໓. ອິທ຺ຘິປາທວາໂຣ

໓໒. ‘‘ອຍໍ ຉນ຺ທສມາຘິປຘານສງ຺ຂາຣສມນ຺ນາຄໂຕ ອິທ຺ຘິປາໂທຕິ ເມ, ຠິກ຺ຂເວ, ປຸພ຺ເພ ອນນຸສ຺ສຸເຕສຸ ຘມ຺ເມສຸ ຈກ຺ຂຸໍ ອຸທປາທິ…ເປ… ອາໂລໂກ ອຸທປາທິ. ໂສ ໂຂ ປນາຍໍ ຉນ຺ທສມາຘິປຘານສງ຺ຂາຣສມນ຺ນາຄໂຕ ອິທ຺ຘິປາໂທ ຠາເວຕພ຺ໂພຕິ ເມ, ຠິກ຺ຂເວ…ເປ… ຠາວິໂຕຕິ ເມ, ຠິກ຺ຂເວ, ປຸພ຺ເພ ອນນຸສ຺ສຸເຕສຸ ຘມ຺ເມສຸ ຈກ຺ຂຸໍ ອຸທປາທິ…ເປ… ອາໂລໂກ ອຸທປາທິ.

‘‘ອຍໍ ວີຣິຍສມາຘິ…ເປ… ອຍໍ ຈິຕ຺ຕສມາຘິ…ເປ… ອຍໍ ວີມໍສາສມາຘິປຘານສງ຺ຂາຣສມນ຺ນາຄໂຕ ອິທ຺ຘິປາໂທຕິ ເມ, ຠິກ຺ຂເວ, ປຸພ຺ເພ ອນນຸສ຺ສຸເຕສຸ ຘມ຺ເມສຸ ຈກ຺ຂຸໍ ອຸທປາທິ…ເປ… ອາໂລໂກ ອຸທປາທິ. ໂສ ໂຂ ປນາຍໍ ວີມໍສາສມາຘິປຘານສງ຺ຂາຣສມນ຺ນາຄໂຕ ອິທ຺ຘິປາໂທ ຠາເວຕພ຺ໂພຕິ ເມ, ຠິກ຺ຂເວ, ປຸພ຺ເພ ອນນຸສ຺ສຸເຕສຸ ຘມ຺ເມສຸ ຈກ຺ຂຸໍ ອຸທປາທິ…ເປ… ອາໂລໂກ ອຸທປາທິ’’.

[ກ] ‘‘‘ອຍໍ ຉນ຺ທສມາຘິປຘານສງ຺ຂາຣສມນ຺ນາຄໂຕ ອິທ຺ຘິປາໂທ’ຕິ ປຸພ຺ເພ ອນນຸສ຺ສຸເຕສຸ ຘມ຺ເມສຸ ຈກ຺ຂຸໍ ອຸທປາທິ…ເປ… ອາໂລໂກ ອຸທປາທິ…ເປ… ໂສ ໂຂ ປນາຍໍ ຉນ຺ທສມາຘິປຘານສງ຺ຂາຣສມນ຺ນາຄໂຕ ອິທ຺ຘິປາໂທ ຠາເວຕພ຺ໂພຕິ…ເປ… ຠາວິໂຕຕິ ປຸພ຺ເພ ອນນຸສ຺ສຸເຕສຸ ຘມ຺ເມສຸ ຈກ຺ຂຸໍ ອຸທປາທິ, ຎາຓໍ ອຸທປາທິ, ປຎ຺ຎາ ອຸທປາທິ, ວິຊ຺ຊາ ອຸທປາທິ, ອາໂລໂກ ອຸທປາທິ’’.

ຈກ຺ຂຸໍ ອຸທປາທີຕິ – ເກນຏ຺ເຐນ? ຎາຓໍ ອຸທປາທີຕິ – ເກນຏ຺ເຐນ? ປຎ຺ຎາ ອຸທປາທີຕິ – ເກນຏ຺ເຐນ? ວິຊ຺ຊາ ອຸທປາທີຕິ – ເກນຏ຺ເຐນ? ອາໂລໂກ ອຸທປາທີຕິ – ເກນຏ຺ເຐນ? ຈກ຺ຂຸໍ ອຸທປາທີຕິ – ທສ຺ສນຏ຺ເຐນ. ຎາຓໍ ອຸທປາທີຕິ – ຎາຕຏ຺ເຐນ. ປຎ຺ຎາ ອຸທປາທີຕິ – ປຊານນຏ຺ເຐນ. ວິຊ຺ຊາ ອຸທປາທີຕິ – ປຏິເວຘຏ຺ເຐນ. ອາໂລໂກ ອຸທປາທີຕິ – ໂອຠາສຏ຺ເຐນ.

ຈກ຺ຂຸໍ ຘມ຺ໂມ, ຎາຓໍ ຘມ຺ໂມ, ປຎ຺ຎາ ຘມ຺ໂມ, ວິຊ຺ຊາ ຘມ຺ໂມ, ອາໂລໂກ ຘມ຺ໂມ. ອິເມ ປຎ຺ຈ ຘມ຺ມາ ຘມ຺ມປຏິສມ຺ຠິທາຍ ອາຣມ຺ມຓາ ເຈວ ໂຫນ຺ຕິ ໂຄຈຣາ ຈ. ເຍ ຕສ຺ສາ ອາຣມ຺ມຓາ ເຕ ຕສ຺ສາ ໂຄຈຣາ. ເຍ ຕສ຺ສາ ໂຄຈຣາ ເຕ ຕສ຺ສາ ອາຣມ຺ມຓາ. ເຕນ ວຸຈ຺ຈຕິ – ‘‘ຘມ຺ເມສຸ ຎາຓໍ ຘມ຺ມປຏິສມ຺ຠິທາ’’.

ທສ຺ສນຏ຺ໂຐ ອຕ຺ໂຖ, ຎາຕຏ຺ໂຐ ອຕ຺ໂຖ, ປຊານນຏ຺ໂຐ ອຕ຺ໂຖ, ປຏິເວຘຏ຺ໂຐ ອຕ຺ໂຖ, ໂອຠາສຏ຺ໂຐ ອຕ຺ໂຖ. ອິເມ ປຎ຺ຈ ອຕ຺ຖາ ອຕ຺ຖປຏິສມ຺ຠິທາຍ ອາຣມ຺ມຓາ ເຈວ ໂຫນ຺ຕິ ໂຄຈຣາ ຈ. ເຍ ຕສ຺ສາ ອາຣມ຺ມຓາ ເຕ ຕສ຺ສາ ໂຄຈຣາ. ເຍ ຕສ຺ສາ ໂຄຈຣາ ເຕ ຕສ຺ສາ ອາຣມ຺ມຓາ. ເຕນ ວຸຈ຺ຈຕິ – ‘‘ອຕ຺ເຖສຸ ຎາຓໍ ອຕ຺ຖປຏິສມ຺ຠິທາ’’.

ປຎ຺ຈ ຘມ຺ເມ ສນ຺ທສ຺ເສຕຸໍ ພ຺ຍຎ຺ຊນນິຣຸຕ຺ຕາຠິລາປາ, ປຎ຺ຈ ອຕ຺ເຖ ສນ຺ທສ຺ເສຕຸໍ ພ຺ຍຎ຺ຊນນິຣຸຕ຺ຕາຠິລາປາ. ອິມາ ທສ ນິຣຸຕ຺ຕິໂຍ ນິຣຸຕ຺ຕິປຏິສມ຺ຠິທາຍ ອາຣມ຺ມຓາ ເຈວ ໂຫນ຺ຕິ ໂຄຈຣາ ຈ. ເຍ ຕສ຺ສາ ອາຣມ຺ມຓາ ເຕ ຕສ຺ສາ ໂຄຈຣາ. ເຍ ຕສ຺ສາ ໂຄຈຣາ ເຕ ຕສ຺ສາ ອາຣມ຺ມຓາ. ເຕນ ວຸຈ຺ຈຕິ – ‘‘ນິຣຸຕ຺ຕີສຸ ຎາຓໍ ນິຣຸຕ຺ຕິປຏິສມ຺ຠິທາ’’.

ປຎ຺ຈສຸ ຘມ຺ເມສຸ ຎາຓານິ, ປຎ຺ຈສຸ ອຕ຺ເຖສຸ ຎາຓານິ, ທສສຸ ນິຣຸຕ຺ຕີສຸ ຎາຓານິ. ອິມານິ ວີສຕິ ຎາຓານິ ປຏິຠານປຏິສມ຺ຠິທາຍ ອາຣມ຺ມຓາ ເຈວ ໂຫນ຺ຕິ ໂຄຈຣາ ຈ. ເຍ ຕສ຺ສາ ອາຣມ຺ມຓາ ເຕ ຕສ຺ສາ ໂຄຈຣາ. ເຍ ຕສ຺ສາ ໂຄຈຣາ ເຕ ຕສ຺ສາ ອາຣມ຺ມຓາ. ເຕນ ວຸຈ຺ຈຕິ – ‘‘ປຏິຠາເນສຸ ຎາຓໍ ປຏິຠານປຏິສມ຺ຠິທາ’’.

ຉນ຺ທສມາຘິປຘານສງ຺ຂາຣສມນ຺ນາຄເຕ ອິທ຺ຘິປາເທ ປນ຺ນຣສ ຘມ຺ມາ, ປນ຺ນຣສ ອຕ຺ຖາ, ຕິໍສ ນິຣຸຕ຺ຕິໂຍ, ສຏ຺ຐິ ຎາຓານິ.

[ຂ-ຆ] ‘‘ອຍໍ ວີຣິຍສມາຘິ…ເປ… ອຍໍ ຈິຕ຺ຕສມາຘິ…ເປ… ອຍໍ ວີມໍສາສມາຘິປຘານສງ຺ຂາຣສມນ຺ນາຄໂຕ ອິທ຺ຘິປາໂທຕິ ປຸພ຺ເພ ອນນຸສ຺ສຸເຕສຸ ຘມ຺ເມສຸ ຈກ຺ຂຸໍ ອຸທປາທິ…ເປ… ອາໂລໂກ ອຸທປາທິ…ເປ… ໂສ ໂຂ ປນາຍໍ ວີມໍສາສມາຘິປຘານສງ຺ຂາຣສມນ຺ນາຄໂຕ ອິທ຺ຘິປາໂທ ຠາເວຕພ຺ໂພຕິ…ເປ… ຠາວິໂຕຕິ ປຸພ຺ເພ ອນນຸສ຺ສຸເຕສຸ ຘມ຺ເມສຸ ຈກ຺ຂຸໍ ອຸທປາທິ…ເປ… ອາໂລໂກ ອຸທປາທິ…ເປ…’’.

ວີມໍສາສມາຘິປຘານສງ຺ຂາຣສມນ຺ນາຄເຕ ອິທ຺ຘິປາເທ ປນ຺ນຣສ ຘມ຺ມາ, ປນ຺ນຣສ ອຕ຺ຖາ, ຕິໍສ ນິຣຸຕ຺ຕິໂຍ, ສຏ຺ຐິ ຎາຓານິ.

ຈຕູສຸ ອິທ຺ຘິປາເທສຸ ສຏ຺ຐິ ຘມ຺ມາ, ສຏ຺ຐິ ອຕ຺ຖາ, ວີສຕິສຕນິຣຸຕ຺ຕິໂຍ, ຈຕ຺ຕາລີສຎ຺ຈ ທ຺ເວ ຈ ຎາຓສຕານິ.