໓. ອານາປານສ຺ສຕິກຖາ
໑. ຄຓນວາຣ
໑໕໒. ໂສຬສວຕ຺ຖຸກໍ ອານາປານສ຺ສຕິສມາຘິໍ [ອານາປານສຕິສມາຘິໍ (ສີ. ອຏ຺ຐ.)] ຠາວຍໂຕ ສມາຘິການິ ທ຺ເວ ຎາຓສຕານິ ອຸປ຺ປຊ຺ຊນ຺ຕິ – ອຏ຺ຐ ປຣິປນ຺ເຖ [ປຣິພນ຺ເຘ (ກ.)] ຎາຓານິ, ອຏ຺ຐ ຈ ອຸປກາເຣ ຎາຓານິ, ອຏ຺ຐາຣສ ອຸປກ຺ກິເລເສ ຎາຓານິ, ເຕຣສ ໂວທາເນ ຎາຓານິ, ພາຕ຺ຕິໍສ ສໂຕກາຣິສ຺ສ [ສໂຕກາຣີສຸ (ສ຺ຍາ.)] ຎາຓານິ, ຈຕຸວີສຕິ ສມາຘິວເສນ ຎາຓານິ, ທ຺ເວສຕ຺ຕຕິ ວິປສ຺ສນາວເສນ ຎາຓານິ, ອຏ຺ຐ ນິພ຺ພິທາຎາຓານິ, ອຏ຺ຐ ນິພ຺ພິທານຸໂລມຎາຓານິ, ອຏ຺ຐ ນິພ຺ພິທາປຏິປ຺ປສ຺ສທ຺ຘິຎາຓານິ, ເອກວີສຕິ ວິມຸຕ຺ຕິສຸເຂ ຎາຓານິ.
ກຕມານິ ອຏ຺ຐ ປຣິປນ຺ເຖ ຎາຓານິ, ອຏ຺ຐ ຈ ອຸປກາເຣ ຎາຓານິ? ກາມຈ຺ຉນ຺ໂທ ສມາຘິສ຺ສ ປຣິປນ຺ໂຖ, ເນກ຺ຂມ຺ມໍ ສມາຘິສ຺ສ ອຸປກາຣໍ. ພ຺ຍາປາໂທ ສມາຘິສ຺ສ ປຣິປນ຺ໂຖ, ອພ຺ຍາປາໂທ ສມາຘິສ຺ສ ອຸປກາຣໍ. ຖິນມິທ຺ຘໍ ສມາຘິສ຺ສ ປຣິປນ຺ໂຖ, ອາໂລກສຎ຺ຎາ ສມາຘິສ຺ສ ອຸປກາຣໍ. ອຸທ຺ຘຈ຺ຈໍ ສມາຘິສ຺ສ ປຣິປນ຺ໂຖ, ອວິກ຺ເຂໂປ ສມາຘິສ຺ສ ອຸປກາຣໍ. ວິຈິກິຈ຺ຉາ ສມາຘິສ຺ສ ປຣິປນ຺ໂຖ, ຘມ຺ມວວຕ຺ຖານໍ ສມາຘິສ຺ສ ອຸປກາຣໍ. ອວິຊ຺ຊາ ສມາຘິສ຺ສ ປຣິປນ຺ໂຖ, ຎາຓໍ ສມາຘິສ຺ສ ອຸປກາຣໍ. ອຣຕິ ສມາຘິສ຺ສ ປຣິປນ຺ໂຖ, ປາໂມຊ຺ຊໍ ສມາຘິສ຺ສ ອຸປກາຣໍ. ສພ຺ເພປິ ອກຸສລາ ຘມ຺ມາ ສມາຘິສ຺ສ ປຣິປນ຺ຖາ, ສພ຺ເພປິ ກຸສລາ ຘມ຺ມາ ສມາຘິສ຺ສ ອຸປກາຣາ. ອິມານິ ອຏ຺ຐ ປຣິປນ຺ເຖ ຎາຓານິ, ອຏ຺ຐ ຈ ອຸປກາເຣ ຎາຓານິ.
ຄຓນວາໂຣ ປຐໂມ.
໒. ໂສຬສຎາຓນິທ຺ເທໂສ
໑໕໓. ອິເມຫິ ໂສຬສຫິ ອາກາເຣຫິ ອຸທຸຈິຕ຺ຕໍ ຈິຕ຺ຕໍ ສມຸທຸຈິຕໍ ຈິຕ຺ຕໍ ເອກຕ຺ເຕ ສນ຺ຕິຏ຺ຐຕິ, ນີວຣເຓຫິ ວິສຸຊ຺ຌຕິ. ກຕເມ ເຕ ເອກຕ຺ຕາ? ເນກ຺ຂມ຺ມໍ ເອກຕ຺ຕໍ, ອພ຺ຍາປາໂທ ເອກຕ຺ຕໍ, ອາໂລກສຎ຺ຎາ ເອກຕ຺ຕໍ, ອວິກ຺ເຂໂປ ເອກຕ຺ຕໍ, ຘມ຺ມວວຕ຺ຖານໍ ເອກຕ຺ຕໍ, ຎາຓໍ ເອກຕ຺ຕໍ, ປາໂມຊ຺ຊໍ ເອກຕ຺ຕໍ, ສພ຺ເພປິ ກຸສລາ ຘມ຺ມາ ເອກຕ຺ຕາ.
ນີວຣຓາຕິ, ກຕເມ ເຕ ນີວຣຓາ? ກາມຈ຺ຉນ຺ໂທ ນີວຣຓໍ, ພ຺ຍາປາໂທ ນີວຣຓໍ, ຖິນມິທ຺ຘໍ ນີວຣຓໍ, ອຸທ຺ຘຈ຺ຈກຸກ຺ກຸຈ຺ຈໍ ນີວຣຓໍ, ວິຈິກິຈ຺ຉາ ນີວຣຓໍ, ອວິຊ຺ຊາ ນີວຣຓໍ, ອຣຕິ ນີວຣຓໍ, ສພ຺ເພປິ ອກຸສລາ ຘມ຺ມາ ນີວຣຓາ.
ນີວຣຓາຕິ, ເກນຏ຺ເຐນ ນີວຣຓາ? ນິຍ຺ຍານາວຣຓຏ຺ເຐນ ນີວຣຓາ. ກຕເມ ເຕ ນິຍ຺ຍານາ? ເນກ຺ຂມ຺ມໍ ອຣິຍານໍ ນິຍ຺ຍານໍ. ເຕນ ຈ ເນກ຺ຂມ຺ເມນ ອຣິຍາ ນິຍ຺ຍນ຺ຕິ. ກາມຈ຺ຉນ຺ໂທ ນິຍ຺ຍານາວຣຓໍ. ເຕນ ຈ ກາມຈ຺ຉນ຺ເທນ ນິວຸຕຕ຺ຕາ ເນກ຺ຂມ຺ມໍ ອຣິຍານໍ ນິຍ຺ຍານໍ ນປ຺ປຊານາຕີຕິ – ກາມຈ຺ຉນ຺ໂທ ນິຍ຺ຍານາວຣຓໍ. ອພ຺ຍາປາໂທ ອຣິຍານໍ ນິຍ຺ຍານໍ. ເຕນ ຈ ອພ຺ຍາປາເທນ ອຣິຍາ ນິຍ຺ຍນ຺ຕິ. ພ຺ຍາປາໂທ ນິຍ຺ຍານາວຣຓໍ. ເຕນ ຈ ພ຺ຍາປາເທນ ນິວຸຕຕ຺ຕາ ອພ຺ຍາປາທໍ ອຣິຍານໍ ນິຍ຺ຍານໍ ນປ຺ປຊານາຕີຕິ – ພ຺ຍາປາໂທ ນິຍ຺ຍານາວຣຓໍ. ອາໂລກສຎ຺ຎາ ອຣິຍານໍ ນິຍ຺ຍານໍ. ຕາຍ ຈ ອາໂລກສຎ຺ຎາຍ ອຣິຍາ ນິຍ຺ຍນ຺ຕິ. ຖິນມິທ຺ຘໍ ນິຍ຺ຍານາວຣຓໍ. ເຕນ ຈ ຖິນມິທ຺ເຘນ ນິວຸຕຕ຺ຕາ ອາໂລກສຎ຺ຎໍ ອຣິຍານໍ ນິຍ຺ຍານໍ ນປ຺ປຊານາຕີຕິ – ຖິນມິທ຺ຘໍ ນິຍ຺ຍານາວຣຓໍ. ອວິກ຺ເຂໂປ ອຣິຍານໍ ນິຍ຺ຍານໍ. ເຕນ ຈ ອວິກ຺ເຂເປນ ອຣິຍາ ນິຍ຺ຍນ຺ຕິ. ອຸທ຺ຘຈ຺ຈໍ ນິຍ຺ຍານາວຣຓໍ. ເຕນ ຈ ອຸທ຺ຘຈ຺ເຈນ ນິວຸຕຕ຺ຕາ ອວິກ຺ເຂປໍ ອຣິຍານໍ ນິຍ຺ຍານໍ ນປ຺ປຊານາຕີຕິ – ອຸທ຺ຘຈ຺ຈໍ ນິຍ຺ຍານາວຣຓໍ. ຘມ຺ມວວຕ຺ຖານໍ ອຣິຍານໍ ນິຍ຺ຍານໍ. ເຕນ ຈ ຘມ຺ມວວຕ຺ຖາເນນ ອຣິຍາ ນິຍ຺ຍນ຺ຕິ. ວິຈິກິຈ຺ຉາ ນິຍ຺ຍານາວຣຓໍ. ຕາຍ ຈ ວິຈິກິຈ຺ຉາຍ ນິວຸຕຕ຺ຕາ ຘມ຺ມວວຕ຺ຖານໍ ອຣິຍານໍ ນິຍ຺ຍານໍ ນປ຺ປຊານາຕີຕິ – ວິຈິກິຈ຺ຉາ ນິຍ຺ຍານາວຣຓໍ. ຎາຓໍ ອຣິຍານໍ ນິຍ຺ຍານໍ. ເຕນ ຈ ຎາເຓນ ອຣິຍາ ນິຍ຺ຍນ຺ຕິ. ອວິຊ຺ຊາ ນິຍ຺ຍານາວຣຓໍ. ຕາຍ ຈ ອວິຊ຺ຊາຍ ນິວຸຕຕ຺ຕາ ຎາຓໍ ອຣິຍານໍ ນິຍ຺ຍານໍ ນປ຺ປຊານາຕີຕິ – ອວິຊ຺ຊາ ນິຍ຺ຍານາວຣຓໍ. ປາໂມຊ຺ຊໍ ອຣິຍານໍ ນິຍ຺ຍານໍ. ເຕນ ຈ ປາໂມຊ຺ເຊນ ອຣິຍາ ນິຍ຺ຍນ຺ຕິ. ອຣຕິ ນິຍ຺ຍານາວຣຓໍ. ຕາຍ ຈ ອຣຕິຍາ ນິວຸຕຕ຺ຕາ ປາໂມຊ຺ຊໍ ອຣິຍານໍ ນິຍ຺ຍານໍ ນປ຺ປຊານາຕີຕິ – ອຣຕິ ນິຍ຺ຍານາວຣຓໍ. ສພ຺ເພປິ ກຸສລາ ຘມ຺ມາ ອຣິຍານໍ ນິຍ຺ຍານໍ. ເຕຫິ ຈ ກຸສເລຫິ ຘມ຺ເມຫິ ອຣິຍາ ນິຍ຺ຍນ຺ຕິ. ສພ຺ເພປິ ອກຸສລາ ຘມ຺ມາ ນິຍ຺ຍານາວຣຓາ. ເຕຫິ ຈ ອກຸສເລຫິ ຘມ຺ເມຫິ ນິວຸຕຕ຺ຕາ ກຸສເລ ຘມ຺ເມ ອຣິຍານໍ ນິຍ຺ຍານໍ ນປ຺ປຊານາຕີຕິ – ສພ຺ເພປິ ອກຸສລາ ຘມ຺ມາ ນິຍ຺ຍານາວຣຓາ. ອິເມຫິ ຈ ປນ ນີວຣເຓຫິ ວິສຸທ຺ຘຈິຕ຺ຕສ຺ສ ໂສຬສວຕ຺ຖຸກໍ ອານາປານສ຺ສຕິສມາຘິໍ ຠາວຍໂຕ ຂຓິກສໂມຘານາ.
ໂສຬສຎາຓນິທ຺ເທໂສ ທຸຕິໂຍ.
໓. ອຸປກ຺ກິເລສຎາຓນິທ຺ເທໂສ
ປຐມຈ຺ຉກ຺ກໍ
໑໕໔. ອິເມຫິ ຈ ປນ ນີວຣເຓຫິ ວິສຸທ຺ຘຈິຕ຺ຕສ຺ສ ໂສຬສວຕ຺ຖຸກໍ ອານາປານສ຺ສຕິສມາຘິໍ ຠາວຍໂຕ ຂຓິກສໂມຘານາ ກຕເມ ອຏ຺ຐາຣສ ອຸປກ຺ກິເລສາ ອຸປ຺ປຊ຺ຊນ຺ຕິ? ອສ຺ສາສາທິມຊ຺ຌປຣິໂຍສານໍ ສຕິຍາ ອນຸຄຈ຺ຉໂຕ ອຊ຺ຌຕ຺ຕວິກ຺ເຂປຄຕໍ ຈິຕ຺ຕໍ ສມາຘິສ຺ສ ປຣິປນ຺ໂຖ. ປສ຺ສາສາທິມຊ຺ຌປຣິໂຍສານໍ ສຕິຍາ ອນຸຄຈ຺ຉໂຕ ພຫິທ຺ຘາວິກ຺ເຂປຄຕໍ ຈິຕ຺ຕໍ ສມາຘິສ຺ສ ປຣິປນ຺ໂຖ. ອສ຺ສາສປຏິກງ຺ຂນາ ນິກນ຺ຕິ ຕຓ຺ຫາຈຣິຍາ ສມາຘິສ຺ສ ປຣິປນ຺ໂຖ. ປສ຺ສາສປຏິກງ຺ຂນາ ນິກນ຺ຕິ ຕຓ຺ຫາຈຣິຍາ ສມາຘິສ຺ສ ປຣິປນ຺ໂຖ. ອສ຺ສາເສນາຠິຕຸນ຺ນສ຺ສ ປສ຺ສາສປຏິລາເຠ ມຸຈ຺ຉນາ ສມາຘິສ຺ສ ປຣິປນ຺ໂຖ. ປສ຺ສາເສນາຠິຕຸນ຺ນສ຺ສ ອສ຺ສາສປຏິລາເຠ ມຸຈ຺ຉນາ ສມາຘິສ຺ສ ປຣິປນ຺ໂຖ.
ອນຸຄຈ຺ຉນາ ຈ ອສ຺ສາສໍ, ປສ຺ສາສໍ ອນຸຄຈ຺ຉນາ;
ສຕິ ອຊ຺ຌຕ຺ຕວິກ຺ເຂປາ, ກງ຺ຂນາ ພຫິທ຺ຘາວິກ຺ເຂປປຕ຺ຖນາ [ວິກ຺ເຂປປນ຺ຖນາ (ສ຺ຍາ.)].
ອສ຺ສາເສນາຠິຕຸນ຺ນສ຺ສ, ປສ຺ສາສປຏິລາເຠ ມຸຈ຺ຉນາ;
ປສ຺ສາເສນາຠິຕຸນ຺ນສ຺ສ, ອສ຺ສາສປຏິລາເຠ ມຸຈ຺ຉນາ.
ຉ ເອເຕ ອຸປກ຺ກິເລສາ, ອານາປານສ຺ສຕິສມາຘິສ຺ສ;
ເຍຫິ ວິກ຺ຂິປ຺ປມານສ຺ສ [ວິກມ຺ປມານສ຺ສ (ສ຺ຍາ.)], ໂນ ຈ ຈິຕ຺ຕໍ ວິມຸຈ຺ຈຕິ;
ວິໂມກ຺ຂໍ ອປ຺ປຊານນ຺ຕາ, ເຕ ໂຫນ຺ຕິ ປຣປຕ຺ຕິຍາຕິ.
ທຸຕິຍຈ຺ຉກ຺ກໍ
໑໕໕. ນິມິຕ຺ຕໍ ອາວຊ຺ຊໂຕ ອສ຺ສາເສ ຈິຕ຺ຕໍ ວິກມ຺ປຕິ – ສມາຘິສ຺ສ ປຣິປນ຺ໂຖ. ອສ຺ສາສໍ ອາວຊ຺ຊໂຕ ນິມິຕ຺ເຕ ຈິຕ຺ຕໍ ວິກມ຺ປຕິ – ສມາຘິສ຺ສ ປຣິປນ຺ໂຖ. ນິມິຕ຺ຕໍ ອາວຊ຺ຊໂຕ ປສ຺ສາເສ ຈິຕ຺ຕໍ ວິກມ຺ປຕິ – ສມາຘິສ຺ສ ປຣິປນ຺ໂຖ. ປສ຺ສາສໍ ອາວຊ຺ຊໂຕ ນິມິຕ຺ເຕ ຈິຕ຺ຕໍ ວິກມ຺ປຕິ – ສມາຘິສ຺ສ ປຣິປນ຺ໂຖ. ອສ຺ສາສໍ ອາວຊ຺ຊໂຕ ປສ຺ສາເສ ຈິຕ຺ຕໍ ວິກມ຺ປຕິ – ສມາຘິສ຺ສ ປຣິປນ຺ໂຖ. ປສ຺ສາສໍ ອາວຊ຺ຊໂຕ ອສ຺ສາເສ ຈິຕ຺ຕໍ ວິກມ຺ປຕິ – ສມາຘິສ຺ສ ປຣິປນ຺ໂຖ.
ນິມິຕ຺ຕໍ ອາວຊ຺ຊມານສ຺ສ, ອສ຺ສາເສ ວິກ຺ຂິປເຕ ມໂນ;
ອສ຺ສາສໍ ອາວຊ຺ຊມານສ຺ສ, ນິມິຕ຺ເຕ ຈິຕ຺ຕໍ ວິກມ຺ປຕິ.
ນິມິຕ຺ຕໍ ອາວຊ຺ຊມານສ຺ສ, ປສ຺ສາເສ ວິກ຺ຂິປເຕ ມໂນ;
ປສ຺ສາສໍ ອາວຊ຺ຊມານສ຺ສ, ນິມິຕ຺ເຕ ຈິຕ຺ຕໍ ວິກມ຺ປຕິ.
ອສ຺ສາສໍ ອາວຊ຺ຊມານສ຺ສ, ປສ຺ສາເສ ວິກ຺ຂິປເຕ ມໂນ;
ປສ຺ສາສໍ ອາວຊ຺ຊມານສ຺ສ, ອສ຺ສາເສ ຈິຕ຺ຕໍ ວິກມ຺ປຕິ.
ຉ ເອເຕ ອຸປກ຺ກິເລສາ, ອານາປານສ຺ສຕິສມາຘິສ຺ສ;
ເຍຫິ ວິກ຺ຂິປ຺ປມານສ຺ສ, ໂນ ຈ ຈິຕ຺ຕໍ ວິມຸຈ຺ຈຕິ;
ວິໂມກ຺ຂໍ ອປ຺ປຊານນ຺ຕາ, ເຕ ໂຫນ຺ຕິ ປຣປຕ຺ຕິຍາຕິ.
ຕຕິຍຈ຺ຉກ຺ກໍ
໑໕໖. ອຕີຕານຸຘາວນໍ ຈິຕ຺ຕໍ ວິກ຺ເຂປານຸປຕິຕໍ – ສມາຘິສ຺ສ ປຣິປນ຺ໂຖ. ອນາຄຕປຏິກງ຺ຂນໍ ຈິຕ຺ຕໍ ວິກມ຺ປິຕໍ – ສມາຘິສ຺ສ ປຣິປນ຺ໂຖ. ລີນໍ ຈິຕ຺ຕໍ ໂກສຊ຺ຊານຸປຕິຕໍ – ສມາຘິສ຺ສ ປຣິປນ຺ໂຖ. ອຕິປຄ຺ຄຫິຕໍ ຈິຕ຺ຕໍ ອຸທ຺ຘຈ຺ຈານຸປຕິຕໍ – ສມາຘິສ຺ສ ປຣິປນ຺ໂຖ. ອຠິນຕໍ ຈິຕ຺ຕໍ ຣາຄານຸປຕິຕໍ – ສມາຘິສ຺ສ ປຣິປນ຺ໂຖ. ອປນຕໍ ຈິຕ຺ຕໍ ພ຺ຍາປາທານຸປຕິຕໍ – ສມາຘິສ຺ສ ປຣິປນ຺ໂຖ.
ອຕີຕານຸຘາວນໍ ຈິຕ຺ຕໍ, ອນາຄຕປຏິກງ຺ຂນໍ ລີນໍ;
ອຕິປຄ຺ຄຫິຕໍ ອຠິນຕໍ, ອປນຕໍ ຈິຕ຺ຕໍ ນ ສມາຘິຍຕິ.
ຉ ເອເຕ ອຸປກ຺ກິເລສາ, ອານາປານສ຺ສຕິສມາຘິສ຺ສ;
ເຍຫິ ອຸປກ຺ກິລິຏ຺ຐສງ຺ກປ຺ໂປ, ອຘິຈິຕ຺ຕໍ ນປ຺ປຊານາຕີຕິ.
໑໕໗. ອສ຺ສາສາທິມຊ຺ຌປຣິໂຍສານໍ ສຕິຍາ ອນຸຄຈ຺ຉໂຕ ອຊ຺ຌຕ຺ຕໍ ວິກ຺ເຂປຄເຕນ ຈິຕ຺ເຕນ ກາໂຍປິ ຈິຕ຺ຕມ຺ປິ ສາຣທ຺ຘາ ຈ ໂຫນ຺ຕິ ອິຎ຺ຊິຕາ ຈ ຜນ຺ທິຕາ ຈ. ປສ຺ສາສາທິມຊ຺ຌປຣິໂຍສານໍ ສຕິຍາ ອນຸຄຈ຺ຉໂຕ ພຫິທ຺ຘາວິກ຺ເຂປຄເຕນ ຈິຕ຺ເຕນ ກາໂຍປິ ຈິຕ຺ຕມ຺ປິ ສາຣທ຺ຘາ ຈ ໂຫນ຺ຕິ ອິຎ຺ຊິຕາ ຈ ຜນ຺ທິຕາ ຈ. ອສ຺ສາສປຏິກງ຺ຂນາຍ ນິກນ຺ຕິຍາ ຕຓ຺ຫາຈຣິຍາຍ ກາໂຍປິ ຈິຕ຺ຕມ຺ປິ ສາຣທ຺ຘາ ຈ ໂຫນ຺ຕິ ອິຎ຺ຊິຕາ ຈ ຜນ຺ທິຕາ ຈ. ປສ຺ສາສປຏິກງ຺ຂນາຍ ນິກນ຺ຕິຍາ ຕຓ຺ຫາຈຣິຍາຍ ກາໂຍປິ ຈິຕ຺ຕມ຺ປິ ສາຣທ຺ຘາ ຈ ໂຫນ຺ຕິ ອິຎ຺ຊິຕາ ຈ ຜນ຺ທິຕາ ຈ. ອສ຺ສາເສນາຠິຕຸນ຺ນສ຺ສ ປສ຺ສາສປຏິລາເຠ ມຸຈ຺ຉິຕຕ຺ຕາ ກາໂຍປິ ຈິຕ຺ຕມ຺ປິ ສາຣທ຺ຘາ ຈ ໂຫນ຺ຕິ ອິຎ຺ຊິຕາ ຈ ຜນ຺ທິຕາ ຈ. ປສ຺ສາເສນາຠິຕຸນ຺ນສ຺ສ ອສ຺ສາສປຏິລາເຠ ມຸຈ຺ຉິຕຕ຺ຕາ ກາໂຍປິ ຈິຕ຺ຕມ຺ປິ ສາຣທ຺ຘາ ຈ ໂຫນ຺ຕິ ອິຎ຺ຊິຕາ ຈ ຜນ຺ທິຕາ ຈ. ນິມິຕ຺ຕໍ ອາວຊ຺ຊໂຕ ອສ຺ສາເສ ຈິຕ຺ຕໍ ວິກມ຺ປິຕຕ຺ຕາ ກາໂຍປິ ຈິຕ຺ຕມ຺ປິ ສາຣທ຺ຘາ ຈ ໂຫນ຺ຕິ ອິຎ຺ຊິຕາ ຈ ຜນ຺ທິຕາ ຈ. ອສ຺ສາສໍ ອາວຊ຺ຊໂຕ ນິມິຕ຺ເຕ ຈິຕ຺ຕໍ ວິກມ຺ປິຕຕ຺ຕາ ກາໂຍປິ ຈິຕ຺ຕມ຺ປິ ສາຣທ຺ຘາ ຈ ໂຫນ຺ຕິ ອິຎ຺ຊິຕາ ຈ ຜນ຺ທິຕາ ຈ. ນິມິຕ຺ຕໍ ອາວຊ຺ຊໂຕ ປສ຺ສາເສ ຈິຕ຺ຕໍ ວິກມ຺ປິຕຕ຺ຕາ ກາໂຍປິ ຈິຕ຺ຕມ຺ປິ ສາຣທ຺ຘາ ຈ ໂຫນ຺ຕິ ອິຎ຺ຊິຕາ ຈ ຜນ຺ທິຕາ ຈ. ປສ຺ສາສໍ ອາວຊ຺ຊໂຕ ນິມິຕ຺ເຕ ຈິຕ຺ຕໍ ວິກມ຺ປິຕຕ຺ຕາ ກາໂຍປິ ຈິຕ຺ຕມ຺ປິ ສາຣທ຺ຘາ ຈ ໂຫນ຺ຕິ ອິຎ຺ຊິຕາ ຈ ຜນ຺ທິຕາ ຈ. ອສ຺ສາສໍ ອາວຊ຺ຊໂຕ ປສ຺ສາເສ ຈິຕ຺ຕໍ ວິກມ຺ປິຕຕ຺ຕາ ກາໂຍປິ ຈິຕ຺ຕມ຺ປິ ສາຣທ຺ຘາ ຈ ໂຫນ຺ຕິ ອິຎ຺ຊິຕາ ຈ ຜນ຺ທິຕາ ຈ. ປສ຺ສາສໍ ອາວຊ຺ຊໂຕ ອສ຺ສາເສ ຈິຕ຺ຕໍ ວິກມ຺ປິຕຕ຺ຕາ ກາໂຍປິ ຈິຕ຺ຕມ຺ປິ ສາຣທ຺ຘາ ຈ ໂຫນ຺ຕິ ອິຎ຺ຊິຕາ ຈ ຜນ຺ທິຕາ ຈ. ອຕີຕານຸຘາວເນນ ຈິຕ຺ເຕນ ວິກ຺ເຂປານຸປຕິເຕນ ກາໂຍປິ ຈິຕ຺ຕມ຺ປິ ສາຣທ຺ຘາ ຈ ໂຫນ຺ຕິ ອິຎ຺ຊິຕາ ຈ ຜນ຺ທິຕາ ຈ. ອນາຄຕປຏິກງ຺ຂເນນ ຈິຕ຺ເຕນ ວິກມ຺ປິເຕນ ກາໂຍປິ ຈິຕ຺ຕມ຺ປິ ສາຣທ຺ຘາ ຈ ໂຫນ຺ຕິ ອິຎ຺ຊິຕາ ຈ ຜນ຺ທິຕາ ຈ. ລີເນນ ຈິຕ຺ເຕນ ໂກສຊ຺ຊານຸປຕິເຕນ ກາໂຍປິ ຈິຕ຺ຕມ຺ປິ ສາຣທ຺ຘາ ຈ ໂຫນ຺ຕິ ອິຎ຺ຊິຕາ ຈ ຜນ຺ທິຕາ ຈ. ອຕິປຄ຺ຄຫິເຕນ ຈິຕ຺ເຕນ ອຸທ຺ຘຈ຺ຈານຸປຕິເຕນ ກາໂຍປິ ຈິຕ຺ຕມ຺ປິ ສາຣທ຺ຘາ ຈ ໂຫນ຺ຕິ ອິຎ຺ຊິຕາ ຈ ຜນ຺ທິຕາ ຈ. ອຠິນເຕນ ຈິຕ຺ເຕນ ຣາຄານຸປຕິເຕນ ກາໂຍປິ ຈິຕ຺ຕມ຺ປິ ສາຣທ຺ຘາ ຈ ໂຫນ຺ຕິ ອິຎ຺ຊິຕາ ຈ ຜນ຺ທິຕາ ຈ. ອປນເຕນ ຈິຕ຺ເຕນ ພ຺ຍາປາທານຸປຕິເຕນ ກາໂຍປິ ຈິຕ຺ຕມ຺ປິ ສາຣທ຺ຘາ ຈ ໂຫນ຺ຕິ ອິຎ຺ຊິຕາ ຈ ຜນ຺ທິຕາ ຈ.
ອານາປານສ຺ສຕິ ຍສ຺ສ, ປຣິປຸຓ຺ຓາ ອຠາວິຕາ;
ກາໂຍປິ ອິຎ຺ຊິໂຕ ໂຫຕິ, ຈິຕ຺ຕມ຺ປິ ໂຫຕິ ອິຎ຺ຊິຕໍ;
ກາໂຍປິ ຜນ຺ທິໂຕ ໂຫຕິ, ຈິຕ຺ຕມ຺ປິ ໂຫຕິ ຜນ຺ທິຕໍ.
ອານາປານສ຺ສຕິ ຍສ຺ສ, ປຣິປຸຓ຺ຓາ ສຸຠາວິຕາ;
ກາໂຍປິ ອນິຎ຺ຊິໂຕ ໂຫຕິ, ຈິຕ຺ຕມ຺ປິ ໂຫຕິ ອນິຎ຺ຊິຕໍ;
ກາໂຍປິ ອຜນ຺ທິໂຕ ໂຫຕິ, ຈິຕ຺ຕມ຺ປິ ໂຫຕິ ອຜນ຺ທິຕນ຺ຕິ.
ອິເມຫິ ຈ ປນ ນີວຣເຓຫິ ວິສຸທ຺ຘຈິຕ຺ຕສ຺ສ ໂສຬສວຕ຺ຖຸກໍ ອານາປານສ຺ສຕິສມາຘິໍ ຠາວຍໂຕ ຂຓິກສໂມຘານາ ອິເມ ອຏ຺ຐາຣສ ອຸປກ຺ກິເລສາ ອຸປ຺ປຊ຺ຊນ຺ຕິ.
ອຸປກ຺ກິເລສຎາຓນິທ຺ເທໂສ ຕຕິໂຍ.
໔. ໂວທານຎາຓນິທ຺ເທໂສ
໑໕໘. ກຕມານິ ເຕຣສ ໂວທາເນ ຎາຓານິ? ອຕີຕານຸຘາວນໍ ຈິຕ຺ຕໍ ວິກ຺ເຂປານຸປຕິຕໍ; ຕໍ ວິວຊ຺ຊຍິຕ຺ວາ ເອກຏ຺ຐາເນ ສມາທຫຕິ – ເອວມ຺ປິ ຈິຕ຺ຕໍ ນ ວິກ຺ເຂປໍ ຄຈ຺ຉຕິ. ອນາຄຕປຏິກງ຺ຂນໍ ຈິຕ຺ຕໍ ວິກມ຺ປິຕໍ; ຕໍ ວິວຊ຺ຊຍິຕ຺ວາ ຕຕ຺ເຖວ ອຘິໂມເຈຕິ – ເອວມ຺ປິ ຈິຕ຺ຕໍ ນ ວິກ຺ເຂປໍ ຄຈ຺ຉຕິ. ລີນໍ ຈິຕ຺ຕໍ ໂກສຊ຺ຊານຸປຕິຕໍ; ຕໍ ປຄ຺ຄຓ຺ຫິຕ຺ວາ ໂກສຊ຺ຊໍ ປຊຫຕິ – ເອວມ຺ປິ ຈິຕ຺ຕໍ ນ ວິກ຺ເຂປໍ ຄຈ຺ຉຕິ. ອຕິປຄ຺ຄຫິຕໍ ຈິຕ຺ຕໍ ອຸທ຺ຘຈ຺ຈານຸປຕິຕໍ; ຕໍ ວິນິຄ຺ຄຓ຺ຫິຕ຺ວາ ອຸທ຺ຘຈ຺ຈໍ ປຊຫຕິ – ເອວມ຺ປິ ຈິຕ຺ຕໍ ນ ວິກ຺ເຂປໍ ຄຈ຺ຉຕິ. ອຠິນຕໍ ຈິຕ຺ຕໍ ຣາຄານຸປຕິຕໍ; ຕໍ ສມ຺ປຊາໂນ ຫຸຕ຺ວາ ຣາຄໍ ປຊຫຕິ – ເອວມ຺ປິ ຈິຕ຺ຕໍ ນ ວິກ຺ເຂປໍ ຄຈ຺ຉຕິ. ອປນຕໍ ຈິຕ຺ຕໍ ພ຺ຍາປາທານຸປຕິຕໍ; ຕໍ ສມ຺ປຊາໂນ ຫຸຕ຺ວາ ພ຺ຍາປາທໍ ປຊຫຕິ – ເອວມ຺ປິ ຈິຕ຺ຕໍ ນ ວິກ຺ເຂປໍ ຄຈ຺ຉຕິ. ອິເມຫິ ຉຫິ ຐາເນຫິ ປຣິສຸທ຺ຘໍ ຈິຕ຺ຕໍ ປຣິໂຍທາຕໍ ເອກຕ຺ຕຄຕໍ ໂຫຕິ.
ກຕເມ ເຕ ເອກຕ຺ຕາ? ທານໂວສຄ຺ຄຸປຏ຺ຐາເນກຕ຺ຕໍ, ສມຖນິມິຕ຺ຕຸປຏ຺ຐາເນກຕ຺ຕໍ, ວຍລກ຺ຂຓຸປຏ຺ຐາເນກຕ຺ຕໍ, ນິໂຣຘຸປຏ຺ຐາເນກຕ຺ຕໍ. ທານໂວສຄ຺ຄຸປຏ຺ຐາເນກຕ຺ຕໍ ຈາຄາຘິມຸຕ຺ຕານໍ, ສມຖນິມິຕ຺ຕຸປຏ຺ຐາເນກຕ຺ຕຎ຺ຈ ອຘິຈິຕ຺ຕມນຸຍຸຕ຺ຕານໍ, ວຍລກ຺ຂຓຸປຏ຺ຐາເນກຕ຺ຕຎ຺ຈ ວິປສ຺ສການໍ, ນິໂຣຘຸປຏ຺ຐາເນກຕ຺ຕຎ຺ຈ ອຣິຍປຸຄ຺ຄລານໍ – ອິເມຫິ ຈຕູຫິ ຐາເນຫິ ເອກຕ຺ຕຄຕໍ ຈິຕ຺ຕໍ ປຏິປທາວິສຸທ຺ຘິປກ຺ຂນ຺ທຎ຺ເຈວ ໂຫຕິ, ອຸເປກ຺ຂານຸພ຺ຣູຫິຕຎ຺ຈ, ຎາເຓນ ຈ ສມ຺ປຫໍສິຕໍ.
ປຐມສ຺ສ ຌານສ຺ສ ໂກ ອາທິ, ກິໍ ມຊ຺ເຌ, ກິໍ ປຣິໂຍສານໍ? ປຐມສ຺ສ ຌານສ຺ສ ປຏິປທາວິສຸທ຺ຘິ ອາທິ, ອຸເປກ຺ຂານຸພ຺ຣູຫນາ ມຊ຺ເຌ, ສມ຺ປຫໍສນາ ປຣິໂຍສານໍ. ປຐມສ຺ສ ຌານສ຺ສ ປຏິປທາວິສຸທ຺ຘິ ອາທິ. ອາທິສ຺ສ ກຕິ ລກ຺ຂຓານິ? ອາທິສ຺ສ ຕີຓິ ລກ຺ຂຓານິ. ໂຍ ຕສ຺ສ ປຣິປນ຺ໂຖ ຕໂຕ ຈິຕ຺ຕໍ ວິສຸຊ຺ຌຕິ, ວິສຸທ຺ຘຕ຺ຕາ ຈິຕ຺ຕໍ ມຊ຺ຌິມໍ ສມຖນິມິຕ຺ຕໍ ປຏິປຊ຺ຊຕິ, ປຏິປນ຺ນຕ຺ຕາ ຕຕ຺ຖ ຈິຕ຺ຕໍ ປກ຺ຂນ຺ທຕິ. ຍຎ຺ຈ ປຣິປນ຺ຖໂຕ ຈິຕ຺ຕໍ ວິສຸຊ຺ຌຕິ, ຍຎ຺ຈ ວິສຸທ຺ຘຕ຺ຕາ ຈິຕ຺ຕໍ ມຊ຺ຌິມໍ ສມຖນິມິຕ຺ຕໍ ປຏິປຊ຺ຊຕິ, ຍຎ຺ຈ ປຏິປນ຺ນຕ຺ຕາ ຕຕ຺ຖ ຈິຕ຺ຕໍ ປກ຺ຂນ຺ທຕິ. ປຐມສ຺ສ ຌານສ຺ສ ປຏິປທາວິສຸທ຺ຘິ ອາທິ. ອາທິສ຺ສ ອິມານິ ຕີຓິ ລກ຺ຂຓານິ. ເຕນ ວຸຈ຺ຈຕິ – ‘‘ປຐມໍ ຌານໍ ອາທິກລ຺ຍາຓຎ຺ເຈວ ໂຫຕິ ລກ຺ຂຓສມ຺ປນ຺ນຎ຺ຈ’’.
ປຐມສ຺ສ ຌານສ຺ສ ອຸເປກ຺ຂານຸພ຺ຣູຫນາ ມຊ຺ເຌ. ມຊ຺ຌສ຺ສ ກຕິ ລກ຺ຂຓານິ? ມຊ຺ຌສ຺ສ ຕີຓິ ລກ຺ຂຓານິ. ວິສຸທ຺ຘໍ ຈິຕ຺ຕໍ ອຊ຺ຌຸເປກ຺ຂຕິ, ສມຖປຏິປນ຺ນໍ ອຊ຺ຌຸເປກ຺ຂຕິ, ເອກຕ຺ຕຸປຏ຺ຐານໍ ອຊ຺ຌຸເປກ຺ຂຕິ. ຍຎ຺ຈ ວິສຸທ຺ຘໍ ຈິຕ຺ຕໍ ອຊ຺ຌຸເປກ຺ຂຕິ, ຍຎ຺ຈ ສມຖປຏິປນ຺ນໍ ອຊ຺ຌຸເປກ຺ຂຕິ, ຍຎ຺ຈ ເອກຕ຺ຕຸປຏ຺ຐານໍ ອຊ຺ຌຸເປກ຺ຂຕິ – ປຐມສ຺ສ ຌານສ຺ສ ອຸເປກ຺ຂານຸພ຺ຣູຫນາ ມຊ຺ເຌ. ມຊ຺ຌສ຺ສ ອິມານິ ຕີຓິ ລກ຺ຂຓານິ. ເຕນ ວຸຈ຺ຈຕິ – ‘‘ປຐມໍ ຌານໍ ມຊ຺ເຌກລ຺ຍາຓຎ຺ເຈວ ໂຫຕິ ລກ຺ຂຓສມ຺ປນ຺ນຎ຺ຈ’’.
ປຐມສ຺ສ ຌານສ຺ສ ສມ຺ປຫໍສນາ ປຣິໂຍສານໍ. ປຣິໂຍສານສ຺ສ ກຕິ ລກ຺ຂຓານິ? ປຣິໂຍສານສ຺ສ ຈຕ຺ຕາຣິ ລກ຺ຂຓານິ. ຕຕ຺ຖ ຊາຕານໍ ຘມ຺ມານໍ ອນຕິວຕ຺ຕນຏ຺ເຐນ ສມ຺ປຫໍສນາ, ອິນ຺ທ຺ຣິຍານໍ ເອກຣສຏ຺ເຐນ ສມ຺ປຫໍສນາ, ຕທຸປຄວີຣິຍວາຫນຏ຺ເຐນ ສມ຺ປຫໍສນາ, ອາເສວນຏ຺ເຐນ ສມ຺ປຫໍສນາ. ປຐມສ຺ສ ຌານສ຺ສ ສມ຺ປຫໍສນາ ປຣິໂຍສານໍ. ປຣິໂຍສານສ຺ສ ອິມານິ ຈຕ຺ຕາຣິ ລກ຺ຂຓານິ. ເຕນ ວຸຈ຺ຈຕິ – ‘‘ປຐມໍ ຌານໍ ປຣິໂຍສານກລ຺ຍາຓຎ຺ເຈວ ໂຫຕິ ລກ຺ຂຓສມ຺ປນ຺ນຎ຺ຈ’’. ເອວໍ ຕິວຕ຺ຕຄຕໍ ຈິຕ຺ຕໍ ຕິວິຘກລ຺ຍາຓກໍ ທສລກ຺ຂຓສມ຺ປນ຺ນໍ ວິຕກ຺ກສມ຺ປນ຺ນຎ຺ເຈວ ໂຫຕິ ວິຈາຣສມ຺ປນ຺ນຎ຺ຈ ປີຕິສມ຺ປນ຺ນຎ຺ຈ ສຸຂສມ຺ປນ຺ນຎ຺ຈ ຈິຕ຺ຕສ຺ສ ອຘິຏ຺ຐານສມ຺ປນ຺ນຎ຺ຈ ສທ຺ຘາສມ຺ປນ຺ນຎ຺ຈ ວີຣິຍສມ຺ປນ຺ນຎ຺ຈ ສຕິສມ຺ປນ຺ນຎ຺ຈ ສມາຘິສມ຺ປນ຺ນຎ຺ຈ ປຎ຺ຎາສມ຺ປນ຺ນຎ຺ຈ.
ທຸຕິຍສ຺ສ ຌານສ຺ສ ໂກ ອາທິ, ກິໍ ມຊ຺ເຌ, ກິໍ ປຣິໂຍສານໍ? ທຸຕິຍສ຺ສ ຌານສ຺ສ ປຏິປທາວິສຸທ຺ຘິ ອາທິ, ອຸເປກ຺ຂານຸພ຺ຣູຫນາ ມຊ຺ເຌ, ສມ຺ປຫໍສນາ ປຣິໂຍສານໍ…ເປ… ເອວໍ ຕິວຕ຺ຕຄຕໍ ຈິຕ຺ຕໍ ຕິວິຘກລ຺ຍາຓກໍ ທສລກ຺ຂຓສມ຺ປນ຺ນໍ ປີຕິສມ຺ປນ຺ນຎ຺ເຈວ ໂຫຕິ ສຸຂສມ຺ປນ຺ນຎ຺ຈ ຈິຕ຺ຕສ຺ສ ອຘິຏ຺ຐານສມ຺ປນ຺ນຎ຺ຈ ສທ຺ຘາສມ຺ປນ຺ນຎ຺ຈ ວີຣິຍສມ຺ປນ຺ນຎ຺ຈ ສຕິສມ຺ປນ຺ນຎ຺ຈ ສມາຘິສມ຺ປນ຺ນຎ຺ຈ ປຎ຺ຎາສມ຺ປນ຺ນຎ຺ຈ.
ຕຕິຍສ຺ສ ຌານສ຺ສ ໂກ ອາທິ, ກິໍ ມຊ຺ເຌ, ກິໍ ປຣິໂຍສານໍ…ເປ… ເອວໍ ຕິວຕ຺ຕຄຕໍ ຈິຕ຺ຕໍ ຕິວິຘກລ຺ຍາຓກໍ ທສລກ຺ຂຓສມ຺ປນ຺ນໍ ສຸຂສມ຺ປນ຺ນຎ຺ເຈວ ໂຫຕິ ຈິຕ຺ຕສ຺ສ ອຘິຏ຺ຐານສມ຺ປນ຺ນຎ຺ຈ ສທ຺ຘາສມ຺ປນ຺ນຎ຺ຈ ວີຣິຍສມ຺ປນ຺ນຎ຺ຈ ສຕິສມ຺ປນ຺ນຎ຺ຈ ສມາຘິສມ຺ປນ຺ນຎ຺ຈ ປຎ຺ຎາສມ຺ປນ຺ນຎ຺ຈ.
ຈຕຸຕ຺ຖສ຺ສ ຌານສ຺ສ ໂກ ອາທິ, ກິໍ ມຊ຺ເຌ, ກິໍ ປຣິໂຍສານໍ…ເປ… ເອວໍ ຕິວຕ຺ຕຄຕໍ ຈິຕ຺ຕໍ ຕິວິຘກລ຺ຍາຓກໍ ທສລກ຺ຂຓສມ຺ປນ຺ນຎ຺ຈ ອຸເປກ຺ຂາສມ຺ປນ຺ນຎ຺ເຈວ ໂຫຕິ ຈິຕ຺ຕສ຺ສ ອຘິຏ຺ຐານສມ຺ປນ຺ນຎ຺ຈ ສທ຺ຘາສມ຺ປນ຺ນຎ຺ຈ ວີຣິຍສມ຺ປນ຺ນຎ຺ຈ ສຕິສມ຺ປນ຺ນຎ຺ຈ ສມາຘິສມ຺ປນ຺ນຎ຺ຈ ປຎ຺ຎາສມ຺ປນ຺ນຎ຺ຈ.
ອາກາສານຎ຺ຈາຍຕນສມາປຕ຺ຕິຍາ…ເປ… ວິຎ຺ຎາຓຎ຺ຈາຍຕນສມາປຕ຺ຕິຍາ… ອາກິຎ຺ຈຎ຺ຎາຍຕນສມາປຕ຺ຕິຍາ… ເນວສຎ຺ຎານາສຎ຺ຎາຍຕນສມາປຕ຺ຕິຍາ ໂກ ອາທິ, ກິໍ ມຊ຺ເຌ, ກິໍ ປຣິໂຍສານໍ…ເປ… ເອວໍ ຕິວຕ຺ຕຄຕໍ ຈິຕ຺ຕໍ ຕິວິຘກລ຺ຍາຓກໍ ທສລກ຺ຂຓສມ຺ປນ຺ນໍ ອຸເປກ຺ຂາສມ຺ປນ຺ນຎ຺ເຈວ ໂຫຕິ ຈິຕ຺ຕສ຺ສ ອຘິຏ຺ຐານສມ຺ປນ຺ນໍ ຈ…ເປ… ປຎ຺ຎາສມ຺ປນ຺ນຎ຺ຈ.
ອນິຈ຺ຈານຸປສ຺ສນາຍ ໂກ ອາທິ, ກິໍ ມຊ຺ເຌ, ກິໍ ປຣິໂຍສານໍ…ເປ… ເອວໍ ຕິວຕ຺ຕຄຕໍ ຈິຕ຺ຕໍ ຕິວິຘກລ຺ຍາຓກໍ ທສລກ຺ຂຓສມ຺ປນ຺ນໍ ວິຕກ຺ກສມ຺ປນ຺ນຎ຺ເຈວ ໂຫຕິ ວິຈາຣສມ຺ປນ຺ນຎ຺ຈ ປີຕິສມ຺ປນ຺ນຎ຺ຈ ສຸຂສມ຺ປນ຺ນຎ຺ຈ ຈິຕ຺ຕສ຺ສ ອຘິຏ຺ຐານສມ຺ປນ຺ນຎ຺ຈ ສທ຺ຘາສມ຺ປນ຺ນຎ຺ຈ ວີຣິຍສມ຺ປນ຺ນຎ຺ຈ ສຕິສມ຺ປນ຺ນຎ຺ຈ ສມາຘິສມ຺ປນ຺ນຎ຺ຈ ປຎ຺ຎາສມ຺ປນ຺ນຎ຺ຈ. ທຸກ຺ຂານຸປສ຺ສນາຍ…ເປ… ອນຕ຺ຕານຸປສ຺ສນາຍ… ນິພ຺ພິທານຸປສ຺ສນາຍ… ວິຣາຄານຸປສ຺ສນາຍ… ນິໂຣຘານຸປສ຺ສນາຍ… ປຏິນິສ຺ສຄ຺ຄານຸປສ຺ສນາຍ… ຂຍານຸປສ຺ສນາຍ… ວຍານຸປສ຺ສນາຍ… ວິປຣິຓາມານຸປສ຺ສນາຍ… ອນິມິຕ຺ຕານຸປສ຺ສນາຍ… ອປ຺ປຓິຫິຕານຸປສ຺ສນາຍ… ສຸຎ຺ຎຕານຸປສ຺ສນາຍ… ອຘິປຎ຺ຎາຘມ຺ມວິປສ຺ສນາຍ… ຍຖາຠູຕຎາຓທສ຺ສນາຍ… ອາທີນວານຸປສ຺ສນາຍ… ປຏິສງ຺ຂານຸປສ຺ສນາຍ… ວິວຏ຺ຏນານຸປສ຺ສນາຍ… ປຎ຺ຎາສມ຺ປນ຺ນຎ຺ຈ.
ໂສຕາປຕ຺ຕິມຄ຺ຄສ຺ສ…ເປ… ສກທາຄາມິມຄ຺ຄສ຺ສ… ອນາຄາມິມຄ຺ຄສ຺ສ… ອຣຫຕ຺ຕມຄ຺ຄສ຺ສ ໂກ ອາທິ, ກິໍ ມຊ຺ເຌ, ກິໍ ປຣິໂຍສານໍ? ອຣຫຕ຺ຕມຄ຺ຄສ຺ສ ປຏິປທາວິສຸທ຺ຘິ ອາທິ ອຸເປກ຺ຂານຸພ຺ຣູຫນາ ມຊ຺ເຌ, ສມ຺ປຫໍສນາ ປຣິໂຍສານໍ. ອຣຫຕ຺ຕມຄ຺ຄສ຺ສ ປຏິປທາວິສຸທ຺ຘິ ອາທິ. ອາທິສ຺ສ ກຕິ ລກ຺ຂຓານິ? ອາທິສ຺ສ ຕີຓິ ລກ຺ຂຓານິ. ໂຍ ຕສ຺ສ ປຣິປນ຺ໂຖ ຕໂຕ ຈິຕ຺ຕໍ ວິສຸຊ຺ຌຕິ, ວິສຸທ຺ຘຕ຺ຕາ ຈິຕ຺ຕໍ ມຊ຺ຌິມໍ ສມຖນິມິຕ຺ຕໍ ປຏິປຊ຺ຊຕິ, ປຏິປນ຺ນຕ຺ຕາ ຕຕ຺ຖ ຈິຕ຺ຕໍ ປກ຺ຂນ຺ທຕິ. ຍຎ຺ຈ ປຣິປນ຺ຖໂຕ ຈິຕ຺ຕໍ ວິສຸຊ຺ຌຕິ, ຍຎ຺ຈ ວິສຸທ຺ຘຕ຺ຕາ ຈິຕ຺ຕໍ ມຊ຺ຌິມໍ ສມຖນິມິຕ຺ຕໍ ປຏິປຊ຺ຊຕິ, ຍຎ຺ຈ ປຏິປນ຺ນຕ຺ຕາ ຕຕ຺ຖ ຈິຕ຺ຕໍ ປກ຺ຂນ຺ທຕິ – ອຣຫຕ຺ຕມຄ຺ຄສ຺ສ ປຏິປທາວິສຸທ຺ຘິ ອາທິ. ອາທິສ຺ສ ອິມານິ ຕີຓິ ລກ຺ຂຓານິ. ເຕນ ວຸຈ຺ຈຕິ – ‘‘ອຣຫຕ຺ຕມຄ຺ໂຄ ອາທິກລ຺ຍາໂຓ ເຈວ ໂຫຕິ ລກ຺ຂຓສມ຺ປນ຺ໂນ ຈ’’.
ອຣຫຕ຺ຕມຄ຺ຄສ຺ສ ອຸເປກ຺ຂານຸພ຺ຣູຫນາ ມຊ຺ເຌ. ມຊ຺ຌສ຺ສ ກຕິ ລກ຺ຂຓານິ? ມຊ຺ຌສ຺ສ ຕີຓິ ລກ຺ຂຓານິ. ວິສຸທ຺ຘໍ ຈິຕ຺ຕໍ ອຊ຺ຌຸເປກ຺ຂຕິ, ສມຖປຏິປນ຺ນໍ ອຊ຺ຌຸເປກ຺ຂຕິ, ເອກຕ຺ຕຸປຏ຺ຐານໍ ອຊ຺ຌຸເປກ຺ຂຕິ. ຍຎ຺ຈ ວິສຸທ຺ຘໍ ຈິຕ຺ຕໍ ອຊ຺ຌຸເປກ຺ຂຕິ, ຍຎ຺ຈ ສມຖປຏິປນ຺ນໍ ອຊ຺ຌຸເປກ຺ຂຕິ, ຍຎ຺ຈ ເອກຕ຺ຕຸປຏ຺ຐານໍ ອຊ຺ຌຸເປກ຺ຂຕິ. ເຕນ ວຸຈ຺ຈຕິ – ‘‘ອຣຫຕ຺ຕມຄ຺ໂຄ ມຊ຺ເຌກລ຺ຍາໂຓ ເຈວ ໂຫຕິ ລກ຺ຂຓສມ຺ປນ຺ໂນ ຈ’’.
ອຣຫຕ຺ຕມຄ຺ຄສ຺ສ ສມ຺ປຫໍສນາ ປຣິໂຍສານໍ. ປຣິໂຍສານສ຺ສ ກຕິ ລກ຺ຂຓານິ? ປຣິໂຍສານສ຺ສ ຈຕ຺ຕາຣິ ລກ຺ຂຓານິ. ຕຕ຺ຖ ຊາຕານໍ ຘມ຺ມານໍ ອນຕິວຕ຺ຕນຏ຺ເຐນ ສມ຺ປຫໍສນາ, ອິນ຺ທ຺ຣິຍານໍ ເອກຣສຏ຺ເຐນ ສມ຺ປຫໍສນາ, ຕທຸປຄວີຣິຍວາຫນຏ຺ເຐນ ສມ຺ປຫໍສນາ, ອາເສວນຏ຺ເຐນ ສມ຺ປຫໍສນາ. ອຣຫຕ຺ຕມຄ຺ຄສ຺ສ ສມ຺ປຫໍສນາ ປຣິໂຍສານໍ. ປຣິໂຍສານສ຺ສ ອິມານິ ຈຕ຺ຕາຣິ ລກ຺ຂຓານິ. ເຕນ ວຸຈ຺ຈຕິ – ‘‘ອຣຫຕ຺ຕມຄ຺ໂຄ ປຣິໂຍສານກລ຺ຍາໂຓ ເຈວ ໂຫຕິ ລກ຺ຂຓສມ຺ປນ຺ໂນ ຈ’’. ເອວໍ ຕິວຕ຺ຕຄຕໍ ຈິຕ຺ຕໍ ຕິວິຘກລ຺ຍາຓກໍ ທສລກ຺ຂຓສມ຺ປນ຺ນໍ ວິຕກ຺ກສມ຺ປນ຺ນຎ຺ເຈວ ໂຫຕິ ວິຈາຣສມ຺ປນ຺ນຎ຺ຈ ປີຕິສມ຺ປນ຺ນຎ຺ຈ ສຸຂສມ຺ປນ຺ນຎ຺ຈ ຈິຕ຺ຕສ຺ສ ອຘິຏ຺ຐານສມ຺ປນ຺ນຎ຺ຈ ສທ຺ຘາສມ຺ປນ຺ນຎ຺ຈ ວີຣິຍສມ຺ປນ຺ນຎ຺ຈ ສຕິສມ຺ປນ຺ນຎ຺ຈ ສມາຘິສມ຺ປນ຺ນຎ຺ຈ ປຎ຺ຎາສມ຺ປນ຺ນຎ຺ຈ.
໑໕໙. ນິມິຕ຺ຕໍ ອສ຺ສາສປສ຺ສາສາ, ອນາຣມ຺ມຓເມກຈິຕ຺ຕສ຺ສ;
ອຊານໂຕ ຈ ຕໂຍ ຘມ຺ເມ, ຠາວນາ ນຸປລພ຺ຠຕິ.
ນິມິຕ຺ຕໍ ອສ຺ສາສປສ຺ສາສາ, ອນາຣມ຺ມຓເມກຈິຕ຺ຕສ຺ສ;
ຊານໂຕ ຈ ຕໂຍ ຘມ຺ເມ, ຠາວນາ ອຸປລພ຺ຠຕີຕິ.
ກຖໍ ອິເມ ຕໂຍ ຘມ຺ມາ ເອກຈິຕ຺ຕສ຺ສ ອາຣມ຺ມຓາ ນ ໂຫນ຺ຕິ, ນ ຈິເມ ຕໂຍ ຘມ຺ມາ ອວິທິຕາ ໂຫນ຺ຕິ, ນ ຈ ຈິຕ຺ຕໍ ວິກ຺ເຂປໍ ຄຈ຺ຉຕິ, ປຘານຎ຺ຈ ປຎ຺ຎາຍຕິ, ປໂຍຄຎ຺ຈ ສາເຘຕິ, ວິເສສມຘິຄຈ຺ຉຕິ? ເສຍ຺ຍຖາປິ ຣຸກ຺ໂຂ ສເມ ຠູມິຠາເຄ ນິກ຺ຂິຕ຺ໂຕ. ຕເມນໍ ປຸຣິໂສ ກກເຈນ ຉິນ຺ເທຍ຺ຍ. ຣຸກ຺ເຂ ຜຸຏ຺ຐກກຈທນ຺ຕານໍ ວເສນ ປຸຣິສສ຺ສ ສຕິ ອຸປຏ຺ຐິຕາ ໂຫຕິ; ນ ອາຄເຕ ວາ ຄເຕ ວາ ກກຈທນ຺ເຕ ມນສິ ກໂຣຕິ. ນ ອາຄຕາ ວາ ຄຕາ ວາ ກກຈທນ຺ຕາ ອວິທິຕາ ໂຫນ຺ຕິ, ປຘານຎ຺ຈ ປຎ຺ຎາຍຕິ, ປໂຍຄຎ຺ຈ ສາເຘຕິ. ຍຖາ ຣຸກ຺ໂຂ ສເມ ຠູມິຠາເຄ ນິກ຺ຂິຕ຺ໂຕ. ເອວໍ ອຸປນິພນ຺ຘນາ ນິມິຕ຺ຕໍ. ຍຖາ ກກຈທນ຺ຕາ, ເອວໍ ອສ຺ສາສປສ຺ສາສາ. ຍຖາ ຣຸກ຺ເຂ ຜຸຏ຺ຐກກຈທນ຺ຕານໍ ວເສນ ປຸຣິສສ຺ສ ສຕິ ອຸປຏ຺ຐິຕາ ໂຫຕິ, ນ ອາຄເຕ ວາ ຄເຕ ວາ ກກຈທນ຺ເຕ ມນສິ ກໂຣຕິ, ນ ອາຄຕາ ວາ ຄຕາ ວາ ກກຈທນ຺ຕາ ອວິທິຕາ ໂຫນ຺ຕິ, ປຘານຎ຺ຈ ປຎ຺ຎາຍຕິ, ປໂຍຄຎ຺ຈ ສາເຘຕິ. ເອວເມວໍ ຠິກ຺ຂຸ ນາສິກຄ຺ເຄ ວາ ມຸຂນິມິຕ຺ເຕ ວາ ສຕິໍ ອຸປຏ຺ຐເປຕ຺ວາ ນິສິນ຺ໂນ ໂຫຕິ, ນ ອາຄເຕ ວາ ຄເຕ ວາ ອສ຺ສາສປສ຺ສາເສ ມນສິ ກໂຣຕິ, ນ ອາຄຕາ ວາ ຄຕາ ວາ ອສ຺ສາສປສ຺ສາສາ ອວິທິຕາ ໂຫນ຺ຕິ, ປຘານຎ຺ຈ ປຎ຺ຎາຍຕິ, ປໂຍຄຎ຺ຈ ສາເຘຕິ. ວິເສສມຘິຄຈ຺ຉຕິ ປຘານຎ຺ຈ.
ກຕມໍ ປຘານໍ? ອາຣທ຺ຘວີຣິຍສ຺ສ ກາໂຍປິ ຈິຕ຺ຕມ຺ປິ ກມ຺ມນິຍໍ ໂຫຕິ – ອິທໍ ປຘານໍ. ກຕໂມ ປໂຍໂຄ? ອາຣທ຺ຘວີຣິຍສ຺ສ ອຸປກ຺ກິເລສາ ປຫີຍນ຺ຕິ, ວິຕກ຺ກາ ວູປສມນ຺ຕິ – ອຍໍ ປໂຍໂຄ. ກຕໂມ ວິເສໂສ? ອາຣທ຺ຘວີຣິຍສ຺ສ ສຎ຺ໂຎຊນາ ປຫີຍນ຺ຕິ, ອນຸສຍາ ພ຺ຍນ຺ຕີໂຫນ຺ຕິ [ອນຸສຍາ ພ຺ຍາສນ຺ຕິ (ສ຺ຍາ.)]. ອຍໍ ວິເສໂສ. ເອວໍ ອິເມ ຕໂຍ ຘມ຺ມາ ເອກຈິຕ຺ຕສ຺ສ ອາຣມ຺ມຓາ ນ ໂຫນ຺ຕິ, ນ ຈິເມ ຕໂຍ ຘມ຺ມາ ອວິທິຕາ ໂຫນ຺ຕິ, ນ ຈ ຈິຕ຺ຕໍ ວິກ຺ເຂປໍ ຄຈ຺ຉຕິ, ປຘານຎ຺ຈ ປຎ຺ຎາຍຕິ, ປໂຍຄຎ຺ຈ ສາເຘຕິ, ວິເສສມຘິຄຈ຺ຉຕິ.
໑໖໐. ອານາປານສ຺ສຕິ ຍສ຺ສ, ປຣິປຸຓ຺ຓາ ສຸຠາວິຕາ;
ອນຸປຸພ຺ພໍ ປຣິຈິຕາ, ຍຖາ ພຸທ຺ເຘນ ເທສິຕາ;
ໂສ ອິມໍ ໂລກໍ ປຠາເສຕິ, ອພ຺ຠາ ມຸຕ຺ໂຕວ ຈນ຺ທິມາຕິ.
ອານນ຺ຕິ ອສ຺ສາໂສ, ໂນ ປສ຺ສາໂສ. ອປານນ຺ຕິ [ອປານນ຺ຕິ (ກ.)] ປສ຺ສາໂສ, ໂນ ອສ຺ສາໂສ. ອສ຺ສາສວເສນ ອຸປຏ຺ຐານໍ ສຕິ, ປສ຺ສາສວເສນ ອຸປຏ຺ຐານໍ ສຕິ.
ໂຍ ອສ຺ສສຕິ ຕສ຺ສຸປຏ຺ຐາຕິ, ໂຍ ປສ຺ສສຕິ ຕສ຺ສຸປຏ຺ຐາຕິ. ປຣິປຸຓ຺ຓາຕິ ປຣິຄ຺ຄຫຏ຺ເຐນ ປຣິປຸຓ຺ຓາ, ປຣິວາຣຏ຺ເຐນ ປຣິປຸຓ຺ຓາ, ປຣິປູຣຏ຺ເຐນ ປຣິປຸຓ຺ຓາ. ສຸຠາວິຕາຕິ ຈຕສ຺ໂສ ຠາວນາ – ຕຕ຺ຖ ຊາຕານໍ ຘມ຺ມານໍ ອນຕິວຕ຺ຕນຏ຺ເຐນ ຠາວນາ, ອິນ຺ທ຺ຣິຍານໍ ເອກຣສຏ຺ເຐນ ຠາວນາ, ຕທຸປຄວີຣິຍວາຫນຏ຺ເຐນ ຠາວນາ, ອາເສວນຏ຺ເຐນ ຠາວນາ. ຕສ຺ສິເມ ຈຕ຺ຕາໂຣ ຠາວນຏ຺ຐາ ຍານີກຕາ ໂຫນ຺ຕິ ວຕ຺ຖຸກຕາ ອນຸຏ຺ຐິຕາ ປຣິຈິຕາ ສຸສມາຣທ຺ຘາ.
ຍານີກຕາຕິ ຍຕ຺ຖ ຍຕ຺ຖ ອາກງ຺ຂຕິ ຕຕ຺ຖ ຕຕ຺ຖ ວສິປ຺ປຕ຺ໂຕ ໂຫຕິ ພລປ຺ປຕ຺ໂຕ ເວສາຣຊ຺ຊປ຺ປຕ຺ໂຕ. ຕສ຺ສ ເມ ເຕ ຘມ຺ມາ ອາວຊ຺ຊນປຏິພທ຺ຘາ [ອາວຊ຺ຊນປຏິພນ຺ຘາ (ກ.) ເອວມີທິເສສຸ ປເທສຸ] ໂຫນ຺ຕິ ອາກງ຺ຂປຏິພທ຺ຘາ ມນສິກາຣປຏິພທ຺ຘາ ຈິຕ຺ຕຸປ຺ປາທປຏິພທ຺ຘາ. ເຕນ ວຸຈ຺ຈຕິ – ‘‘ຍານີກຕາ’’ຕິ. ວຕ຺ຖຸກຕາຕິ ຍສ຺ມິໍ ຍສ຺ມິໍ ວຕ຺ຖຸສ຺ມິໍ ຈິຕ຺ຕໍ ສ຺ວາຘິຏ຺ຐິຕໍ ໂຫຕິ, ຕສ຺ມິໍ ຕສ຺ມິໍ ວຕ຺ຖຸສ຺ມິໍ ສຕິ ສຸປຏ຺ຐິຕາ ໂຫຕິ. ຍສ຺ມິໍ ຍສ຺ມິໍ ວາ ປນ ວຕ຺ຖຸສ຺ມິໍ ສຕິ ສູປຏ຺ຐິຕາ [ສຸປຏ຺ຐິຕາ (ກ.)] ໂຫຕິ, ຕສ຺ມິໍ ຕສ຺ມິໍ ວຕ຺ຖຸສ຺ມິໍ ຈິຕ຺ຕໍ ສ຺ວາຘິຏ຺ຐິຕໍ ໂຫຕິ. ເຕນ ວຸຈ຺ຈຕິ – ‘‘ວຕ຺ຖຸກຕາ’’ຕິ. ອນຸຏ຺ຐິຕາຕິ ວຕ຺ຖຸສ຺ມິໍ ເຍນ ເຍນ ຈິຕ຺ຕໍ ອຠິນີຫຣຕິ ເຕນ ເຕນ ສຕິ ອນຸປຣິວຕ຺ຕຕິ. ເຍນ ເຍນ ວາ ປນ ສຕິ ອນຸປຣິວຕ຺ຕຕິ ເຕນ ເຕນ ຈິຕ຺ຕໍ ອຠິນີຫຣຕິ. ເຕນ ວຸຈ຺ຈຕິ – ‘‘ອນຸຏ຺ຐິຕາ’’ຕິ. ປຣິຈິຕາຕິ ປຣິຄ຺ຄຫຏ຺ເຐນ ປຣິຈິຕາ, ປຣິວາຣຏ຺ເຐນ ປຣິຈິຕາ, ປຣິປູຣຏ຺ເຐນ ປຣິຈິຕາ. ສຕິຍາ ປຣິຄ຺ຄຓ຺ຫນ຺ໂຕ ຊິນາຕິ ປາປເກ ອກຸສເລ ຘມ຺ເມ. ເຕນ ວຸຈ຺ຈຕິ – ‘‘ປຣິຈິຕາ’’ຕິ. ສຸສມາຣທ຺ຘາຕິ ຈຕ຺ຕາໂຣ ສຸສມາຣທ຺ຘາ – ຕຕ຺ຖ ຊາຕານໍ ຘມ຺ມານໍ ອນຕິວຕ຺ຕນຏ຺ເຐນ ສຸສມາຣທ຺ຘາ, ອິນ຺ທ຺ຣິຍານໍ ເອກຣສຏ຺ເຐນ ສຸສມາຣທ຺ຘາ, ຕທຸປຄວີຣິຍວາຫນຏ຺ເຐນ ສຸສມາຣທ຺ຘາ, ຕປ຺ປຈ຺ຈນີການໍ ກິເລສານໍ ສຸສມູຫຕຕ຺ຕາ [ສຸສມຸຫຕຕ຺ຕາ (ກ.)] ສຸສມາຣທ຺ຘາ.
໑໖໑. ສຸສມນ຺ຕິ ອຕ຺ຖິ ສມໍ, ອຕ຺ຖິ ສຸສມໍ. ກຕມໍ ສມໍ? ເຍ ຕຕ຺ຖ ຊາຕາ ອນວຊ຺ຊາ ກຸສລາ ໂພຘິປກ຺ຂິຍາ – ອິທໍ ສມໍ. ກຕມໍ ສຸສມໍ? ຍໍ ເຕສໍ ເຕສໍ ຘມ຺ມານໍ ອາຣມ຺ມຓໍ ນິໂຣໂຘ ນິພ຺ພານໍ – ອິທໍ ສຸສມໍ. ອິຕິ ອິທຎ຺ຈ ສມໍ ອິທຎ຺ຈ ສຸສມໍ ຎາຕໍ ໂຫຕິ ທິຏ຺ຐໍ ວິທິຕໍ ສຈ຺ຉິກຕໍ ຜສ຺ສິຕໍ ປຎ຺ຎາຍ. ອາຣທ຺ຘໍ ໂຫຕິ ວີຣິຍໍ ອສລ຺ລີນໍ, ອຸປຏ຺ຐິຕາ ສຕິ ອສມ຺ມູຬາ [ອປມຸຏ຺ຐາ (ສ຺ຍາ.)], ປສ຺ສທ຺ໂຘ ກາໂຍ ອສາຣທ຺ໂຘ, ສມາຫິຕໍ ຈິຕ຺ຕໍ ເອກຄ຺ຄໍ. ເຕນ ວຸຈ຺ຈຕິ – ‘‘ສຸສມາຣທ຺ຘາ’’ຕິ.
ອນຸປຸພ຺ພໍ ປຣິຈິຕາຕິ ທີຆໍ ອສ຺ສາສວເສນ ປຸຣິມາ ປຸຣິມາ ປຣິຈິຕາ, ປຈ຺ຉິມາ ປຈ຺ຉິມາ ອນຸປຣິຈິຕາ. ທີຆໍ ປສ຺ສາສວເສນ ປຸຣິມາ ປຸຣິມາ ປຣິຈິຕາ, ປຈ຺ຉິມາ ປຈ຺ຉິມາ ອນຸປຣິຈິຕາ. ຣສ຺ສໍ ອສ຺ສາສວເສນ ປຸຣິມາ ປຸຣິມາ ປຣິຈິຕາ, ປຈ຺ຉິມາ ປຈ຺ຉິມາ ອນຸປຣິຈິຕາ. ຣສ຺ສໍ ປສ຺ສາສວເສນ ປຸຣິມາ ປຸຣິມາ ປຣິຈິຕາ, ປຈ຺ຉິມາ ປຈ຺ຉິມາ ອນຸປຣິຈິຕາ…ເປ… ປຏິນິສ຺ສຄ຺ຄານຸປສ຺ສີ ອສ຺ສາສວເສນ ປຸຣິມາ ປຸຣິມາ ປຣິຈິຕາ, ປຈ຺ຉິມາ ປຈ຺ຉິມາ ອນຸປຣິຈິຕາ. ປຏິນິສ຺ສຄ຺ຄານຸປສ຺ສີ ປສ຺ສາສວເສນ ປຸຣິມາ ປຸຣິມາ ປຣິຈິຕາ, ປຈ຺ຉິມາ ປຈ຺ຉິມາ ອນຸປຣິຈິຕາ. ສພ຺ພາປິ ໂສຬສວຕ຺ຖຸກາ ອານາປານສ຺ສຕິໂຍ ອຎ຺ຎມຎ຺ຎໍ ປຣິຈິຕາ ເຈວ ໂຫນ຺ຕິ ອນຸປຣິຈິຕາ ຈ. ເຕນ ວຸຈ຺ຈຕິ – ‘‘ອນຸປຸພ຺ພປຣິຈິຕາ’’ຕິ.
ຍຖາຕິ ທສ ຍຖຕ຺ຖາ – ອຕ຺ຕທມຖຕ຺ໂຖ ຍຖຕ຺ໂຖ, ອຕ຺ຕສມຖຕ຺ໂຖ ຍຖຕ຺ໂຖ, ອຕ຺ຕປຣິນິພ຺ພາປນຕ຺ໂຖ ຍຖຕ຺ໂຖ, ອຠິຎ຺ຎຕ຺ໂຖ ຍຖຕ຺ໂຖ, ປຣິຎ຺ຎຕ຺ໂຖ ຍຖຕ຺ໂຖ, ປຫານຕ຺ໂຖ ຍຖຕ຺ໂຖ, ຠາວນຕ຺ໂຖ ຍຖຕ຺ໂຖ, ສຈ຺ຉິກິຣິຍຕ຺ໂຖ ຍຖຕ຺ໂຖ, ສຈ຺ຈາຠິສມຍຕ຺ໂຖ ຍຖຕ຺ໂຖ, ນິໂຣເຘ ປຕິຏ຺ຐາປກຕ຺ໂຖ ຍຖຕ຺ໂຖ.
ພຸທ຺ໂຘຕິ ໂຍ ໂສ ຠຄວາ ສຍມ຺ຠູ ອນາຈຣິຍໂກ ປຸພ຺ເພ ອນນຸສ຺ສຸເຕສຸ ຘມ຺ເມສຸ ສາມໍ ສຈ຺ຈານິ ອຠິສມ຺ພຸຊ຺ຌິ, ຕຕ຺ຖ ຈ ສພ຺ພຎ຺ຎຸຕໍ ປາປຸຓິ, ພເລສຸ ຈ ວສີຠາວໍ.
໑໖໒. ພຸທ຺ໂຘຕິ ເກນຏ຺ເຐນ ພຸທ຺ໂຘ? ພຸຊ຺ຌິຕາ ສຈ຺ຈານີຕິ – ພຸທ຺ໂຘ. ໂພເຘຕາ ປຊາຍາຕິ – ພຸທ຺ໂຘ. ສພ຺ພຎ຺ຎຸຕາຍ ພຸທ຺ໂຘ. ສພ຺ພທສ຺ສາວິຕາຍ ພຸທ຺ໂຘ. ອນຎ຺ຎເນຍ຺ຍຕາຍ ພຸທ຺ໂຘ. ວິສວິຕາຍ [ວິກຕິຕາຍ (ສ຺ຍາ.)] ພຸທ຺ໂຘ. ຂີຓາສວສງ຺ຂາເຕນ ພຸທ຺ໂຘ. ນິຣຸປເລປສງ຺ຂາເຕນ [ນິຣຸປກ຺ກິເລສສງ຺ຂາເຕນ (ສ຺ຍາ.)] ພຸທ຺ໂຘ. ເອກນ຺ຕວີຕຣາໂຄຕິ – ພຸທ຺ໂຘ. ເອກນ຺ຕວີຕໂທໂສຕິ – ພຸທ຺ໂຘ. ເອກນ຺ຕວີຕໂມໂຫຕິ – ພຸທ຺ໂຘ. ເອກນ຺ຕນິກ຺ກິເລໂສຕິ – ພຸທ຺ໂຘ. ເອກາຍນມຄ຺ຄໍ ຄໂຕຕິ – ພຸທ຺ໂຘ. ເອໂກ ອນຸຕ຺ຕຣໍ ສມ຺ມາສມ຺ໂພຘິໍ ອຠິສມ຺ພຸທ຺ໂຘຕິ – ພຸທ຺ໂຘ. ອພຸທ຺ຘິວິຫຕຕ຺ຕາ ພຸທ຺ຘິປຏິລາຠາ – ພຸທ຺ໂຘ. ພຸທ຺ໂຘຕິ ເນຕໍ ນາມໍ ມາຕຣາ ກຕໍ, ນ ປິຕຣາ ກຕໍ, ນ ຠາຕຣາ ກຕໍ, ນ ຠຄິນິຍາ ກຕໍ, ນ ມິຕ຺ຕາມຈ຺ເຈຫິ ກຕໍ, ນ ຎາຕິສາໂລຫິເຕຫິ ກຕໍ, ນ ສມຓພ຺ຣາຫ຺ມເຓຫິ ກຕໍ, ນ ເທວຕາຫິ ກຕໍ. ວິໂມກ຺ຂນ຺ຕິກເມຕໍ ພຸທ຺ຘານໍ ຠຄວນ຺ຕານໍ ໂພຘິຍາ ມູເລ ສຫ ສພ຺ພຎ຺ຎຸຕຎາຓສ຺ສ ປຏິລາຠາ ສຈ຺ຉິກາ ປຎ຺ຎຕ຺ຕິ ຍທິທໍ – ພຸທ຺ໂຘຕິ. ເທສິຕາຕິ ອຕ຺ຕທມຖຕ຺ໂຖ ຍຖຕ຺ໂຖ ຍຖາ ພຸທ຺ເຘນ ເທສິໂຕ, ອຕ຺ຕສມຖຕ຺ໂຖ ຍຖຕ຺ໂຖ ຍຖາ ພຸທ຺ເຘນ ເທສິໂຕ, ອຕ຺ຕປຣິນິພ຺ພາປນຕ຺ໂຖ ຍຖຕ຺ໂຖ ຍຖາ ພຸທ຺ເຘນ ເທສິໂຕ…ເປ… ນິໂຣເຘ ປຕິຏ຺ຐາປກຕ຺ໂຖ ຍຖຕ຺ໂຖ ຍຖາ ພຸທ຺ເຘນ ເທສິໂຕ.
ໂສຕິ ຄຫຏ຺ໂຐ ວາ ໂຫຕິ ປພ຺ພຊິໂຕ ວາ. ໂລໂກຕິ. ຂນ຺ຘໂລໂກ ຘາຕຸໂລໂກ ອາຍຕນໂລໂກ ວິປຕ຺ຕິຠວໂລໂກ ວິປຕ຺ຕິສມ຺ຠວໂລໂກ ສມ຺ປຕ຺ຕິຠວໂລໂກ ສມ຺ປຕ຺ຕິສມ຺ຠວໂລໂກ. ເອໂກ ໂລໂກ – ສພ຺ເພ ສຕ຺ຕາ ອາຫາຣຏ຺ຐິຕິກາ…ເປ… ອຏ຺ຐາຣສ ໂລກາ – ອຏ຺ຐາຣສ ຘາຕຸໂຍ. ປຠາເສຕີຕິ ອຕ຺ຕທມຖຕ຺ຖໍ ຍຖຕ຺ຖໍ ອຠິສມ຺ພຸທ຺ຘຕ຺ຕາ. ໂສ ອິມໍ ໂລກໍ ໂອຠາເສຕິ ຠາເສຕິ ປຠາເສຕິ. ອຕ຺ຕສມຖຕ຺ຖໍ ຍຖຕ຺ຖໍ ອຠິສມ຺ພຸທ຺ຘຕ຺ຕາ. ໂສ ອິມໍ ໂລກໍ ໂອຠາເສຕິ ຠາເສຕິ ປຠາເສຕິ. ອຕ຺ຕປຣິນິພ຺ພາປນຕ຺ຖໍ ຍຖຕ຺ຖໍ ອຠິສມ຺ພຸທ຺ຘຕ຺ຕາ. ໂສ ອິມໍ ໂລກໍ ໂອຠາເສຕິ ຠາເສຕິ ປຠາເສຕິ…ເປ… ນິໂຣເຘ ປຕິຏ຺ຐາປກຕ຺ຖໍ ຍຖຕ຺ຖໍ ອຠິສມ຺ພຸທ຺ຘຕ຺ຕາ. ໂສ ອິມໍ ໂລກໍ ໂອຠາເສຕິ ຠາເສຕິ ປຠາເສຕິ.
ອພ຺ຠາ ມຸຕ຺ໂຕວ ຈນ຺ທິມາຕິ ຍຖາ ອພ຺ຠາ, ເອວໍ ກິເລສາ. ຍຖາ ຈນ຺ໂທ, ເອວໍ ອຣິຍຎາຓໍ. ຍຖາ ຈນ຺ທິມາ ເທວປຸຕ຺ໂຕ, ເອວໍ ຠິກ຺ຂຸ. ຍຖາ ຈນ຺ໂທ ອພ຺ຠາ ມຸຕ຺ໂຕ ມຫິກາ ມຸຕ຺ໂຕ ຘູມຣຊາ ມຸຕ຺ໂຕ ຣາຫຸຄຫຓາ [ຣາຫຸປາຓາ (ສ຺ຍາ.)] ວິປ຺ປມຸຕ຺ໂຕ ຠາສເຕ ຈ ຕປເຕ ຈ ວິໂຣຈເຕ [ວິໂຣຈຕິ (ສ຺ຍາ.)] ຈ, ເອວເມວໍ ຠິກ຺ຂຸ ສພ຺ພກິເລເສຫິ ວິປ຺ປມຸຕ຺ໂຕ ຠາສເຕ ຈ ຕປເຕ ຈ ວິໂຣຈເຕ ຈ. ເຕນ ວຸຈ຺ຈຕິ – ອພ຺ຠາ ມຸຕ຺ໂຕວ ຈນ຺ທິມາຕິ. ອິມານິ ເຕຣສ ໂວທາເນ ຎາຓານິ.
ໂວທານຎາຓນິທ຺ເທໂສ ຈຕຸຕ຺ໂຖ.
ຠາຓວາໂຣ.
໕. ສໂຕກາຣິຎາຓນິທ຺ເທໂສ
໑໖໓. ກຕມານິ ພາຕ຺ຕິໍສ ສໂຕກາຣິສ຺ສ ຎາຓານິ? ອິຘ ຠິກ຺ຂຸ ອຣຎ຺ຎຄໂຕ ວາ ຣຸກ຺ຂມູລຄໂຕ ວາ ສຸຎ຺ຎາຄາຣຄໂຕ ວາ ນິສີທຕິ ປລ຺ລງ຺ກໍ ອາຠຸຊິຕ຺ວາ ອຸຊຸໍ ກາຍໍ ປຓິຘາຍ ປຣິມຸຂໍ ສຕິໍ ອຸປຏ຺ຐເປຕ຺ວາ. ໂສ ສໂຕວ ອສ຺ສສຕິ ສໂຕ ປສ຺ສສຕິ. ທີຆໍ ວາ ອສ຺ສສນ຺ໂຕ ‘‘ທີຆໍ ອສ຺ສສາມີ’’ຕິ ປຊານາຕິ. ທີຆໍ ວາ ປສ຺ສສນ຺ໂຕ ‘‘ທີຆໍ ປສ຺ສສາມີ’’ຕິ ປຊານາຕິ. ຣສ຺ສໍ ວາ ອສ຺ສສນ຺ໂຕ ‘‘ຣສ຺ສໍ ອສ຺ສສາມີ’’ຕິ ປຊານາຕິ. ຣສ຺ສໍ ວາ ປສ຺ສສນ຺ໂຕ ‘‘ຣສ຺ສໍ ປສ຺ສສາມີ’’ຕິ ປຊານາຕິ. ‘‘ສພ຺ພກາຍປຏິສໍເວທີ ອສ຺ສສິສ຺ສາມີ’’ຕິ ສິກ຺ຂຕິ. ‘‘ສພ຺ພກາຍປຏິສໍເວທີ ປສ຺ສສິສ຺ສາມີ’’ຕິ ສິກ຺ຂຕິ. ‘‘ປສ຺ສມ຺ຠຍໍ ກາຍສງ຺ຂາຣໍ ອສ຺ສສິສ຺ສາມີ’’ຕິ ສິກ຺ຂຕິ. ‘‘ປສ຺ສມ຺ຠຍໍ ກາຍສງ຺ຂາຣໍ ປສ຺ສສິສ຺ສາມີ’’ຕິ ສິກ຺ຂຕິ. ປີຕິປຏິສໍເວທີ…ເປ… ສຸຂປຏິສໍເວທີ… ຈິຕ຺ຕສງ຺ຂາຣປຏິສໍເວທີ … ປສ຺ສມ຺ຠຍໍ ຈິຕ຺ຕສງ຺ຂາຣໍ… ຈິຕ຺ຕປຏິສໍເວທີ… ອຠິປ຺ປໂມທຍໍ ຈິຕ຺ຕໍ… ສມາທຫໍ ຈິຕ຺ຕໍ… ວິໂມຈຍໍ ຈິຕ຺ຕໍ… ອນິຈ຺ຈານຸປສ຺ສີ… ວິຣາຄານຸປສ຺ສີ… ນິໂຣຘານຸປສ຺ສີ… ‘‘ປຏິນິສ຺ສຄ຺ຄານຸປສ຺ສີ ອສ຺ສສິສ຺ສາມີ’’ຕິ ສິກ຺ຂຕິ. ‘‘ປຏິນິສ຺ສຄ຺ຄານຸປສ຺ສີ ປສ຺ສສິສ຺ສາມີ’’ຕິ ສິກ຺ຂຕິ.
໑໖໔. ອິຘາຕິ ອິມິສ຺ສາ ທິຏ຺ຐິຍາ, ອິມິສ຺ສາ ຂນ຺ຕິຍາ, ອິມິສ຺ສາ ຣຸຈິຍາ, ອິມສ຺ມິໍ ອາທາເຍ, ອິມສ຺ມິໍ ຘມ຺ເມ, ອິມສ຺ມິໍ ວິນເຍ, ອິມສ຺ມິໍ ຘມ຺ມວິນເຍ, ອິມສ຺ມິໍ ປາວຈເນ, ອິມສ຺ມິໍ ພ຺ຣຫ຺ມຈຣິເຍ, ອິມສ຺ມິໍ ສຕ຺ຖຸສາສເນ. ເຕນ ວຸຈ຺ຈຕິ – ‘‘ອິຘາ’’ຕິ. ຠິກ຺ຂູຕິ ປຸຖຸຊ຺ຊນກລ຺ຍາຓໂກ ວາ ໂຫຕິ ຠິກ຺ຂຸ ເສກ຺ໂຂ ວາ ອຣຫາ ວາ ອກຸປ຺ປຘມ຺ໂມ. ອຣຎ຺ຎນ຺ຕິ ນິກ຺ຂມິຕ຺ວາ ພຫິ ອິນ຺ທຂີລາ ສພ຺ພເມຕໍ ອຣຎ຺ຎໍ. ຣຸກ຺ຂມູລນ຺ຕິ ຍຕ຺ຖ ຠິກ຺ຂຸໂນ ອາສນໍ ປຎ຺ຎຕ຺ຕໍ ໂຫຕິ ມຎ຺ໂຈ ວາ ປີຐໍ ວາ ຠິສິ ວາ ຕຏ຺ຏິກາ ວາ ຈມ຺ມຂຓ຺ໂຑ ວາ ຕິຓສນ຺ຖໂຣ [ຕິຓສຓ຺ຐໂຣ (ສ຺ຍາ.)] ວາ ປຓ຺ຓສນ຺ຖໂຣ ວາ ປລາລສນ຺ຖໂຣ [ປລາສສຓ຺ຐໂຣ (ສ຺ຍາ.)] ວາ, ຕຕ຺ຖ ຠິກ຺ຂຸ ຈງ຺ກມຕິ ວາ ຕິຏ຺ຐຕິ ວາ ນິສີທຕິ ວາ ເສຍ຺ຍໍ ວາ ກປ຺ເປຕິ. ສຸຎ຺ຎນ຺ຕິ ເກນຈິ ອນາກິຓ຺ຓໍ ໂຫຕິ ຄຫຏ຺ເຐຫິ ວາ ປພ຺ພຊິເຕຫິ ວາ. ອຄາຣນ຺ຕິ [ອາຄາຣນ຺ຕິ (ສ຺ຍາ.)] ວິຫາໂຣ ອຑ຺ຒໂຍໂຄ ປາສາໂທ ຫມ຺ມິຍໍ ຄຸຫາ. ນິສີທຕິ ປລ຺ລງ຺ກໍ ອາຠຸຊິຕ຺ວາຕິ ນິສິນ຺ໂນ ໂຫຕິ ປລ຺ລງ຺ກໍ ອາຠຸຊິຕ຺ວາ. ອຸຊຸໍ ກາຍໍ ປຓິຘາຍາຕິ ອຸຊຸໂກ ໂຫຕິ ກາໂຍ ຐິໂຕ [ປນິຘິໂຕ (ສ຺ຍາ.)] ສຸປຓິຫິໂຕ. ປຣິມຸຂໍ ສຕິໍ ອຸປຏ຺ຐເປຕ຺ວາຕິ. ປຣີຕິ ປຣິຄ຺ຄຫຏ຺ໂຐ. ມຸຂນ຺ຕິ ນິຍ຺ຍານຏ຺ໂຐ. ສຕີຕິ ອຸປຏ຺ຐານຏ຺ໂຐ. ເຕນ ວຸຈ຺ຈຕິ – ‘‘ປຣິມຸຂໍ ສຕິໍ ອຸປຏ຺ຐເປຕ຺ວາ’’ຕິ.
໑໖໕. ສໂຕວ ອສ຺ສສຕິ, ສໂຕ ປສ຺ສສຕີຕິ ພາຕ຺ຕິໍສາຍ ອາກາເຣຫິ ສໂຕ ກາຣີ ໂຫຕິ. ທີຆໍ ອສ຺ສາສວເສນ ຈິຕ຺ຕສ຺ສ ເອກຄ຺ຄຕໍ ອວິກ຺ເຂປໍ ປຊານໂຕ ສຕິ ອຸປຏ຺ຐິຕາ ໂຫຕິ. ຕາຍ ສຕິຍາ ເຕນ ຎາເຓນ ສໂຕ ກາຣີ ໂຫຕິ. ທີຆໍ ປສ຺ສາສວເສນ ຈິຕ຺ຕສ຺ສ ເອກຄ຺ຄຕໍ ອວິກ຺ເຂປໍ ປຊານໂຕ ສຕິ ອຸປຏ຺ຐິຕາ ໂຫຕິ. ຕາຍ ສຕິຍາ ເຕນ ຎາເຓນ ສໂຕ ກາຣີ ໂຫຕິ. ຣສ຺ສໍ ອສ຺ສາສວເສນ ຈິຕ຺ຕສ຺ສ ເອກຄ຺ຄຕໍ ອວິກ຺ເຂປໍ ປຊານໂຕ ສຕິ ອຸປຏ຺ຐິຕາ ໂຫຕິ. ຕາຍ ສຕິຍາ ເຕນ ຎາເຓນ ສໂຕ ກາຣີ ໂຫຕິ. ຣສ຺ສໍ ປສ຺ສາສວເສນ ຈິຕ຺ຕສ຺ສ ເອກຄ຺ຄຕໍ ອວິກ຺ເຂປໍ ປຊານໂຕ ສຕິ ອຸປຏ຺ຐິຕາ ໂຫຕິ. ຕາຍ ສຕິຍາ ເຕນ ຎາເຓນ ສໂຕ ກາຣີ ໂຫຕິ…ເປ… ປຏິນິສ຺ສຄ຺ຄານຸປສ຺ສີ ອສ຺ສາສວເສນ ປຏິນິສ຺ສຄ຺ຄານຸປສ຺ສີ ປສ຺ສາສວເສນ ຈິຕ຺ຕສ຺ສ ເອກຄ຺ຄຕໍ ອວິກ຺ເຂປໍ ປຊານໂຕ ສຕິ ອຸປຏ຺ຐິຕາ ໂຫຕິ. ຕາຍ ສຕິຍາ ເຕນ ຎາເຓນ ສໂຕ ກາຣີ ໂຫຕິ.
ປຐມຈຕຸກ຺ກນິທ຺ເທໂສ
໑໖໖. ກຖໍ ທີຆໍ ອສ຺ສສນ຺ໂຕ ‘‘ທີຆໍ ອສ຺ສສາມີ’’ຕິ ປຊານາຕິ, ທີຆໍ ປສ຺ສສນ຺ໂຕ ‘‘ທີຆໍ ປສ຺ສສາມີ’’ຕິ ປຊານາຕິ? ທີຆໍ ອສ຺ສາສໍ ອທ຺ຘານສງ຺ຂາເຕ ອສ຺ສສຕິ, ທີຆໍ ປສ຺ສາສໍ ອທ຺ຘານສງ຺ຂາເຕ ປສ຺ສສຕິ, ທີຆໍ ອສ຺ສາສປສ຺ສາສໍ ອທ຺ຘານສງ຺ຂາເຕ ອສ຺ສສຕິປິ ປສ຺ສສຕິປິ. ທີຆໍ ອສ຺ສາສປສ຺ສາສໍ ອທ຺ຘານສງ຺ຂາເຕ ອສ຺ສສໂຕປິ ປສ຺ສສໂຕປິ ຉນ຺ໂທ ອຸປ຺ປຊ຺ຊຕິ. ຉນ຺ທວເສນ ຕໂຕ ສຸຂຸມຕຣໍ ທີຆໍ ອສ຺ສາສໍ ອທ຺ຘານສງ຺ຂາເຕ ອສ຺ສສຕິ, ຉນ຺ທວເສນ ຕໂຕ ສຸຂຸມຕຣໍ ທີຆໍ ປສ຺ສາສໍ ອທ຺ຘານສງ຺ຂາເຕ ປສ຺ສສຕິ, ຉນ຺ທວເສນ ຕໂຕ ສຸຂຸມຕຣໍ ທີຆໍ ອສ຺ສາສປສ຺ສາສໍ ອທ຺ຘານສງ຺ຂາເຕ ອສ຺ສສຕິປິ ປສ຺ສສຕິປິ. ຉນ຺ທວເສນ ຕໂຕ ສຸຂຸມຕຣໍ ທີຆໍ ອສ຺ສາສປສ຺ສາສໍ ອທ຺ຘານສງ຺ຂາເຕ ອສ຺ສສໂຕປິ ປສ຺ສສໂຕປິ ປາໂມຊ຺ຊໍ ອຸປ຺ປຊ຺ຊຕິ. ປາໂມຊ຺ຊວເສນ ຕໂຕ ສຸຂຸມຕຣໍ ທີຆໍ ອສ຺ສາສໍ ອທ຺ຘານສງ຺ຂາເຕ ອສ຺ສສຕິ, ປາໂມຊ຺ຊວເສນ ຕໂຕ ສຸຂຸມຕຣໍ ທີຆໍ ປສ຺ສາສໍ ອທ຺ຘານສງ຺ຂາເຕ ປສ຺ສສຕິ, ປາໂມຊ຺ຊວເສນ ຕໂຕ ສຸຂຸມຕຣໍ ທີຆໍ ອສ຺ສາສປສ຺ສາສໍ ອທ຺ຘານສງ຺ຂາເຕ ອສ຺ສສຕິປິ ປສ຺ສສຕິປິ. ປາໂມຊ຺ຊວເສນ ຕໂຕ ສຸຂຸມຕຣໍ ທີຆໍ ອສ຺ສາສປສ຺ສາສໍ ອທ຺ຘານສງ຺ຂາເຕ ອສ຺ສສໂຕປິ ປສ຺ສສໂຕປິ ທີຆໍ ອສ຺ສາສປສ຺ສາສາປິ ຈິຕ຺ຕໍ ວິວຕ຺ຕຕິ, ອຸເປກ຺ຂາ ສຓ຺ຐາຕິ. ອິເມຫິ ນວຫາກາເຣຫິ ທີຆໍ ອສ຺ສາສປສ຺ສາສາ ກາໂຍ. ອຸປຏ຺ຐານໍ ສຕິ. ອນຸປສ຺ສນາ ຎາຓໍ. ກາໂຍ ອຸປຏ຺ຐານໍ, ໂນ ສຕິ; ສຕິ ອຸປຏ຺ຐານຎ຺ເຈວ ສຕິ ຈ. ຕາຍ ສຕິຍາ ເຕນ ຎາເຓນ ຕໍ ກາຍໍ ອນຸປສ຺ສຕິ. ເຕນ ວຸຈ຺ຈຕິ – ‘‘ກາເຍ ກາຍານຸປສ຺ສນາສຕິປຏ຺ຐານຠາວນາ’’ຕິ.
໑໖໗. ອນຸປສ຺ສຕີຕິ ກຖໍ ຕໍ ກາຍໍ ອນຸປສ຺ສຕິ? ອນິຈ຺ຈໂຕ ອນຸປສ຺ສຕິ, ໂນ ນິຈ຺ຈໂຕ. ທຸກ຺ຂໂຕ ອນຸປສ຺ສຕິ, ໂນ ສຸຂໂຕ. ອນຕ຺ຕໂຕ ອນຸປສ຺ສຕິ, ໂນ ອຕ຺ຕໂຕ. ນິພ຺ພິນ຺ທຕິ, ໂນ ນນ຺ທຕິ. ວິຣຊ຺ຊຕິ, ໂນ ຣຊ຺ຊຕິ. ນິໂຣເຘຕິ, ໂນ ສມຸເທຕິ. ປຏິນິສ຺ສຊ຺ຊຕິ, ໂນ ອາທິຍຕິ. ອນິຈ຺ຈໂຕ ອນຸປສ຺ສນ຺ໂຕ ນິຈ຺ຈສຎ຺ຎໍ ປຊຫຕິ. ທຸກ຺ຂໂຕ ອນຸປສ຺ສນ຺ໂຕ ສຸຂສຎ຺ຎໍ ປຊຫຕິ. ອນຕ຺ຕໂຕ ອນຸປສ຺ສນ຺ໂຕ ອຕ຺ຕສຎ຺ຎໍ ປຊຫຕິ. ນິພ຺ພິນ຺ທນ຺ໂຕ ນນ຺ທິໍ ປຊຫຕິ. ວິຣຊ຺ຊນ຺ໂຕ ຣາຄໍ ປຊຫຕິ. ນິໂຣເຘນ຺ໂຕ ສມຸທຍໍ ປຊຫຕິ. ປຏິນິສ຺ສຊ຺ຊນ຺ໂຕ ອາທານໍ ປຊຫຕິ. ເອວໍ ຕໍ ກາຍໍ ອນຸປສ຺ສຕິ.
ຠາວນາຕິ ຈຕສ຺ໂສ ຠາວນາ – ຕຕ຺ຖ ຊາຕານໍ ຘມ຺ມານໍ ອນຕິວຕ຺ຕນຏ຺ເຐນ ຠາວນາ, ອິນ຺ທ຺ຣິຍານໍ ເອກຣສຏ຺ເຐນ ຠາວນາ, ຕທຸປຄວີຣິຍວາຫນຏ຺ເຐນ ຠາວນາ, ອາເສວນຏ຺ເຐນ ຠາວນາ. ທີຆໍ ອສ຺ສາສປສ຺ສາສວເສນ ຈິຕ຺ຕສ຺ສ ເອກຄ຺ຄຕໍ ອວິກ຺ເຂປໍ ປຊານໂຕ ວິທິຕາ ເວທນາ ອຸປ຺ປຊ຺ຊນ຺ຕິ, ວິທິຕາ ອຸປຏ຺ຐຫນ຺ຕິ, ວິທິຕາ ອພ຺ຠຕ຺ຖໍ ຄຈ຺ຉນ຺ຕິ. ວິທິຕາ ສຎ຺ຎາ ອຸປ຺ປຊ຺ຊນ຺ຕິ, ວິທິຕາ ອຸປຏ຺ຐຫນ຺ຕິ, ວິທິຕາ ອພ຺ຠຕ຺ຖໍ ຄຈ຺ຉນ຺ຕິ. ວິທິຕາ ວິຕກ຺ກາ ອຸປ຺ປຊ຺ຊນ຺ຕິ, ວິທິຕາ ອຸປຏ຺ຐຫນ຺ຕິ, ວິທິຕາ ອພ຺ຠຕ຺ຖໍ ຄຈ຺ຉນ຺ຕິ.
ກຖໍ ວິທິຕາ ເວທນາ ອຸປ຺ປຊ຺ຊນ຺ຕິ, ວິທິຕາ ອຸປຏ຺ຐຫນ຺ຕິ, ວິທິຕາ ອພ຺ຠຕ຺ຖໍ ຄຈ຺ຉນ຺ຕິ? ກຖໍ ເວທນາຍ ອຸປ຺ປາໂທ ວິທິໂຕ ໂຫຕິ? ອວິຊ຺ຊາສມຸທຍາ ເວທນາສມຸທໂຍຕິ – ປຈ຺ຈຍສມຸທຍຏ຺ເຐນ ເວທນາຍ ອຸປ຺ປາໂທ ວິທິໂຕ ໂຫຕິ. ຕຓ຺ຫາສມຸທຍາ ເວທນາສມຸທໂຍຕິ… ກມ຺ມສມຸທຍາ ເວທນາສມຸທໂຍຕິ… ຜສ຺ສສມຸທຍາ ເວທນາສມຸທໂຍຕິ ປຈ຺ຈຍສມຸທຍຏ຺ເຐນ ເວທນາຍ ອຸປ຺ປາໂທ ວິທິໂຕ ໂຫຕິ. ນິພ຺ພຕ຺ຕິລກ຺ຂຓໍ ປສ຺ສໂຕປິ ເວທນາຍ ອຸປ຺ປາໂທ ວິທິໂຕ ໂຫຕິ. ເອວໍ ເວທນາຍ ອຸປ຺ປາໂທ ວິທິໂຕ ໂຫຕິ.
ກຖໍ ເວທນາຍ ອຸປຏ຺ຐານໍ ວິທິຕໍ ໂຫຕິ? ອນິຈ຺ຈໂຕ ມນສິກໂຣໂຕ ຂຍຕຸປຏ຺ຐານໍ ວິທິຕໍ ໂຫຕິ. ທຸກ຺ຂໂຕ ມນສິກໂຣໂຕ ຠຍຕຸປຏ຺ຐານໍ ວິທິຕໍ ໂຫຕິ. ອນຕ຺ຕໂຕ ມນສິກໂຣໂຕ ສຸຎ຺ຎຕຸປຏ຺ຐານໍ ວິທິຕໍ ໂຫຕິ. ເອວໍ ເວທນາຍ ອຸປຏ຺ຐານໍ ວິທິຕໍ ໂຫຕິ.
ກຖໍ ເວທນາຍ ອຕ຺ຖງ຺ຄໂມ ວິທິໂຕ ໂຫຕິ? ອວິຊ຺ຊານິໂຣຘາ ເວທນານິໂຣໂຘຕິ – ປຈ຺ຈຍນິໂຣຘຏ຺ເຐນ ເວທນາຍ ອຕ຺ຖງ຺ຄໂມ ວິທິໂຕ ໂຫຕິ. ຕຓ຺ຫານິໂຣຘາ ເວທນານິໂຣໂຘຕິ …ເປ… ກມ຺ມນິໂຣຘາ ເວທນານິໂຣໂຘຕິ…ເປ… ຜສ຺ສນິໂຣຘາ ເວທນານິໂຣໂຘຕິ ປຈ຺ຈຍນິໂຣຘຏ຺ເຐນ ເວທນາຍ ອຕ຺ຖງ຺ຄໂມ ວິທິໂຕ ໂຫຕິ. ວິປຣິຓາມລກ຺ຂຓໍ ປສ຺ສໂຕປິ ເວທນາຍ ອຕ຺ຖງ຺ຄໂມ ວິທິໂຕ ໂຫຕິ. ເອວໍ ເວທນາຍ ອຕ຺ຖງ຺ຄໂມ ວິທິໂຕ ໂຫຕິ. ເອວໍ ວິທິຕາ ເວທນາ ອຸປ຺ປຊ຺ຊນ຺ຕິ, ວິທິຕາ ອຸປຏ຺ຐຫນ຺ຕິ, ວິທິຕາ ອພ຺ຠຕ຺ຖໍ ຄຈ຺ຉນ຺ຕິ.
ກຖໍ ວິທິຕາ ສຎ຺ຎາ ອຸປ຺ປຊ຺ຊນ຺ຕິ, ວິທິຕາ ອຸປຏ຺ຐຫນ຺ຕິ, ວິທິຕາ ອພ຺ຠຕ຺ຖໍ ຄຈ຺ຉນ຺ຕິ? ກຖໍ ສຎ຺ຎາຍ ອຸປ຺ປາໂທ ວິທິໂຕ ໂຫຕິ? ອວິຊ຺ຊາສມຸທຍາ ສຎ຺ຎາສມຸທໂຍຕິ – ປຈ຺ຈຍສມຸທຍຏ຺ເຐນ ສຎ຺ຎາຍ ອຸປ຺ປາໂທ ວິທິໂຕ ໂຫຕິ. ຕຓ຺ຫາສມຸທຍາ ສຎ຺ຎາສມຸທໂຍຕິ…ເປ… ກມ຺ມສມຸທຍາ ສຎ຺ຎາສມຸທໂຍຕິ…ເປ… ຜສ຺ສສມຸທຍາ ສຎ຺ຎາສມຸທໂຍຕິ – ປຈ຺ຈຍສມຸທຍຏ຺ເຐນ ສຎ຺ຎາຍ ອຸປ຺ປາໂທ ວິທິໂຕ ໂຫຕິ. ນິພ຺ພຕ຺ຕິລກ຺ຂຓໍ ປສ຺ສໂຕປິ ສຎ຺ຎາຍ ອຸປ຺ປາໂທ ວິທິໂຕ ໂຫຕິ. ເອວໍ ສຎ຺ຎາຍ ອຸປ຺ປາໂທ ວິທິໂຕ ໂຫຕິ.
ກຖໍ ສຎ຺ຎາຍ ອຸປຏ຺ຐານໍ ວິທິຕໍ ໂຫຕິ? ອນິຈ຺ຈໂຕ ມນສິກໂຣໂຕ ຂຍຕຸປຏ຺ຐານໍ ວິທິຕໍ ໂຫຕິ. ທຸກ຺ຂໂຕ ມນສິກໂຣໂຕ ຠຍຕຸປຏ຺ຐານໍ ວິທິຕໍ ໂຫຕິ. ອນຕ຺ຕໂຕ ມນສິກໂຣໂຕ ສຸຎ຺ຎຕຸປຏ຺ຐານໍ ວິທິຕໍ ໂຫຕິ. ເອວໍ ສຎ຺ຎາຍ ອຸປຏ຺ຐານໍ ວິທິຕໍ ໂຫຕິ.
ກຖໍ ສຎ຺ຎາຍ ອຕ຺ຖງ຺ຄໂມ ວິທິໂຕ ໂຫຕິ? ອວິຊ຺ຊານິໂຣຘາ ສຎ຺ຎານິໂຣໂຘຕິ – ປຈ຺ຈຍນິໂຣຘຏ຺ເຐນ ສຎ຺ຎາຍ ອຕ຺ຖງ຺ຄໂມ ວິທິໂຕ ໂຫຕິ. ຕຓ຺ຫານິໂຣຘາ ສຎ຺ຎານິໂຣໂຘຕິ…ເປ… ກມ຺ມນິໂຣຘາ ສຎ຺ຎານິໂຣໂຘຕິ…ເປ… ຜສ຺ສນິໂຣຘາ ສຎ຺ຎານິໂຣໂຘຕິ – ປຈ຺ຈຍນິໂຣຘຏ຺ເຐນ ສຎ຺ຎາຍ ອຕ຺ຖງ຺ຄໂມ ວິທິໂຕ ໂຫຕິ. ວິປຣິຓາມລກ຺ຂຓໍ ປສ຺ສໂຕປິ ສຎ຺ຎາຍ ອຕ຺ຖງ຺ຄໂມ ວິທິໂຕ ໂຫຕິ. ເອວໍ ສຎ຺ຎາຍ ອຕ຺ຖງ຺ຄໂມ ວິທິໂຕ ໂຫຕິ. ເອວໍ ວິທິຕາ ສຎ຺ຎາ ອຸປ຺ປຊ຺ຊນ຺ຕິ, ວິທິຕາ ອຸປຏ຺ຐຫນ຺ຕິ, ວິທິຕາ ອພ຺ຠຕ຺ຖໍ ຄຈ຺ຉນ຺ຕິ.
ກຖໍ ວິທິຕາ ວິຕກ຺ກາ ອຸປ຺ປຊ຺ຊນ຺ຕິ, ວິທິຕາ ອຸປຏ຺ຐຫນ຺ຕິ, ວິທິຕາ ອພ຺ຠຕ຺ຖໍ ຄຈ຺ຉນ຺ຕິ? ກຖໍ ວິຕກ຺ການໍ ອຸປ຺ປາໂທ ວິທິໂຕ ໂຫຕິ? ອວິຊ຺ຊາສມຸທຍາ ວິຕກ຺ກສມຸທໂຍຕິ – ປຈ຺ຈຍສມຸທຍຏ຺ເຐນ ວິຕກ຺ການໍ ອຸປ຺ປາໂທ ວິທິໂຕ ໂຫຕິ. ຕຓ຺ຫາສມຸທຍາ ວິຕກ຺ກສມຸທໂຍຕິ…ເປ… ກມ຺ມສມຸທຍາ ວິຕກ຺ກສມຸທໂຍຕິ…ເປ… ສຎ຺ຎາສມຸທຍາ ວິຕກ຺ກສມຸທໂຍຕິ – ປຈ຺ຈຍສມຸທຍຏ຺ເຐນ ວິຕກ຺ການໍ ອຸປ຺ປາໂທ ວິທິໂຕ ໂຫຕິ. ນິພ຺ພຕ຺ຕິລກ຺ຂຓໍ ປສ຺ສໂຕປິ ວິຕກ຺ການໍ ອຸປ຺ປາໂທ ວິທິໂຕ ໂຫຕິ. ເອວໍ ວິຕກ຺ການໍ ອຸປ຺ປາໂທ ວິທິໂຕ ໂຫຕິ.
ກຖໍ ວິຕກ຺ການໍ ອຸປຏ຺ຐານໍ ວິທິຕໍ ໂຫຕິ? ອນິຈ຺ຈໂຕ ມນສິກໂຣໂຕ ຂຍຕຸປຏ຺ຐານໍ ວິທິຕໍ ໂຫຕິ. ທຸກ຺ຂໂຕ ມນສິກໂຣໂຕ ຠຍຕຸປຏ຺ຐານໍ ວິທິຕໍ ໂຫຕິ. ອນຕ຺ຕໂຕ ມນສິກໂຣໂຕ ສຸຎ຺ຎຕຸປຏ຺ຐານໍ ວິທິຕໍ ໂຫຕິ. ເອວໍ ວິຕກ຺ການໍ ອຸປຏ຺ຐານໍ ວິທິຕໍ ໂຫຕິ.
ກຖໍ ວິຕກ຺ການໍ ອຕ຺ຖງ຺ຄໂມ ວິທິໂຕ ໂຫຕິ? ອວິຊ຺ຊານິໂຣຘາ ວິຕກ຺ກນິໂຣໂຘຕິ – ປຈ຺ຈຍນິໂຣຘຏ຺ເຐນ ວິຕກ຺ການໍ ອຕ຺ຖງ຺ຄໂມ ວິທິໂຕ ໂຫຕິ. ຕຓ຺ຫານິໂຣຘາ ວິຕກ຺ກນິໂຣໂຘຕິ…ເປ… ກມ຺ມນິໂຣຘາ ວິຕກ຺ກນິໂຣໂຘຕິ…ເປ… ສຎ຺ຎານິໂຣຘາ ວິຕກ຺ກນິໂຣໂຘຕິ – ປຈ຺ຈຍນິໂຣຘຏ຺ເຐນ ວິຕກ຺ການໍ ອຕ຺ຖງ຺ຄໂມ ວິທິໂຕ ໂຫຕິ. ວິປຣິຓາມລກ຺ຂຓໍ ປສ຺ສໂຕປິ ວິຕກ຺ການໍ ອຕ຺ຖງ຺ຄໂມ ວິທິໂຕ ໂຫຕິ. ເອວໍ ວິຕກ຺ການໍ ອຕ຺ຖງ຺ຄໂມ ວິທິໂຕ ໂຫຕິ. ເອວໍ ວິທິຕາ ວິຕກ຺ກາ ອຸປ຺ປຊ຺ຊນ຺ຕິ, ວິທິຕາ ອຸປຏ຺ຐຫນ຺ຕິ, ວິທິຕາ ອພ຺ຠຕ຺ຖໍ ຄຈ຺ຉນ຺ຕິ.
໑໖໘. ທີຆໍ ອສ຺ສາສປສ຺ສາສວເສນ ຈິຕ຺ຕສ຺ສ ເອກຄ຺ຄຕໍ ອວິກ຺ເຂປໍ ປຊານນ຺ໂຕ ອິນ຺ທ຺ຣິຍານິ ສໂມຘາເນຕິ, ໂຄຈຣຎ຺ຈ ປຊານາຕິ, ສມຕ຺ຖຎ຺ຈ ປຏິວິຊ຺ຌຕິ…ເປ… ມຄ຺ຄໍ ສໂມຘາເນຕິ, ຘມ຺ເມ ສໂມຘາເນຕິ, ໂຄຈຣຎ຺ຈ ປຊານາຕິ, ສມຕ຺ຖຎ຺ຈ ປຏິວິຊ຺ຌຕິ.
ອິນ຺ທ຺ຣິຍານິ ສໂມຘາເນຕີຕິ ກຖໍ ອິນ຺ທ຺ຣິຍານິ ສໂມຘາເນຕິ? ອຘິໂມກ຺ຂຏ຺ເຐນ ສທ຺ຘິນ຺ທ຺ຣິຍໍ ສໂມຘາເນຕິ, ປຄ຺ຄຫຏ຺ເຐນ ວີຣິຍິນ຺ທ຺ຣິຍໍ ສໂມຘາເນຕິ, ອຸປຏ຺ຐານຏ຺ເຐນ ສຕິນ຺ທ຺ຣິຍໍ ສໂມຘາເນຕິ, ອວິກ຺ເຂປຏ຺ເຐນ ສມາຘິນ຺ທ຺ຣິຍໍ ສໂມຘາເນຕິ, ທສ຺ສນຏ຺ເຐນ ປຎ຺ຎິນ຺ທ຺ຣິຍໍ ສໂມຘາເນຕິ. ອຍໍ ປຸຄ຺ຄໂລ ອິມານິ ອິນ຺ທ຺ຣິຍານິ ອິມສ຺ມິໍ ອາຣມ຺ມເຓ ສໂມຘາເນຕິ. ເຕນ ວຸຈ຺ຈຕິ – ‘‘ອິນ຺ທ຺ຣິຍານິ ສໂມຘາເນຕີ’’ຕິ.
ໂຄຈຣຎ຺ຈ ປຊານາຕີຕິ ຍໍ ຕສ຺ສ ອາຣມ຺ມຓໍ, ຕໍ ຕສ຺ສ ໂຄຈຣໍ. ຍໍ ຕສ຺ສ ໂຄຈຣໍ, ຕໍ ຕສ຺ສ ອາຣມ຺ມຓໍ. ປຊານາຕີຕິ ປຸຄ຺ຄໂລ. ປຊານນາ ປຎ຺ຎາ.
ສມນ຺ຕິ ອາຣມ຺ມຓສ຺ສ ອຸປຏ຺ຐານໍ ສມໍ, ຈິຕ຺ຕສ຺ສ ອວິກ຺ເຂໂປ ສມໍ, ຈິຕ຺ຕສ຺ສ ອຘິຏ຺ຐານໍ ສມໍ, ຈິຕ຺ຕສ຺ສ ໂວທານໍ ສມໍ. ອຕ຺ໂຖຕິ ອນວຊ຺ຊຏ຺ໂຐ ນິກ຺ກິເລສຏ຺ໂຐ ໂວທານຏ຺ໂຐ ປຣມຏ຺ໂຐ. ປຏິວິຊ຺ຌຕີຕິ ອາຣມ຺ມຓສ຺ສ ອຸປຏ຺ຐານຏ຺ຐໍ ປຏິວິຊ຺ຌຕິ, ຈິຕ຺ຕສ຺ສ ອວິກ຺ເຂປຏ຺ຐໍ ປຏິວິຊ຺ຌຕິ, ຈິຕ຺ຕສ຺ສ ອຘິຏ຺ຐານຏ຺ຐໍ ປຏິວິຊ຺ຌຕິ, ຈິຕ຺ຕສ຺ສ ໂວທານຏ຺ຐໍ ປຏິວິຊ຺ຌຕິ. ເຕນ ວຸຈ຺ຈຕິ – ‘‘ສມຕ຺ຖຎ຺ຈ ປຏິວິຊ຺ຌຕີ’’ຕິ.
ພລານິ ສໂມຘາເນຕີຕິ ກຖໍ ພລານິ ສໂມຘາເນຕິ? ອສ຺ສທ຺ຘິເຍ ອກມ຺ປິຍຏ຺ເຐນ ສທ຺ຘາພລໍ ສໂມຘາເນຕິ, ໂກສຊ຺ເຊ ອກມ຺ປິຍຏ຺ເຐນ ວີຣິຍພລໍ ສໂມຘາເນຕິ, ປມາເທ ອກມ຺ປິຍຏ຺ເຐນ ສຕິພລໍ ສໂມຘາເນຕິ, ອຸທ຺ຘຈ຺ເຈ ອກມ຺ປິຍຏ຺ເຐນ ສມາຘິພລໍ ສໂມຘາເນຕິ, ອວິຊ຺ຊາຍ ອກມ຺ປິຍຏ຺ເຐນ ປຎ຺ຎາພລໍ ສໂມຘາເນຕິ. ອຍໍ ປຸຄ຺ຄໂລ ອິມານິ ພລານິ ອິມສ຺ມິໍ ອາຣມ຺ມເຓ ສໂມຘາເນຕິ. ເຕນ ວຸຈ຺ຈຕິ – ພລານິ ສໂມຘາເນຕີຕິ. ໂຄຈຣຎ຺ຈ ປຊານາຕີຕິ…ເປ… ເຕນ ວຸຈ຺ຈຕິ – ‘‘ສມຕ຺ຖຎ຺ຈ ປຏິວິຊ຺ຌຕີ’’ຕິ.
ໂພຊ຺ຌງ຺ເຄ ສໂມຘາເນຕີຕິ ກຖໍ ໂພຊ຺ຌງ຺ເຄ ສໂມຘາເນຕິ? ອຸປຏ຺ຐານຏ຺ເຐນ ສຕິສມ຺ໂພຊ຺ຌງ຺ຄໍ ສໂມຘາເນຕິ, ປວິຈຍຏ຺ເຐນ ຘມ຺ມວິຈຍສມ຺ໂພຊ຺ຌງ຺ຄໍ ສໂມຘາເນຕິ, ປຄ຺ຄຫຏ຺ເຐນ ວີຣິຍສມ຺ໂພຊ຺ຌງ຺ຄໍ ສໂມຘາເນຕິ, ຜຣຓຏ຺ເຐນ ປີຕິສມ຺ໂພຊ຺ຌງ຺ຄໍ ສໂມຘາເນຕິ, ອຸປສມຏ຺ເຐນ ປສ຺ສທ຺ຘິສມ຺ໂພຊ຺ຌງ຺ຄໍ ສໂມຘາເນຕິ, ອວິກ຺ເຂປຏ຺ເຐນ ສມາຘິສມ຺ໂພຊ຺ຌງ຺ຄໍ ສໂມຘາເນຕິ, ປຏິສງ຺ຂານຏ຺ເຐນ ອຸເປກ຺ຂາສມ຺ໂພຊ຺ຌງ຺ຄໍ ສໂມຘາເນຕິ. ອຍໍ ປຸຄ຺ຄໂລ ອິເມ ໂພຊ຺ຌງ຺ເຄ ອິມສ຺ມິໍ ອາຣມ຺ມເຓ ສໂມຘາເນຕິ. ເຕນ ວຸຈ຺ຈຕິ – ‘‘ໂພຊ຺ຌງ຺ເຄ ສໂມຘາເນຕີ’’ຕິ. ໂຄຈຣຎ຺ຈ ປຊານາຕີຕິ…ເປ… ເຕນ ວຸຈ຺ຈຕິ – ‘‘ສມຕ຺ຖຎ຺ຈ ປຏິວິຊ຺ຌຕີ’’ຕິ.
ມຄ຺ຄໍ ສໂມຘາເນຕີຕິ ກຖໍ ມຄ຺ຄໍ ສໂມຘາເນຕິ? ທສ຺ສນຏ຺ເຐນ ສມ຺ມາທິຏ຺ຐິໍ ສໂມຘາເນຕິ, ອຠິນິໂຣປນຏ຺ເຐນ ສມ຺ມາສງ຺ກປ຺ປໍ ສໂມຘາເນຕິ, ປຣິຄ຺ຄຫຏ຺ເຐນ ສມ຺ມາວາຈໍ ສໂມຘາເນຕິ, ສມຸຏ຺ຐານຏ຺ເຐນ ສມ຺ມາກມ຺ມນ຺ຕໍ ສໂມຘາເນຕິ, ໂວທານຏ຺ເຐນ ສມ຺ມາອາຊີວໍ ສໂມຘາເນຕິ, ປຄ຺ຄຫຏ຺ເຐນ ສມ຺ມາວາຍາມໍ ສໂມຘາເນຕິ, ອຸປຏ຺ຐານຏ຺ເຐນ ສມ຺ມາສຕິໍ ສໂມຘາເນຕິ, ອວິກ຺ເຂປຏ຺ເຐນ ສມ຺ມາສມາຘິໍ ສໂມຘາເນຕິ. ອຍໍ ປຸຄ຺ຄໂລ ອິມໍ ມຄ຺ຄໍ ອິມສ຺ມິໍ ອາຣມ຺ມເຓ ສໂມຘາເນຕິ. ເຕນ ວຸຈ຺ຈຕິ – ‘‘ມຄ຺ຄໍ ສໂມຘາເນຕີ’’ຕິ. ໂຄຈຣຎ຺ຈ ປຊານາຕີຕິ…ເປ… ເຕນ ວຸຈ຺ຈຕິ – ‘‘ສມຕ຺ຖຎ຺ຈ ປຏິວິຊ຺ຌຕີ’’ຕິ.
ຘມ຺ເມ ສໂມຘາເນຕີຕິ ກຖໍ ຘມ຺ເມ ສໂມຘາເນຕິ? ອາຘິປເຕຍ຺ຍຏ຺ເຐນ ອິນ຺ທ຺ຣິຍານິ ສໂມຘາເນຕິ, ອກມ຺ປິຍຏ຺ເຐນ ພລານິ ສໂມຘາເນຕິ, ນິຍ຺ຍານຏ຺ເຐນ ໂພຊ຺ຌງ຺ເຄ ສໂມຘາເນຕິ, ເຫຕຸຏ຺ເຐນ ມຄ຺ຄໍ ສໂມຘາເນຕິ, ອຸປຏ຺ຐານຏ຺ເຐນ ສຕິປຏ຺ຐານໍ ສໂມຘາເນຕິ, ປທຫນຏ຺ເຐນ ສມ຺ມປ຺ປຘານໍ ສໂມຘາເນຕິ, ອິຊ຺ຌນຏ຺ເຐນ ອິທ຺ຘິປາທໍ ສໂມຘາເນຕິ ຕຖຏ຺ເຐນ ສຈ຺ຈໍ ສໂມຘາເນຕິ, ອວິກ຺ເຂປຏ຺ເຐນ ສມຖໍ ສໂມຘາເນຕິ, ອນຸປສ຺ສນຏ຺ເຐນ ວິປສ຺ສນໍ ສໂມຘາເນຕິ, ເອກຣສຏ຺ເຐນ ສມຖວິປສ຺ສນໍ ສໂມຘາເນຕິ, ອນຕິວຕ຺ຕນຏ຺ເຐນ ຍຸຄນທ຺ຘໍ ສໂມຘາເນຕິ, ສໍວຣຏ຺ເຐນ ສີລວິສຸທ຺ຘິໍ ສໂມຘາເນຕິ, ອວິກ຺ເຂປຏ຺ເຐນ ຈິຕ຺ຕວິສຸທ຺ຘິໍ ສໂມຘາເນຕິ, ທສ຺ສນຏ຺ເຐນ ທິຏ຺ຐິວິສຸທ຺ຘິໍ ສໂມຘາເນຕິ, ວິມຸຕ຺ຕຏ຺ເຐນ ວິໂມກ຺ຂໍ ສໂມຘາເນຕິ, ປຏິເວຘຏ຺ເຐນ ວິຊ຺ຊໍ ສໂມຘາເນຕິ, ປຣິຈ຺ຈາຄຏ຺ເຐນ ວິມຸຕ຺ຕິໍ ສໂມຘາເນຕິ, ສມຸຈ຺ເຉທຏ຺ເຐນ ຂເຍ ຎາຓໍ ສໂມຘາເນຕິ, ປຏິປ຺ປສ຺ສທ຺ຘຏ຺ເຐນ ອນຸປ຺ປາເທ ຎາຓໍ ສໂມຘາເນຕິ, ຉນ຺ທໍ ມູລຏ຺ເຐນ ສໂມຘາເນຕິ, ມນສິກາຣໍ ສມຸຏ຺ຐານຏ຺ເຐນ ສໂມຘາເນຕິ, ຜສ຺ສໍ ສໂມຘານຏ຺ເຐນ ສໂມຘາເນຕິ, ເວທນໍ ສໂມສຣຓຏ຺ເຐນ ສໂມຘາເນຕິ, ສມາຘິໍ ປມຸຂຏ຺ເຐນ ສໂມຘາເນຕິ, ສຕິໍ ອາຘິປເຕຍ຺ຍຏ຺ເຐນ ສໂມຘາເນຕິ, ປຎ຺ຎໍ ຕຕຸຕ຺ຕຣຏ຺ເຐນ ສໂມຘາເນຕິ, ວິມຸຕ຺ຕິໍ ສາຣຏ຺ເຐນ ສໂມຘາເນຕິ, ອມໂຕຄຘໍ ນິພ຺ພານໍ ປຣິໂຍສານຏ຺ເຐນ ສໂມຘາເນຕິ. ອຍໍ ປຸຄ຺ຄໂລ ອິເມ ຘມ຺ເມ ອິມສ຺ມິໍ ອາຣມ຺ມເຓ ສໂມຘາເນຕິ. ເຕນ ວຸຈ຺ຈຕິ – ‘‘ຘມ຺ເມ ສໂມຘາເນຕີ’’ຕິ.
ໂຄຈຣຎ຺ຈ ປຊານາຕີຕິ ຍໍ ຕສ຺ສ ອາຣມ຺ມຓໍ, ຕໍ ຕສ຺ສ ໂຄຈຣໍ. ຍໍ ຕສ຺ສ ໂຄຈຣໍ, ຕໍ ຕສ຺ສ ອາຣມ຺ມຓໍ ປຊານາຕີຕິ ປຸຄ຺ຄໂລ. ປຊານນາ ປຎ຺ຎາ. ສມນ຺ຕິ ອາຣມ຺ມຓສ຺ສ ອຸປຏ຺ຐານໍ ສມໍ, ຈິຕ຺ຕສ຺ສ ອວິກ຺ເຂໂປ ສມໍ, ຈິຕ຺ຕສ຺ສ ອຘິຏ຺ຐານໍ ສມໍ, ຈິຕ຺ຕສ຺ສ ໂວທານໍ ສມໍ. ອຕ຺ໂຖຕິ ອນວຊ຺ຊຏ຺ໂຐ ນິກ຺ກິເລສຏ຺ໂຐ ໂວທານຏ຺ໂຐ ປຣມຏ຺ໂຐ. ປຏິວິຊ຺ຌຕີຕິ ອາຣມ຺ມຓສ຺ສ ອຸປຏ຺ຐານຏ຺ຐໍ ປຏິວິຊ຺ຌຕິ, ຈິຕ຺ຕສ຺ສ ອວິກ຺ເຂປຏ຺ຐໍ ປຏິວິຊ຺ຌຕິ, ຈິຕ຺ຕສ຺ສ ອຘິຏ຺ຐານຏ຺ຐໍ ປຏິວິຊ຺ຌຕິ, ຈິຕ຺ຕສ຺ສ ໂວທານຏ຺ຐໍ ປຏິວິຊ຺ຌຕິ. ເຕນ ວຸຈ຺ຈຕິ – ‘‘ສມຕ຺ຖຎ຺ຈ ປຏິວິຊ຺ຌຕີ’’ຕິ.
໑໖໙. ກຖໍ ຣສ຺ສໍ ອສ຺ສສນ຺ໂຕ ‘‘ຣສ຺ສໍ ອສ຺ສສາມີ’’ຕິ ປຊານາຕິ, ຣສ຺ສໍ ປສ຺ສສນ຺ໂຕ ‘‘ຣສ຺ສໍ ປສ຺ສສາມີ’’ຕິ ປຊານາຕິ? ຣສ຺ສໍ ອສ຺ສາສໍ ອິຕ຺ຕຣສງ຺ຂາເຕ ອສ຺ສສຕິ, ຣສ຺ສໍ ປສ຺ສາສໍ ອິຕ຺ຕຣສງ຺ຂາເຕ ປສ຺ສສຕິ, ຣສ຺ສໍ ອສ຺ສາສປສ຺ສາສໍ ອິຕ຺ຕຣສງ຺ຂາເຕ ອສ຺ສສຕິປິ ປສ຺ສສຕິປິ. ຣສ຺ສໍ ອສ຺ສາສປສ຺ສາສໍ ອິຕ຺ຕຣສງ຺ຂາເຕ ອສ຺ສສໂຕປິ ປສ຺ສສໂຕປິ ຉນ຺ໂທ ອຸປ຺ປຊ຺ຊຕິ. ຉນ຺ທວເສນ ຕໂຕ ສຸຂຸມຕຣໍ ຣສ຺ສໍ ອສ຺ສາສໍ ອິຕ຺ຕຣສງ຺ຂາເຕ ອສ຺ສສຕິ. ຉນ຺ທວເສນ ຕໂຕ ສຸຂຸມຕຣໍ ຣສ຺ສໍ ປສ຺ສາສໍ ອິຕ຺ຕຣສງ຺ຂາເຕ ປສ຺ສສຕິ. ຉນ຺ທວເສນ ຕໂຕ ສຸຂຸມຕຣໍ ຣສ຺ສໍ ອສ຺ສາສປສ຺ສາສໍ ອິຕ຺ຕຣສງ຺ຂາເຕ ອສ຺ສສຕິປິ ປສ຺ສສຕິປິ. ຉນ຺ທວເສນ ຕໂຕ ສຸຂຸມຕຣໍ ຣສ຺ສໍ ອສ຺ສາສປສ຺ສາສໍ ອິຕ຺ຕຣສງ຺ຂາເຕ ອສ຺ສສໂຕປິ ປສ຺ສສໂຕປິ ປາໂມຊ຺ຊໍ ອຸປ຺ປຊ຺ຊຕິ. ປາໂມຊ຺ຊວເສນ ຕໂຕ ສຸຂຸມຕຣໍ ຣສ຺ສໍ ອສ຺ສາສໍ ອິຕ຺ຕຣສງ຺ຂາເຕ ອສ຺ສສຕິ, ປາໂມຊ຺ຊວເສນ ຕໂຕ ສຸຂຸມຕຣໍ ຣສ຺ສໍ ປສ຺ສາສໍ ອິຕ຺ຕຣສງ຺ຂາເຕ ປສ຺ສສຕິ, ປາໂມຊ຺ຊວເສນ ຕໂຕ ສຸຂຸມຕຣໍ ຣສ຺ສໍ ອສ຺ສາສປສ຺ສາສໍ ອິຕ຺ຕຣສງ຺ຂາເຕ ອສ຺ສສຕິປິ ປສ຺ສສຕິປິ. ປາໂມຊ຺ຊວເສນ ຕໂຕ ສຸຂຸມຕຣໍ ຣສ຺ສໍ ອສ຺ສາສປສ຺ສາສໍ ອິຕ຺ຕຣສງ຺ຂາເຕ ອສ຺ສສໂຕປິ ປສ຺ສສໂຕປິ ຣສ຺ສາ ອສ຺ສາສປສ຺ສາສາ ຈິຕ຺ຕໍ ວິວຕ຺ຕຕິ, ອຸເປກ຺ຂາ ສຓ຺ຐາຕິ. ອິເມຫິ ນວຫາກາເຣຫິ ຣສ຺ສາ ອສ຺ສາສປສ຺ສາສາ ກາໂຍ ອຸປຏ຺ຐານໍ ສຕິ ອນຸປສ຺ສນາ ຎາຓໍ. ກາໂຍ ອຸປຏ຺ຐານໍ, ໂນ ສຕິ; ສຕິ ອຸປຏ຺ຐານຎ຺ເຈວ ສຕິ ຈ. ຕາຍ ສຕິຍາ ເຕນ ຎາເຓນ ຕໍ ກາຍໍ ອນຸປສ຺ສຕິ. ເຕນ ວຸຈ຺ຈຕິ – ‘‘ກາເຍ ກາຍານຸປສ຺ສນາສຕິປຏ຺ຐານຠາວນາ’’ຕິ.
ອນຸປສ຺ສຕີຕິ ກຖໍ ຕໍ ກາຍໍ ອນຸປສ຺ສຕິ…ເປ… ເອວໍ ຕໍ ກາຍໍ ອນຸປສ຺ສຕິ. ຠາວນາຕິ ຈຕສ຺ໂສ ຠາວນາ…ເປ… ອາເສວນຏ຺ເຐນ ຠາວນາ. ຣສ຺ສໍ ອສ຺ສາສປສ຺ສາສວເສນ ຈິຕ຺ຕສ຺ສ ເອກຄ຺ຄຕໍ ອວິກ຺ເຂປໍ ປຊານໂຕ ວິທິຕາ ເວທນາ ອຸປ຺ປຊ຺ຊນ຺ຕິ…ເປ… ຣສ຺ສໍ ອສ຺ສາສປສ຺ສາສວເສນ ຈິຕ຺ຕສ຺ສ ເອກຄ຺ຄຕໍ ອວິກ຺ເຂປໍ ປຊານນ຺ໂຕ ອິນ຺ທ຺ຣິຍານິ ສໂມຘາເນຕິ…ເປ… ເຕນ ວຸຈ຺ຈຕິ – ‘‘ສມຕ຺ຖຎ຺ຈ ປຏິວິຊ຺ຌຕີ’’ຕິ.
໑໗໐. ກຖໍ ‘‘ສພ຺ພກາຍປຏິສໍເວທີ ອສ຺ສສິສ຺ສາມີ’’ຕິ ສິກ຺ຂຕິ, ‘‘ສພ຺ພກາຍປຏິສໍເວທີ ປສ຺ສສິສ຺ສາມີ’’ຕິ ສິກ຺ຂຕິ? ກາໂຍຕິ ທ຺ເວ ກາຍາ – ນາມກາໂຍ ຈ ຣູປກາໂຍ ຈ. ກຕໂມ ນາມກາໂຍ? ເວທນາ, ສຎ຺ຎາ, ເຈຕນາ, ຜສ຺ໂສ, ມນສິກາໂຣ, ນາມຎ຺ຈ ນາມກາໂຍ ຈ, ເຍ ຈ ວຸຈ຺ຈນ຺ຕິ ຈິຕ຺ຕສງ຺ຂາຣາ – ອຍໍ ນາມກາໂຍ. ກຕໂມ ຣູປກາໂຍ? ຈຕ຺ຕາໂຣ ຈ ມຫາຠູຕາ, ຈຕຸນ຺ນຎ຺ຈ ມຫາຠູຕານໍ ອຸປາທາຍຣູປໍ, ອສ຺ສາໂສ ຈ ປສ຺ສາໂສ ຈ, ນິມິຕ຺ຕຎ຺ຈ ອຸປນິພນ຺ຘນາ, ເຍ ຈ ວຸຈ຺ຈນ຺ຕິ ກາຍສງ຺ຂາຣາ – ອຍໍ ຣູປກາໂຍ.
ກຖໍ ເຕ ກາຍາ ປຏິວິທິຕາ ໂຫນ຺ຕິ? ທີຆໍ ອສ຺ສາສວເສນ ຈິຕ຺ຕສ຺ສ ເອກຄ຺ຄຕໍ ອວິກ຺ເຂປໍ ປຊານໂຕ ສຕິ ອຸປຏ຺ຐິຕາ ໂຫຕິ. ຕາຍ ສຕິຍາ ເຕນ ຎາເຓນ ເຕ ກາຍາ ປຏິວິທິຕາ ໂຫນ຺ຕິ. ທີຆໍ ປສ຺ສາສວເສນ ຈິຕ຺ຕສ຺ສ ເອກຄ຺ຄຕໍ ອວິກ຺ເຂປໍ ປຊານໂຕ ສຕິ ອຸປຏ຺ຐິຕາ ໂຫຕິ. ຕາຍ ສຕິຍາ ເຕນ ຎາເຓນ ເຕ ກາຍາ ປຏິວິທິຕາ ໂຫນ຺ຕິ. ຣສ຺ສໍ ອສ຺ສາສວເສນ ຈິຕ຺ຕສ຺ສ ເອກຄ຺ຄຕໍ ອວິກ຺ເຂປໍ ປຊານໂຕ ສຕິ ອຸປຏ຺ຐິຕາ ໂຫຕິ. ຕາຍ ສຕິຍາ ເຕນ ຎາເຓນ ເຕ ກາຍາ ປຏິວິທິຕາ ໂຫນ຺ຕິ. ຣສ຺ສໍ ປສ຺ສາສວເສນ ຈິຕ຺ຕສ຺ສ ເອກຄ຺ຄຕໍ ອວິກ຺ເຂປໍ ປຊານໂຕ ສຕິ ອຸປຏ຺ຐິຕາ ໂຫຕິ. ຕາຍ ສຕິຍາ ເຕນ ຎາເຓນ ເຕ ກາຍາ ປຏິວິທິຕາ ໂຫນ຺ຕິ.
ອາວຊ຺ຊໂຕ ເຕ ກາຍາ ປຏິວິທິຕາ ໂຫນ຺ຕິ, ປຊານໂຕ ເຕ ກາຍາ ປຏິວິທິຕາ ໂຫນ຺ຕິ, ປສ຺ສໂຕ ເຕ ກາຍາ ປຏິວິທິຕາ ໂຫນ຺ຕິ, ປຈ຺ຈເວກ຺ຂໂຕ ເຕ ກາຍາ ປຏິວິທິຕາ ໂຫນ຺ຕິ, ຈິຕ຺ຕໍ ອຘິຏ຺ຐຫໂຕ ເຕ ກາຍາ ປຏິວິທິຕາ ໂຫນ຺ຕິ, ສທ຺ຘາຍ ອຘິມຸຈ຺ຈໂຕ ເຕ ກາຍາ ປຏິວິທິຕາ ໂຫນ຺ຕິ, ວີຣິຍໍ ປຄ຺ຄຓ຺ຫໂຕ ເຕ ກາຍາ ປຏິວິທິຕາ ໂຫນ຺ຕິ, ສຕິໍ ອຸປຏ຺ຐາປຍໂຕ ເຕ ກາຍາ ປຏິວິທິຕາ ໂຫນ຺ຕິ, ຈິຕ຺ຕໍ ສມາທຫໂຕ ເຕ ກາຍາ ປຏິວິທິຕາ ໂຫນ຺ຕິ, ປຎ຺ຎາຍ ປຊານໂຕ ເຕ ກາຍາ ປຏິວິທິຕາ ໂຫນ຺ຕິ, ອຠິຎ຺ເຎຍ຺ຍໍ ອຠິຊານໂຕ ເຕ ກາຍາ ປຏິວິທິຕາ ໂຫນ຺ຕິ, ປຣິຎ຺ເຎຍ຺ຍໍ ປຣິຊານໂຕ ເຕ ກາຍາ ປຏິວິທິຕາ ໂຫນ຺ຕິ, ປຫາຕພ຺ພໍ ປຊຫໂຕ ເຕ ກາຍາ ປຏິວິທິຕາ ໂຫນ຺ຕິ, ຠາເວຕພ຺ພໍ ຠາວຍໂຕ ເຕ ກາຍາ ປຏິວິທິຕາ ໂຫນ຺ຕິ, ສຈ຺ຉິກາຕພ຺ພໍ ສຈ຺ຉິກໂຣໂຕ ເຕ ກາຍາ ປຏິວິທິຕາ ໂຫນ຺ຕິ. ເອວໍ ເຕ ກາຍາ ປຏິວິທິຕາ ໂຫນ຺ຕິ. ສພ຺ພກາຍປຏິສໍເວທີ ອສ຺ສາສປສ຺ສາສາ ກາໂຍ ອຸປຏ຺ຐານໍ ສຕິ ອນຸປສ຺ສນາ ຎາຓໍ. ກາໂຍ ອຸປຏ຺ຐານໍ, ໂນ ສຕິ. ສຕິ ອຸປຏ຺ຐານຎ຺ເຈວ ສຕິ ຈ. ຕາຍ ສຕິຍາ ເຕນ ຎາເຓນ ຕໍ ກາຍໍ ອນຸປສ຺ສຕິ. ເຕນ ວຸຈ຺ຈຕິ – ‘‘ກາເຍ ກາຍານຸປສ຺ສນາສຕິປຏ຺ຐານຠາວນາ’’ຕິ.
ອນຸປສ຺ສຕີຕິ ກຖໍ ຕໍ ກາຍໍ ອນຸປສ຺ສຕິ…ເປ… ເອວໍ ຕໍ ກາຍໍ ອນຸປສ຺ສຕິ. ຠາວນາຕິ ຈຕສ຺ໂສ ຠາວນາ…ເປ… ອາເສວນຏ຺ເຐນ ຠາວນາ.
ສພ຺ພກາຍປຏິສໍເວທີ ອສ຺ສາສປສ຺ສາສານໍ [ອສ຺ສາສປສ຺ສາສາ (ສ຺ຍາ.)] ສໍວຣຏ຺ເຐນ ສີລວິສຸທ຺ຘິ, ອວິກ຺ເຂປຏ຺ເຐນ ຈິຕ຺ຕວິສຸທ຺ຘິ, ທສ຺ສນຏ຺ເຐນ ທິຏ຺ຐິວິສຸທ຺ຘິ. ໂຍ ຕຕ຺ຖ ສໍວຣຏ຺ໂຐ, ອຍໍ ອຘິສີລສິກ຺ຂາ. ໂຍ ຕຕ຺ຖ ອວິກ຺ເຂປຏ຺ໂຐ, ອຍໍ ອຘິຈິຕ຺ຕສິກ຺ຂາ. ໂຍ ຕຕ຺ຖ ທສ຺ສນຏ຺ໂຐ, ອຍໍ ອຘິປຎ຺ຎາສິກ຺ຂາ. ອິມາ ຕິສ຺ໂສ ສິກ຺ຂາໂຍ ອາວຊ຺ຊນ຺ໂຕ ສິກ຺ຂຕິ, ຊານນ຺ໂຕ ສິກ຺ຂຕິ, ປສ຺ສນ຺ໂຕ ສິກ຺ຂຕິ, ປຈ຺ຈເວກ຺ຂນ຺ໂຕ ສິກ຺ຂຕິ, ຈິຕ຺ຕໍ ອຘິຏ຺ຐຫນ຺ໂຕ ສິກ຺ຂຕິ, ສທ຺ຘາຍ ອຘິມຸຈ຺ຈນ຺ໂຕ ສິກ຺ຂຕິ, ວີຣິຍໍ ປຄ຺ຄຓ຺ຫນ຺ໂຕ ສິກ຺ຂຕິ, ສຕິໍ ອຸປຏ຺ຐເປນ຺ໂຕ ສິກ຺ຂຕິ, ຈິຕ຺ຕໍ ສມາທຫນ຺ໂຕ ສິກ຺ຂຕິ, ປຎ຺ຎາຍ ປຊານນ຺ໂຕ ສິກ຺ຂຕິ, ອຠິຎ຺ເຎຍ຺ຍໍ ອຠິຊານນ຺ໂຕ ສິກ຺ຂຕິ, ປຣິຎ຺ເຎຍ຺ຍໍ ປຣິຊານນ຺ໂຕ ສິກ຺ຂຕິ, ປຫາຕພ຺ພໍ ປຊຫນ຺ໂຕ ສິກ຺ຂຕິ, ຠາເວຕພ຺ພໍ ຠາເວນ຺ໂຕ ສິກ຺ຂຕິ, ສຈ຺ຉິກາຕພ຺ພໍ ສຈ຺ຉິກໂຣນ຺ໂຕ ສິກ຺ຂຕິ.
ສພ຺ພກາຍປຏິສໍເວທີ ອສ຺ສາສປສ຺ສາສວເສນ ຈິຕ຺ຕສ຺ສ ເອກຄ຺ຄຕໍ ອວິກ຺ເຂປໍ ປຊານໂຕ ວິທິຕາ ເວທນາ ອຸປ຺ປຊ຺ຊນ຺ຕິ…ເປ… ສພ຺ພກາຍປຏິສໍເວທີ ອສ຺ສາສປສ຺ສາສວເສນ ຈິຕ຺ຕສ຺ສ ເອກຄ຺ຄຕໍ ອວິກ຺ເຂປໍ ປຊານນ຺ໂຕ ອິນ຺ທ຺ຣິຍານິ ສໂມຘາເນຕິ…ເປ… ເຕນ ວຸຈ຺ຈຕິ – ‘‘ສມຕ຺ຖຎ຺ຈ ປຏິວິຊ຺ຌຕີ’’ຕິ.
໑໗໑. ກຖໍ ‘‘ປສ຺ສມ຺ຠຍໍ ກາຍສງ຺ຂາຣໍ ອສ຺ສສິສ຺ສາມີ’’ຕິ ສິກ຺ຂຕິ, ‘‘ປສ຺ສມ຺ຠຍໍ ກາຍສງ຺ຂາຣໍ ປສ຺ສສິສ຺ສາມີ’’ຕິ ສິກ຺ຂຕິ? ກຕໂມ ກາຍສງ຺ຂາໂຣ? ທີຆໍ ອສ຺ສາສາ ກາຍິກາ. ເອເຕ ຘມ຺ມາ ກາຍປຏິພທ຺ຘາ ກາຍສງ຺ຂາຣາ. ເຕ ກາຍສງ຺ຂາເຣ ປສ຺ສມ຺ເຠນ຺ໂຕ ນິໂຣເຘນ຺ໂຕ ວູປສເມນ຺ໂຕ ສິກ຺ຂຕິ. ທີຆໍ ປສ຺ສາສາ ກາຍິກາ. ເອເຕ ຘມ຺ມາ ກາຍປຏິພທ຺ຘາ ກາຍສງ຺ຂາຣາ. ເຕ ກາຍສງ຺ຂາເຣ ປສ຺ສມ຺ເຠນ຺ໂຕ ນິໂຣເຘນ຺ໂຕ ວູປສເມນ຺ໂຕ ສິກ຺ຂຕິ. ຣສ຺ສໍ ອສ຺ສາສາ ຣສ຺ສໍ ປສ຺ສາສາ. ສພ຺ພກາຍປຏິສໍເວທີ ອສ຺ສາສາ ສພ຺ພກາຍປຏິສໍເວທີ ປສ຺ສາສາ ກາຍິກາ. ເອເຕ ຘມ຺ມາ ກາຍປຏິພທ຺ຘາ ກາຍສງ຺ຂາຣາ. ເຕ ກາຍສງ຺ຂາເຣ ປສ຺ສມ຺ເຠນ຺ໂຕ ນິໂຣເຘນ຺ໂຕ ວູປສເມນ຺ໂຕ ສິກ຺ຂຕິ.
ຍຖາຣູເປຫິ ກາຍສງ຺ຂາເຣຫິ ຍາ ກາຍສ຺ສ ອານມນາ ວິນມນາ ສນ຺ນມນາ ປຓມນາ ອິຎ຺ຊນາ ຜນ຺ທນາ ຈລນາ ປກມ຺ປນາ – ປສ຺ສມ຺ຠຍໍ ກາຍສງ຺ຂາຣໍ ອສ຺ສສິສ຺ສາມີຕິ ສິກ຺ຂຕິ, ປສ຺ສມ຺ຠຍໍ ກາຍສງ຺ຂາຣໍ ປສ຺ສສິສ຺ສາມີຕິ ສິກ຺ຂຕິ. ຍຖາຣູເປຫິ ກາຍສງ຺ຂາເຣຫິ ຍາ ກາຍສ຺ສ ນ ອານມນາ ນ ວິນມນາ ນ ສນ຺ນມນາ ນ ປຓມນາ ອນິຎ຺ຊນາ ອຜນ຺ທນາ ອຈລນາ ອກມ຺ປນາ ສນ຺ຕໍ ສຸຂຸມໍ ປສ຺ສມ຺ຠຍໍ ກາຍສງ຺ຂາຣໍ ອສ຺ສສິສ຺ສາມີຕິ ສິກ຺ຂຕິ, ປສ຺ສມ຺ຠຍໍ ກາຍສງ຺ຂາຣໍ ປສ຺ສສິສ຺ສາມີຕິ ສິກ຺ຂຕິ.
ອິຕິ ກິຣ ‘‘ປສ຺ສມ຺ຠຍໍ ກາຍສງ຺ຂາຣໍ ອສ຺ສສິສ຺ສາມີ’’ຕິ ສິກ຺ຂຕິ, ‘‘ປສ຺ສມ຺ຠຍໍ ກາຍສງ຺ຂາຣໍ ປສ຺ສສິສ຺ສາມີ’’ຕິ ສິກ຺ຂຕິ. ເອວໍ ສນ຺ເຕ ວາຕູປລທ຺ຘິຍາ ຈ ປຠາວນາ ນ ໂຫຕິ, ອສ຺ສາສປສ຺ສາສານຎ຺ຈ ປຠາວນາ ນ ໂຫຕິ, ອານາປານສ຺ສຕິຍາ ຈ ປຠາວນາ ນ ໂຫຕິ, ອານາປານສ຺ສຕິສມາຘິສ຺ສ ຈ ປຠາວນາ ນ ໂຫຕິ; ນ ຈ ນໍ ຕໍ ສມາປຕ຺ຕິໍ ປຓ຺ຑິຕາ ສມາປຊ຺ຊນ຺ຕິປິ ວຸຏ຺ຐຫນ຺ຕິປິ.
ອິຕິ ກິຣ ‘‘ປສ຺ສມ຺ຠຍໍ ກາຍສງ຺ຂາຣໍ ອສ຺ສສິສ຺ສາມີ’’ຕິ ສິກ຺ຂຕິ, ‘‘ປສ຺ສມ຺ຠຍໍ ກາຍສງ຺ຂາຣໍ ປສ຺ສສິສ຺ສາມີ’’ຕິ ສິກ຺ຂຕິ. ເອວໍ ສນ຺ເຕ ວາຕູປລທ຺ຘິຍາ ຈ ປຠາວນາ ໂຫຕິ, ອສ຺ສາສປສ຺ສາສານຎ຺ຈ ປຠາວນາ ໂຫຕິ, ອານາປານສ຺ສຕິຍາ ຈ ປຠາວນາ ໂຫຕິ. ອານາປານສ຺ສຕິສມາຘິສ຺ສ ຈ ປຠາວນາ ໂຫຕິ; ຕຎ຺ຈ ນໍ ສມາປຕ຺ຕິໍ ປຓ຺ຑິຕາ ສມາປຊ຺ຊນ຺ຕິປິ ວຸຏ຺ຐຫນ຺ຕິປິ. ຍຖາ ກຖໍ ວິຍ? ເສຍ຺ຍຖາປິ ກໍເສ ອາໂກຏິເຕ ປຐມໍ ໂອຬາຣິກາ ສທ຺ທາ ປວຕ຺ຕນ຺ຕິ. ໂອຬາຣິການໍ ສທ຺ທານໍ ນິມິຕ຺ຕໍ ສຸຄ຺ຄຫິຕຕ຺ຕາ ສຸມນສິກຕຕ຺ຕາ ສູປຘາຣິຕຕ຺ຕາ ນິຣຸທ຺ເຘປິ ໂອຬາຣິເກ ສທ຺ເທ, ອຖ ປຈ຺ຉາ ສຸຂຸມກາ ສທ຺ທາ ປວຕ຺ຕນ຺ຕິ. ສຸຂຸມການໍ ສທ຺ທານໍ ນິມິຕ຺ຕໍ ສຸຄ຺ຄຫິຕຕ຺ຕາ ສຸມນສິກຕຕ຺ຕາ ສູປຘາຣິຕຕ຺ຕາ ນິຣຸທ຺ເຘປິ ສຸຂຸມເກ ສທ຺ເທ, ອຖ ປຈ຺ຉາ ສຸຂຸມສທ຺ທນິມິຕ຺ຕາຣມ຺ມຓຕາປິ ຈິຕ຺ຕໍ ປວຕ຺ຕຕິ. ເອວເມວໍ ປຐມໍ ໂອຬາຣິກາ ອສ຺ສາສປສ຺ສາສາ ປວຕ຺ຕນ຺ຕິ; ໂອຬາຣິການໍ ອສ຺ສາສປສ຺ສາສານໍ ນິມິຕ຺ຕໍ ສຸຄ຺ຄຫິຕຕ຺ຕາ ສຸມນສິກຕຕ຺ຕາ ສູປຘາຣິຕຕ຺ຕາ ນິຣຸທ຺ເຘປິ ໂອຬາຣິເກ ອສ຺ສາສປສ຺ສາເສ, ອຖ ປຈ຺ຉາ ສຸຂຸມກາ ອສ຺ສາສປສ຺ສາສາ ປວຕ຺ຕນ຺ຕິ. ສຸຂຸມການໍ ອສ຺ສາສປສ຺ສາສານໍ ນິມິຕ຺ຕໍ ສຸຄ຺ຄຫິຕຕ຺ຕາ ສຸມນສິກຕຕ຺ຕາ ສູປຘາຣິຕຕ຺ຕາ ນິຣຸທ຺ເຘປິ ສຸຂຸມເກ ອສ຺ສາສປສ຺ສາເສ, ອຖ ປຈ຺ຉາ ສຸຂຸມກອສ຺ສາສປສ຺ສາສານໍ ນິມິຕ຺ຕາຣມ຺ມຓຕາປິ ຈິຕ຺ຕໍ ນ ວິກ຺ເຂປໍ ຄຈ຺ຉຕິ.
ເອວໍ ສນ຺ເຕ ວາຕູປລທ຺ຘິຍາ ຈ ປຠາວນາ ໂຫຕິ, ອສ຺ສາສປສ຺ສາສານຎ຺ຈ ປຠາວນາ ໂຫຕິ, ອານາປານສ຺ສຕິຍາ ຈ ປຠາວນາ ໂຫຕິ, ອານາປານສ຺ສຕິສມາຘິສ຺ສ ຈ ປຠາວນາ ໂຫຕິ; ຕຎ຺ຈ ນໍ ສມາປຕ຺ຕິໍ ປຓ຺ຑິຕາ ສມາປຊ຺ຊນ຺ຕິປິ ວຸຏ຺ຐຫນ຺ຕິປິ. ປສ຺ສມ຺ຠຍໍ ກາຍສງ຺ຂາຣໍ ອສ຺ສາສປສ຺ສາສາ ກາໂຍ ອຸປຏ຺ຐານໍ ສຕິ ອນຸປສ຺ສນາ ຎາຓໍ. ກາໂຍ ອຸປຏ຺ຐານໍ, ໂນ ສຕິ; ສຕິ ອຸປຏ຺ຐານຎ຺ເຈວ ສຕິ ຈ. ຕາຍ ສຕິຍາ ເຕນ ຎາເຓນ ຕໍ ກາຍໍ ອນຸປສ຺ສຕິ. ເຕນ ວຸຈ຺ຈຕິ – ‘‘ກາເຍ ກາຍານຸປສ຺ສນາສຕິປຏ຺ຐານຠາວນາ’’ຕິ.
ອນຸປສ຺ສຕີຕິ ກຖໍ ຕໍ ກາຍໍ ອນຸປສ຺ສຕິ…ເປ… ເອວໍ ຕໍ ກາຍໍ ອນຸປສ຺ສຕິ. ຠາວນາຕິ ຈຕສ຺ໂສ ຠາວນາ…ເປ… ອາເສວນຏ຺ເຐນ ຠາວນາ. ປສ຺ສມ຺ຠຍໍ ກາຍສງ຺ຂາຣໍ, ອສ຺ສາສປສ຺ສາສານໍ ສໍວຣຏ຺ເຐນ ສີລວິສຸທ຺ຘິ, ອວິກ຺ເຂປຏ຺ເຐນ ຈິຕ຺ຕວິສຸທ຺ຘິ, ທສ຺ສນຏ຺ເຐນ ທິຏ຺ຐິວິສຸທ຺ຘິ. ໂຍ ຕຕ຺ຖ ສໍວຣຏ຺ໂຐ, ອຍໍ ອຘິສີລສິກ຺ຂາ; ໂຍ ຕຕ຺ຖ ອວິກ຺ເຂປຏ຺ໂຐ, ອຍໍ ອຘິຈິຕ຺ຕສິກ຺ຂາ; ໂຍ ຕຕ຺ຖ ທສ຺ສນຏ຺ໂຐ ອຍໍ ອຘິປຎ຺ຎາສິກ຺ຂາ. ອິມາ ຕິສ຺ໂສ ສິກ຺ຂາໂຍ ອາວຊ຺ຊນ຺ໂຕ ສິກ຺ຂຕິ…ເປ… ສຈ຺ຉິກາຕພ຺ພໍ ສຈ຺ຉິກໂຣນ຺ໂຕ ສິກ຺ຂຕິ, ປສ຺ສມ຺ຠຍໍ ກາຍສງ຺ຂາຣໍ ອສ຺ສາສປສ຺ສາສວເສນ ຈິຕ຺ຕສ຺ສ ເອກຄ຺ຄຕໍ ອວິກ຺ເຂປໍ ປຊານໂຕ ວິທິຕາ ເວທນາ ອຸປ຺ປຊ຺ຊນ຺ຕິ…ເປ… ປສ຺ສມ຺ຠຍໍ ກາຍສງ຺ຂາຣໍ ອສ຺ສາສປສ຺ສາສວເສນ ຈິຕ຺ຕສ຺ສ ເອກຄ຺ຄຕໍ ອວິກ຺ເຂປໍ ປຊານນ຺ໂຕ ອິນ຺ທ຺ຣິຍານິ ສໂມຘາເນຕິ…ເປ… ເຕນ ວຸຈ຺ຈຕິ – ‘‘ສມຕ຺ຖຎ຺ຈ ປຏິວິຊ຺ຌຕີ’’ຕິ.
ອຏ຺ຐ ອນຸປສ຺ສນາຎາຓານິ, ອຏ຺ຐ ຈ ອຸປຏ຺ຐານານຸສ຺ສຕິໂຍ, ຈຕ຺ຕາຣິ ສຸຕ຺ຕນ຺ຕິກວຕ຺ຖູນິ ກາເຍ ກາຍານຸປສ຺ສນາຍ.
ຠາຓວາໂຣ.
ທຸຕິຍຈຕຸກ຺ກນິທ຺ເທໂສ
໑໗໒. ກຖໍ ‘‘ປີຕິປຏິສໍເວທີ ອສ຺ສສິສ຺ສາມີ’’ຕິ ສິກ຺ຂຕິ ‘‘ປີຕິປຏິສໍເວທີ ປສ຺ສສິສ຺ສາມີ’’ຕິ ສິກ຺ຂຕິ? ກຕມາ ປີຕິ? ທີຆໍ ອສ຺ສາສວເສນ ຈິຕ຺ຕສ຺ສ ເອກຄ຺ຄຕໍ ອວິກ຺ເຂປໍ ປຊານໂຕ ອຸປ຺ປຊ຺ຊຕິ ປີຕິ ປາໂມຊ຺ຊໍ. ຍາ ປີຕິ ປາໂມຊ຺ຊໍ ອາໂມທນາ ປໂມທນາ ຫາໂສ ປຫາໂສ ວິຕ຺ຕິ ໂອທຄ຺ຍໍ ອຕ຺ຕມນຕາ. ຈິຕ຺ຕສ຺ສ ທີຆໍ ປສ຺ສາສວເສນ ຈິຕ຺ຕສ຺ສ ເອກຄ຺ຄຕໍ ອວິກ຺ເຂປໍ ປຊານໂຕ ອຸປ຺ປຊ຺ຊຕິ ປີຕິ ປາໂມຊ຺ຊໍ…ເປ… ຣສ຺ສໍ ອສ຺ສາສວເສນ, ຣສ຺ສໍ ປສ຺ສາສວເສນ, ສພ຺ພກາຍປຏິສໍເວທີ ອສ຺ສາສວເສນ, ສພ຺ພກາຍປຏິສໍເວທີ ປສ຺ສາສວເສນ, ປສ຺ສມ຺ຠຍໍ ກາຍສງ຺ຂາຣໍ ອສ຺ສາສວເສນ, ປສ຺ສມ຺ຠຍໍ ກາຍສງ຺ຂາຣໍ ປສ຺ສາສວເສນ ຈິຕ຺ຕສ຺ສ ເອກຄ຺ຄຕໍ ອວິກ຺ເຂປໍ ປຊານໂຕ ອຸປ຺ປຊ຺ຊຕິ ປີຕິ ປາໂມຊ຺ຊໍ. ຍາ ປີຕິ ປາໂມຊ຺ຊໍ ອາໂມທນາ ປໂມທນາ ຫາໂສ ປຫາໂສ ວິຕ຺ຕິ ໂອທຄ຺ຍໍ ອຕ຺ຕມນຕາ ຈິຕ຺ຕສ຺ສ – ອຍໍ ປີຕິ.
ກຖໍ ສາ ປີຕິ ປຏິວິທິຕາ ໂຫຕິ? ທີຆໍ ອສ຺ສາສປສ຺ສາສວເສນ ຈິຕ຺ຕສ຺ສ ເອກຄ຺ຄຕໍ ອວິກ຺ເຂປໍ ປຊານໂຕ ສຕິ ອຸປຏ຺ຐິຕາ ໂຫຕິ. ຕາຍ ສຕິຍາ ເຕນ ຎາເຓນ ສາ ປີຕິ ປຏິວິທິຕາ ໂຫຕິ. ທີຆໍ ປສ຺ສາສວເສນ ຈິຕ຺ຕສ຺ສ ເອກຄ຺ຄຕໍ ອວິກ຺ເຂປໍ ປຊານໂຕ ສຕິ ອຸປຏ຺ຐິຕາ ໂຫຕິ. ຕາຍ ສຕິຍາ ເຕນ ຎາເຓນ ສາ ປີຕິ ປຏິວິທິຕາ ໂຫຕິ. ຣສ຺ສໍ ອສ຺ສາສວເສນ…ເປ… ຣສ຺ສໍ ປສ຺ສາສວເສນ… ສພ຺ພກາຍປຏິສໍເວທີ ອສ຺ສາສວເສນ… ສພ຺ພກາຍປຏິສໍເວທີ ປສ຺ສາສວເສນ… ປສ຺ສມ຺ຠຍໍ ກາຍສງ຺ຂາຣໍ ອສ຺ສາສວເສນ… ປສ຺ສມ຺ຠຍໍ ກາຍສງ຺ຂາຣໍ ປສ຺ສາສວເສນ ຈິຕ຺ຕສ຺ສ ເອກຄ຺ຄຕໍ ອວິກ຺ເຂປໍ ປຊານໂຕ ສຕິ ອຸປຏ຺ຐິຕາ ໂຫຕິ. ຕາຍ ສຕິຍາ ເຕນ ຎາເຓນ ສາ ປີຕິ ປຏິວິທິຕາ ໂຫຕິ. ອາວຊ຺ຊໂຕ ສາ ປີຕິ ປຏິວິທິຕາ ໂຫຕິ, ຊານໂຕ…ເປ… ປສ຺ສໂຕ… ປຈ຺ຈເວກ຺ຂໂຕ… ຈິຕ຺ຕໍ ອຘິຏ຺ຐຫໂຕ… ສທ຺ຘາຍ ອຘິມຸຈ຺ຈໂຕ… ວີຣິຍໍ ປຄ຺ຄຓ຺ຫໂຕ… ສຕິໍ ອຸປຏ຺ຐາປຍໂຕ… ຈິຕ຺ຕໍ ສມາທຫໂຕ… ປຎ຺ຎາຍ ປຊານໂຕ… ອຠິຎ຺ເຎຍ຺ຍໍ ອຠິຊານໂຕ… ປຣິຎ຺ເຎຍ຺ຍໍ ປຣິຊານໂຕ… ປຫາຕພ຺ພໍ ປຊຫໂຕ… ຠາເວຕພ຺ພໍ ຠາວຍໂຕ… ສຈ຺ຉິກາຕພ຺ພໍ ສຈ຺ຉິກໂຣໂຕ ສາ ປີຕິ ປຏິວິທິຕາ ໂຫຕິ. ເອວໍ ສາ ປີຕິ ປຏິວິທິຕາ ໂຫຕິ.
ປີຕິປຏິສໍເວທີ ອສ຺ສາສປສ຺ສາສວເສນ ເວທນາ ອຸປຏ຺ຐານໍ ສຕິ ອນຸປສ຺ສນາ ຎາຓໍ. ເວທນາ ອຸປຏ຺ຐານໍ, ໂນ ສຕິ; ສຕິ ອຸປຏ຺ຐານຎ຺ເຈວ ສຕິ ຈ. ຕາຍ ສຕິຍາ ເຕນ ຎາເຓນ ຕໍ ເວທນໍ ອນຸປສ຺ສຕິ. ເຕນ ວຸຈ຺ຈຕິ – ‘‘ເວທນາສຸ ເວທນານຸປສ຺ສນາສຕິປຏ຺ຐານຠາວນາ’’ຕິ.
ອນຸປສ຺ສຕີຕິ ກຖໍ ຕໍ ເວທນໍ ອນຸປສ຺ສຕິ? ອນິຈ຺ຈໂຕ ອນຸປສ຺ສຕິ…ເປ… ເອວໍ ຕໍ ເວທນໍ ອນຸປສ຺ສຕິ. ຠາວນາຕິ ຈຕສ຺ໂສ ຠາວນາ…ເປ… ອາເສວນຏ຺ເຐນ ຠາວນາ. ປີຕິປຏິສໍເວທີ ອສ຺ສາສປສ຺ສາສານໍ ສໍວຣຏ຺ເຐນ ສີລວິສຸທ຺ຘິ…ເປ… ປີຕິປຏິສໍເວທີ ອສ຺ສາສປສ຺ສາສວເສນ ຈິຕ຺ຕສ຺ສ ເອກຄ຺ຄຕໍ ອວິກ຺ເຂປໍ ປຊານໂຕ…ເປ… ປຊານນ຺ໂຕ ອິນ຺ທ຺ຣິຍານິ ສໂມຘາເນຕິ. ເຕນ ວຸຈ຺ຈຕິ – ‘‘ສມຕ຺ຖຎ຺ຈ ປຏິວິຊ຺ຌຕີ’’ຕິ.
໑໗໓. ກຖໍ ‘‘ສຸຂປຏິສໍເວທີ ອສ຺ສສິສ຺ສາມີ’’ຕິ ສິກ຺ຂຕິ, ‘‘ສຸຂປຏິສໍເວທີ ປສ຺ສສິສ຺ສາມີ’’ຕິ ສິກ຺ຂຕິ? ສຸຂນ຺ຕິ ທ຺ເວ ສຸຂານິ – ກາຍິກຎ຺ຈ ສຸຂໍ, ເຈຕສິກຎ຺ຈ ສຸຂໍ. ກຕມໍ ກາຍິກໍ ສຸຂໍ? ຍໍ ກາຍິກໍ ສາຕໍ ກາຍິກໍ ສຸຂໍ, ກາຍສມ຺ຜສ຺ສຊໍ ສາຕໍ ສຸຂໍ ເວທຍິຕໍ, ກາຍສມ຺ຜສ຺ສຊາ ສາຕາ ສຸຂາ ເວທນາ – ອິທໍ ກາຍິກໍ ສຸຂໍ. ກຕມໍ ເຈຕສິກໍ ສຸຂໍ? ຍໍ ເຈຕສິກໍ ສາຕໍ ເຈຕສິກໍ ສຸຂໍ, ເຈໂຕສມ຺ຜສ຺ສຊໍ ສາຕໍ ສຸຂໍ ເວທຍິຕໍ, ເຈໂຕສມ຺ຜສ຺ສຊາ ສາຕາ ສຸຂາ ເວທນາ – ອິທໍ ເຈຕສິກໍ ສຸຂໍ.
ກຖໍ ເຕ ສຸຂາ ປຏິວິທິຕາ ໂຫນ຺ຕິ? ທີຆໍ ອສ຺ສາສວເສນ ຈິຕ຺ຕສ຺ສ ເອກຄ຺ຄຕໍ ອວິກ຺ເຂປໍ ປຊານໂຕ ສຕິ ອຸປຏ຺ຐິຕາ ໂຫຕິ. ຕາຍ ສຕິຍາ ເຕນ ຎາເຓນ ເຕ ສຸຂາ ປຏິວິທິຕາ ໂຫນ຺ຕິ. ທີຆໍ ປສ຺ສາສວເສນ ຈິຕ຺ຕສ຺ສ ເອກຄ຺ຄຕໍ ອວິກ຺ເຂປໍ ປຊານໂຕ ສຕິ ອຸປຏ຺ຐິຕາ ໂຫຕິ. ຕາຍ ສຕິຍາ ເຕນ ຎາເຓນ ເຕ ສຸຂາ ປຏິວິທິຕາ ໂຫນ຺ຕິ…ເປ… ສຈ຺ຉິກາຕພ຺ພໍ ສຈ຺ຉິກໂຣໂຕ ເຕ ສຸຂາ ປຏິວິທິຕາ ໂຫນ຺ຕິ. ເອວໍ ເຕ ສຸຂາ ປຏິວິທິຕາ ໂຫນ຺ຕິ. ສຸຂປຏິສໍເວທີ ອສ຺ສາສປສ຺ສາສວເສນ ເວທນາ ອຸປຏ຺ຐານໍ ສຕິ ອນຸປສ຺ສນາ ຎາຓໍ. ເວທນາ ອຸປຏ຺ຐານໍ, ໂນ ສຕິ; ສຕິ ອຸປຏ຺ຐານຎ຺ເຈວ ສຕິ ຈ. ຕາຍ ສຕິຍາ ເຕນ ຎາເຓນ ຕໍ ເວທນໍ ອນຸປສ຺ສຕິ. ເຕນ ວຸຈ຺ຈຕິ – ‘‘ເວທນາສຸ ເວທນານຸປສ຺ສນາສຕິປຏ຺ຐານຠາວນາ’’ຕິ.
ອນຸປສ຺ສຕີຕິ ກຖໍ ຕໍ ເວທນໍ ອນຸປສ຺ສຕິ. ອນິຈ຺ຈໂຕ ອນຸປສ຺ສຕິ…ເປ… ເອວໍ ຕໍ ເວທນໍ ອນຸປສ຺ສຕິ. ຠາວນາຕິ ຈຕສ຺ໂສ ຠາວນາ…ເປ… ອາເສວນຏ຺ເຐນ ຠາວນາ. ສຸຂປຏິສໍເວທີ ອສ຺ສາສປສ຺ສາສານໍ ສໍວຣຏ຺ເຐນ ສີລວິສຸທ຺ຘິ…ເປ… ສຸຂປຏິສໍເວທີ ອສ຺ສາສປສ຺ສາສວເສນ ຈິຕ຺ຕສ຺ສ ເອກຄ຺ຄຕໍ ອວິກ຺ເຂປໍ ປຊານໂຕ…ເປ… ປຊານນ຺ໂຕ ອິນ຺ທ຺ຣິຍານິ ສໂມຘາເນຕິ. ເຕນ ວຸຈ຺ຈຕິ – ‘‘ສມຕ຺ຖຎ຺ຈ ປຏິວິຊ຺ຌຕີ’’ຕິ.
໑໗໔. ກຖໍ ‘‘ຈິຕ຺ຕສງ຺ຂາຣປຏິສໍເວທີ ອສ຺ສສິສ຺ສາມີ’’ຕິ ສິກ຺ຂຕິ, ‘‘ຈິຕ຺ຕສງ຺ຂາຣປຏິສໍເວທີ ປສ຺ສສິສ຺ສາມີ’’ຕິ ສິກ຺ຂຕິ? ກຕໂມ ຈິຕ຺ຕສງ຺ຂາໂຣ? ທີຆໍ ອສ຺ສາສວເສນ ສຎ຺ຎາ ຈ ເວທນາ ຈ ເຈຕສິກາ – ເອເຕ ຘມ຺ມາ ຈິຕ຺ຕປຏິພທ຺ຘາ ຈິຕ຺ຕສງ຺ຂາຣາ. ທີຆໍ ປສ຺ສາສວເສນ ສຎ຺ຎາ ຈ ເວທນາ ຈ ເຈຕສິກາ – ເອເຕ ຘມ຺ມາ ຈິຕ຺ຕປຏິພທ຺ຘາ ຈິຕ຺ຕສງ຺ຂາຣາ…ເປ… ສຸຂປຏິສໍເວທີ ອສ຺ສາສວເສນ… ສຸຂປຏິສໍເວທີ ປສ຺ສາສວເສນ ສຎ຺ຎາ ຈ ເວທນາ ຈ ເຈຕສິກາ – ເອເຕ ຘມ຺ມາ ຈິຕ຺ຕປຏິພທ຺ຘາ ຈິຕ຺ຕສງ຺ຂາຣາ – ອຍໍ ຈິຕ຺ຕສງ຺ຂາໂຣ.
ກຖໍ ເຕ ຈິຕ຺ຕສງ຺ຂາຣາ ປຏິວິທິຕາ ໂຫນ຺ຕິ? ທີຆໍ ອສ຺ສາສວເສນ ຈິຕ຺ຕສ຺ສ ເອກຄ຺ຄຕໍ ອວິກ຺ເຂປໍ ປຊານໂຕ ສຕິ ອຸປຏ຺ຐິຕາ ໂຫຕິ. ຕາຍ ສຕິຍາ ເຕນ ຎາເຓນ ເຕ ຈິຕ຺ຕສງ຺ຂາຣາ ປຏິວິທິຕາ ໂຫນ຺ຕິ. ທີຆໍ ປສ຺ສາສວເສນ ຈິຕ຺ຕສ຺ສ ເອກຄ຺ຄຕໍ ອວິກ຺ເຂປໍ ປຊານໂຕ ສຕິ ອຸປຏ຺ຐິຕາ ໂຫຕິ. ຕາຍ ສຕິຍາ ເຕນ ຎາເຓນ ເຕ ຈິຕ຺ຕສງ຺ຂາຣາ ປຏິວິທິຕາ ໂຫນ຺ຕິ…ເປ… ສຈ຺ຉິກາຕພ຺ພໍ ສຈ຺ຉິກໂຣໂຕ ເຕ ຈິຕ຺ຕສງ຺ຂາຣາ ປຏິວິທິຕາ ໂຫນ຺ຕິ. ເອວໍ ເຕ ຈິຕ຺ຕສງ຺ຂາຣາ ປຏິວິທິຕາ ໂຫນ຺ຕິ. ຈິຕ຺ຕສງ຺ຂາຣປຏິສໍເວທີ ອສ຺ສາສປສ຺ສາສວເສນ ເວທນາ ອຸປຏ຺ຐານໍ ສຕິ ອນຸປສ຺ສນາ ຎາຓໍ ເວທນາ ອຸປຏ຺ຐານໍ, ໂນ ສຕິ; ສຕິ ອຸປຏ຺ຐານຎ຺ເຈວ ສຕິ ຈ. ຕາຍ ສຕິຍາ ເຕ ຎາເຓນ ຕໍ ເວທນໍ ອນຸປສ຺ສຕິ. ເຕນ ວຸຈ຺ຈຕິ – ‘‘ເວທນາສຸ ເວທນານຸປສ຺ສນາສຕິປຏ຺ຐານຠາວນາ’’ຕິ.
ອນຸປສ຺ສຕີຕິ ກຖໍ ຕໍ ເວທນໍ ອນຸປສ຺ສຕິ? ອນິຈ຺ຈໂຕ ອນຸປສ຺ສຕິ…ເປ… ເອວໍ ຕໍ ເວທນໍ ອນຸປສ຺ສຕິ. ຠາວນາຕິ ຈຕສ຺ໂສ ຠາວນາ…ເປ… ອາເສວນຏ຺ເຐນ ຠາວນາ. ຈິຕ຺ຕສງ຺ຂາຣປຏິສໍເວທີ ອສ຺ສາສປສ຺ສາສານໍ ສໍວຣຏ຺ເຐນ ສີລວິສຸທ຺ຘິ…ເປ… ຈິຕ຺ຕສງ຺ຂາຣປຏິສໍເວທີ ອສ຺ສາສປສ຺ສາສວເສນ ຈິຕ຺ຕສ຺ສ ເອກຄ຺ຄຕໍ ອວິກ຺ເຂປໍ ປຊານໂຕ…ເປ… ປຊານນ຺ໂຕ ອິນ຺ທ຺ຣິຍານິ ສໂມຘາເນຕິ. ເຕນ ວຸຈ຺ຈຕິ – ‘‘ສມຕ຺ຖຎ຺ຈ ປຏິວິຊ຺ຌຕີ’’ຕິ.
໑໗໕. ກຖໍ ‘‘ປສ຺ສມ຺ຠຍໍ ຈິຕ຺ຕສງ຺ຂາຣໍ ອສ຺ສສິສ຺ສາມີ’’ຕິ ສິກ຺ຂຕິ, ‘‘ປສ຺ສມ຺ຠຍໍ ຈິຕ຺ຕສງ຺ຂາຣໍ ປສ຺ສສິສ຺ສາມີ’’ຕິ ສິກ຺ຂຕິ? ກຕໂມ ຈິຕ຺ຕສງ຺ຂາໂຣ? ທີຆໍ ອສ຺ສາສວເສນ ສຎ຺ຎາ ຈ ເວທນາ ຈ ເຈຕສິກາ – ເອເຕ ຘມ຺ມາ ຈິຕ຺ຕປຏິພທ຺ຘາ ຈິຕ຺ຕສງ຺ຂາຣາ. ເຕ ຈິຕ຺ຕສງ຺ຂາເຣ ປສ຺ສມ຺ເຠນ຺ໂຕ ນິໂຣເຘນ຺ໂຕ ວູປສເມນ຺ໂຕ ສິກ຺ຂຕິ. ທີຆໍ ປສ຺ສາສວເສນ ສຎ຺ຎາ ຈ ເວທນາ ຈ ເຈຕສິກາ – ເອເຕ ຘມ຺ມາ ຈິຕ຺ຕປຏິພທ຺ຘາ ຈິຕ຺ຕສງ຺ຂາຣາ. ເຕ ຈິຕ຺ຕສງ຺ຂາເຣ ປສ຺ສມ຺ເຠນ຺ໂຕ ນິໂຣເຘນ຺ໂຕ ວູປສເມນ຺ໂຕ ສິກ຺ຂຕິ. ຈິຕ຺ຕສງ຺ຂາຣປຏິສໍເວທີ ອສ຺ສາສວເສນ… ຈິຕ຺ຕສງ຺ຂາຣປຏິສໍເວທີ ປສ຺ສາສວເສນ ສຎ຺ຎາ ຈ ເວທນາ ຈ ເຈຕສິກາ – ເອເຕ ຘມ຺ມາ ຈິຕ຺ຕປຏິພທ຺ຘາ ຈິຕ຺ຕສງ຺ຂາຣາ. ເຕ ຈິຕ຺ຕສງ຺ຂາເຣ ປສ຺ສມ຺ເຠນ຺ໂຕ ນິໂຣເຘນ຺ໂຕ ວູປສເມນ຺ໂຕ ສິກ຺ຂຕິ. ປສ຺ສມ຺ຠຍໍ ຈິຕ຺ຕສງ຺ຂາຣໍ ອສ຺ສາສປສ຺ສາສວເສນ ເວທນາ ອຸປຏ຺ຐານໍ ສຕິ ອນຸປສ຺ສນາ ຎາຓໍ. ເວທນາ ອຸປຏ຺ຐານໍ, ໂນ ສຕິ; ສຕິ ອຸປຏ຺ຐານຎ຺ເຈວ ສຕິ ຈ. ຕາຍ ສຕິຍາ ເຕນ ຎາເຓນ ຕໍ ເວທນໍ ອນຸປສ຺ສຕິ. ເຕນ ວຸຈ຺ຈຕິ – ‘‘ເວທນາສຸ ເວທນານຸປສ຺ສນາສຕິປຏ຺ຐານຠາວນາ’’ຕິ.
ອນຸປສ຺ສຕີຕິ ກຖໍ ຕໍ ເວທນໍ ອນຸປສ຺ສຕິ…ເປ… ເອວໍ ຕໍ ເວທນໍ ອນຸປສ຺ສຕິ. ຠາວນາຕິ ຈຕສ຺ໂສ ຠາວນາ…ເປ… ອາເສວນຏ຺ເຐນ ຠາວນາ. ປສ຺ສມ຺ຠຍໍ ຈິຕ຺ຕສງ຺ຂາຣໍ ອສ຺ສາສປສ຺ສາສານໍ ສໍວຣຏ຺ເຐນ ສີລວິສຸທ຺ຘິ…ເປ… ປສ຺ສມ຺ຠຍໍ ຈິຕ຺ຕສງ຺ຂາຣໍ ອສ຺ສາສປສ຺ສາສວເສນ ຈິຕ຺ຕສ຺ສ ເອກຄ຺ຄຕໍ ອວິກ຺ເຂປໍ ປຊານໂຕ…ເປ… ປຊານນ຺ໂຕ ອິນ຺ທ຺ຣິຍານິ ສໂມຘາເນຕິ. ເຕນ ວຸຈ຺ຈຕິ – ‘‘ສມຕ຺ຖຎ຺ຈ ປຏິວິຊ຺ຌຕີ’’ຕິ.
ອຏ຺ຐ ອນຸປສ຺ສນາຎາຓານິ ອຏ຺ຐ ຈ ອຸປຏ຺ຐານານຸສ຺ສຕິໂຍ ຈຕ຺ຕາຣິ ສຸຕ຺ຕນ຺ຕິກວຕ຺ຖູນິ ເວທນາສຸ ເວທນານຸປສ຺ສນາຍ.
ຕຕິຍຈຕຸກ຺ກນິທ຺ເທໂສ
໑໗໖. ກຖໍ ‘‘ຈິຕ຺ຕປຏິສໍເວທີ ອສ຺ສສິສ຺ສາມີ’’ຕິ ສິກ຺ຂຕິ, ‘‘ຈິຕ຺ຕປຏິສໍເວທີ ປສ຺ສສິສ຺ສາມີ’’ຕິ ສິກ຺ຂຕິ? ກຕມໍ ຕໍ ຈິຕ຺ຕໍ? ທີຆໍ ອສ຺ສາສວເສນ ວິຎ຺ຎາຓໍ ຈິຕ຺ຕໍ. ຍໍ ຈິຕ຺ຕໍ ມໂນ ມານສໍ ຫທຍໍ ປຓ຺ຑຣໍ ມໂນ ມນາຍຕນໍ ມນິນ຺ທ຺ຣິຍໍ ວິຎ຺ຎາຓໍ ວິຎ຺ຎາຓກ຺ຂນ຺ໂຘ ຕຊ຺ຊາ ມໂນວິຎ຺ຎາຓຘາຕຸ. ທີຆໍ ປສ຺ສາສວເສນ …ເປ… ປສ຺ສມ຺ຠຍໍ ຈິຕ຺ຕສງ຺ຂາຣໍ ອສ຺ສາສວເສນ… ປສ຺ສມ຺ຠຍໍ ຈິຕ຺ຕສງ຺ຂາຣໍ ປສ຺ສາສວເສນ ວິຎ຺ຎາຓໍ ຈິຕ຺ຕໍ. ຍໍ ຈິຕ຺ຕໍ ມໂນ ມານສໍ ຫທຍໍ ປຓ຺ຑຣໍ ມໂນ ມານຍຕນໍ ມນິນ຺ທ຺ຣິຍໍ ວິຎ຺ຎາຓໍ ວິຎ຺ຎາຓກ຺ຂນ຺ໂຘ ຕຊ຺ຊາ ມໂນວິຎ຺ຎາຓຘາຕຸ – ອິທໍ ຈິຕ຺ຕໍ.
ກຖໍ ຕໍ ຈິຕ຺ຕໍ ປຏິວິທິຕໍ ໂຫຕິ? ທີຆໍ ອສ຺ສາສວເສນ ຈິຕ຺ຕສ຺ສ ເອກຄ຺ຄຕໍ ອວິກ຺ເຂປໍ ປຊານໂຕ ສຕິ ອຸປຏ຺ຐິຕາ ໂຫຕິ. ຕາຍ ສຕິຍາ ເຕນ ຎາເຓນ ຕໍ ຈິຕ຺ຕໍ ປຏິວິທິຕໍ ໂຫຕິ. ທີຆໍ ປສ຺ສາສວເສນ ຈິຕ຺ຕສ຺ສ ເອກຄ຺ຄຕໍ ອວິກ຺ເຂປໍ ປຊານໂຕ ສຕິ ອຸປຏ຺ຐິຕາ ໂຫຕິ. ຕາຍ ສຕິຍາ ເຕນ ຎາເຓນ ຕໍ ຈິຕ຺ຕໍ ປຏິວິທິຕໍ ໂຫຕິ…ເປ… ສຈ຺ຉິກາຕພ຺ພໍ ສຈ຺ຉິກໂຣໂຕ ຕໍ ຈິຕ຺ຕໍ ປຏິວິທິຕໍ ໂຫຕິ. ເອວໍ ຕໍ ຈິຕ຺ຕໍ ປຏິວິທິຕໍ ໂຫຕິ. ຈິຕ຺ຕປຏິສໍເວທີ ອສ຺ສາສປສ຺ສາສວເສນ ວິຎ຺ຎາຓໍ ຈິຕ຺ຕໍ ອຸປຏ຺ຐານໍ ສຕິ ອນຸປສ຺ສນາ ຎາຓໍ. ຈິຕ຺ຕໍ ອຸປຏ຺ຐານໍ, ໂນ ສຕິ; ສຕິ ອຸປຏ຺ຐານຎ຺ເຈວ ສຕິ ຈ. ຕາຍ ສຕິຍາ ເຕນ ຎາເຓນ ຕໍ ຈິຕ຺ຕໍ ອນຸປສ຺ສຕິ. ເຕນ ວຸຈ຺ຈຕິ – ‘‘ຈິຕ຺ເຕ ຈິຕ຺ຕານຸປສ຺ສນາສຕິປຏ຺ຐານຠາວນາ’’ຕິ.
ອນຸປສ຺ສຕີຕິ ກຖໍ ຕໍ ຈິຕ຺ຕໍ ອນຸປສ຺ສຕິ…ເປ… ເອວໍ ຕໍ ຈິຕ຺ຕໍ ອນຸປສ຺ສຕິ. ຠາວນາຕິ ຈຕສ຺ໂສ ຠາວນາ…ເປ… ອາເສວນຏ຺ເຐນ ຠາວນາ. ຈິຕ຺ຕປຏິສໍເວທີ ອສ຺ສາສປສ຺ສາສານໍ ສໍວຣຏ຺ເຐນ ສີລວິສຸທ຺ຘິ…ເປ… ຈິຕ຺ຕປຏິສໍເວທີ ອສ຺ສາສປສ຺ສາສວເສນ ຈິຕ຺ຕສ຺ສ ເອກຄ຺ຄຕໍ ອວິກ຺ເຂປໍ ປຊານໂຕ…ເປ… ປຊານນ຺ໂຕ ອິນ຺ທ຺ຣິຍານິ ສໂມຘາເນຕິ. ເຕນ ວຸຈ຺ຈຕິ – ‘‘ສມຕ຺ຖຎ຺ຈ ປຏິວິຊ຺ຌຕີ’’ຕິ.
໑໗໗. ກຖໍ ‘‘ອຠິປ຺ປໂມທຍໍ ຈິຕ຺ຕໍ ອສ຺ສສິສ຺ສາມີ’’ຕິ, ‘‘ອຠິປ຺ປໂມທຍໍ ຈິຕ຺ຕໍ ປສ຺ສສິສ຺ສາມີ’’ຕິ ສິກ຺ຂຕິ? ກຕໂມ ຈິຕ຺ຕສ຺ສ ອຠິປ຺ປໂມໂທ? ທີຆໍ ອສ຺ສາສວເສນ ຈິຕ຺ຕສ຺ສ ເອກຄ຺ຄຕໍ ອວິກ຺ເຂປໍ ປຊານໂຕ ອຸປ຺ປຊ຺ຊຕິ ຈິຕ຺ຕສ຺ສ ອຠິປ຺ປໂມໂທ. ຍາ ຈິຕ຺ຕສ຺ສ ອາໂມທນາ ປໂມທນາ ຫາໂສ ປຫາໂສ ວິຕ຺ຕິ ໂອທຄ຺ຍໍ ອຕ຺ຕມນຕາ. ຈິຕ຺ຕສ຺ສ ທີຆໍ ອສ຺ສາສປສ຺ສາສວເສນ ຈິຕ຺ຕສ຺ສ ເອກຄ຺ຄຕໍ ອວິກ຺ເຂປໍ ປຊານໂຕ ອຸປ຺ປຊ຺ຊຕິ ຈິຕ຺ຕສ຺ສ ອຠິປ຺ປໂມໂທ. ຍາ ຈິຕ຺ຕສ຺ສ ອາໂມທນາ ປໂມທນາ ຫາໂສ ປຫາໂສ ວິຕ຺ຕິ ໂອທຄ຺ຍໍ ອຕ຺ຕມນຕາ ຈິຕ຺ຕສ຺ສ…ເປ… ຈິຕ຺ຕປຏິສໍເວທີ ອສ຺ສາສວເສນ… ຈິຕ຺ຕປຏິສໍເວທີ ປສ຺ສາສວເສນ ຈິຕ຺ຕສ຺ສ ເອກຄ຺ຄຕໍ ອວິກ຺ເຂປໍ ປຊານໂຕ ອຸປ຺ປຊ຺ຊຕິ ຈິຕ຺ຕສ຺ສ ອຠິປ຺ປໂມໂທ. ຍາ ຈິຕ຺ຕສ຺ສ ອາໂມທນາ ປໂມທນາ ຫາໂສ ປຫາໂສ ວິຕ຺ຕິ ໂອທຄ຺ຍໍ ອຕ຺ຕມນຕາ ຈິຕ຺ຕສ຺ສ – ອຍໍ ຈິຕ຺ຕສ຺ສ ອຠິປ຺ປໂມໂທ. ອຠິປ຺ປໂມທຍໍ ຈິຕ຺ຕໍ ອສ຺ສາສປສ຺ສາສວເສນ ວິຎ຺ຎາຓໍ ຈິຕ຺ຕໍ ອຸປຏ຺ຐານໍ ສຕິ ອນຸປສ຺ສນາ ຎາຓໍ. ຈິຕ຺ຕໍ ອຸປຏ຺ຐານໍ, ໂນ ສຕິ; ສຕິ ອຸປຏ຺ຐານຎ຺ເຈວ ສຕິ ຈ. ຕາຍ ສຕິຍາ ເຕນ ຎາເຓນ ຕໍ ຈິຕ຺ຕໍ ອນຸປສ຺ສຕິ. ເຕນ ວຸຈ຺ຈຕິ – ‘‘ຈິຕ຺ເຕ ຈິຕ຺ຕານຸປສ຺ສນາສຕິປຏ຺ຐານຠາວນາ’’ຕິ.
ອນຸປສ຺ສຕີຕິ ກຖໍ ຕໍ ຈິຕ຺ຕໍ ອນຸປສ຺ສຕິ…ເປ… ເອວໍ ຕໍ ຈິຕ຺ຕໍ ອນຸປສ຺ສຕີຕິ. ຠາວນາຕິ ຈຕສ຺ໂສ ຠາວນາ…ເປ… ອາເສວນຏ຺ເຐນ ຠາວນາ. ອຠິປ຺ປໂມທຍໍ ຈິຕ຺ຕໍ ອສ຺ສາສປສ຺ສາສານໍ ສໍວຣຏ຺ເຐນ ສີລວິສຸທ຺ຘິ…ເປ… ອຠິປ຺ປໂມທຍໍ ຈິຕ຺ຕໍ ອສ຺ສາສປສ຺ສາສວເສນ ຈິຕ຺ຕສ຺ສ ເອກຄ຺ຄຕໍ ອວິກ຺ເຂປໍ ປຊານໂຕ…ເປ… ປຊານນ຺ໂຕ ອິນ຺ທ຺ຣິຍານິ ສໂມຘາເນຕິ. ເຕນ ວຸຈ຺ຈຕິ – ‘‘ສມຕ຺ຖຎ຺ຈ ປຏິວິຊ຺ຌຕີ’’ຕິ.
໑໗໘. ກຖໍ ‘‘ສມາທຫໍ ຈິຕ຺ຕໍ ອສ຺ສສິສ຺ສາມີ’’ຕິ ສິກ຺ຂຕິ, ‘‘ສມາທຫໍ ຈິຕ຺ຕໍ ປສ຺ສສິສ຺ສາມີ’’ຕິ ສິກ຺ຂຕິ? ກຕໂມ ສມາຘິ [ກຕມຎ຺ຈ ສມາຘິນ຺ທິຍໍ (ສ຺ຍາ.)]? ທີຆໍ ອສ຺ສາສວເສນ ຈິຕ຺ຕສ຺ສ ເອກຄ຺ຄຕາ ອວິກ຺ເຂໂປ ສມາຘິ, ຍາ ຈິຕ຺ຕສ຺ສ ຐິຕິ ສຓ຺ຐິຕິ ອວຏ຺ຐິຕິ [ອຘິຏ຺ຏິຕິ (ສ຺ຍາ.)] ອວິສາຫາໂຣ ອວິກ຺ເຂໂປ ອວິສາຫຏມານສຕາ [ອວິສາຫຕມານສຕາ (ສ຺ຍາ. ກ.)] ສມໂຖ ສມາຘິນ຺ທ຺ຣິຍໍ ສມາຘິພລໍ ສມ຺ມາສມາຘິ. ທີຆໍ ປສ຺ສາສວເສນ ຈິຕ຺ຕສ຺ສ ເອກຄ຺ຄຕາ ອວິກ຺ເຂໂປ ສມາຘິ…ເປ… ສມາທຫໍ ຈິຕ຺ຕໍ ອສ຺ສາສວເສນ…ເປ… ສມາທຫໍ ຈິຕ຺ຕໍ ປສ຺ສາສວເສນ ຈິຕ຺ຕສ຺ສ ເອກຄ຺ຄຕາ ອວິກ຺ເຂໂປ ສມາຘິ. ຍາ ຈິຕ຺ຕສ຺ສ ຐິຕິ ສຓ຺ຐິຕິ ອວຏ຺ຐິຕິ ອວິສາຫາໂຣ ອວິກ຺ເຂໂປ ອວິສາຫຏມານສຕາ ສມໂຖ ສມາຘິນ຺ທ຺ຣິຍໍ ສມາຘິພລໍ ສມ຺ມາສມາຘິ – ອຍໍ ສມາຘິ. ສມາທຫໍ ຈິຕ຺ຕໍ ອສ຺ສາສປສ຺ສາສວເສນ ວິຎ຺ຎາຓໍ ຈິຕ຺ຕໍ ອຸປຏ຺ຐານໍ ສຕິ ອນຸປສ຺ສນາ ຎາຓໍ. ຈິຕ຺ຕໍ ອຸປຏ຺ຐານໍ, ໂນ ສຕິ; ສຕິ ອຸປຏ຺ຐານຎ຺ເຈວ ສຕິ ຈ. ຕາຍ ສຕິຍາ ເຕນ ຎາເຓນ ຕໍ ຈິຕ຺ຕໍ ອນຸປສ຺ສຕິ. ເຕນ ວຸຈ຺ຈຕິ – ‘‘ຈິຕ຺ເຕ ຈິຕ຺ຕານຸປສ຺ສນາສຕິປຏ຺ຐານຠາວນາ’’ຕິ.
ອນຸປສ຺ສຕີຕິ ກຖໍ ຕໍ ຈິຕ຺ຕໍ ອນຸປສ຺ສຕິ…ເປ… ເອວໍ ຕໍ ຈິຕ຺ຕໍ ອນຸປສ຺ສຕິ. ຠາວນາຕິ ຈຕສ຺ໂສ ຠາວນາ…ເປ… ອາເສວນຏ຺ເຐນ ຠາວນາ. ສມາທຫໍ ຈິຕ຺ຕໍ ອສ຺ສາສປສ຺ສາສານໍ ສໍວຣຏ຺ເຐນ ສີລວິສຸທ຺ຘິ…ເປ… ສມາທຫໍ ຈິຕ຺ຕໍ ອສ຺ສາສປສ຺ສາສວເສນ ຈິຕ຺ຕສ຺ສ ເອກຄ຺ຄຕໍ ອວິກ຺ເຂປໍ ປຊານໂຕ…ເປ… ປຊານນ຺ໂຕ ອິນ຺ທ຺ຣິຍານິ ສໂມຘາເນຕິ. ເຕນ ວຸຈ຺ຈຕິ – ‘‘ສມຕ຺ຖຎ຺ຈ ປຏິວິຊ຺ຌຕີ’’ຕິ.
໑໗໙. ກຖໍ ‘‘ວິໂມຈຍໍ ຈິຕ຺ຕໍ ອສ຺ສສິສ຺ສາມີ’’ຕິ ສິກ຺ຂຕິ, ‘‘ວິໂມຈຍໍ ຈິຕ຺ຕໍ ປສ຺ສສິສ຺ສາມີ’’ຕິ ສິກ຺ຂຕິ? ‘‘ຣາຄໂຕ ວິໂມຈຍໍ ຈິຕ຺ຕໍ ອສ຺ສສິສ຺ສາມີ’’ຕິ ສິກ຺ຂຕິ, ‘‘ຣາຄໂຕ ວິໂມຈຍໍ ຈິຕ຺ຕໍ ປສ຺ສສິສ຺ສາມີ’’ຕິ ສິກ຺ຂຕິ. ‘‘ໂທສໂຕ ວິໂມຈຍໍ ຈິຕ຺ຕໍ ອສ຺ສສິສ຺ສາມີ’’ຕິ ສິກ຺ຂຕິ, ‘‘ໂທສໂຕ ວິໂມຈຍໍ ຈິຕ຺ຕໍ ປສ຺ສສິສ຺ສາມີ’’ຕິ ສິກ຺ຂຕິ. ‘‘ໂມຫໂຕ ວິໂມຈຍໍ ຈິຕ຺ຕໍ ອສ຺ສສິສ຺ສາມີ’’ຕິ ສິກ຺ຂຕິ…ເປ… ມານໂຕ ວິໂມຈຍໍ ຈິຕ຺ຕໍ… ທິຏ຺ຐິຍາ ວິໂມຈຍໍ ຈິຕ຺ຕໍ… ວິຈິກິຈ຺ຉາຍ ວິໂມຈຍໍ ຈິຕ຺ຕໍ… ຖິນໂຕ ວິໂມຈຍໍ ຈິຕ຺ຕໍ… ອຸທ຺ຘຈ຺ຈໂຕ ວິໂມຈຍໍ ຈິຕ຺ຕໍ… ອຫິຣິກໂຕ ວິໂມຈຍໍ ຈິຕ຺ຕໍ… ‘‘ອໂນຕ຺ຕປ຺ປໂຕ ວິໂມຈຍໍ ຈິຕ຺ຕໍ ອສ຺ສສິສ຺ສາມີ’’ຕິ ສິກ຺ຂຕິ, ‘‘ອໂນຕ຺ຕປ຺ປໂຕ ວິໂມຈຍໍ ຈິຕ຺ຕໍ ປສ຺ສສິສ຺ສາມີ’’ຕິ ສິກ຺ຂຕິ. ວິໂມຈຍໍ ຈິຕ຺ຕໍ ອສ຺ສາສປສ຺ສາສວເສນ ວິຎ຺ຎາຓໍ ຈິຕ຺ຕໍ ອຸປຏ຺ຐານໍ ສຕິ…ເປ….
ອນຸປສ຺ສຕີຕິ ກຖໍ ຕໍ ຈິຕ຺ຕໍ ອນຸປສ຺ສຕິ…ເປ… ເອວໍ ຕໍ ຈິຕ຺ຕໍ ອນຸປສ຺ສຕິ. ຠາວນາຕິ ຈຕສ຺ໂສ ຠາວນາ…ເປ… ອາເສວນຏ຺ເຐນ ຠາວນາ. ວິໂມຈຍໍ ຈິຕ຺ຕໍ ອສ຺ສາສປສ຺ສາສານໍ ສໍວຣຏ຺ເຐນ ສີລວິສຸທ຺ຘິ…ເປ… ວິໂມຈຍໍ ຈິຕ຺ຕໍ ອສ຺ສາສປສ຺ສາສວເສນ ຈິຕ຺ຕສ຺ສ ເອກຄ຺ຄຕໍ ອວິກ຺ເຂປໍ ປຊານໂຕ …ເປ… ປຊານນ຺ໂຕ ອິນ຺ທ຺ຣິຍານິ ສໂມຘາເນຕິ. ເຕນ ວຸຈ຺ຈຕິ – ‘‘ສມຕ຺ຖຎ຺ຈ ປຏິວິຊ຺ຌຕີ’’ຕິ.
ອຏ຺ຐ ອນຸປສ຺ສນາຎາຓານິ ອຏ຺ຐ ຈ ອຸປຏ຺ຐານານຸສ຺ສຕິໂຍ ຈຕ຺ຕາຣິ ສຸຕ຺ຕນ຺ຕິກວຕ຺ຖູນິ ຈິຕ຺ເຕ ຈິຕ຺ຕານຸປສ຺ສນາຍ.
ຈຕຸຕ຺ຖຈຕຸກ຺ກນິທ຺ເທໂສ
໑໘໐. ກຖໍ ‘‘ອນິຈ຺ຈານຸປສ຺ສີ ອສ຺ສສິສ຺ສາມີ’’ຕິ ສິກ຺ຂຕິ, ‘‘ອນິຈ຺ຈານຸປສ຺ສີ ປສ຺ສສິສ຺ສາມີ’’ຕິ ສິກ຺ຂຕິ? ອນິຈ຺ຈນ຺ຕິ ກິໍ ອນິຈ຺ຈໍ? ປຎ຺ຈກ຺ຂນ຺ຘາ ອນິຈ຺ຈາ. ເກນຏ຺ເຐນ ອນິຈ຺ຈາ? ອຸປ຺ປາທວຍຏ຺ເຐນ ອນິຈ຺ຈາ. ປຎ຺ຈນ຺ນໍ ຂນ຺ຘານໍ ອຸທຍໍ ປສ຺ສນ຺ໂຕ ກຕິ ລກ຺ຂຓານິ ປສ຺ສຕິ, ວຍໍ ປສ຺ສນ຺ໂຕ ກຕິ ລກ຺ຂຓານິ ປສ຺ສຕິ, ອຸທຍພ຺ພຍໍ ປສ຺ສນ຺ໂຕ ກຕິ ລກ຺ຂຓານິ ປສ຺ສຕິ? ປຎ຺ຈນ຺ນໍ ຂນ຺ຘານໍ ອຸທຍໍ ປສ຺ສນ຺ໂຕ ປຎ຺ຈວີສຕິ ລກ຺ຂຓານິ ປສ຺ສຕິ, ວຍໍ ປສ຺ສນ຺ໂຕ ປຎ຺ຈວີສຕິ ລກ຺ຂຓານິ ປສ຺ສຕິ. ປຎ຺ຈນ຺ນໍ ຂນ຺ຘານໍ ອຸທຍພ຺ພຍໍ ປສ຺ສນ຺ໂຕ ອິມານິ ປຎ຺ຎາສ ລກ຺ຂຓານິ ປສ຺ສຕິ.