໖໔-໖໗. ສຸທ຺ຘິກປຏິສມ຺ຠິທາຎາຓນິທ຺ເທໂສ

໑໑໐. ກຖໍ ອຕ຺ຖປຏິສມ຺ຠິເທ ຎາຓໍ, ຘມ຺ມປຏິສມ຺ຠິເທ ຎາຓໍ, ນິຣຸຕ຺ຕິປຏິສມ຺ຠິເທ ຎາຓໍ, ປຏິຠານປຏິສມ຺ຠິເທ ຎາຓໍ? ອຕ຺ເຖສຸ ຎາຓໍ ອຕ຺ຖປຏິສມ຺ຠິທາ, ຘມ຺ເມສຸ ຎາຓໍ ຘມ຺ມປຏິສມ຺ຠິທາ, ນິຣຸຕ຺ຕີສຸ ຎາຓໍ ນິຣຸຕ຺ຕິປຏິສມ຺ຠິທາ, ປຏິຠາເນສຸ ຎາຓໍ ປຏິຠານປຏິສມ຺ຠິທາ. ອຕ຺ຖນານຕ຺ເຕ ປຎ຺ຎາ ອຕ຺ຖປຏິສມ຺ຠິເທ ຎາຓໍ, ຘມ຺ມນານຕ຺ເຕ ປຎ຺ຎາ ຘມ຺ມປຏິສມ຺ຠິເທ ຎາຓໍ, ນິຣຸຕ຺ຕິນານຕ຺ເຕ ປຎ຺ຎາ ນິຣຸຕ຺ຕິປຏິສມ຺ຠິເທ ຎາຓໍ, ປຏິຠານນານຕ຺ເຕ ປຎ຺ຎາ ປຏິຠານປຏິສມ຺ຠິເທ ຎາຓໍ, ອຕ຺ຖວວຕ຺ຖາເນ ປຎ຺ຎາ ອຕ຺ຖປຏິສມ຺ຠິເທ ຎາຓໍ, ຘມ຺ມວວຕ຺ຖາເນ ປຎ຺ຎາ ຘມ຺ມປຏິສມ຺ຠິເທ ຎາຓໍ ນິຣຸຕ຺ຕິວວຕ຺ຖາເນ ປຎ຺ຎາ ນິຣຸຕ຺ຕິປຏິສມ຺ຠິເທ ຎາຓໍ, ປຏິຠານວວຕ຺ຖາເນ ປຎ຺ຎາ ປຏິຠານປຏິສມ຺ຠິເທ ຎາຓໍ.

ອຕ຺ຖສລ຺ລກ຺ຂເຓ ປຎ຺ຎາ ອຕ຺ຖປຏິສມ຺ຠິເທ ຎາຓໍ, ຘມ຺ມສລ຺ລກ຺ຂເຓ ປຎ຺ຎາ ຘມ຺ມປຏິສມ຺ຠິເທ ຎາຓໍ, ນິຣຸຕ຺ຕິສລ຺ລກ຺ຂເຓ ປຎ຺ຎາ ນິຣຸຕ຺ຕິປຏິສມ຺ຠິເທ ຎາຓໍ, ປຏິຠານສລ຺ລກ຺ຂເຓ ປຎ຺ຎາ ປຏິຠານປຏິສມ຺ຠິເທ ຎາຓໍ. ອຕ຺ຖູປລກ຺ຂເຓ ປຎ຺ຎາ ອຕ຺ຖປຏິສມ຺ຠິເທ ຎາຓໍ, ຘມ຺ມູປລກ຺ຂເຓ ປຎ຺ຎາ ຘມ຺ມປຏິສມ຺ຠິເທ ຎາຓໍ, ນິຣຸຕ຺ຕູປລກ຺ຂເຓ ປຎ຺ຎາ ນິຣຸຕ຺ຕິປຏິສມ຺ຠິເທ ຎາຓໍ, ປຏິຠານູປລກ຺ຂເຓ ປຎ຺ຎາ ປຏິຠານປຏິສມ຺ຠິເທ ຎາຓໍ.

ອຕ຺ຖປ຺ປເຠເທ ປຎ຺ຎາ ອຕ຺ຖປຏິສມ຺ຠິເທ ຎາຓໍ, ຘມ຺ມປ຺ປເຠເທ ປຎ຺ຎາ ຘມ຺ມປຏິສມ຺ຠິເທ ຎາຓໍ, ນິຣຸຕ຺ຕິປ຺ປເຠເທ ປຎ຺ຎາ ນິຣຸຕ຺ຕິປຏິສມ຺ຠິເທ ຎາຓໍ, ປຏິຠານປ຺ປເຠເທ ປຎ຺ຎາ ປຏິຠານປຏິສມ຺ຠິເທ ຎາຓໍ. ອຕ຺ຖປ຺ປຠາວເນ ປຎ຺ຎາ ອຕ຺ຖປຏິສມ຺ຠິເທ ຎາຓໍ, ຘມ຺ມປ຺ປຠາວເນ ປຎ຺ຎາ ຘມ຺ມປຏິສມ຺ຠິເທ ຎາຓໍ, ນິຣຸຕ຺ຕິປ຺ປຠາວເນ ປຎ຺ຎາ ນິຣຸຕ຺ຕິປຏິສມ຺ຠິເທ ຎາຓໍ, ປຏິຠານປ຺ປຠາວເນ ປຎ຺ຎາ ປຏິຠານປຏິສມ຺ຠິເທ ຎາຓໍ.

ອຕ຺ຖໂຊຕເນ ປຎ຺ຎາ ອຕ຺ຖປຏິສມ຺ຠິເທ ຎາຓໍ, ຘມ຺ມໂຊຕເນ ປຎ຺ຎາ ຘມ຺ມປຏິສມ຺ຠິເທ ຎາຓໍ, ນິຣຸຕ຺ຕິໂຊຕເນ ປຎ຺ຎາ ນິຣຸຕ຺ຕິປຏິສມ຺ຠິເທ ຎາຓໍ, ປຏິຠານໂຊຕເນ ປຎ຺ຎາ ປຏິຠານປຏິສມ຺ຠິເທ ຎາຓໍ. ອຕ຺ຖວິໂຣຈເນ ປຎ຺ຎາ ອຕ຺ຖປຏິສມ຺ຠິເທ ຎາຓໍ, ຘມ຺ມວິໂຣຈເນ ປຎ຺ຎາ ຘມ຺ມປຏິສມ຺ຠິເທ ຎາຓໍ, ນິຣຸຕ຺ຕິວິໂຣຈເນ ປຎ຺ຎາ ນິຣຸຕ຺ຕິປຏິສມ຺ຠິເທ ຎາຓໍ, ປຏິຠານວິໂຣຈເນ ປຎ຺ຎາ ປຏິຠານປຏິສມ຺ຠິເທ ຎາຓໍ. ອຕ຺ຖປ຺ປກາສເນ ປຎ຺ຎາ ອຕ຺ຖປຏິສມ຺ຠິເທ ຎາຓໍ, ຘມ຺ມປ຺ປກາສເນ ປຎ຺ຎາ ຘມ຺ມປຏິສມ຺ຠິເທ ຎາຓໍ, ນິຣຸຕ຺ຕິປ຺ປກາສເນ ປຎ຺ຎາ ນິຣຸຕ຺ຕິປຏິສມ຺ຠິເທ ຎາຓໍ, ປຏິຠານປ຺ປກາສເນ ປຎ຺ຎາ ປຏິຠານປຏິສມ຺ຠິເທ ຎາຓໍ. ຕໍ ຎາຕຏ຺ເຐນ ຎາຓໍ, ປຊານນຏ຺ເຐນ ປຎ຺ຎາ. ເຕນ ວຸຈ຺ຈຕິ – ‘‘ອຕ຺ຖປຏິສມ຺ຠິເທ ຎາຓໍ, ຘມ຺ມປຏິສມ຺ຠິເທ ຎາຓໍ, ນິຣຸຕ຺ຕິປຏິສມ຺ຠິເທ ຎາຓໍ, ປຏິຠານປຏິສມ຺ຠິເທ ຎາຓໍ’’.

ສຸທ຺ຘິກປຏິສມ຺ຠິທາຎາຓນິທ຺ເທໂສ ສຕ຺ຕສຏ຺ຐິໂມ.