໕໑. ໂສຕຘາຕຸວິສຸທ຺ຘິຎາຓນິທ຺ເທໂສ

໑໐໓. ກຖໍ ວິຕກ຺ກວິປ຺ຜາຣວເສນ ນານຕ຺ເຕກຕ຺ຕສທ຺ທນິມິຕ຺ຕານໍ ປຣິໂຍຄາຫເຓ ປຎ຺ຎາ ໂສຕຘາຕຸວິສຸທ຺ຘິຎາຓໍ? ອິຘ ຠິກ຺ຂຸ ຉນ຺ທສມາຘິ…ເປ… ວີຣິຍສມາຘິ… ຈິຕ຺ຕສມາຘິ… ວີມໍສາສມາຘິປຘານສງ຺ຂາຣສມນ຺ນາຄຕໍ ອິທ຺ຘິປາທໍ ຠາເວຕິ. ໂສ ອິເມສຸ ຈຕູສຸ ອິທ຺ຘິປາເທສຸ ຈິຕ຺ຕໍ ປຣິຠາເວຕິ ປຣິທເມຕິ, ມຸທຸໍ ກໂຣຕິ ກມ຺ມນິຍໍ. ໂສ ອິເມສຸ ຈຕູສຸ ອິທ຺ຘິປາເທສຸ ຈິຕ຺ຕໍ ປຣິຠາເວຕ຺ວາ ປຣິທເມຕ຺ວາ, ມຸທຸໍ ກຣິຕ຺ວາ ກມ຺ມນິຍໍ ທູເຣປິ ສທ຺ທານໍ ສທ຺ທນິມິຕ຺ຕໍ ມນສິ ກໂຣຕິ, ສນ຺ຕິເກປິ ສທ຺ທານໍ ສທ຺ທນິມິຕ຺ຕໍ ມນສິ ກໂຣຕິ, ໂອຬາຣິການມ຺ປິ ສທ຺ທານໍ ສທ຺ທນິມິຕ຺ຕໍ ມນສິ ກໂຣຕິ, ສຸຂຸມານມ຺ປິ ສທ຺ທານໍ ສທ຺ທນິມິຕ຺ຕໍ ມນສິ ກໂຣຕິ, ສຓ຺ຫສຓ຺ຫານມ຺ປິ ສທ຺ທານໍ ສທ຺ທນິມິຕ຺ຕໍ ມນສິ ກໂຣຕິ, ປຸຣຕ຺ຖິມາຍປິ ທິສາຍ ສທ຺ທານໍ ສທ຺ທນິມິຕ຺ຕໍ ມນສິ ກໂຣຕິ, ປຈ຺ຉິມາຍປິ ທິສາຍ ສທ຺ທານໍ ສທ຺ທນິມິຕ຺ຕໍ ມນສິ ກໂຣຕິ, ອຸຕ຺ຕຣາຍປິ ທິສາຍ ສທ຺ທານໍ ສທ຺ທນິມິຕ຺ຕໍ ມນສິ ກໂຣຕິ, ທກ຺ຂິຓາຍປິ ທິສາຍ ສທ຺ທານໍ ສທ຺ທນິມິຕ຺ຕໍ ມນສິ ກໂຣຕິ, ປຸຣຕ຺ຖິມາຍປິ ອນຸທິສາຍ ສທ຺ທານໍ ສທ຺ທນິມິຕ຺ຕໍ ມນສິ ກໂຣຕິ, ປຈ຺ຉິມາຍປິ ອນຸທິສາຍ ສທ຺ທານໍ ສທ຺ທນິມິຕ຺ຕໍ ມນສິ ກໂຣຕິ, ອຸຕ຺ຕຣາຍປິ ອນຸທິສາຍ ສທ຺ທານໍ ສທ຺ທນິມິຕ຺ຕໍ ມນສິ ກໂຣຕິ, ທກ຺ຂິຓາຍປິ ອນຸທິສາຍ ສທ຺ທານໍ ສທ຺ທນິມິຕ຺ຕໍ ມນສິ ກໂຣຕິ, ເຫຏ຺ຐິມາຍປິ ທິສາຍ ສທ຺ທານໍ ສທ຺ທນິມິຕ຺ຕໍ ມນສິ ກໂຣຕິ, ອຸປຣິມາຍປິ ທິສາຍ ສທ຺ທານໍ ສທ຺ທນິມິຕ຺ຕໍ ມນສິ ກໂຣຕິ. ໂສ ຕຖາຠາວິເຕນ ຈິຕ຺ເຕນ ປຣິສຸທ຺ເຘນ ປຣິໂຍທາເຕນ ໂສຕຘາຕຸວິສຸທ຺ຘິຎາຓາຍ ຈິຕ຺ຕໍ ອຠິນີຫຣຕິ ອຠິນິນ຺ນາເມຕິ. ໂສ ທິພ຺ພາຍ ໂສຕຘາຕຸຍາ ວິສຸທ຺ຘາຍ ອຕິກ຺ກນ຺ຕມານຸສິກາຍ ອຸໂຠ ສທ຺ເທ ສຸຓາຕິ – ທິພ຺ເພ ຈ ມານຸເສ ຈ ເຍ ທູເຣ ສນ຺ຕິເກ ຈ. ຕໍ ຎາຕຏ຺ເຐນ ຎາຓໍ, ປຊານນຏ຺ເຐນ ປຎ຺ຎາ. ເຕນ ວຸຈ຺ຈຕິ – ‘‘ວິຕກ຺ກວິປ຺ຜາຣວເສນ ນານຕ຺ເຕກຕ຺ຕສທ຺ທນິມິຕ຺ຕານໍ ປຣິໂຍຄາຫເຓ ປຎ຺ຎາ ໂສຕຘາຕຸວິສຸທ຺ຘິຎາຓໍ’’.

ໂສຕຘາຕຸວິສຸທ຺ຘິຎາຓນິທ຺ເທໂສ ເອກປຎ຺ຎາສໂມ.