໒. ພລວາໂຣ

໒໔. ສພ຺ເພ ສຕ຺ຕາ ອເວຣິໂນ ໂຫນ຺ຕຸ, ເຂມິໂນ ໂຫນ຺ຕຸ, ສຸຂິໂນ ໂຫນ຺ຕູຕິ – ອສ຺ສທ຺ຘິເຍ ນ ກມ຺ປຕິ. ສທ຺ຘາພລປຣິຠາວິຕາ ໂຫຕິ ເມຕ຺ຕາເຈໂຕວິມຸຕ຺ຕິ.

ສພ຺ເພ ສຕ຺ຕາ ອເວຣິໂນ ໂຫນ຺ຕຸ, ເຂມິໂນ ໂຫນ຺ຕຸ, ສຸຂິໂນ ໂຫນ຺ຕູຕິ – ໂກສຊ຺ເຊ ນ ກມ຺ປຕິ. ວີຣິຍພລປຣິຠາວິຕາ ໂຫຕິ ເມຕ຺ຕາເຈໂຕວິມຸຕ຺ຕິ.

ສພ຺ເພ ສຕ຺ຕາ ອເວຣິໂນ ໂຫນ຺ຕຸ, ເຂມິໂນ ໂຫນ຺ຕຸ, ສຸຂິໂນ ໂຫນ຺ຕູຕິ – ປມາເທ ນ ກມ຺ປຕິ. ສຕິພລປຣິຠາວິຕາ ໂຫຕິ ເມຕ຺ຕາເຈໂຕວິມຸຕ຺ຕິ.

ສພ຺ເພ ສຕ຺ຕາ ອເວຣິໂນ ໂຫນ຺ຕຸ, ເຂມິໂນ ໂຫນ຺ຕຸ, ສຸຂິໂນ ໂຫນ຺ຕູຕິ – ອຸທ຺ຘຈ຺ເຈ ນ ກມ຺ປຕິ. ສມາຘິພລປຣິຠາວິຕາ ໂຫຕິ ເມຕ຺ຕາເຈໂຕວິມຸຕ຺ຕິ.

ສພ຺ເພ ສຕ຺ຕາ ອເວຣິໂນ ໂຫນ຺ຕຸ, ເຂມິໂນ ໂຫນ຺ຕຸ, ສຸຂິໂນ ໂຫນ຺ຕູຕິ – ອວິຊ຺ຊາຍ ນ ກມ຺ປຕິ. ປຎ຺ຎາພລປຣິຠາວິຕາ ໂຫຕິ ເມຕ຺ຕາເຈໂຕວິມຸຕ຺ຕິ.

ອິມານິ ປຎ຺ຈ ພລານິ ເມຕ຺ຕາຍ ເຈໂຕວິມຸຕ຺ຕິຍາ ອາເສວນາ ໂຫນ຺ຕິ. ອິເມຫິ ປຎ຺ຈຫິ ພເລຫິ ເມຕ຺ຕາເຈໂຕວິມຸຕ຺ຕິ ອາເສວີຍຕິ. ອິມານິ ປຎ຺ຈ ພລານິ ເມຕ຺ຕາຍ ເຈໂຕວິມຸຕ຺ຕິຍາ ຠາວນາ ໂຫນ຺ຕິ. ອິເມຫິ ປຎ຺ຈຫິ ພເລຫິ ເມຕ຺ຕາເຈໂຕວິມຸຕ຺ຕິ ຠາວີຍຕິ. ອິມານິ ປຎ຺ຈ ພລານິ ເມຕ຺ຕາຍ ເຈໂຕວິມຸຕ຺ຕິຍາ ພຫຸລີກຕາ ໂຫນ຺ຕິ. ອິເມຫິ ປຎ຺ຈຫິ ພເລຫິ ເມຕ຺ຕາເຈໂຕວິມຸຕ຺ຕິ ພຫຸລີກຣີຍຕິ. ອິມານິ ປຎ຺ຈ ພລານິ ເມຕ຺ຕາຍ ເຈໂຕວິມຸຕ຺ຕິຍາ ອລງ຺ກາຣາ ໂຫນ຺ຕິ. ອິເມຫິ ປຎ຺ຈຫິ ພເລຫິ ເມຕ຺ຕາເຈໂຕວິມຸຕ຺ຕິ ສ຺ວາລງ຺ກຕາ ໂຫຕິ. ອິມານິ ປຎ຺ຈ ພລານິ ເມຕ຺ຕາຍ ເຈໂຕວິມຸຕ຺ຕິຍາ ປຣິກ຺ຂາຣາ ໂຫນ຺ຕິ. ອິເມຫິ ປຎ຺ຈຫິ ພເລຫິ ເມຕ຺ຕາເຈໂຕວິມຸຕ຺ຕິ ສຸປຣິກ຺ຂຕາ ໂຫຕິ. ອິມານິ ປຎ຺ຈ ພລານິ ເມຕ຺ຕາຍ ເຈໂຕວິມຸຕ຺ຕິຍາ ປຣິວາຣາ ໂຫນ຺ຕິ. ອິເມຫິ ປຎ຺ຈຫິ ພເລຫິ ເມຕ຺ຕາເຈໂຕວິມຸຕ຺ຕິ ສຸປຣິວຸຕາ ໂຫຕິ. ອິມານິ ປຎ຺ຈ ພລານິ ເມຕ຺ຕາຍ ເຈໂຕວິມຸຕ຺ຕິຍາ ອາເສວນາ ໂຫນ຺ຕິ, ຠາວນາ ໂຫນ຺ຕິ, ພຫຸລີກຕາ ໂຫນ຺ຕິ, ອລງ຺ກາຣາ ໂຫນ຺ຕິ, ປຣິກ຺ຂາຣາ ໂຫນ຺ຕິ, ປຣິວາຣາ ໂຫນ຺ຕິ, ປາຣິປູຣີ ໂຫນ຺ຕິ, ສຫຄຕາ ໂຫນ຺ຕິ, ສຫຊາຕາ ໂຫນ຺ຕິ, ສໍສຏ຺ຐາ ໂຫນ຺ຕິ, ສມ຺ປຍຸຕ຺ຕາ ໂຫນ຺ຕິ, ປກ຺ຂນ຺ທນາ ໂຫນ຺ຕິ, ປສີທນາ ໂຫນ຺ຕິ, ສນ຺ຕິຏ຺ຐນາ ໂຫນ຺ຕິ, ວິມຸຈ຺ຈນາ ໂຫນ຺ຕິ, ‘‘ເອຕໍ ສນ຺ຕ’’ນ຺ຕິ ຜສ຺ສນາ ໂຫນ຺ຕິ, ຍານີກຕາ ໂຫນ຺ຕິ, ວຕ຺ຖຸກຕາ ໂຫນ຺ຕິ, ອນຸຏ຺ຐິຕາ ໂຫນ຺ຕິ, ປຣິຈິຕາ ໂຫນ຺ຕິ, ສຸສມາຣທ຺ຘາ ໂຫນ຺ຕິ, ສຸຠາວິຕາ ໂຫນ຺ຕິ, ສ຺ວາຘິຏ຺ຐິຕາ ໂຫນ຺ຕິ, ສຸສມຸຄ຺ຄຕາ ໂຫນ຺ຕິ, ສຸວິມຸຕ຺ຕາ ໂຫນ຺ຕິ ນິພ຺ພຕ຺ເຕນ຺ຕິ ໂຊເຕນ຺ຕິ ປຕາເປນ຺ຕິ.