໑໖. ໂຄຈຣນານຕ຺ຕຎາຓນິທ຺ເທໂສ

໖໗. ກຖໍ ພຫິທ຺ຘາ ວວຕ຺ຖາເນ ປຎ຺ຎາ ໂຄຈຣນານຕ຺ເຕ ຎາຓໍ? ກຖໍ ພຫິທ຺ຘາ ຘມ຺ເມ ວວຕ຺ເຖຕິ? ຣູເປ ພຫິທ຺ຘາ ວວຕ຺ເຖຕິ, ສທ຺ເທ ພຫິທ຺ຘາ ວວຕ຺ເຖຕິ, ຄນ຺ເຘ ພຫິທ຺ຘາ ວວຕ຺ເຖຕິ, ຣເສ ພຫິທ຺ຘາ ວວຕ຺ເຖຕິ, ໂຜຏ຺ຐພ຺ເພ ພຫິທ຺ຘາ ວວຕ຺ເຖຕິ, ຘມ຺ເມ ພຫິທ຺ຘາ ວວຕ຺ເຖຕິ.

ກຖໍ ຣູເປ ພຫິທ຺ຘາ ວວຕ຺ເຖຕິ? ຣູປາ ອວິຊ຺ຊາສມ຺ຠູຕາຕິ ວວຕ຺ເຖຕິ ຣູປາ ຕຓ຺ຫາສມ຺ຠູຕາຕິ ວວຕ຺ເຖຕິ, ຣູປາ ກມ຺ມສມ຺ຠູຕາຕິ ວວຕ຺ເຖຕິ, ຣູປາ ອາຫາຣສມ຺ຠູຕາຕິ ວວຕ຺ເຖຕິ, ຣູປາ ຈຕຸນ຺ນໍ ມຫາຠູຕານໍ ອຸປາທາຍາຕິ ວວຕ຺ເຖຕິ, ຣູປາ ອຸປ຺ປນ຺ນາຕິ ວວຕ຺ເຖຕິ, ຣູປາ ສມຸທາຄຕາຕິ ວວຕ຺ເຖຕິ. ຣູປາ ອຫຸຕ຺ວາ ສມ຺ຠູຕາ, ຫຸຕ຺ວາ ນ ຠວິສ຺ສນ຺ຕີຕິ ວວຕ຺ເຖຕິ. ຣູເປ ອນ຺ຕວນ຺ຕໂຕ ວວຕ຺ເຖຕິ, ຣູປາ ອທ຺ຘຸວາ ອສສ຺ສຕາ ວິປຣິຓາມຘມ຺ມາຕິ ວວຕ຺ເຖຕິ. ຣູປາ ອນິຈ຺ຈາ ສງ຺ຂຕາ ປຏິຈ຺ຈສມຸປ຺ປນ຺ນາ ຂຍຘມ຺ມາ ວຍຘມ຺ມາ ວິຣາຄຘມ຺ມາ ນິໂຣຘຘມ຺ມາຕິ ວວຕ຺ເຖຕິ. ຣູເປ ອນິຈ຺ຈໂຕ ວວຕ຺ເຖຕິ, ໂນ ນິຈ຺ຈໂຕ; ທຸກ຺ຂໂຕ ວວຕ຺ເຖຕິ, ໂນ ສຸຂໂຕ; ອນຕ຺ຕໂຕ ວວຕ຺ເຖຕິ, ໂນ ອຕ຺ຕໂຕ; ນິພ຺ພິນ຺ທຕິ, ໂນ ນນ຺ທຕິ; ວິຣຊ຺ຊຕິ, ໂນ ຣຊ຺ຊຕິ; ນິໂຣເຘຕິ, ໂນ ສມຸເທຕິ; ປຏິນິສ຺ສຊ຺ຊຕິ, ໂນ ອາທິຍຕິ. ອນິຈ຺ຈໂຕ ວວຕ຺ເຖນ຺ໂຕ ນິຈ຺ຈສຎ຺ຎໍ ປຊຫຕິ, ທຸກ຺ຂໂຕ ວວຕ຺ເຖນ຺ໂຕ ສຸຂສຎ຺ຎໍ ປຊຫຕິ, ອນຕ຺ຕໂຕ ວວຕ຺ເຖນ຺ໂຕ ອຕ຺ຕສຎ຺ຎໍ ປຊຫຕິ, ນິພ຺ພິນ຺ທນ຺ໂຕ ນນ຺ທິໍ ປຊຫຕິ, ວິຣຊ຺ຊນ຺ໂຕ ຣາຄໍ ປຊຫຕິ, ນິໂຣເຘນ຺ໂຕ ສມຸທຍໍ ປຊຫຕິ, ປຏິນິສ຺ສຊ຺ຊນ຺ໂຕ ອາທານໍ ປຊຫຕິ. ເອວໍ ຣູເປ ພຫິທ຺ຘາ ວວຕ຺ເຖຕິ.

ກຖໍ ສທ຺ເທ ພຫິທ຺ຘາ ວວຕ຺ເຖຕິ? ສທ຺ທາ ອວິຊ຺ຊາສມ຺ຠູຕາຕິ ວວຕ຺ເຖຕິ…ເປ… ສທ຺ທາ ຈຕຸນ຺ນໍ ມຫາຠູຕານໍ ອຸປາທາຍາຕິ ວວຕ຺ເຖຕິ, ສທ຺ທາ ອຸປ຺ປນ຺ນາຕິ ວວຕ຺ເຖຕິ, ສທ຺ທາ ສມຸທາຄຕາຕິ ວວຕ຺ເຖຕິ. ສທ຺ທາ ອຫຸຕ຺ວາ ສມ຺ຠູຕາ, ຫຸຕ຺ວາ ນ ຠວິສ຺ສນ຺ຕີຕິ ວວຕ຺ເຖຕິ. ສທ຺ເທ ອນ຺ຕວນ຺ຕໂຕ ວວຕ຺ເຖຕິ, ສທ຺ທາ ອທ຺ຘຸວາ ອສສ຺ສຕາ ວິປຣິຓາມຘມ຺ມາຕິ ວວຕ຺ເຖຕິ, ສທ຺ທາ ອນິຈ຺ຈາ ສງ຺ຂຕາ ປຏິຈ຺ຈສມຸປ຺ປນ຺ນາ ຂຍຘມ຺ມາ ວຍຘມ຺ມາ ວິຣາຄຘມ຺ມາ ນິໂຣຘຘມ຺ມາຕິ ວວຕ຺ເຖຕິ. ສທ຺ເທ ອນິຈ຺ຈໂຕ ວວຕ຺ເຖຕິ, ໂນ ນິຈ຺ຈໂຕ…ເປ… ເອວໍ ສທ຺ເທ ພຫິທ຺ຘາ ວວຕ຺ເຖຕິ.

ກຖໍ ຄນ຺ເຘ ພຫິທ຺ຘາ ວວຕ຺ເຖຕິ? ຄນ຺ຘາ ອວິຊ຺ຊາສມ຺ຠູຕາຕິ ວວຕ຺ເຖຕິ, ຄນ຺ຘາ ຕຓ຺ຫາສມ຺ຠູຕາຕິ ວວຕ຺ເຖຕິ…ເປ… ເອວໍ ຄນ຺ເຘ ພຫິທ຺ຘາ ວວຕ຺ເຖຕິ. ກຖໍ ຣເສ ພຫິທ຺ຘາ ວວຕ຺ເຖຕິ? ຣສາ ອວິຊ຺ຊາສມ຺ຠູຕາຕິ ວວຕ຺ເຖຕິ, ຣສາ ຕຓ຺ຫາສມ຺ຠູຕາຕິ ວວຕ຺ເຖຕິ…ເປ… ເອວໍ ຣເສ ພຫິທ຺ຘາ ວວຕ຺ເຖຕິ. ກຖໍ ໂຜຏ຺ຐພ຺ເພ ພຫິທ຺ຘາ ວວຕ຺ເຖຕິ? ໂຜຏ຺ຐພ຺ພາ ອວິຊ຺ຊາສມ຺ຠູຕາຕິ ວວຕ຺ເຖຕິ, ໂຜຏ຺ຐພ຺ພາ ຕຓ຺ຫາສມ຺ຠູຕາຕິ ວວຕ຺ເຖຕິ, ໂຜຏ຺ຐພ຺ພາ ກມ຺ມສມ຺ຠູຕາຕິ ວວຕ຺ເຖຕິ, ໂຜຏ຺ຐພ຺ພາ ອາຫາຣສມ຺ຠູຕາຕິ ວວຕ຺ເຖຕິ, ໂຜຏ຺ຐພ຺ພາ ອຸປ຺ປນ຺ນາຕິ ວວຕ຺ເຖຕິ. ໂຜຏ຺ຐພ຺ພາ ສມຸທາຄຕາຕິ ວວຕ຺ເຖຕິ…ເປ… ເອວໍ ໂຜຏ຺ຐພ຺ເພ ພຫິທ຺ຘາ ວວຕ຺ເຖຕິ.

ກຖໍ ຘມ຺ເມ ພຫິທ຺ຘາ ວວຕ຺ເຖຕິ? ຘມ຺ມາ ອວິຊ຺ຊາສມ຺ຠູຕາຕິ ວວຕ຺ເຖຕິ, ຘມ຺ມາ ຕຓ຺ຫາສມ຺ຠູຕາຕິ ວວຕ຺ເຖຕິ, ຘມ຺ມາ ກມ຺ມສມ຺ຠູຕາຕິ ວວຕ຺ເຖຕິ, ຘມ຺ມາ ອາຫາຣສມ຺ຠູຕາຕິ ວວຕ຺ເຖຕິ, ຘມ຺ມາ ອຸປ຺ປນ຺ນາຕິ ວວຕ຺ເຖຕິ, ຘມ຺ມາ ສມຸທາຄຕາຕິ ວວຕ຺ເຖຕິ. ຘມ຺ມາ ອຫຸຕ຺ວາ ສມ຺ຠູຕາ, ຫຸຕ຺ວາ ນ ຠວິສ຺ສນ຺ຕີຕິ ວວຕ຺ເຖຕິ. ຘມ຺ເມ ອນ຺ຕວນ຺ຕໂຕ ວວຕ຺ເຖຕິ, ຘມ຺ມາ ອທ຺ຘຸວາ ອສສ຺ສຕາ ວິປຣິຓາມຘມ຺ມາຕິ ວວຕ຺ເຖຕິ, ຘມ຺ມາ ອນິຈ຺ຈາ ສງ຺ຂຕາ ປຏິຈ຺ຈສມຸປ຺ປນ຺ນາ ຂຍຘມ຺ມາ ວຍຘມ຺ມາ ວິຣາຄຘມ຺ມາ ນິໂຣຘຘມ຺ມາຕິ ວວຕ຺ເຖຕິ. ຘມ຺ເມ ອນິຈ຺ຈໂຕ ວວຕ຺ເຖຕິ, ໂນ ນິຈ຺ຈໂຕ; ທຸກ຺ຂໂຕ ວວຕ຺ເຖຕິ, ໂນ ສຸຂໂຕ; ອນຕ຺ຕໂຕ ວວຕ຺ເຖຕິ, ໂນ ອຕ຺ຕໂຕ; ນິພ຺ພິນ຺ທຕິ, ໂນ ນນ຺ທຕິ; ວິຣຊ຺ຊຕິ, ໂນ ຣຊ຺ຊຕິ; ນິໂຣເຘຕິ, ໂນ ສມຸເທຕິ; ປຏິນິສ຺ສຊ຺ຊຕິ, ໂນ ອາທິຍຕິ…ເປ… ອນິຈ຺ຈໂຕ ວວຕ຺ເຖນ຺ໂຕ ນິຈ຺ຈສຎ຺ຎໍ ປຊຫຕິ, ທຸກ຺ຂໂຕ ວວຕ຺ເຖນ຺ໂຕ ສຸຂສຎ຺ຎໍ ປຊຫຕິ, ອນຕ຺ຕໂຕ ວວຕ຺ເຖນ຺ໂຕ ອຕ຺ຕສຎ຺ຎໍ ປຊຫຕິ, ນິພ຺ພິນ຺ທນ຺ໂຕ ນນ຺ທິໍ ປຊຫຕິ, ວິຣຊ຺ຊນ຺ໂຕ ຣາຄໍ ປຊຫຕິ, ນິໂຣເຘນ຺ໂຕ ສມຸທຍໍ ປຊຫຕິ, ປຏິນິສ຺ສຊ຺ຊນ຺ໂຕ ອາທານໍ ປຊຫຕິ. ເອວໍ ຘມ຺ເມ ພຫິທ຺ຘາ ວວຕ຺ເຖຕິ. ຕໍ ຎາຕຏ຺ເຐນ ຎາຓໍ, ປຊານນຏ຺ເຐນ ປຎ຺ຎາ. ເຕນ ວຸຈ຺ຈຕິ – ‘‘ພຫິທ຺ຘາ ວວຕ຺ຖາເນ ປຎ຺ຎາ ໂຄຈຣນານຕ຺ເຕ ຎາຓໍ’’.

ໂຄຈຣນານຕ຺ຕຎາຓນິທ຺ເທໂສ ໂສຬສໂມ.