໑໒. ຜລຎາຓນິທ຺ເທໂສ

໖໓. ກຖໍ ປໂຍຄປ຺ປຏິປ຺ປສ຺ສທ຺ຘິປຎ຺ຎາ ຜເລ ຎາຓໍ? ໂສຕາປຕ຺ຕິມຄ຺ຄກ຺ຂເຓ ທສ຺ສນຏ຺ເຐນ ສມ຺ມາທິຏ຺ຐິ ມິຈ຺ຉາທິຏ຺ຐິຍາ ວຸຏ຺ຐາຕິ, ຕທນຸວຕ຺ຕກກິເລເສຫິ ຈ ຂນ຺ເຘຫິ ຈ ວຸຏ຺ຐາຕິ, ພຫິທ຺ຘາ ຈ ສພ຺ພນິມິຕ຺ເຕຫິ ວຸຏ຺ຐາຕິ. ຕໍປໂຍຄປ຺ປຏິປ຺ປສ຺ສທ຺ຘຕ຺ຕາ ອຸປ຺ປຊ຺ຊຕິ ສມ຺ມາທິຏ຺ຐິ. ມຄ຺ຄສ຺ເສຕໍ ຜລໍ.

ອຠິນິໂຣປນຏ຺ເຐນ ສມ຺ມາສງ຺ກປ຺ໂປ ມິຈ຺ຉາສງ຺ກປ຺ປາ ວຸຏ຺ຐາຕິ ຕທນຸວຕ຺ຕກກິເລເສຫິ ຈ ຂນ຺ເຘຫິ ຈ ວຸຏ຺ຐາຕິ, ພຫິທ຺ຘາ ຈ ສພ຺ພນິມິຕ຺ເຕຫິ ວຸຏ຺ຐາຕິ. ຕໍປໂຍຄປ຺ປຏິປ຺ປສ຺ສທ຺ຘຕ຺ຕາ ອຸປ຺ປຊ຺ຊຕິ ສມ຺ມາສງ຺ກປ຺ໂປ. ມຄ຺ຄສ຺ເສຕໍ ຜລໍ.

ປຣິຄ຺ຄຫຏ຺ເຐນ ສມ຺ມາວາຈາ ມິຈ຺ຉາວາຈາຍ ວຸຏ຺ຐາຕິ, ຕທນຸວຕ຺ຕກກິເລເສຫິ ຈ ຂນ຺ເຘຫິ ຈ ວຸຏ຺ຐາຕິ, ພຫິທ຺ຘາ ຈ ສພ຺ພນິມິຕ຺ເຕຫິ ວຸຏ຺ຐາຕິ. ຕໍປໂຍຄປ຺ປຏິປ຺ປສ຺ສທ຺ຘຕ຺ຕາ ອຸປ຺ປຊ຺ຊຕິ ສມ຺ມາວາຈາ. ມຄ຺ຄສ຺ເສຕໍ ຜລໍ.

ສມຸຏ຺ຐານຏ຺ເຐນ ສມ຺ມາກມ຺ມນ຺ໂຕ ມິຈ຺ຉາກມ຺ມນ຺ຕາ ວຸຏ຺ຐາຕິ, ຕທນຸວຕ຺ຕກກິເລເສຫິ ຈ ຂນ຺ເຘຫິ ຈ ວຸຏ຺ຐາຕິ, ພຫິທ຺ຘາ ຈ ສພ຺ພນິມິຕ຺ເຕຫິ ວຸຏ຺ຐາຕິ. ຕໍປໂຍຄປ຺ປຏິປ຺ປສ຺ສທ຺ຘຕ຺ຕາ ອຸປ຺ປຊ຺ຊຕິ ສມ຺ມາກມ຺ມນ຺ໂຕ. ມຄ຺ຄສ຺ເສຕໍ ຜລໍ.

ໂວທານຏ຺ເຐນ ສມ຺ມາອາຊີໂວ ມິຈ຺ຉາອາຊີວາ ວຸຏ຺ຐາຕິ, ຕທນຸວຕ຺ຕກກິເລເສຫິ ຈ ຂນ຺ເຘຫິ ຈ ວຸຏ຺ຐາຕິ, ພຫິທ຺ຘາ ຈ ສພ຺ພນິມິຕ຺ເຕຫິ ວຸຏ຺ຐາຕິ. ຕໍປໂຍຄປ຺ປຏິປ຺ປສ຺ສທ຺ຘຕ຺ຕາ ອຸປ຺ປຊ຺ຊຕິ ສມ຺ມາອາຊີໂວ. ມຄ຺ຄສ຺ເສຕໍ ຜລໍ.

ປຄ຺ຄຫຏ຺ເຐນ ສມ຺ມາວາຍາໂມ ມິຈ຺ຉາວາຍາມາ ວຸຏ຺ຐາຕິ, ຕທນຸວຕ຺ຕກກິເລເສຫິ ຈ ຂນ຺ເຘຫິ ຈ ວຸຏ຺ຐາຕິ, ພຫິທ຺ຘາ ຈ ສພ຺ພນິມິຕ຺ເຕຫິ ວຸຏ຺ຐາຕິ. ຕໍປໂຍຄປ຺ປຏິປ຺ປສ຺ສທ຺ຘຕ຺ຕາ ອຸປ຺ປຊ຺ຊຕິ ສມ຺ມາວາຍາໂມ. ມຄ຺ຄສ຺ເສຕໍ ຜລໍ.

ອຸປຏ຺ຐານຏ຺ເຐນ ສມ຺ມາສຕິ ມິຈ຺ຉາສຕິຍາ ວຸຏ຺ຐາຕິ, ຕທນຸວຕ຺ຕກກິເລເສຫິ ຈ ຂນ຺ເຘຫິ ຈ ວຸຏ຺ຐາຕິ, ພຫິທ຺ຘາ ຈ ສພ຺ພນິມິຕ຺ເຕຫິ ວຸຏ຺ຐາຕິ. ຕໍປໂຍຄປ຺ປຏິປ຺ປສ຺ສທ຺ຘຕ຺ຕາ ອຸປ຺ປຊ຺ຊຕິ ສມ຺ມາສຕິ. ມຄ຺ຄສ຺ເສຕໍ ຜລໍ.

ອວິກ຺ເຂປຏ຺ເຐນ ສມ຺ມາສມາຘິ ມິຈ຺ຉາສມາຘິໂຕ ວຸຏ຺ຐາຕິ, ຕທນຸວຕ຺ຕກກິເລເສຫິ ຈ ຂນ຺ເຘຫິ ຈ ວຸຏ຺ຐາຕິ, ພຫິທ຺ຘາ ຈ ສພ຺ພນິມິຕ຺ເຕຫິ ວຸຏ຺ຐາຕິ. ຕໍປໂຍຄປ຺ປຏິປ຺ປສ຺ສທ຺ຘຕ຺ຕາ ອຸປ຺ປຊ຺ຊຕິ ສມ຺ມາສມາຘິ. ມຄ຺ຄສ຺ເສຕໍ ຜລໍ.

ສກທາຄາມິມຄ຺ຄກ຺ຂເຓ ທສ຺ສນຏ຺ເຐນ ສມ຺ມາທິຏ຺ຐິ…ເປ… ອວິກ຺ເຂປຏ຺ເຐນ ສມ຺ມາສມາຘິ ໂອຬາຣິກາ ກາມຣາຄສຎ຺ໂຎຊນາ ປຏິຆສຎ຺ໂຎຊນາ ໂອຬາຣິກາ ກາມຣາຄານຸສຍາ ປຏິຆານຸສຍາ ວຸຏ຺ຐາຕິ, ຕທນຸວຕ຺ຕກກິເລເສຫິ ຈ ຂນ຺ເຘຫິ ຈ ວຸຏ຺ຐາຕິ, ພຫິທ຺ຘາ ຈ ສພ຺ພນິມິຕ຺ເຕຫິ ວຸຏ຺ຐາຕິ. ຕໍປໂຍຄປ຺ປຏິປ຺ປສ຺ສທ຺ຘຕ຺ຕາ ອຸປ຺ປຊ຺ຊຕິ ສມ຺ມາສມາຘິ. ມຄ຺ຄສ຺ເສຕໍ ຜລໍ.

ອນາຄາມິມຄ຺ຄກ຺ຂເຓ ທສ຺ສນຏ຺ເຐນ ສມ຺ມາທິຏ຺ຐິ…ເປ… ອວິກ຺ເຂປຏ຺ເຐນ ສມ຺ມາສມາຘິ ອນຸສຫຄຕາ ກາມຣາຄສຎ຺ໂຎຊນາ ປຏິຆສຎ຺ໂຎຊນາ ອນຸສຫຄຕາ ກາມຣາຄານຸສຍາ ປຏິຆານຸສຍາ ວຸຏ຺ຐາຕິ, ຕທນຸວຕ຺ຕກກິເລເສຫິ ຈ ຂນ຺ເຘຫິ ຈ ວຸຏ຺ຐາຕິ, ພຫິທ຺ຘາ ຈ ສພ຺ພນິມິຕ຺ເຕຫິ ວຸຏ຺ຐາຕິ. ຕໍປໂຍຄປ຺ປຏິປ຺ປສ຺ສທ຺ຘຕ຺ຕາ ອຸປ຺ປຊ຺ຊຕິ ສມ຺ມາສມາຘິ. ມຄ຺ຄສ຺ເສຕໍ ຜລໍ.

ອຣຫຕ຺ຕມຄ຺ຄກ຺ຂເຓ ທສ຺ສນຏ຺ເຐນ ສມ຺ມາທິຏ຺ຐິ…ເປ… ອວິກ຺ເຂປຏ຺ເຐນ ສມ຺ມາສມາຘິ ຣູປຣາຄາ ອຣູປຣາຄາ ມານາ ອຸທ຺ຘຈ຺ຈາ ອວິຊ຺ຊາຍ ມານານຸສຍາ ຠວຣາຄານຸສຍາ ອວິຊ຺ຊານຸສຍາ ວຸຏ຺ຐາຕິ, ຕທນຸວຕ຺ຕກກິເລເສຫິ ຈ ຂນ຺ເຘຫິ ຈ ວຸຏ຺ຐາຕິ, ພຫິທ຺ຘາ ຈ ສພ຺ພນິມິຕ຺ເຕຫິ ວຸຏ຺ຐາຕິ. ຕໍປໂຍຄປ຺ປຏິປ຺ປສ຺ສທ຺ຘຕ຺ຕາ ອຸປ຺ປຊ຺ຊຕິ ສມ຺ມາສມາຘິ. ມຄ຺ຄສ຺ເສຕໍ ຜລໍ. ຕໍ ຎາຕຏ຺ເຐນ ຎາຓໍ, ປຊານນຏ຺ເຐນ ປຎ຺ຎາ. ເຕນ ວຸຈ຺ຈຕິ – ‘‘ປໂຍຄປ຺ປຏິປ຺ປສ຺ສທ຺ຘິປຎ຺ຎາ ຜເລ ຎາຓໍ’’.

ຜລຎາຓນິທ຺ເທໂສ ທ຺ວາທສໂມ.