໑໐. ໂຄຕ຺ຣຠຸຎາຓນິທ຺ເທໂສ

໕໙. ກຖໍ ພຫິທ຺ຘາ ວຸຏ຺ຐານວິວຏ຺ຏເນ ປຎ຺ຎາ ໂຄຕ຺ຣຠຸຎາຓໍ? ອຸປ຺ປາທໍ ອຠິຠຸຍ຺ຍຕີຕິ – ໂຄຕ຺ຣຠຸ. ປວຕ຺ຕໍ ອຠິຠຸຍ຺ຍຕີຕິ – ໂຄຕ຺ຣຠຸ. ນິມິຕ຺ຕໍ ອຠິຠຸຍ຺ຍຕີຕິ – ໂຄຕ຺ຣຠຸ. ອາຍູຫນໍ ອຠິຠຸຍ຺ຍຕີຕິ – ໂຄຕ຺ຣຠຸ. ປຏິສນ຺ຘິໍ ອຠິຠຸຍ຺ຍຕີຕິ – ໂຄຕ຺ຣຠຸ. ຄຕິໍ ອຠິຠຸຍ຺ຍຕີຕິ – ໂຄຕ຺ຣຠຸ. ນິພ຺ພຕ຺ຕິໍ ອຠິຠຸຍ຺ຍຕີຕິ – ໂຄຕ຺ຣຠຸ. ອຸປປຕ຺ຕິໍ ອຠິຠຸຍ຺ຍຕີຕິ – ໂຄຕ຺ຣຠຸ. ຊາຕິໍ ອຠິຠຸຍ຺ຍຕີຕິ – ໂຄຕ຺ຣຠຸ. ຊຣໍ ອຠິຠຸຍ຺ຍຕີຕິ – ໂຄຕ຺ຣຠຸ. ພ຺ຍາຘິໍ ອຠິຠຸຍ຺ຍຕີຕິ – ໂຄຕ຺ຣຠຸ. ມຣຓໍ ອຠິຠຸຍ຺ຍຕີຕິ – ໂຄຕ຺ຣຠຸ. ໂສກໍ ອຠິຠຸຍ຺ຍຕີຕິ – ໂຄຕ຺ຣຠຸ. ປຣິເທວໍ ອຠິຠຸຍ຺ຍຕີຕິ – ໂຄຕ຺ຣຠຸ. ອຸປາຍາສໍ ອຠິຠຸຍ຺ຍຕີຕິ – ໂຄຕ຺ຣຠຸ. ພຫິທ຺ຘາ ສງ຺ຂາຣນິມິຕ຺ຕໍ ອຠິຠຸຍ຺ຍຕີຕິ – ໂຄຕ຺ຣຠຸ. ອນຸປ຺ປາທໍ ປກ຺ຂນ຺ທຕີຕິ – ໂຄຕ຺ຣຠຸ. ອປ຺ປວຕ຺ຕໍ ປກ຺ຂນ຺ທຕີຕິ – ໂຄຕ຺ຣຠຸ…ເປ… ນິໂຣຘໍ ນິພ຺ພານໍ ປກ຺ຂນ຺ທຕີຕິ – ໂຄຕ຺ຣຠຸ.

ອຸປ຺ປາທໍ ອຠິຠຸຍ຺ຍິຕ຺ວາ ອນຸປ຺ປາທໍ ປກ຺ຂນ຺ທຕີຕິ – ໂຄຕ຺ຣຠຸ. ປວຕ຺ຕໍ ອຠິຠຸຍ຺ຍິຕ຺ວາ ອປ຺ປວຕ຺ຕໍ ປກ຺ຂນ຺ທຕີຕິ – ໂຄຕ຺ຣຠຸ. ນິມິຕ຺ຕໍ ອຠິຠຸຍ຺ຍິຕ຺ວາ ອນິມິຕ຺ຕໍ ປກ຺ຂນ຺ທຕີຕິ – ໂຄຕ຺ຣຠຸ …ເປ… ພຫິທ຺ຘາ ສງ຺ຂາຣນິມິຕ຺ຕໍ ອຠິຠຸຍ຺ຍິຕ຺ວາ ນິໂຣຘໍ ນິພ຺ພານໍ ປກ຺ຂນ຺ທຕີຕິ – ໂຄຕ຺ຣຠຸ.

ອຸປ຺ປາທາ ວຸຏ຺ຐາຕີຕິ – ໂຄຕ຺ຣຠຸ. ປວຕ຺ຕາ ວຸຏ຺ຐາຕີຕິ – ໂຄຕ຺ຣຠຸ. ນິມິຕ຺ຕາ ວຸຏ຺ຐາຕີຕິ – ໂຄຕ຺ຣຠຸ. ອາຍູຫນາ ວຸຏ຺ຐາຕີຕິ – ໂຄຕ຺ຣຠຸ. ປຏິສນ຺ຘິຍາ ວຸຏ຺ຐາຕີຕິ – ໂຄຕ຺ຣຠຸ. ຄຕິຍາ ວຸຏ຺ຐາຕີຕິ – ໂຄຕ຺ຣຠຸ. ນິພ຺ພຕ຺ຕິຍາ ວຸຏ຺ຐາຕີຕິ – ໂຄຕ຺ຣຠຸ. ອຸປປຕ຺ຕິຍາ ວຸຏ຺ຐາຕີຕິ – ໂຄຕ຺ຣຠຸ. ຊາຕິຍາ ວຸຏ຺ຐາຕີຕິ – ໂຄຕ຺ຣຠຸ. ຊຣາຍ ວຸຏ຺ຐາຕີຕິ – ໂຄຕ຺ຣຠຸ. ພ຺ຍາຘິມ຺ຫາ ວຸຏ຺ຐາຕີຕິ – ໂຄຕ຺ຣຠຸ. ມຣຓາ ວຸຏ຺ຐາຕີຕິ – ໂຄຕ຺ຣຠຸ. ໂສກາ ວຸຏ຺ຐາຕີຕິ – ໂຄຕ຺ຣຠຸ. ປຣິເທວາ ວຸຏ຺ຐາຕີຕິ – ໂຄຕ຺ຣຠຸ. ອຸປາຍາສາ ວຸຏ຺ຐາຕີຕິ – ໂຄຕ຺ຣຠຸ. ພຫິທ຺ຘາ ສງ຺ຂາຣນິມິຕ຺ຕາ ວຸຏ຺ຐາຕີຕິ – ໂຄຕ຺ຣຠຸ. ອນຸປ຺ປາທໍ ປກ຺ຂນ຺ທຕີຕິ – ໂຄຕ຺ຣຠຸ. ອປ຺ປວຕ຺ຕໍ ປກ຺ຂນ຺ທຕີຕິ – ໂຄຕ຺ຣຠຸ…ເປ… ນິໂຣຘໍ ນິພ຺ພານໍ ປກ຺ຂນ຺ທຕີຕິ – ໂຄຕ຺ຣຠຸ.

ອຸປ຺ປາທາ ວຸຏ຺ຐຫິຕ຺ວາ [ວຸຏ຺ຐິຕ຺ວາ (ສ຺ຍາ. ກ.)] ອນຸປ຺ປາທໍ ປກ຺ຂນ຺ທຕີຕິ – ໂຄຕ຺ຣຠຸ. ປວຕ຺ຕາ ວຸຏ຺ຐຫິຕ຺ວາ ອປ຺ປວຕ຺ຕໍ ປກ຺ຂນ຺ທຕີຕິ – ໂຄຕ຺ຣຠຸ. ນິມິຕ຺ຕາ ວຸຏ຺ຐຫິຕ຺ວາ ອນິມິຕ຺ຕໍ ປກ຺ຂນ຺ທຕີຕິ – ໂຄຕ຺ຣຠຸ. ອາຍູຫນາ ວຸຏ຺ຐຫິຕ຺ວາ ອນາຍູຫນໍ ປກ຺ຂນ຺ທຕີຕິ – ໂຄຕ຺ຣຠຸ. ປຏິສນ຺ຘິຍາ ວຸຏ຺ຐຫິຕ຺ວາ ອປ຺ປຏິສນ຺ຘິໍ ປກ຺ຂນ຺ທຕີຕິ – ໂຄຕ຺ຣຠຸ. ຄຕິຍາ ວຸຏ຺ຐຫິຕ຺ວາ ອຄຕິໍ ປກ຺ຂນ຺ທຕີຕິ – ໂຄຕ຺ຣຠຸ. ນິພ຺ພຕ຺ຕິຍາ ວຸຏ຺ຐຫິຕ຺ວາ ອນິພ຺ພຕ຺ຕິໍ ປກ຺ຂນ຺ທຕີຕິ – ໂຄຕ຺ຣຠຸ. ອຸປປຕ຺ຕິຍາ ວຸຏ຺ຐຫິຕ຺ວາ ອນຸປປຕ຺ຕິໍ ປກ຺ຂນ຺ທຕີຕິ – ໂຄຕ຺ຣຠຸ. ຊາຕິຍາ ວຸຏ຺ຐຫິຕ຺ວາ ອຊາຕິໍ ປກ຺ຂນ຺ທຕີຕິ – ໂຄຕ຺ຣຠຸ. ຊຣາຍ ວຸຏ຺ຐຫິຕ຺ວາ ອຊຣໍ ປກ຺ຂນ຺ທຕີຕິ – ໂຄຕ຺ຣຠຸ. ພ຺ຍາຘິມ຺ຫາ ວຸຏ຺ຐຫິຕ຺ວາ ອພ຺ຍາຘິໍ ປກ຺ຂນ຺ທຕີຕິ – ໂຄຕ຺ຣຠຸ. ມຣຓາ ວຸຏ຺ຐຫິຕ຺ວາ ອມຕໍ ປກ຺ຂນ຺ທຕີຕິ – ໂຄຕ຺ຣຠຸ. ໂສກາ ວຸຏ຺ຐຫິຕ຺ວາ ອໂສກໍ ປກ຺ຂນ຺ທຕີຕິ – ໂຄຕ຺ຣຠຸ. ປຣິເທວາ ວຸຏ຺ຐຫິຕ຺ວາ ອປຣິເທວໍ ປກ຺ຂນ຺ທຕີຕິ – ໂຄຕ຺ຣຠຸ. ອຸປາຍາສາ ວຸຏ຺ຐຫິຕ຺ວາ ອນຸປາຍາສໍ ປກ຺ຂນ຺ທຕີຕິ – ໂຄຕ຺ຣຠຸ. ພຫິທ຺ຘາ ສງ຺ຂາຣນິມິຕ຺ຕາ ວຸຏ຺ຐຫິຕ຺ວາ ນິໂຣຘໍ ນິພ຺ພານໍ ປກ຺ຂນ຺ທຕີຕິ – ໂຄຕ຺ຣຠຸ.

ອຸປ຺ປາທາ ວິວຏ຺ຏຕີຕິ – ໂຄຕ຺ຣຠຸ. ປວຕ຺ຕາ ວິວຏ຺ຏຕີຕິ – ໂຄຕ຺ຣຠຸ…ເປ… ພຫິທ຺ຘາ ສງ຺ຂາຣນິມິຕ຺ຕາ ວິວຏ຺ຏຕີຕິ – ໂຄຕ຺ຣຠຸ. ອນຸປ຺ປາທໍ ປກ຺ຂນ຺ທຕີຕິ – ໂຄຕ຺ຣຠຸ. ອປ຺ປວຕ຺ຕໍ ປກ຺ຂນ຺ທຕີຕິ – ໂຄຕ຺ຣຠຸ…ເປ… ນິໂຣຘໍ ນິພ຺ພານໍ ປກ຺ຂນ຺ທຕີຕິ – ໂຄຕ຺ຣຠຸ.

ອຸປ຺ປາທາ ວິວຏ຺ຏິຕ຺ວາ ອນຸປ຺ປາທໍ ປກ຺ຂນ຺ທຕີຕິ – ໂຄຕ຺ຣຠຸ. ປວຕ຺ຕາ ວິວຏ຺ຏິຕ຺ວາ ອປ຺ປວຕ຺ຕໍ ປກ຺ຂນ຺ທຕີຕິ – ໂຄຕ຺ຣຠຸ…ເປ… ພຫິທ຺ຘາ ສງ຺ຂາຣນິມິຕ຺ຕາ ວິວຏ຺ຏິຕ຺ວາ ນິໂຣຘໍ ນິພ຺ພານໍ ປກ຺ຂນ຺ທຕີຕິ – ໂຄຕ຺ຣຠຸ.

໖໐. ກຕິ ໂຄຕ຺ຣຠູ ຘມ຺ມາ ສມຖວເສນ ອຸປ຺ປຊ຺ຊນ຺ຕິ? ກຕິ ໂຄຕ຺ຣຠູ ຘມ຺ມາ ວິປສ຺ສນາວເສນ ອຸປ຺ປຊ຺ຊນ຺ຕິ? ອຏ຺ຐ ໂຄຕ຺ຣຠູ ຘມ຺ມາ ສມຖວເສນ ອຸປ຺ປຊ຺ຊນ຺ຕິ. ທສ ໂຄຕ຺ຣຠູ ຘມ຺ມາ ວິປສ຺ສນາວເສນ ອຸປ຺ປຊ຺ຊນ຺ຕິ.

ກຕເມ ອຏ຺ຐ ໂຄຕ຺ຣຠູ ຘມ຺ມາ ສມຖວເສນ ອຸປ຺ປຊ຺ຊນ຺ຕິ? ປຐມໍ ຌານໍ ປຏິລາຠຕ຺ຖາຍ ນີວຣເຓ ອຠິຠຸຍ຺ຍຕີຕິ – ໂຄຕ຺ຣຠຸ. ທຸຕິຍໍ ຌານໍ ປຏິລາຠຕ຺ຖາຍ ວິຕກ຺ກວິຈາເຣ ອຠິຠຸຍ຺ຍຕີຕິ – ໂຄຕ຺ຣຠຸ. ຕຕິຍໍ ຌານໍ ປຏິລາຠຕ຺ຖາຍ ປີຕິໍ ອຠິຠຸຍ຺ຍຕີຕິ – ໂຄຕ຺ຣຠຸ. ຈຕຸຕ຺ຖໍ ຌານໍ ປຏິລາຠຕ຺ຖາຍ ສຸຂທຸກ຺ເຂ ອຠິຠຸຍ຺ຍຕີຕິ – ໂຄຕ຺ຣຠຸ. ອາກາສານຎ຺ຈາຍຕນສມາປຕ຺ຕິໍ ປຏິລາຠຕ຺ຖາຍ ຣູປສຎ຺ຎໍ ປຏິຆສຎ຺ຎໍ ນານຕ຺ຕສຎ຺ຎໍ ອຠິຠຸຍ຺ຍຕີຕິ – ໂຄຕ຺ຣຠຸ. ວິຎ຺ຎາຓຎ຺ຈາຍຕນສມາປຕ຺ຕິໍ ປຏິລາຠຕ຺ຖາຍ ອາກາສານຎ຺ຈາຍຕນສຎ຺ຎໍ ອຠິຠຸຍ຺ຍຕີຕິ – ໂຄຕ຺ຣຠຸ. ອາກິຎ຺ຈຎ຺ຎາຍຕນສມາປຕ຺ຕິໍ ປຏິລາຠຕ຺ຖາຍ ວິຎ຺ຎາຓຎ຺ຈາຍຕນສຎ຺ຎໍ ອຠິຠຸຍ຺ຍຕີຕິ – ໂຄຕ຺ຣຠຸ. ເນວສຎ຺ຎານາສຎ຺ຎາຍຕນສມາປຕ຺ຕິໍ ປຏິລາຠຕ຺ຖາຍ ອາກິຎ຺ຈຎ຺ຎາຍຕນສຎ຺ຎໍ ອຠິຠຸຍ຺ຍຕີຕິ – ໂຄຕ຺ຣຠຸ. ອິເມ ອຏ຺ຐ ໂຄຕ຺ຣຠູ ຘມ຺ມາ ສມຖວເສນ ອຸປ຺ປຊ຺ຊນ຺ຕິ.

ກຕເມ ທສ ໂຄຕ຺ຣຠູ ຘມ຺ມາ ວິປສ຺ສນາວເສນ ອຸປ຺ປຊ຺ຊນ຺ຕິ? ໂສຕາປຕ຺ຕິມຄ຺ຄໍ ປຏິລາຠຕ຺ຖາຍ ອຸປ຺ປາທໍ ປວຕ຺ຕໍ ນິມິຕ຺ຕໍ ອາຍູຫນໍ ປຏິສນ຺ຘິໍ ຄຕິໍ ນິພ຺ພຕ຺ຕິໍ ອຸປປຕ຺ຕິໍ ຊາຕິໍ ຊຣໍ ພ຺ຍາຘິໍ ມຣຓໍ ໂສກໍ ປຣິເທວໍ ອຸປາຍາສໍ ພຫິທ຺ຘາ ສງ຺ຂາຣນິມິຕ຺ຕໍ ອຠິຠຸຍ຺ຍຕີຕິ – ໂຄຕ຺ຣຠຸ. ໂສຕາປຕ຺ຕິຜລສມາປຕ຺ຕຕ຺ຖາຍ ອຸປ຺ປາທໍ ປວຕ຺ຕໍ ນິມິຕ຺ຕໍ ອາຍູຫນໍ ປຏິສນ຺ຘິໍ…ເປ… ອຠິຠຸຍ຺ຍຕີຕິ – ໂຄຕ຺ຣຠຸ. ສກທາຄາມິມຄ຺ຄໍ ປຏິລາຠຕ຺ຖາຍ…ເປ… ສກທາຄາມິຜລສມາປຕ຺ຕຕ຺ຖາຍ… ອນາຄາມິມຄ຺ຄໍ ປຏິລາຠຕ຺ຖາຍ… ອນາຄາມິຜລສມາປຕ຺ຕຕ຺ຖາຍ… ອຣຫຕ຺ຕມຄ຺ຄໍ ປຏິລາຠຕ຺ຖາຍ ອຸປ຺ປາທໍ ປວຕ຺ຕໍ ນິມິຕ຺ຕໍ ອາຍູຫນໍ ປຏິສນ຺ຘິໍ ຄຕິໍ ນິພ຺ພຕ຺ຕິໍ ອຸປປຕ຺ຕິໍ ຊາຕິໍ ຊຣໍ ພ຺ຍາຘິໍ ມຣຓໍ ໂສກໍ ປຣິເທວໍ ອຸປາຍາສໍ ພຫິທ຺ຘາ ສງ຺ຂາຣນິມິຕ຺ຕໍ ອຠິຠຸຍ຺ຍຕີຕິ – ໂຄຕ຺ຣຠຸ. ອຣຫຕ຺ຕຜລສມາປຕ຺ຕຕ຺ຖາຍ… ສຸຎ຺ຎຕວິຫາຣສມາປຕ຺ຕຕ຺ຖາຍ… ອນິມິຕ຺ຕວິຫາຣສມາປຕ຺ຕຕ຺ຖາຍ ອຸປ຺ປາທໍ ປວຕ຺ຕໍ ນິມິຕ຺ຕໍ ອາຍູຫນໍ ປຏິສນ຺ຘິໍ…ເປ… ອຠິຠຸຍ຺ຍຕີຕິ – ໂຄຕ຺ຣຠຸ. ອິເມ ທສ ໂຄຕ຺ຣຠູ ຘມ຺ມາ ວິປສ຺ສນາວເສນ ອຸປ຺ປຊ຺ຊນ຺ຕິ.

ກຕິ ໂຄຕ຺ຣຠູ ຘມ຺ມາ ກຸສລາ, ກຕິ ອກຸສລາ, ກຕິ ອພ຺ຍາກຕາ? ປນ຺ນຣສ ໂຄຕ຺ຣຠູ ຘມ຺ມາ ກຸສລາ, ຕໂຍ ໂຄຕ຺ຣຠູ ຘມ຺ມາ ອພ຺ຍາກຕາ. ນຕ຺ຖິ ໂຄຕ຺ຣຠູ ຘມ຺ມາ ອກຸສລາຕິ.

ສາມິສຎ຺ຈ ນິຣາມິສໍ, ປຓິຫິຕຎ຺ຈ ອປ຺ປຓິຫິຕໍ;

ສຎ຺ຎຸຕ຺ຕຎ຺ຈ ວິສຎ຺ຎຸຕ຺ຕໍ, ວຸຏ຺ຐິຕຎ຺ຈ ອວຸຏ຺ຐິຕໍ.

ອຏ຺ຐ ສມາຘິສ຺ສ ປຈ຺ຈຍາ, ທສ ຎາຓສ຺ສ ໂຄຈຣາ;

ອຏ຺ຐາຣສ ໂຄຕ຺ຣຠູ ຘມ຺ມາ, ຕິຓ຺ຓໍ ວິໂມກ຺ຂານ ປຈ຺ຈຍາ.

ອິເມ ອຏ຺ຐາຣສາກາຣາ, ປຎ຺ຎາ ຍສ຺ສ ປຣິຈ຺ຈິຕາ;

ກຸສໂລ ວິວຏ຺ເຏ ວຸຏ຺ຐາເນ, ນານາທິຏ຺ຐີສຸ ນ ກມ຺ປຕີຕິ.

ຕໍ ຎາຕຏ຺ເຐນ ຎາຓໍ, ປຊານນຏ຺ເຐນ ປຎ຺ຎາ. ເຕນ ວຸຈ຺ຈຕິ – ‘‘ພຫິທ຺ຘາ ວຸຏ຺ຐານວິວຏ຺ຏເນ ປຎ຺ຎາ ໂຄຕ຺ຣຠຸຎາຓໍ’’.

ໂຄຕ຺ຣຠຸຎາຓນິທ຺ເທໂສ ທສໂມ.