໒໐-໒໔. ຎາຓປຎ຺ຈກນິທ຺ເທໂສ

໗໕. ກຖໍ ອຠິຎ຺ຎາປຎ຺ຎາ ຎາຕຏ຺ເຐ ຎາຓໍ, ປຣິຎ຺ຎາປຎ຺ຎາ ຕີຣຓຏ຺ເຐ ຎາຓໍ, ປຫາເນປຎ຺ຎາ ປຣິຈ຺ຈາຄຏ຺ເຐ ຎາຓໍ, ຠາວນາ ປຎ຺ຎາ ເອກຣສຏ຺ເຐ ຎາຓໍ, ສຈ຺ຉິກິຣິຍາປຎ຺ຎາ ຜສ຺ສນຏ຺ເຐ ຎາຓໍ? ເຍ ເຍ ຘມ຺ມາ ອຠິຎ຺ຎາຕາ ໂຫນ຺ຕິ, ເຕ ເຕ ຘມ຺ມາ ຎາຕາ ໂຫນ຺ຕິ. ເຍ ເຍ ຘມ຺ມາ ປຣິຎ຺ຎາຕາ ໂຫນ຺ຕິ, ເຕ ເຕ ຘມ຺ມາ ຕີຣິຕາ ໂຫນ຺ຕິ. ເຍ ເຍ ຘມ຺ມາ ປຫີນາ ໂຫນ຺ຕິ, ເຕ ເຕ ຘມ຺ມາ ປຣິຈ຺ຈຕ຺ຕາ ໂຫນ຺ຕິ. ເຍ ເຍ ຘມ຺ມາ ຠາວິຕາ ໂຫນ຺ຕິ, ເຕ ເຕ ຘມ຺ມາ ເອກຣສາ ໂຫນ຺ຕິ. ເຍ ເຍ ຘມ຺ມາ ສຈ຺ຉິກຕາ ໂຫນ຺ຕິ, ເຕ ເຕ ຘມ຺ມາ ຜສ຺ສິຕາ ໂຫນ຺ຕິ. ຕໍ ຎາຕຏ຺ເຐນ ຎາຓໍ, ປຊານນຏ຺ເຐນ ປຎ຺ຎາ. ເຕນ ວຸຈ຺ຈຕິ – ‘‘ອຠິຎ຺ຎາ ປຎ຺ຎາ ຎາຕຏ຺ເຐ ຎາຓໍ, ປຣິຎ຺ຎາ ປຎ຺ຎາ ຕີຣຓຏ຺ເຐ ຎາຓໍ, ປຫາເນ ປຎ຺ຎາ ປຣິຈ຺ຈາຄຏ຺ເຐ ຎາຓໍ, ຠາວນາ ປຎ຺ຎາ ເອກຣສຏ຺ເຐ ຎາຓໍ, ສຈ຺ຉິກິຣິຍາ ປຎ຺ຎາ ຜຸສນຏ຺ເຐ ຎາຓໍ’’.

ຎາຓປຎ຺ຈກນິທ຺ເທໂສ ຈຕຸວີສຕິໂມ.