໕໖-໖໓. ສຈ຺ຈຎາຓຈຕຸກ຺ກທ຺ວຍນິທ຺ເທໂສ

໑໐໘. ກຖໍ ປຣິຎ຺ຎຏ຺ເຐ ປຎ຺ຎາ ທຸກ຺ເຂ ຎາຓໍ, ປຫານຏ຺ເຐ ປຎ຺ຎາ ສມຸທເຍ ຎາຓໍ, ສຈ຺ຉິກິຣິຍຏ຺ເຐ ປຎ຺ຎາ ນິໂຣເຘ ຎາຓໍ, ຠາວນຏ຺ເຐ ປຎ຺ຎາ ມຄ຺ເຄ ຎາຓໍ? ທຸກ຺ຂສ຺ສ ປີຬນຏ຺ໂຐ ສງ຺ຂຕຏ຺ໂຐ ສນ຺ຕາປຏ຺ໂຐ ວິປຣິຓາມຏ຺ໂຐ ປຣິຎ຺ຎາຕຏ຺ໂຐ; ສມຸທຍສ຺ສ ອາຍູຫນຏ຺ໂຐ ນິທານຏ຺ໂຐ ສຎ຺ໂຎຄຏ຺ໂຐ ປລິໂພຘຏ຺ໂຐ ປຫານຏ຺ໂຐ; ນິໂຣຘສ຺ສ ນິສ຺ສຣຓຏ຺ໂຐ ວິເວກຏ຺ໂຐ ອສງ຺ຂຕຏ຺ໂຐ ອມຕຏ຺ໂຐ ສຈ຺ຉິກິຣິຍຏ຺ໂຐ; ມຄ຺ຄສ຺ສ ນິຍ຺ຍານຏ຺ໂຐ ເຫຕຸຏ຺ໂຐ ທສ຺ສນຏ຺ໂຐ ອາຘິປເຕຍ຺ຍຏ຺ໂຐ ຠາວນຏ຺ໂຐ. ຕໍ ຎາຕຏ຺ເຐນ ຎາຓໍ, ປຊານນຏ຺ເຐນ ປຎ຺ຎາ. ເຕນ ວຸຈ຺ຈຕິ – ‘‘ປຣິຎ຺ຎຏ຺ເຐ ປຎ຺ຎາ ທຸກ຺ເຂ ຎາຓໍ, ປຫານຏ຺ເຐ ປຎ຺ຎາ ສມຸທເຍ ຎາຓໍ, ສຈ຺ຉິກິຣິຍຏ຺ເຐ ປຎ຺ຎາ ນິໂຣເຘ ຎາຓໍ, ຠາວນຏ຺ເຐ ປຎ຺ຎາ ມຄ຺ເຄ ຎາຓໍ’’.

໑໐໙. ກຖໍ ທຸກ຺ເຂ ຎາຓໍ, ທຸກ຺ຂສມຸທເຍ ຎາຓໍ, ທຸກ຺ຂນິໂຣເຘ ຎາຓໍ, ທຸກ຺ຂນິໂຣຘຄາມິນິຍາ ປຏິປທາຍ ຎາຓໍ? ມຄ຺ຄສມງ຺ຄິສ຺ສ ຎາຓໍ ທຸກ຺ເຂ ເປຕໍ ຎາຓໍ, ທຸກ຺ຂສມຸທເຍ ເປຕໍ ຎາຓໍ, ທຸກ຺ຂນິໂຣເຘ ເປຕໍ ຎາຓໍ, ທຸກ຺ຂນິໂຣຘຄາມິນິຍາ ປຏິປທາຍ ເປຕໍ ຎາຓໍ.

ຕຕ຺ຖ ກຕມໍ ທຸກ຺ເຂ ຎາຓໍ? ທຸກ຺ຂໍ ອາຣພ຺ຠ ຍາ ອຸປ຺ປຊ຺ຊຕິ ປຎ຺ຎາ ປຊານນາ ວິຈໂຍ ປວິຈໂຍ ຘມ຺ມວິຈໂຍ ສລ຺ລກ຺ຂຓາ ອຸປລກ຺ຂຓາ ປຈ຺ຈຸປລກ຺ຂຓາ ປຓ຺ຑິຈ຺ຈໍ ໂກສລ຺ລໍ ເນປຸຎ຺ຎໍ ເວຠພ຺ຍາ ຈິນ຺ຕາ ອຸປປຣິກ຺ຂາ ຠູຣິ ເມຘາ ປຣິຓາຍິກາ ວິປສ຺ສນາ ສມ຺ປຊຎ຺ຎໍ ປໂຕໂທ ປຎ຺ຎາ ປຎ຺ຎິນ຺ທ຺ຣິຍໍ ປຎ຺ຎາພລໍ ປຎ຺ຎາສຕ຺ຖໍ ປຎ຺ຎາປາສາໂທ ປຎ຺ຎາອາໂລໂກ ປຎ຺ຎາໂອຠາໂສ ປຎ຺ຎາປຊ຺ໂຊໂຕ ປຎ຺ຎາຣຕນໍ ອໂມໂຫ ຘມ຺ມວິຈໂຍ ສມ຺ມາທິຏ຺ຐິ – ອິທໍ ວຸຈ຺ຈຕິ ທຸກ຺ເຂ ຎາຓໍ. ທຸກ຺ຂສມຸທຍໍ ອາຣພ຺ຠ…ເປ… ທຸກ຺ຂນິໂຣຘໍ ອາຣພ຺ຠ…ເປ… ທຸກ຺ຂນິໂຣຘຄາມິນິໍ ປຏິປທໍ ອາຣພ຺ຠ ຍາ ອຸປ຺ປຊ຺ຊຕິ ປຎ຺ຎາ ປຊານນາ…ເປ… ອໂມໂຫ ຘມ຺ມວິຈໂຍ ສມ຺ມາທິຏ຺ຐິ – ອິທໍ ວຸຈ຺ຈຕິ ທຸກ຺ຂນິໂຣຘຄາມິນິຍາ ປຏິປທາຍ ຎາຓໍ. ຕໍ ຎາຕຏ຺ເຐນ ຎາຓໍ, ປຊານນຏ຺ເຐນ ປຎ຺ຎາ. ເຕນ ວຸຈ຺ຈຕິ – ‘‘ທຸກ຺ເຂ ຎາຓໍ, ທຸກ຺ຂສມຸທເຍ ຎາຓໍ, ທຸກ຺ຂນິໂຣເຘ ຎາຓໍ, ທຸກ຺ຂນິໂຣຘຄາມິນິຍາ ປຏິປທາຍ ຎາຓໍ’’.

ສຈ຺ຈຎາຓຈຕຸກ຺ກທ຺ວຍນິທ຺ເທໂສ ເຕສຏ຺ຐິໂມ.