໑໓. ວິມຸຕ຺ຕິຎາຓນິທ຺ເທໂສ

໖໔. ກຖໍ ຉິນ຺ນວຏຸມານຸປສ຺ສເນ ປຎ຺ຎາ ວິມຸຕ຺ຕິຎາຓໍ? ໂສຕາປຕ຺ຕິມຄ຺ເຄນ ສກ຺ກາຍທິຏ຺ຐິ, ວິຈິກິຈ຺ຉາ, ສີລພ຺ພຕປຣາມາໂສ, ທິຏ຺ຐານຸສໂຍ, ວິຈິກິຈ຺ຉານຸສໂຍ ອຕ຺ຕໂນ ຈິຕ຺ຕສ຺ສ ອຸປກ຺ກິເລສາ ສມ຺ມາ ສມຸຈ຺ຉິນ຺ນາ ໂຫນ຺ຕິ. ອິເມຫິ ປຎ຺ຈຫິ ອຸປກ຺ກິເລເສຫິ ສປຣິຍຸຏ຺ຐາເນຫິ ຈິຕ຺ຕໍ ວິມຸຕ຺ຕໍ ໂຫຕິ ສຸວິມຸຕ຺ຕໍ. ຕໍວິມຸຕ຺ຕິ ຎາຕຏ຺ເຐນ ຎາຓໍ, ປຊານນຏ຺ເຐນ ປຎ຺ຎາ. ເຕນ ວຸຈ຺ຈຕິ – ‘‘ຉິນ຺ນວຏຸມານຸປສ຺ສເນ ປຎ຺ຎາ ວິມຸຕ຺ຕິຎາຓໍ’’.

ສກທາຄາມິມຄ຺ເຄນ ໂອຬາຣິກໍ ກາມຣາຄສຎ຺ໂຎຊນໍ, ປຏິຆສຎ຺ໂຎຊນໍ, ໂອຬາຣິໂກ ກາມຣາຄານຸສໂຍ, ປຏິຆານຸສໂຍ – ອຕ຺ຕໂນ ຈິຕ຺ຕສ຺ສ ອຸປກ຺ກິເລສາ ສມ຺ມາ ສມຸຈ຺ຉິນ຺ນາ ໂຫນ຺ຕິ. ອິເມຫິ ຈຕູຫິ ອຸປກ຺ກິເລເສຫິ ສປຣິຍຸຏ຺ຐາເນຫິ ຈິຕ຺ຕໍ ວິມຸຕ຺ຕໍ ໂຫຕິ ສຸວິມຸຕ຺ຕໍ. ຕໍວິມຸຕ຺ຕິ ຎາຕຏ຺ເຐນ ຎາຓໍ, ປຊານນຏ຺ເຐນ ປຎ຺ຎາ. ເຕນ ວຸຈ຺ຈຕິ – ‘‘ຉິນ຺ນວຏຸມານຸປສ຺ສເນ ປຎ຺ຎາ ວິມຸຕ຺ຕິຎາຓໍ’’.

ອນາຄາມິມຄ຺ເຄນ ອນຸສຫຄຕໍ ກາມຣາຄສຎ຺ໂຎຊນໍ, ປຏິຆສຎ຺ໂຎຊນໍ, ອນຸສຫຄໂຕ ກາມຣາຄານຸສໂຍ, ປຏິຆານຸສໂຍ – ອຕ຺ຕໂນ ຈິຕ຺ຕສ຺ສ ອຸປກ຺ກິເລສາ ສມ຺ມາ ສມຸຈ຺ຉິນ຺ນາ ໂຫນ຺ຕິ. ອິເມຫິ ຈຕູຫິ ອຸປກ຺ກິເລເສຫິ ສປຣິຍຸຏ຺ຐາເນຫິ ຈິຕ຺ຕໍ ວິມຸຕ຺ຕໍ ໂຫຕິ ສຸວິມຸຕ຺ຕໍ. ຕໍວິມຸຕ຺ຕິ ຎາຕຏ຺ເຐນ ຎາຓໍ, ປຊານນຏ຺ເຐນ ປຎ຺ຎາ. ເຕນ ວຸຈ຺ຈຕິ – ‘‘ຉິນ຺ນວຏຸມານຸປສ຺ສເນ ປຎ຺ຎາ ວິມຸຕ຺ຕິຎາຓໍ’’.

ອຣຫຕ຺ຕມຄ຺ເຄນ ຣູປຣາໂຄ, ອຣູປຣາໂຄ, ມາໂນ, ອຸທ຺ຘຈ຺ຈໍ, ອວິຊ຺ຊາ, ມານານຸສໂຍ, ຠວຣາຄານຸສໂຍ, ອວິຊ຺ຊານຸສໂຍ – ອຕ຺ຕໂນ ຈິຕ຺ຕສ຺ສ ອຸປກ຺ກິເລສາ ສມ຺ມາ ສມຸຈ຺ຉິນ຺ນາ ໂຫນ຺ຕິ. ອິເມຫິ ອຏ຺ຐຫິ ອຸປກ຺ກິເລເສຫິ ສປຣິຍຸຏ຺ຐາເນຫິ ຈິຕ຺ຕໍ ວິມຸຕ຺ຕໍ ໂຫຕິ ສຸວິມຸຕ຺ຕໍ. ຕໍວິມຸຕ຺ຕິ ຎາຕຏ຺ເຐນ ຎາຓໍ, ປຊານນຏ຺ເຐນ ປຎ຺ຎາ. ເຕນ ວຸຈ຺ຈຕິ – ‘‘ຉິນ຺ນວຏຸມານຸປສ຺ສເນ ປຎ຺ຎາ ວິມຸຕ຺ຕິຎາຓໍ’’. ຕໍ ຎາຕຏ຺ເຐນ ຎາຓໍ, ປຊານນຏ຺ເຐນ ປຎ຺ຎາ. ເຕນ ວຸຈ຺ຈຕິ – ‘‘ຉິນ຺ນວຏຸມານຸປສ຺ສເນ ປຎ຺ຎາ ວິມຸຕ຺ຕິຎາຓໍ’’.

ວິມຸຕ຺ຕິຎາຓນິທ຺ເທໂສ ເຕຣສໂມ.