໗໒-໗໓. ສພ຺ພຎ຺ຎຸຕຎາຓນິທ຺ເທໂສ

໑໑໙. ກຕມໍ ຕຖາຄຕສ຺ສ ສພ຺ພຎ຺ຎຸຕຎ຺ຎາຓໍ? ສພ຺ພໍ ສງ຺ຂຕມສງ຺ຂຕໍ ອນວເສສໍ ຊານາຕີຕິ – ສພ຺ພຎ຺ຎຸຕຎ຺ຎາຓໍ. ຕຕ຺ຖ ອາວຣຓໍ ນຕ຺ຖີຕິ – ອນາວຣຓຎາຓໍ [ອນາວຣຓໍ ຎາຓໍ (ສ຺ຍາ.) ເອວມຸປຣິປິ].

໑໒໐. ອຕີຕໍ ສພ຺ພໍ ຊານາຕີຕິ – ສພ຺ພຎ຺ຎຸຕຎ຺ຎາຓໍ. ຕຕ຺ຖ ອາວຣຓໍ ນຕ຺ຖີຕິ – ອນາວຣຓຎາຓໍ. ອນາຄຕໍ ສພ຺ພໍ ຊານາຕີຕິ – ສພ຺ພຎ຺ຎຸຕຎ຺ຎາຓໍ. ຕຕ຺ຖ ອາວຣຓໍ ນຕ຺ຖີຕິ – ອນາວຣຓຎາຓໍ. ປຈ຺ຈຸປ຺ປນ຺ນໍ ສພ຺ພໍ ຊານາຕີຕິ – ສພ຺ພຎ຺ຎຸຕຎ຺ຎາຓໍ. ຕຕ຺ຖ ອາວຣຓໍ ນຕ຺ຖີຕິ – ອນາວຣຓຎາຓໍ.

ຈກ຺ຂຸ ເຈວ ຣູປາ ຈ, ເອວໍ ຕໍ ສພ຺ພໍ ຊານາຕີຕິ – ສພ຺ພຎ຺ຎຸຕຎ຺ຎາຓໍ. ຕຕ຺ຖ ອາວຣຓໍ ນຕ຺ຖີຕິ – ອນາວຣຓຎາຓໍ. ໂສຕຎ຺ເຈວ ສທ຺ທາ ຈ…ເປ… ຆານຎ຺ເຈວ ຄນ຺ຘາ ຈ… ຊິວ຺ຫາ ເຈວ ຣສາ ຈ… ກາໂຍ ເຈວ ໂຜຏ຺ຐພ຺ພາ ຈ… ມໂນ ເຈວ ຘມ຺ມາ ຈ, ເອວໍ ຕໍ ສພ຺ພໍ ຊານາຕີຕິ – ສພ຺ພຎ຺ຎຸຕຎ຺ຎາຓໍ. ຕຕ຺ຖ ອາວຣຓໍ ນຕ຺ຖີຕິ – ອນາວຣຓຎາຓໍ.

ຍາວຕາ ອນິຈ຺ຈຏ຺ຐໍ ທຸກ຺ຂຏ຺ຐໍ ອນຕ຺ຕຏ຺ຐໍ, ຕໍ ສພ຺ພໍ ຊານາຕີຕິ – ສພ຺ພຎ຺ຎຸຕຎ຺ຎາຓໍ. ຕຕ຺ຖ ອາວຣຓໍ ນຕ຺ຖີຕິ – ອນາວຣຓຎາຓໍ. ຍາວຕາ ຣູປສ຺ສ ອນິຈ຺ຈຏ຺ຐໍ ທຸກ຺ຂຏ຺ຐໍ ອນຕ຺ຕຏ຺ຐໍ, ຕໍ ສພ຺ພໍ ຊານາຕີຕິ – ສພ຺ພຎ຺ຎຸຕຎ຺ຎາຓໍ. ຕຕ຺ຖ ອາວຣຓໍ ນຕ຺ຖີຕິ – ອນາວຣຓຎາຓໍ. ຍາວຕາ ເວທນາຍ…ເປ… ຍາວຕາ ສຎ຺ຎາຍ…ເປ… ຍາວຕາ ສງ຺ຂາຣານໍ…ເປ… ຍາວຕາ ວິຎ຺ຎາຓສ຺ສ …ເປ… ຍາວຕາ ຈກ຺ຂຸສ຺ສ…ເປ… ຊຣາມຣຓສ຺ສ ອນິຈ຺ຈຏ຺ຐໍ ທຸກ຺ຂຏ຺ຐໍ ອນຕ຺ຕຏ຺ຐໍ, ຕໍ ສພ຺ພໍ ຊານາຕີຕິ – ສພ຺ພຎ຺ຎຸຕຎ຺ຎາຓໍ. ຕຕ຺ຖ ອາວຣຓໍ ນຕ຺ຖີຕິ – ອນາວຣຓຎາຓໍ.

ຍາວຕາ ອຠິຎ຺ຎາຍ ອຠິຎ຺ຎຏ຺ຐໍ, ຕໍ ສພ຺ພໍ ຊານາຕີຕິ – ສພ຺ພຎ຺ຎຸຕຎ຺ຎາຓໍ. ຕຕ຺ຖ ອາວຣຓໍ ນຕ຺ຖີຕິ – ອນາວຣຓຎາຓໍ. ຍາວຕາ ປຣິຎ຺ຎາຍ ປຣິຎ຺ຎຏ຺ຐໍ…ເປ… ຍາວຕາ ປຫານສ຺ສ [ປຫານາຍ (ສ຺ຍາ.)] ປຫານຏ຺ຐໍ…ເປ… ຍາວຕາ ຠາວນາຍ ຠາວນຏ຺ຐໍ…ເປ… ຍາວຕາ ສຈ຺ຉິກິຣິຍາຍ ສຈ຺ຉິກິຣິຍຏ຺ຐໍ, ຕໍ ສພ຺ພໍ ຊານາຕີຕິ – ສພ຺ພຎ຺ຎຸຕຎ຺ຎາຓໍ. ຕຕ຺ຖ ອາວຣຓໍ ນຕ຺ຖີຕິ – ອນາວຣຓຎາຓໍ.

ຍາວຕາ ຂນ຺ຘານໍ ຂນ຺ຘຏ຺ຐໍ, ຕໍ ສພ຺ພໍ ຊານາຕີຕິ – ສພ຺ພຎ຺ຎຸຕຎ຺ຎາຓໍ. ຕຕ຺ຖ ອາວຣຓໍ ນຕ຺ຖີຕິ – ອນາວຣຓຎາຓໍ. ຍາວຕາ ຘາຕູນໍ ຘາຕຸຏ຺ຐໍ…ເປ… ຍາວຕາ ອາຍຕນານໍ ອາຍຕນຏ຺ຐໍ…ເປ… ຍາວຕາ ສງ຺ຂຕານໍ ສງ຺ຂຕຏ຺ຐໍ…ເປ… ຍາວຕາ ອສງ຺ຂຕສ຺ສ ອສງ຺ຂຕຏ຺ຐໍ, ຕໍ ສພ຺ພໍ ຊານາຕີຕິ – ສພ຺ພຎ຺ຎຸຕຎ຺ຎາຓໍ. ຕຕ຺ຖ ອາວຣຓໍ ນຕ຺ຖີຕິ – ອນາວຣຓຎາຓໍ.

ຍາວຕາ ກຸສເລ ຘມ຺ເມ, ສພ຺ພໍ [ສພ຺ເພ (ອຏ຺ຐກຖາ)] ຊານາຕີຕິ – ສພ຺ພຎ຺ຎຸຕຎ຺ຎາຓໍ. ຕຕ຺ຖ ອາວຣຓໍ ນຕ຺ຖີຕິ – ອນາວຣຓຎາຓໍ. ຍາວຕາ ອກຸສເລ ຘມ຺ເມ…ເປ… ຍາວຕາ ອພ຺ຍາກເຕ ຘມ຺ເມ… ຍາວຕາ ກາມາວຈເຣ ຘມ຺ເມ… ຍາວຕາ ຣູປາວຈເຣ ຘມ຺ເມ… ຍາວຕາ ອຣູປາວຈເຣ ຘມ຺ເມ… ຍາວຕາ ອປຣິຍາປນ຺ເນ ຘມ຺ເມ, ສພ຺ພໍ [ສພ຺ເພ (ອຏ຺ຐກຖາ)] ຊານາຕີຕິ – ສພ຺ພຎ຺ຎຸຕຎ຺ຎາຓໍ. ຕຕ຺ຖ ອາວຣຓໍ ນຕ຺ຖີຕິ – ອນາວຣຓຎາຓໍ.

ຍາວຕາ ທຸກ຺ຂສ຺ສ ທຸກ຺ຂຏ຺ຐໍ, ຕໍ ສພ຺ພໍ ຊານາຕີຕິ – ສພ຺ພຎ຺ຎຸຕຎ຺ຎາຓໍ. ຕຕ຺ຖ ອາວຣຓໍ ນຕ຺ຖີຕິ – ອນາວຣຓຎາຓໍ. ຍາວຕາ ສມຸທຍສ຺ສ ສມຸທຍຏ຺ຐໍ…ເປ… ຍາວຕາ ນິໂຣຘສ຺ສ ນິໂຣຘຏ຺ຐໍ…ເປ… ຍາວຕາ ມຄ຺ຄສ຺ສ ມຄ຺ຄຏ຺ຐໍ, ຕໍ ສພ຺ພໍ ຊານາຕີຕິ – ສພ຺ພຎ຺ຎຸຕຎ຺ຎາຓໍ. ຕຕ຺ຖ ອາວຣຓໍ ນຕ຺ຖີຕິ – ອນາວຣຓຎາຓໍ.

ຍາວຕາ ອຕ຺ຖປຏິສມ຺ຠິທາຍ ອຕ຺ຖປຏິສມ຺ຠິທຏ຺ຐໍ, ຕໍ ສພ຺ພໍ ຊານາຕີຕິ – ສພ຺ພຎ຺ຎຸຕຎ຺ຎາຓໍ. ຕຕ຺ຖ ອາວຣຓໍ ນຕ຺ຖີຕິ – ອນາວຣຓຎາຓໍ. ຍາວຕາ ຘມ຺ມປຏິສມ຺ຠິທາຍ ຘມ຺ມປຏິສມ຺ຠິທຏ຺ຐໍ…ເປ… ຍາວຕາ ນິຣຸຕ຺ຕິປຏິສມ຺ຠິທາຍ ນິຣຸຕ຺ຕິປຏິສມ຺ຠິທຏ຺ຐໍ…ເປ… ຍາວຕາ ປຏິຠານປຏິສມ຺ຠິທາຍ ປຏິຠານປຏິສມ຺ຠິທຏ຺ຐໍ, ຕໍ ສພ຺ພໍ ຊານາຕີຕິ – ສພ຺ພຎ຺ຎຸຕຎ຺ຎາຓໍ. ຕຕ຺ຖ ອາວຣຓໍ ນຕ຺ຖີຕິ – ອນາວຣຓຎາຓໍ.

ຍາວຕາ ອິນ຺ທ຺ຣິຍປໂຣປຣິຍຕ຺ຕຎາຓໍ, ຕໍ ສພ຺ພໍ ຊານາຕີຕິ – ສພ຺ພຎ຺ຎຸຕຎ຺ຎາຓໍ. ຕຕ຺ຖ ອາວຣຓໍ ນຕ຺ຖີຕິ – ອນາວຣຓຎາຓໍ. ຍາວຕາ ສຕ຺ຕານໍ ອາສຍານຸສເຍ ຎາຓໍ…ເປ… ຍາວຕາ ຍມກປາຏິຫີເຣ ຎາຓໍ…ເປ… ຍາວຕາ ມຫາກຣຸຓາສມາປຕ຺ຕິຍາ ຎາຓໍ, ຕໍ ສພ຺ພໍ ຊານາຕີຕິ – ສພ຺ພຎ຺ຎຸຕຎ຺ຎາຓໍ. ຕຕ຺ຖ ອາວຣຓໍ ນຕ຺ຖີຕິ – ອນາວຣຓຎາຓໍ.

ຍາວຕາ ສເທວກສ຺ສ ໂລກສ຺ສ ສມາຣກສ຺ສ ສພ຺ຣຫ຺ມກສ຺ສ ສສ຺ສມຓພ຺ຣາຫ຺ມຓິຍາ ປຊາຍ ສເທວມນຸສ຺ສາຍ ທິຏ຺ຐໍ ສຸຕໍ ມຸຕໍ ວິຎ຺ຎາຕໍ ປຕ຺ຕໍ ປຣິເຍສິຕໍ ອນຸວິຈຣິຕໍ ມນສາ, ຕໍ ສພ຺ພໍ ຊານາຕີຕິ – ສພ຺ພຎ຺ຎຸຕຎ຺ຎາຓໍ. ຕຕ຺ຖ ອາວຣຓໍ ນຕ຺ຖີຕິ – ອນາວຣຓຎາຓໍ.

໑໒໑. ນ ຕສ຺ສ ອທ຺ທິຏ຺ຐມິຘຕ຺ຖິ ກິຎ຺ຈິ, ອໂຖ ອວິຎ຺ຎາຕມຊານິຕພ຺ພໍ.

ສພ຺ພໍ ອຠິຎ຺ຎາສິ ຍທຕ຺ຖິ ເນຍ຺ຍໍ, ຕຖາຄໂຕ ເຕນ ສມນ຺ຕຈກ຺ຂູຕິ [ມຫານິ. ໑໕໖; ຈູຬນິ. ໂມຆຣາຊມາຓວປຸຈ຺ຉານິທ຺ເທສ ໘໕].

ສມນ຺ຕຈກ຺ຂູຕິ ເກນຏ຺ເຐນ ສມນ຺ຕຈກ຺ຂຸ? ຈຸທ຺ທສ ພຸທ຺ຘຎາຓານິ. ທຸກ຺ເຂ ຎາຓໍ ພຸທ຺ຘຎາຓໍ, ທຸກ຺ຂສມຸທເຍ ຎາຓໍ ພຸທ຺ຘຎາຓໍ, ທຸກ຺ຂນິໂຣເຘ ຎາຓໍ ພຸທ຺ຘຎາຓໍ, ທຸກ຺ຂນິໂຣຘຄາມິນິຍາ ປຏິປທາຍ ຎາຓໍ ພຸທ຺ຘຎາຓໍ, ອຕ຺ຖປຏິສມ຺ຠິເທ ຎາຓໍ ພຸທ຺ຘຎາຓໍ, ຘມ຺ມປຏິສມ຺ຠິເທ ຎາຓໍ ພຸທ຺ຘຎາຓໍ, ນິຣຸຕ຺ຕິປຏິສມ຺ຠິເທ ຎາຓໍ ພຸທ຺ຘຎາຓໍ, ປຏິຠານປຏິສມ຺ຠິເທ ຎາຓໍ ພຸທ຺ຘຎາຓໍ, ອິນ຺ທ຺ຣິຍປໂຣປຣິຍຕ຺ເຕ ຎາຓໍ ພຸທ຺ຘຎາຓໍ, ສຕ຺ຕານໍ ອາສຍານຸສເຍ ຎາຓໍ ພຸທ຺ຘຎາຓໍ, ຍມກປາຏິຫີເຣ ຎາຓໍ ພຸທ຺ຘຎາຓໍ, ມຫາກຣຸຓາສມາປຕ຺ຕິຍາ ຎາຓໍ ພຸທ຺ຘຎາຓໍ, ສພ຺ພຎ຺ຎຸຕຎ຺ຎາຓໍ ພຸທ຺ຘຎາຓໍ, ອນາວຣຓຎາຓໍ ພຸທ຺ຘຎາຓໍ – ອິມານິ ຈຸທ຺ທສ ພຸທ຺ຘຎາຓານິ. ອິເມສໍ ຈຸທ຺ທສນ຺ນໍ ພຸທ຺ຘຎາຓານໍ ອຏ຺ຐ ຎາຓານິ ສາວກສາຘາຣຓານິ; ຉ ຎາຓານິ ອສາຘາຣຓານິ ສາວເກຫິ.

ຍາວຕາ ທຸກ຺ຂສ຺ສ ທຸກ຺ຂຏ຺ໂຐ, ສພ຺ໂພ ຎາໂຕ; ອຎ຺ຎາໂຕ ທຸກ຺ຂຏ຺ໂຐ ນຕ຺ຖີຕິ – ສພ຺ພຎ຺ຎຸຕຎ຺ຎາຓໍ. ຕຕ຺ຖ ອາວຣຓໍ ນຕ຺ຖີຕິ – ອນາວຣຓຎາຓໍ. ຍາວຕາ ທຸກ຺ຂສ຺ສ ທຸກ຺ຂຏ຺ໂຐ, ສພ຺ໂພ ຎາໂຕ, ສພ຺ໂພ ທິຏ຺ໂຐ, ສພ຺ໂພ ວິທິໂຕ, ສພ຺ໂພ ສຈ຺ຉິກໂຕ, ສພ຺ໂພ ຜສ຺ສິໂຕ ປຎ຺ຎາຍ; ອຜສ຺ສິໂຕ ປຎ຺ຎາຍ ທຸກ຺ຂຏ຺ໂຐ ນຕ຺ຖີຕິ – ສພ຺ພຎ຺ຎຸຕຎ຺ຎາຓໍ. ຕຕ຺ຖ ອາວຣຓໍ ນຕ຺ຖີຕິ – ອນາວຣຓຎາຓໍ. ຍາວຕາ ສມຸທຍສ຺ສ ສມຸທຍຏ຺ໂຐ…ເປ… ຍາວຕາ ນິໂຣຘສ຺ສ ນິໂຣຘຏ຺ໂຐ… ຍາວຕາ ມຄ຺ຄສ຺ສ ມຄ຺ຄຏ຺ໂຐ…ເປ… ຍາວຕາ ອຕ຺ຖປຏິສມ຺ຠິທາຍ ອຕ຺ຖປຏິສມ຺ຠິທຏ຺ໂຐ… ຍາວຕາ ຘມ຺ມປຏິສມ຺ຠິທາຍ ຘມ຺ມປຏິສມ຺ຠິທຏ຺ໂຐ… ຍາວຕາ ນິຣຸຕ຺ຕິປຏິສມ຺ຠິທາຍ ນິຣຸຕ຺ຕິປຏິສມ຺ຠິທຏ຺ໂຐ… ຍາວຕາ ປຏິຠານປຏິສມ຺ຠິທາຍ ປຏິຠານປຏິສມ຺ຠິທຏ຺ໂຐ, ສພ຺ໂພ ຎາໂຕ, ສພ຺ໂພ ທິຏ຺ໂຐ, ສພ຺ໂພ ວິທິໂຕ, ສພ຺ໂພ ສຈ຺ຉິກໂຕ, ສພ຺ໂພ ຜສ຺ສິໂຕ ປຎ຺ຎາຍ; ອຜສ຺ສິໂຕ ປຎ຺ຎາຍ ປຏິຠານປຏິສມ຺ຠິທຏ຺ໂຐ ນຕ຺ຖີຕິ – ສພ຺ພຎ຺ຎຸຕຎ຺ຎາຓໍ. ຕຕ຺ຖ ອາວຣຓໍ ນຕ຺ຖີຕິ – ອນາວຣຓຎາຓໍ.

ຍາວຕາ ອິນ຺ທ຺ຣິຍປໂຣປຣິຍຕ຺ຕຎາຓໍ…ເປ… ຍາວຕາ ສຕ຺ຕານໍ ອາສຍານຸສເຍ ຎາຓໍ… ຍາວຕາ ຍມກປາຏິຫີເຣ ຎາຓໍ… ຍາວຕາ ມຫາກຣຸຓາສມາປຕ຺ຕິຍາ ຎາຓໍ; ສພ຺ພ ຎາຕໍ, ສພ຺ພໍ ທິຏ຺ຐໍ, ສພ຺ພໍ ວິທິຕໍ, ສພ຺ພໍ ສຈ຺ຉິກຕໍ, ສພ຺ພໍ ຜສ຺ສິຕໍ ປຎ຺ຎາຍ; ອຜສ຺ສິຕໍ ປຎ຺ຎາຍ ມຫາກຣຸຓາສມາປຕ຺ຕິຍາ ຎາຓໍ ນຕ຺ຖີຕິ – ສພ຺ພຎ຺ຎຸຕຎ຺ຎາຓໍ. ຕຕ຺ຖ ອາວຣຓໍ ນຕ຺ຖີຕິ – ອນາວຣຓຎາຓໍ.

ຍາວຕາ ສເທວກສ຺ສ ໂລກສ຺ສ ສມາຣກສ຺ສ ສພ຺ຣຫ຺ມກສ຺ສ ສສ຺ສມຓພ຺ຣາຫ຺ມຓິຍາ ປຊາຍ ສເທວມນຸສ຺ສາຍ ທິຏ຺ຐໍ ສຸຕໍ ມຸຕໍ ວິຎ຺ຎາຕໍ ປຕ຺ຕໍ ປຣິເຍສິຕໍ ອນຸວິຈຣິຕໍ ມນສາ, ສພ຺ພໍ ຎາຕໍ, ສພ຺ພໍ ທິຏ຺ຐໍ, ສພ຺ພໍ ວິທິຕໍ, ສພ຺ພໍ ສຈ຺ຉິກຕໍ, ສພ຺ພໍ ຜສ຺ສິຕໍ ປຎ຺ຎາຍ; ອຜສ຺ສິຕໍ ປຎ຺ຎາຍ ນຕ຺ຖີຕິ – ສພ຺ພຎ຺ຎຸຕຎ຺ຎາຓໍ. ຕຕ຺ຖ ອາວຣຓໍ ນຕ຺ຖີຕິ – ອນາວຣຓຎາຓໍ.

ນ ຕສ຺ສ ອທ຺ທິຏ຺ຐມິຘຕ຺ຖິ ກິຎ຺ຈິ, ອໂຖ ອວິຎ຺ຎາຕມຊານິຕພ຺ພໍ;

ສພ຺ພໍ ອຠິຎ຺ຎາສິ ຍທຕ຺ຖິ ເນຍ຺ຍໍ, ຕຖາຄໂຕ ເຕນ ສມນ຺ຕຈກ຺ຂູຕິ.

ສພ຺ພຎ຺ຎຸຕຎາຓນິທ຺ເທໂສ ເຕສຕ຺ຕຕິໂມ.

ຎາຓກຖາ ນິຏ຺ຐິຕາ.