໙. ສງ຺ຂາຣຸເປກ຺ຂາຎາຓນິທ຺ເທໂສ

໕໔. ກຖໍ ມຸຎ຺ຈິຕຸກມ຺ຍຕາປຏິສງ຺ຂາສນ຺ຕິຏ຺ຐນາ [ມຸຈ຺ຈິຕຸກມ຺ຍຕາປຏິສງ຺ຂາສນ຺ຕິຏ຺ຐນາ (ກ.)] ປຎ຺ຎາ ສງ຺ຂາຣຸເປກ຺ຂາສຸ ຎາຓໍ? ອຸປ຺ປາທໍ ມຸຎ຺ຈິຕຸກມ຺ຍຕາປຏິສງ຺ຂາສນ຺ຕິຏ຺ຐນາ [ອຸປ຺ປາທມຸຎ຺ຈິຕຸກມ຺ຍຕາ… (ສ຺ຍາ.)] ປຎ຺ຎາ ສງ຺ຂາຣຸເປກ຺ຂາສຸ ຎາຓໍ, ປວຕ຺ຕໍ ມຸຎ຺ຈິຕຸກມ຺ຍຕາປຏິສງ຺ຂາສນ຺ຕິຏ຺ຐນາ ປຎ຺ຎາ ສງ຺ຂາຣຸເປກ຺ຂາສຸ ຎາຓໍ, ນິມິຕ຺ຕໍ ມຸຎ຺ຈິຕຸກມ຺ຍຕາ…ເປ… ອາຍູຫນໍ ມຸຎ຺ຈິຕຸກມ຺ຍຕາ… ປຏິສນ຺ຘິໍ ມຸຎ຺ຈິຕຸກມ຺ຍຕາ… ຄຕິໍ ມຸຎ຺ຈິຕຸກມ຺ຍຕາ… ນິພ຺ພຕ຺ຕິໍ ມຸຎ຺ຈິຕຸກມ຺ຍຕາ… ອຸປປຕ຺ຕິໍ ມຸຎ຺ຈິຕຸກມ຺ຍຕາ… ຊາຕິໍ ມຸຎ຺ຈິຕຸກມ຺ຍຕາ… ຊຣໍ ມຸຎ຺ຈິຕຸກມ຺ຍຕາ… ພ຺ຍາຘິໍ ມຸຎ຺ຈິຕຸກມ຺ຍຕາ… ມຣຓໍ ມຸຎ຺ຈິຕຸກມ຺ຍຕາ… ໂສກໍ ມຸຎ຺ຈິຕຸກມ຺ຍຕາ… ປຣິເທວໍ ມຸຎ຺ຈິຕຸກມ຺ຍຕາ…ເປ… ອຸປາຍາສໍ ມຸຎ຺ຈິຕຸກມ຺ຍຕາປຏິສງ຺ຂາສນ຺ຕິຏ຺ຐນາ ປຎ຺ຎາ ສງ຺ຂາຣຸເປກ຺ຂາສຸ ຎາຓໍ.

ອຸປ຺ປາໂທ ທຸກ຺ຂນ຺ຕິ – ມຸຎ຺ຈິຕຸກມ຺ຍຕາປຏິສງ຺ຂາສນ຺ຕິຏ຺ຐນາ ປຎ຺ຎາ ສງ຺ຂາຣຸເປກ຺ຂາສຸ ຎາຓໍ. ປວຕ຺ຕໍ ທຸກ຺ຂນ຺ຕິ – ມຸຎ຺ຈິຕຸກມ຺ຍຕາປຏິສງ຺ຂາສນ຺ຕິຏ຺ຐນາ ປຎ຺ຎາ ສງ຺ຂາຣຸເປກ຺ຂາສຸ ຎາຓໍ…ເປ… ອຸປາຍາໂສ ທຸກ຺ຂນ຺ຕິ – ມຸຎ຺ຈິຕຸກມ຺ຍຕາປຏິສງ຺ຂາສນ຺ຕິຏ຺ຐນາ ປຎ຺ຎາ ສງ຺ຂາຣຸເປກ຺ຂາສຸ ຎາຓໍ.

ອຸປ຺ປາໂທ ຠຍນ຺ຕິ – ມຸຎ຺ຈິຕຸກມ຺ຍຕາປຏິສງ຺ຂາສນ຺ຕິຏ຺ຐນາ ປຎ຺ຎາ ສງ຺ຂາຣຸເປກ຺ຂາສຸ ຎາຓໍ. ປວຕ຺ຕໍ ຠຍນ຺ຕິ – ມຸຎ຺ຈິຕຸກມ຺ຍຕາປຏິສງ຺ຂາສນ຺ຕິຏ຺ຐນາ ປຎ຺ຎາ ສງ຺ຂາຣຸເປກ຺ຂາສຸ ຎາຓໍ…ເປ… ອຸປາຍາໂສ ຠຍນ຺ຕິ – ມຸຎ຺ຈິຕຸກມ຺ຍຕາປຏິສງ຺ຂາສນ຺ຕິຏ຺ຐນາ ປຎ຺ຎາ ສງ຺ຂາຣຸເປກ຺ຂາສຸ ຎາຓໍ.

ອຸປ຺ປາໂທ ສາມິສນ຺ຕິ – ມຸຎ຺ຈິຕຸກມ຺ຍຕາປຏິສງ຺ຂາສນ຺ຕິຏ຺ຐນາ ປຎ຺ຎາ ສງ຺ຂາຣຸເປກ຺ຂາສຸ ຎາຓໍ. ປວຕ຺ຕໍ ສາມິສນ຺ຕິ – ມຸຎ຺ຈິຕຸກມ຺ຍຕາປຏິສງ຺ຂາສນ຺ຕິຏ຺ຐນາ ປຎ຺ຎາ ສງ຺ຂາຣຸເປກ຺ຂາສຸ ຎາຓໍ…ເປ… ອຸປາຍາໂສ ສາມິສນ຺ຕິ – ມຸຎ຺ຈິຕຸກມ຺ຍຕາປຏິສງ຺ຂາສນ຺ຕິຏ຺ຐນາ ປຎ຺ຎາ ສງ຺ຂາຣຸເປກ຺ຂາສຸ ຎາຓໍ.

ອຸປ຺ປາໂທ ສງ຺ຂາຣາຕິ – ມຸຎ຺ຈິຕຸກມ຺ຍຕາປຏິສງ຺ຂາສນ຺ຕິຏ຺ຐນາ ປຎ຺ຎາ ສງ຺ຂາຣຸເປກ຺ຂາສຸ ຎາຓໍ. ປວຕ຺ຕໍ ສງ຺ຂາຣາຕິ – ມຸຎ຺ຈິຕຸກມ຺ຍຕາປຏິສງ຺ຂາສນ຺ຕິຏ຺ຐນາ ປຎ຺ຎາ ສງ຺ຂາຣຸເປກ຺ຂາສຸ ຎາຓໍ…ເປ… ອຸປາຍາໂສ ສງ຺ຂາຣາຕິ – ມຸຎ຺ຈິຕຸກມ຺ຍຕາປຏິສງ຺ຂາສນ຺ຕິຏ຺ຐນາ ປຎ຺ຎາ ສງ຺ຂາຣຸເປກ຺ຂາສຸ ຎາຓໍ.

ອຸປ຺ປາໂທ ສງ຺ຂາຣາ, ເຕ ສງ຺ຂາເຣ ອຊ຺ຌຸເປກ຺ຂຕີຕິ – ສງ຺ຂາຣຸເປກ຺ຂາ. ເຍ ຈ ສງ຺ຂາຣາ ຍາ ຈ ອຸເປກ຺ຂາ ອຸໂຠເປເຕ ສງ຺ຂາຣາ, ເຕ ສງ຺ຂາເຣ ອຊ຺ຌຸເປກ຺ຂຕີຕິ – ສງ຺ຂາຣຸເປກ຺ຂາ. ປວຕ຺ຕໍ ສງ຺ຂາຣາ…ເປ… ນິມິຕ຺ຕໍ ສງ຺ຂາຣາ… ອາຍູຫນາ ສງ຺ຂາຣາ… ປຏິສນ຺ຘິ ສງ຺ຂາຣາ… ຄຕິ ສງ຺ຂາຣາ… ນິພ຺ພຕ຺ຕິ ສງ຺ຂາຣາ… ອຸປປຕ຺ຕິ ສງ຺ຂາຣາ… ຊາຕິ ສງ຺ຂາຣາ… ຊຣາ ສງ຺ຂາຣາ… ພ຺ຍາຘິ ສງ຺ຂາຣາ… ມຣຓໍ ສງ຺ຂາຣາ… ໂສໂກ ສງ຺ຂາຣາ… ປຣິເທໂວ ສງ຺ຂາຣາ…ເປ… ອຸປາຍາໂສ ສງ຺ຂາຣາ, ເຕ ສງ຺ຂາເຣ ອຊ຺ຌຸເປກ຺ຂຕີຕິ – ສງ຺ຂາຣຸເປກ຺ຂາ. ເຍ ຈ ສງ຺ຂາຣາ ຍາ ຈ ອຸເປກ຺ຂາ ອຸໂຠເປເຕ ສງ຺ຂາຣາ, ເຕ ສງ຺ຂາເຣ ອຊ຺ຌຸເປກ຺ຂຕີຕິ – ສງ຺ຂາຣຸເປກ຺ຂາ.

໕໕. ກຕິຫາກາເຣຫິ ສງ຺ຂາຣຸເປກ຺ຂາຍ ຈິຕ຺ຕສ຺ສ ອຠິນີຫາໂຣ ໂຫຕິ? ອຏ຺ຐຫາກາເຣຫິ ສງ຺ຂາຣຸເປກ຺ຂາຍ ຈິຕ຺ຕສ຺ສ ອຠິນີຫາໂຣ ໂຫຕິ. ປຸຖຸຊ຺ຊນສ຺ສ ກຕິຫາກາເຣຫິ ສງ຺ຂາຣຸເປກ຺ຂາຍ ຈິຕ຺ຕສ຺ສ ອຠິນີຫາໂຣ ໂຫຕິ? ເສກ຺ຂສ຺ສ ກຕິຫາກາເຣຫິ ສງ຺ຂາຣຸເປກ຺ຂາຍ ຈິຕ຺ຕສ຺ສ ອຠິນີຫາໂຣ ໂຫຕິ? ວີຕຣາຄສ຺ສ ກຕິຫາກາເຣຫິ ສງ຺ຂາຣຸເປກ຺ຂາຍ ຈິຕ຺ຕສ຺ສ ອຠິນີຫາໂຣ ໂຫຕິ? ປຸຖຸຊ຺ຊນສ຺ສ ທ຺ວີຫາກາເຣຫິ ສງ຺ຂາຣຸເປກ຺ຂາຍ ຈິຕ຺ຕສ຺ສ ອຠິນີຫາໂຣ ໂຫຕິ. ເສກ຺ຂສ຺ສ ຕີຫາກາເຣຫິ ສງ຺ຂາຣຸເປກ຺ຂາຍ ຈິຕ຺ຕສ຺ສ ອຠິນີຫາໂຣ ໂຫຕິ. ວີຕຣາຄສ຺ສ ຕີຫາກາເຣຫິ ສງ຺ຂາຣຸເປກ຺ຂາຍ ຈິຕ຺ຕສ຺ສ ອຠິນີຫາໂຣ ໂຫຕິ.

ປຸຖຸຊ຺ຊນສ຺ສ ກຕເມຫິ ທ຺ວີຫາກາເຣຫິ ສງ຺ຂາຣຸເປກ຺ຂາຍ ຈິຕ຺ຕສ຺ສ ອຠິນີຫາໂຣ ໂຫຕິ? ປຸຖຸຊ຺ຊໂນ ສງ຺ຂາຣຸເປກ຺ຂໍ ອຠິນນ຺ທຕິ ວາ ວິປສ຺ສຕິ ວາ. ປຸຖຸຊ຺ຊນສ຺ສ ອິເມຫິ ທ຺ວີຫາກາເຣຫິ ສງ຺ຂາຣຸເປກ຺ຂາຍ ຈິຕ຺ຕສ຺ສ ອຠິນີຫາໂຣ ໂຫຕິ. ເສກ຺ຂສ຺ສ ກຕເມຫິ ຕີຫາກາເຣຫິ ສງ຺ຂາຣຸເປກ຺ຂາຍ ຈິຕ຺ຕສ຺ສ ອຠິນີຫາໂຣ ໂຫຕິ? ເສກ຺ໂຂ ສງ຺ຂາຣຸເປກ຺ຂໍ ອຠິນນ຺ທຕິ ວາ ວິປສ຺ສຕິ ວາ ປຏິສງ຺ຂາຍ ວາ ຜລສມາປຕ຺ຕິໍ ສມາປຊ຺ຊຕິ. ເສກ຺ຂສ຺ສ ອິເມຫິ ຕີຫາກາເຣຫິ ສງ຺ຂາຣຸເປກ຺ຂາຍ ຈິຕ຺ຕສ຺ສ ອຠິນີຫາໂຣ ໂຫຕິ. ວີຕຣາຄສ຺ສ ກຕເມຫິ ຕີຫາກາເຣຫິ ສງ຺ຂາຣຸເປກ຺ຂາຍ ຈິຕ຺ຕສ຺ສ ອຠິນີຫາໂຣ ໂຫຕິ? ວີຕຣາໂຄ ສງ຺ຂາຣຸເປກ຺ຂໍ ວິປສ຺ສຕິ ວາ ປຏິສງ຺ຂາຍ ວາ ຜລສມາປຕ຺ຕິໍ ສມາປຊ຺ຊຕິ, ຕທຊ຺ຌຸເປກ຺ຂິຕ຺ວາ ສຸຎ຺ຎຕວິຫາເຣນ ວາ ອນິມິຕ຺ຕວິຫາເຣນ ວາ ອປ຺ປຓິຫິຕວິຫາເຣນ ວາ ວິຫຣຕິ. ວີຕຣາຄສ຺ສ ອິເມຫິ ຕີຫາກາເຣຫິ ສງ຺ຂາຣຸເປກ຺ຂາຍ ຈິຕ຺ຕສ຺ສ ອຠິນີຫາໂຣ ໂຫຕິ.

໕໖. ກຖໍ ປຸຖຸຊ຺ຊນສ຺ສ ຈ ເສກ຺ຂສ຺ສ ຈ ສງ຺ຂາຣຸເປກ຺ຂາຍ ຈິຕ຺ຕສ຺ສ ອຠິນີຫາໂຣ ເອກຕ຺ຕໍ ໂຫຕິ? ປຸຖຸຊ຺ຊນສ຺ສ ສງ຺ຂາຣຸເປກ຺ຂໍ ອຠິນນ຺ທໂຕ ຈິຕ຺ຕໍ ກິລິສ຺ສຕິ, ຠາວນາຍ ປຣິປນ຺ໂຖ ໂຫຕິ, ປຏິເວຘສ຺ສ ອນ຺ຕຣາໂຍ ໂຫຕິ, ອາຍຕິໍ ປຏິສນ຺ຘິຍາ ປຈ຺ຈໂຍ ໂຫຕິ. ເສກ຺ຂສ຺ສປິ ສງ຺ຂາຣຸເປກ຺ຂໍ ອຠິນນ຺ທໂຕ ຈິຕ຺ຕໍ ກິລິສ຺ສຕິ, ຠາວນາຍ ປຣິປນ຺ໂຖ ໂຫຕິ, ອຸຕ຺ຕຣິປຏິເວຘສ຺ສ ອນ຺ຕຣາໂຍ ໂຫຕິ, ອາຍຕິໍ ປຏິສນ຺ຘິຍາ ປຈ຺ຈໂຍ ໂຫຕິ. ເອວໍ ປຸຖຸຊ຺ຊນສ຺ສ ຈ ເສກ຺ຂສ຺ສ ຈ ສງ຺ຂາຣຸເປກ຺ຂາຍ ຈິຕ຺ຕສ຺ສ ອຠິນີຫາໂຣ ເອກຕ຺ຕໍ ໂຫຕິ ອຠິນນ຺ທຏ຺ເຐນ.

ກຖໍ ປຸຖຸຊ຺ຊນສ຺ສ ຈ ເສກ຺ຂສ຺ສ ຈ ວີຕຣາຄສ຺ສ ຈ ສງ຺ຂາຣຸເປກ຺ຂາຍ ຈິຕ຺ຕສ຺ສ ອຠິນີຫາໂຣ ເອກຕ຺ຕໍ ໂຫຕິ? ປຸຖຸຊ຺ຊໂນ ສງ຺ຂາຣຸເປກ຺ຂໍ ອນິຈ຺ຈໂຕປິ ທຸກ຺ຂໂຕປິ ອນຕ຺ຕໂຕປິ ວິປສ຺ສຕິ. ເສກ຺ໂຂປິ ສງ຺ຂາຣຸເປກ຺ຂໍ ອນິຈ຺ຈໂຕປິ ທຸກ຺ຂໂຕປິ ອນຕ຺ຕໂຕປິ ວິປສ຺ສຕິ. ວີຕຣາໂຄປິ ສງ຺ຂາຣຸເປກ຺ຂໍ ອນິຈ຺ຈໂຕປິ ທຸກ຺ຂໂຕປິ ອນຕ຺ຕໂຕປິ ວິປສ຺ສຕິ. ເອວໍ ປຸຖຸຊ຺ຊນສ຺ສ ຈ ເສກ຺ຂສ຺ສ ຈ ວີຕຣາຄສ຺ສ ຈ ສງ຺ຂາຣຸເປກ຺ຂາຍ ຈິຕ຺ຕສ຺ສ ອຠິນີຫາໂຣ ເອກຕ຺ຕໍ ໂຫຕິ ອນຸປສ຺ສນຏ຺ເຐນ.

ກຖໍ ປຸຖຸຊ຺ຊນສ຺ສ ຈ ເສກ຺ຂສ຺ສ ຈ ວີຕຣາຄສ຺ສ ຈ ສງ຺ຂາຣຸເປກ຺ຂາຍ ຈິຕ຺ຕສ຺ສ ອຠິນີຫາໂຣ ນານຕ຺ຕໍ ໂຫຕິ? ປຸຖຸຊ຺ຊນສ຺ສ ສງ຺ຂາຣຸເປກ຺ຂາ ກຸສລາ ໂຫຕິ. ເສກ຺ຂສ຺ສປິ ສງ຺ຂາຣຸເປກ຺ຂາ ກຸສລາ ໂຫຕິ. ວີຕຣາຄສ຺ສ ສງ຺ຂາຣຸເປກ຺ຂາ ອພ຺ຍາກຕາ ໂຫຕິ. ເອວໍ ປຸຖຸຊ຺ຊນສ຺ສ ຈ ເສກ຺ຂສ຺ສ ຈ ວີຕຣາຄສ຺ສ ຈ ສງ຺ຂາຣຸເປກ຺ຂາຍ ຈິຕ຺ຕສ຺ສ ອຠິນີຫາໂຣ ນານຕ຺ຕໍ ໂຫຕິ ກຸສລາພ຺ຍາກຕຏ຺ເຐນ.

ກຖໍ ປຸຖຸຊ຺ຊນສ຺ສ ຈ ເສກ຺ຂສ຺ສ ຈ ວີຕຣາຄສ຺ສ ຈ ສງ຺ຂາຣຸເປກ຺ຂາຍ ຈິຕ຺ຕສ຺ສ ອຠິນີຫາໂຣ ນານຕ຺ຕໍ ໂຫຕິ? ປຸຖຸຊ຺ຊນສ຺ສ ສງ຺ຂາຣຸເປກ຺ຂາ ກິຎ຺ຈິກາເລ ສຸວິທິຕາ ໂຫຕິ, ກິຎ຺ຈິກາເລ ນ ສຸວິທິຕາ ໂຫຕິ. ເສກ຺ຂສ຺ສປິ ສງ຺ຂາຣຸເປກ຺ຂາ ກິຎ຺ຈິກາເລ ສຸວິທິຕາ ໂຫຕິ, ກິຎ຺ຈິກາເລ ນ ສຸວິທິຕາ ໂຫຕິ. ວີຕຣາຄສ຺ສ ສງ຺ຂາຣຸເປກ຺ຂາ ອຈ຺ຈນ຺ຕໍ ສຸວິທິຕາ ໂຫຕິ. ເອວໍ ປຸຖຸຊ຺ຊນສ຺ສ ຈ ເສກ຺ຂສ຺ສ ຈ ວີຕຣາຄສ຺ສ ຈ ສງ຺ຂາຣຸເປກ຺ຂາຍ ຈິຕ຺ຕສ຺ສ ອຠິນີຫາໂຣ ນານຕ຺ຕໍ ໂຫຕິ ວິທິຕຏ຺ເຐນ ຈ ອວິທິຕຏ຺ເຐນ ຈ.

ກຖໍ ປຸຖຸຊ຺ຊນສ຺ສ ຈ ເສກ຺ຂສ຺ສ ຈ ວີຕຣາຄສ຺ສ ຈ ສງ຺ຂາຣຸເປກ຺ຂາຍ ຈິຕ຺ຕສ຺ສ ອຠິນີຫາໂຣ ນານຕ຺ຕໍ ໂຫຕິ? ປຸຖຸຊ຺ຊໂນ ສງ຺ຂາຣຸເປກ຺ຂໍ ອຕິຕ຺ຕຕ຺ຕາ ວິປສ຺ສຕິ. ເສກ຺ໂຂປິ ສງ຺ຂາຣຸເປກ຺ຂໍ ອຕິຕ຺ຕຕ຺ຕາ ວິປສ຺ສຕິ. ວີຕຣາໂຄ ສງ຺ຂາຣຸເປກ຺ຂໍ ຕິຕ຺ຕຕ຺ຕາ ວິປສ຺ສຕິ. ເອວໍ ປຸຖຸຊ຺ຊນສ຺ສ ຈ ເສກ຺ຂສ຺ສ ຈ ວີຕຣາຄສ຺ສ ຈ ສງ຺ຂາຣຸເປກ຺ຂາຍ ຈິຕ຺ຕສ຺ສ ອຠິນີຫາໂຣ ນານຕ຺ຕໍ ໂຫຕິ ຕິຕ຺ຕຏ຺ເຐນ ຈ ອຕິຕ຺ຕຏ຺ເຐນ ຈ.

ກຖໍ ປຸຖຸຊ຺ຊນສ຺ສ ຈ ເສກ຺ຂສ຺ສ ຈ ວີຕຣາຄສ຺ສ ຈ ສງ຺ຂາຣຸເປກ຺ຂາຍ ຈິຕ຺ຕສ຺ສ ອຠິນີຫາໂຣ ນານຕ຺ຕໍ ໂຫຕິ? ປຸຖຸຊ຺ຊໂນ ສງ຺ຂາຣຸເປກ຺ຂໍ ຕິຓ຺ຓໍ ສໍໂຍຊນານໍ ປຫານາຍ ໂສຕາປຕ຺ຕິມຄ຺ຄໍ ປຏິລາຠຕ຺ຖາຍ ວິປສ຺ສຕິ. ເສກ຺ໂຂ ສງ຺ຂາຣຸເປກ຺ຂໍ ຕິຓ຺ຓໍ ສຎ຺ໂຎຊນານໍ ປຫີນຕ຺ຕາ ອຸຕ຺ຕຣິປຏິລາຠຕ຺ຖາຍ ວິປສ຺ສຕິ. ວີຕຣາໂຄ ສງ຺ຂາຣຸເປກ຺ຂໍ ສພ຺ພກິເລສານໍ ປຫີນຕ຺ຕາ ທິຏ຺ຐຘມ຺ມສຸຂວິຫາຣຕ຺ຖາຍ ວິປສ຺ສຕິ. ເອວໍ ປຸຖຸຊ຺ຊນສ຺ສ ຈ ເສກ຺ຂສ຺ສ ຈ ວີຕຣາຄສ຺ສ ຈ ສງ຺ຂາຣຸເປກ຺ຂາຍ ຈິຕ຺ຕສ຺ສ ອຠິນີຫາໂຣ ນານຕ຺ຕໍ ໂຫຕິ ປຫີນຏ຺ເຐນ ຈ ອປ຺ປຫີນຏ຺ເຐນ ຈ.

ກຖໍ ເສກ຺ຂສ຺ສ ຈ ວີຕຣາຄສ຺ສ ຈ ສງ຺ຂາຣຸເປກ຺ຂາຍ ຈິຕ຺ຕສ຺ສ ອຠິນີຫາໂຣ ນານຕ຺ຕໍ ໂຫຕິ? ເສກ຺ໂຂ ສງ຺ຂາຣຸເປກ຺ຂໍ ອຠິນນ຺ທຕິ ວາ ວິປສ຺ສຕິ ວາ ປຏິສງ຺ຂາຍ ວາ ຜລສມາປຕ຺ຕິໍ ສມາປຊ຺ຊຕິ. ວີຕຣາໂຄ ສງ຺ຂາຣຸເປກ຺ຂໍ ວິປສ຺ສຕິ ວາ ປຏິສງ຺ຂາຍ ວາ ຜລສມາປຕ຺ຕິໍ ສມາປຊ຺ຊຕິ, ຕທຊ຺ຌຸເປກ຺ຂິຕ຺ວາ ສຸຎ຺ຎຕວິຫາເຣນ ວາ ອນິມິຕ຺ຕວິຫາເຣນ ວາ ອປ຺ປຓິຫິຕວິຫາເຣນ ວາ ວິຫຣຕິ. ເອວໍ ເສກ຺ຂສ຺ສ ຈ ວີຕຣາຄສ຺ສ ຈ ສງ຺ຂາຣຸເປກ຺ຂາຍ ຈິຕ຺ຕສ຺ສ ອຠິນີຫາໂຣ ນານຕ຺ຕໍ ໂຫຕິ ວິຫາຣສມາປຕ຺ຕຏ຺ເຐນ.

໕໗. ກຕິ ສງ຺ຂາຣຸເປກ຺ຂາ ສມຖວເສນ ອຸປ຺ປຊ຺ຊນ຺ຕິ? ກຕິ ສງ຺ຂາຣຸເປກ຺ຂາ ວິປສ຺ສນາວເສນ ອຸປ຺ປຊ຺ຊນ຺ຕິ? ອຏ຺ຐ ສງ຺ຂາຣຸເປກ຺ຂາ ສມຖວເສນ ອຸປ຺ປຊ຺ຊນ຺ຕິ. ທສ ສງ຺ຂາຣຸເປກ຺ຂາ ວິປສ຺ສນາວເສນ ອຸປ຺ປຊ຺ຊນ຺ຕິ.

ກຕມາ ອຏ຺ຐ ສງ຺ຂາຣຸເປກ຺ຂາ ສມຖວເສນ ອຸປ຺ປຊ຺ຊນ຺ຕິ? ປຐມໍ ຌານໍ ປຏິລາຠຕ຺ຖາຍ ນີວຣເຓ ປຏິສງ຺ຂາສນ຺ຕິຏ຺ຐນາ ປຎ຺ຎາ ສງ຺ຂາຣຸເປກ຺ຂາສຸ ຎາຓໍ. ທຸຕິຍໍ ຌານໍ ປຏິລາຠຕ຺ຖາຍ ວິຕກ຺ກວິຈາເຣ ປຏິສງ຺ຂາສນ຺ຕິຏ຺ຐນາ ປຎ຺ຎາ ສງ຺ຂາຣຸເປກ຺ຂາສຸ ຎາຓໍ. ຕຕິຍໍ ຌານໍ ປຏິລາຠຕ຺ຖາຍ ປີຕິໍ ປຏິສງ຺ຂາສນ຺ຕິຏ຺ຐນາ ປຎ຺ຎາ ສງ຺ຂາຣຸເປກ຺ຂາສຸ ຎາຓໍ. ຈຕຸຕ຺ຖໍ ຌານໍ ປຏິລາຠຕ຺ຖາຍ ສຸຂທຸກ຺ເຂ ປຏິສງ຺ຂາສນ຺ຕິຏ຺ຐນາ ປຎ຺ຎາ ສງ຺ຂາຣຸເປກ຺ຂາສຸ ຎາຓໍ. ອາກາສານຎ຺ຈາຍຕນສມາປຕ຺ຕິໍ ປຏິລາຠຕ຺ຖາຍ ຣູປສຎ຺ຎໍ ປຏິຆສຎ຺ຎໍ ນານຕ຺ຕສຎ຺ຎໍ ປຏິສງ຺ຂາສນ຺ຕິຏ຺ຐນາ ປຎ຺ຎາ ສງ຺ຂາຣຸເປກ຺ຂາສຸ ຎາຓໍ. ວິຎ຺ຎາຓຎ຺ຈາຍຕນສມາປຕ຺ຕິໍ ປຏິລາຠຕ຺ຖາຍ ອາກາສານຎ຺ຈາຍຕນສຎ຺ຎໍ ປຏິສງ຺ຂາສນ຺ຕິຏ຺ຐນາ ປຎ຺ຎາ ສງ຺ຂາຣຸເປກ຺ຂາສຸ ຎາຓໍ. ອາກິຎ຺ຈຎ຺ຎາຍຕນສມາປຕ຺ຕິໍ ປຏິລາຠຕ຺ຖາຍ ວິຎ຺ຎາຓຎ຺ຈາຍຕນສຎ຺ຎໍ ປຏິສງ຺ຂາສນ຺ຕິຏ຺ຐນາ ປຎ຺ຎາ ສງ຺ຂາຣຸເປກ຺ຂາສຸ ຎາຓໍ. ເນວສຎ຺ຎານາສຎ຺ຎາຍຕນສມາປຕ຺ຕິໍ ປຏິລາຠຕ຺ຖາຍ ອາກິຎ຺ຈຎ຺ຎາຍຕນສຎ຺ຎໍ ປຏິສງ຺ຂາສນ຺ຕິຏ຺ຐນາ ປຎ຺ຎາ ສງ຺ຂາຣຸເປກ຺ຂາສຸ ຎາຓໍ. ອິມາ ອຏ຺ຐ ສງ຺ຂາຣຸເປກ຺ຂາ ສມຖວເສນ ອຸປ຺ປຊ຺ຊນ຺ຕິ.

ກຕມາ ທສ ສງ຺ຂາຣຸເປກ຺ຂາ ວິປສ຺ສນາວເສນ ອຸປ຺ປຊ຺ຊນ຺ຕິ? ໂສຕາປຕ຺ຕິມຄ຺ຄໍ ປຏິລາຠຕ຺ຖາຍ ອຸປ຺ປາທໍ ປວຕ຺ຕໍ ນິມິຕ຺ຕໍ ອາຍູຫນໍ ປຏິສນ຺ຘິໍ ຄຕິໍ ນິພ຺ພຕ຺ຕິໍ ອຸປປຕ຺ຕິໍ ຊາຕິໍ ຊຣໍ ພ຺ຍາຘິໍ ມຣຓໍ ໂສກໍ ປຣິເທວໍ ອຸປາຍາສໍ ປຏິສງ຺ຂາສນ຺ຕິຏ຺ຐນາ ປຎ຺ຎາ ສງ຺ຂາຣຸເປກ຺ຂາສຸ ຎາຓໍ. ໂສຕາປຕ຺ຕິຜລສມາປຕ຺ຕຕ຺ຖາຍ ອຸປ຺ປາທໍ ປວຕ຺ຕໍ ນິມິຕ຺ຕໍ ອາຍູຫນໍ ປຏິສນ຺ຘິໍ…ເປ… ປຏິສງ຺ຂາສນ຺ຕິຏ຺ຐນາ ປຎ຺ຎາ ສງ຺ຂາຣຸເປກ຺ຂາສຸ ຎາຓໍ. ສກທາຄາມິມຄ຺ຄໍ ປຏິລາຠຕ຺ຖາຍ…ເປ… ສກທາຄາມິຜລສມາປຕ຺ຕຕ຺ຖາຍ…ເປ… ອນາຄາມິມຄ຺ຄໍ ປຏິລາຠຕ຺ຖາຍ…ເປ… ອນາຄາມິຜລສມາປຕ຺ຕຕ຺ຖາຍ …ເປ… ອຣຫຕ຺ຕມຄ຺ຄໍ ປຏິລາຠຕ຺ຖາຍ ອຸປ຺ປາທໍ ປວຕ຺ຕໍ ນິມິຕ຺ຕໍ ອາຍູຫນໍ ປຏິສນ຺ຘິໍ ຄຕິໍ ນິພ຺ພຕ຺ຕິໍ ອຸປປຕ຺ຕິໍ ຊາຕິໍ ຊຣໍ ພ຺ຍາຘິໍ ມຣຓໍ ໂສກໍ ປຣິເທວໍ ອຸປາຍາສໍ ປຏິສງ຺ຂາສນ຺ຕິຏ຺ຐນາ ປຎ຺ຎາ ສງ຺ຂາຣຸເປກ຺ຂາສຸ ຎາຓໍ. ອຣຫຕ຺ຕຜລສມາປຕ຺ຕຕ຺ຖາຍ…ເປ… ສຸຎ຺ຎຕວິຫາຣສມາປຕ຺ຕຕ຺ຖາຍ…ເປ… ອນິມິຕ຺ຕວິຫາຣສມາປຕ຺ຕຕ຺ຖາຍ ອຸປ຺ປາທໍ ປວຕ຺ຕໍ ນິມິຕ຺ຕໍ ອາຍູຫນໍ ປຏິສນ຺ຘິໍ…ເປ… ປຏິສງ຺ຂາສນ຺ຕິຏ຺ຐນາ ປຎ຺ຎາ ສງ຺ຂາຣຸເປກ຺ຂາສຸ ຎາຓໍ. ອິມາ ທສ ສງ຺ຂາຣຸເປກ຺ຂາ ວິປສ຺ສນາວເສນ ອຸປ຺ປຊ຺ຊນ຺ຕິ.

໕໘. ກຕິ ສງ຺ຂາຣຸເປກ຺ຂາ ກຸສລາ, ກຕິ ອກຸສລາ, ກຕິ ອພ຺ຍາກຕາ? ປນ຺ນຣສ ສງ຺ຂາຣຸເປກ຺ຂາ ກຸສລາ, ຕິສ຺ໂສ ສງ຺ຂາຣຸເປກ຺ຂາ ອພ຺ຍາກຕາ. ນຕ຺ຖິ ສງ຺ຂາຣຸເປກ຺ຂາ ອກຸສລາ.

ປຏິສງ຺ຂາສນ຺ຕິຏ຺ຐນາ ປຎ຺ຎາ, ອຏ຺ຐ ຈິຕ຺ຕສ຺ສ ໂຄຈຣາ;

ປຸຖຸຊ຺ຊນສ຺ສ ທ຺ເວ ໂຫນ຺ຕິ, ຕໂຍ ເສກ຺ຂສ຺ສ ໂຄຈຣາ;

ຕໂຍ ຈ ວີຕຣາຄສ຺ສ, ເຍຫິ ຈິຕ຺ຕໍ ວິວຏ຺ຏຕິ.

ອຏ຺ຐ ສມາຘິສ຺ສ ປຈ຺ຈຍາ, ທສ ຎາຓສ຺ສ ໂຄຈຣາ;

ອຏ຺ຐາຣສ ສງ຺ຂາຣຸເປກ຺ຂາ, ຕິຓ຺ຓໍ ວິໂມກ຺ຂານ ປຈ຺ຈຍາ.

ອິເມ ອຏ຺ຐາຣສາກາຣາ, ປຎ຺ຎາ ຍສ຺ສ ປຣິຈ຺ຈິຕາ;

ກຸສໂລ ສງ຺ຂາຣຸເປກ຺ຂາສຸ, ນານາທິຏ຺ຐີສຸ ນ ກມ຺ປຕີຕິ.

ຕໍ ຎາຕຏ຺ເຐນ ຎາຓໍ, ປຊານນຏ຺ເຐນ ປຎ຺ຎາ. ເຕນ ວຸຈ຺ຈຕິ – ‘‘ມຸຎ຺ຈິຕຸກມ຺ຍຕາປຏິສງ຺ຂາສນ຺ຕິຏ຺ຐນາ ປຎ຺ຎາ ສງ຺ຂາຣຸເປກ຺ຂາສຸ ຎາຓໍ’’.

ສງ຺ຂາຣຸເປກ຺ຂາຎາຓນິທ຺ເທໂສ ນວໂມ.