໓. ໂພຊ຺ຌງ຺ຄວາໂຣ

໒໕. ສພ຺ເພ ສຕ຺ຕາ ອເວຣິໂນ ໂຫນ຺ຕຸ, ເຂມິໂນ ໂຫນ຺ຕຸ, ສຸຂິໂນ ໂຫນ຺ຕູຕິ – ສຕິໍ ອຸປຏ຺ຐາເປຕິ. ສຕິສມ຺ໂພຊ຺ຌງ຺ຄປຣິຠາວິຕາ ໂຫຕິ ເມຕ຺ຕາເຈໂຕວິມຸຕ຺ຕິ.

ສພ຺ເພ ສຕ຺ຕາ ອເວຣິໂນ ໂຫນ຺ຕຸ, ເຂມິໂນ ໂຫນ຺ຕຸ, ສຸຂິໂນ ໂຫນ຺ຕູຕິ – ປຎ຺ຎາຍ ປວິຈິນາຕິ. ຘມ຺ມວິຈຍສມ຺ໂພຊ຺ຌງ຺ຄປຣິຠາວິຕາ ໂຫຕິ ເມຕ຺ຕາເຈໂຕວິມຸຕ຺ຕິ.

ສພ຺ເພ ສຕ຺ຕາ ອເວຣິໂນ ໂຫນ຺ຕຸ, ເຂມິໂນ ໂຫນ຺ຕຸ, ສຸຂິໂນ ໂຫນ຺ຕູຕິ – ວີຣິຍໍ ປຄ຺ຄຓ຺ຫາຕິ. ວີຣິຍສມ຺ໂພຊ຺ຌງ຺ຄປຣິຠາວິຕາ ໂຫຕິ ເມຕ຺ຕາເຈໂຕວິມຸຕ຺ຕິ.

ສພ຺ເພ ສຕ຺ຕາ ອເວຣິໂນ ໂຫນ຺ຕຸ, ເຂມິໂນ ໂຫນ຺ຕຸ, ສຸຂິໂນ ໂຫນ຺ຕູຕິ – ປຣິຬາຫໍ ປຏິປ຺ປສ຺ສມ຺ເຠຕິ. ປີຕິສມ຺ໂພຊ຺ຌງ຺ຄປຣິຠາວິຕາ ໂຫຕິ ເມຕ຺ຕາເຈໂຕວິມຸຕ຺ຕິ.

ສພ຺ເພ ສຕ຺ຕາ ອເວຣິໂນ ໂຫນ຺ຕຸ, ເຂມິໂນ ໂຫນ຺ຕຸ, ສຸຂິໂນ ໂຫນ຺ຕູຕິ – ທຸຏ຺ຐຸລ຺ລໍ ປຏິປ຺ປສ຺ສມ຺ເຠຕິ. ປສ຺ສທ຺ຘິສມ຺ໂພຊ຺ຌງ຺ຄປຣິຠາວິຕາ ໂຫຕິ ເມຕ຺ຕາເຈໂຕວິມຸຕ຺ຕິ.

ສພ຺ເພ ສຕ຺ຕາ ອເວຣິໂນ ໂຫນ຺ຕຸ, ເຂມິໂນ ໂຫນ຺ຕຸ, ສຸຂິໂນ ໂຫນ຺ຕູຕິ – ຈິຕ຺ຕໍ ສມາທຫຕິ. ສມາຘິສມ຺ໂພຊ຺ຌງ຺ຄປຣິຠາວິຕາ ໂຫຕິ ເມຕ຺ຕາເຈໂຕວິມຸຕ຺ຕິ.

ສພ຺ເພ ສຕ຺ຕາ ອເວຣິໂນ ໂຫນ຺ຕຸ, ເຂມິໂນ ໂຫນ຺ຕຸ, ສຸຂິໂນ ໂຫນ຺ຕູຕິ – ຎາເຓນ ກິເລເສ ປຏິສງ຺ຂາຕິ. ອຸເປກ຺ຂາສມ຺ໂພຊ຺ຌງ຺ຄປຣິຠາວິຕາ ໂຫຕິ ເມຕ຺ຕາເຈໂຕວິມຸຕ຺ຕິ.

ອິເມ ສຕ຺ຕ ໂພຊ຺ຌງ຺ຄາ ເມຕ຺ຕາຍ ເຈໂຕວິມຸຕ຺ຕິຍາ ອາເສວນາ ໂຫນ຺ຕິ. ອິເມຫິ ສຕ຺ຕຫິ ໂພຊ຺ຌງ຺ເຄຫິ ເມຕ຺ຕາເຈໂຕວິມຸຕ຺ຕິ ອາເສວີຍຕິ. ອິເມ ສຕ຺ຕ ໂພຊ຺ຌງ຺ຄາ ເມຕ຺ຕາຍ ເຈໂຕວິມຸຕ຺ຕິຍາ ຠາວນາ ໂຫນ຺ຕິ. ອິເມຫິ ສຕ຺ຕຫິ ໂພຊ຺ຌງ຺ເຄຫິ ເມຕ຺ຕາເຈໂຕວິມຸຕ຺ຕິ ຠາວີຍຕິ. ອິເມ ສຕ຺ຕ ໂພຊ຺ຌງ຺ຄາ ເມຕ຺ຕາຍ ເຈໂຕວິມຸຕ຺ຕິຍາ ພຫຸລີກຕາ ໂຫນ຺ຕິ. ອິເມຫິ ສຕ຺ຕຫິ ໂພຊ຺ຌງ຺ເຄຫິ ເມຕ຺ຕາເຈໂຕວິມຸຕ຺ຕິ ພຫຸລີກຣີຍຕິ. ອິເມ ສຕ຺ຕ ໂພຊ຺ຌງ຺ຄາ ເມຕ຺ຕາຍ ເຈໂຕວິມຸຕ຺ຕິຍາ ອລງ຺ກາຣາ ໂຫນ຺ຕິ. ອິເມຫິ ສຕ຺ຕຫິ ໂພຊ຺ຌງ຺ເຄຫິ ເມຕ຺ຕາເຈໂຕວິມຸຕ຺ຕິ ສ຺ວາລງ຺ກຕາ ໂຫຕິ. ອິເມ ສຕ຺ຕ ໂພຊ຺ຌງ຺ຄາ ເມຕ຺ຕາຍ ເຈໂຕວິມຸຕ຺ຕິຍາ ປຣິກ຺ຂາຣາ ໂຫນ຺ຕິ. ອິເມຫິ ສຕ຺ຕຫິ ໂພຊ຺ຌງ຺ເຄຫິ ເມຕ຺ຕາເຈໂຕວິມຸຕ຺ຕິ ສຸປຣິກ຺ຂຕາ ໂຫຕິ. ອິເມ ສຕ຺ຕ ໂພຊ຺ຌງ຺ຄາ ເມຕ຺ຕາຍ ເຈໂຕວິມຸຕ຺ຕິຍາ ປຣິວາຣາ ໂຫນ຺ຕິ. ອິເມຫິ ສຕ຺ຕຫິ ໂພຊ຺ຌງ຺ເຄຫິ ເມຕ຺ຕາເຈໂຕວິມຸຕ຺ຕິ ສຸປຣິວຸຕາ ໂຫຕິ. ອິເມ ສຕ຺ຕ ໂພຊ຺ຌງ຺ຄາ ເມຕ຺ຕາຍ ເຈໂຕວິມຸຕ຺ຕິຍາ ອາເສວນາ ໂຫນ຺ຕິ, ຠາວນາ ໂຫນ຺ຕິ, ພຫຸລີກຕາ ໂຫນ຺ຕິ, ອລງ຺ກາຣາ ໂຫນ຺ຕິ, ປຣິກ຺ຂາຣາ ໂຫນ຺ຕິ, ປຣິວາຣາ ໂຫນ຺ຕິ, ປາຣິປູຣີ ໂຫນ຺ຕິ, ສຫຄຕາ ໂຫນ຺ຕິ, ສຫຊາຕາ ໂຫນ຺ຕິ, ສໍສຏ຺ຐາ ໂຫນ຺ຕິ, ສມ຺ປຍຸຕ຺ຕາ ໂຫນ຺ຕິ, ປກ຺ຂນ຺ທນາ ໂຫນ຺ຕິ, ປສີທນາ ໂຫນ຺ຕິ, ສນ຺ຕິຏ຺ຐນາ ໂຫນ຺ຕິ, ວິມຸຈ຺ຈນາ ໂຫນ຺ຕິ, ‘‘ເອຕໍ ສນ຺ຕ’’ນ຺ຕິ ຜສ຺ສນາ ໂຫນ຺ຕິ, ຍານີກຕາ ໂຫນ຺ຕິ, ວຕ຺ຖຸກຕາ ໂຫນ຺ຕິ, ອນຸຏ຺ຐິຕາ ໂຫນ຺ຕິ, ປຣິຈິຕາ ໂຫນ຺ຕິ, ສຸສມາຣທ຺ຘາ ໂຫນ຺ຕິ, ສຸຠາວິຕາ ໂຫນ຺ຕິ, ສ຺ວາຘິຏ຺ຐິຕາ ໂຫນ຺ຕິ, ສຸສມຸຄ຺ຄຕາ ໂຫນ຺ຕິ, ສຸວິມຸຕ຺ຕາ ໂຫນ຺ຕິ, ນິພ຺ພຕ຺ເຕນ຺ຕິ ໂຊເຕນ຺ຕິ ປຕາເປນ຺ຕິ.