໑໕. ວຕ຺ຖຸນານຕ຺ຕຎາຓນິທ຺ເທໂສ

໖໖. ກຖໍ ອຊ຺ຌຕ຺ຕວວຕ຺ຖາເນ ປຎ຺ຎາ ວຕ຺ຖຸນານຕ຺ເຕ ຎາຓໍ? ກຖໍ ອຊ຺ຌຕ຺ຕຘມ຺ເມ ວວຕ຺ເຖຕິ? ຈກ຺ຂຸໍ ອຊ຺ຌຕ຺ຕໍ ວວຕ຺ເຖຕິ, ໂສຕໍ ອຊ຺ຌຕ຺ຕໍ ວວຕ຺ເຖຕິ, ຆານໍ ອຊ຺ຌຕ຺ຕໍ ວວຕ຺ເຖຕິ, ຊິວ຺ຫໍ ອຊ຺ຌຕ຺ຕໍ ວວຕ຺ເຖຕິ, ກາຍໍ ອຊ຺ຌຕ຺ຕໍ ວວຕ຺ເຖຕິ, ມນໍ ອຊ຺ຌຕ຺ຕໍ ວວຕ຺ເຖຕິ.

ກຖໍ ຈກ຺ຂຸໍ ອຊ຺ຌຕ຺ຕໍ ວວຕ຺ເຖຕິ? ຈກ຺ຂຸ ອວິຊ຺ຊາສມ຺ຠູຕນ຺ຕິ ວວຕ຺ເຖຕິ, ຈກ຺ຂຸ ຕຓ຺ຫາສມ຺ຠູຕນ຺ຕິ ວວຕ຺ເຖຕິ, ຈກ຺ຂຸ ກມ຺ມສມ຺ຠູຕນ຺ຕິ ວວຕ຺ເຖຕິ, ຈກ຺ຂຸ ອາຫາຣສມ຺ຠູຕນ຺ຕິ ວວຕ຺ເຖຕິ, ຈກ຺ຂຸ ຈຕຸນ຺ນໍ ມຫາຠູຕານໍ ອຸປາທາຍາຕິ ວວຕ຺ເຖຕິ, ຈກ຺ຂຸ ອຸປ຺ປນ຺ນນ຺ຕິ ວວຕ຺ເຖຕິ, ຈກ຺ຂຸ ສມຸທາຄຕນ຺ຕິ ວວຕ຺ເຖຕິ. ຈກ຺ຂຸ ອຫຸຕ຺ວາ ສມ຺ຠູຕໍ, ຫຸຕ຺ວາ ນ ຠວິສ຺ສຕີຕິ ວວຕ຺ເຖຕິ. ຈກ຺ຂຸໍ ອນ຺ຕວນ຺ຕໂຕ ວວຕ຺ເຖຕິ, ຈກ຺ຂຸ ອທ຺ຘຸວໍ ອສສ຺ສຕໍ ວິປຣິຓາມຘມ຺ມນ຺ຕິ ວວຕ຺ເຖຕິ, ຈກ຺ຂຸ ອນິຈ຺ຈໍ ສງ຺ຂຕໍ ປຏິຈ຺ຈສມຸປ຺ປນ຺ນໍ ຂຍຘມ຺ມໍ ວຍຘມ຺ມໍ ວິຣາຄຘມ຺ມໍ ນິໂຣຘຘມ຺ມນ຺ຕິ ວວຕ຺ເຖຕິ. ຈກ຺ຂຸໍ ອນິຈ຺ຈໂຕ ວວຕ຺ເຖຕິ, ໂນ ນິຈ຺ຈໂຕ; ທຸກ຺ຂໂຕ ວວຕ຺ເຖຕິ, ໂນ ສຸຂໂຕ; ອນຕ຺ຕໂຕ ວວຕ຺ເຖຕິ, ໂນ ອຕ຺ຕໂຕ; ນິພ຺ພິນ຺ທຕິ, ໂນ ນນ຺ທຕິ; ວິຣຊ຺ຊຕິ, ໂນ ຣຊ຺ຊຕິ; ນິໂຣເຘຕິ, ໂນ ສມຸເທຕິ; ປຏິນິສ຺ສຊ຺ຊຕິ, ໂນ ອາທິຍຕິ. ອນິຈ຺ຈໂຕ ວວຕ຺ເຖນ຺ໂຕ ນິຈ຺ຈສຎ຺ຎໍ ປຊຫຕິ, ທຸກ຺ຂໂຕ ວວຕ຺ເຖນ຺ໂຕ ສຸຂສຎ຺ຎໍ ປຊຫຕິ, ອນຕ຺ຕໂຕ ວວຕ຺ເຖນ຺ໂຕ ອຕ຺ຕສຎ຺ຎໍ ປຊຫຕິ, ນິພ຺ພິນ຺ທນ຺ໂຕ ນນ຺ທິໍ ປຊຫຕິ, ວິຣຊ຺ຊນ຺ໂຕ ຣາຄໍ ປຊຫຕິ, ນິໂຣເຘນ຺ໂຕ ສມຸທຍໍ ປຊຫຕິ, ປຏິນິສ຺ສຊ຺ຊນ຺ໂຕ ອາທານໍ ປຊຫຕິ. ເອວໍ ຈກ຺ຂຸໍ ອຊ຺ຌຕ຺ຕໍ ວວຕ຺ເຖຕິ.

ກຖໍ ໂສຕໍ ອຊ຺ຌຕ຺ຕໍ ວວຕ຺ເຖຕິ? ໂສຕໍ ອວິຊ຺ຊາສມ຺ຠູຕນ຺ຕິ ວວຕ຺ເຖຕິ…ເປ… ເອວໍ ໂສຕໍ ອຊ຺ຌຕ຺ຕໍ ວວຕ຺ເຖຕິ. ກຖໍ ຆານໍ ອຊ຺ຌຕ຺ຕໍ ວວຕ຺ເຖຕິ? ຆານໍ ອວິຊ຺ຊາສມ຺ຠູຕນ຺ຕິ ວວຕ຺ເຖຕິ…ເປ… ເອວໍ ຆານໍ ອຊ຺ຌຕ຺ຕໍ ວວຕ຺ເຖຕິ. ກຖໍ ຊິວ຺ຫໍ ອຊ຺ຌຕ຺ຕໍ ວວຕ຺ເຖຕິ? ຊິວ຺ຫາ ອວິຊ຺ຊາສມ຺ຠູຕາຕິ ວວຕ຺ເຖຕິ, ຊິວ຺ຫາ ຕຓ຺ຫາສມ຺ຠູຕາຕິ ວວຕ຺ເຖຕິ, ຊິວ຺ຫາ ກມ຺ມສມ຺ຠູຕາຕິ ວວຕ຺ເຖຕິ, ຊິວ຺ຫາ ອາຫາຣສມ຺ຠູຕາຕິ ວວຕ຺ເຖຕິ, ຊິວ຺ຫາ ຈຕຸນ຺ນໍ ມຫາຠູຕານໍ ອຸປາທາຍາຕິ ວວຕ຺ເຖຕິ, ຊິວ຺ຫາ ອຸປ຺ປນ຺ນາຕິ ວວຕ຺ເຖຕິ ຊິວ຺ຫາ ສມຸທາຄຕາຕິ ວວຕ຺ເຖຕິ. ຊິວ຺ຫາ ອຫຸຕ຺ວາ ສມ຺ຠູຕາ, ຫຸຕ຺ວາ ນ ຠວິສ຺ສຕີຕິ ວວຕ຺ເຖຕິ. ຊິວ຺ຫໍ ອນ຺ຕວນ຺ຕໂຕ ວວຕ຺ເຖຕິ, ຊິວ຺ຫາ ອທ຺ຘຸວາ ອສສ຺ສຕາ ວິປຣິຓາມຘມ຺ມາຕິ ວວຕ຺ເຖຕິ, ຊິວ຺ຫາ ອນິຈ຺ຈາ ສງ຺ຂຕາ ປຏິຈ຺ຈສມຸປ຺ປນ຺ນາ ຂຍຘມ຺ມາ ວຍຘມ຺ມາ ວິຣາຄຘມ຺ມາ ນິໂຣຘຘມ຺ມາຕິ ວວຕ຺ເຖຕິ. ຊິວ຺ຫໍ ອນິຈ຺ຈໂຕ ວວຕ຺ເຖຕິ, ໂນ ນິຈ຺ຈໂຕ…ເປ… ປຏິນິສ຺ສຊ຺ຊຕິ, ໂນ ອາທິຍຕິ. ອນິຈ຺ຈໂຕ ວວຕ຺ເຖນ຺ໂຕ ນິຈ຺ຈສຎ຺ຎໍ ປຊຫຕິ…ເປ… ປຏິນິສ຺ສຊ຺ຊນ຺ໂຕ ອາທານໍ ປຊຫຕິ. ເອວໍ ຊິວ຺ຫໍ ອຊ຺ຌຕ຺ຕໍ ວວຕ຺ເຖຕິ.

ກຖໍ ກາຍໍ ອຊ຺ຌຕ຺ຕໍ ວວຕ຺ເຖຕິ? ກາໂຍ ອວິຊ຺ຊາສມ຺ຠູໂຕຕິ ວວຕ຺ເຖຕິ, ກາໂຍ ຕຓ຺ຫາສມ຺ຠູໂຕຕິ ວວຕ຺ເຖຕິ, ກາໂຍ ກມ຺ມສມ຺ຠູໂຕຕິ ວວຕ຺ເຖຕິ, ກາໂຍ ອາຫາຣສມ຺ຠູໂຕຕິ ວວຕ຺ເຖຕິ, ກາໂຍ ຈຕຸນ຺ນໍ ມຫາຠູຕານໍ ອຸປາທາຍາຕິ ວວຕ຺ເຖຕິ, ກາໂຍ ອຸປ຺ປນ຺ໂນຕິ ວວຕ຺ເຖຕິ, ກາໂຍ ສມຸທາຄໂຕຕິ ວວຕ຺ເຖຕິ. ກາໂຍ ອຫຸຕ຺ວາ ສມ຺ຠູໂຕ, ຫຸຕ຺ວາ ນ ຠວິສ຺ສຕີຕິ ວວຕ຺ເຖຕິ. ກາຍໍ ອນ຺ຕວນ຺ຕໂຕ ວວຕ຺ເຖຕິ, ກາໂຍ ອທ຺ຘຸໂວ ອສສ຺ສໂຕ ວິປຣິຓາມຘມ຺ໂມຕິ ວວຕ຺ເຖຕິ, ກາໂຍ ອນິຈ຺ໂຈ ສງ຺ຂໂຕ ປຏິຈ຺ຈສມຸປ຺ປນ຺ໂນ ຂຍຘມ຺ໂມ ວຍຘມ຺ໂມ ວິຣາຄຘມ຺ໂມ ນິໂຣຘຘມ຺ໂມຕິ ວວຕ຺ເຖຕິ. ກາຍໍ ອນິຈ຺ຈໂຕ ວວຕ຺ເຖຕິ, ໂນ ນິຈ຺ຈໂຕ; ທຸກ຺ຂໂຕ ວວຕ຺ເຖຕິ, ໂນ ສຸຂໂຕ…ເປ… ປຏິນິສ຺ສຊ຺ຊຕິ, ໂນ ອາທິຍຕິ. ອນິຈ຺ຈໂຕ ວວຕ຺ເຖນ຺ໂຕ ນິຈ຺ຈສຎ຺ຎໍ ປຊຫຕິ, ທຸກ຺ຂໂຕ ວວຕ຺ເຖນ຺ໂຕ ສຸຂສຎ຺ຎໍ ປຊຫຕິ…ເປ… ປຏິນິສ຺ສຊ຺ຊນ຺ໂຕ ອາທານໍ ປຊຫຕິ. ເອວໍ ກາຍໍ ອຊ຺ຌຕ຺ຕໍ ວວຕ຺ເຖຕິ.

ກຖໍ ມນໍ ອຊ຺ຌຕ຺ຕໍ ວວຕ຺ເຖຕິ? ມໂນ ອວິຊ຺ຊາສມ຺ຠູໂຕຕິ ວວຕ຺ເຖຕິ, ມໂນ ຕຓ຺ຫາສມ຺ຠູໂຕຕິ ວວຕ຺ເຖຕິ, ມໂນ ກມ຺ມສມ຺ຠູໂຕຕິ ວວຕ຺ເຖຕິ, ມໂນ ອາຫາຣສມ຺ຠູໂຕຕິ ວວຕ຺ເຖຕິ, ມໂນ ອຸປ຺ປນ຺ໂນຕິ ວວຕ຺ເຖຕິ, ມໂນ ສມຸທາຄໂຕຕິ ວວຕ຺ເຖຕິ. ມໂນ ອຫຸຕ຺ວາ ສມ຺ຠູໂຕ, ຫຸຕ຺ວາ ນ ຠວິສ຺ສຕີຕິ ວວຕ຺ເຖຕິ. ມນໍ ອນ຺ຕວນ຺ຕໂຕ ວວຕ຺ເຖຕິ, ມໂນ ອທ຺ຘຸໂວ ອສສ຺ສໂຕ ວິປຣິຓາມຘມ຺ໂມຕິ ວວຕ຺ເຖຕິ, ມໂນ ອນິຈ຺ໂຈ ສງ຺ຂໂຕ ປຏິຈ຺ຈສມຸປ຺ປນ຺ໂນ ຂຍຘມ຺ໂມ ວຍຘມ຺ໂມ ວິຣາຄຘມ຺ໂມ ນິໂຣຘຘມ຺ໂມຕິ ວວຕ຺ເຖຕິ. ມນໍ ອນິຈ຺ຈໂຕ ວວຕ຺ເຖຕິ, ໂນ ນິຈ຺ຈໂຕ; ທຸກ຺ຂໂຕ ວວຕ຺ເຖຕິ, ໂນ ສຸຂໂຕ; ອນຕ຺ຕໂຕ ວວຕ຺ເຖຕິ, ໂນ ອຕ຺ຕໂຕ; ນິພ຺ພິນ຺ທຕິ, ໂນ ນນ຺ທຕິ; ວິຣຊ຺ຊຕິ, ໂນ ຣຊ຺ຊຕິ; ນິໂຣເຘຕິ, ໂນ ສມຸເທຕິ; ປຏິນິສ຺ສຊ຺ຊຕິ, ໂນ ອາທິຍຕິ. ອນິຈ຺ຈໂຕ ວວຕ຺ເຖນ຺ໂຕ ນິຈ຺ຈສຎ຺ຎໍ ປຊຫຕິ, ທຸກ຺ຂໂຕ ວວຕ຺ເຖນ຺ໂຕ ສຸຂສຎ຺ຎໍ ປຊຫຕິ, ອນຕ຺ຕໂຕ ວວຕ຺ເຖນ຺ໂຕ ອຕ຺ຕສຎ຺ຎໍ ປຊຫຕິ, ນິພ຺ພິນ຺ທນ຺ໂຕ ນນ຺ທິໍ ປຊຫຕິ, ວິຣຊ຺ຊນ຺ໂຕ ຣາຄໍ ປຊຫຕິ, ນິໂຣເຘນ຺ໂຕ ສມຸທຍໍ ປຊຫຕິ, ປຏິນິສ຺ສຊ຺ຊນ຺ໂຕ ອາທານໍ ປຊຫຕິ. ເອວໍ ມນໍ ອຊ຺ຌຕ຺ຕໍ ວວຕ຺ເຖຕິ. ເອວໍ ອຊ຺ຌຕ຺ຕຘມ຺ເມ ວວຕ຺ເຖຕິ. ຕໍ ຎາຕຏ຺ເຐນ ຎາຓໍ, ປຊານນຏ຺ເຐນ ປຎ຺ຎາ. ເຕນ ວຸຈ຺ຈຕິ – ‘‘ອຊ຺ຌຕ຺ຕວວຕ຺ຖາເນ ປຎ຺ຎາ ວຕ຺ຖຸນານຕ຺ເຕ ຎາຓໍ’’.

ວຕ຺ຖຸນານຕ຺ຕຎາຓນິທ຺ເທໂສ ປນ຺ນຣສໂມ.