໗໑. ມຫາກຣຸຓາຎາຓນິທ຺ເທໂສ

໑໑໗. ກຕມໍ ຕຖາຄຕສ຺ສ ມຫາກຣຸຓາສມາປຕ຺ຕິຍາ ຎາຓໍ? ພຫຸເກຫິ ອາກາເຣຫິ ປສ຺ສນ຺ຕານໍ ພຸທ຺ຘານໍ ຠຄວນ຺ຕານໍ ສຕ຺ເຕສຸ ມຫາກຣຸຓາ ໂອກ຺ກມຕິ. ອາທິຕ຺ໂຕ ໂລກສນ຺ນິວາໂສຕິ – ປສ຺ສນ຺ຕານໍ ພຸທ຺ຘານໍ ຠຄວນ຺ຕານໍ ສຕ຺ເຕສຸ ມຫາກຣຸຓາ ໂອກ຺ກມຕິ. ອຸຍ຺ຍຸຕ຺ໂຕ ໂລກສນ຺ນິວາໂສຕິ – ປສ຺ສນ຺ຕານໍ ພຸທ຺ຘານໍ ຠຄວນ຺ຕານໍ ສຕ຺ເຕສຸ ມຫາກຣຸຓາ ໂອກ຺ກມຕິ. ປຍາໂຕ ໂລກສນ຺ນິວາໂສຕິ – ປສ຺ສນ຺ຕານໍ ພຸທ຺ຘານໍ ຠຄວນ຺ຕານໍ ສຕ຺ເຕສຸ ມຫາກຣຸຓາ ໂອກ຺ກມຕິ. ກຸມ຺ມຄ຺ຄປ຺ປຏິປນ຺ໂນ [ກຸມ຺ມຄ຺ຄໍ ປຏິປນ຺ໂນ (ສ຺ຍາ.)] ໂລກສນ຺ນິວາໂສຕິ – ປສ຺ສນ຺ຕານໍ ພຸທ຺ຘານໍ ຠຄວນ຺ຕານໍ ສຕ຺ເຕສຸ ມຫາກຣຸຓາ ໂອກ຺ກມຕິ. ອຸປນີຍຕິ ໂລໂກ ອທ຺ຘຸໂວຕິ – ປສ຺ສນ຺ຕານໍ ພຸທ຺ຘານໍ ຠຄວນ຺ຕານໍ ສຕ຺ເຕສຸ ມຫາກຣຸຓາ ໂອກ຺ກມຕິ. ອຕາໂຓ [ອຕ຺ຕາໂຓ (ສ຺ຍາ.)] ໂລໂກ ອນຠິສ຺ສໂຣຕິ – ປສ຺ສນ຺ຕານໍ ພຸທ຺ຘານໍ ຠຄວນ຺ຕານໍ ສຕ຺ເຕສຸ ມຫາກຣຸຓາ ໂອກ຺ກມຕິ. ອສ຺ສໂກ ໂລໂກ, ສພ຺ພໍ ປຫາຍ ຄມນີຍນ຺ຕິ – ປສ຺ສນ຺ຕານໍ ພຸທ຺ຘານໍ ຠຄວນ຺ຕານໍ ສຕ຺ເຕສຸ ມຫາກຣຸຓາ ໂອກ຺ກມຕິ. ອູໂນ ໂລໂກ ອຕີໂຕ ຕຓ຺ຫາທາໂສຕິ – ປສ຺ສນ຺ຕານໍ ພຸທ຺ຘານໍ ຠຄວນ຺ຕານໍ ສຕ຺ເຕສຸ ມຫາກຣຸຓາ ໂອກ຺ກມຕິ. ອຕາຍໂນ ໂລກສນ຺ນິວາໂສຕິ – ປສ຺ສນ຺ຕານໍ…ເປ… ອເລໂຓ ໂລກສນ຺ນິວາໂສຕິ – ປສ຺ສນ຺ຕານໍ …ເປ… ອສຣໂຓ ໂລກສນ຺ນິວາໂສຕິ – ປສ຺ສນ຺ຕານໍ…ເປ… ອສຣຓີຠູໂຕ ໂລກສນ຺ນິວາໂສຕິ – ປສ຺ສນ຺ຕານໍ…ເປ….

ອຸທ຺ຘໂຕ ໂລໂກ ອວູປສນ຺ໂຕຕິ – ປສ຺ສນ຺ຕານໍ…ເປ… ສສລ຺ໂລ ໂລກສນ຺ນິວາໂສ, ວິທ຺ໂຘ ປຸຖຸສລ຺ເລຫິ; ຕສ຺ສ ນຕ຺ຖຎ຺ໂຎ ໂກຈິ ສລ຺ລານໍ ອຸທ຺ຘຕາ, ອຎ຺ຎຕ຺ຣ ມຍາຕິ – ປສ຺ສນ຺ຕານໍ…ເປ… ອວິຊ຺ຊນ຺ຘກາຣາວຣໂຓ ໂລກສນ຺ນິວາໂສ ອຓ຺ຑຠູໂຕ ກິເລສປຎ຺ຊຣປກ຺ຂິຕ຺ໂຕ; ຕສ຺ສ ນຕ຺ຖຎ຺ໂຎ ໂກຈິ ອາໂລກໍ ທສ຺ເສຕາ, ອຎ຺ຎຕ຺ຣ ມຍາຕິ – ປສ຺ສນ຺ຕານໍ…ເປ… ອວິຊ຺ຊາຄໂຕ ໂລກສນ຺ນິວາໂສ ອຓ຺ຑຠູໂຕ ປຣິໂຍນທ຺ໂຘ ຕນ຺ຕາກຸລກຊາໂຕ [ຕນ຺ຕາກຸລຊາໂຕ (ສ຺ຍາ.)] ກຸລາຄຓ຺ຑິກຊາໂຕ [ຄຸຬາຄຸຓ຺ຐິກຊາໂຕ (ສ຺ຍາ.), ຄຸລາຄຸຓ຺ຑິກຊາໂຕ (ກ. ສີ. ອຏ຺ຐ.) ທີ. ນິ. ໒.໙໕ ປສ຺ສິຕພ຺ພາ] ມຸຎ຺ຊປພ຺ພຊຠູໂຕ ອປາຍໍ ທຸຄ຺ຄຕິໍ ວິນິປາຕໍ ສໍສາຣໍ ນາຕິວຕ຺ຕຕີຕິ – ປສ຺ສນ຺ຕານໍ…ເປ… ອວິຊ຺ຊາວິສໂທສສໍລິຕ຺ໂຕ ໂລກສນ຺ນິວາໂສ ກິເລສກລລີຠູໂຕຕິ – ປສ຺ສນ຺ຕານໍ…ເປ… ຣາຄໂທສໂມຫຊຏາຊຏິໂຕ ໂລກສນ຺ນິວາໂສ; ຕສ຺ສ ນຕ຺ຖຎ຺ໂຎ ໂກຈິ ຊຏໍ ວິຊເຏຕາ, ອຎ຺ຎຕ຺ຣ ມຍາຕິ – ປສ຺ສນ຺ຕານໍ…ເປ….

ຕຓ຺ຫາສງ຺ຆາຏປຏິມຸກ຺ໂກ ໂລກສນ຺ນິວາໂສຕິ – ປສ຺ສນ຺ຕານໍ…ເປ… ຕຓ຺ຫາຊາເລນ ໂອຕ຺ຖໂຏ [ໂອຕ຺ຖໂຕ (ກ.)] ໂລກສນ຺ນິວາໂສຕິ – ປສ຺ສນ຺ຕານໍ…ເປ… ຕຓ຺ຫາໂສເຕນ ວຸຍ຺ຫຕິ ໂລກສນ຺ນິວາໂສຕິ – ປສ຺ສນ຺ຕານໍ…ເປ… ຕຓ຺ຫາສຎ຺ໂຎຊເນນ ສຎ຺ຎຸຕ຺ໂຕ ໂລກສນ຺ນິວາໂສຕິ – ປສ຺ສນ຺ຕານໍ…ເປ… ຕຓ຺ຫານຸສເຍນ ອນຸສໂຏ ໂລກສນ຺ນິວາໂສຕິ – ປສ຺ສນ຺ຕານໍ…ເປ… ຕຓ຺ຫາສນ຺ຕາເປນ ສນ຺ຕປ຺ປຕິ ໂລກສນ຺ນິວາໂສຕິ – ປສ຺ສນ຺ຕານໍ…ເປ… ຕຓ຺ຫາປຣິຬາເຫນ ປຣິຑຍ຺ຫຕິ ໂລກສນ຺ນິວາໂສຕິ – ປສ຺ສນ຺ຕານໍ…ເປ….

ທິຏ຺ຐິສງ຺ຆາຏປຏິມຸກ຺ໂກ ໂລກສນ຺ນິວາໂສຕິ – ປສ຺ສນ຺ຕານໍ…ເປ… ທິຏ຺ຐິຊາເລນ ໂອຕ຺ຖໂຏ ໂລກສນ຺ນິວາໂສຕິ – ປສ຺ສນ຺ຕານໍ…ເປ… ທິຏ຺ຐິໂສເຕນ ວຸຍ຺ຫຕິ ໂລກສນ຺ນິວາໂສຕິ – ປສ຺ສນ຺ຕານໍ…ເປ… ທິຏ຺ຐິສຎ຺ໂຎຊເນນ ສຎ຺ຎຸຕ຺ໂຕ ໂລກສນ຺ນິວາໂສຕິ – ປສ຺ສນ຺ຕານໍ…ເປ… ທິຏ຺ຐານຸສເຍນ ອນຸສໂຏ ໂລກສນ຺ນິວາໂສຕິ – ປສ຺ສນ຺ຕານໍ…ເປ… ທິຏ຺ຐິສນ຺ຕາເປນ ສນ຺ຕປ຺ປຕິ ໂລກສນ຺ນິວາໂສຕິ – ປສ຺ສນ຺ຕານໍ…ເປ… ທິຏ຺ຐິປຣິຬາເຫນ ປຣິຑຍ຺ຫຕິ ໂລກສນ຺ນິວາໂສຕິ – ປສ຺ສນ຺ຕານໍ…ເປ….

ຊາຕິຍາ ອນຸຄໂຕ ໂລກສນ຺ນິວາໂສຕິ – ປສ຺ສນ຺ຕານໍ…ເປ… ຊຣາຍ ອນຸສໂຏ ໂລກສນ຺ນິວາໂສຕິ – ປສ຺ສນ຺ຕານໍ…ເປ… ພ຺ຍາຘິນາ ອຠິຠູໂຕ ໂລກສນ຺ນິວາໂສຕິ – ປສ຺ສນ຺ຕານໍ …ເປ… ມຣເຓນ ອພ຺ຠາຫໂຕ ໂລກສນ຺ນິວາໂສຕິ – ປສ຺ສນ຺ຕານໍ…ເປ… ທຸກ຺ເຂ ປຕິຏ຺ຐິໂຕ ໂລກສນ຺ນິວາໂສຕິ – ປສ຺ສນ຺ຕານໍ…ເປ….

ຕຓ຺ຫາຍ ອຸຑ຺ຑິໂຕ ໂລກສນ຺ນິວາໂສຕິ – ປສ຺ສນ຺ຕານໍ…ເປ… ຊຣາປາກາຣປຣິກ຺ຂິຕ຺ໂຕ ໂລກສນ຺ນິວາໂສຕິ – ປສ຺ສນ຺ຕານໍ…ເປ… ມຈ຺ຈຸປາເສນ ປຣິກ຺ຂິຕ຺ໂຕ ໂລກສນ຺ນິວາໂສຕິ – ປສ຺ສນ຺ຕານໍ…ເປ… ມຫາພນ຺ຘນພນ຺ໂຘ ໂລກສນ຺ນິວາໂສ – ຣາຄພນ຺ຘເນນ ໂທສພນ຺ຘເນນ ໂມຫພນ຺ຘເນນ ມານພນ຺ຘເນນ ທິຏ຺ຐິພນ຺ຘເນນ ກິເລສພນ຺ຘເນນ ທຸຈ຺ຈຣິຕພນ຺ຘເນນ; ຕສ຺ສ ນຕ຺ຖຎ຺ໂຎ ໂກຈິ ພນ຺ຘນໍ ໂມເຈຕາ, ອຎ຺ຎຕ຺ຣ ມຍາຕິ – ປສ຺ສນ຺ຕານໍ…ເປ… ມຫາສມ຺ພາຘປ຺ປຏິປນ຺ໂນ ໂລກສນ຺ນິວາໂສ; ຕສ຺ສ ນຕ຺ຖຎ຺ໂຎ ໂກຈິ ໂອກາສໍ ທສ຺ເສຕາ, ອຎ຺ຎຕ຺ຣ ມຍາຕິ – ປສ຺ສນ຺ຕານໍ… ມຫາປລິໂພເຘນ ປລິພຸທ຺ໂຘ ໂລກສນ຺ນິວາໂສ; ຕສ຺ສ ນຕ຺ຖຎ຺ໂຎ ໂກຈິ ປລິໂພຘໍ ເຉຕາ, ອຎ຺ຎຕ຺ຣ ມຍາຕິ – ປສ຺ສນ຺ຕານໍ…ເປ… ມຫາປປາເຕ ປຕິໂຕ ໂລກສນ຺ນິວາໂສ; ຕສ຺ສ ນຕ຺ຖຎ຺ໂຎ ໂກຈິ ປປາຕາ ອຸທ຺ຘຕາ, ອຎ຺ຎຕ຺ຣ ມຍາຕິ – ປສ຺ສນ຺ຕານໍ…ເປ… ມຫາກນ຺ຕາຣປ຺ປຏິປນ຺ໂນ ໂລກສນ຺ນິວາໂສ; ຕສ຺ສ ນຕ຺ຖຎ຺ໂຎ ໂກຈິ ກນ຺ຕາຣໍ ຕາເຣຕາ, ອຎ຺ຎຕ຺ຣ ມຍາຕິ – ປສ຺ສນ຺ຕານໍ…ເປ… ມຫາສໍສາຣປ຺ປຏິປນ຺ໂນ ໂລກສນ຺ນິວາໂສ; ຕສ຺ສ ນຕ຺ຖຎ຺ໂຎ ໂກຈິ ສໍສາຣາ ໂມເຈຕາ, ອຎ຺ຎຕ຺ຣ ມຍາຕິ – ປສ຺ສນ຺ຕານໍ…ເປ… ມຫາວິທຸຄ຺ເຄ ສມ຺ປຣິວຕ຺ຕຕິ ໂລກສນ຺ນິວາໂສ; ຕສ຺ສ ນຕ຺ຖຎ຺ໂຎ ໂກຈິ ວິທຸຄ຺ຄາ ອຸທ຺ຘຕາ, ອຎ຺ຎຕ຺ຣ ມຍາຕິ – ປສ຺ສນ຺ຕານໍ…ເປ… ມຫາປລິເປ [ມຫາປລ຺ເລເປ (ສ຺ຍາ.)] ປລິປນ຺ໂນ ໂລກສນ຺ນິວາໂສ; ຕສ຺ສ ນຕ຺ຖຎ຺ໂຎ ໂກຈິ ປລິປາ ອຸທ຺ຘຕາ, ອຎ຺ຎຕ຺ຣ ມຍາຕິ – ປສ຺ສນ຺ຕານໍ…ເປ….

ອພ຺ຠາຫໂຕ ໂລກສນ຺ນິວາໂສຕິ – ປສ຺ສນ຺ຕານໍ…ເປ… ອາທິຕ຺ໂຕ ໂລກສນ຺ນິວາໂສ – ຣາຄຄ຺ຄິນາ ໂທສຄ຺ຄິນາ ໂມຫຄ຺ຄິນາ ຊາຕິຍາ ຊຣາຍ ມຣເຓນ ໂສເກຫິ ປຣິເທເວຫິ ທຸກ຺ເຂຫິ ໂທມນສ຺ເສຫິ ອຸປາຍາເສຫິ; ຕສ຺ສ ນຕ຺ຖຎ຺ໂຎ ໂກຈິ ນິພ຺ພາເປຕາ, ອຎ຺ຎຕ຺ຣ ມຍາຕິ – ປສ຺ສນ຺ຕານໍ…ເປ… ອຸນ຺ນີຕໂກ ໂລກສນ຺ນິວາໂສ ຫຎ຺ຎຕິ ນິຈ຺ຈມຕາໂຓ ປຕ຺ຕທຓ຺ໂຑ ຕກ຺ກໂຣຕິ – ປສ຺ສນ຺ຕານໍ…ເປ… ວຊ຺ຊພນ຺ຘນພທ຺ໂຘ ໂລກສນ຺ນິວາໂສ ອາຆາຕນປຈ຺ຈຸປຏ຺ຐິໂຕ; ຕສ຺ສ ນຕ຺ຖຎ຺ໂຎ ໂກຈິ ພນ຺ຘນໍ ໂມເຈຕາ, ອຎ຺ຎຕ຺ຣ ມຍາຕິ – ປສ຺ສນ຺ຕານໍ…ເປ… ອນາໂຖ ໂລກສນ຺ນິວາໂສ ປຣມກາຣຸຎ຺ຎປ຺ປຕ຺ໂຕ; ຕສ຺ສ ນຕ຺ຖຎ຺ໂຎ ໂກຈິ ຕາເຍຕາ, ອຎ຺ຎຕ຺ຣ ມຍາຕິ – ປສ຺ສນ຺ຕານໍ…ເປ… ທຸກ຺ຂາຠິຕຸນ຺ໂນ [ທຸກ຺ຂາຠິຕຸຓ຺ໂຓ (ກ.)] ໂລກສນ຺ນິວາໂສ ຈິຣຣຕ຺ຕໍ ປີຬິໂຕຕິ – ປສ຺ສນ຺ຕານໍ…ເປ… ຄຘິໂຕ ໂລກສນ຺ນິວາໂສ ນິຈ຺ຈໍ ປິປາສິໂຕຕິ – ປສ຺ສນ຺ຕານໍ…ເປ….

ອນ຺ໂຘ ໂລກສນ຺ນິວາໂສ ອຈກ຺ຂຸໂກຕິ – ປສ຺ສນ຺ຕານໍ…ເປ… ຫຕເນຕ຺ໂຕ ໂລກສນ຺ນິວາໂສ ອປຣິຓາຍໂກຕິ – ປສ຺ສນ຺ຕານໍ…ເປ… ວິປຖປກ຺ຂນ຺ໂທ [ວິປຖໍ ປກ຺ຂນ຺ໂຕ (ສ຺ຍາ.)] ໂລກສນ຺ນິວາໂສ ອຎ຺ຊສາປຣທ຺ໂຘ; ຕສ຺ສ ນຕ຺ຖຎ຺ໂຎ ໂກຈິ ອຣິຍປຖໍ ອາເນຕາ, ອຎ຺ຎຕ຺ຣ ມຍາຕິ – ປສ຺ສນ຺ຕານໍ…ເປ… ມໂຫຆປກ຺ຂນ຺ໂທ ໂລກສນ຺ນິວາໂສ; ຕສ຺ສ ນຕ຺ຖຎ຺ໂຎ ໂກຈິ ໂອຆາ ອຸທ຺ຘຕາ, ອຎ຺ຎຕ຺ຣ ມຍາຕິ – ປສ຺ສນ຺ຕານໍ…ເປ….

໑໑໘. ທ຺ວີຫິ ທິຏ຺ຐິຄເຕຫິ ປຣິຍຸຏ຺ຐິໂຕ ໂລກສນ຺ນິວາໂສຕິ – ປສ຺ສນ຺ຕານໍ…ເປ… ຕີຫິ ທຸຈ຺ຈຣິເຕຫິ ວິປ຺ປຏິປນ຺ໂນ ໂລກສນ຺ນິວາໂສຕິ – ປສ຺ສນ຺ຕານໍ…ເປ… ຈຕູຫິ ໂຍເຄຫິ ຍຸຕ຺ໂຕ ໂລກສນ຺ນິວາໂສ ຈຕຸໂຍຄໂຍຊິໂຕຕິ – ປສ຺ສນ຺ຕານໍ…ເປ… ຈຕູຫິ ຄນ຺ເຖຫິ [ຄຓ຺ເຐຫິ (ສ຺ຍາ.)] ຄນ຺ຖິໂຕ ໂລກສນ຺ນິວາໂສຕິ – ປສ຺ສນ຺ຕານໍ…ເປ… ຈຕູຫິ ອຸປາທາເນຫິ ອຸປາທິຍຕິ ໂລກສນ຺ນິວາໂສຕິ – ປສ຺ສນ຺ຕານໍ…ເປ… ປຎ຺ຈຄຕິສມາຣຸຬ຺ໂຫ ໂລກສນ຺ນິວາໂສຕິ – ປສ຺ສນ຺ຕານໍ…ເປ… ປຎ຺ຈຫິ ກາມຄຸເຓຫິ ຣຊ຺ຊຕິ ໂລກສນ຺ນິວາໂສຕິ – ປສ຺ສນ຺ຕານໍ…ເປ… ປຎ຺ຈຫິ ນີວຣເຓຫິ ໂອຕ຺ຖໂຏ ໂລກສນ຺ນິວາໂສຕິ – ປສ຺ສນ຺ຕານໍ…ເປ… ຉຫິ ວິວາທມູເລຫິ ວິວທຕິ ໂລກສນ຺ນິວາໂສຕິ – ປສ຺ສນ຺ຕານໍ…ເປ… ຉຫິ ຕຓ຺ຫາກາເຍຫິ ຣຊ຺ຊຕິ ໂລກສນ຺ນິວາໂສຕິ – ປສ຺ສນ຺ຕານໍ…ເປ… ຉຫິ ທິຏ຺ຐິຄເຕຫິ ປຣິຍຸຏ຺ຐິໂຕ ໂລກສນ຺ນິວາໂສຕິ – ປສ຺ສນ຺ຕານໍ …ເປ… ສຕ຺ຕຫິ ອນຸສເຍຫິ ອນຸສໂຏ ໂລກສນ຺ນິວາໂສຕິ – ປສ຺ສນ຺ຕານໍ…ເປ… ສຕ຺ຕຫິ ສຎ຺ໂຎຊເນຫິ ສຎ຺ຎຸຕ຺ໂຕ ໂລກສນ຺ນິວາໂສຕິ – ປສ຺ສນ຺ຕານໍ…ເປ… ສຕ຺ຕຫິ ມາເນຫິ ອຸນ຺ນໂຕ [ອຸຓ຺ຓໂຕ (ສ຺ຍາ. ກ.)] ໂລກສນ຺ນິວາໂສຕິ – ປສ຺ສນ຺ຕານໍ…ເປ… ອຏ຺ຐຫິ ໂລກຘມ຺ເມຫິ ສມ຺ປຣິວຕ຺ຕຕິ ໂລກສນ຺ນິວາໂສຕິ – ປສ຺ສນ຺ຕານໍ…ເປ… ອຏ຺ຐຫິ ມິຈ຺ຉຕ຺ເຕຫິ ນິຍ຺ຍາໂຕ ໂລກສນ຺ນິວາໂສຕິ – ປສ຺ສນ຺ຕານໍ…ເປ… ອຏ຺ຐຫິ ປຸຣິສໂທເສຫິ ທຸສ຺ສຕິ ໂລກສນ຺ນິວາໂສຕິ – ປສ຺ສນ຺ຕານໍ…ເປ… ນວຫິ ອາຆາຕວຕ຺ຖູຫິ ອາຆາຕິໂຕ ໂລກສນ຺ນິວາໂສຕິ – ປສ຺ສນ຺ຕານໍ …ເປ… ນວວິຘມາເນຫິ ອຸນ຺ນໂຕ ໂລກສນ຺ນິວາໂສຕິ – ປສ຺ສນ຺ຕານໍ…ເປ… ນວຫິ ຕຓ຺ຫາມູລເກຫິ ຘມ຺ເມຫິ ຣຊ຺ຊຕິ ໂລກສນ຺ນິວາໂສຕິ – ປສ຺ສນ຺ຕານໍ…ເປ… ທສຫິ ກິເລສວຕ຺ຖູຫິ ກິລິສ຺ສຕິ ໂລກສນ຺ນິວາໂສຕິ – ປສ຺ສນ຺ຕານໍ…ເປ… ທສຫິ ອາຆາຕວຕ຺ຖູຫິ ອາຆາຕິໂຕ ໂລກສນ຺ນິວາໂສຕິ – ປສ຺ສນ຺ຕານໍ…ເປ… ທສຫິ ອກຸສລກມ຺ມປເຖຫິ ສມນ຺ນາຄໂຕ ໂລກສນ຺ນິວາໂສຕິ – ປສ຺ສນ຺ຕານໍ…ເປ… ທສຫິ ສຎ຺ໂຎຊເນຫິ ສຎ຺ຎຸຕ຺ໂຕ ໂລກສນ຺ນິວາໂສຕິ – ປສ຺ສນ຺ຕານໍ…ເປ… ທສຫິ ມິຈ຺ຉຕ຺ເຕຫິ ນິຍ຺ຍາໂຕ ໂລກສນ຺ນິວາໂສຕິ – ປສ຺ສນ຺ຕານໍ…ເປ… ທສວຕ຺ຖຸກາຍ ມິຈ຺ຉາທິຏ຺ຐິຍາ ສມນ຺ນາຄໂຕ ໂລກສນ຺ນິວາໂສຕິ – ປສ຺ສນ຺ຕານໍ…ເປ… ທສວຕ຺ຖຸກາຍ ອນ຺ຕຄ຺ຄາຫິກາຍ ທິຏ຺ຐິຍາ ສມນ຺ນາຄໂຕ ໂລກສນ຺ນິວາໂສຕິ – ປສ຺ສນ຺ຕານໍ…ເປ… ອຏ຺ຐສຕຕຓ຺ຫາປປຎ຺ຈສເຕຫິ ປປຎ຺ຈິໂຕ ໂລກສນ຺ນິວາໂສຕິ – ປສ຺ສນ຺ຕານໍ ພຸທ຺ຘານໍ ຠຄວນ຺ຕານໍ ສຕ຺ເຕສຸ ມຫາກຣຸຓາ ໂອກ຺ກມຕິ. ທ຺ວາສຏ຺ຐິຍາ ທິຏ຺ຐິຄເຕຫິ ປຣິຍຸຏ຺ຐິໂຕ ໂລກສນ຺ນິວາໂສຕິ – ປສ຺ສນ຺ຕານໍ ພຸທ຺ຘານໍ ຠຄວນ຺ຕານໍ ສຕ຺ເຕສຸ ມຫາກຣຸຓາ ໂອກ຺ກມຕິ.

ອຫຎ຺ຈມ຺ຫິ ຕິຓ຺ໂຓ, ໂລໂກ ຈ ອຕິຓ຺ໂຓ ອຫໍ ຈມ຺ຫິ ມຸຕ຺ໂຕ, ໂລໂກ ຈ ອມຸຕ຺ໂຕ; ອຫຎ຺ຈມ຺ຫິ ທນ຺ໂຕ, ໂລໂກ ຈ ອທນ຺ໂຕ; ອຫໍ ຈມ຺ຫິ ສນ຺ໂຕ, ໂລໂກ ຈ ອສນ຺ໂຕ; ອຫໍ ຈມ຺ຫິ ອສ຺ສຕ຺ໂຖ, ໂລໂກ ຈ ອນສ຺ສຕ຺ໂຖ; ອຫໍ ຈມ຺ຫິ ປຣິນິພ຺ພຸໂຕ, ໂລໂກ ຈ ອປຣິນິພ຺ພຸໂຕ; ປໂຫມິ ຂ຺ວາຫໍ ຕິຓ຺ໂຓ ຕາເຣຕຸໍ, ມຸຕ຺ໂຕ ໂມເຈຕຸໍ, ທນ຺ໂຕ ທເມຕຸໍ, ສນ຺ໂຕ ສເມຕຸໍ, ອສ຺ສຕ຺ໂຖ ອສ຺ສາເສຕຸໍ, ປຣິນິພ຺ພຸໂຕ ປເຣ ຈ ປຣິນິພ຺ພາເປຕຸນ຺ຕິ – ປສ຺ສນ຺ຕານໍ ພຸທ຺ຘານໍ ຠຄວນ຺ຕານໍ ສຕ຺ເຕສຸ ມຫາກຣຸຓາ ໂອກ຺ກມຕິ. ອິທໍ ຕຖາຄຕສ຺ສ ມຫາກຣຸຓາສມາປຕ຺ຕິຍາ ຎາຓໍ.

ມຫາກຣຸຓາຎາຓນິທ຺ເທໂສ ເອກສຕ຺ຕຕິໂມ.