺ສ ຎາຓໍ ປຠິຊ຺ຊຕິ.

ທ຺ເວ ປຸຄ຺ຄລາ ປຏິສມ຺ຠິທປ຺ປຕ຺ຕາ, ທ຺ເວປິ ປຸພ຺ພໂຍຄສມ຺ປນ຺ນາ, ທ຺ເວປິ ພຫຸສ຺ສຸຕາ, ທ຺ເວປິ ເທສນາພຫຸລາ, ທ຺ເວປິ ຄຣູປນິສ຺ສິຕາ, ທ຺ເວປິ ວິຫາຣພຫຸລາ, ທ຺ເວປິ ປຈ຺ຈເວກ຺ຂຓາພຫຸລາ, ທ຺ເວປິ ອເສຂປຏິສມ຺ຠິທປ຺ປຕ຺ຕາ – ເອໂກ ສາວກປາຣມິປ຺ປຕ຺ໂຕ, ເອໂກ ປຈ຺ເຈກສມ຺ພຸທ຺ໂຘ. ໂຍ ປຈ຺ເຈກສມ຺ພຸທ຺ໂຘ, ໂສ ເຕນ ອຕິເຣໂກ ໂຫຕິ, ອຘິໂກ ໂຫຕິ, ວິເສໂສ ໂຫຕິ. ຕສ຺ສ ຎາຓໍ ປຠິຊ຺ຊຕິ.

ປຈ຺ເຈກພຸທ຺ຘຎ຺ຈ ສເທວກຎ຺ຈ ໂລກໍ ອຸປາທາຍ ຕຖາຄໂຕ ອຣຫໍ ສມ຺ມາສມ຺ພຸທ຺ໂຘ ອຄ຺ໂຄ ປຏິສມ຺ຠິທປ຺ປຕ຺ໂຕ ປຎ຺ຎາປເຠທກຸສໂລ ປຠິນ຺ນຎາໂຓ ອຘິຄຕປຏິສມ຺ຠິໂທ ຈຕຸເວສາຣຊ຺ຊປ຺ປຕ຺ໂຕ ທສພລຘາຣີ ປຸຣິສາສໂຠ ປຸຣິສສີໂຫ…ເປ… ເຍປິ ເຕ ຂຕ຺ຕິຍປຓ຺ຑິຕາ ພ຺ຣາຫ຺ມຓປຓ຺ຑິຕາ ຄຫປຕິປຓ຺ຑິຕາ ສມຓປຓ຺ຑິຕາ ນິປຸຓາ ກຕປຣປ຺ປວາທາ ວາລເວຘິຣູປາ ໂວຠິນ຺ທນ຺ຕາ ມຎ຺ເຎ ຈຣນ຺ຕິ ປຎ຺ຎາຄເຕນ ທິຏ຺ຐິຄຕານິ, ເຕ ປຎ຺ຫໍ ອຠິສງ຺ຂຣິຕ຺ວາ ອຠິສງ຺ຂຣິຕ຺ວາ ຕຖາຄຕໍ ອຸປສງ຺ກມິຕ຺ວາ ປຸຈ຺ຉນ຺ຕິ ຄູຬ຺ຫານິ ຈ ປຏິຈ຺ຉນ຺ນານິ ຈ. ກຖິຕາ ວິສຊ຺ຊິຕາ ຈ ເຕ ປຎ຺ຫາ ຠຄວຕາ ໂຫນ຺ຕິ ນິທ຺ທິຏ຺ຐກາຣຓາ, ອຸປກ຺ຂິຕ຺ຕກາ ຈ ເຕ ຠຄວໂຕ ສມ຺ປຊ຺ຊນ຺ຕິ. ອຖ ໂຂ ຠຄວາ ຕຕ຺ຖ ອຕິໂຣຈຕິ, ຍທິທໍ ປຎ຺ຎາຍາຕິ ອຄ຺ໂຄ ປຏິສມ຺ຠິທປ຺ປຕ຺ໂຕຕິ.

ມຫາປຎ຺ຎາກຖາ ນິຏ຺ຐິຕາ.