໖. ຎາຓຣາສິຉກ຺ກນິທ຺ເທໂສ

໑໘໓. ກຕມານິ ຈຕຸວີສຕິ ສມາຘິວເສນ ຎາຓານິ? ທີຆໍ ອສ຺ສາສວເສນ ຈິຕ຺ຕສ຺ສ ເອກຄ຺ຄຕາ ອວິກ຺ເຂໂປ ສມາຘິ, ທີຆໍ ປສ຺ສາສວເສນ ຈິຕ຺ຕສ຺ສ ເອກຄ຺ຄຕາ ອວິກ຺ເຂໂປ ສມາຘິ…ເປ… ວິໂມຈຍໍ ຈິຕ຺ຕໍ ອສ຺ສາສວເສນ ຈິຕ຺ຕສ຺ສ ເອກຄ຺ຄຕາ ອວິກ຺ເຂໂປ ສມາຘິ, ວິໂມຈຍໍ ຈິຕ຺ຕໍ ປສ຺ສາສວເສນ ຈິຕ຺ຕສ຺ສ ເອກຄ຺ຄຕາ ອວິກ຺ເຂໂປ ສມາຘິ. ອິມານິ ຈຕຸວີສຕິ ສມາຘິວເສນ ຎາຓານິ.

ກຕມານິ ທ຺ເວສຕ຺ຕຕິ ວິປສ຺ສນາວເສນ ຎາຓານິ? ທີຆໍ ອສ຺ສາສໍ ອນິຈ຺ຈໂຕ ອນຸປສ຺ສນຏ຺ເຐນ ວິປສ຺ສນາ, ທຸກ຺ຂໂຕ ອນຸປສ຺ສນຏ຺ເຐນ ວິປສ຺ສນາ, ອນຕ຺ຕໂຕ ອນຸປສ຺ສນຏ຺ເຐນ ວິປສ຺ສນາ, ທີຆໍ ປສ຺ສາສໍ ອນິຈ຺ຈໂຕ ອນຸປສ຺ສນຏ຺ເຐນ ວິປສ຺ສນາ, ທຸກ຺ຂໂຕ ອນຸປສ຺ສນຏ຺ເຐນ ວິປສ຺ສນາ, ອນຕ຺ຕໂຕ ອນຸປສ຺ສນຏ຺ເຐນ ວິປສ຺ສນາ…ເປ… ວິໂມຈຍໍ ຈິຕ຺ຕໍ ອສ຺ສາສໍ, ວິໂມຈຍໍ ຈິຕ຺ຕໍ ປສ຺ສາສໍ ອນິຈ຺ຈໂຕ ອນຸປສ຺ສນຏ຺ເຐນ ວິປສ຺ສນາ, ທຸກ຺ຂໂຕ ອນຸປສ຺ສນຏ຺ເຐນ ວິປສ຺ສນາ, ອນຕ຺ຕໂຕ ອນຸປສ຺ສນຏ຺ເຐນ ວິປສ຺ສນາ. ອິມານິ ທ຺ເວສຕ຺ຕຕິ ວິປສ຺ສນາວເສນ ຎາຓານິ.

ກຕມານິ ອຏ຺ຐ ນິພ຺ພິທາຎາຓານິ? ອນິຈ຺ຈານຸປສ຺ສີ ອສ຺ສາສໍ ຍຖາຠູຕໍ ຊານາຕິ ປສ຺ສຕີຕິ – ນິພ຺ພິທາຎາຓໍ, ອນິຈ຺ຈານຸປສ຺ສີ ປສ຺ສາສໍ ຍຖາຠູຕໍ ຊານາຕິ ປສ຺ສຕີຕິ – ນິພ຺ພິທາຎາຓໍ…ເປ… ປຏິນິສ຺ສຄ຺ຄານຸປສ຺ສີ ອສ຺ສາສໍ ຍຖາຠູຕໍ ຊານາຕິ ປສ຺ສຕີຕິ – ນິພ຺ພິທາຎາຓໍ, ປຏິນິສ຺ສຄ຺ຄານຸປສ຺ສີ ປສ຺ສາສໍ ຍຖາຠູຕໍ ຊານາຕິ ປສ຺ສຕີຕິ – ນິພ຺ພິທາຎາຓໍ. ອິມານິ ອຏ຺ຐ ນິພ຺ພິທາຎາຓານິ.

ກຕມານິ ອຏ຺ຐ ນິພ຺ພິທານຸໂລເມ ຎາຓານິ? ອນິຈ຺ຈານຸປສ຺ສີ ອສ຺ສາສໍ ຠຍຕຸປຏ຺ຐາເນ ປຎ຺ຎາ ນິພ຺ພິທານຸໂລເມ ຎາຓໍ, ອນິຈ຺ຈານຸປສ຺ສີ ປສ຺ສາສໍ ຠຍຕຸປຏ຺ຐາເນ ປຎ຺ຎາ ນິພ຺ພິທານຸໂລເມ ຎາຓໍ…ເປ… ປຏິນິສ຺ສຄ຺ຄານຸປສ຺ສີ ອສ຺ສາສໍ ຠຍຕຸປຏ຺ຐາເນ ປຎ຺ຎາ ນິພ຺ພິທານຸໂລເມ ຎາຓໍ, ປຏິນິສ຺ສຄ຺ຄານຸປສ຺ສີ ປສ຺ສາສໍ ຠຍຕຸປຏ຺ຐາເນ ປຎ຺ຎາ ນິພ຺ພິທານຸໂລເມ ຎາຓໍ – ອິມານິ ອຏ຺ຐ ນິພ຺ພິທານຸໂລເມ ຎາຓານິ.

ກຕມານິ ອຏ຺ຐ ນິພ຺ພິທາປຏິປ຺ປສ຺ສທ຺ຘິຎາຓານິ? ອນິຈ຺ຈານຸປສ຺ສີ ອສ຺ສາສໍ ປຏິສງ຺ຂາ ສນ຺ຕິຏ຺ຐນາ ປຎ຺ຎາ ນິພ຺ພິທາປຏິປ຺ປສ຺ສທ຺ຘິຎາຓໍ, ອນິຈ຺ຈານຸປສ຺ສີ ປສ຺ສາສໍ ປຏິສງ຺ຂາ ສນ຺ຕິຏ຺ຐນາ ປຎ຺ຎາ ນິພ຺ພິທາປຏິປ຺ປສ຺ສທ຺ຘິຎາຓໍ…ເປ… ປຏິນິສ຺ສຄ຺ຄານຸປສ຺ສີ ອສ຺ສາສໍ ປຏິສງ຺ຂາ ສນ຺ຕິຏ຺ຐນາ ປຎ຺ຎາ ນິພ຺ພິທາປຏິປ຺ປສ຺ສທ຺ຘິຎາຓໍ, ປຏິນິສ຺ສຄ຺ຄານຸປສ຺ສີ ປສ຺ສາສໍ ປຏິສງ຺ຂາ ສນ຺ຕິຏ຺ຐນາ ປຎ຺ຎາ ນິພ຺ພິທາປຏິປ຺ປສ຺ສທ຺ຘິຎາຓໍ – ອິມານິ ອຏ຺ຐ ນິພ຺ພິທາປຏິປ຺ປສ຺ສທ຺ຘິຎາຓານິ.

ກຕມານິ ເອກວີສຕິ ວິມຸຕ຺ຕິສຸເຂ ຎາຓານິ? ໂສຕາປຕ຺ຕິມຄ຺ເຄນ ສກ຺ກາຍທິຏ຺ຐິຍາ ປຫີນຕ຺ຕາ ສມຸຈ຺ຉິນ຺ນຕ຺ຕາ ອຸປ຺ປຊ຺ຊຕິ ວິມຸຕ຺ຕິສຸເຂ ຎາຓໍ, ວິຈິກິຈ຺ຉາຍ ປຫີນຕ຺ຕາ ສມຸຈ຺ຉິນ຺ນຕ຺ຕາ ອຸປ຺ປຊ຺ຊຕິ ວິມຸຕ຺ຕິສຸເຂ ຎາຓໍ, ສີລພ຺ພຕປຣາມາສສ຺ສ…ເປ… ທິຏ຺ຐານຸສຍສ຺ສ, ວິຈິກິຈ຺ຉານຸສຍສ຺ສ ປຫີນຕ຺ຕາ ສມຸຈ຺ຉິນ຺ນຕ຺ຕາ ອຸປ຺ປຊ຺ຊຕິ ວິມຸຕ຺ຕິສຸເຂ ຎາຓໍ, ສກທາຄາມິມຄ຺ເຄນ ໂອຬາຣິກສ຺ສ, ກາມຣາຄສຎ຺ໂຎຊນສ຺ສ…ເປ… ປຏິຆສຎ຺ໂຎຊນສ຺ສ, ໂອຬາຣິກສ຺ສ ກາມຣາຄານຸສຍສ຺ສ, ປຏິຆານຸສຍສ຺ສ ປຫີນຕ຺ຕາ ສມຸຈ຺ຉິນ຺ນຕ຺ຕາ ອຸປ຺ປຊ຺ຊຕິ ວິມຸຕ຺ຕິສຸເຂ ຎາຓໍ, ອນາຄາມິມຄ຺ເຄນ ອນຸສຫຄຕສ຺ສ ກາມຣາຄສຎ຺ໂຎຊນສ຺ສ…ເປ… ປຏິຆສຎ຺ໂຎຊນສ຺ສ, ອນຸສຫຄຕສ຺ສ ກາມຣາຄານຸສຍສ຺ສ, ປຏິຆານຸສຍສ຺ສ ປຫີນຕ຺ຕາ ສມຸຈ຺ຉິນ຺ນຕ຺ຕາ ອຸປ຺ປຊ຺ຊຕິ ວິມຸຕ຺ຕິສຸເຂ ຎາຓໍ, ອຣຫຕ຺ຕມຄ຺ເຄນ, ຣູປຣາຄສ຺ສ…ເປ… ອຣູປຣາຄສ຺ສ, ມານສ຺ສ, ອຸທ຺ຘຈ຺ຈສ຺ສ, ອວິຊ຺ຊາຍ, ມານານຸສຍສ຺ສ, ຠວຣາຄານຸສຍສ຺ສ, ອວິຊ຺ຊານຸສຍສ຺ສ ປຫີນຕ຺ຕາ ສມຸຈ຺ຉິນ຺ນຕ຺ຕາ ອຸປ຺ປຊ຺ຊຕິ ວິມຸຕ຺ຕິສຸເຂ ຎາຓໍ. ອິມານິ ເອກວີສຕິ ວິມຸຕ຺ຕິສຸເຂ ຎາຓານິ. ໂສຬສວຕ຺ຖຸກໍ ອານາປານສ຺ສຕິສມາຘິໍ ຠາວຍໂຕ ສມຘິການິ ອິມານິ ທ຺ເວ ຎາຓສຕານິ ອຸປ຺ປຊ຺ຊນ຺ຕິ.

ຎາຓຣາສິຉກ຺ກນິທ຺ເທໂສ ຉຏ຺ໂຐ.

ອານາປານສ຺ສຕິກຖາ [ອານາປານກຖາ (ສ຺ຍາ. ກ.)] ນິຏ຺ຐິຕາ.