໑໙. ຘມ຺ມນານຕ຺ຕຎາຓນິທ຺ເທໂສ

໗໓. ກຖໍ ນວຘມ຺ມວວຕ຺ຖາເນ ປຎ຺ຎາ ຘມ຺ມນານຕ຺ເຕ ຎາຓໍ? ກຖໍ ຘມ຺ເມ ວວຕ຺ເຖຕິ? ກາມາວຈເຣ ຘມ຺ເມ ກຸສລໂຕ ວວຕ຺ເຖຕິ, ອກຸສລໂຕ ວວຕ຺ເຖຕິ, ອພ຺ຍາກຕໂຕ ວວຕ຺ເຖຕິ. ຣູປາວຈເຣ ຘມ຺ເມ ກຸສລໂຕ ວວຕ຺ເຖຕິ, ອພ຺ຍາກຕໂຕ ວວຕ຺ເຖຕິ. ອຣູປາວຈເຣ ຘມ຺ເມ ກຸສລໂຕ ວວຕ຺ເຖຕິ, ອພ຺ຍາກຕໂຕ ວວຕ຺ເຖຕິ. ອປຣິຍາປນ຺ເນ ຘມ຺ເມ ກຸສລໂຕ ວວຕ຺ເຖຕິ, ອພ຺ຍາກຕໂຕ ວວຕ຺ເຖຕິ.

ກຖໍ ກາມາວຈເຣ ຘມ຺ເມ ກຸສລໂຕ ວວຕ຺ເຖຕິ, ອກຸສລໂຕ ວວຕ຺ເຖຕິ, ອພ຺ຍາກຕໂຕ ວວຕ຺ເຖຕິ? ທສ ກຸສລກມ຺ມປເຖ ກຸສລໂຕ ວວຕ຺ເຖຕິ, ທສ ອກຸສລກມ຺ມປເຖ ອກຸສລໂຕ ວວຕ຺ເຖຕິ, ຣູປຎ຺ຈ ວິປາກຎ຺ຈ ກິຣິຍຎ຺ຈ ອພ຺ຍາກຕໂຕ ວວຕ຺ເຖຕິ – ເອວໍ ກາມາວຈເຣ ຘມ຺ເມ ກຸສລໂຕ ວວຕ຺ເຖຕິ, ອກຸສລໂຕ ວວຕ຺ເຖຕິ, ອພ຺ຍາກຕໂຕ ວວຕ຺ເຖຕິ.

ກຖໍ ຣູປາວຈເຣ ຘມ຺ເມ ກຸສລໂຕ ວວຕ຺ເຖຕິ, ອພ຺ຍາກຕໂຕ ວວຕ຺ເຖຕິ? ອິຘຏ຺ຐສ຺ສ ຈຕ຺ຕາຣິ ຌານານິ ກຸສລໂຕ ວວຕ຺ເຖຕິ, ຕຕ຺ຣູປປນ຺ນສ຺ສ ຈຕ຺ຕາຣິ ຌານານິ ອພ຺ຍາກຕໂຕ ວວຕ຺ເຖຕິ – ເອວໍ ຣູປາວຈເຣ ຘມ຺ເມ ກຸສລໂຕ ວວຕ຺ເຖຕິ, ອພ຺ຍາກຕໂຕ ວວຕ຺ເຖຕິ.

ກຖໍ ອຣູປາວຈເຣ ຘມ຺ເມ ກຸສລໂຕ ວວຕ຺ເຖຕິ, ອພ຺ຍາກຕໂຕ ວວຕ຺ເຖຕິ? ອິຘຏ຺ຐສ຺ສ ຈຕສ຺ໂສ ອຣູປາວຈຣສມາປຕ຺ຕິໂຍ ກຸສລໂຕ ວວຕ຺ເຖຕິ, ຕຕ຺ຣູປປນ຺ນສ຺ສ ຈຕສ຺ໂສ ອຣູປາວຈຣສມາປຕ຺ຕິໂຍ ອພ຺ຍາກຕໂຕ ວວຕ຺ເຖຕິ – ເອວໍ ອຣູປາວຈເຣ ຘມ຺ເມ ກຸສລໂຕ ວວຕ຺ເຖຕິ, ອພ຺ຍາກຕໂຕ ວວຕ຺ເຖຕິ.

ກຖໍ ອປຣິຍາປນ຺ເນ ຘມ຺ເມ ກຸສລໂຕ ວວຕ຺ເຖຕິ, ອພ຺ຍາກຕໂຕ ວວຕ຺ເຖຕິ? ຈຕ຺ຕາໂຣ ອຣິຍມຄ຺ເຄ ກຸສລໂຕ ວວຕ຺ເຖຕິ, ຈຕ຺ຕາຣິ ຈ ສາມຎ຺ຎຜລານິ ນິພ຺ພານຎ຺ຈ ອພ຺ຍາກຕໂຕ ວວຕ຺ເຖຕິ – ເອວໍ ອປຣິຍາປນ຺ເນ ຘມ຺ເມ ກຸສລໂຕ ວວຕ຺ເຖຕິ, ອພ຺ຍາກຕໂຕ ວວຕ຺ເຖຕິ. ເອວໍ ຘມ຺ເມ ວວຕ຺ເຖຕິ.

ນວ ປາໂມຊ຺ຊມູລກາ ຘມ຺ມາ. ອນິຈ຺ຈໂຕ ມນສິກໂຣໂຕ ປາໂມຊ຺ຊໍ ຊາຍຕິ, ປມຸທິຕສ຺ສ ປີຕິ ຊາຍຕິ, ປີຕິມນສ຺ສ ກາໂຍ ປສ຺ສມ຺ຠຕິ, ປສ຺ສທ຺ຘກາໂຍ ສຸຂໍ ເວເທຕິ, ສຸຂິໂນ ຈິຕ຺ຕໍ ສມາຘິຍຕິ. ສມາຫິເຕ ຈິຕ຺ເຕ ຍຖາຠູຕໍ ປຊານາຕິ ປສ຺ສຕິ. ຍຖາຠູຕໍ ຊານໍ ປສ຺ສໍ ນິພ຺ພິນ຺ທຕິ, ນິພ຺ພິນ຺ທໍ ວິຣຊ຺ຊຕິ, ວິຣາຄາ ວິມຸຈ຺ຈຕິ. ທຸກ຺ຂໂຕ ມນສິກໂຣໂຕ ປາໂມຊ຺ຊໍ ຊາຍຕິ…ເປ… ອນຕ຺ຕໂຕ ມນສິກໂຣໂຕ ປາໂມຊ຺ຊໍ ຊາຍຕິ…ເປ… ວິມຸຈ຺ຈຕິ.

ຣູປໍ ອນິຈ຺ຈໂຕ ມນສິກໂຣໂຕ ປາໂມຊ຺ຊໍ ຊາຍຕິ…ເປ… ຣູປໍ ທຸກ຺ຂໂຕ ມນສິກໂຣໂຕ…ເປ… ເວທນໍ… ສຎ຺ຎໍ… ສງ຺ຂາເຣ… ວິຎ຺ຎາຓໍ… ຈກ຺ຂຸໍ…ເປ… ຊຣາມຣຓໍ ອນິຈ຺ຈໂຕ ມນສິກໂຣໂຕ ປາໂມຊ຺ຊໍ ຊາຍຕິ…ເປ… ຊຣາມຣຓໍ ທຸກ຺ຂໂຕ ມນສິກໂຣໂຕ ປາໂມຊ຺ຊໍ ຊາຍຕິ…ເປ… ຊຣາມຣຓໍ ອນຕ຺ຕໂຕ ມນສິກໂຣໂຕ ປາໂມຊ຺ຊໍ ຊາຍຕິ, ປມຸທິຕສ຺ສ ປີຕິ ຊາຍຕິ, ປີຕິມນສ຺ສ ກາໂຍ ປສ຺ສມ຺ຠຕິ, ປສ຺ສທ຺ຘກາໂຍ ສຸຂໍ ເວເທຕິ, ສຸຂິໂນ ຈິຕ຺ຕໍ ສມາຘິຍຕິ. ສມາຫິເຕ ຈິຕ຺ເຕ ຍຖາຠູຕໍ ປຊານາຕິ ປສ຺ສຕິ. ຍຖາຠູຕໍ ຊານໍ ປສ຺ສໍ ນິພ຺ພິນ຺ທຕິ, ນິພ຺ພິນ຺ທໍ ວິຣຊ຺ຊຕິ, ວິຣາຄາ ວິມຸຈ຺ຈຕິ. ອິເມ ນວ ປາໂມຊ຺ຊມູລກາ ຘມ຺ມາ.

໗໔. ນວ ໂຍນິໂສ ມນສິກາຣມູລກາ ຘມ຺ມາ. ອນິຈ຺ຈໂຕ ໂຍນິໂສ ມນສິກໂຣໂຕ ປາໂມຊ຺ຊໍ ຊາຍຕິ, ປມຸທິຕສ຺ສ ປີຕິ ຊາຍຕິ, ປີຕິມນສ຺ສ ກາໂຍ ປສ຺ສມ຺ຠຕິ, ປສ຺ສທ຺ຘກາໂຍ ສຸຂໍ ເວເທຕິ, ສຸຂິໂນ ຈິຕ຺ຕໍ ສມາຘິຍຕິ. ສມາຫິເຕນ ຈິຕ຺ເຕນ ‘‘ອິທໍ ທຸກ຺ຂ’’ນ຺ຕິ ຍຖາຠູຕໍ ປຊານາຕິ, ‘‘ອຍໍ ທຸກ຺ຂສມຸທໂຍ’’ຕິ ຍຖາຠູຕໍ ປຊານາຕິ, ‘‘ອຍໍ ທຸກ຺ຂນິໂຣໂຘ’’ຕິ ຍຖາຠູຕໍ ປຊານາຕິ, ‘‘ອຍໍ ທຸກ຺ຂນິໂຣຘຄາມິນີ ປຏິປທາ’’ຕິ ຍຖາຠູຕໍ ປຊານາຕິ. ທຸກ຺ຂໂຕ ໂຍນິໂສ ມນສິກໂຣໂຕ ປາໂມຊ຺ຊໍ ຊາຍຕິ, ປມຸທິຕສ຺ສ ປີຕິ ຊາຍຕິ, ປີຕິມນສ຺ສ ກາໂຍ ປສ຺ສມ຺ຠຕິ, ປສ຺ສທ຺ຘກາໂຍ ສຸຂໍ ເວເທຕິ, ສຸຂິໂນ ຈິຕ຺ຕໍ ສມາຘິຍຕິ. ສມາຫິເຕນ ຈິຕ຺ເຕນ ‘‘ອິທໍ ທຸກ຺ຂ’’ນ຺ຕິ ຍຖາຠູຕໍ ປຊານາຕິ, ‘‘ອຍໍ ທຸກ຺ຂສມຸທໂຍ’’ຕິ ຍຖາຠູຕໍ ປຊານາຕິ, ‘‘ອຍໍ ທຸກ຺ຂນິໂຣໂຘ’’ຕິ ຍຖາຠູຕໍ ປຊານາຕິ, ‘‘ອຍໍ ທຸກ຺ຂນິໂຣຘຄາມິນີ ປຏິປທາ’’ຕິ ຍຖາຠູຕໍ ປຊານາຕິ. ອນຕ຺ຕໂຕ ໂຍນິໂສ ມນສິກໂຣໂຕ ປາໂມຊ຺ຊໍ ຊາຍຕິ…ເປ….

ຣູປໍ ອນິຈ຺ຈໂຕ ໂຍນິໂສ ມນສິກໂຣໂຕ ປາໂມຊ຺ຊໍ ຊາຍຕິ…ເປ… ຣູປໍ ທຸກ຺ຂໂຕ ໂຍນິໂສ ມນສິກໂຣໂຕ ປາໂມຊ຺ຊໍ ຊາຍຕິ…ເປ… ຣູປໍ ອນຕ຺ຕໂຕ ໂຍນິໂສ ມນສິກໂຣໂຕ ປາໂມຊ຺ຊໍ ຊາຍຕິ…ເປ… ເວທນໍ… ສຎ຺ຎໍ… ສງ຺ຂາເຣ… ວິຎ຺ຎາຓໍ… ຈກ຺ຂຸໍ…ເປ… ຊຣາມຣຓໍ ອນິຈ຺ຈໂຕ ໂຍນິໂສ ມນສິກໂຣໂຕ ປາໂມຊ຺ຊໍ ຊາຍຕິ…ເປ… ຊຣາມຣຓໍ ທຸກ຺ຂໂຕ ໂຍນິໂສ ມນສິກໂຣໂຕ ປາໂມຊ຺ຊໍ ຊາຍຕິ…ເປ… ຊຣາມຣຓໍ ອນຕ຺ຕໂຕ ໂຍນິໂສ ມນສິກໂຣໂຕ ປາໂມຊ຺ຊໍ ຊາຍຕິ, ປມຸທິຕສ຺ສ ປີຕິ ຊາຍຕິ, ປີຕິມນສ຺ສ ກາໂຍ ປສ຺ສມ຺ຠຕິ, ປສ຺ສທ຺ຘກາໂຍ ສຸຂໍ ເວເທຕິ, ສຸຂິໂນ ຈິຕ຺ຕໍ ສມາຘິຍຕິ. ສມາຫິເຕນ ຈິຕ຺ເຕນ ‘‘ອິທໍ ທຸກ຺ຂ’’ນ຺ຕິ ຍຖາຠູຕໍ ປຊານາຕິ, ‘‘ອຍໍ ທຸກ຺ຂສມຸທໂຍ’’ຕິ ຍຖາຠູຕໍ ປຊານາຕິ, ‘‘ອຍໍ ທຸກ຺ຂນິໂຣໂຘ’’ຕິ ຍຖາຠູຕໍ ປຊານາຕິ, ‘‘ອຍໍ ທຸກ຺ຂນິໂຣຘຄາມິນີ ປຏິປທາ’’ຕິ ຍຖາຠູຕໍ ປຊານາຕິ. ອິເມ ນວ ໂຍນິໂສ ມນສິກາຣມູລກາ ຘມ຺ມາ.

ນວ ນານຕ຺ຕາ – ຘາຕຸນານຕ຺ຕໍ ປຏິຈ຺ຈ ອຸປ຺ປຊ຺ຊຕິ ຜສ຺ສນານຕ຺ຕໍ, ຜສ຺ສນານຕ຺ຕໍ ປຏິຈ຺ຈ ອຸປ຺ປຊ຺ຊຕິ ເວທນານານຕ຺ຕໍ, ເວທນານານຕ຺ຕໍ ປຏິຈ຺ຈ ອຸປ຺ປຊ຺ຊຕິ ສຎ຺ຎານານຕ຺ຕໍ, ສຎ຺ຎານານຕ຺ຕໍ ປຏິຈ຺ຈ ອຸປ຺ປຊ຺ຊຕິ ສງ຺ກປ຺ປນານຕ຺ຕໍ, ສງ຺ກປ຺ປນານຕ຺ຕໍ ປຏິຈ຺ຈ ອຸປ຺ປຊ຺ຊຕິ ຉນ຺ທນານຕ຺ຕໍ, ຉນ຺ທນານຕ຺ຕໍ ປຏິຈ຺ຈ ອຸປ຺ປຊ຺ຊຕິ ປຣິຬາຫນານຕ຺ຕໍ, ປຣິຬາຫນານຕ຺ຕໍ ປຏິຈ຺ຈ ອຸປ຺ປຊ຺ຊຕິ ປຣິເຍສນານານຕ຺ຕໍ, ປຣິເຍສນານານຕ຺ຕໍ ປຏິຈ຺ຈ ອຸປ຺ປຊ຺ຊຕິ ລາຠນານຕ຺ຕໍ – ອິເມ ນວ ນານຕ຺ຕາ. ຕໍ ຎາຕຏ຺ເຐນ ຎາຓໍ, ປຊານນຏ຺ເຐນ ປຎ຺ຎາ. ເຕນ ວຸຈ຺ຈຕິ – ‘‘ນວຘມ຺ມວວຕ຺ຖາເນ ປຎ຺ຎາ ຘມ຺ມນານຕ຺ເຕ ຎາຓໍ’’.

ຘມ຺ມນານຕ຺ຕຎາຓນິທ຺ເທໂສ ເອກູນວີສຕິໂມ.