໑໔. ປຈ຺ຈເວກ຺ຂຓຎາຓນິທ຺ເທໂສ

໖໕. ກຖໍ ຕທາ ສມຸທາຄເຕ ຘມ຺ເມ ປສ຺ສເນ ປຎ຺ຎາ ປຈ຺ຈເວກ຺ຂເຓ ຎາຓໍ? ໂສຕາປຕ຺ຕິມຄ຺ຄກ຺ຂເຓ ທສ຺ສນຏ຺ເຐນ ສມ຺ມາທິຏ຺ຐິ ຕທາ ສມຸທາຄຕາ. ອຠິນິໂຣປນຏ຺ເຐນ ສມ຺ມາສງ຺ກປ຺ໂປ ຕທາ ສມຸທາຄໂຕ. ປຣິຄ຺ຄຫຏ຺ເຐນ ສມ຺ມາວາຈາ ຕທາ ສມຸທາຄຕາ. ສມຸຏ຺ຐານຏ຺ເຐນ ສມ຺ມາກມ຺ມນ຺ໂຕ ຕທາ ສມຸທາຄໂຕ. ໂວທານຏ຺ເຐນ ສມ຺ມາອາຊີໂວ ຕທາ ສມຸທາຄໂຕ. ປຄ຺ຄຫຏ຺ເຐນ ສມ຺ມາວາຍາໂມ ຕທາ ສມຸທາຄໂຕ. ອຸປຏ຺ຐານຏ຺ເຐນ ສມ຺ມາສຕິ ຕທາ ສມຸທາຄຕາ. ອວິກ຺ເຂປຏ຺ເຐນ ສມ຺ມາສມາຘິ ຕທາ ສມຸທາຄໂຕ.

ອຸປຏ຺ຐານຏ຺ເຐນ ສຕິສມ຺ໂພຊ຺ຌງ຺ໂຄ ຕທາ ສມຸທາຄໂຕ. ປວິຈຍຏ຺ເຐນ ຘມ຺ມວິຈຍສມ຺ໂພຊ຺ຌງ຺ໂຄ ຕທາ ສມຸທາຄໂຕ. ປຄ຺ຄຫຏ຺ເຐນ ວີຣິຍສມ຺ໂພຊ຺ຌງ຺ໂຄ ຕທາ ສມຸທາຄໂຕ. ຜຣຓຏ຺ເຐນ ປີຕິສມ຺ໂພຊ຺ຌງ຺ໂຄ ຕທາ ສມຸທາຄໂຕ. ອຸປສມຏ຺ເຐນ ປສ຺ສທ຺ຘິສມ຺ໂພຊ຺ຌງ຺ໂຄ ຕທາ ສມຸທາຄໂຕ. ອວິກ຺ເຂປຏ຺ເຐນ ສມາຘິສມ຺ໂພຊ຺ຌງ຺ໂຄ ຕທາ ສມຸທາຄໂຕ. ປຏິສງ຺ຂານຏ຺ເຐນ ອຸເປກ຺ຂາສມ຺ໂພຊ຺ຌງ຺ໂຄ ຕທາ ສມຸທາຄໂຕ.

ອສ຺ສທ຺ຘິເຍ ອກມ຺ປິຍຏ຺ເຐນ ສທ຺ຘາພລໍ ຕທາ ສມຸທາຄຕໍ. ໂກສຊ຺ເຊ ອກມ຺ປິຍຏ຺ເຐນ ວີຣິຍພລໍ ຕທາ ສມຸທາຄຕໍ. ປມາເທ ອກມ຺ປິຍຏ຺ເຐນ ສຕິພລໍ ຕທາ ສມຸທາຄຕໍ. ອຸທ຺ຘຈ຺ເຈ ອກມ຺ປິຍຏ຺ເຐນ ສມາຘິພລໍ ຕທາ ສມຸທາຄຕໍ. ອວິຊ຺ຊາຍ ອກມ຺ປິຍຏ຺ເຐນ ປຎ຺ຎາພລໍ ຕທາ ສມຸທາຄຕໍ.

ອຘິໂມກ຺ຂຏ຺ເຐນ ສທ຺ຘິນ຺ທ຺ຣິຍໍ ຕທາ ສມຸທາຄຕໍ. ປຄ຺ຄຫຏ຺ເຐນ ວີຣິຍິນ຺ທ຺ຣິຍໍ ຕທາ ສມຸທາຄຕໍ. ອຸປຏ຺ຐານຏ຺ເຐນ ສຕິນ຺ທ຺ຣິຍໍ ຕທາ ສມຸທາຄຕໍ. ອວິກ຺ເຂປຏ຺ເຐນ ສມາຘິນ຺ທ຺ຣິຍໍ ຕທາ ສມຸທາຄຕໍ. ທສ຺ສນຏ຺ເຐນ ປຎ຺ຎິນ຺ທ຺ຣິຍໍ ຕທາ ສມຸທາຄຕໍ.

ອາຘິປເຕຍ຺ຍຏ຺ເຐນ ອິນ຺ທ຺ຣິຍາ ຕທາ ສມຸທາຄຕາ. ອກມ຺ປິຍຏ຺ເຐນ ພລາ ຕທາ ສມຸທາຄຕາ. ນິຍ຺ຍານຏ຺ເຐນ ສມ຺ໂພຊ຺ຌງ຺ຄາ ຕທາ ສມຸທາຄຕາ. ເຫຕຸຏ຺ເຐນ ມຄ຺ໂຄ ຕທາ ສມຸທາຄໂຕ. ອຸປຏ຺ຐານຏ຺ເຐນ ສຕິປຏ຺ຐານາ ຕທາ ສມຸທາຄຕາ. ປທຫນຏ຺ເຐນ ສມ຺ມປ຺ປຘານາ ຕທາ ສມຸທາຄຕາ. ອິຊ຺ຌນຏ຺ເຐນ ອິທ຺ຘິປາທາ ຕທາ ສມຸທາຄຕາ. ຕຖຏ຺ເຐນ ສຈ຺ຈາ ຕທາ ສມຸທາຄຕາ. ອວິກ຺ເຂປຏ຺ເຐນ ສມໂຖ ຕທາ ສມຸທາຄໂຕ. ອນຸປສ຺ສນຏ຺ເຐນ ວິປສ຺ສນາ ຕທາ ສມຸທາຄຕາ. ເອກຣສຏ຺ເຐນ ສມຖວິປສ຺ສນາ ຕທາ ສມຸທາຄຕາ. ອນຕິວຕ຺ຕນຏ຺ເຐນ ຍຸຄນທ຺ຘໍ ຕທາ ສມຸທາຄຕໍ. ສໍວຣຏ຺ເຐນ ສີລວິສຸທ຺ຘິ ຕທາ ສມຸທາຄຕາ. ອວິກ຺ເຂປຏ຺ເຐນ ຈິຕ຺ຕວິສຸທ຺ຘິ ຕທາ ສມຸທາຄຕາ. ທສ຺ສນຏ຺ເຐນ ທິຏ຺ຐິວິສຸທ຺ຘິ ຕທາ ສມຸທາຄຕາ. ວິມຸຕ຺ຕຏ຺ເຐນ ວິໂມກ຺ໂຂ ຕທາ ສມຸທາຄໂຕ. ປຏິເວຘຏ຺ເຐນ ວິຊ຺ຊາ ຕທາ ສມຸທາຄຕາ. ປຣິຈ຺ຈາຄຏ຺ເຐນ ວິມຸຕ຺ຕິ ຕທາ ສມຸທາຄຕາ. ສມຸຈ຺ເຉທຏ຺ເຐນ ຂເຍ ຎາຓໍ ຕທາ ສມຸທາຄຕໍ.

ຉນ຺ໂທ ມູລຏ຺ເຐນ ຕທາ ສມຸທາຄໂຕ. ມນສິກາໂຣ ສມຸຏ຺ຐານຏ຺ເຐນ ຕທາ ສມຸທາຄໂຕ. ຜສ຺ໂສ ສໂມຘານຏ຺ເຐນ ຕທາ ສມຸທາຄໂຕ. ເວທນາ ສໂມສຣຓຏ຺ເຐນ ຕທາ ສມຸທາຄຕາ. ສມາຘິ ປມຸຂຏ຺ເຐນ ຕທາ ສມຸທາຄໂຕ. ສຕິ ອາຘິປເຕຍ຺ຍຏ຺ເຐນ ຕທາ ສມຸທາຄຕາ. ປຎ຺ຎາ ຕທຸຕ຺ຕຣຏ຺ເຐນ ຕທາ ສມຸທາຄຕາ. ວິມຸຕ຺ຕິ ສາຣຏ຺ເຐນ ຕທາ ສມຸທາຄຕາ. ອມໂຕຄຘໍ ນິພ຺ພານໍ ປຣິໂຍສານຏ຺ເຐນ ຕທາ ສມຸທາຄຕໍ. ວຸຏ຺ຐຫິຕ຺ວາ ປຈ຺ຈເວກ຺ຂຕິ, ອິເມ ຘມ຺ມາ ຕທາ ສມຸທາຄຕາ.

ໂສຕາປຕ຺ຕິຜລກ຺ຂເຓ ທສ຺ສນຏ຺ເຐນ ສມ຺ມາທິຏ຺ຐິ ຕທາ ສມຸທາຄຕາ. ອຠິນິໂຣປນຏ຺ເຐນ ສມ຺ມາສງ຺ກປ຺ໂປ ຕທາ ສມຸທາຄໂຕ…ເປ… ປຏິປ຺ປສ຺ສທ຺ຘຏ຺ເຐນ ອນຸປ຺ປາເທ ຎາຓໍ ຕທາ ສມຸທາຄຕໍ. ຉນ຺ໂທ ມູລຏ຺ເຐນ ຕທາ ສມຸທາຄໂຕ. ມນສິກາໂຣ ສມຸຏ຺ຐານຏ຺ເຐນ ຕທາ ສມຸທາຄໂຕ. ຜສ຺ໂສ ສໂມຘານຏ຺ເຐນ ຕທາ ສມຸທາຄໂຕ. ເວທນາ ສໂມສຣຓຏ຺ເຐນ ຕທາ ສມຸທາຄຕາ. ສມາຘິ ປມຸຂຏ຺ເຐນ ຕທາ ສມຸທາຄໂຕ. ສຕິ ອາຘິປເຕຍ຺ຍຏ຺ເຐນ ຕທາ ສມຸທາຄຕາ. ປຎ຺ຎາ ຕທຸຕ຺ຕຣຏ຺ເຐນ ຕທາ ສມຸທາຄຕາ. ວິມຸຕ຺ຕິ ສາຣຏ຺ເຐນ ຕທາ ສມຸທາຄຕາ. ອມໂຕຄຘໍ ນິພ຺ພານໍ ປຣິໂຍສານຏ຺ເຐນ ຕທາ ສມຸທາຄຕໍ. ວຸຏ຺ຐຫິຕ຺ວາ ປຈ຺ຈເວກ຺ຂຕິ, ອິເມ ຘມ຺ມາ ຕທາ ສມຸທາຄຕາ.

ສກທາຄາມິມຄ຺ຄກ຺ຂເຓ…ເປ… ສກທາຄາມິຜລກ຺ຂເຓ…ເປ… ອນາຄາມິມຄ຺ຄກ຺ຂເຓ…ເປ… ອນາຄາມິຜລກ຺ຂເຓ…ເປ… ອຣຫຕ຺ຕມຄ຺ຄກ຺ຂເຓ ທສ຺ສນຏ຺ເຐນ ສມ຺ມາທິຏ຺ຐິ ຕທາ ສມຸທາຄຕາ…ເປ… ສມຸຈ຺ເຉທຏ຺ເຐນ ຂເຍ ຎາຓໍ ຕທາ ສມຸທາຄຕໍ. ຉນ຺ໂທ ມູລຏ຺ເຐນ ຕທາ ສມຸທາຄໂຕ…ເປ… ອມໂຕຄຘໍ ນິພ຺ພານໍ ປຣິໂຍສານຏ຺ເຐນ ຕທາ ສມຸທາຄຕໍ. ວຸຏ຺ຐຫິຕ຺ວາ ປຈ຺ຈເວກ຺ຂຕິ, ອິເມ ຘມ຺ມາ ຕທາ ສມຸທາຄຕາ.

ອຣຫຕ຺ຕຜລກ຺ຂເຓ ທສ຺ສນຏ຺ເຐນ ສມ຺ມາທິຏ຺ຐິ ຕທາ ສມຸທາຄຕາ …ເປ… ປຏິປ຺ປສ຺ສທ຺ຘຏ຺ເຐນ ອນຸປ຺ປາເທ ຎາຓໍ ຕທາ ສມຸທາຄຕໍ. ຉນ຺ໂທ ມູລຏ຺ເຐນ ຕທາ ສມຸທາຄໂຕ …ເປ… ອມໂຕຄຘໍ ນິພ຺ພານໍ ປຣິໂຍສານຏ຺ເຐນ ຕທາ ສມຸທາຄຕໍ. ວຸຏ຺ຐຫິຕ຺ວາ ປຈ຺ຈເວກ຺ຂຕິ, ອິເມ ຘມ຺ມາ ຕທາ ສມຸທາຄຕາ. ຕໍ ຎາຕຏ຺ເຐນ ຎາຓໍ, ປຊານນຏ຺ເຐນ ປຎ຺ຎາ. ເຕນ ວຸຈ຺ຈຕິ – ‘‘ຕທາ ສມຸທາຄເຕ ຘມ຺ເມ ປສ຺ສເນ ປຎ຺ຎາ ປຈ຺ຈເວກ຺ຂເຓ ຎາຓໍ’’.

ປຈ຺ຈເວກ຺ຂຓຎາຓນິທ຺ເທໂສ ຈຸທ຺ທສໂມ.