໔. ມຄ຺ຄງ຺ຄວາໂຣ

໒໖. ສພ຺ເພ ສຕ຺ຕາ ອເວຣິໂນ ໂຫນ຺ຕຸ, ເຂມິໂນ ໂຫນ຺ຕຸ, ສຸຂິໂນ ໂຫນ຺ຕູຕິ – ສມ຺ມາ ປສ຺ສຕິ. ສມ຺ມາທິຏ຺ຐິປຣິຠາວິຕາ ໂຫຕິ ເມຕ຺ຕາເຈໂຕວິມຸຕ຺ຕິ.

ສພ຺ເພ ສຕ຺ຕາ ອເວຣິໂນ ໂຫນ຺ຕຸ, ເຂມິໂນ ໂຫນ຺ຕຸ, ສຸຂິໂນ ໂຫນ຺ຕູຕິ – ສມ຺ມາ ອຠິນິໂຣເປຕິ. ສມ຺ມາສງ຺ກປ຺ປປຣິຠາວິຕາ ໂຫຕິ ເມຕ຺ຕາເຈໂຕວິມຸຕ຺ຕິ.

ສພ຺ເພ ສຕ຺ຕາ ອເວຣິໂນ ໂຫນ຺ຕຸ, ເຂມິໂນ ໂຫນ຺ຕຸ, ສຸຂິໂນ ໂຫນ຺ຕູຕິ – ສມ຺ມາ ປຣິຄ຺ຄຓ຺ຫາຕິ. ສມ຺ມາວາຈາປຣິຠາວິຕາ ໂຫຕິ ເມຕ຺ຕາເຈໂຕວິມຸຕ຺ຕິ.

ສພ຺ເພ ສຕ຺ຕາ ອເວຣິໂນ ໂຫນ຺ຕຸ, ເຂມິໂນ ໂຫນ຺ຕຸ, ສຸຂິໂນ ໂຫນ຺ຕູຕິ – ສມ຺ມາ ສມຸຏ຺ຐາເປຕິ. ສມ຺ມາກມ຺ມນ຺ຕປຣິຠາວິຕາ ໂຫຕິ ເມຕ຺ຕາເຈໂຕວິມຸຕ຺ຕິ.

ສພ຺ເພ ສຕ຺ຕາ ອເວຣິໂນ ໂຫນ຺ຕຸ, ເຂມິໂນ ໂຫນ຺ຕຸ, ສຸຂິໂນ ໂຫນ຺ຕູຕິ – ສມ຺ມາ ໂວທາເປຕິ. ສມ຺ມາອາຊີວປຣິຠາວິຕາ ໂຫຕິ ເມຕ຺ຕາເຈໂຕວິມຸຕ຺ຕິ.

ສພ຺ເພ ສຕ຺ຕາ ອເວຣິໂນ ໂຫນ຺ຕຸ, ເຂມິໂນ ໂຫນ຺ຕຸ, ສຸຂິໂນ ໂຫນ຺ຕູຕິ – ສມ຺ມາ ປຄ຺ຄຓ຺ຫາຕິ. ສມ຺ມາວາຍາມປຣິຠາວິຕາ ໂຫຕິ ເມຕ຺ຕາເຈໂຕວິມຸຕ຺ຕິ.

ສພ຺ເພ ສຕ຺ຕາ ອເວຣິໂນ ໂຫນ຺ຕຸ, ເຂມິໂນ ໂຫນ຺ຕຸ, ສຸຂິໂນ ໂຫນ຺ຕູຕິ – ສມ຺ມາ ອຸປຏ຺ຐາເປຕິ. ສມ຺ມາສຕິປຣິຠາວິຕາ ໂຫຕິ ເມຕ຺ຕາເຈໂຕວິມຸຕ຺ຕິ.

ສພ຺ເພ ສຕ຺ຕາ ອເວຣິໂນ ໂຫນ຺ຕຸ, ເຂມິໂນ ໂຫນ຺ຕຸ, ສຸຂິໂນ ໂຫນ຺ຕູຕິ – ສມ຺ມາ ສມາທຫຕິ. ສມ຺ມາສມາຘິປຣິຠາວິຕາ ໂຫຕິ ເມຕ຺ຕາເຈໂຕວິມຸຕ຺ຕິ.

ອິເມ ອຏ຺ຐ ມຄ຺ຄງ຺ຄາ ເມຕ຺ຕາຍ ເຈໂຕວິມຸຕ຺ຕິຍາ ອາເສວນາ ໂຫນ຺ຕິ. ອິເມຫິ ອຏ຺ຐຫິ ມຄ຺ຄງ຺ເຄຫິ ເມຕ຺ຕາເຈໂຕວິມຸຕ຺ຕິ ອາເສວີຍຕິ. ອິເມ ອຏ຺ຐ ມຄ຺ຄງ຺ຄາ ເມຕ຺ຕາຍ ເຈໂຕວິມຸຕ຺ຕິຍາ ຠາວນາ ໂຫນ຺ຕິ. ອິເມຫິ ອຏ຺ຐຫິ ມຄ຺ຄງ຺ເຄຫິ ເມຕ຺ຕາເຈໂຕວິມຸຕ຺ຕິ ຠາວີຍຕິ. ອິເມ ອຏ຺ຐ ມຄ຺ຄງ຺ຄາ ເມຕ຺ຕາຍ ເຈໂຕວິມຸຕ຺ຕິຍາ ພຫຸລີກຕາ ໂຫນ຺ຕິ. ອິເມຫິ ອຏ຺ຐຫິ ມຄ຺ຄງ຺ເຄຫິ ເມຕ຺ຕາເຈໂຕວິມຸຕ຺ຕິ ພຫຸລີກຣີຍຕິ. ອິເມ ອຏ຺ຐ ມຄ຺ຄງ຺ຄາ ເມຕ຺ຕາຍ ເຈໂຕວິມຸຕ຺ຕິຍາ ອລງ຺ກາຣາ ໂຫນ຺ຕິ. ອິເມຫິ ອຏ຺ຐຫິ ມຄ຺ຄງ຺ເຄຫິ ເມຕ຺ຕາເຈໂຕວິມຸຕ຺ຕິ ສ຺ວາລງ຺ກຕາ ໂຫນ຺ຕິ. ອິເມ ອຏ຺ຐ ມຄ຺ຄງ຺ຄາ ເມຕ຺ຕາຍ ເຈໂຕວິມຸຕ຺ຕິຍາ ປຣິກ຺ຂາຣາ ໂຫນ຺ຕິ. ອິເມຫິ ອຏ຺ຐຫິ ມຄ຺ຄງ຺ເຄຫິ ເມຕ຺ຕາເຈໂຕວິມຸຕ຺ຕິ ສຸປຣິກ຺ຂຕາ ໂຫຕິ. ອິເມ ອຏ຺ຐ ມຄ຺ຄງ຺ຄາ ເມຕ຺ຕາຍ ເຈໂຕວິມຸຕ຺ຕິຍາ ປຣິວາຣາ ໂຫນ຺ຕິ. ອິເມຫິ ອຏ຺ຐຫິ ມຄ຺ຄງ຺ເຄຫິ ເມຕ຺ຕາເຈໂຕວິມຸຕ຺ຕິ ສຸປຣິວຸຕາ ໂຫຕິ. ອິເມ ອຏ຺ຐ ມຄ຺ຄງ຺ຄາ ເມຕ຺ຕາຍ ເຈໂຕວິມຸຕ຺ຕິຍາ ອາເສວນາ ໂຫນ຺ຕິ, ຠາວນາ ໂຫນ຺ຕິ, ພຫຸລີກຕາ ໂຫນ຺ຕິ, ອລງ຺ກາຣາ ໂຫນ຺ຕິ, ປຣິກ຺ຂາຣາ ໂຫນ຺ຕິ, ປຣິວາຣາ ໂຫນ຺ຕິ, ປາຣິປູຣີ ໂຫນ຺ຕິ, ສຫຄຕາ ໂຫນ຺ຕິ, ສຫຊາຕາ ໂຫນ຺ຕິ, ສໍສຏ຺ຐາ ໂຫນ຺ຕິ, ສມ຺ປຍຸຕ຺ຕາ ໂຫນ຺ຕິ, ປກ຺ຂນ຺ທນາ ໂຫນ຺ຕິ, ປສີທນາ ໂຫນ຺ຕິ, ສນ຺ຕິຏ຺ຐນາ ໂຫນ຺ຕິ, ວິມຸຈ຺ຈນາ ໂຫນ຺ຕິ, ‘‘ເອຕໍ ສນ຺ຕ’’ນ຺ຕິ ຜສ຺ສນາ ໂຫນ຺ຕິ, ຍານີກຕາ ໂຫນ຺ຕິ, ວຕ຺ຖຸກຕາ ໂຫນ຺ຕິ, ອນຸຏ຺ຐິຕາ ໂຫນ຺ຕິ, ປຣິຈິຕາ ໂຫນ຺ຕິ, ສຸສມາຣທ຺ຘາ ໂຫນ຺ຕິ, ສຸຠາວິຕາ ໂຫນ຺ຕິ, ສ຺ວາຘິຏ຺ຐິຕາ ໂຫນ຺ຕິ, ສຸສມຸຄ຺ຄຕາ ໂຫນ຺ຕິ, ສຸວິມຸຕ຺ຕາ ໂຫນ຺ຕິ ນິພ຺ພຕ຺ເຕນ຺ຕິ ໂຊເຕນ຺ຕິ ປຕາເປນ຺ຕິ.

໒໗. ສພ຺ເພສໍ ປາຓານໍ…ເປ… ສພ຺ເພສໍ ຠູຕານໍ… ສພ຺ເພສໍ ປຸຄ຺ຄລານໍ… ສພ຺ເພສໍ ອຕ຺ຕຠາວປຣິຍາປນ຺ນານໍ… ສພ຺ພາສໍ ອິຕ຺ຖີນໍ… ສພ຺ເພສໍ ປຸຣິສານໍ… ສພ຺ເພສໍ ອຣິຍານໍ… ສພ຺ເພສໍ ອນຣິຍານໍ… ສພ຺ເພສໍ ເທວານໍ… ສພ຺ເພສໍ ມນຸສ຺ສານໍ… ສພ຺ເພສໍ ວິນິປາຕິການໍ ປີຬນໍ ວຊ຺ເຊຕ຺ວາ ອປີຬນາຍ, ອຸປຆາຕໍ ວຊ຺ເຊຕ຺ວາ ອນຸປຆາເຕນ, ສນ຺ຕາປໍ ວຊ຺ເຊຕ຺ວາ ອສນ຺ຕາເປນ, ປຣິຍາທານໍ ວຊ຺ເຊຕ຺ວາ ອປຣິຍາທາເນນ, ວິເຫສໍ ວຊ຺ເຊຕ຺ວາ ອວິເຫສາຍ, ສພ຺ເພ ວິນິປາຕິກາ ອເວຣິໂນ ໂຫນ຺ຕຸ ມາ ເວຣິໂນ, ສຸຂິໂນ ໂຫນ຺ຕຸ ມາ ທຸກ຺ຂິໂນ, ສຸຂິຕຕ຺ຕາ ໂຫນ຺ຕຸ ມາ ທຸກ຺ຂິຕຕ຺ຕາຕິ – ອິເມຫິ ອຏ຺ຐຫາກາເຣຫິ ສພ຺ເພ ວິນິປາຕິເກ ເມຕ຺ຕາຍຕີຕິ – ເມຕ຺ຕາ. ຕໍ ຘມ຺ມໍ ເຈຕຍຕີຕິ – ເຈໂຕ. ສພ຺ພພ຺ຍາປາທປຣິຍຸຏ຺ຐາເນຫິ ວິມຸຈ຺ຈຕີຕິ – ວິມຸຕ຺ຕິ. ເມຕ຺ຕາ ຈ ເຈໂຕ ຈ ວິມຸຕ຺ຕິ ຈາຕິ – ເມຕ຺ຕາເຈໂຕວິມຸຕ຺ຕິ.

ສພ຺ເພ ວິນິປາຕິກາ ອເວຣິໂນ ໂຫນ຺ຕຸ, ເຂມິໂນ ໂຫນ຺ຕຸ, ສຸຂິໂນ ໂຫນ຺ຕູຕິ – ສທ຺ຘາຍ ອຘິມຸຈ຺ຈຕິ. ສທ຺ຘິນ຺ທ຺ຣິຍປຣິຠາວິຕາ ໂຫຕິ ເມຕ຺ຕາເຈໂຕວິມຸຕ຺ຕິ…ເປ… ນິພ຺ພຕ຺ເຕນ຺ຕິ ໂຊເຕນ຺ຕິ ປຕາເປນ຺ຕິ.

ສພ຺ເພສໍ ປຸຣຕ຺ຖິມາຍ ທິສາຍ ສຕ຺ຕານໍ…ເປ… ສພ຺ເພສໍ ປຈ຺ຉິມາຍ ທິສາຍ ສຕ຺ຕານໍ… ສພ຺ເພສໍ ອຸຕ຺ຕຣາຍ ທິສາຍ ສຕ຺ຕານໍ… ສພ຺ເພສໍ ທກ຺ຂິຓາຍ ທິສາຍ ສຕ຺ຕານໍ… ສພ຺ເພສໍ ປຸຣຕ຺ຖິມາຍ ອນຸທິສາຍ ສຕ຺ຕານໍ… ສພ຺ເພສໍ ປຈ຺ຉິມາຍ ອນຸທິສາຍ ສຕ຺ຕານໍ… ສພ຺ເພສໍ ອຸຕ຺ຕຣາຍ ອນຸທິສາຍ ສຕ຺ຕານໍ… ສພ຺ເພສໍ ທກ຺ຂິຓາຍ ອນຸທິສາຍ ສຕ຺ຕານໍ… ສພ຺ເພສໍ ເຫຏ຺ຐິມາຍ ທິສາຍ ສຕ຺ຕານໍ… ສພ຺ເພສໍ ອຸປຣິມາຍ ທິສາຍ ສຕ຺ຕານໍ ປີຬນໍ ວຊ຺ເຊຕ຺ວາ ອປີຬນາຍ, ອຸປຆາຕໍ ວຊ຺ເຊຕ຺ວາ ອນຸປຆາເຕນ, ສນ຺ຕາປໍ ວຊ຺ເຊຕ຺ວາ ອສນ຺ຕາເປນ, ປຣິຍາທານໍ ວຊ຺ເຊຕ຺ວາ ອປຣິຍາທາເນນ, ວິເຫສໍ ວຊ຺ເຊຕ຺ວາ ອວິເຫສາຍ, ສພ຺ເພ ອຸປຣິມາຍ ທິສາຍ ສຕ຺ຕາ ອເວຣິໂນ ໂຫນ຺ຕຸ ມາ ເວຣິໂນ, ສຸຂິໂນ ໂຫນ຺ຕຸ ມາ ທຸກ຺ຂິໂນ, ສຸຂິຕຕ຺ຕາ ໂຫນ຺ຕຸ ມາ ທຸກ຺ຂິຕຕ຺ຕາຕິ – ອິເມຫິ ອຏ຺ຐຫາກາເຣຫິ ສພ຺ເພ ອຸປຣິມາຍ ທິສາຍ ສຕ຺ເຕ ເມຕ຺ຕາຍຕີຕິ – ເມຕ຺ຕາ. ຕໍ ຘມ຺ມໍ ເຈຕຍຕີຕິ – ເຈໂຕ. ສພ຺ພພ຺ຍາປາທປຣິຍຸຏ຺ຐາເນຫິ ວິມຸຈ຺ຈຕີຕິ – ວິມຸຕ຺ຕິ. ເມຕ຺ຕາ ຈ ເຈໂຕ ຈ ວິມຸຕ຺ຕິ ຈາຕິ – ເມຕ຺ຕາເຈໂຕວິມຸຕ຺ຕິ.

ສພ຺ເພ ອຸປຣິມາຍ ທິສາຍ ສຕ຺ຕາ ອເວຣິໂນ ໂຫນ຺ຕຸ, ເຂມິໂນ ໂຫນ຺ຕຸ, ສຸຂິໂນ ໂຫນ຺ຕູຕິ – ສທ຺ຘາຍ ອຘິມຸຈ຺ຈຕິ. ສທ຺ຘິນ຺ທ຺ຣິຍປຣິຠາວິຕາ ໂຫຕິ ເມຕ຺ຕາເຈໂຕວິມຸຕ຺ຕິ…ເປ… ນິພ຺ພຕ຺ເຕນ຺ຕິ ໂຊເຕນ຺ຕິ ປຕາເປນ຺ຕິ.

ສພ຺ເພສໍ ປຸຣຕ຺ຖິມາຍ ທິສາຍ ປາຓານໍ…ເປ… ຠູຕານໍ… ປຸຄ຺ຄລານໍ ອຕ຺ຕຠາວປຣິຍາປນ຺ນານໍ… ສພ຺ພາສໍ ອິຕ຺ຖີນໍ… ສພ຺ເພສໍ ປຸຣິສານໍ… ສພ຺ເພສໍ ອຣິຍານໍ… ສພ຺ເພສໍ ອນຣິຍານໍ… ສພ຺ເພສໍ ເທວານໍ… ສພ຺ເພສໍ ມນຸສ຺ສານໍ… ສພ຺ເພສໍ ວິນິປາຕິການໍ… ສພ຺ເພສໍ ປຈ຺ຉິມາຍ ທິສາຍ ວິນິປາຕິການໍ… ສພ຺ເພສໍ ອຸຕ຺ຕຣາຍ ທິສາຍ ວິນິປາຕິການໍ… ສພ຺ເພສໍ ທກ຺ຂິຓາຍ ທິສາຍ ວິນິປາຕິການໍ… ສພ຺ເພສໍ ປຸຣຕ຺ຖິມາຍ ອນຸທິສາຍ ວິນິປາຕິການໍ… ສພ຺ເພສໍ ປຈ຺ຉິມາຍ ອນຸທິສາຍ ວິນິປາຕິການໍ… ສພ຺ເພສໍ ອຸຕ຺ຕຣາຍ ອນຸທິສາຍ ວິນິປາຕິການໍ… ສພ຺ເພສໍ ທກ຺ຂິຓາຍ ອນຸທິສາຍ ວິນິປາຕິການໍ… ສພ຺ເພສໍ ເຫຏ຺ຐິມາຍ ທິສາຍ ວິນິປາຕິການໍ… ສພ຺ເພສໍ ອຸປຣິມາຍ ທິສາຍ ວິນິປາຕິການໍ ປີຬນໍ ວຊ຺ເຊຕ຺ວາ ອປີຬນາຍ, ອຸປຆາຕໍ ວຊ຺ເຊຕ຺ວາ ອນຸປຆາເຕນ, ສນ຺ຕາປໍ ວຊ຺ເຊຕ຺ວາ ອສນ຺ຕາເປນ, ປຣິຍາທານໍ ວຊ຺ເຊຕ຺ວາ ອປຣິຍາທາເນນ, ວິເຫສໍ ວຊ຺ເຊຕ຺ວາ ອວິເຫສາຍ, ສພ຺ເພ ອຸປຣິມາຍ ທິສາຍ ວິນິປາຕິກາ ອເວຣິໂນ ໂຫນ຺ຕຸ ມາ ເວຣິໂນ, ສຸຂິໂນ ໂຫນ຺ຕຸ ມາ ທຸກ຺ຂິໂນ, ສຸຂິຕຕ຺ຕາ ໂຫນ຺ຕຸ ມາ ທຸກ຺ຂິຕຕ຺ຕາຕິ – ອິເມຫິ ອຏ຺ຐຫາກາເຣຫິ ສພ຺ເພ ອຸປຣິມາຍ ທິສາຍ ວິນິປາຕິເກ ເມຕ຺ຕາຍຕີຕິ – ເມຕ຺ຕາ. ຕໍ ຘມ຺ມໍ ເຈຕຍຕີຕິ – ເຈໂຕ. ສພ຺ພພ຺ຍາປາທປຣິຍຸຏ຺ຐາເນຫິ ວິມຸຈ຺ຈຕີຕິ – ວິມຸຕ຺ຕິ. ເມຕ຺ຕາ ຈ ເຈໂຕ ຈ ວິມຸຕ຺ຕິ ຈາຕິ – ເມຕ຺ຕາເຈໂຕວິມຸຕ຺ຕິ.

ສພ຺ເພ ອຸປຣິມາຍ ທິສາຍ ວິນິປາຕິກາ ອເວຣິໂນ ໂຫນ຺ຕຸ, ເຂມິໂນ ໂຫນ຺ຕຸ, ສຸຂິໂນ ໂຫນ຺ຕູຕິ – ສທ຺ຘາຍ ອຘິມຸຈ຺ຈຕິ. ສທ຺ຘິນ຺ທ຺ຣິຍປຣິຠາວິຕາ ໂຫຕິ ເມຕ຺ຕາເຈໂຕວິມຸຕ຺ຕິ.

ສພ຺ເພ ອຸປຣິມາຍ ທິສາຍ ວິນິປາຕິກາ ອເວຣິໂນ ໂຫນ຺ຕຸ, ເຂມິໂນ ໂຫນ຺ຕຸ, ສຸຂິໂນ ໂຫນ຺ຕູຕິ – ວີຣິຍໍ ປຄ຺ຄຓ຺ຫາຕິ. ວີຣິຍິນ຺ທ຺ຣິຍປຣິຠາວິຕາ ໂຫຕິ ເມຕ຺ຕາເຈໂຕວິມຸຕ຺ຕິ.

ສຕິໍ ອຸປຏ຺ຐາເປຕິ. ສຕິນ຺ທ຺ຣິຍປຣິຠາວິຕາ ໂຫຕິ ເມຕ຺ຕາເຈໂຕວິມຸຕ຺ຕິ. ຈິຕ຺ຕໍ ສມາທຫຕິ. ສມາຘິນ຺ທ຺ຣິຍປຣິຠາວິຕາ ໂຫຕິ ເມຕ຺ຕາເຈໂຕວິມຸຕ຺ຕິ. ປຎ຺ຎາຍ ປຊານາຕິ. ປຎ຺ຎິນ຺ທ຺ຣິຍປຣິຠາວິຕາ ໂຫຕິ ເມຕ຺ຕາເຈໂຕວິມຸຕ຺ຕິ.

ອິມານິ ປຎ຺ຈິນ຺ທ຺ຣິຍານິ ເມຕ຺ຕາຍ ເຈໂຕວິມຸຕ຺ຕິຍາ ອາເສວນາ ໂຫນ຺ຕິ. ອິເມຫິ ປຎ຺ຈຫິ ອິນ຺ທ຺ຣິເຍຫິ ເມຕ຺ຕາເຈໂຕວິມຸຕ຺ຕິ ອາເສວີຍຕິ…ເປ… ນິພ຺ພຕ຺ເຕນ຺ຕິ ໂຊເຕນ຺ຕິ ປຕາເປນ຺ຕິ.

ສພ຺ເພ ອຸປຣິມາຍ ທິສາຍ ວິນິປາຕິກາ ອເວຣິໂນ ໂຫນ຺ຕຸ, ເຂມິໂນ ໂຫນ຺ຕຸ, ສຸຂິໂນ ໂຫນ຺ຕູຕິ – ອສ຺ສທ຺ຘິເຍ ນ ກມ຺ປຕິ. ສທ຺ຘາພລປຣິຠາວິຕາ ໂຫຕິ ເມຕ຺ຕາເຈໂຕວິມຸຕ຺ຕິ. ໂກສຊ຺ເຊ ນ ກມ຺ປຕິ. ວີຣິຍພລປຣິຠາວິຕາ ໂຫຕິ ເມຕ຺ຕາເຈໂຕວິມຸຕ຺ຕິ. ປມາເທ ນ ກມ຺ປຕິ. ສຕິພລປຣິຠາວິຕາ ໂຫຕິ ເມຕ຺ຕາເຈໂຕວິມຸຕ຺ຕິ. ອຸທ຺ຘຈ຺ເຈ ນ ກມ຺ປຕິ. ສມາຘິພລປຣິຠາວິຕາ ໂຫຕິ ເມຕ຺ຕາເຈໂຕວິມຸຕ຺ຕິ. ອວິຊ຺ຊາຍ ນ ກມ຺ປຕິ. ປຎ຺ຎາພລປຣິຠາວິຕາ ໂຫຕິ ເມຕ຺ຕາເຈໂຕວິມຸຕ຺ຕິ.

ອິມານິ ປຎ຺ຈ ພລານິ ເມຕ຺ຕາຍ ເຈໂຕວິມຸຕ຺ຕິຍາ ອາເສວນາ ໂຫນ຺ຕິ. ອິເມຫິ ປຎ຺ຈຫິ ພເລຫິ ເມຕ຺ຕາເຈໂຕວິມຸຕ຺ຕິ ອາເສວີຍຕິ…ເປ… ນິພ຺ພຕ຺ເຕນ຺ຕິ ໂຊເຕນ຺ຕິ ປຕາເປນ຺ຕິ.

ສພ຺ເພ ອຸປຣິມາຍ ທິສາຍ ວິນິປາຕິກາ ອເວຣິໂນ ໂຫນ຺ຕຸ, ເຂມິໂນ ໂຫນ຺ຕຸ, ສຸຂິໂນ ໂຫນ຺ຕູຕິ – ສຕິໍ ອຸປຏ຺ຐາເປຕິ. ສຕິສມ຺ໂພຊ຺ຌງ຺ຄປຣິຠາວິຕາ ໂຫຕິ ເມຕ຺ຕາເຈໂຕວິມຸຕ຺ຕິ.

ປຎ຺ຎາຍ ປວິຈິນາຕິ. ຘມ຺ມວິຈຍສມ຺ໂພຊ຺ຌງ຺ຄປຣິຠາວິຕາ ໂຫຕິ ເມຕ຺ຕາເຈໂຕວິມຸຕ຺ຕິ. ວີຣິຍໍ ປຄ຺ຄຓ຺ຫາຕິ. ວີຣິຍສມ຺ໂພຊ຺ຌງ຺ຄປຣິຠາວິຕາ ໂຫຕິ ເມຕ຺ຕາເຈໂຕວິມຸຕ຺ຕິ. ປຣິຬາຫໍ ປຏິປ຺ປສ຺ສມ຺ເຠຕິ. ປີຕິສມ຺ໂພຊ຺ຌງ຺ຄປຣິຠາວິຕາ ໂຫຕິ ເມຕ຺ຕາເຈໂຕວິມຸຕ຺ຕິ. ທຸຏ຺ຐຸລ຺ລໍ ປຏິປ຺ປສ຺ສມ຺ເຠຕິ. ປສ຺ສທ຺ຘິສມ຺ໂພຊ຺ຌງ຺ຄປຣິຠາວິຕາ ໂຫຕິ ເມຕ຺ຕາເຈໂຕວິມຸຕ຺ຕິ. ຈິຕ຺ຕໍ ສມາທຫຕິ. ສມາຘິສມ຺ໂພຊ຺ຌງ຺ຄປຣິຠາວິຕາ ໂຫຕິ ເມຕ຺ຕາເຈໂຕວິມຸຕ຺ຕິ. ຎາເຓນ ກິເລເສ ປຏິສງ຺ຂາຕິ. ອຸເປກ຺ຂາສມ຺ໂພຊ຺ຌງ຺ຄປຣິຠາວິຕາ ໂຫຕິ ເມຕ຺ຕາເຈໂຕວິມຸຕ຺ຕິ.

ອິເມ ສຕ຺ຕ ໂພຊ຺ຌງ຺ຄາ ເມຕ຺ຕາຍ ເຈໂຕວິມຸຕ຺ຕິຍາ ອາເສວນາ ໂຫນ຺ຕິ. ອິເມຫິ ສຕ຺ຕຫິ ໂພຊ຺ຌງ຺ເຄຫິ ເມຕ຺ຕາເຈໂຕວິມຸຕ຺ຕິ ອາເສວີຍຕິ…ເປ… ນິພ຺ພຕ຺ເຕນ຺ຕິ ໂຊເຕນ຺ຕິ ປຕາເປນ຺ຕິ.

ສພ຺ເພ ອຸປຣິມາຍ ທິສາຍ ວິນິປາຕິກາ ອເວຣິໂນ ໂຫນ຺ຕຸ, ເຂມິໂນ ໂຫນ຺ຕຸ, ສຸຂິໂນ ໂຫນ຺ຕູຕິ – ສມ຺ມາ ປສ຺ສຕິ. ສມ຺ມາທິຏ຺ຐິ ປຣິຠາວິຕາ ໂຫຕິ ເມຕ຺ຕາເຈໂຕວິມຸຕ຺ຕິ. ສມ຺ມາ ອຠິນິໂຣເປຕິ. ສມ຺ມາສງ຺ກປ຺ປປຣິຠາວິຕາ ໂຫຕິ ເມຕ຺ຕາເຈໂຕວິມຸຕ຺ຕິ. ສມ຺ມາ ປຣິຄ຺ຄຓ຺ຫາຕິ. ສມ຺ມາວາຈາປຣິຠາວິຕາ ໂຫຕິ ເມຕ຺ຕາເຈໂຕວິມຸຕ຺ຕິ. ສມ຺ມາ ສມຸຏ຺ຐາເປຕິ. ສມ຺ມາກມ຺ມນ຺ຕປຣິຠາວິຕາ ໂຫຕິ ເມຕ຺ຕາເຈໂຕວິມຸຕ຺ຕິ. ສມ຺ມາ ໂວທາເປຕິ. ສມ຺ມາ ອາຊີວປຣິຠາວິຕາ ໂຫຕິ ເມຕ຺ຕາເຈໂຕວິມຸຕ຺ຕິ. ສມ຺ມາ ປຄ຺ຄຓ຺ຫາຕິ. ສມ຺ມາວາຍາມປຣິຠາວິຕາ ໂຫຕິ ເມຕ຺ຕາເຈໂຕວິມຸຕ຺ຕິ. ສມ຺ມາ ອຸປຏ຺ຐາຕິ. ສມ຺ມາສຕິປຣິຠາວິຕາ ໂຫຕິ ເມຕ຺ຕາເຈໂຕວິມຸຕ຺ຕິ. ສມ຺ມາ ສມາທຫຕິ. ສມ຺ມາສມາຘິປຣິຠາວິຕາ ໂຫຕິ ເມຕ຺ຕາເຈໂຕວິມຸຕ຺ຕິ.

ອິເມ ອຏ຺ຐ ມຄ຺ຄງ຺ຄາ ເມຕ຺ຕາຍ ເຈໂຕວິມຸຕ຺ຕິຍາ ອາເສວນາ ໂຫນ຺ຕິ. ອິເມຫິ ອຏ຺ຐຫິ ມຄ຺ຄງ຺ເຄຫິ ເມຕ຺ຕາເຈໂຕວິມຸຕ຺ຕິ ອາເສວີຍຕິ…ເປ… ອິເມ ອຏ຺ຐ ມຄ຺ຄງ຺ຄາ ເມຕ຺ຕາຍ ເຈໂຕວິມຸຕ຺ຕິຍາ ປຣິຠາວິຕາ ໂຫນ຺ຕິ. ອິເມຫິ ອຏ຺ຐຫິ ມຄ຺ຄງ຺ເຄຫິ ເມຕ຺ຕາເຈໂຕວິມຸຕ຺ຕິ ສຸປຣິວຸຕາ ໂຫຕິ. ອິເມ ອຏ຺ຐ ມຄ຺ຄງ຺ຄາ ເມຕ຺ຕາຍ ເຈໂຕວິມຸຕ຺ຕິຍາ ອາເສວນາ ໂຫນ຺ຕິ, ຠາວນາ ໂຫນ຺ຕິ, ພຫຸລີກຕາ ໂຫນ຺ຕິ, ອລງ຺ກາຣາ ໂຫນ຺ຕິ, ປຣິກ຺ຂາຣາ ໂຫນ຺ຕິ, ປຣິວາຣາ ໂຫນ຺ຕິ, ປາຣິປູຣີ ໂຫນ຺ຕິ, ສຫຄຕາ ໂຫນ຺ຕິ, ສຫຊາຕາ ໂຫນ຺ຕິ, ສໍສຏ຺ຐາ ໂຫນ຺ຕິ, ສມ຺ປຍຸຕ຺ຕາ ໂຫນ຺ຕິ, ປກ຺ຂນ຺ທນາ ໂຫນ຺ຕິ, ປສີທນາ ໂຫນ຺ຕິ, ສນ຺ຕິຏ຺ຐນາ ໂຫນ຺ຕິ, ວິມຸຈ຺ຈນາ ໂຫນ຺ຕິ, ‘‘ເອຕໍ ສນ຺ຕ’’ນ຺ຕິ ຜສ຺ສນາ ໂຫນ຺ຕິ, ຍານີກຕາ ໂຫນ຺ຕິ, ວຕ຺ຖຸກຕາ ໂຫນ຺ຕິ, ອນຸຏ຺ຐິຕາ ໂຫນ຺ຕິ, ປຣິຈິຕາ ໂຫນ຺ຕິ, ສຸສມາຣທ຺ຘາ ໂຫນ຺ຕິ, ສຸຠາວິຕາ ໂຫນ຺ຕິ, ສ຺ວາຘິຏ຺ຐິຕາ ໂຫນ຺ຕິ, ສຸສມຸຄ຺ຄຕາ ໂຫນ຺ຕິ, ສຸວິມຸຕ຺ຕາ ໂຫນ຺ຕິ ນິພ຺ພຕ຺ເຕນ຺ຕິ ໂຊເຕນ຺ຕິ ປຕາເປນ຺ຕີຕິ.

ເມຕ຺ຕາກຖາ ນິຏ຺ຐິຕາ.