໖໙. ອາສຍານຸສຍຎາຓນິທ຺ເທໂສ

໑໑໓. ກຕມໍ ຕຖາຄຕສ຺ສ ສຕ຺ຕານໍ ອາສຍານຸສເຍ ຎາຓໍ? ອິຘ ຕຖາຄໂຕ ສຕ຺ຕານໍ ອາສຍໍ ຊານາຕິ, ອນຸສຍໍ ຊານາຕິ, ຈຣິຕໍ ຊານາຕິ, ອຘິມຸຕ຺ຕິໍ ຊານາຕິ, ຠພ຺ພາຠພ຺ເພ ສຕ຺ເຕ ປຊານາຕິ. ກຕໂມ [ກຕໂມ ຈ (ສ຺ຍາ. ກ.)] ສຕ຺ຕານໍ ອາສໂຍ? ‘‘ສສ຺ສໂຕ ໂລໂກ’’ຕິ ວາ, ‘‘ອສສ຺ສໂຕ ໂລໂກ’’ຕິ ວາ, ‘‘ອນ຺ຕວາ ໂລໂກ’’ຕິ ວາ, ‘‘ອນນ຺ຕວາ ໂລໂກ’’ຕິ ວາ, ‘‘ຕໍ ຊີວໍ ຕໍ ສຣີຣ’’ນ຺ຕິ ວາ, ‘‘ອຎ຺ຎໍ ຊີວໍ ອຎ຺ຎໍ ສຣີຣ’’ນ຺ຕິ ວາ, ‘‘ໂຫຕິ ຕຖາຄໂຕ ປຣໍ ມຣຓາ’’ຕິ ວາ, ‘‘ນ ໂຫຕິ ຕຖາຄໂຕ ປຣໍ ມຣຓາ’’ຕິ ວາ, ‘‘ໂຫຕິ ຈ ນ ຈ ໂຫຕິ ຕຖາຄໂຕ ປຣໍ ມຣຓາ’’ຕິ ວາ, ‘‘ເນວ ໂຫຕິ ນ ນ ໂຫຕິ ຕຖາຄໂຕ ປຣໍ ມຣຓາ’’ຕິ ວາ. ອິຕິ ຠວທິຏ຺ຐິສນ຺ນິສ຺ສິຕາ ວາ ສຕ຺ຕາ ໂຫນ຺ຕິ ວິຠວທິຏ຺ຐິສນ຺ນິສ຺ສິຕາ ວາ.

ເອເຕ ວາ ປນ ອຸໂຠ ອນ຺ເຕ ອນຸປຄມ຺ມ ອິທປ຺ປຈ຺ຈຍຕາປຏິຈ຺ຈສມຸປ຺ປນ຺ເນສຸ ຘມ຺ເມສຸ ອນຸໂລມິກາ ຂນ຺ຕິ ປຏິລທ຺ຘາ ໂຫຕິ, ຍຖາຠູຕໍ ວາ ຎາຓໍ. ກາມໍ ເສວນ຺ຕຎ຺ເຎວ ຊານາຕິ – ‘‘ອຍໍ ປຸຄ຺ຄໂລ ກາມຄຣຸໂກ ກາມາສໂຍ ກາມາຘິມຸຕ຺ໂຕ’’ຕິ. ກາມໍ ເສວນ຺ຕຎ຺ເຎວ ຊານາຕິ – ‘‘ອຍໍ ປຸຄ຺ຄໂລ ເນກ຺ຂມ຺ມຄຣຸໂກ ເນກ຺ຂມ຺ມາສໂຍ ເນກ຺ຂມ຺ມາຘິມຸຕ຺ໂຕ’’ຕິ. ເນກ຺ຂມ຺ມໍ ເສວນ຺ຕຎ຺ເຎວ ຊານາຕິ – ‘‘ອຍໍ ປຸຄ຺ຄໂລ (ເນກ຺ຂມ຺ມຄຣຸໂກ ເນກ຺ຂມ຺ມາສໂຍ ເນກ຺ຂມ຺ມາຘິມຸຕ຺ໂຕ’’ຕິ. ເນກ຺ຂມ຺ມໍ ເສວນ຺ຕຎ຺ເຎວ ຊານາຕິ – ‘‘ອຍໍ ປຸຄ຺ຄໂລ ກາມຄຣຸໂກ ກາມາສໂຍ ກາມາຘິມຸຕ຺ໂຕ’’ຕິ. ພ຺ຍາປາທໍ ເສວນ຺ຕຎ຺ເຎວ ຊານາຕິ) [( ) ເອຕ຺ຖນ຺ຕເຣ ປາຐາ ນຕ຺ຖິ ສ຺ຍາມໂປຕ຺ຖເກ, ເອວມຸປຣິປິ] – ‘‘ອຍໍ ປຸຄ຺ຄໂລ ພ຺ຍາປາທຄຣຸໂກ ພ຺ຍາປາທາສໂຍ ພ຺ຍາປາທາຘິມຸຕ຺ໂຕ’’ຕິ. ພ຺ຍາປາທໍ ເສວນ຺ຕຎ຺ເຎວ ຊານາຕິ – ‘‘ອຍໍ ປຸຄ຺ຄໂລ (ອພ຺ຍາປາທຄຣຸໂກ ອພ຺ຍາປາທາສໂຍ ອພ຺ຍາປາທາຘິມຸຕ຺ໂຕ’’ຕິ. ອພ຺ຍາປາທໍ ເສວນ຺ຕຎ຺ເຎວ ຊານາຕິ – ‘‘ອຍໍ ປຸຄ຺ຄໂລ ອພ຺ຍາປາທຄຣຸໂກ ອພ຺ຍາປາທາສໂຍ ອພ຺ຍາປາທາຘິມຸຕ຺ໂຕ’’ຕິ. ອພ຺ຍາປາທໍ ເສວນ຺ຕຎ຺ເຎວ ຊານາຕິ – ‘‘ອຍໍ ປຸຄ຺ຄໂລ ພ຺ຍາປາທຄຣຸໂກ ພ຺ຍາປາທາສໂຍ ພ຺ຍາປາທາຘິມຸຕ຺ໂຕ’’ຕິ. ຖິນມິທ຺ຘໍ ເສວນ຺ຕຎ຺ເຎວ ຊານາຕິ) – ‘‘ອຍໍ ປຸຄ຺ຄໂລ ຖິນມິທ຺ຘຄຣຸໂກ ຖິນມິທ຺ຘາສໂຍ ຖິນມິທ຺ຘາຘິມຸຕ຺ໂຕ’’ຕິ. ຖິນມິທ຺ຘໍ ເສວນ຺ຕຎ຺ເຎວ ຊານາຕິ – ‘‘ອຍໍ ປຸຄ຺ຄໂລ ອາໂລກສຎ຺ຎາຄຣຸໂກ ອາໂລກສຎ຺ຎາສໂຍ ອາໂລກສຎ຺ຎາຘິມຸຕ຺ໂຕ’’ຕິ. ອາໂລກສຎ຺ຎໍ ເສວນ຺ຕຎ຺ເຎວ ຊານາຕິ – ‘‘ອຍໍ ປຸຄ຺ຄໂລ (ອາໂລກສຎ຺ຎາຄຣຸໂກ ອາໂລກສຎ຺ຎາສໂຍ ອາໂລກສຎ຺ຎາຘິມຸຕ຺ໂຕ’’ຕິ. ອາໂລກສຎ຺ຎໍ ເສວນ຺ຕຎ຺ເຎວ ຊານາຕິ – ‘‘ອຍໍ ປຸຄ຺ຄໂລ ຖິນມິທ຺ຘຄຣຸໂກ ຖິນມິທ຺ຘາສໂຍ ຖິນມິທ຺ຘາຘິມຸຕ຺ໂຕ’’ຕິ.) ອຍໍ ສຕ຺ຕານໍ ອາສໂຍ.

໑໑໔. ກຕໂມ ຈ ສຕ຺ຕານໍ ອນຸສໂຍ? ສຕ຺ຕານຸສຍາ – ກາມຣາຄານຸສໂຍ, ປຏິຆານຸສໂຍ, ມານານຸສໂຍ, ທິຏ຺ຐານຸສໂຍ, ວິຈິກິຈ຺ຉານຸສໂຍ, ຠວຣາຄານຸສໂຍ, ອວິຊ຺ຊານຸສໂຍ. ຍໍ ໂລເກ ປິຍຣູປໍ ສາຕຣູປໍ, ເອຕ຺ຖ ສຕ຺ຕານໍ ກາມຣາຄານຸສໂຍ ອນຸເສຕິ. ຍໍ ໂລເກ ອປ຺ປິຍຣູປໍ ອສາຕຣູປໍ, ເອຕ຺ຖ ສຕ຺ຕານໍ ປຏິຆານຸສໂຍ ອນຸເສຕິ. ອິຕິ ອິເມສຸ ທ຺ວີສຸ ຘມ຺ເມສຸ ອວິຊ຺ຊາ ອນຸປຕິຕາ, ຕເທກຏ຺ໂຐ ມາໂນ ຈ ທິຏ຺ຐິ ຈ ວິຈິກິຈ຺ຉາ ຈ ທຏ຺ຐພ຺ພາ. ອຍໍ ສຕ຺ຕານໍ ອນຸສໂຍ.

ກຕມຎ຺ຈ ສຕ຺ຕານໍ ຈຣິຕໍ? ປຸຎ຺ຎາຠິສງ຺ຂາໂຣ ອປຸຎ຺ຎາຠິສງ຺ຂາໂຣ ອາເນຎ຺ຊາຠິສງ຺ຂາໂຣ ປຣິຕ຺ຕຠູມໂກ ວາ ມຫາຠູມໂກ ວາ. ອິທໍ ສຕ຺ຕານໍ ຈຣິຕໍ.

໑໑໕. ກຕມາ ຈ ສຕ຺ຕານໍ ອຘິມຸຕ຺ຕິ? ສນ຺ຕິ ສຕ຺ຕາ ຫີນາຘິມຸຕ຺ຕິກາ, ສນ຺ຕິ ສຕ຺ຕາ ປຓີຕາຘິມຸຕ຺ຕິກາ. ຫີນາຘິມຸຕ຺ຕິກາ ສຕ຺ຕາ ຫີນາຘິມຸຕ຺ຕິເກ ສຕ຺ເຕ ເສວນ຺ຕິ ຠຊນ຺ຕິ ປຍິຣຸປາສນ຺ຕິ. ປຓີຕາຘິມຸຕ຺ຕິກາ ສຕ຺ຕາ ປຓີຕາຘິມຸຕ຺ຕິເກ ສຕ຺ເຕ ເສວນ຺ຕິ ຠຊນ຺ຕິ ປຍິຣຸປາສນ຺ຕິ. ອຕີຕມ຺ປິ ອທ຺ຘານໍ ຫີນາຘິມຸຕ຺ຕິກາ ສຕ຺ຕາ ຫີນາຘິມຸຕ຺ຕິເກ ສຕ຺ເຕ ເສວິໍສຸ ຠຊິໍສຸ ປຍິຣຸປາສິໍສຸ; ປຓີຕາຘິມຸຕ຺ຕິກາ ສຕ຺ຕາ ປຓີຕາຘິມຸຕ຺ຕິເກ ສຕ຺ເຕ ເສວິໍສຸ ຠຊິໍສຸ ປຍິຣຸປາສິໍສຸ. ອນາຄຕມ຺ປິ ອທ຺ຘານໍ ຫີນາຘິມຸຕ຺ຕິກາ ສຕ຺ຕາ ຫີນາຘິມຸຕ຺ຕິເກ ສຕ຺ເຕ ເສວິສ຺ສນ຺ຕິ ຠຊິສ຺ສນ຺ຕິ ປຍິຣຸປາສິສ຺ສນ຺ຕິ; ປຓີຕາຘິມຸຕ຺ຕິກາ ສຕ຺ຕາ ປຓີຕາຘິມຸຕ຺ຕິເກ ສຕ຺ເຕ ເສວິສ຺ສນ຺ຕິ ຠຊິສ຺ສນ຺ຕິ ປຍິຣຸປາສິສ຺ສນ຺ຕິ. ອຍໍ ສຕ຺ຕານໍ ອຘິມຸຕ຺ຕິ.

ກຕເມ ສຕ຺ຕາ ອຠພ຺ພາ? ເຍ ເຕ ສຕ຺ຕາ ກມ຺ມາວຣເຓນ ສມນ຺ນາຄຕາ, ກິເລສາວຣເຓນ ສມນ຺ນາຄຕາ, ວິປາກາວຣເຓນ ສມນ຺ນາຄຕາ, ອສ຺ສທ຺ຘາ ອຈ຺ຉນ຺ທິກາ ທຸປ຺ປຎ຺ຎາ, ອຠພ຺ພາ ນິຍາມໍ ໂອກ຺ກມິຕຸໍ ກຸສເລສຸ ຘມ຺ເມສຸ ສມ຺ມຕ຺ຕໍ – ອິເມ ເຕ ສຕ຺ຕາ ອຠພ຺ພາ.

ກຕເມ ສຕ຺ຕາ ຠພ຺ພາ? ເຍ ເຕ ສຕ຺ຕາ ນ ກມ຺ມາວຣເຓນ ສມນ຺ນາຄຕາ, ນ ກິເລສາວຣເຓນ ສມນ຺ນາຄຕາ, ນ ວິປາກາວຣເຓນ ສມນ຺ນາຄຕາ, ສທ຺ຘາ ຉນ຺ທິກາ ປຎ຺ຎວນ຺ໂຕ, ຠພ຺ພາ ນິຍາມໍ ໂອກ຺ກມິຕຸໍ ກຸສເລສຸ ຘມ຺ເມສຸ ສມ຺ມຕ຺ຕໍ – ອິເມ ເຕ ສຕ຺ຕາ ຠພ຺ພາ. ອິທໍ ຕຖາຄຕສ຺ສ ສຕ຺ຕານໍ ອາສຍານຸສເຍ ຎາຓໍ.

ອາສຍານຸສຍຎາຓນິທ຺ເທໂສ ນວສຏ຺ຐິໂມ.