໑໑. ມຄ຺ຄຎາຓນິທ຺ເທໂສ

໖໑. ກຖໍ ທຸຠໂຕ ວຸຏ຺ຐານວິວຏ຺ຏເນ ປຎ຺ຎາ ມຄ຺ເຄ ຎາຓໍ? ໂສຕາປຕ຺ຕິມຄ຺ຄກ຺ຂເຓ ທສ຺ສນຏ຺ເຐນ ສມ຺ມາທິຏ຺ຐິ ມິຈ຺ຉາທິຏ຺ຐິຍາ ວຸຏ຺ຐາຕິ, ຕທນຸວຕ຺ຕກກິເລເສຫິ ຈ ຂນ຺ເຘຫິ ຈ ວຸຏ຺ຐາຕິ, ພຫິທ຺ຘາ ຈ ສພ຺ພນິມິຕ຺ເຕຫິ ວຸຏ຺ຐາຕິ. ເຕນ ວຸຈ຺ຈຕິ – ‘‘ທຸຠໂຕ ວຸຏ຺ຐານວິວຏ຺ຏເນ ປຎ຺ຎາ ມຄ຺ເຄ ຎາຓໍ’’. ອຠິນິໂຣປນຏ຺ເຐນ ສມ຺ມາສງ຺ກປ຺ໂປ ມິຈ຺ຉາສງ຺ກປ຺ປາ ວຸຏ຺ຐາຕິ, ຕທນຸວຕ຺ຕກກິເລເສຫິ ຈ ຂນ຺ເຘຫິ ຈ ວຸຏ຺ຐາຕິ, ພຫິທ຺ຘາ ຈ ສພ຺ພນິມິຕ຺ເຕຫິ ວຸຏ຺ຐາຕິ. ເຕນ ວຸຈ຺ຈຕິ – ‘‘ທຸຠໂຕ ວຸຏ຺ຐານວິວຏ຺ຏເນ ປຎ຺ຎາ ມຄ຺ເຄ ຎາຓໍ’’.

ປຣິຄ຺ຄຫຏ຺ເຐນ ສມ຺ມາວາຈາ ມິຈ຺ຉາວາຈາຍ ວຸຏ຺ຐາຕິ, ຕທນຸວຕ຺ຕກກິເລເສຫິ ຈ ຂນ຺ເຘຫິ ຈ ວຸຏ຺ຐາຕິ, ພຫິທ຺ຘາ ຈ ສພ຺ພນິມິຕ຺ເຕຫິ ວຸຏ຺ຐາຕິ. ເຕນ ວຸຈ຺ຈຕິ – ‘‘ທຸຠໂຕ ວຸຏ຺ຐານວິວຏ຺ຏເນ ປຎ຺ຎາ ມຄ຺ເຄ ຎາຓໍ’’.

ສມຸຏ຺ຐານຏ຺ເຐນ ສມ຺ມາກມ຺ມນ຺ໂຕ ມິຈ຺ຉາກມ຺ມນ຺ຕາ ວຸຏ຺ຐາຕິ, ຕທນຸວຕ຺ຕກກິເລເສຫິ ຈ ຂນ຺ເຘຫິ ຈ ວຸຏ຺ຐາຕິ, ພຫິທ຺ຘາ ຈ ສພ຺ພນິມິຕ຺ເຕຫິ ວຸຏ຺ຐາຕິ. ເຕນ ວຸຈ຺ຈຕິ – ‘‘ທຸຠໂຕ ວຸຏ຺ຐານວິວຏ຺ຏເນ ປຎ຺ຎາ ມຄ຺ເຄ ຎາຓໍ’’.

ໂວທານຏ຺ເຐນ ສມ຺ມາອາຊີໂວ ມິຈ຺ຉາອາຊີວາ ວຸຏ຺ຐາຕິ, ຕທນຸວຕ຺ຕກກິເລເສຫິ ຈ ຂນ຺ເຘຫິ ຈ ວຸຏ຺ຐາຕິ, ພຫິທ຺ຘາ ຈ ສພ຺ພນິມິຕ຺ເຕຫິ ວຸຏ຺ຐາຕິ. ເຕນ ວຸຈ຺ຈຕິ – ‘‘ທຸຠໂຕ ວຸຏ຺ຐານວິວຏ຺ຏເນ ປຎ຺ຎາ ມຄ຺ເຄ ຎາຓໍ’’.

ປຄ຺ຄຫຏ຺ເຐນ ສມ຺ມາວາຍາໂມ ມິຈ຺ຉາວາຍາມາ ວຸຏ຺ຐາຕິ, ຕທນຸວຕ຺ຕກກິເລເສຫິ ຈ ຂນ຺ເຘຫິ ຈ ວຸຏ຺ຐາຕິ, ພຫິທ຺ຘາ ຈ ສພ຺ພນິມິຕ຺ເຕຫິ ວຸຏ຺ຐາຕິ. ເຕນ ວຸຈ຺ຈຕິ – ‘‘ທຸຠໂຕ ວຸຏ຺ຐານວິວຏ຺ຏເນ ປຎ຺ຎາ ມຄ຺ເຄ ຎາຓໍ’’.

ອຸປຏ຺ຐານຏ຺ເຐນ ສມ຺ມາສຕິ ມິຈ຺ຉາສຕິຍາ ວຸຏ຺ຐາຕິ, ຕທນຸວຕ຺ຕກກິເລເສຫິ ຈ ຂນ຺ເຘຫິ ຈ ວຸຏ຺ຐາຕິ, ພຫິທ຺ຘາ ຈ ສພ຺ພນິມິຕ຺ເຕຫິ ວຸຏ຺ຐາຕິ. ເຕນ ວຸຈ຺ຈຕິ – ‘‘ທຸຠໂຕ ວຸຏ຺ຐານວິວຏ຺ຏເນ ປຎ຺ຎາ ມຄ຺ເຄ ຎາຓໍ’’.

ອວິກ຺ເຂປຏ຺ເຐນ ສມ຺ມາສມາຘິ ມິຈ຺ຉາສມາຘິໂຕ ວຸຏ຺ຐາຕິ, ຕທນຸວຕ຺ຕກກິເລເສຫິ ຈ ຂນ຺ເຘຫິ ຈ ວຸຏ຺ຐາຕິ, ພຫິທ຺ຘາ ຈ ສພ຺ພນິມິຕ຺ເຕຫິ ວຸຏ຺ຐາຕິ. ເຕນ ວຸຈ຺ຈຕິ – ‘‘ທຸຠໂຕ ວຸຏ຺ຐານວິວຏ຺ຏເນ ປຎ຺ຎາ ມຄ຺ເຄ ຎາຓໍ’’.

ສກທາຄາມິມຄ຺ຄກ຺ຂເຓ ທສ຺ສນຏ຺ເຐນ ສມ຺ມາທິຏ຺ຐິ …ເປ… ອວິກ຺ເຂປຏ຺ເຐນ ສມ຺ມາສມາຘິ ໂອຬາຣິກາ ກາມຣາຄສຎ຺ໂຎຊນາ ປຏິຆສຎ຺ໂຎຊນາ ໂອຬາຣິກາ ກາມຣາຄານຸສຍາ ປຏິຆານຸສຍາ ວຸຏ຺ຐາຕິ, ຕທນຸວຕ຺ຕກກິເລເສຫິ ຈ ຂນ຺ເຘຫິ ຈ ວຸຏ຺ຐາຕິ, ພຫິທ຺ຘາ ຈ ສພ຺ພນິມິຕ຺ເຕຫິ ວຸຏ຺ຐາຕິ. ເຕນ ວຸຈ຺ຈຕິ – ‘‘ທຸຠໂຕ ວຸຏ຺ຐານວິວຏ຺ຏເນ ປຎ຺ຎາ ມຄ຺ເຄ ຎາຓໍ’’.

ອນາຄາມິມຄ຺ຄກ຺ຂເຓ ທສ຺ສນຏ຺ເຐນ ສມ຺ມາທິຏ຺ຐິ…ເປ… ອວິກ຺ເຂປຏ຺ເຐນ ສມ຺ມາສມາຘິ ອນຸສຫຄຕາ ກາມຣາຄສຎ຺ໂຎຊນາ ປຏິຆສຎ຺ໂຎຊນາ ອນຸສຫຄຕາ ກາມຣາຄານຸສຍາ ປຏິຆານຸສຍາ ວຸຏ຺ຐາຕິ, ຕທນຸວຕ຺ຕກກິເລເສຫິ ຈ ຂນ຺ເຘຫິ ຈ ວຸຏ຺ຐາຕິ, ພຫິທ຺ຘາ ຈ ສພ຺ພນິມິຕ຺ເຕຫິ ວຸຏ຺ຐາຕິ. ເຕນ ວຸຈ຺ຈຕິ – ‘‘ທຸຠໂຕ ວຸຏ຺ຐານວິວຏ຺ຏເນ ປຎ຺ຎາ ມຄ຺ເຄ ຎາຓໍ’’.

ອຣຫຕ຺ຕມຄ຺ຄກ຺ຂເຓ ທສ຺ສນຏ຺ເຐນ ສມ຺ມາທິຏ຺ຐິ…ເປ… ອວິກ຺ເຂປຏ຺ເຐນ ສມ຺ມາສມາຘິ ຣູປຣາຄາ ອຣູປຣາຄາ ມານາ ອຸທ຺ຘຈ຺ຈາ ອວິຊ຺ຊາຍ ມານານຸສຍາ ຠວຣາຄານຸສຍາ ອວິຊ຺ຊານຸສຍາ ວຸຏ຺ຐາຕິ, ຕທນຸວຕ຺ຕກກິເລເສຫິ ຈ ຂນ຺ເຘຫິ ຈ ວຸຏ຺ຐາຕິ, ພຫິທ຺ຘາ ຈ ສພ຺ພນິມິຕ຺ເຕຫິ ວຸຏ຺ຐາຕິ. ເຕນ ວຸຈ຺ຈຕິ – ‘‘ທຸຠໂຕ ວຸຏ຺ຐານວິວຏ຺ຏເນ ປຎ຺ຎາ ມຄ຺ເຄ ຎາຓໍ’’.

໖໒. ອຊາຕໍ ຌາເປຕິ ຊາເຕນ, ຌານໍ ເຕນ ປວຸຈ຺ຈຕິ;

ຌານວິໂມກ຺ເຂ ກຸສລຕາ, ນານາທິຏ຺ຐີສຸ ນ ກມ຺ປຕິ.

ສມາທຫິຕ຺ວາ ຍຖາ ເຈ ວິປສ຺ສຕິ, ວິປສ຺ສມາໂນ ຕຖາ ເຈ ສມາທເຫ;

ວິປສ຺ສນາ ຈ ສມໂຖ ຕທາ ອຫຸ, ສມານຠາຄາ ຍຸຄນທ຺ຘາ ວຕ຺ຕເຣ.

ທຸກ຺ຂາ ສງ຺ຂາຣາ ສຸໂຂ, ນິໂຣໂຘ ອິຕິ ທສ຺ສນໍ [ນິໂຣໂຘຕິ ທສ຺ສນໍ (ສ຺ຍາ. ກ.)];

ທຸຠໂຕ ວຸຏ຺ຐິຕາ ປຎ຺ຎາ, ຜສ຺ເສຕິ ອມຕໍ ປທໍ.

ວິໂມກ຺ຂຈຣິຍໍ ຊານາຕິ, ນານຕ຺ເຕກຕ຺ຕໂກວິໂທ;

ທ຺ວິນ຺ນໍ ຎາຓານໍ ກຸສລຕາ, ນານາທິຏ຺ຐີສຸ ນ ກມ຺ປຕີຕິ.

ຕໍ ຎາຕຏ຺ເຐນ ຎາຓໍ, ປຊານນຏ຺ເຐນ ປຎ຺ຎາ. ເຕນ ວຸຈ຺ຈຕິ – ‘‘ທຸຠໂຕ ວຸຏ຺ຐານວິວຏ຺ຏເນ ປຎ຺ຎາ ມຄ຺ເຄ ຎາຓໍ’’.

ມຄ຺ຄຎາຓນິທ຺ເທໂສ ເອກາທສໂມ.