໑໗. ຈຣິຍານານຕ຺ຕຎາຓນິທ຺ເທໂສ

໖໘. ກຖໍ ຈຣິຍາວວຕ຺ຖາເນ ປຎ຺ຎາ ຈຣິຍານານຕ຺ເຕ ຎາຓໍ? ຈຣິຍາຕິ ຕິສ຺ໂສ ຈຣິຍາໂຍ – ວິຎ຺ຎາຓຈຣິຍາ, ອຎ຺ຎາຓຈຣິຍາ, ຎາຓຈຣິຍາ.

ກຕມາ ວິຎ຺ຎາຓຈຣິຍາ? ທສ຺ສນຕ຺ຖາຍ ອາວຊ຺ຊນກິຣິຍາພ຺ຍາກຕາ ວິຎ຺ຎາຓຈຣິຍາ ຣູເປສຸ, ທສ຺ສນຏ຺ໂຐ ຈກ຺ຂຸວິຎ຺ຎາຓໍ ວິຎ຺ຎາຓຈຣິຍາ ຣູເປສຸ, ທິຏ຺ຐຕ຺ຕາ ອຠິນິໂຣປນາ ວິປາກມໂນຘາຕຸ [ອຠິນິໂຣປນວິປາກມໂນຘາຕຸ (ສ຺ຍາ.)] ວິຎ຺ຎາຓຈຣິຍາ ຣູເປສຸ, ອຠິນິໂຣປິຕຕ຺ຕາ ວິປາກມໂນວິຎ຺ຎາຓຘາຕຸ ວິຎ຺ຎາຓຈຣິຍາ ຣູເປສຸ. ສວນຕ຺ຖາຍ ອາວຊ຺ຊນກິຣິຍາພ຺ຍາກຕາ ວິຎ຺ຎາຓຈຣິຍາ ສທ຺ເທສຸ, ສວນຕ຺ໂຖ ໂສຕວິຎ຺ຎາຓໍ ວິຎ຺ຎາຓຈຣິຍາ ສທ຺ເທສຸ, ສຸຕຕ຺ຕາ ອຠິນິໂຣປນາ ວິປາກມໂນຘາຕຸ ວິຎ຺ຎາຓຈຣິຍາ ສທ຺ເທສຸ, ອຠິນິໂຣປິຕຕ຺ຕາ ວິປາກມໂນວິຎ຺ຎາຓຘາຕຸ ວິຎ຺ຎາຓຈຣິຍາ ສທ຺ເທສຸ. ຆາຍນຕ຺ຖາຍ ອາວຊ຺ຊນກິຣິຍາພ຺ຍາກຕາ ວິຎ຺ຎາຓຈຣິຍາ ຄນ຺ເຘສຸ, ຆາຍນຏ຺ໂຐ [ຆາຍນຕ຺ໂຖ (ສ຺ຍາ. ກ.)] ຆານວິຎ຺ຎາຓໍ ວິຎ຺ຎາຓຈຣິຍາ ຄນ຺ເຘສຸ, ຆາຍິຕຕ຺ຕາ ອຠິນິໂຣປນາ ວິປາກມໂນຘາຕຸ ວິຎ຺ຎາຓຈຣິຍາ ຄນ຺ເຘສຸ, ອຠິນິໂຣປິຕຕ຺ຕາ ວິປາກມໂນວິຎ຺ຎາຓຘາຕຸ ວິຎ຺ຎາຓຈຣິຍາ ຄນ຺ເຘສຸ. ສາຍນຕ຺ຖາຍ ອາວຊ຺ຊນກິຣິຍາພ຺ຍາກຕາ ວິຎ຺ຎາຓຈຣິຍາ ຣເສສຸ, ສາຍນຏ຺ໂຐ ຊິວ຺ຫາວິຎ຺ຎາຓໍ ວິຎ຺ຎາຓຈຣິຍາ ຣເສສຸ, ສາຍິຕຕ຺ຕາ ອຠິນິໂຣປນາ ວິປາກມໂນຘາຕຸ ວິຎ຺ຎາຓຈຣິຍາ ຣເສສຸ, ອຠິນິໂຣປິຕຕ຺ຕາ ວິປາກມໂນວິຎ຺ຎາຓຘາຕຸ ວິຎ຺ຎາຓຈຣິຍາ ຣເສສຸ. ຜຸສນຕ຺ຖາຍ ອາວຊ຺ຊນກິຣິຍາພ຺ຍາກຕາ ວິຎ຺ຎາຓຈຣິຍາ ໂຜຏ຺ຐພ຺ເພສຸ, ຜຸສນຏ຺ໂຐ ກາຍວິຎ຺ຎາຓໍ ວິຎ຺ຎາຓຈຣິຍາ ໂຜຏ຺ຐພ຺ເພສຸ, ຜຸຏ຺ຐຕ຺ຕາ ອຠິນິໂຣປນາ ວິປາກມໂນຘາຕຸ ວິຎ຺ຎາຓຈຣິຍາ ໂຜຏ຺ຐພ຺ເພສຸ, ອຠິນິໂຣປິຕຕ຺ຕາ ວິປາກມໂນວິຎ຺ຎາຓຘາຕຸ ວິຎ຺ຎາຓຈຣິຍາ ໂຜຏ຺ຐພ຺ເພສຸ. ວິຊານນຕ຺ຖາຍ ອາວຊ຺ຊນກິຣິຍາພ຺ຍາກຕາ ວິຎ຺ຎາຓຈຣິຍາ ຘມ຺ເມສຸ, ວິຊານນຏ຺ໂຐ ມໂນວິຎ຺ຎາຓໍ ວິຎ຺ຎາຓຈຣິຍາ ຘມ຺ເມສຸ, ວິຎ຺ຎາຕຕ຺ຕາ ອຠິນິໂຣປນາ ວິປາກມໂນຘາຕຸ ວິຎ຺ຎາຓຈຣິຍາ ຘມ຺ເມສຸ, ອຠິນິໂຣປິຕຕ຺ຕາ ວິປາກມໂນວິຎ຺ຎາຓຘາຕຸ ວິຎ຺ຎາຓຈຣິຍາ ຘມ຺ເມສຸ.

໖໙. ວິຎ຺ຎາຓຈຣິຍາຕິ ເກນຏ຺ເຐນ ວິຎ຺ຎາຓຈຣິຍາ? ນີຣາຄາ ຈຣຕີຕິ – ວິຎ຺ຎາຓຈຣິຍາ. ນິທ຺ໂທສາ ຈຣຕີຕິ – ວິຎ຺ຎາຓຈຣິຍາ. ນິມ຺ໂມຫາ ຈຣຕີຕິ – ວິຎ຺ຎາຓຈຣິຍາ. ນິມ຺ມານາ ຈຣຕີຕິ – ວິຎ຺ຎາຓຈຣິຍາ. ນິທ຺ທິຏ຺ຐິ ຈຣຕີຕິ – ວິຎ຺ຎາຓຈຣິຍາ ນິອຸທ຺ຘຈ຺ຈາ ຈຣຕີຕິ – ວິຎ຺ຎາຓຈຣິຍາ. ນິພ຺ພິຈິກິຈ຺ຉາ ຈຣຕີຕິ – ວິຎ຺ຎາຓຈຣິຍາ. ນານຸສຍາ ຈຣຕີຕິ – ວິຎ຺ຎາຓຈຣິຍາ. ຣາຄວິປ຺ປຍຸຕ຺ຕາ ຈຣຕີຕິ – ວິຎ຺ຎາຓຈຣິຍາ. ໂທສວິປ຺ປຍຸຕ຺ຕາ ຈຣຕີຕິ – ວິຎ຺ຎາຓຈຣິຍາ. ໂມຫວິປ຺ປຍຸຕ຺ຕາ ຈຣຕີຕິ – ວິຎ຺ຎາຓຈຣິຍາ. ມານວິປ຺ປຍຸຕ຺ຕາ ຈຣຕີຕິ – ວິຎ຺ຎາຓຈຣິຍາ. ທິຏ຺ຐິວິປ຺ປຍຸຕ຺ຕາ ຈຣຕີຕິ – ວິຎ຺ຎາຓຈຣິຍາ. ອຸທ຺ຘຈ຺ຈວິປ຺ປຍຸຕ຺ຕາ ຈຣຕີຕິ – ວິຎ຺ຎາຓຈຣິຍາ. ວິຈິກິຈ຺ຉາວິປ຺ປຍຸຕ຺ຕາ ຈຣຕີຕິ – ວິຎ຺ຎາຓຈຣິຍາ. ອນຸສຍວິປ຺ປຍຸຕ຺ຕາ ຈຣຕີຕິ – ວິຎ຺ຎາຓຈຣິຍາ. ກຸສເລຫິ ກມ຺ເມຫິ ສມ຺ປຍຸຕ຺ຕາ ຈຣຕີຕິ – ວິຎ຺ຎາຓຈຣິຍາ. ອກຸສເລຫິ ກມ຺ເມຫິ ວິປ຺ປຍຸຕ຺ຕາ ຈຣຕີຕິ – ວິຎ຺ຎາຓຈຣິຍາ. ສາວຊ຺ເຊຫິ ກມ຺ເມຫິ ວິປ຺ປຍຸຕ຺ຕາ ຈຣຕີຕິ – ວິຎ຺ຎາຓຈຣິຍາ. ອນວຊ຺ເຊຫິ ກມ຺ເມຫິ ສມ຺ປຍຸຕ຺ຕາ ຈຣຕີຕິ – ວິຎ຺ຎາຓຈຣິຍາ. ກຓ຺ເຫຫິ ກມ຺ເມຫິ ວິປ຺ປຍຸຕ຺ຕາ ຈຣຕີຕິ – ວິຎ຺ຎາຓຈຣິຍາ. ສຸກ຺ເກຫິ ກມ຺ເມຫິ ສມ຺ປຍຸຕ຺ຕາ ຈຣຕີຕິ – ວິຎ຺ຎາຓຈຣິຍາ. ສຸຂຸທ຺ຣເຍຫິ ກມ຺ເມຫິ ສມ຺ປຍຸຕ຺ຕາ ຈຣຕີຕິ – ວິຎ຺ຎາຓຈຣິຍາ. ທຸກ຺ຂຸທ຺ຣເຍຫິ ກມ຺ເມຫິ ວິປ຺ປຍຸຕ຺ຕາ ຈຣຕີຕິ – ວິຎ຺ຎາຓຈຣິຍາ. ສຸຂວິປາເກຫິ ກມ຺ເມຫິ ສມ຺ປຍຸຕ຺ຕາ ຈຣຕີຕິ – ວິຎ຺ຎາຓຈຣິຍາ. ທຸກ຺ຂວິປາເກຫິ ກມ຺ເມຫິ ວິປ຺ປຍຸຕ຺ຕາ ຈຣຕີຕິ – ວິຎ຺ຎາຓຈຣິຍາ. ວິຎ຺ຎາເຕ ຈຣຕີຕິ – ວິຎ຺ຎາຓຈຣິຍາ. ວິຎ຺ຎາຓສ຺ສ ເອວຣູປາ ຈຣິຍາ ໂຫຕີຕິ – ວິຎ຺ຎາຓຈຣິຍາ. ປກຕິປຣິສຸທ຺ຘມິທໍ ຈິຕ຺ຕໍ ນິກ຺ກິເລສຏ຺ເຐນາຕິ – ວິຎ຺ຎາຓຈຣິຍາ. ອຍໍ ວິຎ຺ຎາຓຈຣິຍາ.

ກຕມາ ອຎ຺ຎາຓຈຣິຍາ? ມນາປິເຍສຸ ຣູເປສຸ ຣາຄສ຺ສ ຊວນຕ຺ຖາຍ ອາວຊ຺ຊນກິຣິຍາພ຺ຍາກຕາ ວິຎ຺ຎາຓຈຣິຍາ; ຣາຄສ຺ສ ຊວນາ ອຎ຺ຎາຓຈຣິຍາ. ອມນາປິເຍສຸ ຣູເປສຸ ໂທສສ຺ສ ຊວນຕ຺ຖາຍ ອາວຊ຺ຊນກິຣິຍາພ຺ຍາກຕາ ວິຎ຺ຎາຓຈຣິຍາ; ໂທສສ຺ສ ຊວນາ ອຎ຺ຎາຓຈຣິຍາ. ຕທຸຠເຍນ ອສມເປກ຺ຂນສ຺ມິໍ ວຕ຺ຖຸສ຺ມິໍ ໂມຫສ຺ສ ຊວນຕ຺ຖາຍ ອາວຊ຺ຊນກິຣິຍາພ຺ຍາກຕາ ວິຎ຺ຎາຓຈຣິຍາ; ໂມຫສ຺ສ ຊວນາ ອຎ຺ຎາຓຈຣິຍາ. ວິນິພນ຺ຘສ຺ສ ມານສ຺ສ ຊວນຕ຺ຖາຍ ອາວຊ຺ຊນກິຣິຍາພ຺ຍາກຕາ ວິຎ຺ຎາຓຈຣິຍາ; ມານສ຺ສ ຊວນາ ອຎ຺ຎາຓຈຣິຍາ. ປຣາມຏ຺ຐາຍ ທິຏ຺ຐິຍາ ຊວນຕ຺ຖາຍ ອາວຊ຺ຊນກິຣິຍາພ຺ຍາກຕາ ວິຎ຺ຎາຓຈຣິຍາ; ທິຏ຺ຐິຍາ ຊວນາ ອຎ຺ຎາຓຈຣິຍາ. ວິກ຺ເຂປຄຕສ຺ສ ອຸທ຺ຘຈ຺ຈສ຺ສ ຊວນຕ຺ຖາຍ ອາວຊ຺ຊນກິຣິຍາພ຺ຍາກຕາ ວິຎ຺ຎາຓຈຣິຍາ; ອຸທ຺ຘຈ຺ຈສ຺ສ ຊວນາ ອຎ຺ຎາຓຈຣິຍາ. ອນິຏ຺ຐງ຺ຄຕາຍ ວິຈິກິຈ຺ຉາຍ ຊວນຕ຺ຖາຍ ອາວຊ຺ຊນກິຣິຍາພ຺ຍາກຕາ ວິຎ຺ຎາຓຈຣິຍາ; ວິຈິກິຈ຺ຉາຍ ຊວນາ ອຎ຺ຎາຓຈຣິຍາ. ຖາມຄຕສ຺ສ ອນຸສຍສ຺ສ ຊວນຕ຺ຖາຍ ອາວຊ຺ຊນກິຣິຍາພ຺ຍາກຕາ ວິຎ຺ຎາຓຈຣິຍາ; ອນຸສຍສ຺ສ ຊວນາ ອຎ຺ຎາຓຈຣິຍາ.

ມນາປິເຍສຸ ສທ຺ເທສຸ…ເປ… ມນາປິເຍສຸ ຄນ຺ເຘສຸ…ເປ… ມນາປິເຍສຸ ຣເສສຸ…ເປ… ມນາປິເຍສຸ ໂຜຏ຺ຐພ຺ເພສຸ…ເປ… ມນາປິເຍສຸ ຘມ຺ເມສຸ ຣາຄສ຺ສ ຊວນຕ຺ຖາຍ ອາວຊ຺ຊນກິຣິຍາພ຺ຍາກຕາ ວິຎ຺ຎາຓຈຣິຍາ; ຣາຄສ຺ສ ຊວນາ ອຎ຺ຎາຓຈຣິຍາ. ອມນາປິເຍສຸ ຘມ຺ເມສຸ ໂທສສ຺ສ ຊວນຕ຺ຖາຍ ອາວຊ຺ຊນກິຣິຍາພ຺ຍາກຕາ ວິຎ຺ຎາຓຈຣິຍາ; ໂທສສ຺ສ ຊວນາ ອຎ຺ຎາຓຈຣິຍາ. ຕທຸຠເຍນ ອສມເປກ຺ຂນສ຺ມິໍ ວຕ຺ຖຸສ຺ມິໍ ໂມຫສ຺ສ ຊວນຕ຺ຖາຍ ອາວຊ຺ຊນກິຣິຍາພ຺ຍາກຕາ ວິຎ຺ຎາຓຈຣິຍາ; ໂມຫສ຺ສ ຊວນາ ອຎ຺ຎາຓຈຣິຍາ. ວິນິພນ຺ຘສ຺ສ ມານສ຺ສ ຊວນຕ຺ຖາຍ ອາວຊ຺ຊນກິຣິຍາພ຺ຍາກຕາ ວິຎ຺ຎາຓຈຣິຍາ; ມານສ຺ສ ຊວນາ ອຎ຺ຎາຓຈຣິຍາ. ປຣາມຏ຺ຐາຍ ທິຏ຺ຐິຍາ ຊວນຕ຺ຖາຍ ອາວຊ຺ຊນກິຣິຍາພ຺ຍາກຕາ ວິຎ຺ຎາຓຈຣິຍາ; ທິຏ຺ຐິຍາ ຊວນາ ອຎ຺ຎາຓຈຣິຍາ. ວິກ຺ເຂປຄຕສ຺ສ ອຸທ຺ຘຈ຺ຈສ຺ສ ຊວນຕ຺ຖາຍ ອາວຊ຺ຊນກິຣິຍາພ຺ຍາກຕາ ວິຎ຺ຎາຓຈຣິຍາ; ອຸທ຺ຘຈ຺ຈສ຺ສ ຊວນາ ອຎ຺ຎາຓຈຣິຍາ; ອນິຏ຺ຐງ຺ຄຕາຍ ວິຈິກິຈ຺ຉາຍ ຊວນຕ຺ຖາຍ ອາວຊ຺ຊນກິຣິຍາພ຺ຍາກຕາ ວິຎ຺ຎາຓຈຣິຍາ; ວິຈິກິຈ຺ຉາຍ ຊວນາ ອຎ຺ຎາຓຈຣິຍາ. ຖາມຄຕສ຺ສ ອນຸສຍສ຺ສ ຊວນຕ຺ຖາຍ ອາວຊ຺ຊນກິຣິຍາພ຺ຍາກຕາ ວິຎ຺ຎາຓຈຣິຍາ; ອນຸສຍສ຺ສ ຊວນາ ອຎ຺ຎາຓຈຣິຍາ.

໗໐. ອຎ຺ຎາຓຈຣິຍາຕິ ເກນຏ຺ເຐນ ອຎ຺ຎາຓຈຣິຍາ? ສຣາຄາ ຈຣຕີຕິ – ອຎ຺ຎາຓຈຣິຍາ. ສໂທສາ ຈຣຕີຕິ – ອຎ຺ຎາຓຈຣິຍາ. ສໂມຫາ ຈຣຕີຕິ – ອຎ຺ຎາຓຈຣິຍາ. ສມານາ ຈຣຕີຕິ – ອຎ຺ຎາຓຈຣິຍາ. ສທິຏ຺ຐິ ຈຣຕີຕິ – ອຎ຺ຎາຓຈຣິຍາ. ສອຸທ຺ຘຈ຺ຈາ ຈຣຕີຕິ – ອຎ຺ຎາຓຈຣິຍາ. ສວິຈິກິຈ຺ຉາ ຈຣຕີຕິ – ອຎ຺ຎາຓຈຣິຍາ. ສານຸສຍາ ຈຣຕີຕິ – ອຎ຺ຎາຓຈຣິຍາ. ຣາຄສມ຺ປຍຸຕ຺ຕາ ຈຣຕີຕິ – ອຎ຺ຎາຓຈຣິຍາ. ໂທສສມ຺ປຍຸຕ຺ຕາ ຈຣຕີຕິ – ອຎ຺ຎາຓຈຣິຍາ. ໂມຫສມ຺ປຍຸຕ຺ຕາ ຈຣຕີຕິ – ອຎ຺ຎາຓຈຣິຍາ. ມານສມ຺ປຍຸຕ຺ຕາ ຈຣຕີຕິ – ອຎ຺ຎາຓຈຣິຍາ. ທິຏ຺ຐິສມ຺ປຍຸຕ຺ຕາ ຈຣຕີຕິ – ອຎ຺ຎາຓຈຣິຍາ. ອຸທ຺ຘຈ຺ຈສມ຺ປຍຸຕ຺ຕາ ຈຣຕີຕິ – ອຎ຺ຎາຓຈຣິຍາ. ວິຈິກິຈ຺ຉາສມ຺ປຍຸຕ຺ຕາ ຈຣຕີຕິ – ອຎ຺ຎາຓຈຣິຍາ. ອນຸສຍສມ຺ປຍຸຕ຺ຕາ ຈຣຕີຕິ – ອຎ຺ຎາຓຈຣິຍາ. ກຸສເລຫິ ກມ຺ເມຫິ ວິປ຺ປຍຸຕ຺ຕາ ຈຣຕີຕິ – ອຎ຺ຎາຓຈຣິຍາ. ອກຸສເລຫິ ກມ຺ເມຫິ ສມ຺ປຍຸຕ຺ຕາ ຈຣຕີຕິ – ອຎ຺ຎາຓຈຣິຍາ. ສາວຊ຺ເຊຫິ ກມ຺ເມຫິ ສມ຺ປຍຸຕ຺ຕາ ຈຣຕີຕິ – ອຎ຺ຎາຓຈຣິຍາ. ອນວຊ຺ເຊຫິ ກມ຺ເມຫິ ວິປ຺ປຍຸຕ຺ຕາ ຈຣຕີຕິ – ອຎ຺ຎາຓຈຣິຍາ. ກຓ຺ເຫຫິ ກມ຺ເມຫິ ສມ຺ປຍຸຕ຺ຕາ ຈຣຕີຕິ – ອຎ຺ຎາຓຈຣິຍາ. ສຸກ຺ເກຫິ ກມ຺ເມຫິ ວິປ຺ປຍຸຕ຺ຕາ ຈຣຕີຕິ – ອຎ຺ຎາຓຈຣິຍາ. ສຸຂຸທ຺ຣເຍຫິ ກມ຺ເມຫິ ວິປ຺ປຍຸຕ຺ຕາ ຈຣຕີຕິ – ອຎ຺ຎາຓຈຣິຍາ. ທຸກ຺ຂຸທ຺ຣເຍຫິ ກມ຺ເມຫິ ສມ຺ປຍຸຕ຺ຕາ ຈຣຕີຕິ – ອຎ຺ຎາຓຈຣິຍາ. ສຸຂວິປາເກຫິ ກມ຺ເມຫິ ວິປ຺ປຍຸຕ຺ຕາ ຈຣຕີຕິ – ອຎ຺ຎາຓຈຣິຍາ. ທຸກ຺ຂວິປາເກຫິ ກມ຺ເມຫິ ສມ຺ປຍຸຕ຺ຕາ ຈຣຕີຕິ – ອຎ຺ຎາຓຈຣິຍາ. ອຎ຺ຎາເຕ ຈຣຕີຕິ – ອຎ຺ຎາຓຈຣິຍາ. ອຎ຺ຎາຓສ຺ສ ເອວຣູປາ ຈຣິຍາ ໂຫຕີຕິ – ອຎ຺ຎາຓຈຣິຍາ. ອຍໍ ອຎ຺ຎາຓຈຣິຍາ.

໗໑. ກຕມາ ຎາຓຈຣິຍາ? ອນິຈ຺ຈານຸປສ຺ສນຕ຺ຖາຍ ອາວຊ຺ຊນກິຣິຍາພ຺ຍາກຕາ ວິຎ຺ຎາຓຈຣິຍາ; ອນິຈ຺ຈານຸປສ຺ສນາ ຎາຓຈຣິຍາ. ທຸກ຺ຂານຸປສ຺ສນຕ຺ຖາຍ ອາວຊ຺ຊນກິຣິຍາພ຺ຍາກຕາ ວິຎ຺ຎາຓຈຣິຍາ; ທຸກ຺ຂານຸປສ຺ສນາ ຎາຓຈຣິຍາ. ອນຕ຺ຕານຸປສ຺ສນຕ຺ຖາຍ ອາວຊ຺ຊນກິຣິຍາພ຺ຍາກຕາ ວິຎ຺ຎາຓຈຣິຍາ; ອນຕ຺ຕານຸປສ຺ສນາ ຎາຓຈຣິຍາ. ນິພ຺ພິທານຸປສ຺ສນຕ຺ຖາຍ…ເປ… ວິຣາຄານຸປສ຺ສນຕ຺ຖາຍ… ນິໂຣຘານຸປສ຺ສນຕ຺ຖາຍ… ປຏິນິສ຺ສຄ຺ຄານຸປສ຺ສນຕ຺ຖາຍ… ຂຍານຸປສ຺ສນຕ຺ຖາຍ… ວຍານຸປສ຺ສນຕ຺ຖາຍ… ວິປຣິຓາມານຸປສ຺ສນຕ຺ຖາຍ… ອນິມິຕ຺ຕານຸປສ຺ສນຕ຺ຖາຍ… ອປ຺ປຓິຫິຕານຸປສ຺ສນຕ຺ຖາຍ… ສຸຎ຺ຎຕານຸປສ຺ສນຕ຺ຖາຍ… ອຘິປຎ຺ຎາຘມ຺ມານຸປສ຺ສນຕ຺ຖາຍ… ຍຖາຠູຕຎາຓທສ຺ສນຕ຺ຖາຍ… ອາທີນວານຸປສ຺ສນຕ຺ຖາຍ… ປຏິສງ຺ຂານຸປສ຺ສນຕ຺ຖາຍ ອາວຊ຺ຊນກິຣິຍາພ຺ຍາກຕາ ວິຎ຺ຎາຓຈຣິຍາ; ປຏິສງ຺ຂານຸປສ຺ສນາ ຎາຓຈຣິຍາ. ວິວຏ຺ຏນານຸປສ຺ສນາ ຎາຓຈຣິຍາ. ໂສຕາປຕ຺ຕິມຄ຺ໂຄ ຎາຓຈຣິຍາ. ໂສຕາປຕ຺ຕິຜລສມາປຕ຺ຕິ ຎາຓຈຣິຍາ. ສກທາຄາມິມຄ຺ໂຄ ຎາຓຈຣິຍາ. ສກທາຄາມິຜລສມາປຕ຺ຕິ ຎາຓຈຣິຍາ. ອນາຄາມິມຄ຺ໂຄ ຎາຓຈຣິຍາ. ອນາຄາມິຜລສມາປຕ຺ຕິ ຎາຓຈຣິຍາ. ອຣຫຕ຺ຕມຄ຺ໂຄ ຎາຓຈຣິຍາ. ອຣຫຕ຺ຕຜລສມາປຕ຺ຕິ ຎາຓຈຣິຍາ.

ຎາຓຈຣິຍາຕິ ເກນຏ຺ເຐນ ຎາຓຈຣິຍາ? ນີຣາຄາ ຈຣຕີຕິ – ຎາຓຈຣິຍາ. ນິທ຺ໂທສາ ຈຣຕີຕິ – ຎາຓຈຣິຍາ…ເປ… ນານຸສຍາ ຈຣຕີຕິ – ຎາຓຈຣິຍາ. ຣາຄວິປ຺ປຍຸຕ຺ຕາ ຈຣຕີຕິ – ຎາຓຈຣິຍາ. ໂທສວິປ຺ປຍຸຕ຺ຕາ ຈຣຕີຕິ – ຎາຓຈຣິຍາ. ໂມຫວິປ຺ປຍຸຕ຺ຕາ ຈຣຕີຕິ – ຎາຓຈຣິຍາ. ມານວິປ຺ປຍຸຕ຺ຕາ…ເປ… ທິຏ຺ຐິວິປ຺ປຍຸຕ຺ຕາ… ອຸທ຺ຘຈ຺ຈວິປ຺ປຍຸຕ຺ຕາ… ວິຈິກິຈ຺ຉາວິປ຺ປຍຸຕ຺ຕາ… ອນຸສຍວິປ຺ປຍຸຕ຺ຕາ… ກຸສເລຫິ ກມ຺ເມຫິ ສມ຺ປຍຸຕ຺ຕາ… ອກຸສເລຫິ ກມ຺ເມຫິ ວິປ຺ປຍຸຕ຺ຕາ… ສາວຊ຺ເຊຫິ ກມ຺ເມຫິ ວິປ຺ປຍຸຕ຺ຕາ… ອນວຊ຺ເຊຫິ ກມ຺ເມຫິ ສມ຺ປຍຸຕ຺ຕາ… ກຓ຺ເຫຫິ ກມ຺ເມຫິ ວິປ຺ປຍຸຕ຺ຕາ… ສຸກ຺ເກຫິ ກມ຺ເມຫິ ສມ຺ປຍຸຕ຺ຕາ… ສຸຂຸທ຺ຣເຍຫິ ກມ຺ເມຫິ ສມ຺ປຍຸຕ຺ຕາ… ທຸກ຺ຂຸທ຺ຣເຍຫິ ກມ຺ເມຫິ ວິປ຺ປຍຸຕ຺ຕາ… ສຸຂວິປາເກຫິ ກມ຺ເມຫິ ສມ຺ປຍຸຕ຺ຕາ ຈຣຕີຕິ – ຎາຓຈຣິຍາ. ທຸກ຺ຂວິປາເກຫິ ກມ຺ເມຫິ ວິປ຺ປຍຸຕ຺ຕາ ຈຣຕີຕິ – ຎາຓຈຣິຍາ. ຎາເຕ ຈຣຕີຕິ – ຎາຓຈຣິຍາ. ຎາຓສ຺ສ ເອວຣູປາ ຈຣິຍາ ໂຫຕີຕິ – ຎາຓຈຣິຍາ. ອຍໍ ຎາຓຈຣິຍາ. ອຎ຺ຎາ ວິຎ຺ຎາຓຈຣິຍາ, ອຎ຺ຎາ ອຎ຺ຎາຓຈຣິຍາ, ອຎ຺ຎາ ຎາຓຈຣິຍາຕິ. ຕໍ ຎາຕຏ຺ເຐນ ຎາຓໍ, ປຊານນຏ຺ເຐນ ປຎ຺ຎາ. ເຕນ ວຸຈ຺ຈຕິ – ‘‘ຈຣິຍາວວຕ຺ຖາເນ ປຎ຺ຎາ ຈຣິຍານານຕ຺ເຕ ຎາຓໍ’’.

ຈຣິຍານານຕ຺ຕຎາຓນິທ຺ເທໂສ ສຕ຺ຕຣສໂມ.