໑. ອິນ຺ທ຺ຣິຍວາໂຣ

໒໓. ສພ຺ເພສໍ ສຕ຺ຕານໍ ປີຬນໍ ວຊ຺ເຊຕ຺ວາ ອປີຬນາຍ, ອຸປຆາຕໍ ວຊ຺ເຊຕ຺ວາ ອນຸປຆາເຕນ, ສນ຺ຕາປໍ ວຊ຺ເຊຕ຺ວາ ອສນ຺ຕາເປນ, ປຣິຍາທານໍ ວຊ຺ເຊຕ຺ວາ ອປຣິຍາທາເນນ, ວິເຫສໍ ວຊ຺ເຊຕ຺ວາ ອວິເຫສາຍ, ສພ຺ເພ ສຕ຺ຕາ ອເວຣິໂນ ໂຫນ຺ຕຸ ມາ ເວຣິໂນ, ສຸຂິໂນ ໂຫນ຺ຕຸ ມາ ທຸກ຺ຂິໂນ, ສຸຂິຕຕ຺ຕາ ໂຫນ຺ຕຸ ມາ ທຸກ຺ຂິຕຕ຺ຕາຕິ – ອິເມຫິ ອຏ຺ຐຫາກາເຣຫິ ສພ຺ເພ ສຕ຺ເຕ ເມຕ຺ຕາຍຕີຕິ – ເມຕ຺ຕາ. ຕໍ ຘມ຺ມໍ ເຈຕຍຕີຕິ – ເຈໂຕ. ສພ຺ພພ຺ຍາປາທປຣິຍຸຏ຺ຐາເນຫິ ວິມຸຈ຺ຈຕີຕິ – ວິມຸຕ຺ຕິ. ເມຕ຺ຕາ ຈ ເຈໂຕ ຈ ວິມຸຕ຺ຕິ ຈາຕິ – ເມຕ຺ຕາເຈໂຕວິມຸຕ຺ຕິ.

ສພ຺ເພ ສຕ຺ຕາ ອເວຣິໂນ ໂຫນ຺ຕຸ, ເຂມິໂນ ໂຫນ຺ຕຸ, ສຸຂິໂນ ໂຫນ຺ຕູຕິ – ສທ຺ຘາຍ ອຘິມຸຈ຺ຈຕິ. ສທ຺ຘິນ຺ທ຺ຣິຍປຣິຠາວິຕາ ໂຫຕິ ເມຕ຺ຕາເຈໂຕວິມຸຕ຺ຕິ.

ສພ຺ເພ ສຕ຺ຕາ ອເວຣິໂນ ໂຫນ຺ຕຸ, ເຂມິໂນ ໂຫນ຺ຕຸ, ສຸຂິໂນ ໂຫນ຺ຕູຕິ – ວີຣິຍໍ ປຄ຺ຄຓ຺ຫາຕິ. ວີຣິຍິນ຺ທ຺ຣິຍປຣິຠາວິຕາ ໂຫຕິ ເມຕ຺ຕາເຈໂຕວິມຸຕ຺ຕິ.

ສພ຺ເພ ສຕ຺ຕາ ອເວຣິໂນ ໂຫນ຺ຕຸ, ເຂມິໂນ ໂຫນ຺ຕຸ, ສຸຂິໂນ ໂຫນ຺ຕູຕິ – ສຕິໍ ອຸປຏ຺ຐາເປຕິ. ສຕິນ຺ທ຺ຣິຍປຣິຠາວິຕາ ໂຫຕິ ເມຕ຺ຕາເຈໂຕວິມຸຕ຺ຕິ.

ສພ຺ເພ ສຕ຺ຕາ ອເວຣິໂນ ໂຫນ຺ຕຸ, ເຂມິໂນ ໂຫນ຺ຕຸ, ສຸຂິໂນ ໂຫນ຺ຕູຕິ – ຈິຕ຺ຕໍ ສມາທຫຕິ. ສມາຘິນ຺ທ຺ຣິຍປຣິຠາວິຕາ ໂຫຕິ ເມຕ຺ຕາເຈໂຕວິມຸຕ຺ຕິ.

ສພ຺ເພ ສຕ຺ຕາ ອເວຣິໂນ ໂຫນ຺ຕຸ, ເຂມິໂນ ໂຫນ຺ຕຸ, ສຸຂິໂນ ໂຫນ຺ຕູຕິ – ປຎ຺ຎາຍ ປຊານາຕິ. ປຎ຺ຎິນ຺ທ຺ຣິຍປຣິຠາວິຕາ ໂຫຕິ ເມຕ຺ຕາເຈໂຕວິມຸຕ຺ຕິ.

ອິມານິ ປຎ຺ຈິນ຺ທ຺ຣິຍານິ ເມຕ຺ຕາຍ ເຈໂຕວິມຸຕ຺ຕິຍາ ອາເສວນາ ໂຫນ຺ຕິ. ອິເມຫິ ປຎ຺ຈຫິ ອິນ຺ທ຺ຣິເຍຫິ ເມຕ຺ຕາເຈໂຕວິມຸຕ຺ຕິ ອາເສວີຍຕິ. ອິມານິ ປຎ຺ຈິນ຺ທ຺ຣິຍານິ ເມຕ຺ຕາຍ ເຈໂຕວິມຸຕ຺ຕິຍາ ຠາວນາ ໂຫນ຺ຕິ. ອິເມຫິ ປຎ຺ຈຫິ ອິນ຺ທ຺ຣິເຍຫິ ເມຕ຺ຕາເຈໂຕວິມຸຕ຺ຕິ ຠາວີຍຕິ. ອິມານິ ປຎ຺ຈິນ຺ທ຺ຣິຍານິ ເມຕ຺ຕາຍ ເຈໂຕວິມຸຕ຺ຕິຍາ ພຫຸລີກຕາ ໂຫນ຺ຕິ. ອິເມຫິ ປຎ຺ຈຫິ ອິນ຺ທ຺ຣິເຍຫິ ເມຕ຺ຕາເຈໂຕວິມຸຕ຺ຕິ ພຫຸລີກຣີຍຕິ. ອິມານິ ປຎ຺ຈິນ຺ທ຺ຣິຍານິ ເມຕ຺ຕາຍ ເຈໂຕວິມຸຕ຺ຕິຍາ ອລງ຺ກາຣາ ໂຫນ຺ຕິ. ອິເມຫິ ປຎ຺ຈຫິ ອິນ຺ທ຺ຣິເຍຫິ ເມຕ຺ຕາເຈໂຕວິມຸຕ຺ຕິ ສ຺ວາລງ຺ກຕາ ໂຫຕິ. ອິມານິ ປຎ຺ຈິນ຺ທ຺ຣິຍານິ ເມຕ຺ຕາຍ ເຈໂຕວິມຸຕ຺ຕິຍາ ປຣິກ຺ຂາຣາ ໂຫນ຺ຕິ. ອິເມຫິ ປຎ຺ຈຫິ ອິນ຺ທ຺ຣິເຍຫິ ເມຕ຺ຕາເຈໂຕວິມຸຕ຺ຕິ ສຸປຣິກ຺ຂຕາ ໂຫຕິ. ອິມານິ ປຎ຺ຈິນ຺ທ຺ຣິຍານິ ເມຕ຺ຕາຍ ເຈໂຕວິມຸຕ຺ຕິຍາ ປຣິວາຣາ ໂຫນ຺ຕິ. ອິເມຫິ ປຎ຺ຈຫິ ອິນ຺ທ຺ຣິເຍຫິ ເມຕ຺ຕາເຈໂຕວິມຸຕ຺ຕິ ສຸປຣິວຸຕາ ໂຫຕິ. ອິມານິ ປຎ຺ຈິນ຺ທ຺ຣິຍານິ ເມຕ຺ຕາຍ ເຈໂຕວິມຸຕ຺ຕິຍາ ອາເສວນາ ໂຫນ຺ຕິ, ຠາວນາ ໂຫນ຺ຕິ, ພຫຸລີກຕາ ໂຫນ຺ຕິ, ອລງ຺ກາຣາ ໂຫນ຺ຕິ, ປຣິກ຺ຂາຣາ ໂຫນ຺ຕິ, ປຣິວາຣາ ໂຫນ຺ຕິ, ປາຣິປູຣີ ໂຫນ຺ຕິ, ສຫຄຕາ ໂຫນ຺ຕິ, ສຫຊາຕາ ໂຫນ຺ຕິ, ສໍສຏ຺ຐາ ໂຫນ຺ຕິ, ສມ຺ປຍຸຕ຺ຕາ ໂຫນ຺ຕິ, ປກ຺ຂນ຺ທນາ ໂຫນ຺ຕິ, ປສີທນາ [ສໍສີທນາ (ກ. ສີ. ອຏ຺ຐ.)] ໂຫນ຺ຕິ, ສນ຺ຕິຏ຺ຐນາ ໂຫນ຺ຕິ, ວິມຸຈ຺ຈນາ ໂຫນ຺ຕິ, ‘‘ເອຕໍ ສນ຺ຕ’’ນ຺ຕິ ຜສ຺ສນາ ໂຫນ຺ຕິ, ຍານີກຕາ ໂຫນ຺ຕິ, ວຕ຺ຖຸກຕາ ໂຫນ຺ຕິ, ອນຸຏ຺ຐິຕາ ໂຫນ຺ຕິ, ປຣິຈິຕາ ໂຫນ຺ຕິ, ສຸສມາຣທ຺ຘາ ໂຫນ຺ຕິ, ສຸຠາວິຕາ ໂຫນ຺ຕິ, ສ຺ວາຘິຏ຺ຐິຕາ ໂຫນ຺ຕິ, ສຸສມຸຄ຺ຄຕາ ໂຫນ຺ຕິ, ສຸວິມຸຕ຺ຕາ ໂຫນ຺ຕິ, ນິພ຺ພຕ຺ເຕນ຺ຕິ ໂຊເຕນ຺ຕິ ປຕາເປນ຺ຕິ.