໘. ອາທີນວຎາຓນິທ຺ເທໂສ

໕໓. ກຖໍ ຠຍຕຸປຏ຺ຐາເນ ປຎ຺ຎາ ອາທີນເວ ຎາຓໍ? ອຸປ຺ປາໂທ ຠຍນ຺ຕິ – ຠຍຕຸປຏ຺ຐາເນ ປຎ຺ຎາ ອາທີນເວ ຎາຓໍ. ປວຕ຺ຕໍ ຠຍນ຺ຕິ – ຠຍຕຸປຏ຺ຐາເນ ປຎ຺ຎາ ອາທີນເວ ຎາຓໍ. ນິມິຕ຺ຕໍ ຠຍນ຺ຕິ…ເປ… ອາຍູຫນາ ຠຍນ຺ຕິ…ເປ… ປຏິສນ຺ຘິ ຠຍນ຺ຕິ… ຄຕິ ຠຍນ຺ຕິ… ນິພ຺ພຕ຺ຕິ ຠຍນ຺ຕິ… ອຸປປຕ຺ຕິ ຠຍນ຺ຕິ… ຊາຕິ ຠຍນ຺ຕິ… ຊຣາ ຠຍນ຺ຕິ… ພ຺ຍາຘິ ຠຍນ຺ຕິ … ມຣຓໍ ຠຍນ຺ຕິ… ໂສໂກ ຠຍນ຺ຕິ… ປຣິເທໂວ ຠຍນ຺ຕິ… ອຸປາຍາໂສ ຠຍນ຺ຕິ – ຠຍຕຸປຏ຺ຐາເນ ປຎ຺ຎາ ອາທີນເວ ຎາຓໍ.

ອນຸປ຺ປາໂທ ເຂມນ຺ຕິ – ສນ຺ຕິປເທ ຎາຓໍ. ອປ຺ປວຕ຺ຕໍ ເຂມນ຺ຕິ – ສນ຺ຕິປເທ ຎາຓໍ…ເປ… ອນຸປາຍາໂສ ເຂມນ຺ຕິ – ສນ຺ຕິປເທ ຎາຓໍ.

ອຸປ຺ປາໂທ ຠຍໍ, ອນຸປ຺ປາໂທ ເຂມນ຺ຕິ – ສນ຺ຕິປເທ ຎາຓໍ. ປວຕ຺ຕໍ ຠຍໍ, ອປ຺ປວຕ຺ຕໍ ເຂມນ຺ຕິ – ສນ຺ຕິປເທ ຎາຓໍ…ເປ… ອຸປາຍາໂສ ຠຍໍ, ອນຸປາຍາໂສ ເຂມນ຺ຕິ – ສນ຺ຕິປເທ ຎາຓໍ.

ອຸປ຺ປາໂທ ທຸກ຺ຂນ຺ຕິ – ຠຍຕຸປຏ຺ຐາເນ ປຎ຺ຎາ ອາທີນເວ ຎາຓໍ. ປວຕ຺ຕໍ ທຸກ຺ຂນ຺ຕິ – ຠຍຕຸປຏ຺ຐາເນ ປຎ຺ຎາ ອາທີນເວ ຎາຓໍ…ເປ… ອຸປາຍາໂສ ທຸກ຺ຂນ຺ຕິ – ຠຍຕຸປຏ຺ຐາເນ ປຎ຺ຎາ ອາທີນເວ ຎາຓໍ.

ອນຸປ຺ປາໂທ ສຸຂນ຺ຕິ – ສນ຺ຕິປເທ ຎາຓໍ. ອປ຺ປວຕ຺ຕໍ ສຸຂນ຺ຕິ – ສນ຺ຕິປເທ ຎາຓໍ…ເປ… ອນຸປາຍາໂສ ສຸຂນ຺ຕິ – ສນ຺ຕິປເທ ຎາຓໍ.

ອຸປ຺ປາໂທ ທຸກ຺ຂໍ, ອນຸປ຺ປາໂທ ສຸຂນ຺ຕິ – ສນ຺ຕິປເທ ຎາຓໍ. ປວຕ຺ຕໍ ທຸກ຺ຂໍ, ອປ຺ປວຕ຺ຕໍ ສຸຂນ຺ຕິ – ສນ຺ຕິປເທ ຎາຓໍ…ເປ… ອຸປາຍາໂສ ທຸກ຺ຂໍ, ອນຸປາຍາໂສ ສຸຂນ຺ຕິ – ສນ຺ຕິປເທ ຎາຓໍ.

ອຸປ຺ປາໂທ ສາມິສນ຺ຕິ – ຠຍຕຸປຏ຺ຐາເນ ປຎ຺ຎາ ອາທີນເວ ຎາຓໍ. ປວຕ຺ຕໍ ສາມິສນ຺ຕິ – ຠຍຕຸປຏ຺ຐາເນ ປຎ຺ຎາ ອາທີນເວ ຎາຓໍ…ເປ… ອຸປາຍາໂສ ສາມິສນ຺ຕິ – ຠຍຕຸປຏ຺ຐາເນ ປຎ຺ຎາ ອາທີນເວ ຎາຓໍ.

ອນຸປ຺ປາໂທ ນິຣາມິສນ຺ຕິ – ສນ຺ຕິປເທ ຎາຓໍ. ອປ຺ປວຕ຺ຕໍ ນິຣາມິສນ຺ຕິ – ສນ຺ຕິປເທ ຎາຓໍ…ເປ… ອນຸປາຍາໂສ ນິຣາມິສນ຺ຕິ – ສນ຺ຕິປເທ ຎາຓໍ.

ອຸປ຺ປາໂທ ສາມິສໍ, ອນຸປ຺ປາໂທ ນິຣາມິສນ຺ຕິ – ສນ຺ຕິປເທ ຎາຓໍ. ປວຕ຺ຕໍ ສາມິສໍ, ອປ຺ປວຕ຺ຕໍ ນິຣາມິສນ຺ຕິ – ສນ຺ຕິປເທ ຎາຓໍ…ເປ… ອຸປາຍາໂສ ສາມິສໍ, ອນຸປາຍາໂສ ນິຣາມິສນ຺ຕິ – ສນ຺ຕິປເທ ຎາຓໍ.

ອຸປ຺ປາໂທ ສງ຺ຂາຣາຕິ – ຠຍຕຸປຏ຺ຐາເນ ປຎ຺ຎາ ອາທີນເວ ຎາຓໍ. ປວຕ຺ຕໍ ສງ຺ຂາຣາຕິ – ຠຍຕຸປຏ຺ຐາເນ ປຎ຺ຎາ ອາທີນເວ ຎາຓໍ…ເປ… ອຸປາຍາໂສ ສງ຺ຂາຣາຕິ – ຠຍຕຸປຏ຺ຐາເນ ປຎ຺ຎາ ອາທີນເວ ຎາຓໍ.

ອນຸປ຺ປາໂທ ນິພ຺ພານນ຺ຕິ – ສນ຺ຕິປເທ ຎາຓໍ. ອປ຺ປວຕ຺ຕໍ ນິພ຺ພານນ຺ຕິ – ສນ຺ຕິປເທ ຎາຓໍ…ເປ… ອນຸປາຍາໂສ ນິພ຺ພານນ຺ຕິ – ສນ຺ຕິປເທ ຎາຓໍ.

ອຸປ຺ປາໂທ ສງ຺ຂາຣາ, ອນຸປ຺ປາໂທ ນິພ຺ພານນ຺ຕິ – ສນ຺ຕິປເທ ຎາຓໍ. ປວຕ຺ຕໍ ສງ຺ຂາຣາ, ອປ຺ປວຕ຺ຕໍ ນິພ຺ພານນ຺ຕິ – ສນ຺ຕິປເທ ຎາຓໍ…ເປ… ອຸປາຍາໂສ ສງ຺ຂາຣາ, ອນຸປາຍາໂສ ນິພ຺ພານນ຺ຕິ – ສນ຺ຕິປເທ ຎາຓໍ.

ອຸປ຺ປາທຎ຺ຈ ປວຕ຺ຕຎ຺ຈ, ນິມິຕ຺ຕໍ ທຸກ຺ຂນ຺ຕິ ປສ຺ສຕິ;

ອາຍູຫນໍ ປຏິສນ຺ຘິໍ, ຎາຓໍ ອາທີນເວ ອິທໍ.

ອນຸປ຺ປາທໍ ອປ຺ປວຕ຺ຕໍ, ອນິມິຕ຺ຕໍ ສຸຂນ຺ຕິ ຈ;

ອນາຍູຫນໍ ອປ຺ປຏິສນ຺ຘິໍ, ຎາຓໍ ສນ຺ຕິປເທ ອິທໍ.

ອິທໍ ອາທີນເວ ຎາຓໍ, ປຎ຺ຈຐາເນສຸ ຊາຍຕິ;

ປຎ຺ຈຐາເນ ສນ຺ຕິປເທ, ທສ ຎາເຓ ປຊານາຕິ;

ທ຺ວິນ຺ນໍ ຎາຓານໍ ກຸສລຕາ, ນານາທິຏ຺ຐີສຸ ນ ກມ຺ປຕີຕິ.

ຕໍ ຎາຕຏ຺ເຐນ ຎາຓໍ, ປຊານນຏ຺ເຐນ ປຎ຺ຎາ. ເຕນ ວຸຈ຺ຈຕິ – ‘‘ຠຍຕຸປຏ຺ຐາເນ ປຎ຺ຎາ ອາທີນເວ ຎາຓໍ’’.

ອາທີນວຎາຓນິທ຺ເທໂສ ອຏ຺ຐໂມ.