໖໘. ອິນ຺ທ຺ຣິຍປໂຣປຣິຍຕ຺ຕຎາຓນິທ຺ເທໂສ

໑໑໑. ກຕມໍ ຕຖາຄຕສ຺ສ ອິນ຺ທ຺ຣິຍປໂຣປຣິຍຕ຺ຕ ຎາຓໍ? ອິຘ ຕຖາຄໂຕ ສຕ຺ເຕ ປສ຺ສຕິ ອປ຺ປຣຊກ຺ເຂ ມຫາຣຊກ຺ເຂ ຕິກ຺ຂິນ຺ທ຺ຣິເຍ ມຸທິນ຺ທ຺ຣິເຍ ສ຺ວາກາເຣ ທ຺ວາກາເຣ ສຸວິຎ຺ຎາປເຍ ທຸວິຎ຺ຎາປເຍ ອປ຺ເປກຈ຺ເຈ ປຣໂລກວຊ຺ຊຠຍທສ຺ສາວິໂນ ອປ຺ເປກຈ຺ເຈ ນ ປຣໂລກວຊ຺ຊຠຍທສ຺ສາວິໂນ.

ອປ຺ປຣຊກ຺ເຂ ມຫາຣຊກ຺ເຂຕິ ສທ຺ໂຘ ປຸຄ຺ຄໂລ ອປ຺ປຣຊກ຺ໂຂ, ອສ຺ສທ຺ໂຘ ປຸຄ຺ຄໂລ ມຫາຣຊກ຺ໂຂ. ອາຣທ຺ຘວີຣິໂຍ ປຸຄ຺ຄໂລ ອປ຺ປຣຊກ຺ໂຂ, ກຸສີໂຕ ປຸຄ຺ຄໂລ ມຫາຣຊກ຺ໂຂ. ອຸປຏ຺ຐິຕສ຺ສຕິ ປຸຄ຺ຄໂລ ອປ຺ປຣຊກ຺ໂຂ, ມຸຏ຺ຐສ຺ສຕິ ປຸຄ຺ຄໂລ ມຫາຣຊກ຺ໂຂ. ສມາຫິໂຕ ປຸຄ຺ຄໂລ ອປ຺ປຣຊກ຺ໂຂ, ອສມາຫິໂຕ ປຸຄ຺ຄໂລ ມຫາຣຊກ຺ໂຂ. ປຎ຺ຎວາ ປຸຄ຺ຄໂລ ອປ຺ປຣຊກ຺ໂຂ, ທຸປ຺ປຎ຺ໂຎ ປຸຄ຺ຄໂລ ມຫາຣຊກ຺ໂຂ.

ຕິກ຺ຂິນ຺ທ຺ຣິເຍ ມຸທິນ຺ທ຺ຣິເຍຕິ ສທ຺ໂຘ ປຸຄ຺ຄໂລ ຕິກ຺ຂິນ຺ທ຺ຣິໂຍ, ອສ຺ສທ຺ໂຘ ປຸຄ຺ຄໂລ ມຸທິນ຺ທ຺ຣິໂຍ. ອາຣທ຺ຘວີຣິໂຍ ປຸຄ຺ຄໂລ ຕິກ຺ຂິນ຺ທ຺ຣິໂຍ, ກຸສີໂຕ ປຸຄ຺ຄໂລ ມຸທິນ຺ທ຺ຣິໂຍ. ອຸປຏ຺ຐິຕສ຺ສຕິ ປຸຄ຺ຄໂລ ຕິກ຺ຂິນ຺ທ຺ຣິໂຍ, ມຸຏ຺ຐສ຺ສຕິ ປຸຄ຺ຄໂລ ມຸທິນ຺ທ຺ຣິໂຍ. ສມາຫິໂຕ ປຸຄ຺ຄໂລ ຕິກ຺ຂິນ຺ທ຺ຣິໂຍ, ອສມາຫິໂຕ ປຸຄ຺ຄໂລ ມຸທິນ຺ທ຺ຣິໂຍ. ປຎ຺ຎວາ ປຸຄ຺ຄໂລ ຕິກ຺ຂິນ຺ທ຺ຣິໂຍ, ທຸປ຺ປຎ຺ໂຎ ປຸຄ຺ຄໂລ ມຸທິນ຺ທ຺ຣິໂຍ.

ສ຺ວາກາເຣ ທ຺ວາກາເຣຕິ ສທ຺ໂຘ ປຸຄ຺ຄໂລ ສ຺ວາກາໂຣ, ອສ຺ສທ຺ໂຘ ປຸຄ຺ຄໂລ ທ຺ວາກາໂຣ. ອາຣທ຺ຘວີຣິໂຍ ປຸຄ຺ຄໂລ ສ຺ວາກາໂຣ, ກຸສີໂຕ ປຸຄ຺ຄໂລ ທ຺ວາກາໂຣ. ອຸປຏ຺ຐິຕສ຺ສຕິ ປຸຄ຺ຄໂລ ສ຺ວາກາໂຣ, ມຸຏ຺ຐສ຺ສຕິ ປຸຄ຺ຄໂລ ທ຺ວາກາໂຣ. ສມາຫິໂຕ ປຸຄ຺ຄໂລ ສ຺ວາກາໂຣ, ອສມາຫິໂຕ ປຸຄ຺ຄໂລ ທ຺ວາກາໂຣ. ປຎ຺ຎວາ ປຸຄ຺ຄໂລ ສ຺ວາກາໂຣ, ທຸປ຺ປຎ຺ໂຎ ປຸຄ຺ຄໂລ ທ຺ວາກາໂຣ.

ສຸວິຎ຺ຎາປເຍ ທຸວິຎ຺ຎາປເຍຕິ ສທ຺ໂຘ ປຸຄ຺ຄໂລ ສຸວິຎ຺ຎາປໂຍ, ອສ຺ສທ຺ໂຘ ປຸຄ຺ຄໂລ ທຸວິຎ຺ຎາປໂຍ. ອາຣທ຺ຘວີຣິໂຍ ປຸຄ຺ຄໂລ ສຸວິຎ຺ຎາປໂຍ, ກຸສີໂຕ ປຸຄ຺ຄໂລ ທຸວິຎ຺ຎາປໂຍ. ອຸປຏ຺ຐິຕສ຺ສຕິ ປຸຄ຺ຄໂລ ສຸວິຎ຺ຎາປໂຍ, ມຸຏ຺ຐສ຺ສຕິ ປຸຄ຺ຄໂລ ທຸວິຎ຺ຎາປໂຍ. ສມາຫິໂຕ ປຸຄ຺ຄໂລ ສຸວິຎ຺ຎາປໂຍ, ອສມາຫິໂຕ ປຸຄ຺ຄໂລ ທຸວິຎ຺ຎາປໂຍ. ປຎ຺ຎວາ ປຸຄ຺ຄໂລ ສຸວິຎ຺ຎາປໂຍ, ທຸປ຺ປຎ຺ໂຎ ປຸຄ຺ຄໂລ ທຸວິຎ຺ຎາປໂຍ.

ອປ຺ເປກຈ຺ເຈ ປຣໂລກວຊ຺ຊຠຍທສ຺ສາວິໂນ, ອປ຺ເປກຈ຺ເຈ ນ ປຣໂລກວຊ຺ຊຠຍທສ຺ສາວິໂນຕິ ສທ຺ໂຘ ປຸຄ຺ຄໂລ ປຣໂລກວຊ຺ຊຠຍທສ຺ສາວີ, ອສ຺ສທ຺ໂຘ ປຸຄ຺ຄໂລ ນ ປຣໂລກວຊ຺ຊຠຍທສ຺ສາວີ. ອາຣທ຺ຘວີຣິໂຍ ປຸຄ຺ຄໂລ ປຣໂລກວຊ຺ຊຠຍທສ຺ສາວີ, ກຸສີໂຕ ປຸຄ຺ຄໂລ ນ ປຣໂລກວຊ຺ຊຠຍທສ຺ສາວີ. ອຸປຏ຺ຐິຕສ຺ສຕິ ປຸຄ຺ຄໂລ ປຣໂລກວຊ຺ຊຠຍທສ຺ສາວີ, ມຸຏ຺ຐສ຺ສຕິ ປຸຄ຺ຄໂລ ນ ປຣໂລກວຊ຺ຊຠຍທສ຺ສາວີ. ສມາຫິໂຕ ປຸຄ຺ຄໂລ ປຣໂລກວຊ຺ຊຠຍທສ຺ສາວີ, ອສມາຫິໂຕ ປຸຄ຺ຄໂລ ນ ປຣໂລກວຊ຺ຊຠຍທສ຺ສາວີ. ປຎ຺ຎວາ ປຸຄ຺ຄໂລ ປຣໂລກວຊ຺ຊຠຍທສ຺ສາວີ, ທຸປ຺ປຎ຺ໂຎ ປຸຄ຺ຄໂລ ນ ປຣໂລກວຊ຺ຊຠຍທສ຺ສາວີ.

໑໑໒. ໂລໂກຕິ – ຂນ຺ຘໂລໂກ, ຘາຕຸໂລໂກ, ອາຍຕນໂລໂກ, ວິປຕ຺ຕິຠວໂລໂກ, ວິປຕ຺ຕິສມ຺ຠວໂລໂກ, ສມ຺ປຕ຺ຕິຠວໂລໂກ, ສມ຺ປຕ຺ຕິສມ຺ຠວໂລໂກ.

ເອໂກ ໂລໂກ – ສພ຺ເພ ສຕ຺ຕາ ອາຫາຣຏ຺ຐິຕິກາ. ທ຺ເວ ໂລກາ – ນາມຎ຺ຈ, ຣູປຎ຺ຈ. ຕໂຍ ໂລກາ – ຕິສ຺ໂສ ເວທນາ. ຈຕ຺ຕາໂຣ ໂລກາ – ຈຕ຺ຕາໂຣ ອາຫາຣາ. ປຎ຺ຈ ໂລກາ – ປຎ຺ຈຸປາທານກ຺ຂນ຺ຘາ. ຉ ໂລກາ – ຉ ອຊ຺ຌຕ຺ຕິການິ ອາຍຕນານິ. ສຕ຺ຕ ໂລກາ – ສຕ຺ຕ ວິຎ຺ຎາຓຏ຺ຐິຕິໂຍ. ອຏ຺ຐ ໂລກາ – ອຏ຺ຐ ໂລກຘມ຺ມາ. ນວ ໂລກາ – ນວ ສຕ຺ຕາວາສາ. ທສ ໂລກາ – ທສາຍຕນານິ. ທ຺ວາທສໂລກາ – ທ຺ວາທສາຍຕນານິ. ອຏ຺ຐາຣສ ໂລກາ – ອຏ຺ຐາຣສ ຘາຕຸໂຍ.

ວຊ຺ຊນ຺ຕິ ສພ຺ເພ ກິເລສາ ວຊ຺ຊາ, ສພ຺ເພ ທຸຈ຺ຈຣິຕາ ວຊ຺ຊາ, ສພ຺ເພ ອຠິສງ຺ຂາຣາ ວຊ຺ຊາ, ສພ຺ເພ ຠວຄາມິກມ຺ມາ ວຊ຺ຊາ. ອິຕິ ອິມສ຺ມິຎ຺ຈ ໂລເກ ອິມສ຺ມິຎ຺ຈ ວຊ຺ເຊ ຕິພ຺ພາ ຠຍສຎ຺ຎາ ປຈ຺ຈຸປຏ຺ຐິຕາ ໂຫຕິ, ເສຍ຺ຍຖາປິ ອຸກ຺ຂິຕ຺ຕາສິເກ ວຘເກ. ອິເມຫິ ປຎ຺ຎາສາຍ ອາກາເຣຫິ ອິມານິ ປຎ຺ຈິນ຺ທ຺ຣິຍານິ ຊານາຕິ ປສ຺ສຕິ ອຎ຺ຎາຕິ ປຏິວິຊ຺ຌຕິ – ອິທໍ ຕຖາຄຕສ຺ສ ອິນ຺ທ຺ຣິຍປໂຣປຣິຍຕ຺ເຕ ຎາຓໍ.

ອິນ຺ທ຺ຣິຍປໂຣປຣິຍຕ຺ຕຎາຓນິທ຺ເທໂສ ອຏ຺ຐສຏ຺ຐິໂມ.