໒໕-໒໘. ປຏິສມ຺ຠິທາຎາຓນິທ຺ເທໂສ

໗໖. ກຖໍ ອຕ຺ຖນານຕ຺ເຕ ປຎ຺ຎາ ອຕ຺ຖປຏິສມ຺ຠິເທ ຎາຓໍ, ຘມ຺ມນານຕ຺ເຕ ປຎ຺ຎາ ຘມ຺ມປຏິສມ຺ຠິເທ ຎາຓໍ, ນິຣຸຕ຺ຕິນານຕ຺ເຕ ປຎ຺ຎາ ນິຣຸຕ຺ຕິປຏິສມ຺ຠິເທ ຎາຓໍ, ປຏິຠານນານຕ຺ເຕ ປຎ຺ຎາ ປຏິຠານປຏິສມ຺ຠິເທ ຎາຓໍ? ສທ຺ຘິນ຺ທ຺ຣິຍໍ ຘມ຺ໂມ, ວີຣິຍິນ຺ທ຺ຣິຍໍ ຘມ຺ໂມ, ສຕິນ຺ທ຺ຣິຍໍ ຘມ຺ໂມ, ສມາຘິນ຺ທ຺ຣິຍໍ ຘມ຺ໂມ, ປຎ຺ຎິນ຺ທ຺ຣິຍໍ ຘມ຺ໂມ. ອຎ຺ໂຎ ສທ຺ຘິນ຺ທ຺ຣິຍໍ ຘມ຺ໂມ, ອຎ຺ໂຎ ວີຣິຍິນ຺ທ຺ຣິຍໍ ຘມ຺ໂມ, ອຎ຺ໂຎ ສຕິນ຺ທ຺ຣິຍໍ ຘມ຺ໂມ, ອຎ຺ໂຎ ສມາຘິນ຺ທ຺ຣິຍໍ ຘມ຺ໂມ, ອຎ຺ໂຎ ປຎ຺ຎິນ຺ທ຺ຣິຍໍ ຘມ຺ໂມ. ເຍນ ຎາເຓນ ອິເມ ນານາ ຘມ຺ມາ ຎາຕາ, ເຕເນວ ຎາເຓນ ອິເມ ນານາ ຘມ຺ມາ ປຏິວິທິຕາຕິ. ເຕນ ວຸຈ຺ຈຕິ – ‘‘ຘມ຺ມນານຕ຺ເຕ ປຎ຺ຎາ ຘມ຺ມປຏິສມ຺ຠິເທ ຎາຓໍ’’.

ອຘິໂມກ຺ຂຏ຺ໂຐ ອຕ຺ໂຖ, ປຄ຺ຄຫຏ຺ໂຐ ອຕ຺ໂຖ, ອຸປຏ຺ຐານຏ຺ໂຐ ອຕ຺ໂຖ, ອວິກ຺ເຂປຏ຺ໂຐ ອຕ຺ໂຖ, ທສ຺ສນຏ຺ໂຐ ອຕ຺ໂຖ. ອຎ຺ໂຎ ອຘິໂມກ຺ຂຏ຺ໂຐ ອຕ຺ໂຖ, ອຎ຺ໂຎ ປຄ຺ຄຫຏ຺ໂຐ ອຕ຺ໂຖ, ອຎ຺ໂຎ ອຸປຏ຺ຐານຏ຺ໂຐ ອຕ຺ໂຖ, ອຎ຺ໂຎ ອວິກ຺ເຂປຏ຺ໂຐ ອຕ຺ໂຖ, ອຎ຺ໂຎ ທສ຺ສນຏ຺ໂຐ ອຕ຺ໂຖ. ເຍນ ຎາເຓນ ອິເມ ນານາ ອຕ຺ຖາ ຎາຕາ, ເຕເນວ ຎາເຓນ ອິເມ ນານາ ອຕ຺ຖາ ປຏິວິທິຕາຕິ. ເຕນ ວຸຈ຺ຈຕິ ‘‘ອຕ຺ຖນານຕ຺ເຕ ປຎ຺ຎາ ອຕ຺ຖປຏິສມ຺ຠິເທ ຎາຓໍ’’.

ປຎ຺ຈ ຘມ຺ເມ ສນ຺ທສ຺ເສຕຸໍ ພ຺ຍຎ຺ຊນນິຣຸຕ຺ຕາຠິລາປາ, ປຎ຺ຈ ອຕ຺ເຖ ສນ຺ທສ຺ເສຕຸໍ ພ຺ຍຎ຺ຊນນິຣຸຕ຺ຕາຠິລາປາ. ອຎ຺ຎາ ຘມ຺ມນິຣຸຕ຺ຕິໂຍ, ອຎ຺ຎາ ອຕ຺ຖນິຣຸຕ຺ຕິໂຍ. ເຍນ ຎາເຓນ ອິມາ ນານາ ນິຣຸຕ຺ຕິໂຍ ຎາຕາ, ເຕເນວ ຎາເຓນ ອິມາ ນານາ ນິຣຸຕ຺ຕິໂຍ ປຏິວິທິຕາຕິ. ເຕນ ວຸຈ຺ຈຕິ – ‘‘ນິຣຸຕ຺ຕິນານຕ຺ເຕ ປຎ຺ຎາ ນິຣຸຕ຺ຕິປຏິສມ຺ຠິເທ ຎາຓໍ’’.

ປຎ຺ຈສຸ ຘມ຺ເມສຸ ຎາຓານິ, ປຎ຺ຈສຸ ອຕ຺ເຖສຸ ຎາຓານິ, ທສສຸ ນິຣຸຕ຺ຕີສຸ ຎາຓານິ. ອຎ຺ຎານິ ຘມ຺ເມສຸ ຎາຓານິ, ອຎ຺ຎານິ ອຕ຺ເຖສຸ ຎາຓານິ, ອຎ຺ຎານິ ນິຣຸຕ຺ຕີສຸ ຎາຓານິ. ເຍນ ຎາເຓນ ອິເມ ນານາ ຎາຓາ ຎາຕາ, ເຕເນວ ຎາເຓນ ອິເມ ນານາ ຎາຓາ ປຏິວິທິຕາຕິ. ເຕນ ວຸຈ຺ຈຕິ – ‘‘ປຏິຠານນານຕ຺ເຕ ປຎ຺ຎາ ປຏິຠານປຏິສມ຺ຠິເທ ຎາຓໍ’’.

໗໗. ສທ຺ຘາພລໍ ຘມ຺ໂມ, ວີຣິຍພລໍ ຘມ຺ໂມ, ສຕິພລໍ ຘມ຺ໂມ, ສມາຘິພລໍ ຘມ຺ໂມ, ປຎ຺ຎາພລໍ ຘມ຺ໂມ. ອຎ຺ໂຎ ສທ຺ຘາພລໍ ຘມ຺ໂມ, ອຎ຺ໂຎ ວີຣິຍພລໍ ຘມ຺ໂມ, ອຎ຺ໂຎ ສຕິພລໍ ຘມ຺ໂມ, ອຎ຺ໂຎ ສມາຘິພລໍ ຘມ຺ໂມ, ອຎ຺ໂຎ ປຎ຺ຎາພລໍ ຘມ຺ໂມ. ເຍນ ຎາເຓນ ອິເມ ນານາ ຘມ຺ມາ ຎາຕາ, ເຕເນວ ຎາເຓນ ອິເມ ນານາ ຘມ຺ມາ ປຏິວິທິຕາຕິ. ເຕນ ວຸຈ຺ຈຕິ – ‘‘ຘມ຺ມນານຕ຺ເຕ ປຎ຺ຎາ ຘມ຺ມປຏິສມ຺ຠິເທ ຎາຓໍ’’.

ອສ຺ສທ຺ຘິເຍ ອກມ຺ປິຍຏ຺ໂຐ ອຕ຺ໂຖ. ໂກສຊ຺ເຊ ອກມ຺ປິຍຏ຺ໂຐ ອຕ຺ໂຖ. ປມາເທ ອກມ຺ປິຍຏ຺ໂຐ ອຕ຺ໂຖ. ອຸທ຺ຘຈ຺ເຈ ອກມ຺ປິຍຏ຺ໂຐ ອຕ຺ໂຖ. ອວິຊ຺ຊາຍ ອກມ຺ປິຍຏ຺ໂຐ ອຕ຺ໂຖ. ອຎ຺ໂຎ ອສ຺ສທ຺ຘິເຍ ອກມ຺ປິຍຏ຺ໂຐ ອຕ຺ໂຖ, ອຎ຺ໂຎ ໂກສຊ຺ເຊ ອກມ຺ປິຍຏ຺ໂຐ ອຕ຺ໂຖ, ອຎ຺ໂຎ ປມາເທ ອກມ຺ປິຍຏ຺ໂຐ ອຕ຺ໂຖ, ອຎ຺ໂຎ ອຸທ຺ຘຈ຺ເຈ ອກມ຺ປິຍຏ຺ໂຐ ອຕ຺ໂຖ, ອຎ຺ໂຎ ອວິຊ຺ຊາຍ ອກມ຺ປິຍຏ຺ໂຐ ອຕ຺ໂຖ. ເຍນ ຎາເຓນ ອິເມ ນານາ ອຕ຺ຖາ ຎາຕາ, ເຕເນວ ຎາເຓນ ອິເມ ນານາ ອຕ຺ຖາ ປຏິວິທິຕາຕິ. ເຕນ ວຸຈ຺ຈຕິ – ‘‘ອຕ຺ຖນານຕ຺ເຕ ປຎ຺ຎາ ອຕ຺ຖປຏິສມ຺ຠິເທ ຎາຓໍ’’.

ປຎ຺ຈ ຘມ຺ເມ ສນ຺ທສ຺ເສຕຸໍ ພ຺ຍຎ຺ຊນນິຣຸຕ຺ຕາຠິລາປາ, ປຎ຺ຈ ອຕ຺ເຖ ສນ຺ທສ຺ເສຕຸໍ ພ຺ຍຎ຺ຊນນິຣຸຕ຺ຕາຠິລາປາ. ອຎ຺ຎາ ຘມ຺ມນິຣຸຕ຺ຕິໂຍ, ອຎ຺ຎາ ອຕ຺ຖນິຣຸຕ຺ຕິໂຍ. ເຍນ ຎາເຓນ ອິມາ ນານາ ນິຣຸຕ຺ຕິໂຍ ຎາຕາ, ເຕເນວ ຎາເຓນ ອິມາ ນານາ ນິຣຸຕ຺ຕິໂຍ ປຏິວິທິຕາຕິ. ເຕນ ວຸຈ຺ຈຕິ – ‘‘ນິຣຸຕ຺ຕິນານຕ຺ເຕ ປຎ຺ຎາ ນິຣຸຕ຺ຕິປຏິສມ຺ຠິເທ ຎາຓໍ’’.

ປຎ຺ຈສຸ [ປຎ຺ຈ (?)] ຘມ຺ເມສຸ ຎາຓານິ, ປຎ຺ຈສຸ [ປຎ຺ຈ (?)] ອຕ຺ເຖສຸ ຎາຓານິ, ທສສຸ [ທສ (?)] ນິຣຸຕ຺ຕີສຸ ຎາຓານິ. ອຎ຺ຎານິ ຘມ຺ເມສຸ ຎາຓານິ, ອຎ຺ຎານິ ອຕ຺ເຖສຸ ຎາຓານິ, ອຎ຺ຎານິ ນິຣຸຕ຺ຕີສຸ ຎາຓານິ. ເຍນ ຎາເຓນ ອິເມ ນານາ ຎາຓາ ຎາຕາ, ເຕເນວ ຎາເຓນ ອິເມ ນານາ ຎາຓາ ປຏິວິທິຕາຕິ. ເຕນ ວຸຈ຺ຈຕິ – ‘‘ປຏິຠານນານຕ຺ເຕ ປຎ຺ຎາ ປຏິຠານປຏິສມ຺ຠິເທ ຎາຓໍ’’.

ສຕິສມ຺ໂພຊ຺ຌງ຺ໂຄ ຘມ຺ໂມ, ຘມ຺ມວິຈຍສມ຺ໂພຊ຺ຌງ຺ໂຄ ຘມ຺ໂມ, ວີຣິຍສມ຺ໂພຊ຺ຌງ຺ໂຄ ຘມ຺ໂມ, ປີຕິສມ຺ໂພຊ຺ຌງ຺ໂຄ ຘມ຺ໂມ, ປສ຺ສທ຺ຘິສມ຺ໂພຊ຺ຌງ຺ໂຄ ຘມ຺ໂມ, ສມາຘິສມ຺ໂພຊ຺ຌງ຺ໂຄ ຘມ຺ໂມ, ອຸເປກ຺ຂາສມ຺ໂພຊ຺ຌງ຺ໂຄ ຘມ຺ໂມ. ອຎ຺ໂຎ ສຕິສມ຺ໂພຊ຺ຌງ຺ໂຄ ຘມ຺ໂມ, ອຎ຺ໂຎ ຘມ຺ມວິຈຍສມ຺ໂພຊ຺ຌງ຺ໂຄ ຘມ຺ໂມ, ອຎ຺ໂຎ ວີຣິຍສມ຺ໂພຊ຺ຌງ຺ໂຄ ຘມ຺ໂມ, ອຎ຺ໂຎ ປີຕິສມ຺ໂພຊ຺ຌງ຺ໂຄ ຘມ຺ໂມ, ອຎ຺ໂຎ ປສ຺ສທ຺ຘິສມ຺ໂພຊ຺ຌງ຺ໂຄ ຘມ຺ໂມ, ອຎ຺ໂຎ ສມາຘິສມ຺ໂພຊ຺ຌງ຺ໂຄ ຘມ຺ໂມ, ອຎ຺ໂຎ ອຸເປກ຺ຂາສມ຺ໂພຊ຺ຌງ຺ໂຄ ຘມ຺ໂມ. ເຍນ ຎາເຓນ ອິເມ ນານາ ຘມ຺ມາ ຎາຕາ, ເຕເນວ ຎາເຓນ ອິເມ ນານາ ຘມ຺ມາ ປຏິວິທິຕາຕິ. ເຕນ ວຸຈ຺ຈຕິ – ‘‘ຘມ຺ມນານຕ຺ເຕ ປຎ຺ຎາ ຘມ຺ມປຏິສມ຺ຠິເທ ຎາຓໍ’’.

ອຸປຏ຺ຐານຏ຺ໂຐ ອຕ຺ໂຖ, ປວິຈຍຏ຺ໂຐ ອຕ຺ໂຖ, ປຄ຺ຄຫຏ຺ໂຐ ອຕ຺ໂຖ, ຜຣຓຏ຺ໂຐ ອຕ຺ໂຖ, ອຸປສມຏ຺ໂຐ ອຕ຺ໂຖ, ອວິກ຺ເຂປຏ຺ໂຐ ອຕ຺ໂຖ, ປຏິສງ຺ຂານຏ຺ໂຐ ອຕ຺ໂຖ. ອຎ຺ໂຎ ອຸປຏ຺ຐານຏ຺ໂຐ ອຕ຺ໂຖ, ອຎ຺ໂຎ ປວິຈຍຏ຺ໂຐ ອຕ຺ໂຖ, ອຎ຺ໂຎ ປຄ຺ຄຫຏ຺ໂຐ ອຕ຺ໂຖ, ອຎ຺ໂຎ ຜຣຓຏ຺ໂຐ ອຕ຺ໂຖ, ອຎ຺ໂຎ ອຸປສມຏ຺ໂຐ ອຕ຺ໂຖ, ອຎ຺ໂຎ ອວິກ຺ເຂປຏ຺ໂຐ ອຕ຺ໂຖ, ອຎ຺ໂຎ ປຏິສງ຺ຂານຏ຺ໂຐ ອຕ຺ໂຖ. ເຍນ ຎາເຓນ ອິເມ ນານາ ອຕ຺ຖາ ຎາຕາ, ເຕເນວ ຎາເຓນ ອິເມ ນານາ ອຕ຺ຖາ ປຏິວິທິຕາຕິ. ເຕນ ວຸຈ຺ຈຕິ – ‘‘ອຕ຺ຖນານຕ຺ເຕ ປຎ຺ຎາ ອຕ຺ຖປຏິສມ຺ຠິເທ ຎາຓໍ’’.

ສຕ຺ຕ ຘມ຺ເມ ສນ຺ທສ຺ເສຕຸໍ ພ຺ຍຎ຺ຊນນິຣຸຕ຺ຕາຠິລາປາ, ສຕ຺ຕ ອຕ຺ເຖ ສນ຺ທສ຺ເສຕຸໍ ພ຺ຍຎ຺ຊນນິຣຸຕ຺ຕາຠິລາປາ. ອຎ຺ຎາ ຘມ຺ມນິຣຸຕ຺ຕິໂຍ, ອຎ຺ຎາ ອຕ຺ຖນິຣຸຕ຺ຕິໂຍ. ເຍນ ຎາເຓນ ອິມາ ນານາ ນິຣຸຕ຺ຕິໂຍ ຎາຕາ, ເຕເນວ ຎາເຓນ ອິມາ ນານາ ນິຣຸຕ຺ຕິໂຍ ປຏິວິທິຕາຕິ. ເຕນ ວຸຈ຺ຈຕິ – ‘‘ນິຣຸຕ຺ຕິນານຕ຺ເຕ ປຎ຺ຎາ ນິຣຸຕ຺ຕິປຏິສມ຺ຠິເທ ຎາຓໍ’’.

ສຕ຺ຕສຸ ຘມ຺ເມສຸ ຎາຓານິ, ສຕ຺ຕສຸ ອຕ຺ເຖສຸ ຎາຓານິ, ຈຸທ຺ທສສຸ ນິຣຸຕ຺ຕີສຸ ຎາຓານິ. ອຎ຺ຎານິ ຘມ຺ເມສຸ ຎາຓານິ, ອຎ຺ຎານິ ອຕ຺ເຖສຸ ຎາຓານິ, ອຎ຺ຎານິ ນິຣຸຕ຺ຕີສຸ ຎາຓານິ. ເຍນ ຎາເຓນ ອິເມ ນານາ ຎາຓາ ຎາຕາ, ເຕເນວ ຎາເຓນ ອິເມ ນານາ ຎາຓາ ປຏິວິທິຕາຕິ. ເຕນ ວຸຈ຺ຈຕິ – ‘‘ປຏິຠານນານຕ຺ເຕ ປຎ຺ຎາ ປຏິຠານປຏິສມ຺ຠິເທ ຎາຓໍ’’.

ສມ຺ມາທິຏ຺ຐິ ຘມ຺ໂມ, ສມ຺ມາສງ຺ກປ຺ໂປ ຘມ຺ໂມ, ສມ຺ມາວາຈາ ຘມ຺ໂມ, ສມ຺ມາກມ຺ມນ຺ໂຕ ຘມ຺ໂມ, ສມ຺ມາອາຊີໂວ ຘມ຺ໂມ, ສມ຺ມາວາຍາໂມ ຘມ຺ໂມ, ສມ຺ມາສຕິ ຘມ຺ໂມ, ສມ຺ມາສມາຘິ ຘມ຺ໂມ. ອຎ຺ໂຎ ສມ຺ມາທິຏ຺ຐິ ຘມ຺ໂມ, ອຎ຺ໂຎ ສມ຺ມາສງ຺ກປ຺ໂປ ຘມ຺ໂມ, ອຎ຺ໂຎ ສມ຺ມາວາຈາ ຘມ຺ໂມ, ອຎ຺ໂຎ ສມ຺ມາກມ຺ມນ຺ໂຕ ຘມ຺ໂມ, ອຎ຺ໂຎ ສມ຺ມາອາຊີໂວ ຘມ຺ໂມ, ອຎ຺ໂຎ ສມ຺ມາວາຍາໂມ ຘມ຺ໂມ, ອຎ຺ໂຎ ສມ຺ມາສຕິ ຘມ຺ໂມ, ອຎ຺ໂຎ ສມ຺ມາສມາຘິ ຘມ຺ໂມ. ເຍນ ຎາເຓນ ອິເມ ນານາ ຘມ຺ມາ ຎາຕາ, ເຕເນວ ຎາເຓນ ອິເມ ນານາ ຘມ຺ມາ ປຏິວິທິຕາຕິ. ເຕນ ວຸຈ຺ຈຕິ – ‘‘ຘມ຺ມນານຕ຺ເຕ ປຎ຺ຎາ ຘມ຺ມປຏິສມ຺ຠິເທ ຎາຓໍ’’.

ທສ຺ສນຏ຺ໂຐ ອຕ຺ໂຖ, ອຠິນິໂຣປນຏ຺ໂຐ ອຕ຺ໂຖ, ປຣິຄ຺ຄຫຏ຺ໂຐ ອຕ຺ໂຖ, ສມຸຏ຺ຐານຏ຺ໂຐ ອຕ຺ໂຖ, ໂວທານຏ຺ໂຐ ອຕ຺ໂຖ, ປຄ຺ຄຫຏ຺ໂຐ ອຕ຺ໂຖ, ອຸປຏ຺ຐານຏ຺ໂຐ ອຕ຺ໂຖ, ອວິກ຺ເຂປຏ຺ໂຐ ອຕ຺ໂຖ. ອຎ຺ໂຎ ທສ຺ສນຏ຺ໂຐ ອຕ຺ໂຖ, ອຎ຺ໂຎ ອຠິນິໂຣປນຏ຺ໂຐ ອຕ຺ໂຖ, ອຎ຺ໂຎ ປຣິຄ຺ຄຫຏ຺ໂຐ ອຕ຺ໂຖ, ອຎ຺ໂຎ ສມຸຏ຺ຐານຏ຺ໂຐ ອຕ຺ໂຖ, ອຎ຺ໂຎ ໂວທານຏ຺ໂຐ ອຕ຺ໂຖ, ອຎ຺ໂຎ ປຄ຺ຄຫຏ຺ໂຐ ອຕ຺ໂຖ, ອຎ຺ໂຎ ອຸປຏ຺ຐານຏ຺ໂຐ ອຕ຺ໂຖ, ອຎ຺ໂຎ ອວິກ຺ເຂປຏ຺ໂຐ ອຕ຺ໂຖ. ເຍນ ຎາເຓນ ອິເມ ນານາ ອຕ຺ຖາ ຎາຕາ ເຕເນວ ຎາເຓນ ອິເມ ນານາ ອຕ຺ຖາ ປຏິວິທິຕາຕິ. ເຕນ ວຸຈ຺ຈຕິ – ‘‘ອຕ຺ຖນານຕ຺ເຕ ປຎ຺ຎາ ອຕ຺ຖປຏິສມ຺ຠິເທ ຎາຓໍ’’.

ອຏ຺ຐ ຘມ຺ເມ ສນ຺ທສ຺ເສຕຸໍ ພ຺ຍຎ຺ຊນນິຣຸຕ຺ຕາຠິລາປາ, ອຏ຺ຐ ອຕ຺ເຖ ສນ຺ທສ຺ເສຕຸໍ ພ຺ຍຎ຺ຊນນິຣຸຕ຺ຕາຠິລາປາ. ອຎ຺ຎາ ຘມ຺ມນິຣຸຕ຺ຕິໂຍ, ອຎ຺ຎາ ອຕ຺ຖນິຣຸຕ຺ຕິໂຍ. ເຍນ ຎາເຓນ ອິມາ ນານາ ນິຣຸຕ຺ຕິໂຍ ຎາຕາ, ເຕເນວ ຎາເຓນ ອິມາ ນານາ ນິຣຸຕ຺ຕິໂຍ ປຏິວິທິຕາຕິ. ເຕນ ວຸຈ຺ຈຕິ – ‘‘ນິຣຸຕ຺ຕິນານຕ຺ເຕ ປຎ຺ຎາ ນິຣຸຕ຺ຕິປຏິສມ຺ຠິເທ ຎາຓໍ’’.

ອຏ຺ຐສຸ ຘມ຺ເມສຸ ຎາຓານິ, ອຏ຺ຐສຸ ອຕ຺ເຖສຸ ຎາຓານິ ໂສຬສສຸ ນິຣຸຕ຺ຕີສຸ ຎາຓານິ. ອຎ຺ຎານິ ຘມ຺ເມສຸ ຎາຓານິ, ອຎ຺ຎານິ ອຕ຺ເຖສຸ ຎາຓານິ, ອຎ຺ຎານິ ນິຣຸຕ຺ຕີສຸ ຎາຓານິ. ເຍນ ຎາເຓນ ອິເມ ນານາ ຎາຓາ ຎາຕາ, ເຕເນວ ຎາເຓນ ອິເມ ນານາ ຎາຓາ ປຏິວິທິຕາຕິ. ເຕນ ວຸຈ຺ຈຕິ – ‘‘ປຏິຠານນານຕ຺ເຕ ປຎ຺ຎາ ປຏິຠານປຏິສມ຺ຠິເທ ຎາຓໍ’’. ຕໍ ຎາຕຏ຺ເຐນ ຎາຓໍ, ປຊານນຏ຺ເຐນ ປຎ຺ຎາ. ເຕນ ວຸຈ຺ຈຕິ – ‘‘ອຕ຺ຖນານຕ຺ເຕ ປຎ຺ຎາ ອຕ຺ຖປຏິສມ຺ຠິເທ ຎາຓໍ. ຘມ຺ມນານຕ຺ເຕ ປຎ຺ຎາ ຘມ຺ມປຏິສມ຺ຠິເທ ຎາຓໍ. ນິຣຸຕ຺ຕິນານຕ຺ເຕ ປຎ຺ຎາ ນິຣຸຕ຺ຕິປຏິສມ຺ຠິເທ ຎາຓໍ. ປຏິຠານນານຕ຺ເຕ ປຎ຺ຎາ ປຏິຠານປຏິສມ຺ຠິເທ ຎາຓໍ’’.

ປຏິສມ຺ຠິທາຎາຓນິທ຺ເທໂສ ອຏ຺ຐວີສຕິໂມ.