໗໐. ຍມກປາຏິຫີຣຎາຓນິທ຺ເທໂສ

໑໑໖. ກຕມໍ ຕຖາຄຕສ຺ສ ຍມກປາຏິຫີເຣ ຎາຓໍ? ອິຘ ຕຖາຄໂຕ ຍມກປາຏິຫີຣໍ ກໂຣຕິ ອສາຘາຣຓໍ ສາວເກຫິ. ອຸປຣິມກາຍໂຕ ອຄ຺ຄິກ຺ຂນ຺ໂຘ ປວຕ຺ຕຕິ, ເຫຏ຺ຐິມກາຍໂຕ ອຸທກຘາຣາ ປວຕ຺ຕຕິ; ເຫຏ຺ຐິມກາຍໂຕ ອຄ຺ຄິກ຺ຂນ຺ໂຘ ປວຕ຺ຕຕິ, ອຸປຣິມກາຍໂຕ ອຸທກຘາຣາ ປວຕ຺ຕຕິ; ປຸຣຕ຺ຖິມກາຍໂຕ ອຄ຺ຄິກ຺ຂນ຺ໂຘ ປວຕ຺ຕຕິ, ປຈ຺ຉິມກາຍໂຕ ອຸທກຘາຣາ ປວຕ຺ຕຕິ; ປຈ຺ຉິມກາຍໂຕ ອຄ຺ຄິກ຺ຂນ຺ໂຘ ປວຕ຺ຕຕິ, ປຸຣຕ຺ຖິມກາຍໂຕ ອຸທກຘາຣາ ປວຕ຺ຕຕິ; ທກ຺ຂິຓອກ຺ຂິໂຕ ອຄ຺ຄິກ຺ຂນ຺ໂຘ ປວຕ຺ຕຕິ, ວາມອກ຺ຂິໂຕ ອຸທກຘາຣາ ປວຕ຺ຕຕິ; ວາມອກ຺ຂິໂຕ ອຄ຺ຄິກ຺ຂນ຺ໂຘ ປວຕ຺ຕຕິ, ທກ຺ຂິຓອກ຺ຂິໂຕ ອຸທກຘາຣາ ປວຕ຺ຕຕິ; ທກ຺ຂິຓກຓ຺ຓໂສຕໂຕ ອຄ຺ຄິກ຺ຂນ຺ໂຘ ປວຕ຺ຕຕິ, ວາມກຓ຺ຓໂສຕໂຕ ອຸທກຘາຣາ ປວຕ຺ຕຕິ; ວາມກຓ຺ຓໂສຕໂຕ ອຄ຺ຄິກ຺ຂນ຺ໂຘ ປວຕ຺ຕຕິ, ທກ຺ຂິຓກຓ຺ຓໂສຕໂຕ ອຸທກຘາຣາ ປວຕ຺ຕຕິ; ທກ຺ຂິຓນາສິກາໂສຕໂຕ ອຄ຺ຄິກ຺ຂນ຺ໂຘ ປວຕ຺ຕຕິ, ວາມນາສິກາໂສຕໂຕ ອຸທກຘາຣາ ປວຕ຺ຕຕິ; ວາມນາສິກາໂສຕໂຕ ອຄ຺ຄິກ຺ຂນ຺ໂຘ ປວຕ຺ຕຕິ, ທກ຺ຂິຓນາສິກາໂສຕໂຕ ອຸທກຘາຣາ ປວຕ຺ຕຕິ; ທກ຺ຂິຓອໍສກູຏໂຕ ອຄ຺ຄິກ຺ຂນ຺ໂຘ ປວຕ຺ຕຕິ, ວາມອໍສກູຏໂຕ ອຸທກຘາຣາ ປວຕ຺ຕຕິ; ວາມອໍສກູຏໂຕ ອຄ຺ຄິກ຺ຂນ຺ໂຘ ປວຕ຺ຕຕິ, ທກ຺ຂິຓອໍສກູຏໂຕ ອຸທກຘາຣາ ປວຕ຺ຕຕິ; ທກ຺ຂິຓຫຕ຺ຖໂຕ ອຄ຺ຄິກ຺ຂນ຺ໂຘ ປວຕ຺ຕຕິ, ວາມຫຕ຺ຖໂຕ ອຸທກຘາຣາ ປວຕ຺ຕຕິ; ວາມຫຕ຺ຖໂຕ ອຄ຺ຄິກ຺ຂນ຺ໂຘ ປວຕ຺ຕຕິ, ທກ຺ຂິຓຫຕ຺ຖໂຕ ອຸທກຘາຣາ ປວຕ຺ຕຕິ; ທກ຺ຂິຓປສ຺ສໂຕ ອຄ຺ຄິກ຺ຂນ຺ໂຘ ປວຕ຺ຕຕິ, ວາມປສ຺ສໂຕ ອຸທກຘາຣາ ປວຕ຺ຕຕິ; ວາມປສ຺ສໂຕ ອຄ຺ຄິກ຺ຂນ຺ໂຘ ປວຕ຺ຕຕິ, ທກ຺ຂິຓປສ຺ສໂຕ ອຸທກຘາຣາ ປວຕ຺ຕຕິ; ທກ຺ຂິຓປາທໂຕ ອຄ຺ຄິກ຺ຂນ຺ໂຘ ປວຕ຺ຕຕິ, ວາມປາທໂຕ ອຸທກຘາຣາ ປວຕ຺ຕຕິ; ວາມປາທໂຕ ອຄ຺ຄິກ຺ຂນ຺ໂຘ ປວຕ຺ຕຕິ, ທກ຺ຂິຓປາທໂຕ ອຸທກຘາຣາ ປວຕ຺ຕຕິ; ອງ຺ຄຸລງ຺ຄຸເລຫິ ອຄ຺ຄິກ຺ຂນ຺ໂຘ ປວຕ຺ຕຕິ, ອງ຺ຄຸລນ຺ຕຣິກາຫິ ອຸທກຘາຣາ ປວຕ຺ຕຕິ; ອງ຺ຄຸລນ຺ຕຣິກາຫິ ອຄ຺ຄິກ຺ຂນ຺ໂຘ ປວຕ຺ຕຕິ, ອງ຺ຄຸລງ຺ຄຸເລຫິ ອຸທກຘາຣາ ປວຕ຺ຕຕິ; ເອເກກໂລມໂຕ ອຄ຺ຄິກ຺ຂນ຺ໂຘ ປວຕ຺ຕຕິ, ເອເກກໂລມໂຕ ອຸທກຘາຣາ ປວຕ຺ຕຕິ; ໂລມກູປໂຕ ໂລມກູປໂຕ ອຄ຺ຄິກ຺ຂນ຺ໂຘ ປວຕ຺ຕຕິ, ໂລມກູປໂຕ ໂລມກູປໂຕ ອຸທກຘາຣາ ປວຕ຺ຕຕິ.

ຉນ຺ນໍ ວຓ຺ຓານໍ – ນີລານໍ, ປີຕການໍ, ໂລຫິຕການໍ, ໂອທາຕານໍ, ມຎ຺ຊິຏ຺ຐານໍ [ມຎ຺ເຊຏ຺ຐານໍ (ສ຺ຍາ. ກ.)], ປຠສ຺ສຣານໍ ຠຄວາ ຈງ຺ກມຕິ, ນິມ຺ມິໂຕ ຕິຏ຺ຐຕິ ວາ ນິສີທຕິ ວາ ເສຍ຺ຍໍ ວາ ກປ຺ເປຕິ. ຠຄວາ ຕິຏ຺ຐຕິ, ນິມ຺ມິໂຕ ຈງ຺ກມຕິ ວາ ນິສີທຕິ ວາ ເສຍ຺ຍໍ ວາ ກປ຺ເປຕິ. ຠຄວາ ນິສີທຕິ, ນິມ຺ມິໂຕ ຈງ຺ກມຕິ ວາ ຕິຏ຺ຐຕິ ວາ ເສຍ຺ຍໍ ວາ ກປ຺ເປຕິ. ຠຄວາ ເສຍ຺ຍໍ ກປ຺ເປຕິ, ນິມ຺ມິໂຕ ຈງ຺ກມຕິ ວາ ຕິຏ຺ຐຕິ ວາ ນິສີທຕິ ວາ. ນິມ຺ມິໂຕ ຈງ຺ກມຕິ, ຠຄວາ ຕິຏ຺ຐຕິ ວາ ນິສີທຕິ ວາ ເສຍ຺ຍໍ ວາ ກປ຺ເປຕິ. ນິມ຺ມິໂຕ ຕິຏ຺ຐຕິ, ຠຄວາ ຈງ຺ກມຕິ ວາ ນິສີທຕິ ວາ ເສຍ຺ຍໍ ວາ ກປ຺ເປຕິ. ນິມ຺ມິໂຕ ນິສີທຕິ, ຠຄວາ ຈງ຺ກມຕິ ວາ ຕິຏ຺ຐຕິ ວາ ເສຍ຺ຍໍ ວາ ກປ຺ເປຕິ. ນິມ຺ມິໂຕ ເສຍ຺ຍໍ ກປ຺ເປຕິ, ຠຄວາ ຈງ຺ກມຕິ ວາ ຕິຏ຺ຐຕິ ວາ ນິສີທຕິ ວາ. ອິທໍ ຕຖາຄຕສ຺ສ ຍມກປາຏິຫີເຣ ຎາຓໍ.

ຍມກປາຏິຫີຣຎາຓນິທ຺ເທໂສ ສຕ຺ຕຕິໂມ.