໑໘. ຠູມິນານຕ຺ຕຎາຓນິທ຺ເທໂສ

໗໒. ກຖໍ ຈຕຸຘມ຺ມວວຕ຺ຖາເນ ປຎ຺ຎາ ຠູມິນານຕ຺ເຕ ຎາຓໍ? ຈຕສ຺ໂສ ຠູມິໂຍ – ກາມາວຈຣາ ຠູມິ, ຣູປາວຈຣາ ຠູມິ, ອຣູປາວຈຣາ ຠູມິ, ອປຣິຍາປນ຺ນາ ຠູມິ. ກຕມາ ກາມາວຈຣາ ຠູມິ? ເຫຏ຺ຐໂຕ ອວີຈິນິຣຍໍ ປຣິຍນ຺ຕໍ ກຣິຕ຺ວາ ອຸປຣິໂຕ ປຣນິມ຺ມິຕວສວຕ຺ຕີ ເທເວ [ປຣນິມ຺ມິຕວສວຕ຺ຕິເທເວ (ກ.)] ອນ຺ໂຕກຣິຕ຺ວາ ຍໍ ເອຕສ຺ມິໍ ອນ຺ຕເຣ ເອຕ຺ຖາວຈຣາ ເອຕ຺ຖ ປຣິຍາປນ຺ນາ ຂນ຺ຘຘາຕຸອາຍຕນາ ຣູປໍ ເວທນາ ສຎ຺ຎາ ສງ຺ຂາຣາ ວິຎ຺ຎາຓໍ – ອຍໍ ກາມາວຈຣາ ຠູມິ.

ກຕມາ ຣູປາວຈຣາ ຠູມິ? ເຫຏ຺ຐໂຕ ພ຺ຣຫ຺ມໂລກໍ ປຣິຍນ຺ຕໍ ກຣິຕ຺ວາ ອຸປຣິໂຕ ອກນິຏ຺ເຐ ເທເວ ອນ຺ໂຕກຣິຕ຺ວາ ຍໍ ເອຕສ຺ມິໍ ອນ຺ຕເຣ ເອຕ຺ຖາວຈຣາ ເອຕ຺ຖ ປຣິຍາປນ຺ນາ ສມາປນ຺ນສ຺ສ ວາ ອຸປປນ຺ນສ຺ສ ວາ ທິຏ຺ຐຘມ຺ມສຸຂວິຫາຣິສ຺ສ ວາ ຈິຕ຺ຕເຈຕສິກາ ຘມ຺ມາ – ອຍໍ ຣູປາວຈຣາ ຠູມິ.

ກຕມາ ອຣູປາວຈຣາ ຠູມິ? ເຫຏ຺ຐໂຕ ອາກາສານຎ຺ຈາຍຕນູປເຄ ເທເວ ປຣິຍນ຺ຕໍ ກຣິຕ຺ວາ ອຸປຣິໂຕ ເນວສຎ຺ຎານາສຎ຺ຎາຍຕນູປເຄ ເທເວ ອນ຺ໂຕກຣິຕ຺ວາ ຍໍ ເອຕສ຺ມິໍ ອນ຺ຕເຣ ເອຕ຺ຖາວຈຣາ ເອຕ຺ຖ ປຣິຍາປນ຺ນາ ສມາປນ຺ນສ຺ສ ວາ ອຸປປນ຺ນສ຺ສ ວາ ທິຏ຺ຐຘມ຺ມສຸຂວິຫາຣິສ຺ສ ວາ ຈິຕ຺ຕເຈຕສິກາ ຘມ຺ມາ – ອຍໍ ອຣູປາວຈຣາ ຠູມິ.

ກຕມາ ອປຣິຍາປນ຺ນາ ຠູມິ? ອປຣິຍາປນ຺ນາ ມຄ຺ຄາ ຈ ມຄ຺ຄຜລານິ ຈ ອສງ຺ຂຕາ ຈ ຘາຕຸ – ອຍໍ ອປຣິຍາປນ຺ນາ ຠູມິ. ອິມາ ຈຕສ຺ໂສ ຠູມິໂຍ.

ອປຣາປິ ຈຕສ຺ໂສ ຠູມິໂຍ ຈຕ຺ຕາໂຣ ສຕິປຏ຺ຐານາ ຈຕ຺ຕາໂຣ ສມ຺ມປ຺ປຘານາ, ຈຕ຺ຕາໂຣ ອິທ຺ຘິປາທາ, ຈຕ຺ຕາຣິ ຌານານິ, ຈຕສ຺ໂສ ອປ຺ປມຎ຺ຎາໂຍ, ຈຕສ຺ໂສ ອຣູປສມາປຕ຺ຕິໂຍ, ຈຕສ຺ໂສ ປຏິສມ຺ຠິທາ, ຈຕສ຺ໂສ ປຏິປທາ, ຈຕ຺ຕາຣິ ອາຣມ຺ມຓານິ, ຈຕ຺ຕາໂຣ ອຣິຍວໍສາ, ຈຕ຺ຕາຣິ ສງ຺ຄຫວຕ຺ຖູນິ, ຈຕ຺ຕາຣິ ຈກ຺ການິ, ຈຕ຺ຕາຣິ ຘມ຺ມປທານິ – ອິມາ ຈຕສ຺ໂສ ຠູມິໂຍ. ຕໍ ຎາຕຏ຺ເຐນ ຎາຓໍ, ປຊານນຏ຺ເຐນ ປຎ຺ຎາ. ເຕນ ວຸຈ຺ຈຕິ – ‘‘ຈຕຸຘມ຺ມວວຕ຺ຖາເນ ປຎ຺ຎາ ຠູມິນານຕ຺ເຕ ຎາຓໍ’’.

ຠູມິນານຕ຺ຕຎາຓນິທ຺ເທໂສ ອຏ຺ຐາຣສໂມ.